စကားပြောလို့မရလျှင် အသေသတ်ခြင်း (၂)

ထိုစဉ်မှာပင်...

ကောင်းကင်ယံ၌ ကျင့်ကြံသူများ ပျံသန်းလာသည်ကို မြင်လိုက်ရသည်။

"ကောင်းကင်သိုင်းဂိုဏ်း တံခါးဖွင့်လှစ်တယ်လို့ ကြားသိရလို့ ချင်းဖုန်းဂိုဏ်း က ရွှမ်ရွှီကျီ ကိုယ်တိုင် ဂုဏ်ပြုဖို့ ရောက်လာပါတယ်"

တောင်တံခါးရှေ့သို့ တာအိုဆရာတစ်ဦး ဆင်းသက်လာပြီး ကျယ်လောင်စွာ ကြေညာလိုက်သည်။ ထိုစကားကြောင့် လူအုပ်ကြီးမှာ လှုပ်လှုပ်ရှားရှား ဖြစ်သွားပြီး ရိုသေလေးစားသော မျက်လုံးများဖြင့် ကြည့်လိုက်ကြသည်။

"ကောင်းကင်သိုင်းဂိုဏ်းက အရှိန်အဝါ တကယ်ကြီးတာပဲ၊ ချင်းဖုန်းဂိုဏ်းချုပ်ကိုယ်တိုင် လာလိမ့်မယ်လို့ မထင်ထားဘူး"

"ချင်းဖုန်းဂိုဏ်းက နှစ်ပေါင်းထောင်ချီ သက်တမ်းရှိတာ၊ ရွှမ်ရွှီကျီဆိုရင် နတ်ဘုရားပေါင်းစပ်ခြင်းနယ်ပယ် ငါးခုမြောက်အဆင့်ရှိတဲ့ အစွမ်းထက်ပုဂ္ဂိုလ်ပဲ"

နတ်ဘုရားပေါင်းစပ်ခြင်းနယ်ပယ် ငါးခုမြောက်အဆင့်ဆိုသည်မှာ ကျင်ယွန်းစီရင်စုတွင် အလွန်အစွမ်းထက်သည်ဟု သတ်မှတ်နိုင်သည်။ ဂိုဏ်းချုပ်ကိုယ်တိုင် လာရောက်လိမ့်မည်ဟု မည်သူမျှ မထင်ထားခဲ့ပေ။

"ဂိုဏ်းချုပ်ရွှမ်ရွှီကျီ.. ကြိုဆိုဖို့ နောက်ကျသွားတဲ့အတွက် တောင်းပန်ပါတယ်" ကုဝူပေါ်လာပြီး ပြုံးရွှင်စွာ နှုတ်ဆက်လိုက်သည်။ သူသည် ချင်းဖုန်းဂိုဏ်းအကြောင်း သတင်းများ ကြိုတင်စုဆောင်းထားပြီးသား ဖြစ်သည်။

"ဂိုဏ်းချုပ်ကုကို တွေ့ရတာ ဝမ်းသာပါတယ်"

ရွှမ်ရွှီကျီသည်လည်း ယဉ်ကျေးစွာ လက်အုပ်ချီ နှုတ်ဆက်လိုက်သည်။ ကုဝူကို မြင်လိုက်ရသည့် ခဏမှာပင် သူ၏ ကိုယ်ခန္ဓာအတွင်းမှ ထွက်ပေါ်နေသော ကြီးမားလှသည့် အသက်ဓာတ်စွမ်းအားများကြောင့် ရွှမ်ရွှီကျီ ဖိအားများစွာ ခံစားလိုက်ရသည်။ ဤမျှ ဖိအားပေးနိုင်သည်ဆိုလျှင် ရှစ်ခုမြောက်အဆင့်ထက်မကဘဲ ကိုးခုမြောက်အဆင့်ကို ရောက်ရှိနေသည့် ထိပ်တန်းကျွမ်းကျင်သူ ဖြစ်ရမည်ဟု သူ တွက်ဆလိုက်မိသည်။

ကျင်ယွန်းစီရင်စု၏ ထိပ်တန်း (၁၀) ဦးစာရင်းတွင် သေချာပေါက် ပါဝင်နိုင်သူဖြစ်သည်။

မကြာမီ အခြားသော အစွမ်းထက် အရှိန်အဝါများလည်း တစ်ခုပြီးတစ်ခု ရောက်ရှိလာကြသည်။

" ချီမြစ်ဂိုဏ်းက ယန်ဟဲဂုဏ်ပြုဖို့ ရောက်ရှိပါတယ်"

" နေမင်းသုံးပါးဂိုဏ်းက ချင်းယန်ကျီရောက်ရှိပါတယ်"

" နတ်ဘုရားတံဆိပ်တောင်က ရှယွန်းချွမ်းရောက်ရှိပါတယ်..."

ရောက်ရှိလာသူ တစ်ဦးချင်းစီ၏ အမည်ကို ကြားရတိုင်း ကျင့်ကြံသူများမှာ အံ့အားသင့်နေကြသည်။ နေမင်းသုံးပါးဂိုဏ်းချုပ် ချင်းယန်ကျီမှာ ခုနစ်ခုမြောက်အဆင့်ဖြစ်ပြီး၊ နတ်ဘုရားတံဆိပ်တောင်မှ ရှယွန်းချွမ်းမှာ ရှစ်ခုမြောက်အဆင့် ဖြစ်သည်။ ပို၍ အရေးကြီးသည်မှာ နတ်ဘုရားတံဆိပ်တောင်တွင် ကိုးခုမြောက်အဆင့်ရှိသူ တစ်ဦး ရှိနေသေးခြင်းပင်။ ၎င်းမှာ ကျင်ယွန်းစီရင်စု၏ ထိပ်တန်းဂိုဏ်းကြီးများထဲမှ တစ်ခုဖြစ်သည်။

ရှယွန်းချွမ်းသည် အလယ်အလတ်အရွယ် ပညာရှိတစ်ဦးနှင့်တူပြီး အမြဲတမ်း ပြုံးနေတတ်သည်။ သို့သော် ကျင်ယွန်းစီရင်စု၏ ထိပ်တန်း (၁၀) ဂိုဏ်းထဲမှ တစ်ခုကို ဦးဆောင်နေသူဖြစ်ရာ မည်သူမျှ သူ့ကို လျှော့မတွက်ရဲကြပေ။

"ဂိုဏ်းချုပ်ရှ" ကုဝူက ရှယွန်းချွမ်းကို နှုတ်ဆက်လိုက်သည်။ ရှစ်ခုမြောက်အဆင့်ရှိသူဖြစ်သဖြင့် ကုဝူအနေဖြင့် အလေးထားဆက်ဆံရမည်ဖြစ်သည်။

ရှယွန်းချွမ်းက ကုဝူကို ကြည့်ကာ "ဂိုဏ်းချုပ်ကုကို လူကိုယ်တိုင် တွေ့ရတာ သတင်းကြားတာထက် ပိုထူးခြားပါတယ်။ လေနက်ကျေးရွာဟာ ကျင်ယွန်းစီရင်စုမှာ နှစ်ပေါင်းများစွာ ဒုက္ခပေးနေခဲ့တာ၊ ဘယ်သူမှ မနှိမ်နင်းနိုင်ခဲ့ဘူး။ အခု ဂိုဏ်းချုပ်ကုက သူတို့ကို အမြစ်ပြတ်ရှင်းလင်းလိုက်တာဟာ အားလုံးအတွက် လမ်းသစ်ဖောက်ပေးလိုက်တာပါပဲ" ဟု ချီးကျူးစကား ဆိုလိုက်သည်။

ထို့နောက် ကုဝူက ဧည့်သည်များအတွက် ပြင်ဆင်ထားသော နေရာများသို့ ဖိတ်ကြားလိုက်သည်။ "ဒီနေ့ ကောင်းကင်သိုင်းဂိုဏ်းက တပည့်သစ်တွေ လက်ခံမှာပါ၊ အားလုံး လာရောက်ပေးကြတာ ဂုဏ်ယူမိပါတယ်။ ကျေးဇူးပြုပြီး နေရာယူကြပါဦး၊ ဒီအခမ်းအနားပြီးရင် အားလုံးကို ကောင်းကောင်း ဧည့်ခံပါ့မယ်"

ဂိုဏ်းချုပ်များသည် နေရာယူလိုက်ကြပြီး တပည့်သစ်ခေါ်ယူမှုကို စောင့်ကြည့်နေကြသည်။ ကုဝူသည် မူလနေရာတွင် ထိုင်နေသော်လည်း တည်ငြိမ်နေသည်။ သူသည် ယွင်းရှန်ဂိုဏ်း ရောက်လာမည့်အချိန်ကို စောင့်နေခြင်းဖြစ်သည်။

တပည့်သစ်ခေါ်ယူမှု ပြီးခါနီးအထိ ယွင်းရှန်ဂိုဏ်း ပေါ်မလာသဖြင့် ကုဝူ အံ့ဩနေစဉ်မှာပင်... ထိတ်လန့်ဖွယ်ရာ အရှိန်အဝါတစ်ခု ကောင်းကင်ယံမှ ဆင်းသက်လာသည်။ ဂိုဏ်းချုပ်များအားလုံး မျက်နှာပျက်သွားကြသော်လည်း ကုဝူ၏ မျက်နှာပေါ်တွင်မူ အပြုံးတစ်ခု ပေါ်လာသည်။

"သူတို့ ရောက်လာပြီ"

ကျင့်ကြံသူ ဒါဇင်ပေါင်းများစွာ ကောင်းကင်မှ ပျံဆင်းလာကြသည်။ အားလုံးမှာ နတ်ဘုရားပေါင်းစပ်ခြင်းနယ်ပယ်ထဲသို့ ရောက်ရှိနေကြသူများ ဖြစ်သည်။ အရှေ့ဆုံးမှ ဦးဆောင်လာသူမှာ လင်းယုန်မျက်လုံးနှင့် ဝံပုလွေပုံသဏ္ဍာန်ရှိသော အလယ်အလတ်အရွယ် ကျင့်ကြံသူဖြစ်ပြီး သူ၏ အကြည့်များမှာ စူးရှလှသည်။

ရှယွန်းချွမ်းနှင့် အခြားသူများမှာ မျက်နှာထား တင်းမာသွားကြသည်။ "ဖူရှန် "

ဖူရှန်သည် ကုဝူကို အပေါ်ယံအပြုံးဖြင့် နှုတ်ဆက်လိုက်သည်။ "ကောင်းကင်သိုင်းဂိုဏ်း ဖွင့်ပွဲကို ယွင်းရှန်ဂိုဏ်းက အနည်းငယ် နောက်ကျပြီးမှ ရောက်လာတယ်၊ ဂိုဏ်းချုပ်ကု စိတ်မရှိဘူးလို့ မျှော်လင့်ပါတယ်"

"ဂိုဏ်းချုပ်ဖူ လာရောက်တာဟာ ကျွန်တော့်အတွက် ဝမ်းသာစရာပါပဲ၊ ဘယ်လိုလုပ် စိတ်ဆိုးနိုင်ပါ့မလဲ" ကုဝူကလည်း အပြုံးဖြင့် ပြန်ပြောသော်လည်း သူ၏ နေရာမှ ထ၍ မနှုတ်ဆက်ပေ။

ထိုသို့ မလေးမစား လုပ်ရပ်ကြောင့် ဖူရှန်၏ မျက်မှောင်မှာ အနည်းငယ် ကြုတ်သွားသည်။ ထိုစဉ် ဖူရှန်၏ နောက်မှ ယွင်းရှန်ဂိုဏ်း လူကြီးတစ်ဦးက ဒေါသတကြီး ကြိမ်းမောင်းလိုက်သည်။ "ငါတို့ ယွင်းရှန်ဂိုဏ်းချုပ် ကိုယ်တိုင်လာတာကို ကောင်းကင်သိုင်းဂိုဏ်းက ဒီလိုပဲ မလေးမစား ဆက်ဆံတာလား"

"မင်းက ဘယ်သူလဲ" ကုဝူ၏ အပြုံးများ ပျောက်ကွယ်သွားပြီး ထိုသူကို စိုက်ကြည့်လိုက်သည်။

ထိုသူက ဂုဏ်ယူစွာဖြင့် "ငါ့နာမည်က ဝမ်ဟူ၊ ယွင်းရှန်ဂိုဏ်းရဲ့ အကြီးအကဲတစ်ယောက်ပဲ"

ဝမ်ဟူ စကားမဆုံးခင်မှာပင် ထိတ်လန့်ဖွယ် ဓားအလင်းတန်းတစ်ခု လေထုကို ဖြတ်သန်းသွားသည်။ ခဏချင်းမှာပင် ဝမ်ဟူ၏ ခန္ဓာကိုယ်မှာ နှစ်ပိုင်းပြတ်သွားပြီး သွေးများ ကောင်းကင်သိုင်းဂိုဏ်းအတွင်း စင်ထွက်သွားတော့သည်။

ဤရုတ်တရက် အပြောင်းအလဲကြောင့် လူတိုင်း ထိတ်လန့်သွားကြသည်။ ဖူရှန်သာမက ရှယွန်းချွမ်းနှင့် အခြားသူများပါ ကုဝူ၏ လုပ်ရပ်ကြောင့် မှင်သက်သွားကြသည်။ ဘာဖြစ်တာလဲ။ စကားတစ်ခွန်းမှ မပြောဘဲ တန်းသတ်လိုက်တာလား။ ဝမ်ဟူသည် ငါးခုမြောက်အဆင့်ရှိသူ ဖြစ်သော်လည်း ကုဝူ၏ ဓားချက်တစ်ချက်တည်းဖြင့် ကျဆုံးသွားရသည်။

အားလုံး သတိပြန်ဝင်လာချိန်တွင် ဝမ်ဟူ သေဆုံးသွားပြီဖြစ်သည်။ ယွင်းရှန်ဂိုဏ်းက ဤကိစ္စကို ဒီအတိုင်း လွှတ်ထားမည်မဟုတ်ပေ။ အခြားဂိုဏ်းများသည် ယွင်းရှန်ဂိုဏ်းကို ခုခံရန် မဟာမိတ်ဖွဲ့လိုကြသော်လည်း ယခုကဲ့သို့ တိုက်ရိုက် စိန်ခေါ်ရန်မှာ မမျှော်လင့်ထားကြပေ။

"ရူးသွားပြီလား" ရွှမ်ရွှီကျီမှာ စိတ်ထဲမှ အော်ဟစ်နေမိသည်။ ကောင်းကင်သိုင်းဂိုဏ်းချုပ်က ဤမျှ ကြမ်းတမ်းပြီး သဘောထားမတိုက်ဆိုင်သည်နှင့် သတ်ပစ်လိမ့်မည်ဟု သူ မထင်ထားခဲ့ပေ။ အခုတော့ ယွင်းရှန်ဂိုဏ်းနှင့် ထိပ်တိုက်တွေ့ဆုံမှုမှာ ရှောင်လွှဲ၍ မရတော့ပေ။

"ဝုန်း"

ဖူရှန်၏ ကိုယ်မှ ထိတ်လန့်ဖွယ် လူသတ်လိုသော အရှိန်အဝါများ ပေါက်ကွဲထွက်လာသည်။ သူသည် ကုဝူကို စိုက်ကြည့်ရင်း ဒေါသတကြီး ပြောလိုက်သည်။

"ဂိုဏ်းချုပ်ကု.. မင်း ငါတို့ ယွင်းရှန်ဂိုဏ်းရဲ့ အကြီးအကဲတစ်ယောက်ကို သတ်လိုက်တယ်၊ တကယ်လို့ မင်းဘက်က သင့်တော်တဲ့ ရှင်းလင်းချက် မပေးနိုင်ဘူးဆိုရင် ဒီနေ့ကိစ္စဟာ ငြိမ်းငြိမ်းချမ်းချမ်း ပြီးဆုံးမှာ မဟုတ်ဘူး"