ထူးဆန်းသော ဖုန်းခေါ်ဆိုမှု

စုန့်ရှောင်ချင်းသည် စားသောက်ဆိုင် ထွက်ခွာသွားခဲ့ပြီး သူမ မထွက်ခွာမီ ကျသင့်ငွေကို ရှင်းလင်းသွားခဲ့ပြီး ထိုသူဌေးမလေးသည် အခြားသူများအား ငွေပေးချေရန် အခွင့်အရေးကို အလွယ်တကူ ပေးလေ့မရှိပါပေ။

လုအန်းကျီသည် သက်ပြင်းတစ်ချက် ချလိုက်မိကာ သူ၏ လက်ရှိ အစီအစဉ်သည် တစ်ဖက်လူကို ပြင်းထန်သော ဒဏ်ရာရစေနိုင်ခြင်း မရှိဘဲ အနည်းငယ်မျှသာ ထိခိုက်စေနိုင်သည်ကို သူ သိထားပြီး

အမှန်တကယ် အကောင်းဆုံး နည်းလမ်းမှာ ဂုရုကျားဝမ်၏ ပုပ်သိုးနေသော သတင်းများကို တူးဖော်ပြီး လူသိရှင်ကြား ဖွင့်ချလိုက်ခြင်းပင် ဖြစ်‌သော်လည်း အကယ်၍ ထိုသတင်းများက ဂုရုကျားဝမ်ကို အကျဉ်းထောင်ထဲအထိ ရောက်သွားစေနိုင်ပါက အကောင်းဆုံး ဖြစ်လိမ့်မည်။

ဂုရုကျားဝမ်သည် လွန်ခဲ့သော သုံးနှစ်ကျော်က ထိုကဲ့သို့သော ယုတ်မာမှုမျိုးကို လုပ်ဆောင်နိုင်ခဲ့လျှင် သူ၏ နောက်ကွယ်၌ အခြားသော ပုပ်သိုးနေသည့် ကိစ္စရပ်များစွာ ရှိနေမည်မှာ သေချာပါသော်လည်း လုအန်းကျီတွင် ထိုကဲ့သို့သော သတင်းများကို တူးဖော်ပေးနိုင်မည့် ယုံကြည်စိတ်ချရသော လူယုံ သို့မဟုတ် ဆက်သွယ်ရေး လမ်းကြောင်းများ မရှိသေးပေ

ထို့ကြောင့် ဤအနုပညာလောကထဲသို့ ဖြည်းဖြည်းချင်း ဝင်ရောက်ရင်း ဂုရုကျားဝမ်ကို စိတ်အနှောင့်အယှက် ဖြစ်အောင် လုပ်ဆောင်ကာ တစ်ဖက်မှလည်း ပူးပေါင်းဆောင်ရွက်ရန် သင့်တော်ပြီး ယုံကြည်ရမည့် လူများကို ရှာဖွေခြင်းက ပို၍ ကောင်းမွန်ပြီး ဂုရုကျားဝမ်ကို စိတ်ပျက်အောင် လုပ်နေစဉ်အတွင်း ထိုသူ၏ အားနည်းချက်များ ပေါ်ထွက်လာအောင် ဖန်တီးနိုင်ပါက အကောင်းဆုံး ဖြစ်သည် ဟုတွေးကြံထားလေသည်။

ထိုအချိန်ကျမှသာ အခွင့်အရေး တစ်ခုခု ရလာလျှင် သို့မဟုတ် ပူးပေါင်းဆောင်ရွက်မည့်သူ ရှိလာလျှင် ထိရောက်သော ရလဒ်များ ရရှိရန် ယခုအချိန်တွင်မူ သူ လုပ်နိုင်သမျှကို တစ်ဆင့်ချင်းစီသာ လုပ်ဆောင်ရန် လုအန်းကျီက ဆုံးဖြတ်လိုက်သည်။

လုအန်းကျီသည် သူ၏ အစီအစဉ်အတိုင်း စန်းဝေ့ စာအုပ်ဆိုင်သို့ ပြန်ရောက်သောအခါ ‌ကျုံ့ပေါ် ထံသို့ ဆက်သွယ်လိုက်ပြီး သူသည် စုန့်ရှောင်ချင်းနှင့် ပူးပေါင်း၍ ‘အဆိုတော်၏ ခရီးစဉ်’ အစီအစဉ်တွင် ပါဝင်လိုကြောင်း ရှင်းပြပြီး ကျုံ့ပေါ် အား ဒါရိုက်တာ ဟန်နှင့် မိတ်ဆက်ပေးရန် အကူအညီ တောင်းလိုက်သည်။

စုန့်ရှောင်ချင်း၏ အမည်ကို ကြားသောအခါ ကျုံ့ပေါ်မှာ အံ့အားသင့်သွားပြီး “ဖုန်းသံဘုရင်မလား” ဟု မေးမြန်းလိုက်ကာ

လုအန်းကျီကလည်း အံ့အားသင့်သွားကာ “ဖုန်းသံဘုရင်မ ဟုတ်လား၊ သူက ဘယ်တုန်းက အဲဒီလို ဖြစ်သွားတာလဲ” ဟု ပြန်မေးလိုက်မိ၏။

ကျုံ့ပေါ်က “အွန်လိုင်းမှာ လူတွေက သူ့ကို အဲဒီလို ခေါ်နေကြတာ တွေ့လို့ပါ ငါတို့ ကုမ္ပဏီက လူတွေကလည်း စုန့်ရှောင်ချင်းကို အဲဒီလိုပဲ ခေါ်ကြတယ်” ဟု ဖြေလိုက်သည်။

လုအန်းကျီက “ဖုန်းသံဘုရင်မ ဆိုတာက ကျန်းဆူရှင်း ဖြစ်သင့်တာ မဟုတ်လား” ဟု ဆိုရာ ကျုံ့ပေါ်က “မဟုတ်ဘူးလေ၊ ကျန်းဆူရှင်းကတော့ ကြယ်ပွင့်တစ်ဦး ဖြစ်နေပြီဆိုတော့ ဘယ်သူမှ သူ့ကို အဲဒီလို မခေါ်ကြတော့ပါဘူး”

“စုန့်ရှောင်ချင်းရဲ့ ‘ကြောင်လေးလို အော်တတ်ဖို့ သင်ယူမယ်’ ဆိုတဲ့ သီချင်းက ဖုန်းသံ ဒေါင်းလုဒ် ဇယားတွေမှာ နှစ်နဲ့ချီပြီး ထိပ်ဆုံးက ရောက်နေတာလေ၊ သူ့ကို ဖုန်းသံဘုရင်မလို့ ခေါ်တာ မမှားပါဘူး၊ ဆရာလုလည်း ဖုန်းသံ ဂီတဇယားတွေမှာ ထိပ်ဆုံးက ရှိနေလို့ ဖုန်းသံဘုရင်လို့ အမည်တွင်နေတာ မဟုတ်လား” ဟု ရှင်းပြပြီး‌

ကျုံ့ပေါ်က ဆက်လက်၍ “ဆရာလုက အဖွဲ့ရဲ့ တေးဂီတ ထုတ်လုပ်သူအဖြစ် ပါဝင်ပြီး စုန့်ရှောင်ချင်းရဲ့ သီချင်းရွေးချယ်မှု၊ ထုတ်လုပ်မှုနဲ့ တေးဂီတ ဖန်တီးမှုတွေကို တာဝန်ယူမှာလား”

လုအန်းကျီက “ဟုတ်ပါတယ်”

ကျုံ့ပေါ်က “ဒါဆိုရင် ဆရာတို့ အဖွဲ့မှာ အဖွဲ့ခေါင်းဆောင် တစ်ယောက် လိုသေးတယ်နော် ကျန်းဆူရှင်းက အဲဒီ တာဝန်ကို ယူမှာလား၊ ဒါမှမဟုတ် စတူဒီယိုထဲက တခြားသူတွေ ရှိသေးလား” ဟု ထပ်မံ မေးမြန်း၏။

လုအန်းကျီက “ကျန်းဆူရှင်းကတော့ အဆင်မပြေဘူး၊ ငါကိုယ်တိုင်ပဲ အဖွဲ့ခေါင်းဆောင် တာဝန်ယူလို့ မရဘူးလား” ဟု ဆိုရာ ကျုံ့ပေါ်က “ရတော့ ရပါတယ်၊ ဒါပေမဲ့ အဖွဲ့ခေါင်းဆောင်က အသေးအဖွဲ ကိစ္စတွေ အများကြီး လုပ်ရတာ၊ စင်ပေါ်က ကိစ္စတွေတင် မဟုတ်ဘဲ အစီအစဉ် အဖွဲ့သားတွေနဲ့ ဆက်သွယ် ညှိနှိုင်းရတာတွေ ရှိတော့ အချိန်နဲ့ လူအင်အား အများကြီး ကုန်မှာ၊ ဆရာလုက ထုတ်လုပ်သူ တာဝန်ကိုပါ ယူမှာဆိုတော့ အဖွဲ့ခေါင်းဆောင် အလုပ်ပါ လုပ်ရင် အဆင်ပြေမှာ မဟုတ်ဘူး” ဟု အကြံပြုသည်။

“အော် နားလည်ပါပြီ”

လုအန်းကျီသည် ခေတ္တမျှ စဉ်းစားပြီးနောက်

“ဒါဆိုရင် ခဏလောက် စောင့်ပေးဦးနော်၊ ငါ တခြားလူ ရှာနိုင်မလား ကြည့်လိုက်ဦးမယ်”

ကျုံ့ပေါ်က “ဟုတ်ကဲ့ ဒါပေမဲ့ ဆရာလု မြန်မြန်တော့ လုပ်နော်၊ အစီအစဉ် အဖွဲ့သားတွေက အားလုံးကို မကြာခင် အတည်ပြုတော့မှာမို့လို့ပါ” ဟု သတိပေးပြီးနောက်

လုအန်းကျီသည် ကျုံ့ပေါ်နှင့် ဖုန်းချပြီးနောက် စုန့်ရှောင်ချင်းထံသို့ ဖုန်းခေါ်လိုက်ပြီး စုန့်ရှောင်ချင်းက

“ဘာကိစ္စလဲ၊ ငါ သီချင်း လေ့ကျင့်နေတယ်” ဟု ဆို၏။

လုအန်းကျီက “ဘယ်သီချင်း လေ့ကျင့်နေတာလဲ” ဟု မေးရာ စုန့်ရှောင်ချင်းက

“ခရစ်တော် မပေါ်မီက အချစ် ဆိုတဲ့ သီချင်းလေ၊ ငါ ဒီလို ပုံစံမျိုးကို စမ်းဆိုကြည့်ချင်တယ်လို့ ပြောထားတယ် မဟုတ်လား”

လုအန်းကျီက “ကောင်းပါပြီ”

စုန့်ရှောင်ချင်းက “ဘာပြောမလို့လဲ၊ အရေးကြီးတာ မရှိရင် ငါ့လေ့ကျင့်ခန်းကို မနှောင့်ယှက်နဲ့တော့၊ နင် အားတယ်ဆိုရင်လည်း ငါ့အိမ်ကို လာပြီး သင်ပေးတာက ပိုကောင်းမယ်” ဟု ဆိုရာ လုအန်းကျီက “ကိစ္စတစ်ခု ရှိလို့ပါ ငါ ခုနက ကျုံ့ပေါ်နဲ့ စကားပြောတော့ ငါတို့ အဖွဲ့မှာ နေ့စဉ်ကိစ္စတွေနဲ့ ဆက်သွယ်ရေး ကိစ္စတွေကို ကိုင်တွယ်ဖို့ အဖွဲ့ခေါင်းဆောင် တစ်ယောက် လိုအပ်တယ်တဲ့”

“ငါက ထုတ်လုပ်သူ လုပ်မယ်၊ မင်းက သီချင်းဆိုမယ်ဆိုတော့ ငါတို့ နှစ်ယောက်လုံးက အဖွဲ့ခေါင်းဆောင် လုပ်ဖို့ မသင့်တော်ဘူးလေ၊ မင်းမှာ ယုံကြည်ရပြီး အရည်အချင်းရှိတဲ့ လူရှိလား” ဟု မေးလိုက်ရာ

စုန့်ရှောင်ချင်းက “ငါ့မှာတော့ ယုံကြည်ရတဲ့သူ ဘယ်ရှိမလဲ” ဟု ဆိုပြီး ခေတ္တမျှ တိတ်ဆိတ်သွားပြီးနောက် “အော် ရှိသားပဲ၊ တကယ်တော့ ငါ့မှာ ရှိတာ မဟုတ်ဘူး၊ ကျန်းဆူရှင်းမှာ ရှိတာ၊ ခဏစောင့်ဦး၊ ငါ သူ့ကို ဆက်သွယ်လိုက်မယ်” ဟု ပြောလိုက်သည်၏။

စကားဆုံးသည်နှင့် ဖုန်းမှာ ပြတ်တောက်သွားသဖြင့် လုအန်းကျီမှာ ခေတ္တမျှ ကြောင်အမ်းအမ်း ဖြစ်သွားရသည်။

သူမက ဘာကို ဆိုလိုတာပါလိမ့်။ သူမမှာ မရှိဘဲ ကျန်းဆူရှင်းမှာ ရှိတယ်ဆိုတာက ဘာကို ပြောတာလဲ။

လုအန်းကျီသည် ဇဝေဇဝါ ဖြစ်နေသော်လည်း စိတ်ရှည်စွာ စောင့်ဆိုင်းနေကာ မကြာမီတွင် လုအန်းကျီ၏ ဖုန်း ထပ်မံ မြည်လာခဲ့ပြီး စုန့်ရှောင်ချင်း ပြန်ခေါ်သည်ဟု ထင်မှတ်သော်လည်း ဖုန်းနံပါတ်မှာ မရင်းနှီးသော နံပါတ်တစ်ခု ဖြစ်နေသည်။

သူသည် မျက်မှောင်ကြုတ်လျက် ဖုန်းကို ကိုင်ကာ

“ဟဲလို၊ ဘယ်သူပါလဲခင်ဗျာ” ဟု သူက မေးလိုက်ပြီးနောက်

ဖုန်းတစ်ဖက်မှ အေးစက်စက် အသံတစ်သံ ထွက်ပေါ်လာသည်။ “ဟဲလို၊ လုအန်းကျီလား ကျွန်မက ကျန်းဆူရှင်းရဲ့ သူငယ်ချင်းပါ၊ ကျွန်မနာမည်က ယောင်တုန်းရှ” ဟု မိတ်ဆက်လေပြီး သူမ၏ အသံမှာ အေးစက်နေပြီး မည်သည့် ခံစားချက်မျှ ပါဝင်ခြင်း မရှိပေ။

လုအန်းကျီမှာ ခေတ္တမျှ မှင်တက်သွားပြီး “ဟုတ်ကဲ့၊ ကျွန်တော်ပါပဲ၊ ဘာကိစ္စရှိလို့ပါလဲ” ဟု မေးလိုက်သည်။

ယောင်တုန်းရှက “စုန့်ရှောင်ချင်းက ခုနကပဲ ဖုန်းဆက်လာတယ်၊ ရှင်တို့နှစ်ယောက် ဒါရိုက်တာ ဟန်ရဲ့ ‘အဆိုတော်၏ ခရီးစဉ်’ အစီအစဉ်မှာ ပါဝင်ဖို့ ပြင်ဆင်နေပြီး အဖွဲ့ခေါင်းဆောင် လိုအပ်နေတယ်လို့ ပြောတယ်၊ ရှင်တို့ဘက်က အဆင်ပြေတယ်ဆိုရင် ကျွန်မကပဲ အဖွဲ့ခေါင်းဆောင် လုပ်ပေးပါ့မယ်” ဟု ဆိုသည်။

လုအန်းကျီသည် စုန့်ရှောင်ချင်းက သူ၏ ဖုန်းနံပါတ်ကို တိုက်ရိုက် ပေးလိုက်လိမ့်မည်ဟု မမျှော်လင့်ထားခဲ့ပေ။ သို့သော်လည်း စုန့်ရှောင်ချင်းက ဆက်သွယ်ပေးသူ ဖြစ်သောကြောင့် ကိစ္စမရှိနိုင်ဟု ယူဆကာ သူက သဘောတူရန် ပြင်လိုက်သည်။

ထိုစဉ် ယောင်တုန်းရှက ဆက်လက်၍ “ကျန်းဆူရှင်းက ရှင့်အကြောင်း ကျွန်မကို ပြောဖူးပါတယ် ဒါပေမဲ့ ကျွန်မက တခြားမြို့မှာ အလုပ်ကိစ္စနဲ့ ရောက်နေတာဆိုတော့ မဆုံဖြစ်သေးဘူး အခုတော့ တစ်ယောက်နဲ့ တစ်ယောက် သိကျွမ်းဖို့ အခွင့်အရေးကောင်း တစ်ခုပေါ့”

“ရှင် ဘာလုပ်ချင်နေလဲဆိုတာ ကျွန်မ သိပါတယ်၊ လွန်ခဲ့တဲ့ သုံးနှစ်ကျော်က ကိစ္စကို ကျန်းဆူရှင်းအတွက် ကျွန်မ ဖြေရှင်းပေးခဲ့တာပါ၊ ပြီးခဲ့တဲ့ နှစ်နှစ်လုံးလုံးလည်း ကျန်းဆူရှင်းအတွက် လက်စားချေဖို့ ကျွန်မ ကြိုးစားနေခဲ့တာ”

“သူ့ရဲ့ မန်နေဂျာဟောင်းနဲ့ လက်ထောက်ကို လွန်ခဲ့တဲ့ တစ်နှစ်ကျော်ကတည်းက ကုမ္ပဏီကနေ အလုပ်ထုတ်ခံရအောင် ကျွန်မ လုပ်ခဲ့ပြီးပြီ သူတို့တွေ အခုထိ ဘယ်မှာမှ အလုပ်မရသလို နောက်ပိုင်းမှာလည်း ရမှာ မဟုတ်တော့ပါဘူး အနည်းဆုံးတော့ ဒီနယ်ပယ်ထဲမှာပေါ့”

“လက်ထောက်ရဲ့ ဖောက်ပြန်မှုတွေကို ဖော်ထုတ်လိုက်လို့ သူ့ရဲ့ နာမည်ပျက်သွားပြီ၊ မန်နေဂျာကတော့ သူ့ခင်ပွန်းက ရှယ်ယာဈေးကွက်မှာ အကုန်ရှုံးသွားလို့ အခုဆိုရင် ရူးမတတ် ဖြစ်နေလောက်ပြီ”

“ဂုရုကျားဝမ်ကိုတော့ ကျွန်မ တခြားနည်းလမ်းတွေနဲ့ ကိုင်တွယ်ဖို့ စဉ်းစားထားတာ၊ ဒါပေမဲ့ ရှင်က ဒီလိုမျိုး ကစားချင်တယ်ဆိုရင်လည်း ကျွန်မက ရှင့်ဘက်က ပါဝင်ပေးပါ့မယ်၊ ရှင့်ရဲ့ အရည်အချင်းတွေကို ကျွန်မ ကြားဖူးပါတယ် ရှင့်ရဲ့ အရည်အချင်းနဲ့ ကျွန်မရဲ့ အစီအစဉ်တွေ ပေါင်းစပ်လိုက်ရင် မထင်မှတ်ထားတဲ့ ရလဒ်တွေ ထွက်လာနိုင်မှာပါ” ဟု ပြောဆို‌သောကြောင့် လုအန်းကျီမှာ အလွန်အံ့အားသင့်သွားခဲ့ရသည်။

ဤအမျိုးသမီးမှာ ကျန်းဆူရှင်း အမြဲပြောလေ့ရှိသည့် “ထိုသူငယ်ချင်း” ဖြစ်နေလိမ့်မည်ဟု သူ မထင်ထားခဲ့ပေ။ သူမသာ အဖွဲ့ခေါင်းဆောင် လုပ်ပေးမည်ဆိုပါက ဘာမှ စိုးရိမ်စရာ မလိုတော့ပေ။

သို့သော် လုအန်းကျီ ယခု စိတ်ဝင်စားနေသည်မှာ ထိုအချက် မဟုတ်‌သောကြောင့်

“မစ္စယောင်၊ ဂုရုကျားဝမ်ကို ကိုင်တွယ်ဖို့ မူလက ဘယ်လို အစီအစဉ်မျိုး ရှိထားတာလဲ” ဟု သူက မေးမြန်းလိုက်၏။

ယောင်တုန်းရှ၏ စကားအနည်းငယ်အတွင်း၌ပင် အချက်အလက်များစွာ ပါဝင်နေပြီး ကျန်းဆူရှင်း၏ မန်နေဂျာဟောင်းနှင့် လက်ထောက်တို့ ထိုကဲ့သို့ အခြေအနေမျိုး ရောက်သွားခြင်းမှာ ဤအမျိုးသမီးနှင့် သေချာပေါက် ပတ်သက်နေသည်။ ဤမျှ ပြတ်သားသော အမျိုးသမီးက ဂုရုကျားဝမ်အတွက် ပြင်ဆင်ထားသည့် အကွက်များမှာလည်း သာမန် ဖြစ်လိမ့်မည် မဟုတ်သည်ကို လုအန်းကျီ တစ်ယောက်ခံစားမိသည်။

သူသည် အစီအစဉ်များကို ဖြည်းဖြည်းချင်း လုပ်ဆောင်ရန် စဉ်းစားထားသော်လည်း တစ်စုံတစ်ယောက်ကမူ သူ၏ နောက်ကွယ်၌ ထိုအရာများကို ကြိုတင် လုပ်ဆောင်နေသည်ကို သူ မမျှော်လင့်ထားခဲ့သည်မှာ အမှန်ပင်ဖြစ်လေသည်။