အညတရ

နောက်တစ်နေ့တွင် ကင်းစောင့်တာဝန် ပြီးဆုံးပြီးနောက် ချန်ဖေးသည် ဆေးခန်းရှိ အဂ္ဂိရတ်ပညာရှင်ကို သွားရောက် ရှာဖွေလိုက်သည်။

“မင်းက ချီသွေးဆေးလုံး ဆေးဖော်နည်းကို လိုချင်တာလား...” ကျန်တာဖုန်းသည် ချန်ဖေးကို အံ့အားသင့်စွာ ကြည့်လိုက်သည်။

“ဖြစ်နိုင်မလား ” ချန်ဖေးက လက်နှစ်ဖက် ဆုပ်ကိုင်လျက် မေးလိုက်သည်။

မနေ့က တစ်ရက်လုံး စဉ်းစားပြီးနောက် ချန်ဖေးသည် နောက်ဆုံးတွင် ဆေးဖော်စပ်ခြင်းကို စမ်းသပ်ရန် ဆုံးဖြတ်လိုက်သည်။ ၎င်းသည် သူဆေးခန်းတွင် နေရစ်ခဲ့သည့် အကြောင်းရင်းများထဲမှ တစ်ခုလည်း ဖြစ်သည်။

ဆေးပညာနှင့် ပတ်သက်၍မူ ၎င်းသည် ပြီးပြည့်စုံသော စနစ်တစ်ခု ဖြစ်ပြီး စနစ်မျက်နှာပြင်က ရိုးရှင်းအောင် ပြုလုပ်နိုင်ခြင်း ရှိမရှိ ချန်ဖေး မသေချာပေ။

အကယ်၍ ရိုးရှင်းအောင် ပြုလုပ်နိုင်လျှင်ပင် ကုန်ကျစရိတ် အလွန်ကြီးမားနိုင်ပြီး ချန်ဖေးသည် လက်ရှိတွင် ငွေကြေးပြတ်လပ်နေသည်။

ထို့ကြောင့် ဆေးဖော်စပ်ခြင်းက ပိုမို သင့်လျော်သည်။

ချန်ဖေးအနေဖြင့် ဆေးလုံးတစ်မျိုးကို ဖော်စပ်နိုင်ရုံဖြင့် တည်ငြိမ်သော ဝင်ငွေ ရရှိနိုင်မည် ဖြစ်ပြီး ထိုမှတစ်ဆင့် အဆင့်မြင့် ဆေးလုံးများကို ရှာဖွေကာ ကောင်းမွန်သော သံသရာတစ်ခု တည်ဆောက်နိုင်မည် ဖြစ်သည်။

“မင်းက ဆေးခန်းရဲ့ အစောင့်တစ်ယောက်ပဲ... ချီသွေးဆေးလုံး ဆေးဖော်နည်း ပေးတာက ပြဿနာ မဟုတ်ပါဘူး”

ကျန်တာဖုန်းက ခေါင်းညိတ်ပြီး ပြောလိုက်၏။ “ဒါပေမဲ့ ဒါက အတွေ့ရအများဆုံး ချီသွေးဆေးလုံး ဆေးဖော်နည်းပဲ... ဆေးခန်းရဲ့ ထူးခြားတဲ့ နည်းစနစ်တွေ မပါဝင်ဘူး... ဒါ့အပြင် မင်းက ဆေးဖော်စပ်ချင်တယ်ဆိုရင် ဆေးမြစ်တွေကို ကိုယ့်ဘာသာ ဝယ်ရမယ်... ဆေးခန်းက အလကား ထုတ်ပေးမှာ မဟုတ်ဘူး”

“ကျွန်တော် နားလည်ပါတယ်”ချန်ဖေး ခေါင်းညိတ်လိုက်သည်။

သူ၏ ဆေးဖော်စပ်ခြင်း စွမ်းရည်ကို မပြသနိုင်မီ ဆေးခန်းအနေဖြင့် ဆေးမြစ်များကို အလကား ထုတ်ပေးလိမ့်မည် မဟုတ်ပေ။ သူက ဆေးဖော်စပ်နိုင်ကြောင်း သက်သေပြလျှင်ပင် ထွက်ရှိလာသော ဆေးလုံး၏ အရည်အသွေးနှင့် ပုံပန်းသဏ္ဌာန်ကို ကြည့်ရှုဦးမည် ဖြစ်သည်။ အကယ်၍ ညံ့ဖျင်းလွန်းပါက ဆေးခန်းက လက်ခံမည် မဟုတ်ချေ။

“ကောင်းပြီ... ယူသွား... သုံးရက်နေရင် ငါ့ကို ပြန်ပေး”

ကျန်တာဖုန်းသည် မတ်တပ်ရပ်လိုက်ပြီး သူ့နောက်ရှိ ဗီဒိုတစ်ခုကို မွှေနှောက်ကာ စာအုပ်ငယ်တစ်အုပ်ကို ဆွဲထုတ်၍ ချန်ဖေးအား ကမ်းပေးလိုက်သည်။

“ကျေးဇူးတင်ပါတယ် အကြီးကဲကျန်...” ချန်ဖေးက လက်နှစ်ဖက် ဆုပ်ကိုင်၍ ကျေးဇူးတင်စကား ဆိုလိုက်သည်။

“ကိစ္စမရှိပါဘူး...”

ကျန်တာဖုန်းက လက်ကို ဝှေ့ယမ်းလိုက်ပြီး ချန်ဖေးကို ဂရုမစိုက်တော့ချေ။

ချန်ဖေးသည်လည်း အလိုက်တသိဖြင့် ဆေးခန်းမှ တိတ်တဆိတ် ထွက်ခွာသွားသည်။ ကျန်တာဖုန်းသည် ချန်ဖေး ထွက်ခွာသွားပုံကို ကြည့်ရင်း ခေါင်းအနည်းငယ် ခါလိုက်မိသည်။

ချန်ဖေးကဲ့သို့ ဆေးဖော်စပ်ခြင်းကို သင်ယူပြီး ကျွမ်းကျင်မှုတစ်ခု ရယူလိုသူများကို သူ အများအပြား တွေ့မြင်ခဲ့ဖူးသော်လည်း စိတ်ကျေနပ်ဖွယ် ဆေးလုံးများကို အမှန်တကယ် ဖော်စပ်နိုင်သူမှာ အလွန်ရှားပါးလှသည်။

ကျန်တာဖုန်း၏ အမြင်တွင် ချန်ဖေးသည် ဘာမှ ဖြစ်မလာမည့်သူများထဲမှ တစ်ယောက် ဖြစ်လာနိုင်ဖွယ် ရှိသည်။

ချန်ဖေးသည် သူ့အခန်းသို့ ပြန်ရောက်သောအခါ သူကိုင်ထားသော ဆေးဖော်နည်းကို သေချာစွာ ဖတ်ရှုလိုက်သည်။ အမွှေးတိုင်တစ်တိုင် ကုန်ဆုံးချိန်ခန့်တွင် ချန်ဖေးသည် ဆေးဖော်နည်းကို ချလိုက်ပြီး မျက်လုံးများ မှိတ်ကာ သူဖတ်ရှုခဲ့သော အကြောင်းအရာများကို ပြန်လည် စဉ်းစားလိုက်သည်။

ဆေးဖော်နည်းတွင် မှတ်တမ်းတင်ထားသော အကြောင်းအရာများသည် ရှုပ်ထွေးခြင်း မရှိပေ။ ဖော်စပ်ရန် လိုအပ်သော ဆေးမြစ်များ၊ ၎င်းတို့၏ ဆေးဖက်ဝင် ဂုဏ်သတ္တိများနှင့် ဖော်စပ်စဉ် သတိထားရမည့် အချက်များကို ရိုးရှင်းစွာ မိတ်ဆက်ထားခြင်း ဖြစ်သည်။ ဆေးဖော်နည်းသည် စာမျက်နှာပါးပါး အနည်းငယ်သာ ရှိသဖြင့် အရာများစွာကို အလွန်တိုတိုတုတ်တုတ် ရှင်းပြထားသည်။

ဤကဲ့သို့သော ဆေးဖော်နည်းကို အခြေခံပြီး ချီသွေးဆေးလုံးကို အောင်မြင်စွာ ဖော်စပ်နိုင်ရန် အနည်းဆုံး အကြိမ်ရေ ဒါဇင်နှင့်ချီ၍ သို့မဟုတ် ရာနှင့်ချီ၍ ကျရှုံးပြီးမှသာ အောင်မြင်ရန် အခွင့်အလမ်း အနည်းငယ် ရှိလာနိုင်သည်။

၎င်းသည် ပါရမီကောင်းမွန်မှသာ ဖြစ်နိုင်သည်။

အကယ်၍ ဤလမ်းစဉ်နှင့် မသင့်လျော်ပါက အကြိမ်ရာပေါင်းများစွာ ကျရှုံးလျှင်ပင် အစပျိုးနိုင်မည် မဟုတ်ပေ။ အကြောင်းမှာ ဆေးဖော်စပ်ခြင်းသည် သိုင်းပညာနှင့် ဆင်တူပြီး အထူးသဖြင့် လူတစ်ဦး၏ ပါရမီနှင့် ပတ်သက်၍ ပိုမိုသက်ဆိုင်သည်။

တစ်ခါတစ်ရံတွင် တော်ပြီး တစ်ခါတစ်ရံတွင် မတော်ကြပေ။

အဂ္ဂိရတ်ပညာ - ချီသွေးဆေးလုံး (မစတင်ရသေး)

စနစ်မျက်နှာပြင်တွင် စာကြောင်းအသစ်တစ်ခု ပေါ်လာပြီး တစ်ချိန်တည်းမှာပင် ရိုးရှင်းအောင် ပြုလုပ်ထားသော သတင်းအချက်အလက်သစ်များ လက်ခနဲ ပေါ်လာရာ ချန်ဖေး၏ မျက်နှာပေါ်တွင် အပြုံးတစ်ခု ပေါ်လာသည်။

အဘယ်ကြောင့်ဆိုသော် ချီသွေးဆေးလုံးကို ရိုးရှင်းအောင် ပြုလုပ်ရန် ငွေတစ်ပြားသာ ကုန်ကျသောကြောင့် ဖြစ်သည်။ ချန်ဖေးသည် ချီသွေးဆေးလုံးကို သူ၏ ပထမဆုံး အဂ္ဂိရတ်ပညာ စွမ်းရည်အဖြစ် ရွေးချယ်ခဲ့ခြင်းမှာ ၎င်း၏ အခြေခံကျသော သဘောသဘာဝကို တန်ဖိုးထားသောကြောင့် ဖြစ်သည်။

အခြေခံကျလေ ရိုးရှင်းအောင် ပြုလုပ်ရန် ငွေကုန်ကျမှု နည်းလေ ဖြစ်သည်။ ဤသည်မှာ ချန်ဖေး မကြာသေးမီက ရှာဖွေတွေ့ရှိခဲ့သော အတွေ့အကြုံတစ်ခု ဖြစ်သည်။

ချီသွေးဆေးလုံးသည် အခြေခံကျဆုံးဖြစ်သော်လည်း ၎င်းကို အသုံးပြုသူ အရေအတွက်မှာ လုံးဝ မနည်းပါးပေ။

ကျင့်ကြံခြင်းကို စတင်လေ့လာသော သိုင်းပညာရှင်များ ဖြစ်စေ၊ ချန်ဖေးကဲ့သို့ အရေပြားသန့်စင်ခြင်းအဆင့်တွင် ရှိသူများ ဖြစ်စေ ချီသွေးဆေးလုံးသည် ကောင်းမွန်သော အကျိုးသက်ရောက်မှုများ ရှိပြီး လူများကို သွေးလေ လည်ပတ်မှု ကောင်းမွန်စေကာ သိုင်းပညာ ကျင့်စဉ်များကို ပိုမိုကောင်းမွန် မြန်ဆန်စွာ ကျင့်ကြံနိုင်စေသည်။

ပိုမိုမြင့်မားသော ကြွက်သားသန့်စင်ခြင်းအဆင့်တွင် ရှိသူများပင်လျှင် ငွေကြေးပြတ်လပ်နေချိန်တွင် ချီသွေးဆေးလုံးများကို ဝယ်ယူ သောက်သုံးကြပြီး အနည်းငယ် အားနည်းသော်လည်း အကျိုးသက်ရောက်မှု ရှိနေဆဲ ဖြစ်သည်။

ထို့ကြောင့် ချန်ဖေးသာ ချီသွေးဆေးလုံးများကို ဖော်စပ်နိုင်ပါက ရောင်းချရန် အခက်အခဲ ရှိမည် မဟုတ်ပေ၊ အဘယ်ကြောင့်ဆိုသော် သိုင်းပညာရှင် အများစုသည် အောက်ခြေအဆင့်တွင် အမြဲရှိနေသောကြောင့် ဖြစ်သည်။

“စနစ်မျက်နှာပြင် ချီသွေးဆေးလုံးကို ရိုးရှင်းအောင် လုပ်မယ်.”

“ချီသွေးဆေးလုံးကို ရိုးရှင်းအောင် ပြုလုပ်နေသည်... ရိုးရှင်းအောင် ပြုလုပ်ခြင်း အောင်မြင်ပါသည်။ ချီသွေးဆေးလုံး - ဝက်အသည်းကြော်”

“...”

ချန်ဖေး မျက်တောင်ခတ်လိုက်မိသည်၊ သူ မှားဖတ်မိသည်ဟုပင် ထင်လိုက်မိ၏။ ချီသွေးဆေးလုံးကို ရိုးရှင်းအောင် ပြုလုပ်ပြီးနောက် ဟင်းတစ်ပွဲအဖြစ် ပြောင်းလဲသွားသည်တဲ့လား။ ပြီးတော့ ဝက်အသည်းကြော်တဲ့လား။

ထိုနှစ်ခုကြားတွင် ပင်ကိုယ် ဆက်နွယ်မှု တစ်စုံတစ်ရာ ရှိသလော။နှစ်မျိုးစလုံးက သွေးအားဖြည့်ပေးပြီး နှစ်မျိုးစလုံးက မီးအသုံးပြုရန် လိုအပ်သည်လား။

စနစ်မျက်နှာပြင်၏ ရိုးရှင်းအောင် ပြုလုပ်ခြင်း နောက်ကွယ်မှ အဓိပ္ပာယ်ကို ချန်ဖေး သေချာ နားမလည်သော်လည်း ဆေးဖော်စပ်ခြင်းမှ ဝက်အသည်းကြော်အဖြစ် ပြောင်းလဲသွားခြင်းကြောင့် ချန်ဖေး၏ ယုံကြည်မှု ချက်ချင်း တိုးလာခဲ့သည်။

ဝက်အသည်းကြော်ဆိုသည်မှာ လူအများစု လုပ်နိုင်သော အရာဖြစ်သည်။ အရသာ အကောင်း အဆိုးသာ ကွာခြားပေမည်။ ချန်ဖေးသည် ဝက်အသည်းအချို့ ဝယ်ယူရန် မနက်ဖြန် ဈေးသို့ သွားရန် စီစဉ်နေစဉ် သူနှင့် ပတ်သက်သော ကောလာဟလများ ဆေးခန်းအတွင်း စတင် ပျံ့နှံ့လာခဲ့သည်။

ထူးထူးခြားခြားတော့ မဟုတ်ပေ၊ ချန်ဖေးသည် ကျန်တာဖုန်းထံမှ ချီသွေးဆေးလုံး ဆေးဖော်နည်း ရယူခဲ့သည့် အကြောင်းအရာသာ ဖြစ်ပြီး လူအများအတွက် အားလပ်ချိန် ပြောစရာ ခေါင်းစဉ်တစ်ခု ဖြစ်လာခဲ့သည်။

လွန်ခဲ့သော နှစ်ရက်ကပင် ချန်ဖေးသည် ဖုလျောင်နှင့် ထိပ်တိုက်တွေ့ခဲ့ပြီး စိတ်ဆတ်သူဟု သတ်မှတ်ခံခဲ့ရသည်။

ယခု သူသည် ချက်ချင်းပင် ဆေးဖော်နည်း ရယူပြီး အဂ္ဂိရတ်ပညာရှင် ဖြစ်ရန် စိတ်ကူးယဉ်နေခြင်းက လူအများအပြားကို ရယ်မောစေခဲ့သည်။

အခြားအစောင့်များက ချန်ဖေးကို လှောင်ပြောင်ရုံသာမက အစေခံများပင်လျှင် ဤဖြစ်ရပ်နှစ်ခုကို ကြားသိရသောအခါ ချန်ဖေးသည် ကိုယ့်ကိုယ်ကိုယ် အထင်ကြီးလွန်းနေသည်ဟု ခံစားခဲ့ကြရသည်။

ထိုအစေခံများသည် တစ်ချိန်က အစေခံ ဖြစ်ခဲ့ဖူးသော်လည်း ယခု အစောင့်တစ်ဦး ဖြစ်နေသော ချန်ဖေးကို မနာလို ဝန်တို ဖြစ်နေကြသူများ ဖြစ်သည်။ ဤဖြစ်ပေါ်တိုးတက်မှု အသစ်များနှင့်အတူ သူတို့သည် သဘာဝကျကျပင် သူ့ကို လှောင်ပြောင်ရန် ဝမ်းသာနေကြသည်။

“သိုင်းပညာကို ကောင်းကောင်းမွန်မွန် မလေ့ကျင့်ဘဲ အဂ္ဂိရတ်ပညာရှင် ဖြစ်ဖို့ စိတ်ကူးယဉ်နေတယ်။ အဂ္ဂိရတ်ပညာရှင်ဆိုတာ သူလို အညတရတစ်ယောက် မှန်းရွယ်လို့ရတဲ့ အရာမျိုးလား။ သူက လုံးဝ အဓိပ္ပာယ်မရှိတာပဲ...”

ဝိုင်းဖွဲ့စားသောက်နေစဉ် ဖုလျောင်သည် မြေပဲစေ့ အနည်းငယ်ကို ပါးစပ်ထဲ ပစ်ထည့်လိုက်ပြီး သူ၏ စကားများတွင် ချန်ဖေးအပေါ် အထင်သေးမှုများ ပြည့်နှက်နေသည်။

“သူ အရင်က အညတရ ဖြစ်ခဲ့လို့ပဲ အခု အခွင့်အရေး ရလာတော့ အပေါ်ကို အသည်းအသန် တက်ဖို့ ကြိုးစားနေတာပေါ့... သနားစရာ ကောင်းတာကတော့ အညတရတွေဟာ တစ်ခါတစ်ရံမှာ တစ်သက်လုံး အညတရပဲ ဖြစ်နေတတ်တယ်ဆိုတာ သူ မသိတာတခုပဲ” အပေါင်းအပါတစ်ဦးက ပြုံးလျက် ပြောလိုက်သည်။

“မူလက သူ နည်းနည်းလောက် ပိုပြီး အသိဉာဏ် ရှိမယ် ထင်ခဲ့တာ... ငါ စိတ်မပါတပါ လမ်းညွှန်ပေးမလို့ပဲ။ ဒါပေမဲ့ သူက ငါ့ဆီကနေ လျှို့ဝှက်စာအုပ်ကို တိုက်ရိုက် တောင်းတယ်လေ... ငါတို့သာ ဆေးခန်းထဲမှာ မရှိရင် သူ့မျက်နှာကို ရိုက်ထည့်လိုက်ပြီးပြီ...” ဖုလျောင်က အေးစက်စွာ ပြောလိုက်သည်။

“အစ်ကိုဖုက တော်တော် သည်းခံနိုင်စွမ်း ရှိတာပဲ... ငါတို့သာဆိုရင် ထိန်းချုပ်နိုင်မှာ မဟုတ်ဘူး”

“သူ့အကြောင်း မပြောပါနဲ့တော့ကွာ... သူက ဟာသတစ်ခုပါပဲ”

ဖုလျောင်က လက်ကို ဝှေ့ယမ်းလိုက်ပြီး ပြောလိုက်၏။ “နောက်ပိုင်း သူ့ကို ကိုင်တွယ်ဖို့ နည်းလမ်းတွေ အများကြီး ရှိပါသေးတယ်... ငါဖုလျောင် ပေးတဲ့ လျှို့ဝှက်စာအုပ်က အဲဒီလောက် လက်ခံရ လွယ်ကူတယ်လို့ သူ တကယ်ထင်နေတာလား”

ဆေးခန်းအတွင်းမှ ကောလာဟလများသည် ချန်ဖေး၏ နားထဲသို့ မရောက်ရှိသေးပေ။

ချန်ဖေးသည် လက်ရှိတွင် စွန့်ပစ်ထားသော အိမ်ဝိုင်းတစ်ခုထဲ၌ မီးဖိုပြီး ဝက်အသည်းကြော် ချက်ပြုတ်နေသည်။ ဝက်အသည်းသည် အလွန်လတ်ဆတ်ပြီး ဈေးမှ ဝယ်လာကာစ ဖြစ်သည်။

ချက်ပြုတ်ပြီးနောက် ချန်ဖေးသည် ကိုယ်တိုင် စားသုံးရန် စီစဉ်ထားသည်။ မည်သို့ပင်ဆိုစေ ၎င်းသည် အသားဓာတ် ရင်းမြစ်တစ်ခု ဖြစ်နေဆဲပင်။

ဆေးခန်းတွင် အစောင့်ဖြစ်လာပြီးနောက် ဆေးခန်းမှ ကျွေးမွေးသော အစားအစာသည် သိသိသာသာ တိုးတက်လာခဲ့ပြီး နပ်တိုင်းတွင် အသားနုပ်အနည်းငယ် ပါဝင်ကာ ရက်အနည်းငယ်လျှင် အသားတုံးကြီးများ ပါဝင်သည်။

သို့သော် သိုင်းပညာရှင်များအတွက် အထူးသဖြင့် ချန်ဖေးကဲ့သို့ ငွေကြေးပြတ်လပ်နေသူများအတွက် မည်သည့်အသားပမာဏကိုမျှ ဖြုန်းတီး၍ မဖြစ်ပေ။ ခဏအကြာတွင် အသားဟင်းနံ့သင်းသင်းလေးသည် အိုးထဲမှ ထွက်ပေါ်လာသည်။

သူ၏ ယခင်ဘဝတွင် ချန်ဖေးသည် ဟင်းချက်တတ်ခဲ့ပြီး ရိုးရှင်းသော အိမ်ချက်ဟင်းလျာများကိုသာ ချက်ပြုတ်နိုင်ခဲ့သည်။ သို့သော် ဝက်အသည်းကြော် တစ်ပွဲကို ကိုင်တွယ်ခြင်းသည် သူ့အတွက် ပြဿနာ မဟုတ်ပေ။

မွှေကြော်သည်၊ အိုးထဲမှ ဆယ်ယူသည်၊ ပန်းကန်ထဲ ထည့်သည်။

ပူပူနွေးနွေး ဝက်အသည်းကြော်သည် ရိုးရှင်းစွာ ပြီးစီးသွားပြီး ချန်ဖေး၏ အကြည့်သည် စနစ်မျက်နှာပြင်သို့ ရောက်သွားသည်။

အဂ္ဂိရတ်ပညာ - ချီသွေးဆေးလုံး (အခြေခံအဆင့် ၁/၁၀၀)