အခန်း (၃၈)

စစ်မြေပြင်မှ ထာဝရရှင်သန်ခြင်းဆီသို့

အခန်း ၃၈

ဟန်နိုင်ငံ၊ ရှင်းကျန်းမြို့တော်။

ကြီးမားသော ခန်းမထဲတွင် လေထုက အလွန်လေးလံထိုင်းမှိုင်းနေသည်။

ဟန်ဘုရင်က ပလ္လင်ပေါ်တွင် ထိုင်နေပြီး သူ၏ ရှေ့တွင် ဝန်ကြီးချုပ်ကျန်းဖျင်နှင့် စစ်ရေးဝန်ကြီး ဟန်ဖေးတို့ ရှိနေကြသည်။

" ကျန်းဖျင်က လေးနက်စွာ ပြောလိုက်သည်။ " အားလုံးကို ပေးပို့ပြီးပါပြီ။ "

" အခြားနိုင်ငံအသီးသီးကိုလည်း ခွဲဝေပို့လိုက်ပါပြီ။ အများစုကို ချူးနိုင်ငံကို ပို့လိုက်ပါတယ်။ "

" စစ်သေနာပတိချုပ်လည်း တိုက်ပွဲမှာ ကျဆုံးသွားပြီ။ သူ့ရဲ့ နောက်ဆုံးစစ်ဗျူဟာကလည်း အလကားဖြစ်သွားခဲ့တယ်။ " ဟန်ဘုရင်က သက်ပြင်းချလိုက်သည်။

" စစ်ဗျူဟာအရဆို စစ်သေနာပတိချုပ်က အောင်မြင်ဖို့ အရမ်းနီးစပ်ခဲ့ပါတယ်။ " ကျန်းဖျင်ကလည်း သက်ပြင်းချလိုက်သည်။

" နှမြောစရာပဲ။ ချင်စစ်တပ်ရဲ့ ထောက်ပို့လမ်းကြောင်းကိုသာ ဖြတ်တောက်နိုင်ခဲ့ရင် ဟန်နိုင်ငံက စစ်ကူတွေ လာတဲ့အထိ ခုခံဖို့ အချိန်ရလိမ့်မယ်။ ဒါပေမယ့် အခုတော့ အသက်စွန့်ခုခံဖို့ကလွဲပြီး တခြားတည်းလမ်းမရှိတော့ဘူး။ "

" ဝမ်ကျန့်က ချင်နိုင်ငံရဲ့ အရည်အချင်းအရှိဆုံး စစ်သေနာပတိချုပ်ဆိုတဲ့ ဂုဏ်သတင်းနဲ့ တကယ်ပဲ ထိုက်တန်ပါတယ်။ " ဟန်ဖေးက ဖြည်းညင်းစွာ ပြောလိုက်သည်။ " စစ်သေနာပတိချုပ် ပေါင်ယွမ်က သူ့လက်ထဲမှာ ရှုံးနိမ့်သွားတာ အရှက်ရစရာမဟုတ်ပါဘူး။ "

" ဟန်ဖေး မင်းမှားနေပြီ။ ပေါင်ယွမ်ရဲ့ ရှုံးနိမ့်မှုက ဝမ်ကျန့်ရဲ့ လက်ချက်မဟုတ်ဘူး။ " ကျန်းဖျင်က ပြောလိုက်သည်။

" တခြားအကြောင်းရင်း ရှိသေးလို့လား။ " ဟန်ဖေးက အံ့ဩစွာ မေးလိုက်သည်။

" ပေါင်ယွမ်က ချင်နိုင်ငံရဲ့ ထောက်ပို့တပ်ဖွဲ့ရဲ့ လက်ထဲမှာ ရှုံးနိမ့်ခဲ့တာပါ။ " ကျန်းဖျင်က ခါးသီးစွာပြုံးရင်း အစီရင်ခံစာကို ဟန်ဖေးအား ပေးလိုက်သည်။

ဟန်ဖေးက အစီရင်ခံစာကို ဖတ်ပြီးနောက် သူ၏ အမူအရာက လေးနက်သွားသည်။

" ချင်နိုင်ငံက အဲ့လောက်တောင် ကြောက်ဖို့ ကောင်းတာလား။ ထောက်ပို့တပ်ဖွဲ့က စစ်သေနာပတိချုပ် ဦးဆောင်တဲ့ အထူးတပ်ဖွဲ့ကို တကယ်ပဲ တားဆီးနိုင်တာလား။ "

" အဲ့ဒါကြောင့် ချင်စစ်တပ်က သူ့ကို ဝိုင်းပြီး ချေမှုန်းခဲ့တာပေါ့။ " ဟန်ဖေးက စိတ်ပျက်စွာ ပြောလိုက်သည်။

ပေါင်းယွမ်က ဝမ်ကျန့်၏ လက်ထဲတွင် ရှုံးနိမ့်ခဲ့လျှင် သူက ယခုလောက်ထိ အံ့ဩမည်မဟုတ်ပေ။ သို့သော် ပေါင်ယွမ်က ထောက်ပို့တပ်ဖွဲ့ကို ရှုံးနိမ့်သွားခြင်းက ဟန်ဖေးအတွက် ယုံကြည်ရန် ခက်ခဲနေသည်။

" ချင်နိုင်ငံရဲ့ အင်အားက တကယ်ပဲ အဲ့ဒီအဆင့်ထိ ရောက်သွားပြီလား။ ထောက်ပို့တပ်ဖွဲ့ကတောင် ငါတို့ ဟန်နိုင်ငံရဲ့ အထူးတပ်ဖွဲ့ကို ယှဉ်နိုင်တာလား။ သူတို့က စစ်သည်တွေကို ဘယ်လိုများ လေ့ကျင့်ပေးထားတာလဲ။ " ဟန်ဖေးက လေးနက်စွာဖြင့် ပြောလိုက်သည်။

" ချင်နိုင်ငံရဲ့ ပြုပြင်ပြောင်းလဲမှုတွေက စစ်တပ်စွမ်းဆောင်မှုစနစ်ကြောင့်ပဲ။ " ကျန်းဖျင်က ဖြည်းညင်းစွာ ပြောလိုက်သည်။ " အဲ့ဒါက အဓိကသော့ချက်ပဲ။ "

ချင်နိုင်ငံက ထိုမျှထိ သန်မာလာခဲ့ခြင်းမှာ ပြုပြင်ပြောင်းလဲမှုများနှင့် စစ်တပ်စွမ်းဆောင်မှုစနစ်ကြောင့် ဖြစ်သည်။ သို့သော် ထိုပြုပြင်ပြောင်းလဲမှုများက ကြီးမားသော ခုခံမှုများနှင့် ကြုံတွေ့ခဲ့ရသည်။

ချင်ဘုရင်က မှူးမတ်ဟောင်းများအားလုံးကို ဆန့်ကျင်ပြီး ပြောင်းလဲမှုများအတွက် လူပေါင်းများစွာ အသက်စွန့်ခဲ့ရသည်။ သို့သော် အဆုံးတွင် ချင်နိုင်ငံက ထိုပြုပြင်ပြောင်းလဲမှုများကြောင့် ချင်နိုင်ငံက ပိုမိုသန်မာလာခြင်းဖြစ်သည်။

သို့သော် အခြားနိုင်ငံများ၏ မှူးမတ်များက သူတို့၏ အကျိုးစီးပွားကို ထိခိုက်မည့် ပြုပြင်ပြောင်းလဲမှုများကို ဘယ်တော့မှ ခွင့်မပြုခဲ့ပေ။

" တကယ်လို့ အဲ့ဒီတုန်းက ရှန်းပုဟိုင်ရဲ့ ပြုပြင်ပြောင်းလဲမှုတွေသာ အောင်မြင်ခဲ့ရင် ငါတို့ရဲ့ ဟန်နိုင်ငံကလည်း ချင်နိုင်ငံကို ယှဉ်နိုင်လိမ့်မယ်။ " ကျန်းဖျင်က နောင်တရစွာဖြင့် ပြောလိုက်သည်။

" မှန်တယ်။ တကယ်တော့ ရှန်းပုဟိုင်က အချိန်မှားပြီး မွေးဖွားလာတာပဲ။ " ဟန်ဘုရင်က ခေါင်းညိမ့်လိုက်သည်။ " သူသာ ငါ့လက်အောက်မှာ အမှုထမ်းခဲ့ရင် ငါ သူ့ကို အစွမ်းကုန်ထောက်ပံ့ပေးမှာပဲ။ "

၎င်းကို ကြားသောအခါ ဟန်ဖေးက စိတ်ထဲမှ သက်ပြင်းချလိုက်သည်။ ရှန်းပုဟိုင်၏ ပြုပြင်ပြောင်းလဲမှုများက ချင်နိုင်ငံနှင့် မတူပေ။ သူ၏ နည်းလမ်းများက ခဏသန်မာနိုင်သော်လည်း ရေရှည်မဟုတ်ပေ။

ချင်နိုင်ငံ၏ ပြုပြင်ပြောင်းလဲမှုများကသာ နိုင်ငံ၏ အင်အားကို အမှန်တကယ် သန်မာစေခြင်းဖြစ်သည်။ ချင်နိုင်ငံက မှူးမတ်များ၏ လက်ဝါးကြီးအုပ်မှုကို ဖြိုဖျက်ပြီး စစ်သည်များကို ရာထူးတက်ရန် အခွင့်အရေးပေးခဲ့ခြင်းဖြစ်သည်။ ထို့ကြောင့် ချင်နိုင်ငံ၏ စစ်သားများက သေမှာကို မကြောက်ရွံ့ပဲ တိုက်ခိုက်ကြခြင်းဖြစ်သည်။

ဥပဒေပညါရှင်တစ်ဦးအနေဖြင့် ဟန်ဖေးက ထိုပြုပြင်ပြောင်းလဲမှုများ၏ သဘာဝကို ရှင်းရှင်းလင်းလင်း မြင်နိုင်လေသည်။

" အရှင်မင်းကြီး " ကျန်းဖျင်က ဟန်ဘုရင်ကို ကြည့်လိုက်သည်။ " အခုတော့ တခြားရွေးချယ်စရာမရှိတော့ဘူး။ "

" ကျွန်တော်မျိုးတို့ အင်အားကြီးတပ်ဖွဲ့တွေ စုစည်းပြီး မြို့တော်ကို ကာကွယ်ရမယ်။ ပြီးတော့ ကျောက်နဲ့ ဝေနိုင်ငံက စစ်ကူတွေကို စောင့်ရမယ်။ ကျောက်ဘုရင်နဲ့ ဝေဘုရင်က သူတို့ရဲ့ စစ်တပ်တွေကို စုစည်းဖို့ ဆန္ဒရှိတယ်လို့ သတင်းရထားပါတယ်။ "

" သူတို့အခု ရိက္ခာတွေ စုဆောင်းနေကြပြီ။ ကျွန်တော်တို့ မြို့တော်ကို ကာကွယ်ထားနိုင်ရင် စစ်ကူတွေရောက်လာတဲ့အခါ ချင်စစ်တပ်ကို ပြန်တိုက်ထုတ်နိုင်မှာပါ။ "

" ဝန်ကြီးဟန် " ဟန်ဘုရင်က ဟန်ဖေးဘက်သို့ လှည့်လာသည်။ " ငါတို့မှာ သုံးနိုင်တဲ့ အင်အားဘယ်လောက်ရှိလဲ။ "

" တော်ဝင်တပ်ဖွဲ့အပါအဝင် ရှင်းကျန်းကို ကာကွယ်ဖို့ တပ်ဖွဲ့တွေအားလုံး စုလိုက်ရင် လူခုနှစ်သောင်းရှိပါတယ်။ " ဟန်ဖေးက ပြန်ဖြေလိုက်သည်။

" မြို့ထဲမှာရှိတဲ့ ကျွန်တွေနဲ့ မှူးမတ်တွေဆီက ကျွန်တွေကို စုစည်းလိုက်မယ်ဆိုရင်တော့ ရှစ်သောင်းကျော်အထိ ရှိလာနိုင်ပါတယ်။ ဒါပေမယ့် စုစည်းဖို့က အရှင်မင်းကြီးရဲ့ အမိန့်လိုပါတယ်။ "

" ငါတို့ ဟန်နိုင်ငံက အကျပ်အတည်းနဲ့ ရင်ဆိုင်နေရပြီ။ မြို့တော်ကို ကာကွယ်ဖို့ ကျွန်တွေကို စုစည်းရမယ့် တာဝန်ကို ဝန်ကြီးဟန်ကို တာဝန်ပေးတယ်။ ဘယ်သူမဆို ငြင်းဆန်ရဲရင် စစ်ဥပဒေနဲ့ အရေးယူစေ။ "

ထို့နောက် ဘုရင်က ကျန်းဖျင်ကို ကြည့်လိုက်သည်။ " ဝန်ကြီးကျန်း အရာရှိအားလုံးရဲ့ ခေါင်းဆောင်အနေနဲ့ သင်က စံပြဖြစ်အောင် လုပ်ရမယ်။ "

" စိတ်ချပါ အရှင်မင်းကြီး။ ကျွန်တော်မျိုး ဟန်နိုင်ငံနဲ့အတူ သေတူရှင်မကွာ ရှိနေမယ်လို့ သစ္စာပြုပါတယ်။ " ကျန်းဖျင်က ပြောလိုက်သည်။ " ကျွန်တော်မျိုး အိမ်တော်က ကျွန်နှစ်ထောင်ကိုလည်း မြို့တော်ကို ကာကွယ်ရေးမှာ အကုန်အသုံးပြုပါမယ်။ "

" ကောင်းပြီ။ " ဟန်ဘုရင်က ပြုံး၍ ပြောလိုက်သည်။ " ဝန်ကြီးက စံပြဖြစ်အောင် လုပ်ပြုလိုက်ပြီဆိုတော့ တခြားအရာရှိတွေအားလုံးလည်း နိုင်ငံတော်နဲ့အတူ ရပ်တည်ကြလိမ့်မယ်လို့ ငါယုံကြည်တယ်။ "

ဘေးတွင်ရပ်နေသော ဟန်ဖေးက တိတ်ဆိတ်နေသော်လည်း သူ၏ မျက်နှာပေါ်မှ စိုးရိမ်မှုများ ပေါ်နေသည်။

" ငါတို့ရဲ့ ဟန်နိုင်ငံက ကျောက်နဲ့ဝေက စစ်ကူတွေလာတဲ့အထိ ခုခံနိုင်ပါစေလို့ ဆုတောင်းရမှာပဲ။ ဒါမှမဟုတ် စစ်ကူတွေ မရောက်လာနိုင်တော့ဘူးလား။ "

ဟန်ဖေး၏ ရင်ထဲတွင် ခါးသီးမှုများနှင့် ပြည့်နှက်နေသည်။ သူ၏ အမြင်အရ စစ်ကူများ ရောက်လာရန် အခွင့်အရေးမရှိသလောက်ပင် ဖြစ်သည်။ ရောက်လာခဲ့လျှင်တောင် ချင်နိုင်ငံက တန်ပြန်စစ်ဗျူဟာများ ပြင်ဆင်ထားမည်မှာ သေချာလေသည်။

ဟန်နိုင်ငံ၏ ရှင်းကျန်းမြို့တော်နှင့် မိုင်ငါးဆယ်မဝေးသော နေရာတွင် ဟန်နိုင်ငံ၏ အုပ်ချုပ်မှုအောက်မှ မြို့ငယ်လေးတစ်မြို့ ရှိသည်။ မြို့ထဲတွင် ဟန်စစ်သားအနည်းငယ်က ချင်စစ်တပ်၏ ချီတက်မှုကို ဟန့်တားရန် မြားများဖြင့် ပစ်ခတ်နေကြသည်။

ဝုန်း...

ချင်းစစ်တပ်၏ အထူးတပ်ဖွဲ့က မြို့ရိုးအနီးသို့ ရောက်ရှိနေပြီဖြစ်ပြီး မြို့တံခါးဖျက်တူကြီးနှင့် မြို့တံခါးကို တစ်ချက်တည်း ဖျက်ဆီးသွားသည်။

" တပ်ဖွဲ့အားလုံး ငါ့အမိန့်ကို နာခံကြ။ သတ်ကြစမ်း။ " ချန်တောက်က သူ၏ ဓားကို ဆွဲထုတ်ပြီး မြို့ငယ်ဆီသို့ ညွှန်ပြလိုက်သည်။

ထိုအချိန်တွင် ထောင်ချီသော စစ်သားများက မြို့ခံတပ်ဆီသို့ အရှိန်အဟုန်ဖြင့် ပြေးဝင်သွားကြသည်။ ထိုမြို့ငယ်လေးက ချင်စစ်တပ်အတွက် ကြီးမားသော အတားအဆီး မဖြစ်နိုင်ပေ။ ချင်စစ်တပ်က မြို့ထဲသို့ ဝင်ရောက်သွားသည်နှင့် စစ်ပွဲ၏ ရလဒ်မှာ အဖြေထွက်သွားပြီဖြစ်သည်။

မြို့ထဲရှိ ဟန်စစ်သားများက ထိတ်လန့်တကြားနှင့် ဆုတ်ခွာနေကြသော်လည်း ချင်စစ်တပ်၏ လိုက်လံချေမှုန်းခြင်းကို ခံရလေသည်။ ပုံမှန်အတိုင်း ကျောက်ဖုန်းမှာလည်း သူတို့ထဲတွင် ပါဝင်နေသည်။

" သတ် " ကျောက်ဖုန်းကလည်း လုံချွမ်ဓားကို ဝှေ့ရမ်းပြီး အော်ဟစ်လိုက်သည်။

သူ၏ ရတနာလက်နက်နှင့် သာလွန်သော စွမ်းရည်များကြောင့် စစ်ရှုံးပြေးနေသော စစ်သားများက သူ့ကို တားဆီးနိုင်စွမ်း လုံးဝ မရှိပေ။

" ဟန်စစ်သားတစ်ယောက်ကို သတ်ဖြတ်ပြီး ခွန်အား ၅မှတ်ကို ရရှိပါတယ်။ "

" ဟန်စစ်သားတစ်ယောက်ကို သတ်ဖြတ်ပြီး အမြန်နှုန်း ၅မှတ် ရရှိပါတယ်။ "

" ဟန်စစ်သားတစ်ယောက်ကို သတ်ဖြတ်ပြီး သက်တမ်း ၅မှတ် ရရှိပါတယ်။ "

ကျောက်ဖုန်းက မြို့ထဲသို့ ပြေးဝင်ရင်း ရန်သူများကို အဆက်မပြတ် သတ်ဖြတ်နေပြီး သတ်သမျှ လူတိုင်း၏ စွမ်းရည်များကို ရရှိနေသည်။

" တပ်မမှူးနောက်ကို လိုက်ကြ။ သတ်ကြ။ "

ကျောက်ဖုန်း၏ နောက်မှ တပ်မှူးများနှင့် စစ်သည်များက စိတ်လှုပ်ရှားစွာဖြင့် ဟိန်းဟောက်ပြီး နောက်မှ လိုက်လံလိုက်ခိုက်ကြတော့သည်။ တစ်နာရီအတွင်း ချင်နိုင်ငံ၏ အလံကို မြို့ပေါ်၌ လွင့်ထူနိုင်ငံပြီး ထိုမြို့ငယ်လေးက ချင်နိုင်ငံ၏ သိမ်းပိုက်ခြင်းကို ခံလိုက်ရပြီဖြစ်သည်။

လမ်းမများပေါ်တွင် ဟန်စစ်သားများ၏ အလောင်းများက ပြန့်ကျဲနေပြီး အသက်ရှင်ကျန်ရစ်သူ မရှိတော့ပေ။

" တပ်မှူးချန် " ကျောက်ဖုန်းက ချန်တောက်အနားသို့ ချဉ်းကပ်ပြီး ပြောလိုက်သည်။ " ဒီဟန်မြို့လေးကို သိမ်းပိုက်နိုင်ခဲ့ပါပြီ။ "

" တပ်မမှူးကျောက် ဒီနေ့ မင်းရဲ့ ရဲစွမ်းသတ္တိကို မြင်တွေ့ခဲ့ရပါပြီ။ " ဝမ်ကျန့်၏တပ်မှ တပ်မှူးတစ်ယောက်က ပြုံး၍ ပြောလိုက်သည်။