ဆဋ္ဌမအဆင့် အခွင့်အရေး၊ မြေကမ္ဘာ ဝိညာဉ်မီးတောက်ကို ရရှိခြင်း (၂)

ကြီးမားသော တိုက်ပွဲကြီးတစ်ခု ဖြစ်ပွားပြီ ဆိုသည်နှင့်၊ ၎င်း၏ အရင်းခံ အကြောင်းတရားသည်လည်း သဘာဝကျကျ ပေါ်ထွက်လာစမြဲပင်။

ကျင့်ကြံခြင်း ဂိုဏ်းများကြားရှိ စစ်ပွဲများသည် အများအားဖြင့် အာဃာတကြောင့်၊ သို့မဟုတ် အကျိုးစီးပွား လုယူခြင်းကြောင့် ဖြစ်ပွားလေ့ရှိသည်။

ကမ္ဗလာမီးလျှံ သံသတ္တုသိုက်နှင့် ဝိညာဉ်ကျောက်တုံး သတ္တုသိုက် နှစ်ခုပေါင်းလိုက်ခြင်းသည် ရွှေအမြုတေဂိုဏ်းကြီးများကြား ကြီးမားသော ပဋိပက္ခ မီးတောက်ကို လောင်ကျွမ်းစေရန် လုံလောက်သည်ထက်ပင် ပိုနေသေးသည်။

အကယ်၍ ရွှေအမြုတေဂိုဏ်း တစ်ခုခုကသာ ဤသတ္တုသိုက် နှစ်ခုလုံးကို ပိုင်ဆိုင်လိုက်ပါက၊ နောင်နှစ်ပေါင်း ရာချီတိုင်သည်အထိ ဘဏ္ဍာရေး ဝင်ငွေအတွက် ပူပန်စရာ လိုတော့မည် မဟုတ်ပေ။

ထို့ကြောင့် မည်သည့် ကျင့်ကြံသူကမျှ ဤအကျိုးအမြတ်ကို အလွယ်တကူ စွန့်လွှတ်လိုကြမည် မဟုတ်ပေ။

"ဒီလိုဆိုရင်... မြစိမ်းတော ဈေးတန်းကရော ဘာဆက်ဖြစ်မလဲ..."

ဖန်ဝေက စိုးရိမ်တကြီး မေးလိုက်သည်။

မည်သို့ပင်ဆိုစေ လေလွင့်ကျင့်ကြံသူများ အတွက် ကျင့်ကြံခြင်း ဈေးတန်းတစ်ခု ရှိနေခြင်းသည် အလွန် အရေးကြီးသည်။

ဈေးတန်း၏ ဆင်းရဲသား ရပ်ကွက်တွင် နေထိုင်ရသဖြင့် နေမင်းကြီး ဓားဂိုဏ်း၏ ခေါင်းပုံဖြတ်ခြင်း ခံရသည် ဆိုသော်လည်း…

ပြဿနာမှာ ဈေးတန်း မရှိတော့ပါက ဝိညာဉ်ဆန်၊ ဆေးဝါး၊ အင်းကွက်၊ မှော်လက်နက်နှင့် အခြားသော ကျင့်ကြံခြင်း အရင်းအမြစ်များကို ဝယ်ယူ၍ ရနိုင်တော့မည် မဟုတ်ပေ။ ဤသည်မှာ သူတို့အတွက် ကြီးမားသော ထိုးနှက်ချက် ဖြစ်သည်။

ထို့ပြင် ဈေးတန်း၏ ကာကွယ်မှုအောက်တွင် လေလွင့်ကျင့်ကြံသူ အများအပြား စုစည်းနေထိုင်နိုင်ပြီး၊ ညဘက် လှုပ်ရှားသော မိစ္ဆာများကိုလည်း စုပေါင်း ကာကွယ်နိုင်သည်။

ဈေးတန်းသာ ပျောက်ကွယ်သွားပါက၊ လေလွင့်ကျင့်ကြံသူ အများအပြားသည် မိစ္ဆာများ၏ အန္တရာယ်နှင့် ရင်ဆိုင်ရပေမည်။

သူတို့သည် သားရဲတစ်သောင်း တောင်တန်းထဲတွင် ဆက်လက် ရှင်သန်နိုင်ကြပါဦးမည်လား။

"မပြောတတ်ဘူးဗျ... ဘာပဲဖြစ်ဖြစ် မြစိမ်းတော ဈေးတန်း ကျဆုံးသွားပြီးတဲ့နောက်၊ ဓာတ်ကြီးငါးပါး ဆေးဂိုဏ်းက လူတွေလည်း အကုန် ပြေးသွားကြပြီ..."

"အခုဆို မြစိမ်းတော ဈေးတန်းကြီးက အပျက်အစီးပုံ ဘဝ ရောက်သွားပြီ..."

"ကြားတာတော့ နေမင်းကြီး ဓားဂိုဏ်းက မြစိမ်းတော ဈေးတန်းကို ပြန်လည် တည်ဆောက်ချင်နေတုန်းပဲတဲ့..."

"ဒါပေမဲ့ အနည်းဆုံးတော့ နေမင်းကြီး ဓားဂိုဏ်းနဲ့ ဓာတ်ကြီးငါးပါး ဆေးဂိုဏ်းတို့ရဲ့ စစ်ပွဲပြီးမှပဲ ဖြစ်လောက်မယ်..."

"ဒီ ရွှေအမြုတေဂိုဏ်းကြီး နှစ်ခုရဲ့ စစ်ပွဲက ဘယ်တော့မှ ပြီးမလဲဆိုတာ ဘယ်သူမှ မသိနိုင်ဘူး..."

လေလွင့်ကျင့်ကြံသူ အများအပြားက ကူရာမဲ့စွာ ပြောရှာသည်။

သူတို့၏ နေအိမ်များ ပျောက်ဆုံးသွားပြီ ဖြစ်သော်လည်း၊ သူတို့ ဘာမှ မတတ်နိုင်ကြပေ။

လေလွင့်ကျင့်ကြံသူများ အနေဖြင့် ရွှေအမြုတေဂိုဏ်းကြီးများ၏ စစ်ပွဲနှင့် ရင်ဆိုင်ရသောအခါ အားကိုးရာမဲ့လွန်းလှသည်။

"မြစိမ်းတော ဈေးတန်းက ဒီလိုပဲ ပျောက်ကွယ်သွားတော့မှာလား..."

ထိုစကားကို ကြားရသောအခါ ကျန်းဖန် စိတ်လေးသွားသည်။

မြစိမ်းတော ဈေးတန်း ပျောက်ဆုံးသွားခြင်းသည် ကျင့်ကြံခြင်း အရင်းအမြစ်များ ရရှိနိုင်မည့် လမ်းကြောင်းတစ်ခု ပိတ်သွားခြင်းနှင့် အတူတူပင်။

ဆေးဝါး၊ ဝိညာဉ်ဆေးပင်နှင့် အခြား အရင်းအမြစ်များ၏ အထောက်အပံ့ မရှိပါက၊ ကျင့်ကြံခြင်းအဆင့်ကို လျင်မြန်စွာ မြှင့်တင်ရန် ခက်ခဲပေလိမ့်မည်။

နေ့စဉ် ကြိုးစားပမ်းစား ကျင့်ကြံခြင်းကိုသာ အားကိုးရတော့မည်။

ဤသည်က ကျင့်ကြံခြင်း စွမ်းဆောင်ရည်ကို များစွာ လျော့ကျသွားစေမည် ဖြစ်သည်။

သို့သော်လည်း အခြား ရွေးချယ်စရာ လမ်းမရှိပေ။ နေမင်းကြီး ဓားဂိုဏ်းနှင့် ဓာတ်ကြီးငါးပါး ဆေးဂိုဏ်းတို့က အရင်းအမြစ် လုပွဲကို ဆင်နွှဲနေကြပြီ ဖြစ်ရာ…

သူတို့လို အားနည်းသော လေလွင့်ကျင့်ကြံသူများ အနေဖြင့် ရေလိုက်ငါးလိုက် နေထိုင်ရုံမှတစ်ပါး အခြား မရှိတော့ပေ။

"ခင်ဗျားတို့ ဘာဆက်လုပ်ဖို့ စီစဉ်ထားလဲ..."

ဖန်ဝေ မနေနိုင်ဘဲ မေးလိုက်သည်။

"မူလကတော့ တခြား ဈေးတန်းတစ်ခုကို ပြောင်းရွှေ့နေထိုင်ဖို့ စဉ်းစားခဲ့တာ..."

"ဘာပဲဖြစ်ဖြစ် သားရဲတစ်သောင်း တောင်တန်းက အကျယ်ကြီးဘဲလေ၊ မြစိမ်းတော ဈေးတန်း တစ်ခုတည်း ရှိတာမှ မဟုတ်တာ..."

"နှစ်ပေါင်းများစွာ ဖွံ့ဖြိုးတိုးတက်လာခဲ့တာဆိုတော့၊ သားရဲတစ်သောင်း တောင်တန်းထဲမှာ ကျင့်ကြံခြင်း ဈေးတန်း (၁၀၀) လောက်တော့ အနည်းဆုံး ရှိတယ်..."

"ပြဿနာက ကျွန်တော်တို့နဲ့ အနီးဆုံး ဈေးတန်းတောင်မှ ကီလိုမီတာ ထောင်ချီ ဝေးကွာနေတာပဲ..."

"ဒီလောက် ဝေးတဲ့ ခရီးကို သွားဖို့ဆိုတာ မလွယ်ဘူး‌ဗျ..."

"ပြီးတော့ သားရဲတစ်သောင်း တောင်တန်းထဲမှာ မိစ္ဆာသားရဲတွေနဲ့ မိစ္ဆာတွေကလည်း သောင်းကျန်းနေသေးတယ်..."

"ကျွန်တော်တို့ရဲ့ အင်အားနဲ့ဆိုရင် သားရဲတစ်သောင်း တောင်တန်းထဲမှာ ကီလိုမီတာ ထောင်ချီ ခရီးနှင်ဖို့ဆိုတာ လုံးဝ မဖြစ်နိုင်ဘူး..."

"ဒါကြောင့် ဒီမှာပဲ ဆက်နေပြီး ယာယီစခန်းလေး တည်ဆောက်ဖို့ စီစဉ်ထားတယ်..."

"ရွှေအမြုတေဂိုဏ်းကြီး နှစ်ခုရဲ့ စစ်ပွဲ မြန်မြန်ပြီးသွားပါစေလို့ပဲ ဆုတောင်းရမှာပေါ့၊ ဒါမှ မြစိမ်းတော ဈေးတန်းကို ပြန်ဆောက်လို့ ရမှာ..."

လေလွင့်ကျင့်ကြံသူ အများအပြား ဆွေးနွေးပြောဆိုနေကြသည်။

သူတို့သည် အခြား ကျင့်ကြံခြင်း ဈေးတန်းများတွင် သွားရောက် နေထိုင်လိုကြသည်။

သို့သော် ခရီးအကွာအဝေးသည် ဝေးလွန်းလှသည်။

လမ်းခရီး တစ်လျှောက်တွင် အန္တရာယ်များဖြင့် ပြည့်နှက်နေသည်။

ချီကျင့်ကြံခြင်းအဆင့်မျှသာ ရှိသေးသော သူတို့အတွက် လမ်းခရီး အန္တရာယ်များကို ကျော်ဖြတ်ရန်မှာ မဖြစ်နိုင်ပေ။

လမ်းတစ်ဝက်တွင်ပင် တစ်ဖွဲ့လုံး သေဆုံးသွားနိုင်သည်။

ထို့ကြောင့် လမ်းတစ်ဝက်တွင် အသေခံမည့်အစား၊ ဤနေရာတွင်သာ ဆက်လက် နေထိုင်ခြင်းက ပိုကောင်းပေလိမ့်မည်။

အနည်းဆုံးတော့ သူတို့သည် ပတ်ဝန်းကျင် အနေအထားနှင့် ရင်းနှီးကျွမ်းဝင်ပြီးသား ဖြစ်သည်။

ဘယ်နေရာက အန္တရာယ်များတယ်၊ ဘယ်နေရာက ဘေးကင်းတယ် ဆိုတာကို သူတို့ သိကြသည်။

ရွှေအမြုတေဂိုဏ်းကြီး နှစ်ခု၏ စစ်ပွဲပြီးဆုံးသွားပါက၊ မြစိမ်းတော ဈေးတန်း ပြန်လည် ပေါ်ပေါက်လာနိုင်ပေသည်။

"ဒါဆို ခင်ဗျားတို့ ဘယ်နေရာမှာ နေဖို့ စီစဉ်ထားလဲ..."

ကျန်းဖန် မေးလိုက်သည်။

"ခင်ဗျားတို့ နှစ်ယောက် နေတဲ့ တောင်ကြားလေးက အဆင်ပြေမယ်လို့ ကျွန်တော်တို့ ထင်တယ်..."

"အဲ့ဒီနေရာက လူသူကင်းဝေးပြီး ရေအရင်းအမြစ်လည်း ရှိတယ်လေ..."

"ဒါကြောင့် အနီးအနားမှာပဲ သစ်သားအိမ်လေးတွေ ဆောက်ပြီး ယာယီစခန်းချဖို့ စီစဉ်ထားတယ်..."

"ပြီးတော့ လေလွင့်ကျင့်ကြံသူတွေ အများကြီး စုစည်းနေထိုင်ရင် အန္တရာယ်ကို စုပေါင်း ကာကွယ်နိုင်တယ်လေ..."

"ကျင့်ကြံသူမိတ်ဆွေတို့ သဘောမကွက်ပါဘူးနော်..."

ဤလေလွင့်ကျင့်ကြံသူ အုပ်စုသည် တောင်ကြားထဲတွင် သစ်သားအိမ်များ ဆောက်လုပ်ရန် ဆုံးဖြတ်ပြီးသား ဖြစ်သည်။

မည်သို့ဆိုစေ ဤကဲ့သို့ နေထိုင်ရန် သင့်တော်သော နေရာမျိုးသည် ရှားပါးလှသည် မဟုတ်ပါလော။

"သဘောမကွက်ပါဘူးဗျာ..."

"ကျင့်ကြံသူမိတ်ဆွေတို့ ဒီမှာ လာနေထိုင်တာ ကျွန်တော်တို့အတွက်လည်း အကျိုးရှိပါတယ်..."

"ဘာပဲဖြစ်ဖြစ် အားလုံး အပြန်အလှန် ကူညီပြီး မိစ္ဆာတွေ၊ မိစ္ဆာသားရဲတွေကို စုပေါင်း ကာကွယ်နိုင်တာပေါ့..."

ဖန်ဝေက သဘောထားကြီးစွာ ပြောလိုက်သည်။

လေလွင့်ကျင့်ကြံသူများသည် အမျိုးမျိုး အထွေထွေ ရောနှောနေကြပြီး၊ မည်သူက ကောင်းသည်၊ မည်သူက ဆိုးသည်ကို ခွဲခြားရခက်သော်လည်း... လက်ရှိ အခြေအနေတွင် လေလွင့်ကျင့်ကြံသူများ စုစည်းနေထိုင်ခြင်းသည် အသင့်တော်ဆုံး ရွေးချယ်မှု ဖြစ်သည်။

လူအင်အား များပြားပါက သားရဲတစ်သောင်း တောင်တန်းထဲတွင် နေရာတိုင်း၌ ရှိနေတတ်သော မိစ္ဆာများနှင့် မိစ္ဆာသားရဲများကို ရင်ဆိုင်ရာတွင် အားရှိသည်။

အန္တရာယ်နှင့် ကြုံတွေ့ရသည့်အခါ တစ်ယောက်တည်း ရင်ဆိုင်စရာ မလိုတော့ပေ။

ပိုအရေးကြီးသည်မှာ သူသည် ဤလေလွင့်ကျင့်ကြံသူများ၏ တောင်းဆိုမှုကို ငြင်းဆန်၍ မရနိုင်ခြင်းပင်။

ထို့ကြောင့် မတတ်သာဘဲ သဘောတူလိုက်ရခြင်း ဖြစ်သည်။

"ကျေးဇူးတင်ပါတယ် ကျင့်ကြံသူမိတ်ဆွေ ဖန်..."

"ကျွန်တော်တို့ ဒီမှာ အချိန်အတိုင်းအတာ တစ်ခုအထိ နေဖြစ်ကြလောက်တယ်..."

လေလွင့်ကျင့်ကြံသူ အများအပြား အနည်းငယ် ပြုံးလိုက်ကြသည်။

......

ညဉ့်နက်သန်းခေါင်ယံ အချိန်။

ကျန်းဖန်သည် တောင်ကြားထဲမှ တိတ်တဆိတ် ထွက်ခွာလာခဲ့သည်။

ဆဋ္ဌမအဆင့် အခွင့်အရေး ညွှန်ပြထားသော အရပ်မျက်နှာအတိုင်း လိုက်ပါသွားပြီးနောက် မကြာမီ သူသည် ကိုယ်ပေါ့အင်း၏ စွမ်းအားကို အသုံးပြုလိုက်၏။ ထိုအခါ အမည်မသိ တောင်တစ်လုံးဆီသို့ လျင်မြန်စွာ ရောက်ရှိသွားသည်။ ထို့နောက် တောင်ပေါ်ရှိ ဂူတစ်ခုထဲသို့ ဝင်ရောက်သွားလိုက်၏။

ဂူထဲသို့ ဝင်ရောက်ပြီးနောက်၊ သူသည် ရှေ့သို့ ဆက်လက် တိုးဝင်သွားရာ နောက်ဆုံးတွင် ဂူ၏ အနက်ရှိုင်းဆုံး နေရာသို့ ရောက်ရှိသွားသည်။

ဝုန်း…

ထိုအချိန်၌ ဂူ၏ နက်ရှိုင်းရာတွင် အပြာရောင် မီးတောက်တစ်ခုသည် ပြင်းထန်စွာ လောင်ကျွမ်းနေ၏။

၎င်း၏ ပုံသဏ္ဌာန်သည် အပြာရောင် ကြာပန်းတစ်ပွင့်နှင့် တူသည်။

ဖျော့တော့သော အပြာရောင် အလင်းတန်းများကို ထုတ်လွှတ်နေလေ၏။

အပြာရောင် မီးတောက်၏ လွှမ်းခြုံမှုအောက်တွင်၊ စိတ်နှလုံးတွင်းရှိ မိစ္ဆာဆိုးများ ပျောက်ကွယ်သွားသကဲ့သို့ ခံစားရပြီး၊ စိတ်ကို ကြည်လင် အေးချမ်းသွားစေသည်။

သောက အားလုံးကို အပြီးတိုင် ဖယ်ရှားပစ်လိုက်သကဲ့သို့ပင်။

"နေပါဦး... ဒါက 'မြကမ္ဘာ ဝိညာဉ်မီးတောက်'လား..."

အပြာရောင် မီးတောက်ကို မြင်လိုက်ရသောအခါ ကျန်းဖန်၏ မျက်လုံးအိမ် ကျဉ်းမြောင်းသွားသည်။

ဆဋ္ဌမအဆင့် အခွင့်အရေး ဆိုကတည်းက သာမန်မဟုတ်ကြောင်း သူ သိထား၏။ သို့သော်လည်း၊ ဤဂူထဲတွင် မြကမ္ဘာ ဝိညာဉ်မီးတောက်ကို တွေ့ရလိမ့်မည်ဟု သူ လုံးဝ ထင်မှတ်မထားခဲ့မိပါ။

သိထားရမည်မှာ မြကမ္ဘာ ဝိညာဉ်မီးတောက်သည် ကျင့်ကြံခြင်းလောကရှိ 'ထူးဆန်းသော မီးတောက်များ'ထဲမှ တစ်ခု ဖြစ်သည်။

ဤမီးတောက်၏ စွမ်းအားသည် မှန်းဆ၍မရနိုင်အောင် ကြီးမားပြီး၊ ၎င်းတွင် ကြောက်မက်ဖွယ် ဖျက်ဆီးအားများလည်း ပါဝင်သည်။

တစ်ခါ ပေါက်ကွဲလိုက်သည်နှင့် ငလျင်လှုပ်သကဲ့သို့၊ မီးတောင်ပေါက်ကွဲသကဲ့သို့ ဖြစ်စေနိုင်သည်။

ထို့ပြင် ၎င်းသည် ကျင့်ကြံခြင်းကို အထောက်အကူပြုသော ထူးဆန်းသည့် မီးတောက် တစ်မျိုးလည်း ဖြစ်သည်။

အကယ်၍ ၎င်းကို အပြည့်အဝ ထိန်းချုပ်ပြီး သိမ်းပိုက်နိုင်ပါက၊ မြကမ္ဘာ ဝိညာဉ်မီးတောက်ကို အသုံးပြု၍ စိတ်နှလုံးတွင်းရှိ မိစ္ဆာဆိုးများကို သန့်စင်နိုင်ပြီး၊ ဉာဏ်အလင်းပွင့်ခြင်းကို တိုးတက်စေနိုင်သည်။ ၎င်း၏ အကျိုးကျေးဇူးသည် အလွန် နက်ရှိုင်းလှသည်။

ဤသည်မှာ ဆေးဖော်စပ်သူ အများအပြား အလိုချင်ဆုံးသော ထူးဆန်းသည့် မီးတောက်များထဲမှ တစ်ခု ဖြစ်သည်။

မရေမတွက်နိုင်သော ဆေးဖော်စပ်သူများသည် ထူးဆန်းသည့် မီးတောက် တစ်ခုခုကို ရှာဖွေချင်ကြသော်လည်း မတတ်နိုင်ကြပေ။

သို့သော် မမျှော်လင့်ဘဲ သူ ရှာတွေ့ခဲ့လေပြီ။

ကိုယ်တိုင် အသုံးမပြုလျှင်တောင်၊ ဤထူးဆန်းသည့် မီးတောက်ကို သိမ်းဆည်းထားပြီး ပြန်လည် ရောင်းချပါက၊ မှန်းဆ၍မရနိုင်သော ဈေးနှုန်းကို ရရှိနိုင်ပေသည်။

"ပုံမှန်ဆိုရင် အင်းကွက်ဆရာ တစ်ယောက်အတွက် ထူးဆန်းတဲ့ မီးတောက်တွေက သိပ်အသုံးမဝင်လှဘူး..."

"ဒါပေမဲ့ ယွမ်ချူး ဝိညာဉ်အင်းဂိုဏ်းရဲ့ အင်းကွက်ဆရာတွေ အတွက်တော့ ခြွင်းချက်ပဲ..."

"အထူးသဖြင့် 'အမြုတေပေါင်းစု အင်းကွက်ကျမ်းစာ'ကို ကျင့်ကြံတဲ့ အင်းကွက် ကျင့်ကြံသူတွေ အတွက်ဆိုရင်၊ ထူးဆန်းတဲ့ မီးတောက်တွေက ကောင်းကင်နဲ့ မြေကြီးရဲ့ အံ့ဖွယ်ရတနာတွေပဲ..."

"အကယ်၍ ဒီ မြကမ္ဘာ ဝိညာဉ်မီးတောက်ကို မီးလုံးအင်း နဲ့ ပေါင်းစပ်လိုက်ရင်၊ မီးလုံးအင်းရဲ့ စွမ်းအားက ဆယ်ဆ၊ အဆပေါင်းများစွာတောင် တိုးတက်သွားနိုင်တယ်..."

ကျန်းဖန် လက်သီးကို တင်းတင်းဆုပ်လိုက်မိပြီး၊ အလွန်အမင်း စိတ်လှုပ်ရှားနေမိသည်။

သူ့အတွက်မူ ယင်းသည် တကယ့်ကို မှန်းဆ၍မရနိုင်သော အခွင့်အရေးကြီး တစ်ရပ် ဖြစ်သည်။

ယခင် မီးလုံးအင်းတွင် ပါဝင်သော မီးစွမ်းအားသည် သာမန် မီးဝိညာဉ်စွမ်းအားမျှသာ ဖြစ်သည်။

အတော်လေး စွမ်းအားကြီးသည် မှန်သော်လည်း၊ ပိုမို သန်မာသော ရန်သူများနှင့် ရင်ဆိုင်ရပါက လုံလောက်တော့မည် မဟုတ်ပေ။

သို့သော် မြကမ္ဘာ ဝိညာဉ်မီးတောက်နှင့် ပေါင်းစပ်လိုက်ပါက အခြေအနေသည် လုံးဝ ကွာခြားသွားလိမ့်မည်။

မီးလုံးအင်း၏ စွမ်းအားသည် ကြီးမားစွာ တိုးတက်သွားမည် ဖြစ်သည်။

ထိုအချိန်ကျ မီးလုံးအင်း၏ စွမ်းအားကို ထုတ်လွှတ်လိုက်ခြင်းသည် မြကမ္ဘာ ဝိညာဉ်မီးတောက်၏ စွမ်းအားကို ထုတ်လွှတ်လိုက်ခြင်းနှင့် အတူတူပင် ဖြစ်ပေလိမ့်မည်။

ယင်းသည် မီးလုံးအင်း၏ စွမ်းအားကို အနည်းဆုံး ဆယ်ဆခန့် မြှင့်တင်ပေးနိုင်မည် ဖြစ်သည်။

တစ်ချိန်တည်းမှာပင် မီးလုံးအင်းကို အဆင့်မြှင့်တင်ပေးနိုင်ပေလိမ့်မည်။

"ပင်ကိုအင်းကွက်ရဲ့ စွမ်းအားကို မြှင့်တင်ဖို့ဆိုတာ၊ ကျင့်ကြံခြင်းအဆင့် မြှင့်တင်တာ၊ ကျွမ်းကျင်မှုအဆင့် မြှင့်တင်တာတွေ ရှိတယ်..."

"တတိယမြောက် နည်းလမ်းလည်း ရှိသေးတယ်... အဲ့ဒါကတော့ ကောင်းကင်နဲ့ မြေကြီးရဲ့ အံ့ဖွယ်အရာဝတ္ထုတွေနဲ့ ပေါင်းစပ်ခြင်းပဲ..."

"အကယ်၍ မီးလုံးအင်းက မြကမ္ဘာ ဝိညာဉ်မီးတောက်နဲ့ ပေါင်းစပ်သွားရင်၊ အဆင့်နိမ့် အင်းကွက်သက်သက် မဟုတ်တော့ဘူး..."

"ဒုတိယအဆင့် အင်းကွက်၊ ဒါမှမဟုတ် တတိယအဆင့် အင်းကွက် အဖြစ်တောင် ပြောင်းလဲသွားနိုင်တယ်..."

"သူ့ရဲ့ စွမ်းအားက အတိုင်းအဆမရှိ တိုးပွားသွားနိုင်တယ်..."

ကျန်းဖန်၏ မျက်လုံးများသည် စိတ်လှုပ်ရှားမှုကြောင့် အရောင်တောက်နေသည်။

ထိုသို့ တွေးတောမိသည်နှင့် သူသည် တုံ့ဆိုင်းမနေဘဲ ရှေ့သို့ တိုးသွားလိုက်ပြီး၊ 'အမြုတေပေါင်းစု အင်းကွက်ကျမ်းစာ' ၏ စွမ်းအားကို အသက်သွင်းလိုက်သည်။

ချက်ချင်းဆိုသလိုပင် သူ၏ တန်းထျန်နှင့် ချီပင်လယ် နက်ရှိုင်းရာရှိ ပင်ကိုအင်းကွက်သည် ပေါ်ထွက်လာသည်။

၎င်းသည် စက်လုံးပုံသဏ္ဌာန်ရှိသော အင်းကွက်တစ်ခု ဖြစ်ပြီး၊ ဂြိုဟ်တစ်လုံးကဲ့သို့ လည်ပတ်နေသည်။

နောက်တစ်စက္ကန့်တွင် ၎င်းသည် တွင်းနက်ကြီး တစ်ခုကဲ့သို့ ကြီးမားသော စုပ်ယူအားကို ထုတ်လွှတ်လိုက်သည်။

ဝုန်း…

မျက်တောင်တစ်ခတ် အတွင်းမှာပင် မြကမ္ဘာ ဝိညာဉ်မီးတောက် အမျှင်တန်းလေးသည် ပင်ကိုအင်းကွက်၏ ဝါးမြိုခြင်းကို ခံလိုက်ရပြီး၊ ၎င်း၏ အစိတ်အပိုင်း တစ်ခု ဖြစ်သွားတော့သည်။

ထိုအချိန်၌ မီးလုံးအင်း၏ စွမ်းအားသည် ထူးခြားစွာ တိုးတက်ပြောင်းလဲသွား၏။

ရိုးရှင်းသော မီးလုံးအင်း၏ သင်္ကေတ အင်းကွက်စာလုံးများ နေရာတွင်၊ အပြာရောင် အင်းကွက်စာလုံး အများအပြား ပေါ်ထွက်လာတော့သည်။

ထိုအချက်က မီးလုံးအင်းကို ယခင်ကထက် များစွာ ပိုမို ရှုပ်ထွေးနက်နဲသွားစေသည်။

ယင်းသည် မီးလုံးအင်း မဟုတ်တော့ဘဲ၊ 'မြကမ္ဘာ ဝိညာဉ်မီးတောက် အင်း' အဖြစ် ပြောင်းလဲသွားပြီဟု ဆိုရပေမည်။