ကျင်ယွန်းစီရင်စု ကောင်းကင်သိုင်းဂိုဏ်း ပေါ်ထွက်လာခြင်းသည်...

အရှေ့ပိုင်းဒေသတစ်ခုလုံးအတွက်မူ မည်သည့်လှိုင်းတံပိုးမျှ ထမလာခဲ့သော်လည်း၊ ကောင်းကင်သိုင်းဂိုဏ်း၏ ပတ်ဝန်းကျင် မိုင်တစ်ထောင်အတွင်းရှိ နယ်မြေများအတွက်မူ ဂိုဏ်းသစ်တစ်ခု ပေါ်ပေါက်လာခြင်းမှာ အများအပြား၏ အာရုံစိုက်မှုကို ခံခဲ့ရသည်။

ကောင်းကင်သိုင်းဂိုဏ်း တည်ရှိမှုကို သိရှိသွားသည့်အခါ ဂိုဏ်းအင်အားစုအများအပြားမှာ အံ့အားသင့်သွားကြသည်။

"ဒီမှာ ကောင်းကင်သိုင်းဂိုဏ်းဆိုတာ ဘယ်တုန်းက ပေါ်လာတာလဲ"

"ကောင်းကင်သိုင်းတောင်... ငါ တစ်ခါမှတောင် မကြားဖူးဘူး"

ချင်းဖုန်းဂိုဏ်း၏ ဂိုဏ်းချုပ်မှာ မှင်သက်သွားရသည်။ ထိုစဉ် လက်အောက်မှ လူကြီးတစ်ဦးက ဝင်ရောက် သတိပေးစကား ပြောကြားလာသည်။

"သတင်းတွေအရတော့ ကောင်းကင်သိုင်းတောင်က မူလက 'လေနက်တောင်' လို့ လူသိများပြီး 'လေနက်ကျေးရွာ' က သိမ်းပိုက်ထားတာပါ။ နောက်ပိုင်းမှာ အစွမ်းထက်တဲ့ ပုဂ္ဂိုလ်တစ်ယောက်က လေနက်ကျေးရွာကို ဖျက်ဆီးပြီး အဲဒီဓားပြဂိုဏ်းကို အမြစ်ပြတ်ရှင်းလင်းခဲ့တယ်၊ အဲဒီနောက်မှာတော့ ကောင်းကင်သိုင်းတောင်လို့ အမည်ပြောင်းပြီး ဂိုဏ်းတစ်ခုကိုတောင် တည်ထောင်လိုက်တာပါ"

"လေနက်ကျေးရွာ..."

ချင်းဖုန်းဂိုဏ်းချုပ်၏ အမူအရာ ပြောင်းလဲသွားသည်။

"ငါမှတ်မိသလောက်ဆိုရင် လေနက်ကျေးရွာရဲ့ ခေါင်းဆောင်ဟာ နတ်ဘုရားပေါင်းစပ်ခြင်းနယ်ပယ် ခုနစ်ခုမြောက်အဆင့် ကျင့်ကြံသူ တစ်ယောက်ပဲ။ ဒါ့အပြင် ကျန်တဲ့အဖွဲ့ဝင်တွေရဲ့ အင်အားကလည်း မသေးဘူး။ ဒီလိုအင်အားစုကို ကောင်းကင်သိုင်းဂိုဏ်းက အကုန်ရှင်းပစ်နိုင်ခဲ့တယ်ဆိုရင် ဒီဂိုဏ်းက သာမန်တော့ မဟုတ်နိုင်ဘူး"

လေနက်ကျေးရွာသည် မိုင်ပေါင်းသောင်းချီသော ပတ်ဝန်းကျင်တွင် အတော်လေး နာမည်ဆိုးဖြင့် ကျော်ကြားသည်။ အကြောင်းမှာ နတ်ဘုရားပေါင်းစပ်ခြင်းနယ်ပယ် ခုနစ်ခုမြောက်အဆင့်ရှိသော ကျင့်ကြံသူတစ်ဦး ပိုင်ဆိုင်ထားခြင်းမှာ အခြားဂိုဏ်းများကြားတွင် သိသာထင်ရှားသော အင်အားတစ်ခုဖြစ်သောကြောင့် ဖြစ်သည်။

ချင်းဖုန်းဂိုဏ်းတွင်ပင် အသန်မာဆုံးသူမှာ ဂိုဏ်းချုပ်ကိုယ်တိုင်ဖြစ်ပြီး သူသည် နတ်ဘုရားပေါင်းစပ်ခြင်းနယ်ပယ် ငါးခုမြောက်အဆင့်မျှသာ ရှိသေးသည်။ ချင်းဖုန်းဂိုဏ်းတွင် အချို့သော လျှို့ဝှက်အင်အားများ ရှိနေဦးတော့၊ စစ်မှန်သော အစွမ်းအစအရဆိုလျှင် လေနက်ကျေးရွာနှင့် အဆင့်တူ သို့မဟုတ် အနည်းငယ် ပို၍ပင် အားနည်းပေလိမ့်မည်။

ထို့ကြောင့် လေနက်ကျေးရွာ အမြစ်ပြတ်သွားကြောင်း သိလိုက်ရသောအခါ ချင်းဖုန်းဂိုဏ်းချုပ်မှာ အတော်လေး တုန်လှုပ်သွားသည်။

"မြစ်ကို ဖြတ်ကူးလာတဲ့ နဂါးတစ်ကောင်ပဲ"

ဒါက သူ့ခေါင်းထဲကို ပထမဆုံး ဝင်လာတဲ့ အတွေးဖြစ်သည်။ မဟုတ်လျှင် အခြားတစ်ဖက်က ဘာကြောင့် လေနက်ကျေးရွာကို တိုက်ရိုက် ပစ်မှတ်ထားပါ့မည်နည်း။ ယခုအခါ လေနက်ကျေးရွာ ပျက်စီးသွားပြီ ဖြစ်သဖြင့် ကောင်းကင်သိုင်းဂိုဏ်း၏ အင်အားမှာ လေနက်ကျေးရွာထက် များစွာ သာလွန်ကြောင်း ညွှန်ပြနေသည်။

ထိုစဉ် ချင်းဖုန်းဂိုဏ်းမှ လူကြီးတစ်ဦးက တိုးတိုးလေး မေးမြန်းလိုက်သည်။ "ဂိုဏ်းချုပ်၊ ကျွန်တော်တို့ သူတို့ဆီကို သွားရောက်နှုတ်ဆက်ဖို့ လိုမလား"

"သွားရမှာပေါ့.. ဘာလို့ မသွားဘဲ နေမလဲ"

ချင်းဖုန်းဂိုဏ်းချုပ်က ရယ်မောလိုက်သည်။

"အခု ကျင်ယွန်းစီရင်စု ရဲ့ မိုင်တစ်သောင်းပတ်လည်မှာ ယွင်းရှန်ဂိုဏ်းက သြဇာကြီးနေတယ် သတင်းတွေအရဆိုရင် သူတို့က တာအိုနန်းတော်နယ်ပယ်ကို တက်လှမ်းတော့မယ်၊ ပြီးတော့ ကျင်ယွန်းစီရင်စုတစ်ခုလုံးကို စည်းလုံးသိမ်းပိုက်ဖို့ ရည်ရွယ်ချက် ရှိနေကြတာ။ ကောင်းကင်သိုင်းဂိုဏ်းလို အင်အားစုအသစ် ပေါ်လာတာက အပြောင်းအလဲတချို့ သယ်ဆောင်လာနိုင်တယ်"

စကားအဆုံးတွင် ချင်းဖုန်းဂိုဏ်းချုပ်၏ အမူအရာမှာ ပို၍ လေးနက်သွားသည်။ အရှေ့ပိုင်းဒေသတွင် ပြည်နယ်ပေါင်း ၁၀၈ ခု ရှိသည်။ ပြည်နယ်တစ်ခုတွင် စီရင်စုပေါင်း ၃,၆၀၀ ရှိသည်။ ကျင်ယွန်းစီရင်စုမှာ သွေးနေမင်းပြည်နယ် အတွင်းရှိ သာမန်စီရင်စုလေးတစ်ခုသာ ဖြစ်ပြီး အင်အားမကြီးလှပေ။

သို့သော် လူရှိသည့်နေရာတွင် သိုင်းလောကရှိစမြဲ ဖြစ်သည်။ ကျင်ယွန်းစီရင်စုမှာ သေးငယ်သည်ဆိုသော်လည်း မိုင်ပေါင်းသောင်းချီ ကျယ်ဝန်းပြီး ဂိုဏ်းများစွာ ရှိသည်။ ၎င်းတို့အနက် ယွင်းရှန်ဂိုဏ်းမှာ အင်အားအကြီးဆုံး ဖြစ်သည်။

မူလက ယွင်းရှန်ဂိုဏ်းသည် အားကောင်းသော်လည်း အခြားဂိုဏ်းများနှင့် ကွာဟချက်မှာ ထိုမျှ မကြီးမားခဲ့ပေ။ အားလုံးမှာ အများဆုံး နတ်ဘုရားပေါင်းစပ်ခြင်းနယ်ပယ် ကျင့်ကြံသူများသာ ရှိကြရာ မည်မျှအထိ ပို၍ အစွမ်းထက်နိုင်မည်နည်း။ သို့သော် ပြဿနာမှာ နှစ်ပေါင်းများစွာအတွင်း ယွင်းရှန်ဂိုဏ်း၏ အုတ်မြစ်မှာ ပိုမိုခိုင်မာလာပြီး ၎င်းတို့ဂိုဏ်းမှ အစွမ်းထက်ကျင့်ကြံသူတစ်ဦး တာအိုနန်းတော်နယ်ပယ်သို့ တက်လှမ်းရန် ကြိုးပမ်းနေသည်ဟူသော ကောလာဟလများ ထွက်ပေါ်လာခြင်းဖြစ်သည်။

နတ်ဘုရားပေါင်းစပ်ခြင်းနယ်ပယ် ဂိုဏ်းစုများကြားတွင် တာအိုနန်းတော်နယ်ပယ် ကျင့်ကြံသူတစ်ဦး ရုတ်တရက် ထွက်ပေါ်လာခြင်းက မည်သို့သော ရလဒ်များ ဖြစ်လာမည်ကို မည်သူမဆို ခန့်မှန်းနိုင်သည်။ ထို့အပြင် ယွင်းရှန်ဂိုဏ်းသည် ကျင်ယွန်းစီရင်စုကို လွှမ်းမိုးလိုသည့် ရည်မှန်းချက် အမြဲရှိနေသဖြင့် ချင်းဖုန်းဂိုဏ်းအတွက် စိုးရိမ်စရာ ဖြစ်လာသည်။

အကယ်၍ ကျင်ယွန်းစီရင်စုရှိ အင်အားစုအားလုံး စည်းလုံးနိုင်လျှင် ယွင်းရှန်ဂိုဏ်းကို ရင်ဆိုင်ရန်မှာ ပြဿနာမဟုတ်သော်လည်း လူတိုင်းမှာ ကိုယ့်အကျိုးစီးပွားကိုယ် ကြည့်နေကြသဖြင့် သဲပွင့်များကဲ့သို့ လူစုကွဲနေကြသည်။ ယခု ကျင်ယွန်းစီရင်စုတွင် ကောင်းကင်သိုင်းဂိုဏ်း ဟု အမည်ရသော အဖွဲ့အစည်းတစ်ခု ရုတ်တရက် ပေါ်ထွက်လာခြင်းမှာ ချင်းဖုန်းဂိုဏ်းချုပ်၏ အာရုံကို ဖမ်းစားလိုက်ခြင်းဖြစ်သည်။

လေနက်ကျေးရွာကို အမြစ်ပြတ်ရှင်းနိုင်သည်ဆိုကတည်းက ကောင်းကင်သိုင်းဂိုဏ်းတွင် အနည်းဆုံး နတ်ဘုရားပေါင်းစပ်ခြင်းနယ်ပယ် ရှစ်ခုမြောက် သို့မဟုတ် ကိုးခုမြောက်အဆင့် ကျင့်ကြံသူတစ်ဦး ရှိနေနိုင်ခြေရှိသည်။ ထိုကဲ့သို့သော အင်အားစုနှင့် ချင်းဖုန်းဂိုဏ်းအနေဖြင့် မဟာမိတ်ဖြစ်ချင်သည်မှာ သဘာဝကျလှသည်။

"နောက်တစ်လမှာ ကောင်းကင်သိုင်းဂိုဏ်းက ဖွင့်ပွဲအခမ်းအနား ကျင်းပမယ်၊ ချင်းဖုန်းဂိုဏ်းက တိုက်ရိုက်သွားပြီး ဂုဏ်ပြုမှာပါ။ သူတို့နဲ့ မိတ်ဆွေမဖြစ်နိုင်ရင်တောင် အနည်းဆုံးတော့ အငြိုးအတေး မကျန်ခဲ့ဖို့ လိုတယ်။ ကျင်ယွန်းစီရင်စုရဲ့ အခြေအနေက မတည်ငြိမ်ဘူး၊ ချင်းဖုန်းဂိုဏ်းသာ သတိမထားရင် နှစ်ပေါင်းထောင်ချီတဲ့ ဒီမျိုးဆက်ဟာ ငါ့လက်ထက်မှာပဲ ပြတ်တောက်သွားနိုင်တယ်" ချင်းဖုန်းဂိုဏ်းချုပ်က သက်ပြင်းချလိုက်သည်။

...

ကောင်းကင်သိုင်းဂိုဏ်း ဖွင့်ပွဲသတင်းမှာ ကျင်ယွန်းစီရင်စုတစ်ခုလုံးကို အာရုံစိုက်လာစေသည်။ သာမန်ဂိုဏ်းတစ်ခုသာဆိုလျှင် ကိစ္စမရှိသော်လည်း ကောင်းကင်သိုင်းဂိုဏ်းသည် လေနက်ကျေးရွာကို နင်းခြေပြီး နာမည်ကျော်လာခြင်းဖြစ်ရာ အခြေအနေမှာ ကွဲပြားသွားသည်။

ဒါက ကောင်းကင်သိုင်းဂိုဏ်း၏ အစွမ်းထက်မှုကို ပြသနေခြင်းပင်။ ထို့ကြောင့် ယခုအခါ အင်အားစုအားလုံးမှာ ကောင်းကင်သိုင်းဂိုဏ်းဘက်သို့ အကြည့်ရောက်နေကြသည်။

ထိုစဉ် ဂိုဏ်းအတွင်း၌မူ...

လျှို့ဝှက်အစောင့်အရှောက်အဖြစ် အသွင်ယူထားသော လူကြီးတစ်ဦးက အဓိကနေရာတွင် ထိုင်နေသော ကုဝူ ကို ရိုသေစွာ လျှောက်တင်လိုက်သည်။

"ဂိုဏ်းချုပ်.. ကျင့်ကြံသူ အများအပြားဟာ အပြင်ကနေ ကျွန်တော်တို့ဂိုဏ်းကို တိတ်တဆိတ် စောင့်ကြည့်နေကြပါတယ်၊ တချို့ကတော့ ကောင်းကင်သိုင်းဂိုဏ်းကို အန္တရာယ်ပေးဖို့ ရည်ရွယ်ချက် ရှိနေပုံရပါတယ်"

"ဒါကို စိတ်ပူစရာမလိုဘူး၊ အားလုံးက ငါ့ရဲ့ တွက်ချက်မှုထဲမှာပဲ ရှိတယ်" ကုဝူက တည်ငြိမ်စွာ ပြုံးလိုက်သည်။

လေနက်ကျေးရွာကို နှိမ်နင်းပြီး ကောင်းကင်သိုင်းဂိုဏ်း တည်ထောင်ဖို့ ဆုံးဖြတ်ကတည်းက ကုဝူက ယခုအခြေအနေကို ထည့်သွင်းစဉ်းစားပြီးသားဖြစ်သည်။ အရှေ့ပိုင်းဒေသတွင် ပြည်နယ်ပေါင်း ၁၀၈ ခု ရှိရာ သွေးနေမင်းပြည်နယ်သည် သာမန်ပြည်နယ်တစ်ခုသာ ဖြစ်ပြီး၊ ၎င်းအတွင်းရှိ စီရင်စု ၃,၆၀၀ ထဲတွင်လည်း ကျင်ယွန်းစီရင်စုမှာ မထင်မရှားသော နေရာလေးတစ်ခုသာ ဖြစ်သည်။

ကောင်းကင်သိုင်းဂိုဏ်း တည်ထောင်ခြင်းကြောင့် ကျင်ယွန်းစီရင်စုတွင် ဆူပူလှုပ်ရှားမှု ဖြစ်လာဦးတော့၊ ၎င်းမှာ ဤမြေကွက်လပ်လေးပေါ်မှာတင် ဖြစ်နေခြင်းဖြစ်ရာ စစ်မှန်သော အင်အားကြီးအဖွဲ့အစည်းကြီးများ၏ အာရုံစိုက်မှုကို ခံရရန် ဖြစ်နိုင်ခြေနည်းပါးသည်။ ထို့ကြောင့် ကောင်းကင်သိုင်းဂိုဏ်း ဖြေရှင်းရမည့် တကယ့်ပြဿနာမှာ ကျင်ယွန်းစီရင်စုအတွင်းမှသာ ဖြစ်သည်။

"ဂိုဏ်းချုပ်.. ကျင်ယွန်းစီရင်စုရဲ့ သတင်းတွေကို စုံစမ်းဖို့ ခိုင်းထားတာ အခု အခြေအနေ ဘယ်လိုရှိပါသလဲ"