အခန်း (၁၂၉-၁၃၀)

အခန်း (၁၂၉)

လူပျို၊ အပျိုပါတီ

တန်ယန်က အယ်လီဆာကို ပေးခဲ့သည့် လက်ဆောင်မှာ တန်ဖိုးအားဖြင့် သန်း ၁၀၀ ကျော်ရှိသည့် ထိပ်တန်း အရည်အသွေးရှိသော ကျောက်စိမ်းနီ လက်ဝတ်ရတနာ တစ်စုံဖြစ်သည်။ ထိုရတနာမျိုးမှာ ငွေရှိရုံနှင့် ဝယ်၍မရနိုင်ဘဲ တကယ့်ကို တန်ဖိုးမဖြတ်နိုင်သည့် အရာမျိုးဖြစ်သည်။

သူမသည် ဤရတနာအစုံကို ကံစမ်းမဲတစ်ခုမှ ရရှိထားခြင်းဖြစ်ပြီး ယင်းတွင် ကျောက်စိမ်းနီသာမက ထိပ်တန်း ခရမ်းရောင်ကျောက်စိမ်းနှင့် ဧကရာဇ်စိမ်းများလည်း ပါဝင်သည်။ အယ်လီဆာအတွက် မင်္ဂလာလက်ဆောင် ရွေးချယ်နေစဉ် ဤကျောက်စိမ်းနီ အစုံကို မြင်လိုက်ရပြီး အယ်လီဆာကဲ့သို့ တက်ကြွရွှင်လန်းသော အမျိုးသမီးမျိုးနှင့် အလွန်လိုက်ဖက်မည်ဟု ယူဆသဖြင့် လက်ဆောင်ပေးရန် ဆုံးဖြတ်ခဲ့ခြင်း ဖြစ်သည်။

တစ်ဖက်လူကလည်း ဤရတနာ၏ တန်ဖိုးကို နားလည်ပုံရသဖြင့် နှမြောစရာမရှိဘဲ ပေးရကျိုး နပ်သည်ဟု တန်ယန် ခံစားလိုက်ရသည်။

တန်ယန်: "အယ်လီဆာ... ဒါကနင့်အတွက် ငါပြင်ဆင်ထားတဲ့ လက်ဆောင်ပါ ငါ့ရဲ့ ဆုတောင်းမေတ္တာတွေလည်း ပါတာမို့လို့ နင်သဘောကျတယ် ဆိုရင်ပဲ ငါဝမ်းသာလှပါပြီ"

အယ်လီဆာ: "ဝါး... ယာနာရေ၊ နင်က ငါ့အစ်ကို အရင်းထက်တောင် ငါ့အပေါ် ပိုကောင်းသေးတယ် ငါ့မှာသာ ဟာဗန်ဒါမရှိရင် နင့်ကိုပဲ ငါချစ်မိသွားမှာ သေချာတယ်ဟယ်"

ကာရင်း: "အယ်လီဆာ နင့်ရဲ့ မင်္ဂလာဆောင်ဝတ်စုံနဲ့ ဆင်မြန်းမယ့် ရတနာတွေကို ဒီအစုံနဲ့ လဲလိုက်ပါလား ဒါက မူလအတွဲထက်တောင် အများကြီး ပိုကောင်းသေးတယ်"

အယ်လီဆာ: "အဲဒါ အဆင်ပြေပါ့မလား၊ ငါလည်း အဲဒီလိုပဲ လုပ်ချင်နေတာ"

ကာရင်း: "အချိန်မီပါသေးတယ် တို့တွေမှာ ပြန်ပြင်ဖို့သုံးရက် ရှိသေးတာပဲ၊ လုပ်နိုင်ပါတယ်"

အယ်လီဆာ: "ဒါဆို ငါသူတို့ကို အခုပဲ သွားပြောလိုက်ဦးမယ် အားလုံးပဲ... ငါခဏ လိုင်းပေါ်က ဆင်းလိုက်ဦးမယ်နော်"

ကာရင်း: "ယာနာ... နင်အရင်က C နိုင်ငံမှာ ဖျော်ဖြေရေးကုမ္ပဏီတစ်ခု ဖွင့်ထားတယ်လို့ ပြောတယ်မလား"

...

နောက်တစ်နေ့တွင် အယ်လီဆာ၏ အပျိုဖျန်းပါတီကို ကျင်းပခဲ့သည်။ မင်္ဂလာဆောင်နေ့တွင် စိတ်အနှောင့်အယှက် မဖြစ်စေရန်အတွက် ပါတီကို တစ်ရက်ကြိုတင် ကျင်းပခြင်း ဖြစ်သည်။

တန်ယန်သည် C အမှတ်တံဆိပ်မှ အဆင့်မြင့် Haute Couture ဝတ်စုံကို ဝတ်ဆင်ကာ H အမှတ်တံဆိပ်မှ အရေအတွက် ကန့်သတ်ထုတ်ဝေထားသည့် လက်ကိုင်အိတ်ကို ကိုင်ဆောင်လျက် ပါတီကျင်းပရာ သီးသန့်ဗီလာသို့ ရောက်ရှိလာခဲ့သည်။

အယ်လီဆာသည် တန်ယန်ကို မြင်သည်နှင့် အပြေးအလွှား ရောက်လာပြီး -

"ယာနာ ရောက်ပြီလား ငါ့သူငယ်ချင်းကောင်း အချို့နဲ့ မိတ်ဆက်ပေးချင်လို့"

ဟု ပြောကာ တန်ယန်၏ လက်ကိုဆွဲပြီး လူအုပ်ကြီး၏ အလယ်သို့ ခေါ်ဆောင်သွားတော့သည်။

"အယ်လီဆာ... ဒီလှပတဲ့ အမျိုးသမီးလေးက ဘယ်သူလဲ"

ဥဒေါင်းတစ်ကောင်ကဲ့သို့ အရောင်အသွေး စုံလင်စွာ ဝတ်ဆင်ထားသော အမျိုးသား တစ်ဦးသည် ရှန်ပိန်ဖန်ခွက်ကို ကိုင်လျက် လျှောက်လာသည်။

"ဂျေမီ ... ဒီနားက ထွက်သွားစမ်း ဒါက ငါ့ရဲ့ အချစ်ဆုံး သူငယ်ချင်းပဲ နင့်ရဲ့ မိန်းမကြိုက်တဲ့ နည်းလမ်းတွေကို ဒီမှာ လာမသုံးနဲ့ဦး"

အယ်လီဆာက သူ့ကို သတိပေးသည့် အကြည့်ဖြင့် ကြည့်လိုက်သည်။

ထိုအမျိုးသားသည် ရှန်ပိန်ခွက်ကို အောက်ချလိုက်ပြီး အလွန်တည်ကြည် လေးနက်သော ပုံစံသို့ ချက်ချင်း ပြောင်းလဲကာ -

"မင်္ဂလာညချမ်းပါ ချစ်စရာကောင်းတဲ့ မိန်းကလေး ကျွန်တော့်နာမည်က ဂျေမီပါ၊ ညီမလေးရဲ့ နာမည်ကို သိခွင့်ရှိမလားခင်ဗျာ"

"ယာနာပါ... တွေ့ရတာ ဝမ်းသာပါတယ်"

ဟု တန်ယန်က နှုတ်ဆက်လိုက်သည်။ ဤနေရာရှိ လူအားလုံးမှာ အယ်လီဆာ၏ သူငယ်ချင်းများ ဖြစ်ကြသဖြင့် တန်ယန်အနေဖြင့်လည်း အယ်လီဆာ၏ မျက်နှာကို ထောက်ထား၍ ယဉ်ကျေးစွာ ဆက်ဆံခြင်း ဖြစ်သည်။

"ယာနာ... ဒီမိန်းမရှုပ်ကြီးကို ဂရုစိုက်နေဖို့ မလိုဘူးနော် ငါပြောပြမယ်... သူက ရည်းစားကို တစ်ပတ်တစ်ယောက်လဲတဲ့သမိုင်းကြောင်းရှိတာ သတိထားနော်"

အယ်လီဆာသည် ထိုအမျိုးသား ရှိနေသည်ကိုပင် ဂရုမစိုက်ဘဲ သူ၏ အချစ်ရေးရာ ဇာတ်လမ်းဟောင်းများကို တန်ယန်အား တိုင်တောနေတော့သည်။

"အယ်လီဆာရာ... ဒီလိုအလှလေး ရှေ့မှာတော့ ငါ့ကို မျက်နှာလေး နည်းနည်းလောက် ထောက်ပါဦး"

ဟု ဂျေမီက ပြောလိုက်သော်လည်း သူ၏ မျက်လုံးများတွင်မူ အပြုံးများ ပြည့်နှက်နေပြီး လှောင်ပြောင်ခံရခြင်းကို အရေးစိုက်ပုံ မရပေ။

"ကဲပါ... ဒီနေ့ ငါစိတ်ကောင်းရှိနေလို့ နင့်ကို လွှတ်ပေးလိုက်မယ်"

အယ်လီဆာက သဘောထားကြီးစွာဖြင့် ဆိုလိုက်သည်။

"ယာနာက ငါ့ရဲ့ အရင်းနှီးဆုံး သူငယ်ချင်းတွေထဲက တစ်ယောက်ပဲ၊ ဒါကြောင့် နောင်ကျရင် သူ့ကို သေချာ ဂရုစိုက်ပေးကြဦးနော်"

"ဒါက ကျွန်တော့်အတွက် ဂုဏ်ယူစရာပါပဲ"

ဟု ဂျေမီက အလေးအနက် ကတိပေးလိုက်သည်။

အယ်လီဆာသည် နောက်ဆုံးတွင် စိတ်ကျေနပ်သွားကာ တန်ယန်ကို သူမ၏ အခြား သူငယ်ချင်းများနှင့် မိတ်ဆက်ပေးရန် ခေါ်သွားတော့သည်။ မကြာမီမှာပင် တန်ယန်သည် ချစ်စရာကောင်းသော မိန်းကလေးတစ်စုနှင့် ရောနှောကာ ပျော်ရွှင်နေတော့သည်။ တန်ယန်သည် သူငယ်ချင်း ဆိုသည်မှာ တူညီသော စံနှုန်းနှင့် တန်ဖိုးထားမှုများ ရှိသင့်သည်ဟု အမြဲယုံကြည်ထားသူ ဖြစ်သည်။ အယ်လီဆာ ကိုယ်တိုင်က သူမစိတ်ချရသော သူငယ်ချင်း ဖြစ်သည့်အတွက် အယ်လီဆာ၏ သူငယ်ချင်းများမှာလည်း သဘောကောင်းကြမည်မှာ သေချာပါသည်။

"တို့တွေ ဓာတ်ပုံရိုက်ကြမလား?"

ဟု အီလိန်းအမည်ရှိ မိန်းကလေးက ဆိုလိုက်သည်။

"အီလီနာ ... နင်က ဒါကို ဖေးရှင်းပေါ် ထပ်တင်ဦးမလို့လား"

ဟု ချစ်စရာကောင်းသော ဖီးလ်က မေးလိုက်သည်။

တန်ယန်မှာ အခြေအနေကို နားမလည်ဘဲ ကြောင်နေသဖြင့် အယ်လီဆာက ဘေးမှ ရှင်းပြပေးသည်။

"အီလီနာက ဖေးရှင်းမှာ ဖန်တွေအများကြီးရှိတဲ့ အလှအပဆိုင်ရာ ဘလော့ဂါ တစ်ယောက်လေ အဲဒါကြောင့် သူက သူ့ရဲ့ နေ့စဉ်ဘဝတွေကို အမြဲတင်လေ့ရှိတာ"

"ဒါဆို အွန်လိုင်းဆယ်လီလိုမျိုးပေါ့"

တန်ယန်က နားလည်သွားသည့်အလား ခေါင်းညိတ်လိုက်သည်။

"ယာနာ... ငါနင်နဲ့ ဓာတ်ပုံတွဲရိုက်ပြီး ဖေးရှင်းပေါ် တင်လို့ရမလားဟင်"

အီလိန်းက သူမ၏ ဝိုင်းစက်နေသော မျက်လုံးကြီးများဖြင့် မျှော်လင့်တကြီး ကြည့်ကာ မေးလိုက်သည်။

"ရတာပေါ့"

အုပ်စုလိုက် ဓာတ်ပုံရိုက်ခြင်းမှာ ဘာမှမမှားဟု ယူဆသဖြင့် တန်ယန်က လွယ်လွယ်ကူကူပင် သဘောတူလိုက်သည်။

"ဝိုး ငါလည်းရိုက်ချင်တယ် နင့်ရဲ့ အသွင်အပြင်ကို ငါအရမ်းသဘောကျတာပဲ"

ဖီးလ်ကလည်း ချက်ချင်းပင် လက်ညှိုးထောင်ကာ ပါဝင်လာတော့သည်။

"ဒါဆို တို့တစ်ယောက်ချင်းစီ ယာနာနဲ့ ပုံရိုက်မယ်၊ ပြီးတော့မှ အားလုံးစုပြီး အုပ်စုပုံ ရိုက်ကြတာပေါ့"

ဟု အီလိန်းက အကြံပြုရာ အားလုံးက သဘောတူလိုက်ကြသည်။

တန်ယန်: ကောင်းပြီလေ... ငါကတော့ ဓာတ်ပုံရိုက်ခံရတဲ့ ကိရိယာတစ်ခု ဖြစ်သွားပြီပေါ့။

အုပ်စုပုံ ရိုက်ပြီးနောက် အီလိန်းသည် ဖုန်းထဲမှ ပုံကိုကြည့်ကာ အလွန်ပင် စိတ်ကျေနပ်သွားသည်။ တန်ယန်၏အလှမှာ သဘာဝအတိုင်း အလွန်လှပလွန်းသဖြင့် ပြုပြင်ရန်ပင် မလိုတော့ပေ။ လူတစ်ယောက်က ဒီလောက်အထိ ပြည့်စုံနိုင်ပါ့မလားဟု တွေးမိကာ သူမတောင် အနည်းငယ် မနာလို ဖြစ်မိသွားသည်။

ဓာတ်ပုံများကို အစီအစဉ်တကျ စီပြီးနောက် အီလိန်းက စာသားလေး တစ်ခုနှင့်အတူ တင်လိုက်သည်။

"အပျိုဘဝကို မကြာခင် အဆုံးသတ်တော့မယ့် အယ်လီဆာအတွက် ဂုဏ်ယူပါတယ်၊ ဒီနေ့တော့ ငါ့ရဲ့ နတ်ဘုရားမလေး ယာနာ (တန်ယန်) နဲ့ ဆုံခွင့်ရလို့ အရမ်းပျော်နေပြီ" (ဓာတ်ပုံ ၉ ပုံ)

【ဝိုး... အီလိန်းက အရမ်းလှတာပဲ တို့ရဲ့ မင်းသမီးလေး အယ်လီဆာလည်း ပျော်ရွှင်ပါစေနော်】

【လှပတဲ့ မိန်းကလေးတွေချည်း စုနေတာပဲ၊ အလှလေးတွေက အလှလေးတွေနဲ့ပဲ ပေါင်းကြတာလား】

【အီလိန်းဘေးက မိန်းကလေးက တောင်ကိုရီးယားကလားတော်တော်လှတာပဲ】

【ဂျပန်ကထင်တယ်၊ ကြည့်ရတာ အရမ်းနုနယ်ပြီး သေးသေးလေးနဲ့ ချစ်စရာကောင်းတယ်】

【တောင်ကိုရီးယားက အိုင်ဒေါတွေကလည်း ရုပ်ရည်ပိုင်းမှာ ထူးထူးခြားခြား လှပကြတာပဲနော်】

【နေပါဦး... တို့ရဲ့ အီလိန်းကမှ အစစ်အမှန် အလှတရားပါ ကိုယ်လုံးကိုယ်ပေါက်ရော မိသားစုနောက်ခံပါ ပြည့်စုံတာ】

【ယာနာက တရုတ်နိုင်ငံကပါ၊ ရှိုပင်အထူးဆုကို ဆွတ်ခူးထားတဲ့သူလေ သူမက အသက် ၁၇ နှစ်ပဲ ရှိသေးတဲ့ ပါရမီရှင် အမျိုးသမီးငယ်လေးပါ】

【ငါက C နိုင်ငံကပါ၊ ငါသိတယ် တန်ယန်က တို့နိုင်ငံရဲ့ ဂုဏ်ဆောင်ပဲ မနှစ်က ဆုရတုန်းက ၁၇ နှစ်၊ အခုဆို ၁၈ ထဲ ရောက်ပြီပေါ့ ဒါပေမဲ့ တို့နိုင်ငံရဲ့ ဓလေ့အရ မွေးနေ့ကျော်မှ အသက်တစ်နှစ်တိုးတာ တန်ယန်ရဲ့ အချက်အလက်တွေအရ သူမမွေးနေ့က မတ်လ ၁၄ ရက်ဆိုတော့ နောက်ထပ် နှစ်လနေမှ ၁၈ ပြည့်မှာပါ】

...

အီလိန်း၏ပို့စ်မှာ နိုင်ငံရပ်ခြား လူမှုကွန်ရက်များတွင် ပျံ့နှံ့သွားခဲ့ပြီး တရုတ်နိုင်ငံရှိ လူအများအပြားလည်း မြင်တွေ့သွားကြသည်။ အကြောင်းမှာ အီလိန်းသည် အွန်လိုင်းဆယ်လီ တစ်ဦးသာမက ချမ်းသာကြွယ်ဝသော သူဌေးသမီး တစ်ဦးလည်း ဖြစ်သောကြောင့်ပင်။ ရေပန်းစားနေသော အကြောင်းအရာများကို အခြေခံ၍ တရုတ်မီဒီယာများက တန်ယန်နှင့် အီလိန်းတို့၏ တွဲဖက်ဓာတ်ပုံကို ရှာဖွေတွေ့ရှိပြီးနောက် တရုတ်နိုင်ငံ၏ အကြီးဆုံး လူမှုကွန်ရက်ဖြစ်သော Weibo ပေါ်တွင် ပြန်လည် မျှဝေခဲ့ကြသည်။

All-Star Fashion V: "အိပ်မက်ဆန်တဲ့ ပေါင်းစည်းမှု ရှိုပင်အထူးဆုရှင် ပီယာနိုပညာရှင် တန်ယန်ကို YL နိုင်ငံရဲ့ နာမည်ကြီး အီလိန်းရဲ့ သူငယ်ချင်း အသိုင်းအဝိုင်းထဲမှာ မထင်မှတ်ဘဲ တွေ့လိုက်ရပါတယ် တန်ယန်ဟာ YL နိုင်ငံရဲ့ နာမည်ကြီး မြို့စားမင်း အိုင်းရစ်ရဲ့သမီး အယ်လီဆာရဲ့ အပျိုဖျန်းပါတီမှာ အီလိန်းနဲ့ ဆုံတွေ့ခဲ့တာ ဖြစ်ပါတယ်" 【ပုံ】

【တန်ယန်ရဲ့ဖန်တွေ ရောက်လာပြီ တကယ့်ကို အိပ်မက်ဆန်တဲ့ တွဲဖက်မှုပဲ တို့ရဲ့ တန်ယန်ကတော့ အလယ်ဗဟိုမှာ အမြဲတမ်း ထင်ရှားနေတာပဲ】

【တန်ယန်ရဲ့ လူမှုကွန်ရက် အသိုင်းအဝိုင်းကတော့ တကယ်ကို အံ့မခန်းပဲ၊ ချမ်းသာကြွယ်ဝပြီး အာဏာရှိတဲ့ သူတွေချည်းပဲ (ပြုံးနေသောမျက်နှာ)】

【အပေါ်ကလူ ပြောတာက နည်းနည်း ရွဲ့နေသလိုပဲနော်】

【တို့ရဲ့ တန်တန်ကလည်း သူဌေးသမီးပဲလေ ဟုတ်ပြီလား၊ ရှိုပင်ပြိုင်ပွဲတုန်းက သူမဝတ်ခဲ့တဲ့ ဝတ်စုံတစ်စုံတည်းတင် ရှစ်သန်းတန်တာ (ပုံ)】

【ကျောင်းနေဖက် တစ်ယောက်အနေနဲ့ ပြောရရင် တန်ယန်က အထက်တန်း ပထမနှစ်တုန်းက တစ်တန်းလုံးကို အပန်းဖြေစခန်းမှာ တစ်ညအိပ်နှစ်ရက် ခရီးစဉ် လိုက်ပို့ခဲ့ဖူးတယ် အဲဒီတုန်းက အတန်းထဲမှာ အားလုံးမကြိုက်တဲ့ တောင်တက်ခရီးစဉ်ကို အစားထိုးပြီး ပျော်စရာဖြစ်အောင် လုပ်ပေးခဲ့တာ (ငိုနေသော အီမိုဂျီ) 】

【နောက်ထပ် ကျောင်းနေဖက် တစ်ယောက်အနေနဲ့ ထပ်ပြောပါရစေ တန်ယန်က ကျောင်းကို အမြဲတမ်း ဇိမ်ခံကားနဲ့ အကြိုအပို့လုပ်တာ၊ ပြီးတော့ သူမဝတ်သမျှ အဝတ်အစားတွေကလည်း နာမည်ကြီး တံဆိပ်တွေချည်းပဲ】

【တန်ယန်က ရှိုပင်အထူးဆုကို ရထားတာလေ၊ ဒါက တကယ့်ကို ဂုဏ်သရေရှိတဲ့ ဆုကြီးပါ သူမက YL နိုင်ငံက နာမည်ကြီးအမျိုးသမီးတွေထက် ဘာနိမ့်ကျလို့လဲ】

【နိုင်ငံခြား ဝက်ဘ်ဆိုက်တွေမှာတောင် အားလုံးက ချီးကျူးနေကြတာကို ဒီမှာဘာလို့ အငြင်းပွားနေကြတာလဲ (မေးခွန်းပုံ)】

【အပေါ်က မှတ်ချက်ကြောင့် အထင်လွဲသွားကြလို့ ကျွန်တော် နည်းနည်းတော့ ကြောက်သွားပြီ အားလုံးထင်သလို ဆိုလိုတာ မဟုတ်ပါဘူး၊ တန်ယန်ရဲ့ အံ့အားသင့်စရာကောင်းတဲ့ လူမှုအသိုင်းအဝိုင်းကို ကြည့်ပြီး အံ့သြမိရုံ သက်သက်ပါ ကျေးဇူးပြုပြီး ကျွန်တော့်ကို လွှတ်ပေးကြပါဦး】

အခန်း (၁၃၀)

ဝီလ်ပို့တ် ၁၇၈၂

"ဝိုး"

အီလိန်းက ရုတ်တရက် အော်ဟစ်လိုက်သဖြင့် ဘေးပတ်ဝန်းကျင်ရှိ အမျိုးသား၊ အမျိုးသမီးများ၏ အာရုံစိုက်ခြင်းကို ခံလိုက်ရသည်။

"ဘာဖြစ်လို့လဲ အီလိန်း"

မိန်းကလေး တစ်ယောက်က စပ်စုချင်စိတ်ဖြင့် မေးလိုက်သည်။

"ငါ ယာနာနဲ့ ရိုက်ထားတဲ့ပုံက ရေပန်းစားနေပြီဟ"

သူမက စိတ်လှုပ်ရှားစွာဖြင့် ရေရွတ်လိုက်သည်။ သူမအနေဖြင့် ယခင်ကလည်း ထရန်းဒင်း ဖြစ်ဖူးသော်လည်း ဓာတ်ပုံတစ်ပုံတည်းနှင့် ယခုကဲ့သို့ သဘာဝကျကျ အချိန်တိုအတွင်း နာမည်ကြီးလာခြင်းမျိုးမှာ ရှားပါးလှသည်။

တန်ယန်ကတော့ ခေါင်းလေးစောင်းကာ ကြည့်နေမိသည်။ သူမအတွက်မူ လူမှုကွန်ရက်ပေါ်တွင် နာမည်ကြီးခြင်းမှာ ထူးဆန်းသည့်ကိစ္စ မဟုတ်ပေ။ တရုတ်နိုင်ငံတွင်လည်း သူမသည် အမြဲတမ်း ရေပန်းစားနေသူ ဖြစ်ခြင်းကြောင့် ဖြစ်သည်။

"ယာနာက တကယ် နာမည်ကြီးတာပဲ အစကတော့ လူစိမ်းတချို့က ငါ့ရဲ့ ဖေးရှင်းမှာ ယာနာက တောင်ကိုရီးယားကလို့ လာရေးကြတာ ဒါပေမဲ့ တရုတ်နိုင်ငံက အင်တာနက် အသုံးပြုသူတွေ ထွက်လာပြီး အမှန်ကို ရှင်းပြပေးလိုက်ကြတယ် နောက်ပြီး သူမက အရမ်းလှနေတော့ တခြားလူတွေလည်း အလုံးအရင်းနဲ့ဝင်လာပြီး ငါ့ပို့စ်ကို လိုက်ခ်ပေးနေကြတာ ငါတော့ တကယ်ကို စိတ်လှုပ်ရှားနေပြီ"

"အီလီနာ... နင် သတိတော့ ထားဦးနော် အင်တာနက်ပေါ်ကလူတွေ ပေါက်ကရတွေ လျှောက်ပြောတာမျိုး အဖြစ်မခံနဲ့ ငါအများကြီး တွေ့ဖူးတယ် တချို့လူတွေက သူများကောင်းစားတာကို မကြည့်နိုင်ဘဲ တမင်သက်သက် ပုတ်ခတ်ဖို့အတွက် သတင်းအမှားတွေ လျှောက်ဖြန့်တတ်ကြတယ်"

အယ်လီဆာက မျက်မှောင်လေးကြုတ်ကာ အီလီနာကို အကြံပေးလိုက်သည်။

"စိတ်မပူပါနဲ့အေ ဘယ်သူမဆို သတင်းအမှားတွေ ဖြန့်ရဲရင် ငါ့ရဲ့ ကိုယ်ပိုင်ရှေ့နေနဲ့ သင်ခန်းစာ ပေးလိုက်မှာပေါ့"

အီလိန်းက ဤကိစ္စတွင် အလွန်ပင် ယုံကြည်မှု ရှိနေသည်။ သူမသည် အွန်လိုင်းဆယ်လီအဖြစ် လုပ်ကိုင်လာသည်မှာ ကြာပြီဖြစ်၍ အစပိုင်းတွင် နားမလည်သောသူ အချို့နှင့် ကြုံခဲ့ဖူးသော်လည်း သူမ၏ နောက်ခံအသိုင်းအဝိုင်းကို လူတိုင်းသိသွားပြီး နောက်တွင်မူ မည်သူကမျှ သူမကို လာရောက်နှောင့်ယှက်ခြင်း မရှိတော့ပေ။

သူတို့အုပ်စုသည် မနက် ၂ နာရီ၊ ၃ နာရီအထိ စကားပြောရယ်မောကာ ပါတီဆင်နွှဲခဲ့ကြသည်။ တန်ယန်သည် ထိုဗီလာ၌ပင် တစ်ညအိပ်ရန် ဖိတ်ခေါ်မှုကို ငြင်းပယ်ခဲ့ပြီး နှင်းဆီဥယျာဉ် ရဲတိုက်သို့ ကားဖြင့် ပြန်လာခဲ့သည်။

နောက်တစ်နေ့တွင် တန်ယန်သည် တစ်နေကုန် ရဲတိုက်ထဲ၌ပင် အနားယူနေခဲ့သည်။ ပြင်သစ်တွင် အလုပ်ကိစ္စများဖြင့် သွားရောက်နေသော ကာရင်း ပြန်ရောက်လာသည့်အခါ တန်ယန်၏ ရဲတိုက်သို့ တိုက်ရိုက်လာခဲ့သည်။

"အယ်လီဆာရဲ့ အပျိုဖျန်းပါတီကို မတက်လိုက်ရတာ တကယ့်ကို နှမြောစရာပဲ၊ ဒါပေမဲ့ မင်္ဂလာဆောင်ကိုတော့ အမီပြန်လာနိုင်လို့ တော်သေးတာပေါ့"

ကာရင်းသည် မီးဖိုဘေးရှိ ဆိုဖာကုလားထိုင်တွင် မှီထိုင်ရင်း လက်ထဲမှ ဝိုင်နီဖန်ခွက်ကို ဝှေ့ယမ်းနေသည်။

"ဒီဝိုင်က တကယ်ကောင်းတာပဲ ပြင်သစ်က ဝီလ်ခြံထွက် စပျစ်သီးတွေနဲ့ လုပ်ထားတာ ဖြစ်ရမယ် ဟုတ်တယ်မလား"

တန်ယန်က အနည်းငယ် အံ့သြသွားသလို မော့ကြည့်လိုက်ပြီး

"နင့်ရဲ့လျှာကတော့ တကယ့်ကို အံ့မခန်းပဲ"

ဟုဆိုကာ ကာရင်းပြောသည်မှာ မှန်ကန်ကြောင်း သွယ်ဝိုက်၍ ဝန်ခံလိုက်သည်။

"နေပါဦး... ဝီလ်ခြံက နင့်ဟာတော့ မဟုတ်ပါဘူးနော်"

ကာရင်းက အံ့သြတကြီး မေးလိုက်သည်။

တန်ယန်က ခေါင်းညိတ်ပြလိုက်သည်ကို မြင်သောအခါ သူမ၏ ရင်ဘတ်ကို ဖိလိုက်ရင်း

"တစ်နေ့ကျရင် နင့်ကြောင့်နဲ့ ငါ နှလုံးရောဂါ ရတော့မှာပဲလို့ တကယ် သံသယဖြစ်မိတယ်"

"နင်ကလည်း ပိုလိုက်တာ ဒါက ခြံဝင်းလေး တစ်ခုပဲဟာကို"

တန်ယန်ကတော့ စိတ်ရင်းအတိုင်းပင် ရိုးရိုးသားသား ထင်မြင်မိခြင်း ဖြစ်သော်လည်း တစ်ဖက်လူ အတွက်မူ ဤသည်မှာ တကယ့်ကို ကြွားလုံးထုတ်နေသည့်အလား ခံစားနေရတော့၏။

"အို... ဘုရားရေ ယာနာရေ... ဘာမှထပ်မပြောနဲ့တော့၊ ငါတောင် မနာလိုဖြစ်လာပြီ"

ကာရင်း၏ အမြင်တွင် တန်ယန်သည် ရုတ်တရက် ကြီးပွားလာသူများကဲ့သို့ သူမ၏ ချမ်းသာကြွယ်ဝမှုကို တမင်ကြွားဝါတတ်သူမျိုး မဟုတ်ပေ။ သို့သော် သူမသည် ဝီလ်ခြံဝင်း၏ အဆင့်အတန်းကို တကယ်ပဲ မသိခြင်းပေလား။

ကာရင်းသည် စိတ်ကိုခဏ ပြန်ထိန်းလိုက်ပြီးနောက် ဆက်ပြောသည်။

"ယာနာ... ဝီလ်ခြံဝင်းဆိုတာ နှစ်ပေါင်းတစ်ထောင် သမိုင်းကြောင်းရှိတဲ့ အစောဆုံးနဲ့ အလျှို့ဝှက်ဆုံး ဝိုင်ထုတ်လုပ်တဲ့ နေရာတစ်ခုပဲ ကမ္ဘာပေါ်မှာ ဈေးအကြီးဆုံးဝိုင်က ဝီလ်ခြံကထုတ်တဲ့ 'ဝီလ်ပို့တ် ၁၇၈၂' လို့ ပြောကြပေမဲ့ အဲဒါက တကယ်ကို ရှားပါးလွန်းတယ်"

ထိုအချိန်တုန်းက ဘလူးစတားဂြိုဟ် တစ်ခုလုံးတွင် ထိုဝိုင်ပုလင်း စုစုပေါင်း ထုတ်လုပ်မှုမှာ အလုံးတစ်ရာပင် မပြည့်ခဲ့ဘဲ ယနေ့အထိ မည်မျှ ကျန်ရှိနေသေးသည်ကို မည်သူမျှ မသိနိုင်ပေ၊ အလွန်ဆုံးရှိလှမှ အလုံးအနည်းငယ်သာ ဖြစ်ပေလိမ့်မည်။ YL တော်ဝင်မိသားစုတွင်ပင် တစ်ပုလင်းသာရှိပြီး ယင်းကပင် နိုင်ငံအသီးသီးရှိ သူဌေးကြီးများ၏ မနာလိုမှုကို ခံနေရခြင်းဖြစ်သည်။ တစ်ခါက လူတစ်ယောက်သည် စတားဒင်္ဂါး သုံးသန်းအထိ ပေးကမ်းကာ ကမ်းလှမ်းခဲ့သော်လည်း ဝိုင်အယ်လ်တော်ဝင် မိသားစုက လုံးဝ မတုန်လှုပ်ခဲ့ပေ။

တန်ယန် ခဏလောက် စဉ်းစားလိုက်သည်။ စတားဒင်္ဂါး သုံးသန်းဆိုသည်မှာ C နိုင်ငံသုံး ငွေဖြင့်ဆိုလျှင် ယွမ် သန်း ၂၀ ခန့်နှင့် ညီမျှသည်။ ဝိုး၊ သူမ၏ စနစ်ကပေးသော ဤဆုလာဘ်မှာ တကယ့်ကို အံ့မခန်းပါပေ။

【အရှင်... ဒီစနစ်ကတော့ တကယ့်ကို ဘယ်သူနဲ့မှမတူဘဲ အစွမ်းထက်လှပါတယ်】

【နင်ဘာလို့ ငါ့စိတ်ကို ထပ်ပြီး ချောင်းကြည့်နေပြန်တာလဲ】

【ကျွန်တော် ပျင်းလို့ပါ၊ ဒီနေ့ အရှင်တို့အိမ်ကို လူတွေအများကြီး ရောက်နေကြတယ်】

【ဘယ်သူတွေ ရောက်နေတာလဲ】

【ချင်းရွှဲ့ဒေါ်လေးရဲ့ ရည်းစားဘက်က မိသားစုဝင်တွေထင်တယ်】

တန်ယန် အံ့သြသွားရသည်။ သူမ ဘာလို့မသိရသနည်း၊ သူမ၏မိခင်ပင် သူမကို ဘာမှမပြောခဲ့ပါ၊ ထားလိုက်ပါတော့၊ နောက်မှပဲ ပြန်မေးကြည့်တော့မည်။

"အကယ်၍ 'ဝီလ်ပို့တ် ၁၇၈၂' ကို ပြောတာဆိုရင်တော့ ငါ့ဆီမှာ လက်ကျန်အချို့ ရှိသေးတယ် နင်ပြန်တဲ့အခါ ရတ်ဒ်ဝင်းကို တစ်ပုလင်း ထည့်ပေးလိုက်ဖို့ ပြောလိုက်မယ်လေ"

တန်ယန်က သူမအပေါ် လုံးဝပွင့်လင်းသည်ကို မြင်ရသောအခါ ကာရင်းမှာ စိတ်လှုပ်ရှား ဝမ်းသာသလို တစ်ဖက်တွင်လည်း အားမလိုအားမရ ဖြစ်သွားသည်။

"ယာနာ... ငါက ဝီလ်ခြံရဲ့ ထူးခြားချက်တွေကို ပြောပြချင်ရုံတင်ပါ နင်က အဲဒီခြံရဲ့ ပိုင်ရှင်ဆိုတာကို သူစိမ်းတွေကို အလွယ်တကူ မပြောမိစေနဲ့နော်၊ နားလည်လား"

"အင်းပါ... ငါက ဘယ်သူ့ကိုမဆို လျှောက်ပြောနေမှာ မဟုတ်ပါဘူး"

တန်ယန်က နားလည်ကြောင်း ခေါင်းညိတ်ပြလိုက်သည်။

"ဒါပေမဲ့ အယ်လီဆာကိုလည်း တစ်ပုလင်းလောက် လက်ဆောင်ပေးချင်သေးတယ် အဲဒါက အရမ်းကြီး လူသိထင်ရှား ဖြစ်သွားမလားလို့ စဉ်းစားနေတာ"

ကာရင်းက ရယ်မောလိုက်ရင်း

"နင့်ရဲ့ ရတနာတွေကတောင် ဒီလောက် လူအာရုံ စိုက်ခံနေရတာပဲ၊ ဝိုင်တစ်ပုလင်းလောက် ထပ်တိုးတာကတော့ မထူးဆန်းတော့ပါဘူး"

ဟု ဆိုလိုက်သည်။ အမှန်စင်စစ် တန်ယန်၏ ချမ်းသာကြွယ်ဝမှုကို လူတိုင်းသိပြီးသား ဖြစ်သည်။ သူမ၏ မြင့်မြတ်သော မိသားစု နောက်ခံကြောင့်ဟုသာ အားလုံးက ယူဆကြမည် ဖြစ်သဖြင့် သူမကို မည်သူကမျှ လျှော့တွက်ရဲကြမည် မဟုတ်ပေ။

"သိပ်ကောင်းတာပဲ ဒါဆို အခုပဲ တစ်ယောက်ယောက်ကို လွှတ်ပြီး ပို့ခိုင်းလိုက်မယ်"

တန်ယန်အတွက်မူ ဝိုင်ဖြစ်စေ၊ ရတနာဖြစ်စေ အထူးတလည် ရှားပါးလှသည့် အရာများ မဟုတ်သဖြင့် သူမသည် မျက်တောင်တစ်ချက် မခတ်ဘဲ ပေးကမ်းနိုင်ခြင်း ဖြစ်သည်။ အကယ်၍သာ ရင်းနှီးမှု မရှိလျှင်တော့ သူမသည် ဤမျှအထိ အရူးလုပ်ခံမည်မဟုတ်သည်မှာ သေချာလှပါသည်။

အယ်လီဆာက သူမအား သူငယ်ချင်း အသိုင်းအဝိုင်းနှင့် မိတ်ဆက်ပေးခြင်းအပေါ် တန်ယန်က ကျေးဇူးတင်မိသည်။ ကာရင်းရော အယ်လီဆာပါ သူငယ်ချင်းများအပေါ် အလွန်ရိုးသားပွင့်လင်းကြသူများဖြစ်ရာ ထိုသို့သော သူများနှင့် ခင်မင်ရသည်ကို သူမသဘောကျသည်။ ထို့အပြင် သူမတွင် ကိုယ်ပိုင်ရည်ရွယ်ချက် တစ်ခုလည်း ရှိနေသေးသည်။ နောင်တစ်ချိန်တွင် သူမကုမ္ပဏီမှ အနုပညာရှင်များ ဖက်ရှင်လောကသို့ ခြေလှမ်းစတင်ရာတွင် ကာရင်းသည် အကူအညီ အပေးနိုင်ဆုံးပုဂ္ဂိုလ်ဖြစ်လာပေလိမ့်မည်။

ဇန်နဝါရီလ ၁၇ ရက်၊ YL စံတော်ချိန် နံနက် ၁၁ နာရီတွင် အယ်လီဆာနှင့် သူမ၏ချစ်သူ ဟတ်ဒန်တို့သည် YL တော်ဝင်ဘုရားကျောင်းကြီး၌ ခမ်းနားထည်ဝါသော မင်္ဂလာအခမ်းအနားကို ကျင်းပခဲ့ကြသည်။ နှစ်ဖက်မိသားစုနှင့် စီးပွားဖက်ဖြစ်သော သူဌေးကြီးများသာမက တော်ဝင်မိသားစုဝင်များကပါ တက်ရောက် ဆုတောင်းပေးခဲ့ကြသည်။

တန်ယန်သည် ဘုရားကျောင်း အတွင်း၌ ထိုင်နေရင်း သူမ၏ခင်ပွန်းသစ်ဘေးတွင် ပျော်ရွှင်စွာ ခိုဝင်နေသော အယ်လီဆာကို ကြည့်ကာ သူမအတွက် များစွာ ဝမ်းသာပေးမိသည်။

အခမ်းအနား အပြီးတွင် အားလုံးသည် စီစဉ်ထားသော နေရာသို့ နေ့လယ်စာ စားပွဲအတွက် ဆက်လက် ထွက်ခွာခဲ့ကြသည်။ ယနေ့တွင် အယ်လီဆာသည် တန်ယန် လက်ဆောင်ပေးထားသော အဖိုးတန် ကျောက်စိမ်းနီ ရတနာများကို ဆင်မြန်းထားသဖြင့် ထူးထူးခြားခြား ပို၍ လှပနေတော့သည်။ ချမ်းသာကြွယ်ဝသော အမျိုးသမီး အများအပြားက ထိုရတနာများ၏ ရင်းမြစ်ကို စတင်စုံစမ်းနေကြပြီ ဖြစ်သည်။ အမျိုးသမီးဟူသည် လှပသော ရတနာများကို မည်သို့မျှ မတွန်းလှန်နိုင်ကြသည်မှာ အမှန်ပင်ဖြစ်သည်။

အယ်လီဆာနှင့် ဟတ်ဒန်တို့၏ မင်္ဂလာဆောင် ဓာတ်ပုံများသည် နိုင်ငံတကာ သတင်းမီဒီယာများ၏ မျက်နှာဖုံးတွင် နေရာယူထားပြီး ဖြစ်သည်။ အချို့က ဤမင်္ဂလာပွဲမှာ နိုင်ငံရေးနှင့် စီးပွားရေးအရ စီစဉ်ထားခြင်းသာဖြစ်ပြီး သူတို့နှစ်ဦးကြားတွင် သံယောဇဉ်မရှိဟု ဆိုကြသော်လည်း ဝေဖန်သူ အများစုက ထိုစကားကို ချက်ချင်းပင် ပယ်ချလိုက်ကြသည်။ သူတို့၏ မျက်လုံးများထဲတွင်ရှိသော အချစ်ရိပ်များကို ဖန်သားပြင်မှ တစ်ဆင့်ပင် ထင်ထင်ရှားရှား မြင်တွေ့နေရသောကြောင့် ဖြစ်သည်။

ထို့အပြင် မီဒီယာအချို့က ဤမင်္ဂလာပွဲအတွက် ကုန်ကျစရိတ်ကြီးမားပုံကိုလည်း ဖော်ပြခဲ့ကြသည်။ ပန်းရောင်နှင့် အဖြူရောင် အော်စတင်နှင်းဆီပန်းပေါင်း သိန်းနှင့်ချီ၍ လေယာဉ်ဖြင့် သယ်ယူကာ အလှဆင်ထားခြင်းသာမက သတို့သမီး၏ မင်္ဂလာဝတ်စုံ၊ သရဖူနှင့် လက်ဝတ်ရတနာ များမှာလည်း လက်ရာမြောက်လှသည်။ အထူးသဖြင့် သတို့သမီး ဆင်မြန်းထားသော ထိပ်တန်းအရည်အသွေးရှိ ကျောက်စိမ်းနီ ရတနာမှာ ဈေးကွက်အတွင်း ဝယ်ယူ၍ မရနိုင်လောက်အောင် တန်ဖိုးကြီးလှသည်။

အယ်လီဆာ၏ အလှပြင်အဖွဲ့နှင့် မီဒီယာများ အင်တာဗျူးရာတွင် အဓိကဒီဇိုင်နာက သတို့သမီးအတွက် မူလက စီစဉ်ထားသော ရတနာမှာ ဤအစုံမဟုတ်ကြောင်း ဖွင့်ဟပြောဆိုခဲ့သည်။ မူလက စီစဉ်ထားသည်မှာလည်း အလွန်ရှားပါးသော နီလာရတနာအစုံ ဖြစ်သော်လည်း မင်္ဂလာပွဲတွင် ဆင်မြန်းခဲ့သော ကျောက်စိမ်းနီ အစုံလောက် မပြည့်စုံကြောင်း ဆိုသည်။

ဤလက်ရာ မြောက်လှသော ကျောက်စိမ်းနီအစုံမှာ အယ်လီဆာ၏ သူငယ်ချင်းတစ်ဦးက ပေးအပ်သော မင်္ဂလာလက်ဆောင်ဖြစ်ကြောင်း သိရသည်။

မည်သူက ပေးခဲ့ခြင်း ဖြစ်သည်ကို မီဒီယာများက စူးစမ်းရန် ကြိုးစားသော်လည်း ဒီဇိုင်နာကမူ နားလည်ရခက်သော အပြုံးတစ်ခုဖြင့်သာ တုံ့ပြန်ခဲ့သည်။

ထို့ကြောင့် အင်တာနက်ပေါ်တွင် မည်သည့် လျှို့ဝှက်သူဌေးကြီးက အယ်လီဆာအား ဤမျှ တန်ဖိုးကြီးသော ရတနာကို ပေးခဲ့သနည်းဟု ဝိုင်းဝန်း မှန်းဆနေကြတော့သည်။ အချို့က သူမ၏အချစ်ကို မရနိုင်ခဲ့သော ပိုးပန်းသူ တစ်ဦးဟု ဆိုကြသလို အချို့ကလည်း အယ်လီဆာမှာ ဘုရင်မကြီး၏ အချစ်တော် ဖြစ်သဖြင့် ဘုရင်မကြီးကိုယ်တိုင် ပေးသနားခြင်း ဖြစ်မည်ဟု ဆိုကြသည်။

ဤအကြောင်းအရာများမှာ တန်ယန်အတွက်တော့ စိတ်ဝင်စားစရာ မဟုတ်တော့ပေ။ မင်္ဂလာပွဲ တက်ရောက်ပြီးနောက်တွင် သူမသည် ကိုယ်ပိုင်လေယာဉ်ဖြင့် တရုတ်နိုင်ငံသို့ ပြန်လည်ထွက်ခွာလာခဲ့ပြီ ဖြစ်သည်။