အခန်း (၂၃၇)

ရှန်းယွီသည် သူ၏ အခြေအနေပြကိန်းဂဏန်းများကို ကြည့်ရင်း ပြောင်းလဲသွားမှုများအပေါ် အလွန်ပင် အထင်ကြီးမိသည်။ ခန္ဓာကိုယ် သန့်စင်ခြင်းအပိုင်းတွင် နှစ်ဆင့်သာ တိုးတက်လာခြင်းအပေါ် အနည်းငယ် အားမရဖြစ်မိသော်လည်း ထူးကဲသာလွန်သော တာအိုခန္ဓာ၏ အစွမ်းမှာ အဆင့်နံပါတ်ထက် ပိုမိုနက်ရှိုင်းကြောင်း သူ နားလည်လိုက်သည်။ ကျင့်ကြံမှု မြင့်မားလာသည်နှင့်အမျှ အဆင့်တစ်ခု တက်လှမ်းရန်မှာ အဆမတန် ခက်ခဲလာစမြဲ ဖြစ်သည်။

ပို၍အရေးကြီးသည်မှာ သူ၏ အခြေခံခွန်အားသိသိသာသာ မြင့်တက်လာခြင်းပင်။ ဤအခြေခံခွန်အားကသာ သူတက်လှမ်းမည့် ခန္ဓာကိုယ်သန့်စင်ခြင်း အဆင့်တိုင်းကို ယခင်ထက် ပိုမိုစွမ်းအားကြီးမားစေမည်ပင်။

သူ၏ အစစ်အမှန် တိုက်ခိုက်ရေးစွမ်းအားကို စမ်းသပ်ရန်အတွက် ရှန်းယွီသည် တိုက်ပွဲပုံဖော်

စမ်းသပ်ခြင်းအတွင်းသို့ ဝင်ရောက်လိုက်သည်။ ယခုတစ်ကြိမ်တွင် သူသည် အခြေတည်ဝိညာဉ်

အဆင့် လီယောင်းကို မရွေးချယ်တော့ဘဲ သူမ၏ အစွမ်းအထက်ဆုံး ချိုးဖျက်ခြင်းပုံစံရှိသော မူလလီယောင်းကိုသာ တိုက်ရိုက် ရွေးချယ်လိုက်သည်။

စမ်းသပ်မှုပတ်ဝန်းကျင် ပေါ်ပေါက်လာသောအခါ လီယောင်းသည် သူမ၏ အခြေခံပုံစံဖြင့် ထွက်ပေါ်လာသည်။ သူမက ထုံးစံအတိုင်း အရှိန်အဟုန်ဖြင့် စတင်တိုက်ခိုက်လာသော်လည်း ရှန်းယွီအတွက်မူ သူမ၏ လှုပ်ရှားမှုများမှာ ရုပ်ရှင်ကို အနှေးပြကွက်ဖြင့် ကြည့်နေရသကဲ့သို့ပင်။ သူသည် ကြိုတင်သိမြင်မှုစွမ်းရည်ကိုပင် အသုံးမပြုရသေးဘဲ သူမရှေ့သို့ မျက်စိတစ်မှိတ်အတွင်း ရောက်ရှိသွားကာ ဝမ်းဗိုက်ကို ပြင်းထန်သော လက်သီးချက်တစ်ချက် ကျွေးလိုက်သည်။ ထိုဒဏ်ချက်ကြောင့် လီယောင်းမှာ မီတာအတော်ကြာအောင် နောက်သို့ လွင့်ထွက်သွားတော့သည်။

လီယောင်းသည် ချက်ချင်းပင် သူမ၏ ဒြပ်စင်ပုံစံနှင့် ဝိညာဉ်ပုံစံတို့သို့ အဆင့်ဆင့် ပြောင်းလဲတိုက်ခိုက်သော်လည်း ရှန်းယွီက အလွယ်တကူပင် အနိုင်ယူနိုင်ခဲ့သည်။ သူသည် ဤကဲ့သို့ အခြေခံအဆင့်များကို အချိန်ဖြုန်းနေရမည့်အစား အစွမ်းထက်ဆုံးပုံစံသို့ တိုက်ရိုက်ခုန်ကျော်

နိုင်မည့်စနစ်မျိုး စနစ်တွင် ရှိလျှင် ကောင်းမည်ဟုပင် တွေးတောနေမိသည်။

ထိုစဉ် သူ၏ ကြိုတင်သိမြင်မှု အာရုံက ရုတ်တရက် အသက်ဝင်လာသည်။ သူ၏ ရင်ဘတ်ဆီသို့ ဦးတည်လာသော ပြင်းထန်သည့် လက်သီးချက်တစ်ခုကို စိတ်အာရုံတွင် မြင်ယောင်လိုက်ရသည်။ ရှန်းယွီ၏ မျက်နှာထက်တွင် အပြုံးတစ်ခု ပေါ်လာသည်။

သူ၏ ကြိုတင်သိမြင်မှုစွမ်းရည်မှာ သိသိသာသာ အဆင့်မြင့်သွားခဲ့ပြီ ဖြစ်သည်။ ယခင်က အနာဂတ်ကို တစ်စက္ကန့်သာ ကြိုမြင်နိုင်သော်လည်း ယခုမူ သုံးစက္ကန့် အထိ အပြည့်အဝ ကြိုတင်မြင်တွေ့နိုင်ပြီ ဖြစ်သည်။ သူကဲ့သို့ အဆင့်မြင့်တိုက်ခိုက်ရေးသမားတစ်ဦးအတွက် အနာဂတ်ကို သုံးစက္ကန့် ကြိုမြင်ရခြင်းမှာ ရက်ပေါင်းများစွာ ကြိုတင်ပြင်ဆင်ခွင့် ရလိုက်သကဲ့သို့ပင် အားသာချက်ရှိလှပေသည်။

သူသည် အရှိန်အဟုန်ဖြင့် ပြေးဝင်လာသော တိုက်ကွက်ကို ရှောင်တိမ်းရန် အားစိုက်ထုတ်ခြင်းပင် မပြုတော့ပေ။ သူမ၏ လက်သီးချက်သည် သူ၏အနီးသို့ ရောက်လာသောအခါ သူက လက်ညှိုးတစ်ချောင်းကို သာမန်ကာလျှံကာ မြှောက်လိုက်ရုံဖြင့် သူမ၏ အင်အားအပြည့်ပါသော တိုက်ကွက်ကို အလွယ်တကူပင် တားဆီးလိုက်သည်။

"ဒါနဲ့တင် အဖြေက ထွက်နေပြီ ထင်တယ်"

သူက မည်သည့်ခံစားချက်မျှ မပါဘဲ ပြောလိုက်သည်။

ထို့နောက် လက်ညှိုးကို ခါထုတ်လိုက်ရုံဖြင့် သူမကို အပိုင်းပိုင်းအပြတ်ပြတ် ချေမှုန်းပစ်လိုက်ပြီး စမ်းသပ်မှုကို အဆုံးသတ်လိုက်တော့သည်။

သူ၏ အသိစိတ်မှာ ရုပ်ကမ္ဘာသို့ ပြန်ရောက်လာသောအခါ ရှန်းယွီ၏ မျက်နှာထက်တွင် စစ်မှန်သော ကျေနပ်အားရသည့် အပြုံးကြီးတစ်ခု ပေါ်လွင်နေသည်။ သူ အနိုင်ရနိုင်မည်ဟု ခန့်မှန်းထားခဲ့သော်လည်း ဤမျှလောက်ထိ တစ်ဖက်သတ် ဆန်လိမ့်မည်ဟုတော့ မထင်ထားခဲ့ပေ။ ယခု သူသည် သိသိသာသာ အစွမ်းထက်လာခဲ့ပြီ ဖြစ်ရာ ဤသည်ကို တိုက်ပွဲဟု ခေါ်ဆိုရန်ပင် ခက်ခဲလှပေသည်။

သူ၏ တိုက်ခိုက်ရေးဗီဇသည်လည်း ပိုမိုမြင့်မားသော အလားအလာများကို ဖွင့်လှစ်ပေးလိုက်ခြင်းက ပိုလျှံသော ဆုလာဘ်တစ်ခုပင်။ သူ၏ အပြုံးမှာ ပိုမိုကျယ်ပြန့်လာသည်။ ဤသည်မှာ သူသည် လီယောင်းထက် အမှန်တကယ်ပင် ပို၍ အစွမ်းထက်သွားပြီဟု ဆိုလိုခြင်းလား။

သို့သော် ထိုအတွေး ပိုမိုခိုင်မာလာသည်နှင့်အမျှ သူ၏ အပြုံးမှာ တဖြည်းဖြည်း မှေးမှိန်သွားသည်။ သူသည် လီယောင်း၏ လက်ရှိအခြေအနေထက် သာလွန်နေသည်မှာ သေချာသော်လည်း သူမ အခြေတည်ဝိညာဉ်အဆင့်သို့ တက်လှမ်းပြီးနောက်တွင်ကော... စွမ်းအားကွာဟချက်က ဘယ်လို ပြောင်းလဲသွားနိုင်မလဲ။

သူသည် ဤအခြေအနေကို ချက်ချင်းစမ်းသပ်ရန် ဆုံးဖြတ်လိုက်ပြီး စမ်းသပ်မှုအတွင်းသို့ တစ်ဖန်ပြန်လည် ဝင်ရောက်လိုက်သည်။ ယခုတစ်ကြိမ်တွင် သူ၏ ပြိုင်ဘက်အဖြစ် အခြေတည်ဝိညာဉ်အဆင့် လီယောင်းကို ရွေးချယ်လိုက်သည်။

ယခင် ချိုးဖျက်ခြင်းပုံစံသည် ဝိညာဉ်ပုံဖော်ခြင်းအဆင့်၏ အစောပိုင်းအဆင့် ခွန်အားရှိခဲ့လျှင် ယခု အခြေခံ အခြေတည်ဝိညာဉ်အဆင့် လီယောင်းမှာမူ ဝိညာဉ်ပုံဖော်ခြင်းအဆင့်သို့ တက်လှမ်းရန် ခြေတစ်လှမ်းအလိုအစွမ်းမျိုး ရှိပေသည်။

ရှန်းယွီသည် သူမ၏ အခြေခံပုံစံကို အချိန်တိုအတွင်း ချေမှုန်းလိုက်သည်။

ဆက်လက်၍ သူမ၏ ဒုတိယမြောက် အသွင်ပြောင်းလဲမှုဖြစ်သော ဒြပ်စင်ပုံစံသို့ ရောက်ရှိချိန်တွင် ရှန်းယွီ စိတ်ဝင်စားသွားသည်။ ဤပုံစံသည် သူမ၏ ယခင်က ချိုးဖျက်ခြင်းပုံစံ၏ စွမ်းအားနှင့် တူညီနေသည်။ ရှန်းယွီသည် ဤကဲ့သို့ အဆင့်ဆင့် အသွင်ပြောင်းလဲနိုင်သည့် စွမ်းရည်အပေါ် အမှန်တကယ် စိတ်ဝင်စားသွားမိပြီး သူကိုယ်တိုင်လည်း မည်သည့်အချိန်တွင် ထိုကဲ့သို့သော စွမ်းရည်မျိုး ရရှိနိုင်မလဲဟု တွေးတောနေမိတော့သည်။

သူသည် လီယောင်းကို ထိုချိုးဖျက်ခြင်းပညာရပ်အကြောင်း မေးဖူးသော်လည်း ၎င်းသည် သက်တမ်းကို စတေးပြီးမှ အသက်သွင်းရခြင်းဖြစ်ကြောင်း သိလိုက်ရသဖြင့် စိတ်ဝင်စားမှု လုံးဝမရှိတော့ပေ။ သူ၏ အခြေခံခွန်အားမှာ အလွန်ပင် ကြီးမားလှသဖြင့် သူ၏ ဒြပ်စင်ပုံစံမှာ အလှပြသဘောသာ ဖြစ်ပြီး ဒြပ်စင်များနှင့် ပေါင်းစပ်မှုကိုသာ မြှင့်တင်ပေးနိုင်ကာ တိုက်ခိုက်ရေးအတွက်မူ ထူးခြားသော အကျိုးသက်ရောက်မှု မရှိလှချေ။

ဒြပ်စင်ပုံစံကို အနိုင်ယူပြီးနောက်တွင် ဝိညာဉ်ပုံစံပေါ်ထွက်လာသည်။ ဤပုံစံသည် ယခင်ပုံစံထက် ပိုမိုသန်မာပြီး ဝိညာဉ်ပုံဖော်ခြင်းအဆင့်၏ အလယ်အလတ်အဆင့်ခန့် ရှိမည်ဟု သူ ခန့်မှန်းမိသည်။ သို့သော် ၎င်းကို အနိုင်ယူရန်လည်း သူ အလွန်အကျွံ အားထုတ်စရာ မလိုခဲ့ပေ။

သို့သော်လည်း နောက်ထပ်ပေါ်လာသော အသွင်ပြောင်းလဲမှုက သူ့ကို လုံးဝ အံ့အားသင့်သွားစေသည်။ ၎င်းသည် သူ မျှော်လင့်ထားသည့် ချိုးဖျက်ခြင်းပုံစံမဟုတ်ဘဲ သူ တစ်ခါမှ မမြင်ဖူးသေးသည့် ပုံစံသစ်တစ်ခု ဖြစ်နေသည်။

သူ့ရှေ့တွင် ပေါ်လာသော ပုံစံသစ်မှာ သူမ၏ မိုးကြိုးအသွင်ပြောင်းလဲမှုနှင့် ဆင်တူသော်လည်း အရွယ်ရောက်ပြီးသော ရုပ်သွင်ကဲ့သို့ ဝိညာဉ်ပုံစံ ၏ ဝိသေသလက္ခဏာများကို ထိန်းသိမ်းထားဆဲ ဖြစ်သည်။ သို့သော် သူမ၏ မျက်နှာအမူအရာမှာမူ ဝိညာဉ်ပုံစံ၏ ရင့်ကျက်ပြီး အခြားကမ္ဘာမှ ရောက်လာသကဲ့သို့သော အသွင်မျိုး မဟုတ်ဘဲ သူမ၏ ထုံးစံအတိုင်း ကလေးဆန်သော ပုံစံမျိုး ဖြစ်နေသည်။

သူမအနေဖြင့် အခြေတည်ဝိညာဉ်အဆင့်သို့ အောင်မြင်စွာ တက်လှမ်းပြီးနောက်တွင် နောက်ထပ် ပုံစံသစ်များ ထပ်မံရရှိဦးမလားဟု သူ တွေးတောမိသည်။

ဒါကြီးက မတရားဘူးလေ။ လူတစ်ယောက်တည်းမှာ အသွင်ပြောင်းလဲမှု ပုံစံ ဘယ်နှစ်မျိုးတောင် ရှိနိုင်တာလဲ။

"ဘာပဲဖြစ်ဖြစ်လေ..."

သူသည် ပြေးဝင်လာတော့မည့် တိုက်ကွက်အတွက် လက်သီးကို ပြင်ဆင်ရင်း တွေးလိုက်သည်။

ရုတ်တရက်ဆိုသလိုပင် သူ၏ နောက်ကျောတည့်တည့် မြေပြင်ပေါ်သို့ တောက်ပသော မိုးကြိုးတစ်ချက် ပစ်ချလိုက်သည်။ ထိုခဏမှာပင် သူမသည် မိုးကြိုးအတွင်းမှ ကိုယ်ယောင်ဖျောက်ကာ ပေါ်ထွက်လာပြီး သူ၏ အကွယ်မှနေ၍ အလစ်အငိုက် တိုက်ခိုက်ရန် ကြိုးပမ်းသည်။

ရှန်းယွီသည် သရော်ပြုံး ပြုံးရင်း လှည့်ကြည့်လိုက်သည်။ သူသည် ကြိုတင်သိမြင်မှု စွမ်းရည်ဖြင့် ဤဖြစ်စဉ်တစ်ခုလုံးကို မြင်တွေ့ထားပြီးသား ဖြစ်သည်။ သူသည် တိုက်ခိုက်လာသော သူမ၏လက်ကို လေထဲ၌ပင် အလွယ်တကူ ဖမ်းဆီးလိုက်ပြီး သူမ၏ အရှိန်ကို အသုံးချကာ ပခုံးပေါ်မှနေ၍ မြေပြင်ပေါ်သို့ အားပြင်းပြင်းဖြင့် လွှဲရိုက်လိုက်သည်။ သို့သော် သူမ၏ ခန္ဓာကိုယ် မြေပြင်နှင့် မထိတွေ့မီ စက္ကန့်ပိုင်းအလိုမှာပင် သူမသည် လုံးဝ ပျောက်ကွယ်သွားပြီး မူလနေရာ၌ ပြန်လည်ပေါ်လာပြန်သည်။

"ဟင်း... ဒါကတော့ နည်းနည်း စိတ်ရှုပ်စရာပဲ"