အခန်း (၁၄၉)

အခန်း။ ၁၄၉

"မကြာသေးခင်ကမှ မီးမှုတ်နိုင်တဲ့ ဇွန်ဘီနဲ့ တွေ့ခဲ့ရတာ အခုတော့ မြေအောက်ထဲ လျှိုးဝင်နိုင်တဲ့ကောင်နဲ့ ထပ်တွေ့ပြန်ပြီ။ ဒီဇွန်ဘီတွေရဲ့ ဆင့်ကဲပြောင်းလဲမှု ပုံစံတွေက တကယ့်ကို ထူးဆန်းတာပဲ"

မြေလျှိုးဇွန်ဘီ ပေါ်ထွက်လာခြင်းက လုချွမ်းကို ထိတ်လန့်သွားစေခြင်း မရှိဘဲ အလွန်အမင်း ဝမ်းသာကြည်နူးစေခဲ့သည်။

"ငါ အရင်ကပြောခဲ့တဲ့ စကားတွေကို ပြန်ရုပ်သိမ်းရမယ်ထင်တယ်။ လက်ရှိအချိန်မှာတော့ ကျောက်လင်းကို နိမိတ်မကောင်းတဲ့ မိန်းမလို့ ခေါ်ဖို့ မသင့်တော်တော့ဘူးပဲ"

ဤကာလအတွင်း လုချွမ်းသည် ဇွန်ဘီရုပ်သေးအဖွဲ့များစွာကို ကျန်းနန်ခရိုင်အတွင်းသို့ စေလွှတ်ခဲ့သော်လည်း သာမန် ပထမအဆင့် ဆင့်ကဲဇွန်ဘီအချို့မှလွဲ၍ ထူးခြားသည့် စွမ်းရည်ရှိသော ဇွန်ဘီမျိုးကို လုံးဝရှာမတွေ့ခဲ့ပေ။

သို့သော် မမျှော်လင့်ဘဲ ကျောက်လင်း ရောက်လာပြီး မကြာမီမှာပင် ဤမြေလျှိုးဇွန်ဘီက သူ့အလိုလို အိမ်အရောက် ဆိုက်ဆိုက်မြိုက်မြိုက် ရောက်ရှိလာခဲ့သည်။

ထို့အပြင် ဤမြေလျှိုးဇွန်ဘီသည် ကျောက်လင်းအပေါ်တွင် ရန်ငြိုးကြီးပုံရသည်ကို လုချွမ်း သတိပြုမိလိုက်သည်။ ၎င်း ချင်းရွှေလယ်ယာခြံသို့ ရောက်ရှိလာခြင်းမှာ ကျောက်လင်းကို ဦးတည်လာခြင်းဖြစ်ကြောင်း သိသာလှသည်။

မြေကြီးရောင်ရှိသော ဤဇွန်ဘီသည် မြေပေါ်သို့ ရောက်သည်နှင့် ကျောက်လင်းအား တဟုန်ထိုး စတင်တိုက်ခိုက်လေတော့သည်။

"နင် နောက်တစ်ခါ ထပ်ပေါ်လာပြန်ပြီလား။ ဒီအငြိုးအတေးမှတ်တတ်တဲ့ကောင်"

ဆူညံသံကြောင့် နိုးလာသော ကျောက်လင်းသည် ပြေးဝင်လာသော မြေလျှိုးဇွန်ဘီကို မြင်လိုက်ရသဖြင့် အံ့အားသင့်သွားရသည်။

သူမသည် ချင်းရွှေလယ်ယာခြံအထိ ခက်ခဲစွာ လာခဲ့သော်လည်း ဤဇွန်ဘီက သူမနောက်သို့ တကောက်ကောက် လိုက်လာနိုင်လိမ့်မည်ဟု မယုံကြည်နိုင်ဘဲ ရှိနေသည်။

တကယ်ကို ရန်ငြိုးကြီးတဲ့ကောင်ပဲ။

ဒုတိယအဆင့် ဧရာမဇွန်ဘီတစ်ကောင်မှာ သူမဘေးနားတွင် ရှိနေသော်လည်း ဤမြေလျှိုးဇွန်ဘီကမူ ဘယ်သူ့ကိုမှ ဂရုမစိုက်သကဲ့သို့ ကျောက်လင်းကိုသာ အသေအလဲ ပစ်မှတ်ထား၍ ပြေးဝင်လာသည်။

ထိုအခိုက်အတန့်တွင် ကျောက်လင်း၏ စိတ်ထဲ၌ ဒေါသများ တောက်လောင်လာတော့သည်။ လွန်ခဲ့သော ရက်များအတွင်း ဤမြေလျှိုးဇွန်ဘီကြောင့် သူမ စိတ်ကျန်းမာရေးပင် ထိခိုက်မတတ် ဖြစ်ခဲ့ရသော်လည်း ချင်းရွှေလယ်ယာခြံသို့ ရောက်မှသာ နှစ်ရက်ခန့် အေးအေးဆေးဆေး နေခဲ့ရခြင်းဖြစ်သည်။

သူမသည် ဗိုက်ဝအောင်စားပြီး ကောင်းကောင်းအိပ်စက်ရန် မျှော်လင့်နေစဉ်မှာပင် ဤကောင်က ထပ်မံနှောင့်ယှက်လာပြန်သဖြင့် ကျောက်လင်းမှာ အကြီးအကျယ် ဒေါသထွက်သွားရသည်။

သံကြိုးနှင့် အချည်ခံထားရသော်လည်း သူမသည် အစွမ်းကုန် တိုက်ခိုက်လေတော့သည်။ ပြေးဝင်လာသော မြေလျှိုးဇွန်ဘီကို ရင်ဆိုင်ရန်အတွက် ကျောက်လင်းသည် သူမ၏ပေါင်ကြွက်သားများကို အားပြုကာ ဘေးရှိလျှောစီးစင်ကို နင်း၍ ဇွန်ဘီ၏ ခေါင်းပေါ်မှ ကျော်ဖြတ်ခုန်လိုက်သည်။

တိုက်ကွက်ကို ရှောင်တိမ်းပြီးနောက် ကျောက်လင်းသည် သူမ၏ ဆင့်ကဲပြောင်းလဲထားသော သန်မာသည့် ခန္ဓာကိုယ်ကို အသုံးချကာ လေထဲတွင်ပင် သုံးချက်ဆင့်ကန်ချက်ဖြင့် ဇွန်ဘီကို နောက်သို့ တရစပ် ဆုတ်ခွာသွားစေခဲ့သည်။

သူမ၏ စဉ်ဆက်မပြတ် ဆင့်ကဲပြောင်းလဲမှုကြောင့် ကျောက်လင်းသည် အလွန်သန်မာသော ခန္ဓာကိုယ်ကို ပိုင်ဆိုင်ထားသည်။

လုချွမ်း၏ ထိန်းချုပ်မှုအောက်ရှိ လျှပ်စီး ၁ နှင့် လျှပ်စီး ၂ တို့ကို မယှဉ်နိုင်သော်လည်း တိုက်ခိုက်ရေးစွမ်းရည် အားနည်းသော ဤမြေလျှိုးဇွန်ဘီကိုမူ သူမ အလွယ်တကူ ကိုင်တွယ်နိုင်စွမ်း ရှိသည်။

နောက်သို့ လွင့်ထွက်သွားပြီးနောက် ခေတ္တရပ်တန့်နေစဉ် မြေလျှိုးဇွန်ဘီသည် ကျောက်လင်း၏ ပတ်ဝန်းကျင်ရှိ အစွမ်းထက်သော ဆင့်ကဲဇွန်ဘီများ၏ အရှိန်အဝါကို အာရုံခံမိသွားသည်။

၎င်းမှာ အင်အားမမျှကြောင်း သိရှိသွားသဖြင့် ဤမြေလျှိုးဇွန်ဘီသည် ၎င်း၏ လက်များကို လက်သည်းများအဖြစ် ပြောင်းလဲကာ မြေကြီးကို စတင်တူးဆွလေတော့သည်။

ဤဇွန်ဘီနှင့် အကြိမ်ကြိမ် ရင်ဆိုင်ခဲ့ဖူးသော ကျောက်လင်းသည် ၎င်း ထွက်ပြေးရန် ကြံစည်နေကြောင်း ချက်ချင်း သိလိုက်သည်။ သူမသည် ပတ်ဝန်းကျင်သို့ အော်ဟစ်အချက်ပေးလိုက်၏။

"ဟဲ့ ဇွန်ဘီဘုရင် နင် ဒီမှာ စောင့်ကြည့်နေတာ ငါသိတယ်"

"နင့်ကို သတိမပေးဘူးလို့ မပြောနဲ့ဦး ဒီကောင် ထွက်ပြေးတော့မယ်"

ထိုစကားကို ကြားသည်နှင့် တိတ်တဆိတ် စောင့်ကြည့်နေသော လုချွမ်းသည် သူ၏ စိတ်

စွမ်းအင်ကို ထုတ်လွှတ်လိုက်သည်။

ကြောက်မက်ဖွယ်ကောင်းသော ထိုစိတ်စွမ်းအားအောက်တွင် မြေလျှိုးဇွန်ဘီမှာ ဘယ်လိုမျှ မရုန်းကန်နိုင်တော့ဘဲ အလွယ်တကူပင် ငြိမ်ကျသွားတော့သည်။

ထွက်ပြေးရန် ကြံစည်နေသော မြေလျှိုးဇွန်ဘီမှာ ရုတ်တရက် ကျောက်ရုပ်ကဲ့သို့ အေးခဲသွားသည်ကို မြင်လိုက်ရချိန်တွင် ကျောက်လင်းမှာ မှင်သက်သွားရသည်။

"ဇွန်ဘီတစ်ကောင်ကို ဒီလောက်အလွယ်တကူနဲ့ လုံးဝထိန်းချုပ်ပစ်လိုက်တာလား"

သူမအပေါ် မည်သည့်ရန်လိုမှုမျှ မရှိတော့ဘဲ အရှိန်အဝါတစ်ခုလုံး ပြောင်းလဲသွားသည့် ထိုဇွန်ဘီကို ကြည့်ရင်း ကျောက်လင်း၏ စိတ်ထဲတွင် ချမ်းစိမ့်သွားတော့သည်။

"ဒါဟာ ဇွန်ဘီဘုရင်ရဲ့ တကယ့်စွမ်းအားလား ဆင့်ကဲဇွန်ဘီတစ်ကောင်ကို ဒီလောက်မြန်မြန်ဆန်ဆန် ထိန်းချုပ်နိုင်တာ တကယ့်ကို ကြောက်စရာကောင်းလိုက်တာ"

ကျောက်လင်းသည် နေရောင်ခြည်ရပ်ကွက်တွင် ရှိစဉ်က ကိုယ်ပျောက်ဆင့်ကဲပြောင်းလဲသူ ပြောခဲ့သည့် စကားများကို မရည်ရွယ်ဘဲ ပြန်လည်သတိရမိသွားသည်။

ဇွန်ဘီဘုရင်သည် အမှန်တကယ်ပင် အကြောက်စရာအကောင်းဆုံး ဇွန်ဘီဖြစ်သည်မှာ သေချာလှ၏။

ထို့ကြောင့်လည်း ထိုကိုယ်ပျောက်လူက ၎င်းကို အသေအလဲ ဖျက်ဆီးချင်နေခြင်း ဖြစ်ပေလိမ့်မည်။ အကယ်၍သာ ဤဇွန်ဘီဘုရင်ကို ဆက်လက် ကြီးထွားခွင့်ပေးထားပါက လူသားမျိုးနွယ်အတွက် အကြီးမားဆုံးသော ခြိမ်းခြောက်မှု ဖြစ်လာပေတော့မည်။

ထိုအချိန်တွင် လုချွမ်းသည် မြေလျှိုးဇွန်ဘီကို ကျောက်လင်း၏ အမြင်အာရုံမှ ဝေးရာသို့ ခေါ်ဆောင်သွားပြီး ၎င်း၏ စွမ်းရည်အသစ်များကို စတင်စမ်းသပ်လေသည်။ မြေကြီးရောင်ရှိသော ဤဇွန်ဘီသည် မြေအောက်ထဲတွင် လွတ်လပ်စွာ သွားလာနိုင်ရုံသာမက ပစ္စည်းများကိုပါ သယ်ဆောင်သွားနိုင်သည်။

သို့သော် သက်ရှိသတ္တဝါများကိုမူ သယ်ဆောင်နိုင်ခြင်း မရှိပေ။

လုချွမ်းက မျက်ခုံးပင့်လိုက်ရင်း ရေရွတ်လိုက်သည်။

"ဇွန်ဘီတွေက သက်ရှိသတ္တဝါတွေ မဟုတ်ဘူးလို့ သတ်မှတ်လို့ရတယ်မလား"

စမ်းသပ်မှုများ ပြုလုပ်ပြီးနောက် လုချွမ်းသည် ဝမ်းသာစရာ အချက်တစ်ခုကို တွေ့ရှိခဲ့သည်။ ဤမြေလျှိုးဇွန်ဘီသည် အခြားသော ဇွန်ဘီများကို မြေအောက်သို့ သယ်ဆောင်သွားနိုင်သည်။ လက်ရှိ ၎င်း၏ အဆင့်အတန်းအရ တစ်ကြိမ်လျှင် တစ်ကောင်သာ သယ်ဆောင်နိုင်သော်လည်း ဤစွမ်းရည်မှာ အလွန်ပင် ထူးခြားလှသည်။

"မြေအောက်ကနေ သွားလာနိုင်တဲ့ ဒီဇွန်ဘီရှိနေမှတော့ နောင်ကျရင် စစ်ဆင်ရေးတွေလုပ်ရတာ အများကြီး ပိုလွယ်ကူသွားပြီ။ ဆင့်ကဲပြောင်းလဲသူတွေမှာ ဘယ်လို ထူးဆန်းတဲ့ စွမ်းရည်တွေပဲ ရှိရှိ မြေအောက်က လှုပ်ရှားမှုကိုတော့ ဘယ်သူမှ သိနိုင်မှာ မဟုတ်ဘူး"

လူအများစုအတွက်မူ ဤမြေလျှိုးဇွန်ဘီ၏ လှုပ်ရှားမှုမှာ လေထဲသို့ ကိုယ်ပျောက်ကွယ်သွားသည်ဟုပင် ထင်မှတ်ရပေလိမ့်မည်။

နောင်တွင် သတင်းအချက်အလက် စုဆောင်းရန်အတွက် ဤဇွန်ဘီသည် အဖိုးမဖြတ်နိုင်သော ကင်းထောက်တစ်ဦး ဖြစ်လာပေတော့မည်။

ရန်သူ့ခံစစ်များကို ကျော်ဖြတ်နိုင်သလို အခြေအနေမဟန်ပါက မြေအောက်သို့ လျှိုးဝင်၍ အလွယ်တကူ ထွက်ပြေးနိုင်သည်။

ရန်သူက မည်မျှပင် အစွမ်းထက်ပါစေ မြေပြင်တစ်ခုလုံးကို ဆွဲဖြဲပစ်ရန်မှာ မဖြစ်နိုင်ပေ။

ထို့ပြင် ဤဇွန်ဘီသည် သူ့အား မြေအောက်သို့ သယ်ဆောင်သွားနိုင်သဖြင့် အရေးကြုံလာပါက အသက်ဘေးမှ လွတ်မြောက်နိုင်မည့် နောက်ဆုံးထွက်ပေါက်တစ်ခုလည်း ဖြစ်လာနိုင်ပေသည်။

နောက်တစ်နေ့ မွန်းတည့်ချိန်၌ ကျိရုရွှယ်သည် လင်ဗန်းကြီးတစ်ခုကို ကိုင်ဆောင်ကာ ကျောက်လင်းထံသို့ လျှောက်လာခဲ့သည်။ လင်ဗန်းပေါ်တွင် မွှေးကြိုင်လှသော ဆန်ပြုတ်တစ်ခွက် ဂျုံပေါင်မုန့်အချို့နှင့် ဆန်ပြုတ်ထဲတွင် ထည့်ထားသော ကြက်ဥတစ်လုံးတို့ ပါရှိသည်။

ကျိရုရွှယ်သည် ဤကိုးကြိမ်သေ နတ်သမီးရဲမေကို အလွန်တန်ဖိုးထားသည်။ အကယ်၍ စနစ်တကျ လေ့ကျင့်သင်ကြားပေးနိုင်ပါက နောင်တစ်ချိန်တွင် ကျောက်လင်းသည် ဧကရာဇ်အဆင့်သို့ အောင်မြင်စွာ တက်လှမ်းနိုင်မည်ဟု သူမ မျှော်လင့်ထားသည်။

အဓိကအချက်မှာ ကျောက်လင်းသည် တိုက်ခိုက်ရေးစွမ်းရည် အလွန်မြင့်မားသော်လည်း ဦးနှောက်ကမူ အနည်းငယ် အူကြောင်ကြောင်နိုင်သဖြင့် ကြင်နာမှုဖြင့် သိမ်းသွင်းရန် ကျိရုရွှယ် ဆုံးဖြတ်ထားခြင်းဖြစ်သည်။

မျှော်လင့်ထားသည့်အတိုင်းပင် ကျိရုရွှယ် ယူဆောင်လာပေးသော ကောင်းမွန်လှသည့် အစားအစာများကို မြင်လိုက်ရချိန်တွင် ကျောက်လင်းမှာ အကြီးအကျယ် စိတ်လှုပ်ရှားသွားရသည်။

အေးစက်ရက်စက်လှသော ဤကမ္ဘာပျက်ကပ်အတွင်း၌ ဤမျှ ခမ်းနားသော အစားအစာကို စားရလိမ့်မည်ဟု သူမ တစ်ခါမျှ မတွေးဝံ့ခဲ့ပေ။

ချီချီလေး၏ ဖြူစင်သောအကြည့်များကို ကြည့်ရင်း ကျောက်လင်းသည် ရဲစခန်းမှ လူယုတ်မာများနှင့် ဆန့်ကျင်ဘက်ဖြစ်သော ဤနတ်သမီးလေးကို ကာကွယ်ရန် ပို၍ပင် စိတ်ပိုင်းဖြတ်

လိုက်မိသည်။

သူမသည် ကျိရုရွှယ်ကို ကြည့်ကာ အလေးအနက် ပြောလိုက်သည်။

"ချီချီလေး... စိတ်မပူနဲ့နော်။ အန်တီ သမီးကို ဒီနေရာကနေ သေချာပေါက် ကယ်ထုတ်သွားပေးမယ်"

ကျိရုရွှယ်: ""

ဒီနေရာကနေ ထွက်သွားမယ်။

တကယ်ကြီးလား။

နင် ရူးနေတာလား။

ငါက ဘယ်တုန်းက ထွက်သွားချင်တယ်လို့ ပြောလို့လဲ။

ကိုယ့်ဘာသာကိုယ် လျှောက်ပြီး ဆုံးဖြတ်ချက်တွေ မချပါနဲ့လား။

ကျိရုရွှယ်မှာ စကားပင် ဆွံ့အသွားရသည်။ သူမက ကျောက်လင်းကို မဟာမိတ်အဖြစ် သိမ်းသွင်းရန် ကြံစည်နေသော်လည်း ကျောက်လင်းကမူ သူမအား ဤငရဲခန်းမှ ကယ်တင်ရန်သာ စဉ်းစားနေတော့သည်။