အခန်း (၂၄၄)

အခန်း။ ၂၄၄

ခေတ္တမျှအထိ ထိုဝိညာဉ်ဖြစ်တည်ခြင်းအဆင့် ပညာရှင် သုံးဦးမှာ မမျှော်လင့်ထားသော မြင်ကွင်းကြောင့် ဇဝေဇဝါဖြစ်လျက် ရပ်နေမိကြသည်။

"နတ်ဘုရားလက်နက်က ဘယ်မှာလဲ"

သူတို့ထဲမှ တစ်ယောက်က တိုးတိုးလေး ရေရွတ်ရင်း ရတနာ၏ အရိပ်အယောင်ကို တောင်ထိပ်တစ်ခုလုံး အသည်းအသန် လိုက်လံရှာဖွေနေတော့သည်။

ထိုလူသုံးဦးမှာ တစ်ဦးကိုတစ်ဦး ကြောင်တောင်တောင်ဖြင့် ကြည့်လိုက်ကြပြီးနောက် တရားထိုင်သည့်ပုံစံဖြင့် ထိုင်နေဆဲဖြစ်သော လီယောင်းထံသို့ အကြည့်များ ရောက်သွားကြသည်။ လီယောင်း၏ အကြည့်များတွင် ကြောက်ရွံ့ခြင်း သို့မဟုတ် စိုးရိမ်ခြင်း အရိပ်အယောင် အနည်းငယ်မျှ မရှိဘဲ အမှန်စင်စစ်တွင် စိတ်လှုပ်ရှားနေသည့် အရိပ်အယောင်ကိုပင် သူတို့ ခံစားနေရသည်။ သို့သော် ၎င်းမှာ သူတို့၏ စိတ်အထင်သာ ဖြစ်လိမ့်မည်ဟု ယူဆလိုက်ကြသည်။

"နတ်ဘုရားလက်နက်ကို ဘယ်မှာ ဖျောက်ထားတာလဲ"

လူတစ်ယောက်က ဒေါသတကြီး မေးလိုက်သည်။ သူ၏ ဝိညာဉ်ဖိအားများပြန့်လွင့်လာပြီး သူ၏ခြေရင်းရှိ မြေပြင်များမှာ အက်ကွဲကြောင်းများ ပေါ်လာတော့သည်။

"အခုချက်ချင်း ထုတ်မပေးဘူးဆိုရင်တော့ ငါတို့ဘက်က ရိုင်းရိုင်းစိုင်းစိုင်း ပြုမူမိတာကို အပြစ်မတင်နဲ့တော့"

လီမိန်မှာမူ ဤစကားဝိုင်းကို နားမလည်နိုင်စွာ ကြည့်နေမိသည်။

ဒီလူသုံးယောက် တစ်ခုခုကို အထင်လွဲနေကြတာလား။

သူတို့လည်း သူမလိုပဲ ဒီအပေါ်မှာ နတ်ဘုရားလက်နက် ရှိနေတယ်လို့ ထင်နေကြတာလား။

သူမသည် ဝမ်းကွဲမမကို အပြစ်ရှိသကဲ့သို့ ဘေးစောင်းကြည့်လိုက်သည်။ လီယောင်းဆီသို့ ပြဿနာများ မရောက်စေရန် သူမသည် ဝေးဝေးသို့ ထွက်ပြေးခဲ့သော်လည်း နောက်ဆုံးတွင် အခြေအနေမှာ ဤသို့ ဖြစ်လာခဲ့ရသည်။

ထိုသို့ တွေးနေစဉ်မှာပင် သူမ တစ်ခုခု ထူးဆန်းနေသည်ကို သတိထားမိသွားသည်။

"ဟင် ဘာလို့ အဲဒီလို ဖြစ်နေတာလဲ"

လီယောင်း၏ ထူးဆန်းသော မျက်နှာအမူအရာကို ကြည့်ပြီး လီမိန် တွေးနေမိသည်။

"တကယ်ပဲ ဒီအပေါ်မှာ နတ်ဘုရားလက်နက် ရှိနေတာလား"

လီယောင်းသည် ထိုလူများ၏ စကားကို ကြားလိုက်ရသောအခါ မျက်နှာထား တင်းမာသွားသည်။

"ငါ့မှာ နတ်ဘုရားလက်နက် ရှိနေတာကို မင်းတို့ ဘယ်လိုသိတာလဲ"

သူမက မေးလိုက်သည်။

"သတင်းတွေ ပေါက်ကြားသွားတာလား ဘယ်သူက ပေါက်ကြားအောင် လုပ်တာလဲ"

သူမ၏ စိတ်ထဲတွင် ဖြစ်နိုင်ခြေများကို လျင်မြန်စွာ စဉ်းစားနေမိသည်။

ဘယ်သူက သူမကို ဖော်ကောင်လုပ်လိုက်တာလဲ တစ်စုံတစ်ယောက်က ရတနာကို သတိထားမိသွားတာလား ဘယ်သူပါလိမ့်။

ထိုလူသုံးဦးမှာ တစ်ဦးကိုတစ်ဦး ကြည့်လိုက်ကြပြီး သူတို့ထဲမှ အမောက်မာဆုံးလူက ခေါင်းကိုမော့ကာ တဟားဟား ရယ်မောလိုက်သည်။

"ဟားဟား ငါ မင်းတို့ကို ဘာပြောခဲ့လဲ"

သူက သူ၏ အပေါင်းအသင်းများကို ပြောလိုက်သည်။

အခြားသူများ၏ လောဘရိပ်များမှာလည်း ပိုမိုနက်ရှိုင်းလာသည်။

"ဟားဟားဟား... သတင်းပေါက်ကြားစရာတောင် မလိုပါဘူး။ ဦးနှောက်ရှိတဲ့သူဆိုရင် ဒီလောက်ပြင်းထန်တဲ့ ဘေးဒုက္ခလျှပ်စီးတွေကို ကြည့်ရုံနဲ့ ဒီမှာ နတ်ဘုရားလက်နက် ရှိနေတယ်ဆိုတာ သိနိုင်တာပဲ"

တစ်ယောက်က ကောင်းကင်ယံမှ ပျောက်ကွယ်စပြုနေသော မိုးတိမ်များကို ညွှန်ပြကာပြောလိုက်သည်။

"ဟားဟား… နိမ့်ကျတဲ့ သတ္တဝါတွေဆီက ဘာများ မျှော်လင့်နေလို့လဲ"

တတိယမြောက်လူက ထပ်လောင်းပြောဆိုလိုက်ရာ အခြားသူများပါ လိုက်လံရယ်မောကြတော့သည်။

လီယောင်းသည် သက်ပြင်းတစ်ချက်ကို အသံထွက်အောင် ချလိုက်ပြီး သူမ၏ ပခုံးများမှာ စိတ်သက်သာရာရသွားဟန်ဖြင့် လျော့ကျသွားသည်။

"သတင်းပေါက်ကြားတာ မဟုတ်ဘူးဆိုရင်တော့ တော်သေးတာပေါ့"

သူမက ကျေနပ်စွာ ပြောလိုက်သည်။

"ဂိုဏ်းသားတွေကို သတ်လိုက်ရမယ်ဆိုရင် စီနီယာအစ်ကိုက သဘောကျမှာ မဟုတ်ဘူး"

သူမသည် ထိုင်နေရာမှ ထရပ်လိုက်သည်။

"ဝမ်းကွဲမမ"

လီမိန်သည် စိုးရိမ်တကြီးဖြင့် လှမ်းခေါ်လိုက်သော်လည်း လီယောင်းသည် သူမကို အသိအမှတ်ပင်မပြုဘဲ ဘေးမှ ဖြတ်လျှောက်သွားခဲ့သည်။

လီမိန်သည် ဝေးကွာသွားသော သူမ၏ ဝမ်းကွဲမမ၏ ကျောပြင်ကို ကြည့်ရင်း သူမသည် ယခင်နှင့်မတူဘဲ တစ်မျိုးကြီး ဖြစ်နေသည်ဟု တွေးနေမိသည်။ ၎င်းမှာ လီယောင်း၏ ရုပ်ရည်ပိုမိုရင့်ကျက်လာခြင်းမျိုးတင်မကဘဲ သူမ၏အတွင်းစိတ်ထဲ၌ အခြေခံကျကျ တစ်ခုခု ပြောင်းလဲသွားပြီဟု ခံစားနေရခြင်း ဖြစ်သည်။

လီယောင်းသည် ထိုလူသုံးယောက်ထံသို့ ချဉ်းကပ်သွားပြီး သူတို့ရှေ့ တစ်မီတာခန့်အကွာတွင် ရပ်လိုက်သည်။ ထို့နောက် သူမသည် သူတို့ကို မော့ကြည့်လိုက်ပြီး…

"ဝိညာဉ်ဖြစ်တည်ခြင်းနယ်ပယ်က အမှိုက်သုံးကောင်..."

သူမက စတင်ပြောဆိုလိုက်သည်။

"တစ်နေရာတည်းမှာ အကြာကြီးနေခဲ့ရလို့ ညောင်းညာနေတဲ့ ငါ့အရိုးအဆစ်တွေကို ဆန့်ထုတ်ဖို့အတွက်တော့ လုံလောက်မှာပဲ"

ထိုလူသုံးဦးမှာ သူတို့ကြားလိုက်ရသည်ကို မယုံနိုင်သဖြင့် မျက်တောင်များကို ပြိုင်တူခတ်လိုက်ကြသည်။ ထို့နောက်တွင်တော့ သူတို့သည် အလွန်အမင်း ရယ်မောလိုက်ကြပြီး တစ်ယောက်ပေါ်တစ်ယောက် မှီလျက်ပင် ရယ်မောနေကြတော့သည်။

"ဟားဟားဟား... မင်းတို့ ကြားလိုက်လား"

တစ်ယောက်က ရယ်ရလွန်းသဖြင့် အသက်ရှူပင် မဝတော့ပေ။

"ဒါက ဒီနေ့တစ်နေ့လုံး ငါကြားဖူးသမျှထဲမှာ အရင်ဆုံးရဆုံးပဲ"

နောက်တစ်ယောက်က မျက်ရည်များ ထွက်လာသည်အထိ ရယ်မောရင်း ပြောလိုက်သည်။

သူတို့သည် ထိုကဲ့သို့ပင် တဟားဟားနှင့် အကြာကြီး ရယ်မောနေကြသည်။ နောက်ဆုံးတွင် သူတို့ထဲမှ တစ်ယောက်က အပေါင်းအသင်းကို မှီထားရဆဲ ဖြစ်သော်လည်း စိတ်ကို ပြန်ထိန်းကာ စကားပြောလိုက်သည်။

"မင်းက တကယ်ရယ်ရတာပဲ"

သူက ရယ်သံများကို မနည်းအောင့်ထားရင်းပြောလိုက်သည်။

"မင်းကို အသက်ချမ်းသာပေးဖို့ ငါ ဆုံးဖြတ်လိုက်ပြီ။ အဲဒီ နတ်ဘုရားလက်နက်ကိုသာ ငါ့ကိုပေး ပြီးရင် ငါ့စိတ်မပြောင်းခင် ဒီကနေ အမြန်ထွက်သွားတော့"

သို့သော် လီယောင်းမှာမူ မည်သည့်တုံ့ပြန်မှုမျှမရှိဘဲ ခံစားချက်ကင်းမဲ့သော အကြည့်ဖြင့်သာ စိုက်ကြည့်နေဆဲပင်...

သူမတွင် မည်သည့်တုန်လှုပ်မှုမျှမရှိသည်ကို မြင်လိုက်ရသောအခါ ထိုလူ၏ ရယ်သံများမှာ တဖြည်းဖြည်း တိတ်ဆိတ်သွားတော့သည်။ သူ၏ မျက်နှာအမူအရာမှာလည်း ရယ်မောနေရာမှ တည်ကြည်လေးနက်သွားသည်။

"မင်း အတည်ပြောနေတာလား"

...

လီမိန်သည် မြေပြင်ပေါ်မှနေ၍ လီယောင်းကို လှမ်းကြည့်နေမိသည်။

သူမ ဘာဖြစ်နေတာလဲ။ ဘာကြောင့် ဝိညာဉ်ဖြစ်တည်ခြင်းအဆင့် ပညာရှင် သုံးယောက်ကို ဒီလောက်အထိ တမင်တကာ သွားရောက်ရန်စနေရတာလဲ။

လီယောင်းသည် အခြေတည်ဝိညာဉ်အဆင့်သို့ အောင်မြင်စွာ တက်လှမ်းနိုင်ခဲ့သည်မှာ ထင်ရှားသော်လည်း သူမအနေဖြင့် ဝိညာဉ်ဖြစ်တည်ခြင်းအဆင့် ပညာရှင်တစ်ဦးကို တိုက်ပွဲတွင် အမှန်တကယ် အနိုင်ယူနိုင်လိမ့်မည်ဟု လီမိန် မယုံကြည်ပေ။ ထိုအဆင့်နှစ်ခုကြားရှိ စွမ်းအားကွာဟချက်မှာ အလွန်တရာ ကြီးမားလွန်းလှသည်။

လီယောင်း ဤမျှမြန်မြန် အခြေတည်ဝိညာဉ်အဆင့်သို့ ရောက်ရှိသွားခြင်းအပေါ် လီမိန် အထူးတလည် အံ့ဩခြင်းမရှိပေ။ သူမကိုယ်တိုင်ပင် ရွှေအမြုတေအဆင့်လတ်သို့ ရောက်ရှိနေပြီဖြစ်ရာ အဆင့်တက်ရန် ခြေလှမ်းအနည်းငယ်သာ လိုတော့သည်။ ထို့ပြင် လီယောင်းမှာ မွေးဖွားကတည်းက ပါရမီရှင်အဆင့် ပါရမီများကို ပိုင်ဆိုင်ထားသူဟု ကျော်ကြားခဲ့သဖြင့် သူမကဲ့သို့ လူတစ်ဦးအတွက် ကျင့်စဉ်အဆင့် လျင်မြန်စွာတိုးတက်ခြင်းမှာ ထူးဆန်းသည့်ကိစ္စ မဟုတ်ပေ။

သို့သော် လီယောင်း၏ မယုံနိုင်စရာကောင်းသော ယုံကြည်ချက်များမှာ မည်သည့်နေရာမှ ရောက်လာတာလဲဆိုသည်ကိုမူ လီမိန် နားမလည်နိုင်ပေ။

လီယောင်းတွင် တကယ်ပဲ နတ်ဘုရားရတနာ ရှိနေတာလား။

အကယ်၍ အမှန်တကယ်ရှိနေလျှင် သူမ၏ ရဲတင်းမှုမှာ အတန်ငယ် အကြောင်းပြချက်ရှိပေလိမ့်မည်။ နတ်ဘုရားအဆင့် လက်နက်တစ်ခု၏ အကူအညီဖြင့်ဆိုလျှင် အခြေတည်ဝိညာဉ် အဆင့် ကျင့်ကြံသူတစ်ဦးက ဝိညာဉ်ဖြစ်တည်ခြင်းအဆင့် ရန်သူကို အနိုင်ယူရန် သီအိုရီအရ ဖြစ်နိုင်ခြေရှိသည်။

သို့သော် ထိုသို့ဖြစ်လျှင်ပင် လီမိန်မှာ မယုံကြည်နိုင်သေးပေ။ သူတို့ရှေ့တွင် ရှိနေသည်မှာ ဝိညာဉ်ဖြစ်တည်ခြင်းအဆင့် ပညာရှင် တစ်ဦးတည်းမဟုတ်ဘဲ သုံးဦးတောင် ရှိနေခြင်းဖြစ်သည်။ နတ်ဘုရားလက်နက်တစ်ခု ရှိနေလျှင်ပင် အခြေအနေမှာ လီယောင်းအတွက် အလွန်တရာ အားနည်းနေဆဲ ဖြစ်သည်။ နတ်ဘုရားအဆင့် လက်နက်များကို များသောအားဖြင့် ဟင်းလင်းပြင်ဖြတ်သန်းခြင်းအဆင့်နှင့် အထက်ရှိသူများသာ ကိုင်တွယ်လေ့ရှိကြရာ လီယောင်းကဲ့သို့ အခြေတည်ဝိညာဉ်အဆင့်ရှိသူတစ်ဦးမှာ ထိုလက်နက်၏ အစွမ်းကုန်စွမ်းအားကို ကောင်းမွန်စွာ ထုတ်ဖော်နိုင်လိမ့်မည် မဟုတ်ပေ။ ထို့ပြင် သူမသည် အဆင့်တက်ခြင်းကို မိနစ်ပိုင်းအတွင်းကမှ ပြီးမြောက်ထားသူဖြစ်ရာ သူမ၏ ကျင့်စဉ်အခြေခံမှာလည်း မတည်ငြိမ်သေးဘဲ ရှိနေနိုင်ပေသည်။

လီယောင်းသည် သူမ၏စိန်ခေါ်မှုတွင် အမှန်တကယ် လေးနက်နေကြောင်း သိလိုက်ရသောအခါမှ ထိုလူသုံးဦး၏ လှောင်ပြောင်ရယ်မောသံများမှာ နောက်ဆုံးတွင် ရပ်တန့်သွားတော့သည်။ သူတို့သည် သူမကို မယုံကြည်နိုင်မှု စိတ်အနှောင့်အယှက်ဖြစ်မှုများဖြင့် စိုက်ကြည့်နေကြသော်လည်း လီယောင်းကမူ ကြောက်ရွံ့ခြင်း အရိပ်အယောင် အနည်းငယ်မျှမရှိဘဲ ပြန်လည်စိုက်ကြည့်နေခဲ့သည်။

"ဘာလဲ ကြောက်နေတာလား"

လီယောင်းက သူမ၏လက်ကို ပေါ့ပေါ့ပါးပါး ဆန့်ထုတ်ကာ တိုက်ခိုက်ရန် ဖိတ်ခေါ်ရင်း သူတို့ကို အတိအလင်း လှောင်ပြောင်လိုက်သည်။

သူမ၏ ရဲတင်းလှသော ရန်စမှုကြောင့် ထိုလူများ၏ မျက်နှာမှာ သိသိသာသာ မှောင်ကျသွားသည်။

ဒီကလေးမက သူတို့ကို တကယ်ပဲ လှောင်ပြောင်ရဲတာလား။

သူတို့၏ အရှိန်အဝါများမှာ ဝုန်းခနဲ ပွင့်ထွက်လာပြီး ပတ်ဝန်းကျင်တစ်ခုလုံးကို ဖိအားများဖြင့် လွှမ်းမုံသွားတော့သည်။ သို့သော် လီယောင်းမှာမူ မည်သည့်သက်ရောက်မှုမျှမရှိဘဲ ရပ်နေဆဲပင်။

ရုတ်တရက်ဆိုသလို လူသုံးဦးထဲမှ တစ်ဦးမှာ နေရာမှ ပျောက်ကွယ်သွားပြီး လီယောင်း၏ နောက်ကျောတည့်တည့်တွင် ပေါ်လာကာ သူ၏လက်သီးမှာ သူမ၏ဦးခေါင်းဆီသို့ ဦးတည်

လျက်သား ရှိနေကာ လီယောင်းသည် ထိုတိုက်ခိုက်မှုကို သတိပြုမိလိုက်သဖြင့် ဘေးဘက်သို့လျင်မြန်စွာ ခုန်ရှောင်လိုက်သည်။

သို့သော် သူမ မြေပြင်ပေါ်သို့ ပြန်လည်ဆင်းသက်လိုက်သည့် ခဏမှာပင် အခြားတိုက်ခိုက်သူတစ်ဦးနှင့် မျက်နှာချင်းဆိုင် တိုးသွားတော့သည်။ ဒုတိယမြောက်လူသည် သူမ၏ ထွက်ပြေးမည့်လမ်းကြောင်းကို ကြိုတင်ပိတ်ဆို့ထားပြီး ဖြစ်ကာ သူ၏ လက်ဝါးထဲတွင် ပြင်းထန်သော ဝိညာဉ်စွမ်းအင်များကို စုစည်းလျက် တိုက်ခိုက်လိုက်တော့သည်။

လီယောင်းသည် ခုခံရန်အတွက် သူမ၏လက်နှစ်ဖက်ကို အမြန်ဆုံး ကြက်ခြေခတ်ကာ ကာကွယ်လိုက်သည်။ သို့သော် နှစ်ဦးသား ထိတွေ့လိုက်သည့် အခိုက်အတန့်မှာပင် သူမသည် စွမ်းအားချင်း မယှဉ်နိုင်ဘဲ နောက်သို့ လွင့်စင်သွားတော့သည်။

သူမသည် ကြမ်းတမ်းသော ကျောက်ဆောင်မြေပြင်ပေါ်တွင် လျှောတိုက်ပါသွားပြီး သူမ၏ခြေထောက်များမှာ ကျောက်တုံးပေါ်တွင် အနည်းငယ်မျှ နက်ရှိုင်းသော မြောင်းများ ဖြစ်သွားသည်အထိ ရှိခဲ့ကာ မီတာအတော်ကြာမှသာ ရပ်တန့်သွားသည်။

ထိုလူ၏ တိုက်ခိုက်မှု ထိမှန်ခဲ့သော သူမ၏လက်များကို ငုံ့ကြည့်လိုက်ရာ အရေပြားပေါ်တွင် အပူလောင်သည့် အမှတ်အသား အနည်းငယ် ထင်ကျန်နေသည်ကို တွေ့လိုက်ရသည်။

ဝိညာဉ်ဖြစ်တည်ခြင်း အဆင့်၏ စွမ်းအားမှာ အမှန်တကယ်ပင် အဆင့်အတန်း တစ်ခုလုံး ကွာခြားနေပါလားဟု လီယောင်း တွေးလိုက်မိသည်။ သူမသည် အောင်နိုင်သူအမူအရာဖြင့် ကြည့်နေကြသော ထိုလူသုံးဦးကို မော့ကြည့်လိုက်သည်။

မြေပြင်ပေါ်မှ လီမိန်မှာမူ တစ်စက္ကန့်နှင့်တစ်စက္ကန့်အမျှ သူမ၏ ဝမ်းကွဲမမအတွက် ပိုမိုစိုးရိမ်လာနေတော့သည်။

လီယောင်းသည် ဝိညာဉ်စွမ်းအင်ကြောင့် အမှတ်အသား ထင်ကျန်ခဲ့သော သူမ၏လက်များကို သုတ်လိုက်ပြီး သူမ၏ မျက်နှာအမူအရာမှာ စိတ်လှုပ်ရှားမှုအဖြစ်သို့ ပြောင်းလဲသွားသည်။ "အချိန်ကိုက်ပဲ"

သူမက ပြုံးလျက်ပြောလိုက်သည်။

"ငါ့ရဲ့ အသွင်သစ်ကို စမ်းသပ်ဖို့ မင်းတို့ကိုပဲ အသုံးချရတော့မှာပေါ့"

ကောင်းကင်ယံထက်တွင် မှောင်မည်းသော လျှပ်စီးတိမ်တိုက်များမှာ ဝဲဂယက်သဏ္ဌာန် လှည့်ပတ်စုစည်းလာကြသည်။ တစ်ချိန်တည်းမှာပင် တောင်ထိပ်တစ်ခုလုံးကို လွှမ်းခြုံကာ လျှပ်စီးများ တဖျတ်ဖျတ်လက်နေသော ပါးလွှာသည့် အကာအကွယ်တစ်ခု စတင်ဖြစ်ပေါ်လာပြီး လျှပ်စီးအမိုးခုံးကြီးတစ်ခုအသွင် ဖန်တီးလိုက်တော့သည်။

ဝိညာဉ်ဖြစ်တည်ခြင်း အဆင့် ပညာရှင်တစ်ဦးသည် တဖျတ်ဖျတ်လက်နေသော ထိုလျှပ်စီးအတားအဆီးဆီသို့ ဂရုတစိုက် ချဉ်းကပ်သွားသည်။ သူသည် ထိုကြည်လင်နေသော လျှပ်စီးနံရံပေါ်သို့ သူ၏လက်ဖြင့် ဖိကြည့်လိုက်ရာ ထိမှန်လိုက်သည့် ခဏမှာပင် ပြင်းထန်သော လျှပ်စစ်ရှော့ခ်တစ်ခုမှာ သူ၏ခန္ဓာကိုယ်အတွင်းသို့ စီးဝင်သွားတော့သည်။

"အား"

သူသည် လက်ကို ချက်ချင်းပြန်ရုပ်လိုက်ပြီး ကျန်ရှိနေသော ထုံကျင်မှုများ ပျောက်ကွယ်သွားစေရန် လက်ကို အပြင်းအထန် ခါယမ်းလိုက်ရသည်။

သူသည် ထိုအတားအဆီးကို စိုးရိမ်စိတ်ဖြင့် စိုက်ကြည့်နေမိသည်။ ဤအကာအကွယ်မှာ အမှန်တကယ်ပင် ထူးဆန်းလှသည်။ သူ၏ ဝိညာဉ်အာရုံမှာ ထိုနံရံကို ဖောက်ထွက်ပြီး တစ်ဖက်သို့ လုံးဝ မရောက်ရှိနိုင်ပေ။

ဤကဲ့သို့သော ဖြစ်စဉ်နှင့် ဆင်တူသည်မှာ နယ်ပယ်တစ်ခုသာ ရှိသော်လည်း ၎င်းမှာ ဟင်းလင်းပြင်ဖြတ်သန်းခြင်းအဆင့် ကျင့်ကြံသူများသာ အသုံးပြုနိုင်သော သီးသန့်စွမ်းရည် ဖြစ်သည်။ သူသည် သူတို့၏ ခေါင်းပေါ်တွင် စုဝေးနေသော လျှပ်စီးတိမ်တိုက်များကို ပျာပျာသလဲ လှည့်ကြည့်လိုက်သည်။

ဤအတားအဆီးမှာ စစ်မှန်သော နယ်ပယ် တစ်ခုကဲ့သို့ အပြတ်အသတ် လွှမ်းမိုးထားနိုင်ပုံ မရသဖြင့် ၎င်းမှာ နယ်ပယ်တစ်ခုတော့ မဟုတ်လောက်ပေ။ ယင်းအစား ထိုမိန်းကလေးသည် သူမ၏ နတ်ဘုရားရတနာကို အသုံးပြု၍ နယ်ပယ်တစ်ခုနှင့် ဆင်တူသော အရာတစ်ခုကို အတုအယောင် ဖန်တီးထားခြင်းဖြစ်မည်ဟု သူ ကောက်ချက်ချလိုက်သည်။ ဤတိုက်ပွဲကို ယခင်ကထက် ပိုမိုအလေးအနက်ထားရန် လိုအပ်နေပြီ ဖြစ်သည်။

သူတို့ပတ်ဝန်းကျင်ရှိ ကောင်းကင်မှ လျှပ်စီးများမှာ အမှတ်တစ်ခုတည်းသို့ စတင်စုစည်းလာကြသည်။ ထိုစွမ်းအင်များမှာ လည်ပတ်ကာ ဖိသိပ်သွားပြီးနောက် လီယောင်း ရှိနေသည့်နေရာကို အပြည့်အဝ လွှမ်းခြုံထားသော ကြီးမားသည့် လျှပ်စီးလုံးကြီးတစ်ခုအဖြစ် ပြောင်းလဲသွားတော့သည်။

"တောက် ငါတို့က မင်းကို ဒီအတိုင်း လွှတ်ထားမယ်လို့ ထင်နေလား"

ထိုလူများထဲမှ တစ်ဦးက ဒေါသတကြီး အော်ဟစ်ရင်း စုစည်းနေသော လျှပ်စီးစွမ်းအင်လုံးကြီးဆီသို့ ပြေးဝင်သွားသည်။

သူသည် ထိုလျှပ်စီးလုံးကြီးနှင့် ထိတွေ့လိုက်သည့် အခိုက်အတန့်မှာပင် ပြင်းထန်သော အားတစ်ခုဖြင့် နောက်သို့ ချက်ချင်း လွင့်စင်သွားပြီး သူ၏ ခန္ဓာကိုယ်မှာ ကျောက်ဆောင်မြေပြင်ပေါ်တွင် လိမ့်ပါသွားတော့သည်။ သူသည် ထိုလျှပ်စီးလုံးကြီးကို လုံးဝ အံ့ဩမှင်သက်စွာဖြင့် မော့ကြည့်လိုက်မိသည်။

ထိုစဉ်မှာပင် လျှပ်စီးလုံးကြီးမှာ စတင်အက်ကွဲလာတော့သည်။

ထို့နောက် ဖန်သားပြင် ကွဲအက်သွားသကဲ့သို့ အသံမျိုးနှင့်အတူ ထိုလျှပ်စီးလုံးမှာ အစိတ်စိတ်အမွှာမွှာ ကွဲထွက်သွားပြီး လုံးဝ အသွင်သစ်ဖြင့် ရှိနေသော လီယောင်းကို ထင်ရှားစေခဲ့သည်။

သူမ၏ အသွင်ပြောင်းလဲမှုအပြီးတွင် သူမသည် ပိုမိုရင့်ကျက်သော ရုပ်ရည်ကို ပိုင်ဆိုင်ထားသော်လည်း သူမ၏ ဝိညာဉ်ပုံသဏ္ဌာန်ကဲ့သို့တော့ မဟုတ်ပေ။ ယင်းအစား ဤအသွင်သစ်မှာ ပိုမိုတည်ငြိမ်သော ဝိညာဉ်ပုံသဏ္ဌာန်နှင့် ယှဉ်လျှင် သိသိသာသာကိုပင် ဆော့ကစားလိုသော ဂုဏ်သတ္တိမျိုး ရှိနေသည်။

သူမသည် တိုးညှင်းစွာ စတင်ရယ်မောလိုက်ရာ ထိုရယ်သံမှာ ကန့်သတ်ထားသော ဤနေရာလွတ်အတွင်း ထူးဆန်းစွာ ဟိန်းထွက်နေသည်။ ထို့နောက် သူမသည် လျှပ်စီးကဲ့သို့ မြန်သော အရှိန်ဖြင့် အကာအကွယ်အတားအဆီးအတွင်း အရပ်မျက်နှာအနှံ့ ပျံသန်းနေပြီး တစ်နေရာမှ တစ်နေရာသို့ အလွန်လျင်မြန်စွာ ကူးပြောင်းနေသဖြင့် ဝိညာဉ်ဖြစ်တည်ခြင်းအဆင့် ပညာရှင်များပင် သူမ၏ လှုပ်ရှားမှုများကို ခြေရာခံရန် မဖြစ်နိုင်သလောက် ဖြစ်နေတော့သည်။

ထိုလူသုံးဦးမှာ ဗီဇအရ ကျောချင်းကပ်လိုက်ကြပြီး အရပ်မျက်နှာအနှံ့မှ သူမ ချဉ်းကပ်လာမည့် အရိပ်အယောင်ကို ရှာဖွေရန် သူတို့၏ ခေါင်းများကို ပျာပျာသလဲ လှည့်ကြည့်ရင်း ခံစစ်တြိဂံပုံစံကို ယူလိုက်ကြသည်။

သူမသည် အနားသတ်တစ်လျှောက်တွင် နေရာကူးပြောင်း ပျံသန်းနေဆဲဖြစ်ကာ သူမ၏ ကစားလိုသော ရယ်မောသံများမှာ အရပ်မျက်နှာအနှံ့မှ လေထုထဲတွင် ပြည့်နှက်နေသည်။

"ဒုတိယကောင်းကင်ကနေ ကြိုဆိုပါတယ်"