အခန်း (၁၃၆-၁၄၀)

အခန်း (၁၃၆) - အရှိန်အဝါ

လင်းရန်ယန် သည်လည်း အသာအယာ ခေါင်းညိတ်ပြလိုက်သည်။

“အင်း... ဒါဆိုရင်တော့ ဒီသတင်းကို လောလောဆယ် လျှို့ဝှက်ထားကြတာပေါ့ ”

ကျောက်အဘိုးကြီး သည်လည်း ထိုအတိုင်းပင် ဆုံးဖြတ်ချက် ချလိုက်၏။

“အော်... ကျွန်တော် မေ့တော့မလို့ ၊ အဘိုးကို ကူညီခိုင်းစရာ ကိစ္စတစ်ခု ရှိသေးတယ် ၊ မဟုတ်ရင် အပြင်ဘက်က မိုင်ရာချီတဲ့ ပတ်ဝန်းကျင်တစ်ခုလုံး မကြာခင်မှာ အေးခဲသွားတော့မှာ ”

လင်းရန်ယန်က ဟင်းလင်းပြင် အက်ကြောင်းအနီးတွင် အိပ်ပျော်နေသည့် စစ်မှန်သောအရှင်သခင် အဆင့်ရှိ နှင်းမိစ္ဆာ အကြောင်းကို ကျောက်အဘိုးကြီးအား အားကိုးတကြီးဖြင့် ပြောပြလိုက်တော့သည်။

“ဟဲဟဲ... ငါက ဘာကြီးများ ဖြစ်နေမလဲလို့ ၊ ဒါလေးတင်လား ၊ စိတ်မပူပါနဲ့ ၊ အရင်သွားကြည့်ကြတာပေါ့ ၊ မောင်းထုတ်ရုံတင် ဆိုရင်တော့ ၊ တစ်ဖက်က ကြယ်ငါးပွင့် မိစ္ဆာဧကရာဇ် ဖြစ်နေရင်တောင်မှ ၊ ဒီအဖိုးကြီး အောင်မြင်အောင် လုပ်နိုင်မယ်လို့ ယုံကြည်ချက် ရှိပါတယ် ”

ကျောက်အဘိုးကြီးက ယုံကြည်မှုအပြည့်ဖြင့် ပြုံးလျက် ဆိုလိုက်၏။ အဘယ့်ကြောင့်ဆိုသော် သူသည် ယခင်က ကြယ်သုံးပွင့် မိစ္ဆာဧကရာဇ် တစ်ကောင်ကိုပင် အမဲလိုက်နိုင်ခဲ့ဖူးသောကြောင့်ပင် ဖြစ်၏။

မိနစ်အနည်းငယ် ကြာပြီးနောက် ၊ ထိုအဘိုးအိုနှင့် လူငယ်လေးမှာ မိုင်သုံးရာကျော် ဝေးကွာသော နှင်းတောင်ကြီးတစ်ခုသို့ ရောက်ရှိသွားကြတော့သည်။ ထိုနှင်းတောင်၏ ရှေ့ မိုင်ပေါင်းများစွာ အကွာတွင်မူ ၊ အမြင့် မီတာ ခုနစ်ရာကျော်ရှိသော ဧရာမ ဟင်းလင်းပြင် အက်ကြောင်းကြီးတစ်ခု ရှိနေ၏။ သန်မာသည်ဖြစ်စေ ၊ မသန်မာသည်ဖြစ်စေ အစွမ်းထက်သော မိစ္ဆာသားရဲများ အားလုံးမှာ ဤနေရာမှ တိုးထွက်နေကြခြင်းဖြစ်ကြောင်း အထင်အရှားပင် ဖြစ်သည်။

လင်းရန်ယန် ဤနေရာသို့ ရောက်ရှိပြီး တစ်မိနစ်ပင် မပြည့်သေးမီမှာပင် ၊ မိစ္ဆာကြီး အချို့မှာ အကြောင်းရင်းမရှိဘဲ ဟင်းလင်းပြင် အက်ကြောင်းထဲသို့ မောင်းနှင်ခြင်း ခံလိုက်ရ၏။

“ဝုန်း... ”

သို့သော်လည်း ထိုစဉ်မှာပင် ဧရာမ နှင်းတောင်ကြီးမှာ ဖြည်းဖြည်းချင်း တုန်ခါလာတော့သည်။ နောက်တစ်ခဏ၌ တောင်ပေါ်ရှိ နှင်းများမှာ အောက်သို့ လျှောကျသွားပြီး ၊ အမြင့် မီတာ ထောင်ချီရှိကာ ဖင်ပိုင်းတွင် အမြီးလေးခု ပါရှိသော မိစ္ဆာမြေခွေးကြီး တစ်ကောင်မှာ ဖြည်းဖြည်းချင်း ထရပ်လိုက်၏။ ၎င်း၏ အရှိန်အဝါမှာ ထိတ်လန့်ဖွယ်ရာ မိစ္ဆာဧကရာဇ် ဒုတိယအဆင့် သို့ ရောက်ရှိနေသည်။

“ဒါက မိစ္ဆာဧကရာဇ်ကိုး ၊ ဘယ်ရောက်နေလဲလို့ ငါ ရှာနေတာ ၊ ဒါပေမဲ့ ဒီကောင်ရဲ့ နှင်းခဲဝိညာဉ်ခန္ဓာ ကလည်း စတုတ္ထအဆင့်မှာ ရှိနေတာပဲ ”

ကျောက်အဘိုးကြီးသည် တစ်ဖက်လူ၏ ကျင့်ကြံခြင်းအဆင့်ကို မြင်သောအခါ မျက်မှောင်ကြုတ်လိုက်မိသည်။အကယ်၍ သူသာ ယခင်အခြေအနေအတိုင်း ဆိုပါက ၊ ဤပါရမီရှင် မိစ္ဆာကို ယှဉ်နိုင်မည် မဟုတ်ချေ ။ သို့သော်လည်း ယခုအခါ သူ၏ ကျင့်ကြံခြင်းအဆင့်မှာလည်း တိုးတက်လာခဲ့ပြီး ၊ နှင်းခဲဝိညာဉ်ခန္ဓာမှာလည်း အဆင့်မြင့်သွားခဲ့သဖြင့် ၊ သူ၏ ခွန်အားမှာ သိသိသာသာ ခုန်ပျံကျော်လွှားသွားခဲ့ပြီ ဖြစ်သည်။ တစ်ဖက်ကို သတ်ပစ်နိုင်ရန် အာမမခံနိုင်သော်လည်း ၊ မောင်းထုတ်ရန်မှာမူ ဖြစ်နိုင်သေး၏။

သို့ပေမယ့် ထိုအမြီးလေးခုပါ နှင်းမြေခွေးကြီးမှာ ရုတ်တရက် ခေါင်းမော့လိုက်ပြီး ၊ ကောင်းကင်ယံရှိ လင်းရန်ယန်နှင့် ကျောက်အဘိုးကြီးကို အေးစက်သော မျက်ဝန်းများဖြင့် ကြည့်လိုက်၏ ။

“လူသားတွေ ၊ မင်းတို့ ဒီမှာ ဘာလာလုပ်နေကြတာလဲ ”

နောက်တစ်ခဏ၌ ကြည်လင်အေးစက်သော မိန်းကလေးငယ်တစ်ဦး၏ အသံမှာ သူတို့နှစ်ဦး၏ စိတ်အာရုံထဲသို့ ကူးစက်လာတော့သည်။

“သူက တကယ်ပဲ စကားပြောနိုင်တာလား ”

နှင်းမြေခွေး စကားပြောသည်ကို ကြားရသည့်အခါ လင်းရန်ယန်မှာ မျက်ခုံးပင့်မိသွား၏ ။ ဤအဆင့်သို့ ရောက်လျှင် သေချာပေါက် စကားပြောနိုင်မည် ဖြစ်သော်လည်း ၊ ဤကဲ့သို့သော အအေးလွန် နယ်မြေထဲတွင် လူသားတို့၏ ဘာသာစကားကို သူ မည်သို့ သင်ယူခဲ့သနည်း။

“ဟင်း... သေချာတာပေါ့ ၊ ဒီဧကရာဇ်မင်းက စကားပြောနိုင်တာပေါ့ ၊ ဘာလို့လဲဆိုတော့ ငါကလည်း တစ်ခါတုန်းက အပြင်လောကကနေ လာခဲ့တာလေ ၊ အခုတော့ ပြန်ထွက်လို့ မရတော့လို့ ဒီမှာ သောင်တင်နေတာ ”

လင်းရန်ယန်၏ စကားကို ကြားသောအခါ နှင်းမြေခွေး မိစ္ဆာဧကရာဇ်မင်းက ဂုဏ်ယူဝင့်ကြွားစွာဖြင့် နှာခေါင်းရှုံ့လိုက်သည်။ ထိုစကားကို ကြားလိုက်ရသည့်အခါ လင်းရန်ယန်နှင့် ကျောက်အဘိုးကြီးတို့ နှစ်ဦးစလုံး အံ့သြသွားကြ၏ ။

“သူကလည်း အပြင်က လာတာ ဟုတ်လား ”

လင်းရန်ယန်နှင့် ကျောက်အဘိုးကြီးတို့မှာ တစ်ဖက်ကအကောင်သည် အပြင်ထွက်ရန်အတွက် တံဆိပ်ပြားကို အသုံးပြုရမည်ဆိုသော နည်းလမ်းကို မသိရှိခြင်းဖြစ်မည်ဟု ချက်ချင်းပင် တွေးမိလိုက်ကြ၏။

“ဟုတ်တယ် ၊ ငါ ဒီကို မလာခင်တုန်းက ၊ ဒီဧကရာဇ်မင်းက ကြယ်တစ်ပွင့် မိစ္ဆာဘုရင် အဆင့်ပဲ ရှိသေးတာ ၊ ဒီမှာ နှင်းခဲအမျိုးအစား မိစ္ဆာသားရဲတွေ အများကြီး ရှိတယ်လို့ ကြားလို့ လာကစားခဲ့တာပေါ့ ၊ ဘယ်သူ သိမှာလဲ... မတော်တဆ ဒီထဲ ရောက်လာပြီးတဲ့နောက် ၊ ဒီက ကျင့်ကြံခြင်း ပတ်ဝန်းကျင်က အရမ်းကောင်းနေတာကို ၊ အဲဒါနဲ့ပဲ ငါ မိစ္ဆာဧကရာဇ် အဆင့်အထိ ရောက်အောင် ကျင့်ကြံခဲ့တာပေါ့ ၊ ဒါပေမဲ့ ဒီဧကရာဇ်မင်းက မကြာခင်ကမှ ပြန်ထွက်ချင်တယ်လို့ တွေးမိတဲ့အခါ ၊ ဒီဟင်းလင်းပြင် အက်ကြောင်းတွေက ငါ့ရဲ့ ခန္ဓာကိုယ် အရွယ်အစားအတွက် မလုံလောက်တော့တာကို တွေ့လိုက်ရတယ် ၊ ပျင်းပျင်းရှိတာနဲ့ပဲ ၊ ငါ ဒီမှာ နေ့တိုင်း စောင့်နေပြီးတော့ ၊ မိစ္ဆာဘုရင်တွေနဲ့ မိစ္ဆာကြီးတွေကို အပြင်လွှတ်ပြီး အချိန်ဖြုန်းနေတာပေါ့ ၊ အော်... မင်းတို့ မနေ့က ဝင်လာတုန်းကလည်း ငါ တွေ့သားပဲ ၊ ကံမကောင်းတာက မင်းတို့က ဒီအက်ကြောင်းကြီးထဲကနေ ဝင်မလာတာပဲ ၊ မဟုတ်ရင်တော့ ဒီဧကရာဇ်မင်းက မင်းတို့ကို သေချာပေါက် မြည်းစမ်းကြည့်မိမှာ ၊ ဘယ်တတ်နိုင်မလဲ... မင်းတို့ အပြင်လူတွေက ငါ့ရဲ့ အိမ်မွေးတိရစ္ဆာန်ကြီးကို သတ်ခဲ့ကြတာကိုး ”

နှင်းမြေခွေး မိစ္ဆာဧကရာဇ်မှာ လင်းရန်ယန်ကို နှမြောတသဟန်ဖြင့် ကြည့်လိုက်တော့သည်။ သူသည် သဘာဝအတိုင်းပင် လူမိုက်မဟုတ်သဖြင့် ၊ ကျောက်အဘိုးကြီး၏ စွမ်းအားမှာ သူ၏ အောက်တွင် မရှိသည်ကို မြင်နိုင်၏။ အကယ်၍သာ ယခု တိုက်ခိုက်မည်ဆိုပါက ၊ သေဆုံးမည့်သူမှာ သူကိုယ်တိုင်ပင် ဖြစ်နိုင်သည်။

ထိုစကားကို ကြားလိုက်ရသည့်အခါ လင်းရန်ယန်၏ ကျောရိုးမှာ တစ်ခဏချင်း အေးစိမ့်သွား၏။ ကံကောင်းထောက်မစွာဖြင့် သူသည် ဤနေရာသို့ မဝင်ခင်က ဗေဒင်တွက်ချက်ခဲ့သဖြင့် ၊ ယခင် ဟင်းလင်းပြင် အက်ကြောင်းမှာ အလုံခြုံဆုံး ဖြစ်ခဲ့ခြင်း ဖြစ်သည်။ မဟုတ်ပါက သူသည် ဤအကြီးဆုံး အက်ကြောင်းမှ တိုက်ရိုက် ဝင်လာခဲ့မည်ဆိုလျှင် ၊ သေချာပေါက် အသက်ပျောက်သွားလိမ့်မည် ။

သို့ပေမယ့် နှင်းမြေခွေး မိစ္ဆာဧကရာဇ် အပြင်မထွက်နိုင်ရသည့် အကြောင်းရင်းမှာ တကယ့်ကို ရင်နာစရာ ကောင်းလှပါပေသည် ၊ ၎င်းမှာ သူ၏ ကျင့်ကြံခြင်းစွမ်းအား အလွန်အမင်း အစွမ်းထက်လာသဖြင့် ၊ ခန္ဓာကိုယ်မှာ အပြင်ထွက်ရန်အတွက် အလွန်ကြီးမားလွန်းနေသောကြောင့် ဖြစ်သည်။

တစ်ချိန်တည်းမှာပင် လင်းရန်ယန်သည် မူလက နှင်းမုန်တိုင်း ဝက်ဝံ မှာ ဤနှင်းမြေခွေး မိစ္ဆာဧကရာဇ် မွေးမြူထားသည့် အရာဖြစ်ကြောင်း သိရှိသွား၏။ သေချာ စဉ်းစားကြည့်လျှင် ထိုဝက်ဝံ၏ ခန္ဓာကိုယ်ပေါ်ရှိ နှင်းခဲဝိညာဉ်စွမ်းအားမှာ ဤနှင်းမြေခွေး မိစ္ဆာဘုရင်၏ အရှိန်အဝါပင် ဖြစ်သည်။ အကယ်၍သာ ဟင်းလင်းပြင် အက်ကြောင်းက စွမ်းအားအများစုကို တားဆီးမထားခဲ့လျှင် ၊ ထို့အပြင် နှင်းမြေခွေး မိစ္ဆာဧကရာဇ်က သူမ၏ စတုတ္ထအဆင့် နှင်းခဲဝိညာဉ်ခန္ဓာကို ထိုဝက်ဝံပေါ်သို့ သက်ရောက်စေခဲ့မည်ဆိုပါက ၊ ကျန်းတောက်လင်း ကိုယ်တိုင် ဆင်းလာလျှင်ပင် အစိတ်စိတ်အမွှာမွှာ ဖြစ်သွားလိမ့်မည် ။

အဘယ့်ကြောင့်ဆိုသော် ဆင့်ခေါ်လိုက်သော ကျန်းတောက်လင်းမှာ စစ်မှန်သောအရှင်သခင် အဆင့် ခွန်အား ရှိသော်လည်း ၊ ထိုအဆင့်သို့ ရောက်ခါစသာ ရှိသေးသောကြောင့်ပင် ဖြစ်သည်။ ဤနှင်းမြေခွေး မိစ္ဆာဧကရာဇ်အဖို့ သူ့ကို ချက်ချင်း သတ်ပစ်ရန်မှာမူ ၊ အသက်တစ်ချက် ရှူလိုက်ရုံနှင့်ပင် လုံလောက်လှ၏။

“ကဲ... ဒီဧကရာဇ်မင်းကတော့ မထွက်သွားဘူး ၊ မင်းတို့ သွားချင်ရင် ဝေးဝေးကို သွားကြ ၊ ဒါမှမဟုတ်ရင်လည်း တိုက်ကြတာပေါ့ ၊ အကယ်၍ ငါ ရှုံးသွားမယ်ဆိုရင်လည်း ၊ ငါက မင်းတို့ မိသားစုတွေ ရှိတဲ့ နေရာကို နေ့တိုင်း သွားပြီး ပြဿနာ ရှာမှာပဲ ၊ မင်းတို့ထဲက ဘယ်သူ အပြင်ထွက်ရဲဦးမလဲ ကြည့်ကြသေးတာပေါ့ ”

ထိုစဉ်မှာပင် နှင်းမြေခွေး မိစ္ဆာဧကရာဇ်က ခပ်အေးအေးပင် ပြောလိုက်တော့သည်။သူမသည် ဤကဲ့သို့ ပျော်စရာကောင်းသော အရာကို ရှာတွေ့ထားခဲ့ရာ ၊ မည်သို့ ထွက်သွားမည်နည်း။

ယခုအခါ လင်းရန်ယန်နှင့် ကျောက်အဘိုးကြီးတို့မှာ အနည်းငယ် စကားစပျောက်သွားကြတော့သည်။ ဤမိစ္ဆာဧကရာဇ် ပြောပုံဆိုပုံမှာ အနည်းငယ် လူမိုက်ဆန်နေ၏။

ရုတ်တရက် လင်းရန်ယန်၏ မျက်ဝန်းများမှာ လင်းလက်သွား၏။

“ကျွန်တော့်မှာ မင်းကို အပြင်ခေါ်ထုတ်သွားနိုင်မယ့် နည်းလမ်း ရှိတယ် ၊ ဒါပေမဲ့ အရင်ဆုံး မင်း ဒီနေရာကနေ ထွက်သွားပေးရမယ် ၊ သေချာတာကတော့ မင်း အပြင်ကို လုံးဝ ထွက်သွားစရာ မလိုပါဘူး ၊ ဒါပေမဲ့ မင်းရဲ့ အရှိန်အဝါတွေကို အပြင်ဘက်ကို မှုတ်ထုတ်တာမျိုး ဒါမှမဟုတ် မိစ္ဆာသားရဲတွေကို လွှတ်တာမျိုးတော့ မလုပ်ရဘူး ၊ မင်း ဘယ်လို ထင်လဲ ”

လင်းရန်ယန်က ပြုံးလျက် နှင်းမြေခွေး မိစ္ဆာဧကရာဇ်ကို ပြောလိုက်သည်။

သူ၏ စကားအဆုံး၌ နှင်းမြေခွေး မိစ္ဆာဧကရာဇ်၏ မျက်ဝန်းများမှာ ချက်ချင်း တောက်ပသွားတော့သည်။ သူမ၏ ဧရာမ ခေါင်းကြီးမှာ လင်းရန်ယန်၏ မျက်နှာရှေ့သို့ ချက်ချင်း ရောက်ရှိလာပါ၏။

“မင်း တကယ် ပြောနေတာလား ”

နှင်းမြေခွေး မိစ္ဆာဧကရာဇ်က လင်းရန်ယန်၏ စကားမှာ အမှန်တကယ် ဟုတ်မဟုတ် စူးစမ်းသည့် အနေအထားဖြင့် သူမ၏ မျက်လုံးများကို မှေးကြည့်လိုက်တော့သည်။ အကယ်၍သာ အမှန်ဖြစ်ခဲ့လျှင် ၊ သူမ သေချာပေါက် သဘောတူလိမ့်မည်။ အဘယ့်ကြောင့်ဆိုသော် သူမသည် ဤနေရာ၌ နှစ်ပေါင်း ရာချီ ပိတ်မိနေခဲ့ရာ ၊ အချိန်အတော်ကြာကတည်းက ပျင်းရိငြီးငွေ့နေခဲ့သောကြောင့် ဖြစ်သည်။

သဘာဝအရ မိစ္ဆာဧကရာဇ်များမှာ လူသားများထက် အသက်ရှည်ကြ၏။ ဒုတိယအဆင့် အရှိန်အဝါရှိသူတစ်ဦးမှာ အသက် ၅၀၀၀ အထိ နေနိုင်သည်။ သူမသည် အသက် ကိုးရာကျော်သာ ရှိသေးသဖြင့် ၊ သီအိုရီအရဆိုလျှင် နှင်းမြေခွေး မျိုးနွယ်စု၏ အပျိုရွယ် မိန်းကလေးတစ်ဦးဟုသာ သတ်မှတ်နိုင်၏။ သူမ၏ ပါရမီနှင့်ဆိုလျှင် အပြင်လောကမှာပင် ‘မိစ္ဆာဧကရာဇ် တစ်ဝက်’ အဆင့်သို့ ရောက်ရှိနိုင်သည်။ ဤနေရာ၌ သောင်တင်နေခဲ့ရသည်မှာ နှမြောစရာ ကောင်းလှ၏။

“ဒါကတော့ သဘာဝပါပဲ ၊ ကျွန်တော် ကျွန်တော့်ရဲ့ ကျင့်ကြံခြင်း နှလုံးသား ကို တိုင်တည်ပြီး ကျိန်ဆိုရဲပါတယ် ၊ ကျွန်တော် မင်းကို ခေါ်ထုတ်သွားနိုင်တယ် ၊ ဒါပေမဲ့ အခုတော့ မဟုတ်ဘူး ၊ အလွန်ဆုံး တစ်လအတွင်းပေါ့ ၊ မင်း သဘောတူမယ်ဆိုရင် ၊ တစ်လအတွင်းမှာ မင်းကို ဒီကနေ ခေါ်ထုတ်သွားပေးမယ်လို့ ငါ အာမခံတယ် ၊ မင်း စမ်းကြည့်လို့ ရတာပဲ ၊ ဘာပဲဖြစ်ဖြစ် တစ်လဆိုတာ ခဏလေးပါ ”

လင်းရန်ယန်က သူ၏ ရှေ့မှ နှင်းမြေခွေး မိစ္ဆာဧကရာဇ်ကို ကြည့်ကာ ပြုံးလျက် ပြောလိုက်သည်။

ဘေးတွင် ရှိနေသော ကျောက်အဘိုးကြီးမှာမူ ၊ အဘယ့်ကြောင့် တစ်လ ဖြစ်နေရသည်ကို နားမလည်သဖြင့် မျက်မှောင်ကြုတ်မိသွားသော်လည်း ၊ လင်းရန်ယန်၏ ဆုံးဖြတ်ချက်ကို သူ မနှောင့်ယှက်ချေ။ ဘာပဲဖြစ်ဖြစ် သူ ရှိနေသေးသည် မဟုတ်ပါလား ၊ ကိစ္စမရှိပါ ၊ လိုအပ်လျှင် သူ တိုက်ခိုက်မည်သာ ဖြစ်သည်။

“တစ်လ ဟုတ်လား ”

လင်းရန်ယန်၏ စကားကို ကြားရသည့်အခါ နှင်းမြေခွေး မိစ္ဆာဧကရာဇ်က သူမ၏ ခေါင်းကို စောင်းလိုက်၏။၊

“ကောင်းပြီ ၊ ဒါဆိုရင်တော့ ငါ မင်းကို တစ်လ စောင့်ပေးမယ် ”

အခန်း (၁၃၇) - ကျင့်စဉ်များနှင့် တာအိုအတတ်ပညာများ

နှင်းမြေခွေး မိစ္ဆာဧကရာဇ်မင်း စကားပြောပြီးသည်နှင့်တစ်ပြိုင်နက် ၊ သူမသည် ချက်ချင်းပင် ထရပ်လိုက်တော့သည်။

“ဝုန်း... ”

တစ်ခဏချင်းမှာပင် ၊ ဧရာမ အေးခဲစေသော စွမ်းအားများမှာ အပြင်လောကမှနေ၍ အတွင်းဘက်သို့ ပြင်းထန်စွာ ပြန်လည် စီးဝင်လာ၏။ ဟင်းလင်းပြင် အက်ကြောင်း၏ အပြင်ဘက်ရှိ အဆုံးမဲ့လှသော နှင်းကမ္ဘာကြီးမှာ ၊ ဤအခိုက်အတန့်၌ အရှိန်အဟုန်ဖြင့် ပြန်လည် ကျုံ့ဝင်သွားသည်ကို လင်းရန်ယန် တစ်ယောက် အထင်အရှား မြင်တွေ့လိုက်ရ၏။

နောက်ဆုံးတွင် ၊ နာရီဝက်မျှအတွင်းမှာပင် ၊ ထိုအေးခဲမှုများမှာ ဟိမဝန္တာ တောင်တန်းကြီးအတွင်း၌သာ ကျန်ရှိတော့သည်။

“ငါ မင်းကို ဒီမှာ တစ်လ စောင့်နေမယ် ၊ အကယ်၍ မင်းသာ ငါ့ကို လာမခေါ်ဘူးဆိုရင် ၊ အပြင်ဘက်က မိုင်တစ်ထောင် ပတ်လည်မှာရှိတဲ့ အရာအားလုံးကို ငါ နှင်းခဲတွေအဖြစ် ပြောင်းပစ်မယ် ”

နှင်းမြေခွေး မိစ္ဆာဧကရာဇ်မင်းက လင်းရန်ယန်ကို ဒေါသတကြီး စိုက်ကြည့်ကာ ပြောလိုက်၏။ သို့သော်လည်း အဘယ့်ကြောင့်ဆိုသော် သူမ၏ ပြင်းထန်သော အမူအရာမှာ တစ်မျိုးတစ်ဖုံ ချစ်စရာ ကောင်းနေသည်။ ၎င်းမှာ ဤနှင်းမြေခွေး မိစ္ဆာဧကရာဇ်မင်းသည် နှစ်ပေါင်း ကိုးရာကျော် ရှင်သန်ခဲ့သော်လည်း ၊ သူမ၏ မျိုးနွယ်စုအရ ကြည့်လျှင်မူ ပျိုဖော်ဝင်စ အရွယ်သာ ရှိသေးသောကြောင့် ဖြစ်နိုင်၏။

“ကျွန်တော် သိပါတယ် ၊ တစ်လတောင် ကြာမှာ မဟုတ်ပါဘူး ”

လင်းရန်ယန်က အသာအယာ ပြုံးလျက် ဆိုလိုက်သည်။

“တောင်... ၊ ဂုဏ်ယူပါတယ် အရှင် ၊ မစ်ရှင် - ‘အေးခဲနေသော အန္တရာယ်ဇုန်ရှိ မူမမှန်မှုများကို စုံစမ်းစစ်ဆေးခြင်း’ ကို အောင်မြင်စွာ အပြီးသတ်နိုင်ခဲ့ပြီ ၊ အမှတ်ပေးမှု - SSS အဆင့် ၊ အေးခဲနေသော အန္တရာယ်ဇုန်၏ အရင်းအမြစ်ကို ရှာဖွေတွေ့ရှိမှုအတွက် ပါဝင်မှု - ၁၀ ရာခိုင်နှုန်း ၊ နှင်းမုန်တိုင်း ဝက်ဝံကို သတ်ဖြတ်နိုင်မှုအတွက် ပါဝင်မှု - ၃၀ ရာခိုင်နှုန်း ၊ အန္တရာယ်ဇုန်မှ ထွက်ပေါ်နေသော အအေးဓာတ်များကို လုံးဝ ဖြေရှင်းနိုင်မှုအတွက် ပါဝင်မှု - ၆၀ ရာခိုင်နှုန်း ၊ ယခုတစ်ကြိမ်တွင် ကုသိုလ်ကံ ၁.၅၈ သန်း ရရှိခဲ့ပါသည် ”

သေချာပေါက်ပင် ၊ ထိုစဉ်မှာပင် စနစ်၏ အသိပေးသံမှာ လင်းရန်ယန်၏ စိတ်အာရုံထဲသို့ ကူးစက်လာတော့သည်။

“စနစ်... ဆုလာဘ်တွေကိုပဲ တိုက်ရိုက်ပြောပြလိုက်တော့ ”

လင်းရန်ယန်က တွန့်ဆုတ်မနေဘဲ စနစ်ကို တိုက်ရိုက် အမိန့်ပေးလိုက်၏။

“ဒင်... ၊ ဂုဏ်ယူပါတယ် အရှင် ၊ မစ်ရှင် အောင်မြင်ပါသည် ၊ ရရှိခဲ့သော အစွမ်းမဲ့ ဆုလာဘ်များ မှာ - ဒြပ်စင်ငါးပါး ဝိညာဉ်ခန္ဓာ ၂၀ အမြှောက် ၅ ၊ အလိုအလျောက် သိုင်းပညာကျင့်ကြံမှု ၃၀ ၊ အလိုအလျောက် ကျင့်ကြံမှု ၁၀ ၊ မိုးကြိုးဝိညာဉ်ခန္ဓာ ၂၀ ၊ နှင်းခဲဝိညာဉ်ခန္ဓာ ၂၀ ၊ အလင်းဝိညာဉ်ခန္ဓာ ၄၀ ၊ အလိုအလျောက် ငွေကြေးတိုးပွားမှု ၂၀ ၊ အတတ်စုံပညာရှင်၂၀ ၊ စိတ်စွမ်းအား ၃၀ ၊ အလိုအလျောက် တိုက်ခိုက်ရေး ၄၀ ၊ တိုက်ခိုက်မှု ကွဲပြားခြင်း ၂၀ ၊ ဝိညာဉ်စွမ်းအား ရေကန် ၂၀ ၊ ကုသိုလ်တော် ရွှေရောင်အလင်း ၃၀ တို့ ဖြစ်သည် ”

စုစုပေါင်း အစွမ်းမဲ့ ဆုလာဘ် လေးရာတိတိမှာ လင်းရန်ယန်၏ ရှေ့မှောက်၌ ပေါ်ထွက်လာတော့သည်။ အသစ်ရရှိသော အစွမ်းများထဲတွင် ‘အလင်းဝိညာဉ်ခန္ဓာ’ လည်း ပါဝင်နေ၏။

၎င်းသည် အလင်း၏ စွမ်းပကားကို ထိန်းချုပ်ခွင့် ပေးသည်။ အလင်း၏ စွမ်းအားဆိုသည်မှာ အနောက်တိုင်း ဘုရားကျောင်းများ အထူးပြု ကျင့်ကြံသည့် အရာမျိုး ဖြစ်ပုံရ၏။ သို့သော်လည်း ဤသည်မှာ အစပျိုးရုံသာ ရှိသေးသည်။

“ဒင်... ၊ ဂုဏ်ယူပါတယ် အရှင် ၊ ရရှိခဲ့သော ကျင့်စဉ် ဆုလာဘ်မှာ - သုံးထောင်သော ဝိညာဉ်အာရုံ ဖြစ်ပါသည် ၊ ရရှိခဲ့သော တာအိုအတတ်ပညာ ဆုလာဘ်မှာ - ဝိညာဉ်ရေးရာ ဆုတ်ဖြဲခြင်း ဖြစ်ပါသည် ၊ ရရှိခဲ့သော ပစ္စည်း ဆုလာဘ်များမှာ - လူသားအဆင့် ကုန်ကြမ်း ၁၀,၀၀၀ ၊ မြေကမ္ဘာအဆင့် ကုန်ကြမ်း ၁,၀၀၀ ၊ ကောင်းကင်အဆင့် ကုန်ကြမ်း ၁၀၀ ၊ ဝိညာဉ်အဆင့် ကုန်ကြမ်း ၁၀ နှင့် တာအိုအဆင့် ကုန်ကြမ်း ၁ တို့ ဖြစ်ပါသည် ”

အသိပေးသံများ တစ်ခုပြီးတစ်ခု လင်းရန်ယန်၏ စိတ်ထဲသို့ စီးဝင်လာသည့်အခါ ၊ သူ၏ နှုတ်ခမ်းအစုံမှာ အသာအယာ ကွေးညွှတ်သွားတော့သည် ။ ယခုတစ်ကြိမ် ရရှိသော ဆုလာဘ်များမှာ သူ ထင်ထားသည်ထက် များစွာ ပိုမိုကောင်းမွန်လှ၏။ သူသည် အလွန်ဆုံးရှိလှ ဝိညာဉ်အဆင့် အထက်တန်းစား ကျင့်စဉ်နှင့် တာအိုအတတ်ပညာလောက်သာ ရလိမ့်မည်ဟု ထင်ထားခဲ့သော်လည်း ၊ ယခုမူ ဝိညာဉ်အဆင့် အမြင့်ဆုံး ကျင့်စဉ်တစ်ခုနှင့် တာအိုအဆင့် အနိမ့်တန်း အတတ်ပညာတစ်ခုကို ရရှိခဲ့ခြင်း ဖြစ်သည်။

လောလောဆယ်တွင် သူသည် ကျင့်စဉ်များနှင့် တာအိုအတတ်ပညာများအတွက် စိုးရိမ်နေစရာ မလိုတော့ပေ။

“စနစ်... အစွမ်းမဲ့ ဆုလာဘ်တွေ အားလုံးကို ဖြည့်သွင်းလိုက်တော့ ”

လင်းရန်ယန်က တွန့်ဆုတ်မနေဘဲ စနစ်ကို တိုက်ရိုက် ပြောလိုက်သည်။

“ဒင်... ၊ အစွမ်းမဲ့ ဆုလာဘ်များ ဖြည့်သွင်းခြင်းကို စတင်နေပါသည်”

“ဝုန်း... ”

စနစ်၏ အသိပေးသံ အဆုံးသတ်သွားသည်နှင့် ၊ ဟင်းလင်းပြင်ထဲမှ ပုံစံအမျိုးမျိုးရှိသော ဒြပ်စင်စွမ်းအားများမှာ လင်းရန်ယန်၏ ဝိညာဉ်ပင်လယ် အတွင်းသို့ တဟုန်ထိုး စုဆုံလာပါတော့သည် ၊ တစ်ခဏချင်းမှာပင် ၊ လင်းရန်ယန်၏ ဝိညာဉ်ခန္ဓာများ အားလုံးမှာ အရှိန်အဟုန်ဖြင့် စတင် ကြီးထွားလာသည်။

“ဒင်... ၊ ဂုဏ်ယူပါတယ် အရှင် ၊ ဒြပ်စင်ငါးပါး ဝိညာဉ်ခန္ဓာမှာ အဆင့် ၅ (၁၆/၃၂) သို့ တိုးတက်သွားပြီး ၊ အပိုဆောင်း ခွန်အားမှာ ၁၂၈ ဆအထိ မြင့်တက်သွားပါသည် ၊ အလိုအလျောက် ငွေကြေးတိုးပွားမှုမှာ အဆင့် ၆ (၄/၆၄) သို့ တိုးတက်သွားပြီး ၊ တစ်နေ့လျှင် အဆင့်မြင့် ဝိညာဉ်ကျောက်တုံး ၃၀၀ နှင့် ငွေစ ၁၀၀ သန်းကို ရရှိမည် ဖြစ်ပါသည် ၊ အလိုအလျောက် သိုင်းပညာကျင့်ကြံမှုမှာ အဆင့် ၆ (၁၄/၆၄) - တစ်နေ့လျှင် နှစ်ပေါင်း ၁၀၀,၀၀၀ စာ ရရှိပါသည် ၊ ဝိညာဉ်စွမ်းအား ရေကန်မှာ အဆင့် ၅ (၅/၃၂) - ဝိညာဉ်စွမ်းအား ၃,၀၀၀ ဆ ၊ ဝိညာဉ်စွမ်းအား ပြန်လည်ဖြည့်တင်းမှုနှုန်းမှာ အဆပေါင်း ၁၀၀,၀၀၀ ဖြစ်ပါသည် ၊ အတတ်စုံပညာရှင်မှာ အဆင့် ၆ (၀/၆၄) - တစ်နေ့လျှင် နှစ်ပေါင်း ၁၀၀,၀၀၀ စာ ၊ ကုသိုလ်တော် ရွှေရောင်အလင်းမှာ အဆင့် ၆ (၀/၆၄) - ကံတရားအမှတ် ၁၀၀,၀၀၀ ဆ ၊ စိတ်စွမ်းအားမှာ အဆင့် ၅ (၁၄/၃၂ ၊ ဝိညာဉ်နန်းကြိုး ၃,၀၀၀) ၊ မိုးကြိုးဝိညာဉ်ခန္ဓာမှာ အဆင့် ၅ (၁၄/၃၂ ၊ ၆၄ ဆ) ၊ နှင်းခဲဝိညာဉ်ခန္ဓာမှာ အဆင့် ၅ (၁၄/၃၂ ၊ ၆၄ ဆ) ၊ တိုက်ခိုက်မှု ကွဲပြားခြင်းမှာ အဆင့် ၅ (၉/၃၂ ၊ လမ်းကြောင်း ၃၂ ခု) ၊ အလိုအလျောက် တိုက်ခိုက်ရေးမှာ အဆင့် ၅ (၁၂/၃၂) - တစ်နေ့လျှင် တိုက်ခိုက်ရေး အတွေ့အကြုံ နှစ်ပေါင်း ၁၀,၀၀၀ စာ ရရှိပါသည် ၊ အလင်းဝိညာဉ်ခန္ဓာမှာ အဆင့် ၅ (၉/၃၂) - အလယ်အလတ်အဆင့် ဝိညာဉ်ခန္ဓာဖြစ်ပြီး ၊ အလင်း၏ စွမ်းအားကို ထိန်းချုပ်နိုင်ပါသည် ၊ အလင်းဓာတ် တိုက်ခိုက်ရေးစွမ်းရည်ကို ၆,၄၀၀ ရာခိုင်နှုန်း မြှင့်တင်ပေးကာ ၊ အလင်း၏ အလျင်နှုန်း ကို ပိုင်ဆိုင်စေပါသည် ၊ ဤအလျင်နှုန်းမှာ လေဝိညာဉ်ခန္ဓာ၏ အလျင်ထက် များစွာ သာလွန်လှပါသည် ”

လင်းရန်ယန်၏ အစွမ်းမဲ့ စွမ်းရည်များ အားလုံး မြင့်တက်သွားသည်နှင့်အမျှ ၊ အဆင့်မြှင့်တင်မှုဆိုင်ရာ အသိပေးသံများမှာ ဆက်တိုက် ထွက်ပေါ်လာတော့သည်။

“အလင်းဝိညာဉ်ခန္ဓာက တကယ်ပဲ အလျင်နှုန်းအတွက် နာမည်ကြီးတဲ့ ဝိညာဉ်ခန္ဓာ ဖြစ်နေတာပဲ ၊ ဒါပေမဲ့ ဒါကလည်း ကျိုးကြောင်းဆီလျော်ပါတယ် ၊ လေက ဘယ်လောက်ပဲ မြန်မြန် ၊ အလင်းရဲ့ အလျင်ကိုတော့ ဘယ်လိုမှ မမီနိုင်ဘူးလေ ၊ ဒါ့အပြင် ၊ အလင်းဝိညာဉ်ခန္ဓာက မကောင်းဆိုးဝါးတွေကို ချေမှုန်းတဲ့နေရာမှာလည်း တကယ့်ကို ထိတ်လန့်စရာ ကောင်းလောက်အောင် ပြင်းထန်တာပဲ ၊ ”အလယ်အလတ်အဆင့် ဝိညာဉ်ခန္ဓာရဲ့ အားကောင်းတဲ့ အပိုဆောင်း ခွန်အားနဲ့ဆိုရင် ၊ လေဝိညာဉ်ခန္ဓာကိုတော့ အနားပေးလို့ ရပြီ ထင်တယ် ”

အသစ်ရရှိသော ဝိညာဉ်ခန္ဓာကို ကြည့်ရင်း လင်းရန်ယန်မှာ မပြုံးဘဲ မနေနိုင်တော့ချေ။ တစ်ချိန်တည်းမှာပင် သူ၏ အစွမ်းမဲ့ စွမ်းရည်အားလုံးနီးပါးမှာ အဆင့်မြှင့်တင်ခြင်း ခံလိုက်ရပြီ.

အလိုအလျောက် ငွေကြေးတိုးပွားမှုမှပင်လျှင် ယခုအခါ တစ်နေ့လျှင် အဆင့်မြင့် ဝိညာဉ်ကျောက်တုံး သုံးရာတိတိကို သူ့အား ပေးစွမ်းနေပြီ ဖြစ်သည်။ အပြင်လောကတွင်မူ ၊ အဆင့်မြင့် ဝိညာဉ်ကျောက်တုံး တစ်တုံးတည်းကိုပင်လျှင် ၊ ကျင့်ကြံခြင်းလောကတစ်ခုလုံး နှစ်ပေါင်း တစ်ရာအတွင်း၌ ရှာဖွေတွေ့ရှိနိုင်ရန် ခဲယဉ်းလှ၏။ ဤသည်မှာပင် မော်ရှန်း ဂိုဏ်း၏ ဘိုးဘေးကြီး သေဆုံးပြီးနောက်တွင် တစ်တုံးတည်းသာ ပိုင်ဆိုင်ခဲ့ရသည့် အကြောင်းရင်း ဖြစ်သည်။

အဆင့်မြင့်ကို ထားလိုက်ပါဦး ၊ အလယ်အလတ်အဆင့်ကိုပင်လျှင် ၊ မော်ရှန်း ဂိုဏ်းတစ်ခုလုံး စုဆောင်းပါမှ တစ်နှစ်လျှင် အတုံးတစ်ရာ သို့မဟုတ် နှစ်ရာခန့်သာ ရရှိနိုင်ခြင်း ဖြစ်၏။ သေချာတာကတော့ ၊ အအေးလွန် နယ်မြေကို ဖွင့်လှစ်လိုက်သည်နှင့် ၊ အလယ်အလတ်အဆင့် ဝိညာဉ်ကျောက်တုံးများမှာ သေချာပေါက် မရှားပါးတော့ပါချေ ၊ တစ်နှစ်တာ ထွက်ရှိမှုနှုန်းမှာလည်း ဆယ်ဆထက်မက မြင့်တက်လာလိမ့်မည်။

သို့သော်လည်း ၊ အဆင့်မြင့် ဝိညာဉ်ကျောက်တုံးများကို ရရှိရန်အတွက်မူ စစ်မှန်သောအရှင်သခင် အဆင့်ရှိသော သွေးနှင်းမိစ္ဆာ များကို သတ်ဖြတ်နိုင်ရန် လိုအပ်သည်။ ထို့ကြောင့် လင်းရန်ယန်အနေဖြင့် တစ်နေ့လျှင် အဆင့်မြင့် ဝိညာဉ်ကျောက်တုံး သုံးရာ ရရှိနေခြင်းမှာ မည်မျှ ထိတ်လန့်စရာ ကောင်းသည်ကို မှန်းဆကြည့်နိုင်၏။ ကျင့်ကြံခြင်းလောကတစ်ခုလုံးရှိ ချမ်းသာကြွယ်ဝမှု အားလုံးကို ပေါင်းလိုက်လျှင်ပင် ဤမျှလောက် ရှိမည် မဟုတ်ချေ။ ထိုချမ်းသာကြွယ်ဝမှုများကိုပင် အလယ်အလတ်အဆင့် ဝိညာဉ်ကျောက်တုံးများဖြင့်သာ လဲလှယ်ရဦးမည်။

သီအိုရီအရဆိုလျှင် ၊ ကျင့်ကြံခြင်းလောကအတွင်း၌ ၊ အဆင့်မြင့် ဝိညာဉ်ကျောက်တုံး တစ်တုံးကို အနည်းဆုံး အလယ်အလတ်အဆင့် ဝိညာဉ်ကျောက်တုံး နှစ်ထောင် သို့မဟုတ် သုံးထောင်ခန့်နှင့် လဲလှယ်နိုင်သည်။

“ဟုတ်သားပဲ ၊ ဝိညာဉ်အမျိုးအစား ကျင့်စဉ်ကို ငါ မေ့နေတာ ၊ အရင်ဆုံး အဲဒါကို စစ်ဆေးကြည့်ဦးမှ ”

လင်းရန်ယန်သည် သူ ယခုလေးတင် ရရှိထားသော ကျင့်စဉ်ကို ချက်ချင်းပင် အမှတ်ရလိုက်၏။ ထို့နောက် သူသည် ၎င်းကို တိုက်ရိုက် ဖွင့်ကြည့်လိုက်တော့သည်။

“သုံးထောင်သော ဝိညာဉ်အာရုံ (ဝိညာဉ်အဆင့် အမြင့်ဆုံး) - ဝိညာဉ်အမျိုးအစား ကျင့်စဉ် ဖြစ်ပါသည် ၊ မိမိ၏ ဝိညာဉ်အာရုံကို ဆုတ်ဖြဲ၍ ခွဲထုတ်ရန် လိုအပ်ပါသည် ၊ သုံးကြိမ်တိုင်တိုင် ခွဲထုတ်ပြီးနောက် ၊ ဝိညာဉ်အာရုံ နန်းကြိုး ၈ ခုသို့ ရောက်ရှိခြင်းကို အခြေခံအဆင့် ကျင့်ကြံမှုဟု သတ်မှတ်ပါသည် ၊ ထို့နောက် တစ်ကြိမ် ဆုတ်ဖြဲလိုက်တိုင်း ၊ ဝိညာဉ်အရေအတွက်မှာ နှစ်ဆ တိုးပွားသွားမည်ဖြစ်ပြီး ၊ ကျင့်စဉ်အဆင့်မှာလည်း အဆင့်ငယ် တစ်ခုစီ မြင့်တက်သွားမည် ဖြစ်ပါသည် ၊ ပြီးပြည့်စုံသော အဆင့်အထိ ကျင့်ကြံနိုင်ရန် ၊ သုံးထောင်သော ဝိညာဉ်အာရုံသည် စုစုပေါင်း ၁၁ ကြိမ် ဆုတ်ဖြဲရန် လိုအပ်ပါသည် ၊ ထိုအချိန်တွင် ကျင့်စဉ်မှာ မြင့်မြတ်အဆင့်သို့ ထိုးဖောက်သွားမည်ဖြစ်ပြီး ၊ မြင့်မြတ်ဘုရင် အဆင့်သို့ ရောက်ရှိမည် ဖြစ်ပါသည် ၊ မှတ်ချက် - ဝိညာဉ်အရေအတွက် များပြားလေလေ ၊ ခွန်အားအပိုဆောင်းမှာ မြင့်မားလေလေ ဖြစ်ပါသည် ၊ ၁၁ ကြိမ် ဆုတ်ဖြဲခြင်းသည် ဝိညာဉ်စွမ်းအားကို ၁၁ ဆအထိ မြှင့်တင်ပေးမည် ဖြစ်ပါသည် ၊ ကျင့်ကြံမှု ပြီးပြည့်စုံသည့်အဆင့်သို့ ရောက်ရှိပါက ၊ အပိုဆောင်း ခွန်အားမှာ နှစ်ဆ တိုးပွားသွားမည် ဖြစ်ပါသည် ”

သို့သော်လည်း ၊ စတင်လိုက်သည်နှင့်ပင် ၊ ဤတိုက်ကွက်မှာ တကယ့်ကို အဖျက်စွမ်းအားကြီးသော ဗုံးတစ်လုံးနှင့် တူလှသည်။ ခွန်အား ၁၁ ဆ မြင့်တက်သွားသည်ဆိုသည်မှာ သာမန်အားဖြင့် နည်းပါးသည်ဟု ထင်ရသော်လည်း ၊ လက်တွေ့တွင်မူ ၎င်းသည် ကောင်းကင်ကို ဆန့်ကျင်နေသော အစွမ်းပင် ဖြစ်၏ ။

ဤသည်မှာ လက်ရှိရှိနေသော အခြေခံအားလုံးအပေါ်တွင် ၁၁ ဆ အပိုဆောင်း ပေါင်းထည့်လိုက်ခြင်း ဖြစ်သည်။ တစ်နည်းအားဖြင့် ပြောရလျှင် ၊ လင်းရန်ယန်၏ စိတ်စွမ်းအားမှာ အဆင့် ၅ သို့ ရောက်ရှိနေပြီး ၊ ၃၂ ဆသော တိုက်ခိုက်ရေးစွမ်းရည်ကို ပေးစွမ်း၏။ အကယ်၍ ဤကျင့်စဉ်ကိုသာ ထည့်သွင်းလိုက်မည်ဆိုပါက ၊ အခြေခံ အပိုဆောင်း ခွန်အားမှာ ၃၆၀ ဆအထိ ရောက်ရှိသွားနိုင်သည်။ ဤသည်မှာ တာအိုအတတ်ပညာများကို မတွက်ချက်ရသေးသည့် အခြေအနေပင် ဖြစ်၏။ အကယ်၍ ထိုအတတ်ပညာများမှာလည်း ကျင့်စဉ်နှင့် အဆင့်တူညီပါက ၊ တူညီသော မြှောက်ဖော်ကိန်းကိုပင် ရရှိနိုင်သေးသည်။

၎င်းမှာ ၁၁ ဆပင် ဖြစ်၏။ ထိုအချိန်တွင် လင်းရန်ယန်သည် သူနှင့် အဆင့်တူညီသူများထက် အဆပေါင်း ၄,၀၀၀ မျှသော တိုက်ခိုက်ရေးစွမ်းရည်ကို ထုတ်ဖော်နိုင်လိမ့်မည်။ အဆပေါင်း လေးထောင်တိတိပင် ဖြစ်ပါ၏ ၊ ဤအစွမ်းတစ်ခုတည်းနှင့်တင် ၊ လင်းရန်ယန်သည် အထပ်တစ်ထောင် တိုက်ခိုက်ရေးမျှော်စင်ကို အသာအယာ ချေမှုန်းပစ်နိုင်သည်။

သေချာတာကတော့ ၊ လင်းရန်ယန်၏ ကျင့်ကြံခြင်းအဆင့်မှာ မြင့်မြတ်ဘုရင် အဆင့်သို့ ရောက်ရှိသွားပါက ၊ အခြေအနေမှာ ပြောင်းလဲသွားလိမ့်မည်။ ထိုအဆင့်ရှိသူတိုင်းမှာ အဆင့်တူ သို့မဟုတ် ထိုထက်မြင့်သော ကျင့်စဉ်များနှင့် တာအိုအတတ်ပညာများကို ကျင့်ကြံထားကြသူများ ဖြစ်ပါသည် ၊ ၎င်းတို့အားလုံးမှာ ၁၀၀ ရာခိုင်နှုန်း ကျွမ်းကျင်မှုသို့ မရောက်နိုင်ကြသကဲ့သို့ ၊ လူတိုင်းမှာလည်း ဝိညာဉ်ခန္ဓာ မရှိကြချေ။ သို့သော်လည်း ဝိညာဉ်ခန္ဓာ မရှိသော သာမန်လူတစ်ဦးပင်လျှင် ၊ အဆပေါင်း ခုနစ်ဆယ် သို့မဟုတ် ရှစ်ဆယ်မျှသော တိုက်ခိုက်ရေးစွမ်းရည်ကို အလွယ်တကူ ရရှိနိုင်ကြသည်။

အခန်း (၁၃၈) - အကြီးမြတ်ဆုံးသော ဝှက်ဖဲ

ထို့ကြောင့် အကယ်၍ တစ်စုံတစ်ယောက်သည် မြင့်မြတ်ဘုရင် အဆင့်သို့ ရောက်ရှိသွားသော်လည်း ၊ တိုက်ခိုက်ရေးစွမ်းရည် အပိုဆောင်းမှာ အဆပေါင်း ၄,၀၀၀ မျှသာ ရှိနေသေးပါက ၊ ထိုအဆ ၄,၀၀၀ ကို ၈၀ နှင့် ပြန်လည် စားရပေလိမ့်မည်။

၎င်းမှာ အဆင့်တူ ကျင့်ကြံသူတစ်ဦးထက် တိုက်ခိုက်ရေးစွမ်းရည် အဆပေါင်း ငါးဆယ်မျှသာ ပိုမိုသာလွန်သည်ဟု အဓိပ္ပာယ်ရပါသည် ၊ ၊ ဤသည်မှာ အထပ်တစ်ထောင် စမ်းသပ်မှုမျှော်စင်၏ အထပ်ငါးဆယ်မြောက်ကို ကျော်ဖြတ်ရန်အတွက်ပင် မနည်း အားစိုက်ရမည့် အခြေအနေ ဖြစ်ပါ၏။

သေချာတာကတော့ ၊ အကယ်၍ ကျင့်စဉ်ရော သိုင်းပညာကိုပါ ပြီးပြည့်စုံသော အဆင့် အထိ ကျင့်ကြံနိုင်ခဲ့မည်ဆိုပါက ၊ တိုက်ခိုက်ရေးစွမ်းရည်မှာ နောက်ထပ် လေးဆခန့် ထပ်မံ မြင့်တက်လာနိုင်သည်။ ထိုအခါတွင် အဆင့်တူ သိုင်းပညာရှင်တစ်ဦးထက် အဆပေါင်း ၂၀၀ မျှ ပိုမို အစွမ်းထက်သွားလိမ့်မည်။

ထို့ကြောင့် ကျင့်စဉ်တစ်ခုကို ပြီးပြည့်စုံသော အဆင့်အထိ ကျင့်ကြံနိုင်ခြင်း ရှိ၊ မရှိ ဆိုသည်မှာ အလွန်ပင် အရေးကြီးလှသော စံနှုန်းတစ်ခု ဖြစ်သည်။

လက်ရှိတွင် လင်းရန်ယန် ၏ အဆင့်မှာ ကောင်းကင်အရှင်သခင် အဆင့်သာ ရှိသေးပြီး ၊ သာမန် ကောင်းကင်အရှင်သခင်များ ကျင့်ကြံသော ကျင့်စဉ်နှင့် တာအိုအတတ်ပညာများမှာ ခွန်အားကို လေးဆ သို့မဟုတ် ငါးဆခန့်သာ မြှင့်တင်ပေးနိုင်သည်။

ထို့ကြောင့် ထိုလေးငါးဆသော တိုက်ခိုက်ရေးစွမ်းရည် အပြင် ၊ လင်းရန်ယန်သည် ယခင်က တိုက်ခိုက်မှု ကွဲပြားခြင်း ကို အသုံးမပြုဘဲနှင့်ပင် အဆပေါင်း ၉၅၀ မျှသော တိုက်ခိုက်ရေးစွမ်းရည်ကို ထုတ်ဖော်နိုင်ခဲ့ခြင်း ဖြစ်၏။ အကယ်၍သာ ထိုစွမ်းအားများကို မခွဲခြားဘဲ စုစည်းလိုက်မည်ဆိုပါက ၊ သူသည် အမှန်တကယ်ပင် အဆပေါင်း လေးထောင်နီးပါးသော စွမ်းအားကို ပိုင်ဆိုင်ထားခြင်း ဖြစ်သည်။

၎င်းတို့ထဲတွင် ၆၄ ဆမှာ ဒြပ်စင်ငါးပါး ဝိညာဉ်ခန္ဓာမှ ရရှိသော အပိုဆောင်း ခွန်အားဖြစ်ပြီး ၊ ကျန်ရှိသော အဆ ၈၀ မှာ ကျင့်စဉ်နှင့် တာအိုအတတ်ပညာ နှစ်ခုစလုံးကို ၁၀၀ ရာခိုင်နှုန်းအထိ ကျင့်ကြံထားနိုင်မှု၏ အကျိုးရလဒ်ပင် ဖြစ်သည်။

တာအိုအဆင့် ကျင့်စဉ်တစ်ခုကို ၁၀၀ ရာခိုင်နှုန်းအထိ ကျင့်ကြံထားနိုင်ခြင်းမှာ ၊ သာမန် မြင့်မြတ်အဆင့် အထွတ်အထိပ် ကျင့်စဉ်တစ်ခုကို ကျွမ်းကျင်ရုံမျှ ကျင့်ကြံထားသူ၏ ခွန်အားထက်ပင် လျော့နည်းခြင်း မရှိချေ ။ ဤသည်မှာပင် လင်းရန်ယန်၏ အကြီးမြတ်ဆုံးသော ဝှက်ဖဲ ဖြစ်သည်။

အဘယ့်ကြောင့်ဆိုသော် ဝိညာဉ်ခန္ဓာ ဆိုသည်မှာ အခြားသူများ၏ မျက်စိဖြင့် မြင်နိုင်သောအရာ ဖြစ်သော်လည်း ၊ ကျင့်ကြံမှု အနက်ရှိုင်းမှာမူ ဖုံးကွယ်ထားနိုင်သောကြောင့် ဖြစ်သည်။

သေချာပေါက်ပင် ၊ ‘သုံးထောင်သော ဝိညာဉ်အာရုံ’ ကျင့်စဉ်က ဤမျှ အစွမ်းထက်နေမှတော့ ၊ ‘ဝိညာဉ်ရေးရာ ဆုတ်ဖြဲခြင်း’ အတတ်ပညာကလည်း အားနည်းနေမည် မဟုတ်ချေ။

“ဝိညာဉ်ရေးရာ ဆုတ်ဖြဲခြင်း - တာအိုအဆင့် အနိမ့်တန်း ကျင့်စဉ်ဖြစ်ပြီး ၊ ရှေးဟောင်း မသေမျိုး သူရဲကောင်းကြီးတစ်ဦး ဖန်တီးခဲ့သော ကျင့်စဉ်လည်း ဖြစ်ပါသည် ၊ ၎င်းသည် သုံးထောင်သော ဝိညာဉ်အာရုံ ကျင့်စဉ်အတွက် အထောက်အကူပြု တာအိုအတတ်ပညာ တစ်ခု ဖြစ်သည် ၊ သုံးထောင်သော ဝိညာဉ်အာရုံ ကျင့်စဉ်၏ အဆင့် မြင့်တက်လာသည်နှင့်အမျှ ၊ ဤအတတ်ပညာသည်လည်း လိုက်ပါ တိုးတက်နိုင်ပါသည် ၊ ဝိညာဉ်အာရုံကို သုံးကြိမ် ဆုတ်ဖြဲပြီးနောက် ၊ ၎င်း၏ အစွမ်းအစ အပြည့်အဝကို ထုတ်ဖော်နိုင်ပါသည် ၊ ရန်သူအား ဆုတ်ဖြဲပျက်စီးစေမည့် ဝိညာဉ်ဓားသွား ရှစ်လက်အဖြစ် ဖန်တီးနိုင်ပါသည် ၊ ၎င်းသည် စိန့်ဘုရင် အလယ်အလတ်အဆင့် အထိ ရောက်ရှိနိုင်ပါသည် ၊ ထို့အတူ ၊ ၎င်းကို တိုက်ခိုက်မှု ကွဲပြားခြင်း နှင့် ပေါင်းစပ်လိုက်ပါက ၊ ဝိညာဉ်ရေးရာ ဆုတ်ဖြဲခြင်း ဓားသွားများကို အဆပေါင်းများစွာ တိုးပွားစေနိုင်ပါသည် ၊ လက်ရှိတွင် တိုက်ခိုက်မှု ကွဲပြားခြင်း၏ အဆင့်မှာ ၅ ဖြစ်သဖြင့် ၊ ဝိညာဉ်ရေးရာ ဆုတ်ဖြဲခြင်း၏ သတ်ဖြတ်နိုင်စွမ်းကို အဆင့်ကြီး တစ်ခုနှင့် အဆင့်ငယ် တစ်ခုအထိ မြှင့်တင်ပေးနိုင်ပါသည် ”

သို့ပေမယ့် ၊ ဝိညာဉ်ရေးရာ ဆုတ်ဖြဲခြင်း၏ အချက်အလက်များ ပေါ်ထွက်လာသည်နှင့်တစ်ပြိုင်နက် ၊ လင်းရန်ယန်ပင်လျှင် အသက်ရှူမှားမတတ် ဖြစ်သွားရ၏။

ထိတ်လန့်စရာပင် ၊ ၎င်းမှာ တကယ့်ကို ထိတ်လန့်စရာ ကောင်းလွန်းလှသည်။ ‘သုံးထောင်သော ဝိညာဉ်အာရုံ’ နှင့် တွဲဖက်ထားသဖြင့် ၎င်း၏ ကြီးထွားနိုင်စွမ်းမှာ ကောင်းကင်ကို ဆန့်ကျင်နေပြီ ဖြစ်၏။ ၎င်းသည် တိုက်ခိုက်မှု ကွဲပြားခြင်းနှင့်ပါ ထပ်ဆင့်၍ ခွန်အားပေါင်းစပ်နိုင်လိမ့်မည်ဟု သူ မမျှော်လင့်ထားခဲ့ချေ။

“ဒါဆိုရင် ၊ ငါက သုံးထောင်သော ဝိညာဉ်အာရုံကို ဝိညာဉ်အာရုံ ရှစ်ခုအဖြစ် ဆုတ်ဖြဲနိုင်ရုံနဲ့တင် ၊ ဒီဝိညာဉ်ရေးရာ ဆုတ်ဖြဲခြင်းက စိန့်အဆင့် အလယ်အလတ် တိုက်ခိုက်မှုကို တိုက်ရိုက် ထုတ်ဖော်နိုင်မှာပေါ့ ၊ အလို... ဒါဆိုရင် ဒီတာအိုအတတ်ပညာက ငါ့ရဲ့ အစွမ်းအထက်ဆုံး တိုက်ကွက် ဖြစ်သွားပြီ မဟုတ်လား ”

လင်းရန်ယန်မှာ အသက်ကို ပြင်းပြင်းရှူလိုက်မိတော့သည်။

“စနစ်... အလိုအလျောက် သိုင်းပညာကျင့်ကြံမှုကို သုံးပြီး ၊ ကျင့်စဉ်နဲ့ တာအိုအတတ်ပညာတွေကို ငါ့အတွက် တိုက်ရိုက် သင်ယူပေးတော့ ”

လင်းရန်ယန်က တွန့်ဆုတ်မနေဘဲ စနစ်ကို ချက်ချင်း အမိန့်ပေးလိုက်၏။ တစ်ရက်တည်းမှာပင် သူသည် နှစ်ပေါင်း ၁၀၀,၀၀၀ စာရှိသော ကျင့်ကြံမှု အတွေ့အကြုံကို ရရှိနေပြီ ဖြစ်သည်။ ၎င်းကို ကျင့်စဉ်နှစ်ခုအကြား ခွဲဝေလိုက်မည်ဆိုလျှင်ပင် တစ်ခုချင်းစီ၌ နှစ်ပေါင်း ၅၀,၀၀၀ တိတိ ရရှိမည်။

ဤတာအိုအတတ်ပညာ နှစ်ခုစလုံးကို တာအိုအဆင့် အထွတ်အထိပ်အထိ မြှင့်တင်နိုင်မည် မဟုတ်ဟု လင်းရန်ယန် လုံးဝ မယုံကြည်ချေ ။

သေချာတာကတော့ ၊ မြင့်မြတ်အရှင်သခင် အဆင့်ရှိသော ပုဂ္ဂိုလ်ကြီးများသည် နှစ်ပေါင်း တစ်သိန်းတိုင်တိုင် ရှင်သန်နိုင်ကြပြီး ၊ ၎င်းတို့ထဲမှ တစ်ဦးချင်းစီမှာလည်း အလွန်ထူးချွန်သော ပါရမီရှင်များ ဖြစ်ကြသည် ။ ထို့ကြောင့် လင်းရန်ယန်အနေဖြင့် သူ၏ နှစ်ပေါင်း ငါးသောင်းစာ ကျင့်ကြံမှု အတွေ့အကြုံက ၊ ပါရမီရှင်များပင် တစ်သက်လုံး ကျင့်ကြံပါမှ အောင်မြင်နိုင်ခဲသည့် မြင့်မြတ်အဆင့် ကျင့်စဉ်များကို ချက်ချင်း အောင်မြင်သွားလိမ့်မည်ဟုတော့ မမျှော်လင့်ထားပါချေ ။ သို့ပေမယ့် သူ စောင့်နိုင်ပါသည် ၊ မဟုတ်ပါလား ၊ ၊ နှစ်ရက် ၊ သုံးရက် ၊ သို့မဟုတ် သူ၏ အလိုအလျောက် သိုင်းပညာကျင့်ကြံမှု အဆင့် ထပ်မံ မြင့်တက်လာသည်အထိပေါ့ ၊။

“ဒင်... ၊ သင်ယူခြင်းကို စတင်နေပါသည် ”

စနစ်ကလည်း ချက်ချင်းပင် တုံ့ပြန်လိုက်သည်။

တစ်ခဏချင်းမှာပင် ၊ များပြားလှသော မှတ်ဉာဏ်များမှာ လင်းရန်ယန်၏ စိတ်ထဲသို့ စီးဝင်လာ၏။ ထိုအခါ လင်းရန်ယန်သည် သူ၏ ဝိညာဉ်အာရုံမှာ တစ်ခဏချင်းအတွင်း ဝိညာဉ်နန်းကြိုး နှစ်ခုအဖြစ် ဆုတ်ဖြဲခံလိုက်ရသည်ကို အထင်အရှား ခံစားလိုက်ရသည်။ အသစ်ဆုတ်ဖြဲခံလိုက်ရသော ဝိညာဉ်အာရုံ နှစ်ခုမှာ ဝေဝါးနေရုံသာမက ၊ အပိုင်းပိုင်း အစစ ဖြစ်နေသေး၏။

အချိန်ကြာလာသည်နှင့်အမျှ ၊ ထိုဝိညာဉ်အာရုံများမှာ အလျင်အမြန်ပင် ပြန်လည် စုစည်းလာကြပြီး ၊ မကြာခင်မှာပင် ဝိညာဉ်အာရုံ နှစ်ခုစလုံးမှာ အထွတ်အထိပ် အခြေအနေသို့ ပြန်လည် ရောက်ရှိသွားတော့သည်။ ၎င်းတို့မှာ ယခင်ကထက်ပင် အနည်းငယ် ပိုမို သန်မာလာသယောင် ရှိ၏ ။

ထိုအခိုက်အတန့်မှာပင် ၊ ဝိညာဉ်အာရုံမှာ ထပ်မံ၍ ဆုတ်ဖြဲခြင်း ခံလိုက်ရပြန်သည်။

“ဒီကျင့်စဉ်ကို ကျင့်ကြံရတာ တကယ်ကို ခက်ခဲတာပဲ ၊ အကယ်၍ ဝိညာဉ်အာရုံက အထွတ်အထိပ်ကို ပြန်မရောက်ခင်မှာ ဒုတိယအကြိမ် ထပ်ပြီး ဆုတ်ဖြဲမိမယ်ဆိုရင် ၊ အချိန်ကြာလာတာနဲ့အမျှ အဆင့်ကတော့ မြင့်နေလိမ့်မယ် ၊ ဒါပေမဲ့ ဝိညာဉ်အာရုံကတော့ အရမ်း အားနည်းသွားလိမ့်မယ် ၊ နောက်ဆုံးမှာတော့ ၊ အဲဒီ ဝိညာဉ်အာရုံက အတိုင်းအတာတစ်ခုမှာပဲ ရပ်တန့်သွားပြီး ၊ ထပ်ပြီး တိုးတက်လို့ ရတော့မှာ မဟုတ်ဘူး ”

လင်းရန်ယန်သည် ဤကျင့်စဉ်၏ အားနည်းချက်ကို လျင်မြန်စွာ နားလည်သွားတော့သည်။ ၎င်းမှာ အချိန်များစွာ ပေးရန် လိုအပ်ပါသည် ၊ ၊ ၎င်းအပြင် အဆင့်တူ ကျင့်စဉ်များထက် ပိုမို၍ အချိန်ယူရသော်လည်း ၊ ကံကောင်းထောက်မစွာဖြင့် လင်းရန်ယန်၌ အလျှံပယ် ရှိနေသည်မှာ အချိန်ပင် ဖြစ်၏ ။

“ဒီအလျင်အတိုင်းဆိုရင် ၊ နာရီအနည်းငယ်အတွင်းမှာပဲ ၊ ငါ့ရဲ့ သုံးထောင်သော ဝိညာဉ်အာရုံက တာအိုအဆင့် အထက်တန်းကို တိုးတက်သွားတော့မှာ ၊ အဲဒီအချိန်ကျရင် ဝိညာဉ်ရေးရာ ဆုတ်ဖြဲခြင်းရဲ့ အဆင့်ကလည်း မြင့်မြတ်အဆင့် အမြင့်ဆုံး ကို ရောက်သွားလိမ့်မယ် ”

ဤသို့ တွေးမိလိုက်သည့်အခါ လင်းရန်ယန်မှာ ကျေနပ်စွာဖြင့် ခေါင်းညိတ်လိုက်သည်။ ထို့နောက် သူသည် သူ၏ရှေ့မှ နှင်းမြေခွေး မိစ္ဆာဧကရာဇ်မင်းကို ကြည့်လိုက်၏။

“ငါ မင်းကို တစ်လအတွင်းမှာ လာခေါ်မယ် ၊ အခုတော့ ငါ သွားဦးမယ် ”

လင်းရန်ယန်က တစ်ဖက်လူကို လက်အုပ်ချီ၍ အနည်းငယ် နှုတ်ဆက်လိုက်ပြီးနောက် ၊ ဘေးရှိ ကျောက်အဘိုးကြီးကိုလည်း ခေါင်းညိတ်ပြလိုက်သည်။

“ဝုန်း... ”

တစ်ခဏချင်းမှာပင် ၊ သူတို့နှစ်ဦးမှာ နှင်းရွာ ရှိရာ အရပ်သို့ အလျင်အမြန် ပျံသန်းသွားကြတော့သည်။ သူတို့ ထွက်ခွာသွားသည်ကို ကြည့်ရင်း ၊ နှင်းမြေခွေး မိစ္ဆာဧကရာဇ်မင်းသည်လည်း မြေပြင်ပေါ်တွင် ဝပ်လျက် ၊ ဆက်လက် အိပ်စက်ကာ ကျင့်ကြံနေတော့၏။

နာရီအနည်းငယ် ကြာပြီးနောက် ၊ လင်းရန်ယန်သည် နှင်းရွာ၏ အထက် မီတာသောင်းချီ မြင့်သော ကောင်းကင်ယံ၌ တင်ပျဉ်ခွေထိုင်ကာ ၊ သူ၏ အဆင့် တက်လာမည့် အချိန်ကို စောင့်ဆိုင်းနေသည်။

“ဝုန်း... ”

နောက်ဆုံးတွင် ၊ သူ၏ ဝိညာဉ်စွမ်းအားများမှာ အမြင့်ဆုံး အခြေအနေသို့ ရောက်ရှိသွား၏။ ထိုအခါ ပြင်းထန်သော တုန်ခါမှုလှိုင်းများမှာ နောက်ကွယ်မှ လိုက်ပါလာသည်။

“ဝုန်း... ဝုန်း... ဝုန်း... ”

တစ်ခဏချင်းမှာပင် ၊ လင်းရန်ယန်၏ ခန္ဓာကိုယ်တစ်ခုလုံးမှ အလွန်အမင်း ထိတ်လန့်ဖွယ်ရာ ကောင်းသော စွမ်းအားများ ပေါက်ကွဲထွက်လာ၏။ ထိုစွမ်းအားများမှာ မျက်စိတစ်မှိတ်အတွင်း အရပ်မျက်နှာ အနှံ့သို့ ရူးသွပ်စွာ ပျံ့နှံ့သွားတော့သည်။ ထိုထိတ်လန့်ဖွယ်ရာ အရှိန်အဝါမှာ တစ်လောကလုံးကို ဖိနှိပ် ချေမှုန်းထားသယောင် ရှိ၏။

“သူ ထပ်ပြီး အဆင့်တက်သွားပြန်ပြီ ၊ ဒီကလေး မနေ့က ရောက်လာတုန်းက ၊ ကောင်းကင်အရှင်သခင် ပထမအဆင့်မှာပဲ ရှိသေးတာ ”

ကျောက်အဘိုးကြီးမှာ နှင်းရွာ၏ မြေပြင်ပေါ်တွင် ရပ်နေရင်း ၊ ကောင်းကင်ယံ၌ လျင်မြန်စွာ မြင့်တက်နေသော လင်းရန်ယန်၏ စွမ်းအားကို ကြည့်ကာ ၊ သူ၏ မျက်ဝန်းများမှာ မယုံနိုင်လောက်အောင် ကျုံ့ဝင်သွားရသည်။ မနေ့က ရောက်ခါစတွင် ပထမအဆင့် ၊ တစ်ညအတွင်း ဒုတိယအဆင့် ၊ ယခုမူ တတိယအဆင့်သို့ တိုက်ရိုက် ထိုးဖောက်သွားပြန်ပြီ ဖြစ်၏။ ဤကဲ့သို့သော ခွန်အား တိုးတက်မှုနှုန်းမှာ အစွန်းရောက်လှသည်ဟု ဆိုရလိမ့်မည်။

“တောင်... ၊ ဂုဏ်ယူပါတယ် အရှင် ၊ အရှင်၏ အဆင့်မှာ ကောင်းကင်အရှင်သခင် တတိယအဆင့် သို့ အောင်မြင်စွာ တိုးတက်သွားပါပြီ ”

ထိုအခိုက်အတန့်၌ ၊ စနစ်၏ အသိပေးသံမှာလည်း လင်းရန်ယန်၏ စိတ်ထဲ၌ ပဲ့တင်ထပ်သွားသည်။ တစ်ချိန်တည်းမှာပင် လင်းရန်ယန်၏ သုံးထောင်သော ဝိညာဉ်အာရုံမှာလည်း ဝိညာဉ်နန်းကြိုး ၆၄ ခုအထိ ဆုတ်ဖြဲပြီး ဖြစ်သွား၏။ ၎င်း၏ အဆင့်မှာ တာအိုအဆင့် အထက်တန်းသို့ ရောက်ရှိသွားပြီ။တိုက်ခိုက်မှု ကွဲပြားခြင်း ကြောင့် ၊ ဝိညာဉ်ရေးရာ ဆုတ်ဖြဲခြင်း၏ အဆင့်မှာလည်း စိန့်အဆင့် အမြင့်ဆုံးသို့ တိုက်ရိုက် မြင့်တက်သွားတော့သည်။ ၎င်းကို တစ်ကြိမ်မျှ ထုတ်ဖော်လိုက်သည်နှင့် ၊ ၎င်း၏ စွမ်းအားမှာ မယုံနိုင်လောက်အောင် ထိတ်လန့်စရာ ကောင်းနေလိမ့်မည် ၊။

လင်းရန်ယန်၏ စိတ်စွမ်းအား မှာ အဆင့် ၅ သာ ရှိသေးသော်လည်း ၊ ၎င်းမှ ထုတ်ဖော်လိုက်သော တိုက်ခိုက်ရေးစွမ်းရည်မှာ ဒြပ်စင်ငါးပါး ဝိညာဉ်ခန္ဓာ၏ အဆင့် ၅ စွမ်းအားကိုပင် တိုက်ရိုက် ကျော်လွန်သွားတော့သည်။ တစ်နည်းအားဖြင့် ပြောရလျှင် ၊ စိတ်စွမ်းအား အတတ်ပညာများသည် ယခုအခါ လင်းရန်ယန်၏ အစွမ်းထက်ဆုံး တိုက်ခိုက်ရေး နည်းလမ်းများ ဖြစ်လာခဲ့ပြီ ဖြစ်၏။

သေချာတာကတော့ ၊ ၎င်းတို့မှာ အလွန်အစွမ်းထက်သော်လည်း ၊ အလွန်အမင်း သာလွန်နေသည်တော့ မဟုတ်ချေ။ အဘယ့်ကြောင့်ဆိုသော် လင်းရန်ယန်၌ မည်သည့် ဝိညာဉ်ရေးရာ မှော်လက်နက် မျှ မရှိသေးသောကြောင့် ဖြစ်သည်။

ဤသို့ တွေးမိလိုက်သည့်အခါ ၊ လင်းရန်ယန်သည် ကုန်ကြမ်းပစ္စည်း အစုံအလင်ကို တိုက်ရိုက် ထုတ်ယူလိုက်ပြီးနောက် ၊ သူ၏ အတတ်စုံပညာရှင် ဟင်းလင်းပြင်အတွင်းသို့ ပစ်ထည့်လိုက်တော့၏။

“ဝုန်း... ”

ခဏချင်းမှာပင် ၊ တုန်ခါမှုလှိုင်းများနှင့်အတူ ၊ အဆုံးမဲ့လှသော လျှို့ဝှက်ဆန်းကြယ်သည့် ပုံစံများပါရှိသော ငွေရောင် ကျောက်တုံးတစ်တုံးမှာ လင်းရန်ယန်၏ လက်ထဲသို့ ပေါ်ထွက်လာတော့သည် ။

အခန်း (၁၃၉) - ကောင်းကင်အရှင်သခင် တတိယအဆင့်

“သန့်စင်သော ဝိညာဉ်ကျောက်တုံး - ဝိညာဉ်အဆင့် အထက်တန်း ၊ အပြစ်အနာအဆာကင်းသော မှော်လက်နက် ဖြစ်သည် ၊ ဝိညာဉ်မျိုးနွယ်စုမှ ဆင်းသက်လာသော လျှို့ဝှက်ချက်ဖြစ်ပြီး ၊ မိမိ၏ ဝိညာဉ်အာရုံ စွမ်းအားကို များစွာ မြှင့်တင်ပေးနိုင်သော အာနိသင် ရှိပါသည် ၊ လက်ရှိအဆင့်တွင် အရှင်၏ သန့်စင်သော ဝိညာဉ်ခွန်အားကို ၄၀၀ ရာခိုင်နှုန်းအထိ မြှင့်တင်ပေးနိုင်သည် ”

အသိပေးသံမှာ နောက်ကွယ်မှ လိုက်ပါလာတော့သည် ။ သေချာတာကတော့ ၊ နာရီအနည်းငယ် ကြာပြီးနောက်မှာပင် လင်းရန်ယန် ၏ အတတ်စုံပညာရှင် အဆင့်မှာ ဝိညာဉ်အဆင့် အထက်တန်း အရည်အသွေးသို့ ရောက်ရှိသွားခဲ့ပြီး ၊ အရည်အသွေး မြှင့်တင်မှုကြောင့် အပြစ်အနာအဆာကင်းသော အဆင့်သို့ တိုက်ရိုက် ရောက်ရှိသွားခြင်း ဖြစ်၏။

ထို့အပြင် ဤဝိညာဉ်အဆင့် အထက်တန်းရှိ သန့်စင်သော ဝိညာဉ်ကျောက်တုံးမှာ ၊ တိုက်ခိုက်မှု တစ်ခုတည်းကိုသာ အထူးပြုထားသော ဝိညာဉ်အမျိုးအစား တိုက်ခိုက်ရေး ရတနာတစ်ခု ဖြစ်သည် ။ ထို့ကြောင့် ၎င်းသည် ဝိညာဉ်အဆင့် အထက်တန်းသာ ဖြစ်သော်လည်း ၊ ၎င်း၏ အာနိသင်မှာ တာအိုအဆင့် အလယ်အလတ်ရှိသော ရတနာတစ်ခု၏ မြှင့်တင်မှု အဆင့်သို့ ရောက်ရှိနေပြီ ဖြစ်၏၊၊

ဤပစ္စည်းနှင့်ဆိုလျှင် လင်းရန်ယန်၏ စိတ်စွမ်းအား ခွန်အားမှာ ဒြပ်စင်ငါးပါး ဝိညာဉ်ခန္ဓာကို လုံးဝ လွှမ်းမိုးသွားခဲ့ပြီ ဖြစ်သည်။ ဤကဲ့သို့ လွှမ်းမိုးနိုင်မှုမှာ ထိတ်လန့်စရာ ကောင်းလောက်အောင် ငါးဆမျှ ရှိနေ၏။

“အော်... ငါ့ရဲ့ ဝိညာဉ်ပြောင်းလဲခြင်းဓားကိုလည်း အဆင့်မြှင့်လို့ ရတာပဲ ”

ဤသို့ တွေးမိလိုက်သည့်အခါ လင်းရန်ယန်သည် ဝိညာဉ်အဆင့် အမြင့်ဆုံးရှိ အလင်းဝိညာဉ်ကျောက်တုံး တစ်တုံးနှင့် လက်ထဲရှိ သန့်စင်သော ဝိညာဉ်ကျောက်တုံးကို ထုတ်ယူလိုက်၏။ ထို့နောက် သူ၏ လက်နက်နှင့်အတူ အတတ်စုံပညာရှင် ဟင်းလင်းပြင်အတွင်းသို့ ပစ်ထည့်လိုက်တော့သည်။

“ဝုန်း... ”

တစ်ခဏချင်းမှာပင် ၊ အဆင့်မှာ ဝိညာဉ်အဆင့် အထက်တန်းသို့ ရောက်ရှိသွားသော ဝိညာဉ်ပြောင်းလဲခြင်းဓား တစ်လက်မှာ လင်းရန်ယန်၏ လက်ထဲသို့ ပေါ်ထွက်လာ၏။ ယခုအခါ ဤဓားတွင် အလင်းနှင့် ဝိညာဉ်ဟူသော အပိုဆောင်း ဂုဏ်သတ္တိ နှစ်ခု ထပ်မံ ပါဝင်လာခဲ့ပြီ ဖြစ်သည်။ ထိုသန့်စင်သော ဝိညာဉ်ကျောက်တုံးမှာ ဝိညာဉ်ပြောင်းလဲခြင်းဓားအတွင်းသို့ လုံးဝ စီးဝင်သွားခဲ့ပြီ ဖြစ်၏ ။

“ဝိညာဉ်ပြောင်းလဲခြင်းဓား - ဝိညာဉ်အဆင့် အထက်တန်း ၊ ဒြပ်စင်စွမ်းအား ကိုးမျိုးဖြင့် မြှင့်တင်ထားသော ဤဓားသည် ဝိညာဉ်စွမ်းအား အမျိုးအစား အားလုံးကို တစ်ခုနှင့်တစ်ခု လွတ်လပ်စွာ ကူးပြောင်းပေးနိုင်သည် ၊ တစ်ချိန်တည်းမှာပင် ၊ တိုက်ခိုက်ရေး၌ ဝိညာဉ်စွမ်းအား အမျိုးအစား အားလုံးကို ၄၀၀ ရာခိုင်နှုန်းအထိ မြှင့်တင်ပေးနိုင်သည် ”

အသိပေးသံမှာ လင်းရန်ယန်၏ စိတ်ထဲ၌ ပဲ့တင်ထပ်သွားတော့သည် ။ ယခင်က ကောင်းကင်အဆင့် အမြင့်ဆုံးရှိသော ဝိညာဉ်ပြောင်းလဲခြင်းဓားမှာ တိုက်ခိုက်ရေးစွမ်းရည်ကို ၂၈၀ ရာခိုင်နှုန်းခန့်သာ မြှင့်တင်ပေးနိုင်ခဲ့ခြင်း ဖြစ်၏။ ယခုမူ အဆင့်ကြီး တစ်ခုနီးပါး မြင့်တက်သွားပြီးနောက် ၄၀၀ ရာခိုင်နှုန်းအထိ တဟုန်ထိုး မြင့်တက်သွားရာ ၊ ဤစွမ်းအားမှာ သာမန်မဟုတ်သည်မှာ အမှန်ပင် အဘယ့်ကြောင့်ဆိုသော် ၎င်းသည် ဒြပ်စင်စွမ်းအား အားလုံးကို မြှင့်တင်ပေးနိုင်သောကြောင့် ဖြစ်သည်။

လင်းရန်ယန်သည် သူ၏ အချက်အလက်ဇယားကို ချက်ချင်း ဖွင့်ကြည့်လိုက်၏။

အချက်အလက်ဇယား

အမည် - လင်းရန်ယန်

အဆင့် - ကောင်းကင်အရှင်သခင် တတိယအဆင့်

အတတ်စုံပညာရှင်အဆင့် - ဝိညာဉ်အဆင့် အထက်တန်း (ထူးကဲ +၁)

ကျင့်စဉ် - ဝိညာဉ်ငါးပါး တိုက်ခိုက်ရေးနည်းလမ်း (တာအိုအဆင့် အမြင့်ဆုံး) ၊ ကောင်းကင်ပြစ်ဒဏ် ကျမ်းစာ (ဝိညာဉ်အဆင့် အမြင့်ဆုံး) ၊ သုံးထောင်သော ဝိညာဉ်အာရုံ (တာအိုအဆင့် အထက်တန်း ၊ ဆဋ္ဌမအကြိမ် ဆုတ်ဖြဲခြင်း) ၊ တာအိုအတတ်ပညာ - ဝိညာဉ်ရေးရာ ဆုတ်ဖြဲခြင်း (စိန့်အဆင့် အမြင့်ဆုံး)

အစွမ်းမဲ့စွမ်းရည်များ - အလိုအလျောက် ကျင့်ကြံမှု အဆင့် ၅ (၁၆/၃၂) ၊ လေဝိညာဉ်ခန္ဓာ အဆင့် ၄ (၅/၁၆) ၊ ဒြပ်စင်ငါးပါး ဝိညာဉ်ခန္ဓာ အဆင့် ၅ (၁၆/၃၂ ၊ ၁၂၈ ဆ) ၊ အလိုအလျောက် ငွေကြေးတိုးပွားမှု အဆင့် ၆ (၄/၆၄ ၊ အဆင့်မြင့်ကျောက် ၃၀၀/ရက်) ၊ အလိုအလျောက် သိုင်းပညာကျင့်ကြံမှု အဆင့် ၆ (၁၄/၆၄ ၊ နှစ်ပေါင်း ၁၀၀,၀၀၀/ရက်) ၊ ဝိညာဉ်စွမ်းအား ရေကန် အဆင့် ၅ (၅/၃၂ ၊ ၃,၀၀၀ ဆ) ၊ အတတ်စုံပညာရှင် အဆင့် ၆ (၀/၆၄) ၊ ကုသိုလ်တော် ရွှေရောင်အလင်း အဆင့် ၆ (၀/၆၄) ၊ စိတ်စွမ်းအား အဆင့် ၅ (၁၄/၃၂ ၊ နန်းကြိုး ၃,၀၀၀) ၊ မိုးကြိုးဝိညာဉ်ခန္ဓာ အဆင့် ၅ (၁၄/၃၂ ၊ ၆၄ ဆ) ၊ နှင်းခဲဝိညာဉ်ခန္ဓာ အဆင့် ၅ (၁၄/၃၂ ၊ ၆၄ ဆ) ၊ တိုက်ခိုက်မှု ကွဲပြားခြင်း အဆင့် ၅ (၉/၃၂ ၊ လမ်းကြောင်း ၃၂ ခု) ၊ အလိုအလျောက် တိုက်ခိုက်ရေး အဆင့် ၅ (၁၂/၃၂) ၊ အလင်းဝိညာဉ်ခန္ဓာ အဆင့် ၅ (၉/၃၂)

လက်နက် - ဝိညာဉ်ပြောင်းလဲခြင်းဓား (ဝိညာဉ်အဆင့် အထက်တန်း ၊ အပြစ်အနာအဆာကင်း)

ကံတရားအမှတ် - ၁.၆၉၂ သန်း (အမြှောက် ၁၀၀,၀၀၀)

ငွေကြေး - အလယ်အလတ် ဝိညာဉ်ကျောက်တုံး ၁,၈၅၅ တုံး ၊ အဆင့်မြင့် ဝိညာဉ်ကျောက်တုံး ၁၂၅ တုံး

အချက်အလက်ဇယားကို ကြည့်ရင်း လင်းရန်ယန်မှာ အသာအယာ ခေါင်းညိတ်လိုက်ပါသည်။ ယခုရှိနေသော သူ၏ အခြေအနေနှင့်ဆိုလျှင် ၊ ယခင်က အထပ်တစ်ထောင် တိုက်ခိုက်ရေးမျှော်စင်ကို ထိုးဖောက်ရန်မှာ အလွန်လွယ်ကူသော ကိစ္စတစ်ခု ဖြစ်လိမ့်မည်။

“သွားပြီး စမ်းကြည့်ရရင် ကောင်းမလား ”

လင်းရန်ယန်က မျက်ခုံးပင့်လိုက်တော့သည် ။ ဘာပဲဖြစ်ဖြစ် သူသည် ယခင်က ထိုမျှော်စင်ကို ကျော်ဖြတ်နိုင်ခဲ့သော်လည်း ၊ အမြဲတမ်း လှည့်ကွက်များကိုသာ အသုံးပြုခဲ့သဖြင့် ၊ ထိုအောင်ပွဲမှာ လုံးဝ ဂုဏ်ယူစရာ မရှိခဲ့ချေ ။

ဤသို့ တွေးမိသည်နှင့် ၊ သူသည် တွန့်ဆုတ်မနေဘဲ အောက်ဘက်ရှိ နှင်းတောင်ထိပ်ဆီသို့ တိုက်ရိုက် ပျံသန်းသွားတော့သည် ။ ထိုနေရာမှာ စမ်းသပ်မှု၏ ဝင်ပေါက်ပင် ဖြစ်၏ ။

“ဒီကလေး... သူ ဘာလုပ်မလို့လဲ ၊ အဆင့်တက်ပြီးတာနဲ့ ချက်ချင်း စမ်းသပ်မှု သွားလုပ်ချင်တာလား ”

မြေပြင်ပေါ်ရှိ ကျောက်အဘိုးကြီး သည် လင်းရန်ယန်၏ လုပ်ရပ်ကို မြင်သောအခါ မျက်မှောင်ကြုတ်လိုက်မိသည်။ အဘယ့်ကြောင့်ဆိုသော် ၊ အဆင့်တစ်ခု ထိုးဖောက်ပြီးပြီးချင်းတွင် ခွန်အား တိုးတက်မှုမှာ အလွန်အမင်း မသိသာသေးသော်လည်း ၊ ရန်သူများမှာမူ မိမိ၏ အဆင့်နှင့်အညီ အဆင့်ကြီး တစ်ခုစာ မြင့်တက်သွားမည် ဖြစ်သောကြောင့်ပင် ဖြစ်၏။

သူ ကိုယ်တိုင်လည်း ယခင်က စမ်းသပ်ခဲ့ဖူးသည်။ သူ စစ်မှန်သောအရှင်သခင် ပထမအဆင့်မှာ ရှိစဉ်က မျှော်စင်၏ ၄၉ ထပ်အထိ ကျော်ဖြတ်နိုင်ခဲ့၏။ သို့သော်လည်း စစ်မှန်သောအရှင်သခင် ဒုတိယအဆင့်သို့ ထိုးဖောက်ပြီးပြီးချင်း သွားရောက်သည့်အခါ ၊ ၃၅ ထပ်ကိုပင် မကျော်ဖြတ်နိုင်ခဲ့ချေ ၊၊

ဤသို့ တွေးမိသည်နှင့် သူသည် တောင်ထိပ်ဆီသို့ အလျင်အမြန် ပျံသန်းသွားတော့သည် ၊၊ ကံမကောင်းစွာဖြင့် ၊ သူ တောင်ထိပ်သို့ ရောက်ရှိသွားချိန်တွင် လင်းရန်ယန်မှာ ပျောက်ကွယ်သွားခဲ့ပြီ ဖြစ်၏၊၊

“ဝုန်း... ဝုန်း... ဝုန်း... ”

သို့သော်လည်း ၊ နောက်တစ်ခဏချင်းမှာပင် ၊ တိုက်ခိုက်ရေးမျှော်စင်ပေါ်ရှိ အလင်းတန်းများမှာ ရူးသွပ်စွာ စတင် လင်းလက်လာတော့သည် ၊၊ တစ်မိနစ်အတွင်းမှာပင် အထပ်ပေါင်း ရာချီသို့ ရောက်ရှိသွားခဲ့ပြီ ဖြစ်၏ ၊၊

ကျောက်အဘိုးကြီးမှာမူ အံ့သြခြင်း မရှိချေ ၊၊ ဘာပဲဖြစ်ဖြစ် လင်းရန်ယန်သည် တစ်ခါက အထပ် ၁၀၀၀ စလုံးကို ကျော်ဖြတ်ခဲ့ဖူးသည် ဖြစ်၏၊၊ အခုမှ အဆင့်တက်ထားသည် ဆိုသော်လည်း အထပ် ၇၀၀ အတွင်းမှာတော့ သေချာပေါက် လွယ်ကူနေလိမ့်မည် ၊၊

“အခုလေးတင် အဆင့်တက်ထားတာဆိုတော့ ၊ အလွန်ဆုံး အထပ် ၈၀၀ လောက်အထိပဲ ရောက်မှာပါလေ ”

ကျောက်အဘိုးကြီးက မျက်မှောင်အနည်းငယ် ကြုတ်လျက် ရေရွတ်လိုက်သည် ၊၊ သေချာတာကတော့ ၊ လင်းရန်ယန်သည် တစ်ရှိန်ထိုး တက်လှမ်းသွားခဲ့ပြီးနောက် ၊ နောက်ဆုံးတွင် အထပ် ၉၁၅ သို့ ရောက်ရှိသည့်အခါမှသာ အရှိန်မှာ သိသိသာသာ လျော့ကျသွား၏ ၊၊

“ငါ ထင်သားပဲ ”

ကျောက်အဘိုးကြီးက သက်ပြင်းချလိုက်သည် ၊၊ သို့ပေမယ့် ၊ ထိုစဉ်က သူ မသိရှိခဲ့သည်မှာ အထပ် ၉၁၅ သို့ အတင်းအဓမ္မ ရောက်ရှိသွားခဲ့သော လင်းရန်ယန်သည် ၊ စွမ်းရည်တစ်ခုတည်းကိုသာ အသုံးပြုခဲ့ခြင်း ဖြစ်၏။ ၎င်းမှာ နှင်းခဲဝိညာဉ်ခန္ဓာပင် ဖြစ်သည် ၊၊

၎င်းအပြင် ကျောက်အဘိုးကြီး ပြောခဲ့သကဲ့သို့ပင် ၊ သူသည် လတ်တလောမှ အဆင့်တက်ထားခြင်း ဖြစ်သဖြင့် ၊ လင်းရန်ယန်၏ အဆင့်မှာ တတိယအဆင့် အစောပိုင်းပိုင်းသာ ရှိသေးသည် ၊၊ အကယ်၍ သူသာ အထွတ်အထိပ်သို့ ရောက်ရှိနေမည်ဆိုပါက ၊ နှင်းခဲဝိညာဉ်ခန္ဓာ တစ်ခုတည်းကို အားကိုးရုံနှင့်ပင် အထပ် ၉၉၉ အထိ ရောက်ရှိနိုင်၏ ၊၊

သို့သော်လည်း ၊ လင်းရန်ယန်သည် နှင်းခဲဝိညာဉ်ခန္ဓာ တစ်ခုတည်းဖြင့် အထပ် ၉၉၉ ရှိ ရန်သူကို မအနိုင်ယူနိုင်ဟု ခန့်မှန်းထားသည် ၊၊ အဘယ့်ကြောင့်ဆိုသော် အထပ် ၉၉၉ ရှိ ရန်သူမှာ စစ်မှန်သောအရှင်သခင် ဒုတိယအဆင့်သို့ ရောက်ရှိနေပြီ ဖြစ်သောကြောင့်ပင် ဖြစ်၏ ၊၊

သေချာပေါက်ပင် ၊ အထပ် ၉၉၉ သို့ ရောက်သည်နှင့် ပေါ်ထွက်လာသော ရန်သူမှာ ယခင်က မိစ္ဆာရဟန်းပင် ဖြစ်သည် ၊၊ လင်းရန်ယန်၏ လက်ချက်ဖြင့် တစ်ကြိမ် သေဆုံးဖူးခဲ့သဖြင့် ၊ ထိုရန်သူသည် ချက်ချင်းပင် ပြီးပြည့်စုံသော သွေးအသူရာ တစ်ကောင်ကို ဆင့်ခေါ်လိုက်၏၊၊ ၎င်း၏ စွမ်းအားမှာ ထိတ်လန့်စရာ ကောင်းလှပြီး ၊ ကောင်းကင်နှင့် မြေကမ္ဘာကိုပင် ဖျက်ဆီးပစ်နိုင်စွမ်း ရှိသည်၊၊

လင်းရန်ယန်သည်လည်း သူ၏ မိုးကြိုးဝိညာဉ်ခန္ဓာကို တိုက်ရိုက် အသုံးပြုလိုက်ပြီး ၊ ကောင်းကင်ဘေးဒုက္ခ စွမ်းအား နှစ်ခုကို တစ်ခဏချင်း ဆင့်ခေါ်လိုက်၏ ၊၊ တစ်ချိန်တည်းမှာပင် တိုက်ခိုက်မှု ကွဲပြားခြင်းကို အသုံးပြုလိုက်ရာ ၊ ထိုစွမ်းအား နှစ်ခုမှာ လမ်းကြောင်းပေါင်း ၆၄ ခုအဖြစ် ကွဲထွက်သွားတော့သည် ၊၊ ကောင်းကင်ဘေးဒုက္ခ ကျရောက်လာသည့် အခိုက်အတန့်၌ ၊ သွေးအသူရာမှာ ဘာမှမရှိတော့သည့်အထိ ချေမှုန်းခြင်း ခံလိုက်ရ၏ ၊၊

အထပ် ၁၀၀၀ မြောက်တွင်မူ ခွန်အားမှာ မိစ္ဆာဧကရာဇ် အဆင့်နီးပါး ရှိသော ငရဲခွေးခေါင်းသုံးလုံး ပေါ်ထွက်လာတော့သည် ၊၊ ၎င်း၏ ခေါင်းသုံးလုံးထဲမှ တစ်လုံးမှာ နှင်းခဲစွမ်းအား ၊ တစ်လုံးမှာ အမှောင်စွမ်းအားနှင့် အခြားတစ်လုံးမှာ မိစ္ဆာမီးတောက် စွမ်းအားကို အသုံးပြုနိုင်၏ ၊၊ ၎င်းသည် စစ်မှန်သောအရှင်သခင် အဆင့်သို့ ရောက်ရန် ခြေတစ်လှမ်းသာ လိုတော့သော်လည်း ၊ ထိုမိစ္ဆာရဟန်းကို ချက်ချင်း သတ်ပစ်နိုင်လောက်သော ပြင်းထန်သည့် စွမ်းအားကို ထုတ်ဖော်နိုင်သည် ၊၊

ကံမကောင်းစွာဖြင့် ၊ လင်းရန်ယန်၏ လမ်းကြောင်း ၆၄ ခုရှိသော ကောင်းကင်ဘေးဒုက္ခ မိုးကြိုးများ၏ ရှေ့မှောက်တွင်မူ ၊ ထိုငရဲခွေးကြီးမှာ တစ်ခဏချင်းမှာပင် ဖုန်မှုန့်အဖြစ်သို့ ပြောင်းလဲသွားရတော့သည် ၊၊ ယခုတစ်ကြိမ်တွင် လင်းရန်ယန်သည် သူ၏ ဒြပ်စင်ငါးပါး ဝိညာဉ်ခန္ဓာ သို့မဟုတ် ထိုထက် ပိုမိုပြင်းထန်သော ဝိညာဉ်ရေးရာ ဆုတ်ဖြဲခြင်းကိုပင် အသုံးမပြုခဲ့ရချေ ၊၊

သေချာတာကတော့ ၊ ဤလမ်းကြောင်း ၆၄ ခုရှိသော ကောင်းကင်ဘေးဒုက္ခ မိုးကြိုးများ၏ စွမ်းအားမှာ ၊ ဒြပ်စင်ငါးပါး ဝိညာဉ်ခန္ဓာမှ ထုတ်ဖော်သော လမ်းကြောင်း ၃၂ ခုရှိ ဝိညာဉ်ငါးပါး ဓားအတတ်ထက် လုံးဝ လျော့နည်းခြင်း မရှိပေ ၊၊ ဘာပဲဖြစ်ဖြစ် ၊ ကောင်းကင်ဘေးဒုက္ခ စွမ်းအား တစ်ခုတည်းမှာပင် သာမန် စစ်မှန်သောအရှင်သခင် ပထမအဆင့် အထွတ်အထိပ်ကို ချက်ချင်း သတ်ပစ်နိုင်စွမ်း ရှိသည်၊၊

မည်သို့ပင်ဖြစ်စေ ၊ လင်းရန်ယန်၏ စုစုပေါင်း တိုက်ခိုက်ရေးစွမ်းရည်မှာ ယခင်ကထက် များစွာ တိုးတက်လာခဲ့သည်မှာ အလွန်ပင် သေချာလှ၏ ၊၊

“တီ... တီ... တီ... ၊ ဂုဏ်ယူပါတယ် ၊ အထပ်တစ်ထောင် တိုက်ခိုက်ရေး စမ်းသပ်မှုမျှော်စင်ကို အောင်မြင်စွာ ကျော်ဖြတ်နိုင်ခဲ့ပါပြီ ၊ အရှင်သည် ကောင်းကင်အရှင်သခင် အဆင့်ရှိ ဆုလာဘ်ကို တစ်ကြိမ် ရရှိပြီးဖြစ်သဖြင့် ၊ ဒုတိယအကြိမ် ထပ်မံ ရယူ၍ မရနိုင်ပါ ၊ ကျေးဇူးပြု၍ အရှင်၏ အဆင့်မှာ စစ်မှန်သောအရှင်သခင် အဆင့်သို့ ရောက်ရှိသည့်အခါမှသာ ထပ်မံ လာရောက်ပါရန် ၊ ”

မျှော်စင်၏ အထပ် ၁၀၀၀ ကို စက္ကန့်ပိုင်းအတွင်း ကျော်ဖြတ်ပြီးသည်နှင့် ၊ အသိပေးသံမှာ လင်းရန်ယန်၏ စိတ်ထဲ၌ ပဲ့တင်ထပ်သွားသည် ၊၊

“ဒါကို တကယ်ပဲ ဒုတိယအကြိမ် ထပ်ပြီး တောင်းလို့ ရတာလား ၊ ဒါဆိုရင် နောက်ပိုင်းမှာ ငါ တာအိုအရှင်သခင် နဲ့ မြင့်မြတ်အရှင်သခင် အဆင့်တွေကို ရောက်တဲ့အခါမှာလည်း ဆုလာဘ်တွေ ထပ်တောင်းလို့ ရမယ်ဆိုတဲ့ အဓိပ္ပာယ်ပေါ့ ”

ဤအသိပေးချက်ကို ကြားလိုက်ရသည့်အခါ လင်းရန်ယန်၏ မျက်ဝန်းများမှာ တောက်ပသွားတော့သည် ၊၊ အကယ်၍ ထိုအတိုင်းသာ ဆိုပါက ၊ သူသည် နောင်အနာဂတ်တွင် များစွာသော အကျိုးအမြတ်များကို အလကား ရရှိနိုင်တော့မည် ၊၊

အခန်း (၁၄၀) - ခွဲခွာရန် ဝန်လေးခြင်း

“တခြား စမ်းသပ်မှု မျှော်စင်နှစ်ခုကနေ ရမယ့် ဆုလာဘ်တွေလည်း ရှိသေးတာပဲ ၊ ဒါပေမဲ့ လောလောဆယ်တော့ အဲဒါတွေကို ခဏ ဖယ်ထားလိုက်ဦးမယ် ၊ အကယ်၍ ငါသာ မော်ရှန်းဂိုဏ်းကို အမြန်မပြန်ရင် ၊ ဂိုဏ်းကလူတွေ ငါ့ကို သေပြီလို့ ထင်နေကြတော့မှာ ”

လင်းရန်ယန် မှာ အနည်းငယ် သက်ပြင်းချမိသည် ၊၊

“ဝုန်း... ”

ထိုစဉ်မှာပင် လင်းရန်ယန်၏ ပုံရိပ်မှာ လေထဲ၌ ဝေဝါးသွားပြီးနောက် ၊ သူ ယခင်က တာအဘိုးကြီး နှင့် တွေ့ဆုံခဲ့ဖူးသည့် ဟင်းလင်းပြင်အတွင်းသို့ တစ်ခဏချင်း ရောက်ရှိသွား၏ ၊၊ တာအဘိုးကြီး တဖြည်းဖြည်း ပေါ်ထွက်လာသည့်အခါ ၊ သူသည် လင်းရန်ယန်ကို အလွန်အမင်း အံ့အားသင့်သော မျက်နှာပေးဖြင့် စိုက်ကြည့်နေသည်ကို လင်းရန်ယန် အထင်အရှား မြင်လိုက်ရသည် ၊၊

၎င်းမှာ နောက်ပြောင်နေခြင်း မဟုတ်ချေ ၊ ယခင်က အထပ်သုံးထောင်ကို ကျော်ဖြတ်ရန်အတွက် လှည့်ကွက်များကို အသုံးပြုခဲ့ရသော လင်းရန်ယန်သည် ၊ ယခုတစ်ကြိမ်တွင်မူ အထပ်ပေါင်း သုံးထောင်စလုံးကို စက္ကန့်ပိုင်းအတွင်း ချေမှုန်းသတ်ဖြတ်ကာ ဖြတ်ကျော်လာခဲ့ခြင်း ဖြစ်သည် ၊၊ ဤသည်ကို တာအဘိုးကြီးအနေဖြင့် မည်သို့လျှင် အံ့သြဘဲ နေနိုင်မည်နည်း ၊၊

သူသည် အနီးကပ် စစ်ဆေးကြည့်လိုက်သောအခါ ၊ လင်းရန်ယန်၏ ဝိညာဉ်ခန္ဓာ အားလုံးမှာ ယခုအခါ အဆင့်မြင့်တက်သွားခဲ့သည်ကို ထပ်မံ တွေ့ရှိလိုက်ရ၏ ၊၊ ၎င်းအပြင် အလင်းဝိညာဉ်ခန္ဓာကိုပင် အသစ်ရရှိထားသေးသည် ဖြစ်၏၊၊

“ထူးဆန်းလိုက်တာ... တကယ်ကို ထူးဆန်းလွန်းတယ် ၊ ငါ နှစ်သန်းပေါင်း ရာချီ ရှင်သန်ခဲ့တဲ့အတွင်းမှာ ၊ မင်းလို အခြေအနေမျိုးကို တစ်ခါမှ မမြင်ဖူးခဲ့ဘူး ”

တာအဘိုးကြီးက လင်းရန်ယန်ကို မလွှတ်တမ်း စိုက်ကြည့်နေသည် ၊၊

“ဟဲဟဲ... တာအဘိုးကြီး ၊ ကျွန်တော် အရင်က ရခဲ့တဲ့ ကျင့်စဉ် ဆုလာဘ်တွေကို လာရွေးတာပါ ”

ထိုအကြည့်များကြောင့် လင်းရန်ယန်မှာ အနည်းငယ် အနေရခက်သွားပြီး ၊ စကားလမ်းကြောင်း လွှဲလိုက်ရသည် ၊၊ လင်းရန်ယန်၏ စကားကို ကြားပြီးနောက် တာအဘိုးကြီးသည်လည်း ခေါင်းကို ခါယမ်းလိုက်ကာ ၊ အလွန်အကျွံ ဆက်မတွေးတော့ချေ ၊၊ ဘာပဲဖြစ်ဖြစ် ၊ ကျယ်ပြောလှသော ကောင်းကင်နှင့် မြေကမ္ဘာကြီးအတွင်းမှာ ဤကဲ့သို့သော ထူးခြားဖြစ်စဉ်များ ပေါ်ထွက်လာခြင်းမှာ ဖြစ်လေ့ဖြစ်ထရှိသည့် သဘောဟုသာ သူ မှတ်ယူလိုက်သည် ၊၊

ထို့နောက် သူသည် တွန့်ဆုတ်မနေဘဲ ၊ သူ၏ ညာဘက်လက်ဖြင့် ဟင်းလင်းပြင်ကို အသာအယာ ဝေ့ယမ်းလိုက်၏၊၊

“ဝုန်း... ”

တစ်ခဏချင်းမှာပင် ၊ လင်းရန်ယန်၏ ရှေ့မှောက်၌ ဧရာမ အရိပ်ယောင် ပြကွက်ကြီးတစ်ခု ပေါ်ထွက်လာတော့သည် ၊၊

“မင်း ဘယ်လိုမျိုး ကျင့်စဉ်ကို လိုချင်တာလဲ ၊ ဘယ်လို သတ်မှတ်ချက်တွေ ရှိမလဲဆိုတာသာ ပြောပြလိုက်တော့ ”

တာအဘိုးကြီးက လင်းရန်ယန်ကို ဆိုလိုက်၏ ၊၊

“ကျွန်တော်က ခန္ဓာကိုယ် သန်မာစေမယ့် ကျင့်စဉ်မျိုးကို လိုချင်တာပါ ၊ အဲဒါက ကျွန်တော့်ရဲ့ ဒြပ်စင်စွမ်းအားတွေနဲ့ ကိုက်ညီရင် ပိုကောင်းပါလိမ့်မယ် ၊ ပြီးတော့ သဘာဝ ဒြပ်စင်တွေကို အားဖြည့်ပေးနိုင်တဲ့ ခန္ဓာကိုယ် တိုက်ခိုက်ရေး တာအိုအတတ်ပညာ တစ်ခုလည်း လိုချင်ပါတယ် ”

လင်းရန်ယန်က သူ လိုချင်သော အမျိုးအစားကို တိုက်ရိုက် ပြောပြလိုက်၏ ၊၊

“ဝုန်း... ”

သေချာပေါက်ပင် ၊ လင်းရန်ယန်၏ စကားအဆုံး၌ ၊ အရိပ်ယောင် ပြကွက်ပေါ်တွင် ကျင့်စဉ်များနှင့် တာအိုအတတ်ပညာများ ချက်ချင်း ပေါ်ထွက်လာသည် ၊၊ လင်းရန်ယန်သည် မိတ်ဆက်စာသားများကို လျင်မြန်စွာ ဖတ်ရှုလိုက်ပြီးနောက် ၊ သူ လိုအပ်နေသော ကျင့်စဉ်နှင့် အတတ်ပညာကို မကြာခင်မှာပင် ရှာတွေ့သွား၏ ၊၊

ကံမကောင်းစွာဖြင့် ၊ လင်းရန်ယန်သည် တစ်ပတ်ပတ်၍ ရှာဖွေကြည့်သော်လည်း ၊ ဝိညာဉ်ခန္ဓာနှင့်အညီ အဆင့်လိုက် မြင့်တက်နိုင်သော ကျင့်စဉ်မျိုးကိုမူ မတွေ့ရှိခဲ့ချေ ၊၊ ဤသည်ကို သေချာ ပြန်စဉ်းစားကြည့်လျှင်မူ ကျိုးကြောင်းဆီလျော်လှသည် ၊၊ ဝိညာဉ်ခန္ဓာကို အသုံးပြု၍ အဆင့်မြှင့်တင်နိုင်သော ကျင့်စဉ်များမှာ ၊ ခြွင်းချက်မရှိ ရှေးဟောင်း မသေမျိုးခေတ်နှင့် အစဦး ကမ္ဘာဦးခေတ်ရှိ ပုဂ္ဂိုလ်ကြီးများ ဖန်တီးခဲ့သော အလွန်အစွမ်းထက်သည့် ကျင့်စဉ်များသာ ဖြစ်ကြ၏ ၊၊ ဤကဲ့သို့သော ကျင့်စဉ်မျိုးကို မည်သို့လျှင် ဆုလာဘ်အဖြစ် အလွယ်တကူ ပေးနိုင်မည်နည်း ၊၊

စနစ်ကသာလျှင် ဤကဲ့သို့သော ကျင့်စဉ်များကို လင်းရန်ယန်အတွက် ဆုလာဘ်အဖြစ် ထုတ်ပေးနိုင်ခြင်း ဖြစ်သည် ၊၊

“ကောင်းကင်နှင့် မြေကမ္ဘာ သွန်းလုပ်ခြင်းအတတ် - စိန့်အဆင့် အနိမ့်တန်း ကျင့်စဉ် ဖြစ်ပါသည် ၊ ကောင်းကင်နှင့် မြေကမ္ဘာရှိ ဒြပ်စင်စွမ်းအားများကို လောင်စာအဖြစ် အသုံးပြု၍ ၊ မိမိ၏ ခန္ဓာကိုယ်ကို သန့်စင်သွန်းလုပ်ရမည် ဖြစ်ပါသည် ၊ အသုံးပြုသော ဒြပ်စင်စွမ်းအား အမျိုးအစား များလေလေ ၊ ကျင့်ကြံမှုနှုန်းမှာ ပိုမို မြန်ဆန်လေလေ ဖြစ်ပါသည် ၊ စုစုပေါင်း ပြောင်းလဲခြင်း အဆင့် ၄ ဆင့် ရှိပါသည် ၊ အမြင့်ဆုံးအထိ ကျင့်ကြံပြီးပါက ၊ မိမိ၏ စုစုပေါင်း ခန္ဓာကိုယ် ခွန်အားကို ၁၂ ဆအထိ မြှင့်တင်ပေးနိုင်သည် ၊ ဤကျင့်စဉ်၏ ပြီးပြည့်စုံသော အဆင့်သို့ ရောက်ရှိရန်မှာ ပြောင်းလဲခြင်း ၄ ဆင့်စလုံးကို ကျင့်ကြံရမည် ဖြစ်သည် ၊ အဆင့်တစ်ခုချင်းစီက တိုက်ခိုက်ရေးစွမ်းရည်ကို သုံးဆစီ မြှင့်တင်ပေးပါသည် ၊ အကယ်၍ ၎င်းသည် သာမန် စိန့်အဆင့် အနိမ့်တန်း ကျင့်စဉ်တစ်ခုသာ ဆိုပါက ၊ အလွန်ဆုံး ခြောက်ဆခန့်သာ မြှင့်တင်ပေးနိုင်မည် ဖြစ်ပါသည် ။

ပြီးပြည့်စုံသော အဆင့်သို့ ရောက်ရှိမှသာ ၁၂ ဆအထိ ရရှိနိုင်ခြင်း ဖြစ်၏ ၊၊ သို့သော်လည်း ၊ သမိုင်းတစ်လျှောက်တွင် မြင့်မြတ်အရှင်သခင်ထက် အဆင့်နှစ်ဆင့်မျှ ပိုမြင့်သောမြင့်မြတ်ဧကရာဇ် အဆင့်ရှိ ပုဂ္ဂိုလ်ကြီးများပင်လျှင် ၊ မြင့်မြတ်အဆင့် ကျင့်စဉ်တစ်ခုကို ပြီးပြည့်စုံသော အဆင့်အထိ ကျင့်ကြံနိုင်ရန် ခဲယဉ်းလှပါသည်။ ထိုအဆင့်ရှိ ပုဂ္ဂိုလ်ကြီးများ၌ ပိုမိုကောင်းမွန်သော ရွေးချယ်စရာများ ရှိနေကြခြင်းကိုတော့ ထည့်မတွက်ပါနှင့်ဦး ၊၊

သေချာတာကတော့ ၊ ဤကျင့်စဉ်သည် ဝိညာဉ်ခန္ဓာနှင့်အတူ အဆင့်မတက်နိုင်သော်လည်း ၊ မြင့်မြတ်အဆင့် အနိမ့်တန်း ဆိုသည့် အဆင့်မှာပင် လင်းရန်ယန်အတွက် အချိန်အတန်ကြာ အသုံးပြုရန် လုံလောက်လှသည် ၊၊ ၎င်းအပြင် ၊ ဒြပ်စင်စွမ်းအား များပြားလေလေ ကျင့်ကြံမှုနှုန်း မြန်ဆန်လေလေ ဖြစ်သည့် ဂုဏ်သတ္တိကြောင့် ၊ လင်းရန်ယန်အနေဖြင့် ဤစိန့်အဆင့် ကျင့်စဉ်ကို အချိန်တိုအတွင်း အထွတ်အထိပ်သို့ ရောက်အောင် ကျင့်ကြံနိုင်လိမ့်မည် ၊၊

ထို့နောက် လင်းရန်ယန်သည် တာအိုအတတ်ပညာကို ကြည့်လိုက်၏ ၊၊ သူသည် ဒြပ်စင်စွမ်းအားဖြင့် အားဖြည့်ပေးနိုင်သော အတတ်ပညာတစ်ခုကို အမှန်တကယ်ပင် ရှာတွေ့သွားခဲ့သည် ၊၊

“ကြယ်စင်ချေမှုန်းရေး လက်သီး - မြင့်မြတ်အဆင့် အနိမ့်တန်း လက်သီးအတတ် ဖြစ်သည် ၊ မိမိ၏ လက်သီးအတွင်းသို့ ဒြပ်စင်စွမ်းအားများကို ထည့်သွင်း စီးဆင်းစေနိုင်ပြီး ၊ ထိုမှတစ်ဆင့် အလွန်အမင်း ထိတ်လန့်ဖွယ်ရာ ကောင်းသော စွမ်းအားများကို ထုတ်ဖော်နိုင်သည် ၊ ၊ ထည့်သွင်းထားသော ဒြပ်စင်စွမ်းအား များလေလေ ၊ ထိုစွမ်းအား၏ အဆင့် မြင့်လေလေ ၊ ဖျက်ဆီးနိုင်စွမ်းမှာလည်း ပိုမို ပြင်းထန်လေလေ ဖြစ်ပါသည် ”

ဤအတတ်ပညာ၏ မိတ်ဆက်စာသားမှာ လင်းရန်ယန်၏ မျက်ဝန်းများကို တောက်ပသွားစေသည် ၊၊

“ဒါပဲပေါ့ ”

လင်းရန်ယန်က ပြုံးလိုက်၏ ၊၊ သူသည် တွန့်ဆုတ်မနေဘဲ ဤအတတ်ပညာနှင့် ကျင့်စဉ်ကို တိုက်ရိုက် လဲလှယ်လိုက်တော့သည် ၊၊

“မဆိုးပါဘူး... ဒီအတတ်ပညာက မင်းနဲ့ တကယ့်ကို အံကိုက်ပဲ ၊ ဒါပေမဲ့ ၎င်းရဲ့ ကျင့်ကြံရမှု ခက်ခဲမှုကတော့ သာမန် မြင့်မြတ်အဆင့် အထက်တန်း အတတ်ပညာတွေထက်တောင် ပိုပြီး မြင့်မားလိမ့်မယ် ၊ သို့ပေမဲ့ မင်းသာ ဒါကို ကျွမ်းကျင်သွားပြီး ၊ နောင်အနာဂတ်မှာ မင်းရဲ့ ဝိညာဉ်ခန္ဓာ အဆင့်တွေ ထပ်ပြီး မြင့်တက်လာမယ်ဆိုရင် ၊ မင်းဟာမြင့်မြတ်ဘုရင် အဆင့်ကို သေချာပေါက် ရောက်ရှိနိုင်လိမ့်မယ် ”

လင်းရန်ယန်သည် ကြယ်စင်ချေမှုန်းရေး လက်သီးကို လဲလှယ်လိုက်သည်ကို မြင်သောအခါ ၊ တာအဘိုးကြီးပင်လျှင် အသာအယာ ခေါင်းညိတ်၍ ချီးကျူးလိုက်သည် ၊၊

“ခက်ခဲတာလား... အဲဒါက ပြဿနာကြီး မဟုတ်ပါဘူး ”

လင်းရန်ယန်က အသာအယာ ပြုံးလိုက်၏။ ဘယ်လောက်ပဲ ခက်ခဲပါစေ ၊ အချိန်အနည်းငယ် ပိုပေးလိုက်ရုံဖြင့် အားလုံး အဆင်ပြေသွားမည် ၊၊

ဤသို့ တွေးမိသည်နှင့် ၊ သူသည် ဤကြယ်စင်ချေမှုန်းရေး လက်သီးကို ယခုချက်ချင်း ပြီးပြည့်စုံအောင် ကျင့်ကြံလိုက်မည်ဆိုပါက ၊ မည်မျှ စွမ်းအားကြီးမားမည်ကို သိနိုင်ရန် စနစ်ဖြင့် စစ်ဆေးကြည့်လိုက်သည် ၊၊

“ဒင်... ၊ ကြယ်စင်ချေမှုန်းရေး လက်သီးကို ၊ အရှင်၏ လက်ရှိအဆင့်ဖြင့် ထုတ်ဖော်မည်ဆိုပါက ၊ မြင့်မြတ်ဘုရင် အနိမ့်တန်း လက်သီးအတတ်၏ စွမ်းအားကို ထုတ်ဖော်နိုင်မည် ဖြစ်သည် ”

စနစ်က လင်းရန်ယန်ကို ချက်ချင်း အကြောင်းပြန်လိုက်၏ ၊၊

“မြင့်မြတ်ဘုရင် အနိမ့်တန်းလား ၊ ငါ ထင်တဲ့အတိုင်းပဲ ၊ ဒီလိုမျိုး အဆင့်မြှင့်လို့ရတဲ့ တာအိုအတတ်ပညာတွေကိုပဲ ငါ သုံးရမှာ ”

လင်းရန်ယန်မှာ မပြုံးဘဲ မနေနိုင်တော့ချေ ၊၊

ဤကဲ့သို့ ကြီးထွားနိုင်စွမ်းရှိသော တာအိုအတတ်ပညာမျိုးမှာ ၊ ဝိညာဉ်ခန္ဓာ ပိုင်ဆိုင်ထားသူများထဲမှ ၉၉ ရာခိုင်နှုန်းအတွက် အသုံးမဝင်လှချေ ၊၊ အဘယ့်ကြောင့်ဆိုသော် ၎င်းကို ဖန်တီးရမှုနှင့် ကျင့်ကြံရမှု ခက်ခဲမှုမှာ ၎င်း၏ အဆင့်ထက် များစွာ သာလွန်နေသောကြောင့် ဖြစ်သည် ၊၊ ထို့ပြင် သာမန် ဝိညာဉ်ခန္ဓာ ပိုင်ဆိုင်သူများအတွက်မူ ၊ မိမိတို့၏ ဝိညာဉ်ခန္ဓာ အဆင့်ကို မြှင့်တင်ရန်မှာ အလွန်ပင် ခက်ခဲလှ၏၊၊

ထိုသို့ အချိန်နှင့် စွမ်းအင်များကို အကုန်ခံမည့်အစား ၊ ၎င်းတို့သည် ပိုမို အစွမ်းထက်သော ၊ အဆင့်မြှင့်ရန် မလိုအပ်သည့် တာအိုအတတ်ပညာများကိုသာ ဖန်တီးကျင့်ကြံကြလေ့ ရှိသည် ၊၊

“ဒါဆိုရင် ၊ ကျွန်တော်မျိုး အရင်ဆုံး နှုတ်ဆက် ခွင့်တောင်းပါတယ် ”

ကျင့်စဉ်များကို လဲလှယ်ပြီးနောက် ၊ လင်းရန်ယန်သည် တာအဘိုးကြီးကို လက်အုပ်ချီ၍ နှုတ်ဆက်ကာ ထွက်ခွာရန် ပြင်ဆင်လိုက်တော့သည် ၊၊

“ကလေး... မင်း တခြား စမ်းသပ်မှု မျှော်စင်နှစ်ခုကို မစမ်းကြည့်တော့ဘူးလား ”

တာအဘိုးကြီးက လင်းရန်ယန်ကို မျှော်လင့်ချက် အပြည့်ဖြင့် ကြည့်ကာ မေးလိုက်သည် ၊၊

“နောက်တစ်ခေါက်မှပဲ ၊ ကျွန်တော် မထွက်သွားခင် အားလုံးကို တစ်ပြိုင်နက်တည်း စမ်းကြည့်ပါ့မယ် ”

လင်းရန်ယန်က အသာအယာ ပြုံးလျက် ပြန်ဖြေလိုက်၏ ၊၊

“ကောင်းပြီလေ... မင်းရဲ့ ကျင့်ကြံမှု ပါရမီနဲ့ဆိုရင် ၊ သိမြင်နားလည်မှု စမ်းသပ်စစ်ဆေးတဲ့ မျှော်စင်ကိုတော့ သေချာပေါက် ကျော်ဖြတ်နိုင်မှာပါ ၊ ဒါပေမဲ့ စိတ်ဓာတ်ကြံ့ခိုင်မှု ကျတော့ မသေချာဘူး ၊ မင်းရဲ့ စိတ်မြန်လက်မြန် ရှိတဲ့ ပုံစံကို ကြည့်ရတာ ၊ မင်းရဲ့ စိတ်ဓာတ်ကြံ့ခိုင်မှုက ပထမ အထပ် ၁၀ ထပ်ကိုတောင် ကျော်နိုင်မှာ မဟုတ်ဘူး ”

“ဒီစိတ်ဓာတ်ကြံ့ခိုင်မှု ဆိုတာက နောင်အနာဂတ်မှာ ရရှိမယ့် အောင်မြင်မှုတွေနဲ့ တိုက်ရိုက် သက်ဆိုင်နေတာ ၊ မင်းမှာ အချိန်ရှိရင် ၊ အဲဒါကို မြှင့်တင်နိုင်မယ့် နည်းလမ်းကို ရှာကြည့်သင့်တယ် ”

တာအဘိုးကြီးသည် လင်းရန်ယန်၏ ရှေ့မှောက်၌ အလေးအနက်ထား၍ ဆုံးမ စကားဆိုလိုက်သည် ၊၊ စိတ်ဓာတ်ကြံ့ခိုင်မှု ဆိုသည်မှာ အခြေခံအားဖြင့် တစ်ဦးတစ်ယောက်၏ စိတ်နေစိတ်ထားပင် ဖြစ်သည် ၊၊ ကျင့်ကြံခြင်း လမ်းစဉ်ဆိုသည်မှာ အလွန်ပင် ရှည်လျားလှသော သက်တမ်းကို ဖြတ်သန်းရခြင်း ဖြစ်၏ ၊၊

အကယ်၍ တစ်စုံတစ်ယောက်သည် အခြေခံအကျဆုံးသော စိတ်နေစိတ်ထားကိုပင် မထိန်းသိမ်းနိုင်ပါက ၊ သူတို့သည် နှစ်ပေါင်း သောင်းချီ ကြာမြင့်လာသည့်အခါ စိတ်ဓာတ်များ ပြိုလဲပျက်စီးသွားပြီး ၊ ဆက်လက် ရှင်သန်လိုစိတ် မရှိတော့သည်အထိ ဖြစ်သွားနိုင်သည် ၊၊ ဤကဲ့သို့သော လူမျိုးက မည်သို့လျှင် အထွတ်အထိပ် ပုဂ္ဂိုလ်တစ်ဦး ဖြစ်လာနိုင်မည်နည်း ၊၊

“ကျွန်တော်မျိုး နားလည်ပါပြီ ၊ ဒါဆိုရင် ကျွန်တော်မျိုး နှုတ်ဆက်ပါတယ် ”

လင်းရန်ယန်သည် ဤစကားကို ကြားပြီးနောက် အလေးအနက် ခေါင်းညိတ်လိုက်တော့သည် ၊၊ တစ်ဖက်လူက သူ့ကို ဤမျှ မြင့်မားစွာ အကဲဖြတ်ထားပြီး ၊ အထပ် ၁၀ ထပ်အထိ ကျော်ဖြတ်နိုင်လိမ့်မည်ဟု ပြောလိမ့်မည်ဟု သူ မထင်ထားခဲ့ချေ ၊၊ သူ ကိုယ်တိုင် ခန့်မှန်းထားသည်မှာမူ ၊ သူသည် စိတ်ဓာတ်ကြံ့ခိုင်မှု စမ်းသပ်ချက်၏ ပထမ တစ်ထပ်ကိုပင် ကျော်ဖြတ်နိုင်မည် မဟုတ်ဟု ဖြစ်သည် ၊၊

အဘယ့်ကြောင့်ဆိုသော် ၊ အစကတည်းက သူ၏ ကျင့်ကြံမှု အားလုံးမှာ စနစ်အပေါ်၌သာ မှီခိုနေခဲ့ရသောကြောင့် ဖြစ်၏၊၊

“စိတ်ဓာတ်ကြံ့ခိုင်မှုကို မြှင့်တင်ပေးနိုင်မယ့် အစွမ်းမဲ့ စွမ်းရည်မျိုး အသစ်ထွက်လာဖို့ပဲ မျှော်လင့်ရတော့မှာပေါ့ ၊ မဟုတ်ရင်တော့ ၊ ဒီစိတ်ဓာတ်ကြံ့ခိုင်မှု ဆိုတာက တစ်ညတည်းနဲ့ မြှင့်တင်လို့ရတဲ့ အရာမျိုး မဟုတ်ဘူးလေ ”

လင်းရန်ယန်မှာ စိတ်ထဲမှနေ၍ အနည်းငယ် သက်ပြင်းချလိုက်မိသည် ၊၊

“ဝုန်း... ”

စကားပြောပြီးသည်နှင့် သူ၏ ပုံရိပ်မှာ ထိုနေရာမှ ချက်ချင်းပင် ပျောက်ကွယ်သွား၏၊၊

နာရီအနည်းငယ် ကြာပြီးနောက် ၊ နှင်းရွာ သူကြီး၏ ခန်းမဆောင်ကြီး ရှေ့တွင်

“ကို... ကို အမြန်ဆုံး ပြန်လာခဲ့ရမယ်နော် ”

လင်းရန်ယန် ထွက်ခွာတော့မည်ကို မြင်သည့်အခါ ၊ ချင်းလင် သည် သူ၏ လက်မောင်းကို ဖက်တွယ်ထားရင်း ၊ ခွဲခွာရမည်ကို အလွန်ပင် ဝန်လေးနေတော့သည် ၊၊