ဆဋ္ဌမအဆင့် အခွင့်အရေး၊ မြေကမ္ဘာ ဝိညာဉ်မီးတောက်ကို ရရှိခြင်း

နောက်ထပ် တစ်နာရီခန့် ကြာပြီးနောက်။

ဖန်ဝေ၏ အကူအညီဖြင့် တောင်ကြားထဲတွင် ရိုးရှင်းသော သစ်သားအိမ်လေး တစ်လုံး ထပ်မံ ပေါ်ပေါက်လာသည်။

ကျင့်ကြံသူ တစ်ယောက်အတွက် အိမ်တစ်လုံး ဆောက်ခြင်းသည် အလွန် လွယ်ကူသော ကိစ္စပင်။

တောင်ကြား တစ်ခုလုံးတွင် သစ်သားအိမ် နှစ်လုံးသည် ဘေးချင်းယှဉ်လျက် ရှိနေကြ၏။

တစ်လုံးမှာ ကျန်းဖန်နှင့် စုဝေဝေတို့၏အိမ် ဖြစ်ပြီး၊ အခြားတစ်လုံးမှာ ဖန်ဝေတို့ မိသားစု၏အိမ် ဖြစ်သည်။

သစ်သားအိမ် နှစ်လုံးသည် နီးကပ်စွာ ရှိနေသော်လည်း၊ အသံတိတ်အင်း၏ စွမ်းအားကြောင့် အိမ်နီးချင်းများ၏ နှောင့်ယှက်မှုအား ခံရမည်ကို စိုးရိမ်စရာ မလိုပေ။

ဝုန်း…

ထိုခဏ၌ပင် ကျန်းဖန်၏ ချီပင်လယ် နက်ရှိုင်းရာမှ သတင်းစကား တစ်ခု ထွက်ပေါ်လာသည်။

"သင်သည် ဆင်းရဲသား ရပ်ကွက်မှ လွတ်မြောက်ခဲ့ပြီး၊ မကောင်းမှု ဒုစရိုက်သမား တစ်သိုက်ကို သတ်ဖြတ်ကာ သေကွင်းသေကွက် ကပ်ဘေးမှ လွတ်မြောက်ခဲ့သဖြင့် ကံကောင်းခြင်းအမှတ် (၃၀၀၀) နှင့် ဆဋ္ဌမအဆင့် အခွင့်အရေး တစ်ခု ရရှိပါသည်။"

ဘာ…

ထိုသတင်းစကားကို သိရှိလိုက်ရသည့်အခါ ကျန်းဖန်၏ မျက်လုံးများ ရုတ်တရက် အရောင်တောက်လာပြီး၊ အလွန်အမင်း စိတ်လှုပ်ရှားသွားသည်။

ဆင်းရဲသား ရပ်ကွက်မှ လွတ်မြောက်ရုံ သက်သက်ဖြင့် ဤမျှများပြားသော ကံကောင်းခြင်းအမှတ်များကို ရရှိလိမ့်မည်ဟု သူ ထင်မှတ်မထားခဲ့ပေ။

ဆင်းရဲသား ရပ်ကွက်တွင် ဆက်နေပါက မည်မျှ အန္တရာယ် ကြီးမားနိုင်ကြောင်းကို ဤအချက်က မီးမောင်းထိုးပြနေသည်။

ရက်စက်ကြမ်းကြုတ်သော ဒုစရိုက်သမားများကို ထည့်မတွက်လျှင်တောင်၊ ဓာတ်ကြီးငါးပါး ဆေးဂိုဏ်းမှ ကျင့်ကြံသူများ တစ်ခုတည်းဖြင့်ပင် လုံလောက်နေပြီ ဖြစ်သည်။

ထိုဂိုဏ်းသား ကျင့်ကြံသူများ၏ စိတ်ထဲတွင် ဘာရှိနေသည်ကို မည်သူမျှ မသိနိုင်ပါ။

ဂိုဏ်းသား ကျင့်ကြံသူများ၏ ဗိုလ်ကျစိုးမိုးတတ်သော နည်းလမ်းများအရဆိုလျှင်၊ ကျန်းဖန်သာ ဆင်းရဲသား ရပ်ကွက်တွင် ဆက်ရှိနေခဲ့ပါက သေချာပေါက် အသက်အန္တရာယ်နှင့် ကြုံတွေ့ရနိုင်ပေသည်။

ထို့ကြောင့် ဆင်းရဲသား ရပ်ကွက်မှ အမြန်ဆုံး ထွက်ခွာပြီး စစ်ပွဲကို ရှောင်ရှားခဲ့ခြင်းသည် အလွန် ပညာသားပါသော ရွေးချယ်မှု ဖြစ်၏။

သားရဲတစ်သောင်း တောင်တန်းသည် မိစ္ဆာများနှင့် မိစ္ဆာသားရဲများ သောင်းကျန်းသဖြင့် အန္တရာယ်များလှသော်လည်း၊ သူ့တွင် မိစ္ဆာနှင် အင်း အများအပြား ပါရှိသဖြင့် ညဘက် လှုပ်ရှားတတ်သော မိစ္ဆာများ၏ တိုက်ခိုက်မှုကို ကာကွယ်ရန် လုံလောက်ပေသည်။

ထို့ကြောင့် ရေတိုကာလအတွင်း သားရဲတစ်သောင်း တောင်တန်း နက်ရှိုင်းရာတွင် ပုန်းအောင်းနေခြင်းသည် အလွန် ဘေးကင်းသည်။

အနည်းဆုံးတော့ သူသည် စစ်ပွဲ၏ ရိုက်ခတ်မှုကို ခံရမည် မဟုတ်ပေ။

"ဆဋ္ဌမအဆင့် အခွင့်အရေးတောင် ရလိုက်တာလား... ဘယ်လို အခွင့်အရေးမျိုး ဖြစ်မလဲ မသိဘူး..."

ကျန်းဖန် လက်သီးကို တင်းတင်းဆုပ်လိုက်မိသည်။ ယခင်က သူသည် အခွင့်အရေး အများအပြား ရရှိခဲ့ဖူးသော်လည်း၊ အများစုမှာ အဋ္ဌမအဆင့်နှင့် သတ္တမအဆင့် အခွင့်အရေးများသာ ဖြစ်သည်။

အကယ်၍ ဆဋ္ဌမအဆင့် အခွင့်အရေးသာ ဆိုပါက၊ အုတ်မြစ်တည်ဆောက်ခြင်း အဆင့်နှင့် သက်ဆိုင်သော အခွင့်အရေး ဖြစ်လောက်သည်။

ရရှိလိုက်သည်နှင့် သူ့အတွက် အကျိုးကျေးဇူး အများအပြား ရရှိစေမည် ဖြစ်သည်။

ဘုန်း…

ထိုသို့ တွေးတောရင်း သူသည် ချီပင်လယ် နက်ရှိုင်းရာရှိ အခွင့်အရေး အလင်းစက်လေးကို ညင်သာစွာ တို့ထိလိုက်သည်။

ချက်ချင်းဆိုသလိုပင် သတင်းစကား တစ်ခုသည် ဒီရေလှိုင်းတံပိုးပမာ သူ၏ ချီပင်လယ် နက်ရှိုင်းရာသို့ ဝင်ရောက်လာတော့သည်။

"နောက်ထပ် သုံးရက်အကြာတွင်၊ ညဉ့်နက်သန်းခေါင်ယံ၌ အနောက်တောင်ဘက် ဆယ်မိုင်အကွာရှိ ဂူတစ်ခုသို့ သွားရောက်ပြီး ဆဋ္ဌမအဆင့် အခွင့်အရေးကို ရယူပါ။"

ထိုသတင်းစကားကို သိရှိလိုက်ရသည့်အခါ ကျန်းဖန် အလွန် ကျေနပ်သွားသည်။

ဆဋ္ဌမအဆင့် အခွင့်အရေးက ဘာလဲဆိုတာ ယခုအချိန်တွင် မသိရသေးသော်လည်း၊ သုံးရက်နေလျှင် ရှင်းလင်းသွားမည် ဖြစ်သည်။

......

မျက်တောင်တစ်ခတ် အတွင်းမှာပင် သုံးရက် လျင်မြန်စွာ ကုန်လွန်သွားခဲ့သည်။

ကျန်းဖန်နှင့် ဖန်ဝေတို့ မိသားစုသည် တောင်ကြားထဲတွင်သာ နေထိုင်ရင်း၊ ပြောင်းလဲနေသော အခြေအနေများကို စောင့်ကြည့်နေကြသည်။

ဝေးလံခေါင်သီသော နေရာတွင် ရှိနေသဖြင့်၊ သူတို့သည် စစ်ပွဲ၏ သက်ရောက်မှုကို မခံစားရပေ။

သို့သော် ရံဖန်ရံခါ၌ မြစိမ်းတော ဈေးတန်းမှ ထွက်ပြေးလာကြသော လေလွင့်ကျင့်ကြံသူ အချို့ကို တွေ့ရတတ်သည်။

ထိုလေလွင့်ကျင့်ကြံသူ အားလုံးသည် ဖုန်မှုန့်များ ပေကျံနေပြီး မျက်နှာများလည်း ညှိုးငယ်နေကြသည်။

"ကြောက်စရာကြီး... မြစိမ်းတော ဈေးတန်း အခြေအနေက တကယ် ကြောက်စရာကြီးဗျ..."

"ဈေးတန်း တစ်ခုလုံးကို ဓာတ်ကြီးငါးပါး ဆေးဂိုဏ်းက အပြတ်အသတ် သိမ်းပိုက်လိုက်ပြီ..."

"အထဲက ရတနာတွေ အကုန်လုံးကိုလည်း ဓာတ်ကြီးငါးပါး ဆေးဂိုဏ်းကပဲ သိမ်းသွားပြီ..."

"နေမင်းကြီး ဓားဂိုဏ်းက တပည့်တွေလည်း ထိတ်လန့်တကြား ထွက်ပြေးကုန်ကြတယ်၊ အုတ်မြစ်တည်ဆောက်ခြင်းအဆင့် ကျင့်ကြံသူ နှစ်ယောက်တောင် သေသွားတယ်တဲ့..."

"မြစိမ်းတော ဈေးတန်း တစ်ခုလုံး မြေလှန်ခံလိုက်ရသလို ဖြစ်သွားတယ်တဲ့ ကာကွယ်ရေး အစီအရင်ကြီးလည်း လုံးဝကို ပျက်စီးသွားပြီ..."

"အခြေအနေကြည့်ပြီး အမြတ်ထုတ်ချင်တဲ့ လေလွင့်ကျင့်ကြံသူတွေကတော့ ပိုဆိုးတာပေါ့ကွာ..."

"ဓာတ်ကြီးငါးပါး ဆေးဂိုဏ်းက တပည့်တွေနဲ့ တွေ့လိုက်မိတာနဲ့၊ အမေးအမြန်းမရှိ အသတ်ခံလိုက်ရတော့တာပဲ..."

"လုယက်ဖို့ ကြိုးစားတဲ့ ဒုစရိုက်သမားတွေလည်း ဓာတ်ကြီးငါးပါး ဆေးဂိုဏ်း လက်ချက်နဲ့ သေကုန်ကြပြီ..."

"တကယ် စွန့်စားရကျိုး မနပ်ဘူးဗျာ..."

လေလွင့်ကျင့်ကြံသူ အများအပြား ညည်းတွားနေကြသည်။

မည်သို့ပင်ဆိုစေ မြစိမ်းတော ဈေးတန်းသည် နှစ်ပေါင်းရာချီ တည်ရှိခဲ့ပြီး၊ မရေမတွက်နိုင်သော အခက်အခဲများနှင့် အန္တရာယ်များကို ကျော်ဖြတ်ခဲ့ရသည်။

သို့သော် မျက်တောင်တစ်ခတ် အတွင်းမှာပင် ဓာတ်ကြီးငါးပါး ဆေးဂိုဏ်း၏ လက်ချက်ဖြင့် ပျက်စီးသွားလိမ့်မည်ဟု မည်သူက ထင်မှတ်ထားပါမည်နည်း။

ဖျက်ဆီးရသည်မှာ လွယ်ကူသော်လည်း၊ ပြန်လည် တည်ဆောက်ရန် အတွက် အချိန်မည်မျှအထိ ကြာဦးမည်ကိုမူ မသိနိုင်ပေ။

အခွင့်ကောင်းယူပြီး ကြီးပွားချမ်းသာရန် ကြံစည်ခဲ့ကြသော လေလွင့်ကျင့်ကြံသူများသည် ဓာတ်ကြီးငါးပါး ဆေးဂိုဏ်း၏ ရက်စက်မှုကို ခါးသီးစွာ ခံစားလိုက်ကြရသည်။

သူတို့သည် လေလွင့်ကျင့်ကြံသူများကို 'အချောင်နှိုက်ခွင့်' လုံးဝ ပေးမည် မဟုတ်ပေ။

လေလွင့်ကျင့်ကြံသူများနှင့် တွေ့သည်နှင့် သတ်ဖြတ်ရှင်းလင်းသည့် မူဝါဒကို ကျင့်သုံးကြသည်။

မြစိမ်းတော ဈေးတန်းထဲ ဝင်ရောက်သွားသော လေလွင့်ကျင့်ကြံသူ အနည်းငယ်သာ အသက်ရှင် လွတ်မြောက်လာခဲ့ကြသည်။

ယခုအခါ မြစိမ်းတော ဈေးတန်း တစ်ခုလုံးတွင် မရေမတွက်နိုင်သော အလောင်းကောင်များနှင့် ပြည့်နှက်နေတော့၏။

ဈေးတန်းတစ်ခုတည်း ပျက်စီးသွားသည် မဟုတ်ပါ။

ဆင်းရဲသား ရပ်ကွက်သည်လည်း အုတ်မြစ်တည်ဆောက်ခြင်းအဆင့် ကျင့်ကြံသူများ၏ တိုက်ပွဲ ရိုက်ခတ်မှုကြောင့် လုံးဝ ပျက်စီးသွားခဲ့ပြီ ဖြစ်သည်။

ထိုတိုက်ပွဲကြောင့် သေကျေဒဏ်ရာရသူ မရေမတွက်နိုင်အောင် ရှိခဲ့သည်။

"ဒါက..."

ထိုစကားကို ကြားလိုက်ရသည့်အခါ ဖန်ဝေသည် အလွန် ကံကောင်းသည်ဟု ခံစားလိုက်ရသည်။

ကျေးဇူးတင်စရာ ကောင်းသည်မှာ သူသည် ဇနီးသည်၏ အကြံဉာဏ်ကို နားထောင်ပြီး၊ ဆင်းရဲသား ရပ်ကွက်မှ အချိန်မီ ထွက်ပြေးခဲ့ခြင်းပင်။

သို့မဟုတ်ပါက သူသည်လည်း ထိုလေလွင့်ကျင့်ကြံသူများ၏ ခြေရာအတိုင်း နင်းမိသွားပေလိမ့်မည်။

ထိုအချိန်ကျလျှင် မည်သည့် အကျိုးအမြတ်မှမရဘဲ အလကား သေသွားရမည် ဖြစ်သည်။

"ဒါဆိုရင် ဘာလို့ နေမင်းကြီး ဓားဂိုဏ်းနဲ့ ဓာတ်ကြီးငါးပါး ဆေးဂိုဏ်းတို့က စစ်ဖြစ်ကြတာတဲ့လဲ... အကြောင်းရင်းတော့ ရှိမှာပဲ..."

ကျန်းဖန် မေးလိုက်သည်။

"ဒါပေါ့ဗျာ... အကျိုးစီးပွားကြောင့်ပဲပေါ့..."

"ကြားတာတော့ နေမင်းကြီး ဓားဂိုဏ်းက 'ကမ္ဗလာမီးလျှံ သံသတ္တုသိုက်' ကို တွေ့ရှိခဲ့ရုံတင် မကဘူးတဲ့..."

"ဝိညာဉ်ကျောက်တုံး သတ္တုသိုက်ကိုပါ ရှာတွေ့သွားတာတဲ့..."

"အကျိုးအမြတ်ကြီးက အဲ့ဒီလောက်ထိ ကြီးတော့ ဓာတ်ကြီးငါးပါး ဆေးဂိုဏ်းက မနာလိုဖြစ်ပြီး ဝေစု လိုချင်တာပေါ့..."

"ဒါပေမဲ့ နေမင်းကြီး ဓားဂိုဏ်းကလည်း ဘယ်လက်ခံပါ့မလဲ၊ ဒါနဲ့ ဆွေးနွေးပွဲ ပျက်သွားတာပဲ..."

"နေမင်းကြီး ဓားဂိုဏ်းက တပည့်တချို့က ဓာတ်ကြီးငါးပါး ဆေးဂိုဏ်းက တပည့်တွေကို အရင် စသတ်လိုက်ကြတယ်တဲ့..."

"အဲ့ဒီကနေ စပြီး ဂိုဏ်းနှစ်ခုကြား ပဋိပက္ခက ကြီးထွားလာတော့တာပဲ..."

"ဒါကြောင့်လည်း ဓာတ်ကြီးငါးပါး ဆေးဂိုဏ်းက လက်တုံ့ပြန်တဲ့ အနေနဲ့ မြစိမ်းတော ဈေးတန်းကို တိုက်ခိုက်ဖို့ ဆုံးဖြတ်လိုက်တာ..."

"ကျွန်တော် သိသလောက်ဆိုရင် ဒီကိစ္စက ဂိုဏ်းကြီးနှစ်ခုရဲ့ 'ရွှေအမြုတေအဆင့် ဆရာသခင်များ' ကိုတောင် တုန်လှုပ်သွားစေတယ်တဲ့..."

"အခုဆို ရွှေအမြုတေအဆင့် ဆရာသခင် နှစ်ပါးက အနိုင်အရှုံး ဆုံးဖြတ်ဖို့ တိုက်ခိုက်ကြတော့မယ်လို့ ကြားတယ်..."

သတင်းစုံစမ်းရာတွင် နှံ့စပ်သူ တစ်ဦးက ဖြစ်ပျက်ခဲ့သမျှ အကြောင်းစုံကို ချက်ချင်း ရှင်းပြလိုက်သည်။

မည်သို့ဆိုစေ ယင်းသည် လျှို့ဝှက်ချက် တစ်ခု မဟုတ်တော့ပေ။