စမ်းသပ်မှုကို ဖြတ်ကျော်ခြင်း။

ဖျင်းယင်းခရိုင်၏ မြို့တံခါးများသည် ပိတ်ထားပြီးဖြစ်ရာ ဤအချိန်၌ မြို့ထဲသို့ ဝင်ရောက်ရန်မှာ မဖြစ်နိုင်တော့ချေ။ ကံကောင်းထောက်မစွာဖြင့် မြို့ထဲသို့ မဝင်နိုင်၍ မြို့ပြင်တွင် စခန်းချနားနေကြသော နယ်လှည့်ကုန်သည်အချို့ ရှိနေလေသည်။

ချန်ဖေးသည် မီးပုံတစ်ခုအနီးသို့ ဝင်ရောက်ကာ ဘေးပတ်ဝန်းကျင်မှ တီးတိုးပြောဆိုသံများကို နားထောင်ရင်း သူ၏ တင်းမာနေသော စိတ်အခြေအနေကို ဖြည်းညင်းစွာ လျှော့ချလိုက်သည်။

ယနေ့တစ်ရက်တည်းတွင် ဖြစ်ပျက်ခဲ့သော အကြောင်းအရာများကား များပြားလွန်းလှသည်။ အကယ်၍သာ သူ၏ခွန်အား အဆင့်မတက်လှမ်းနိုင်ခဲ့ပါက ချန်ဖေးသည် ဖျင်းယင်းတောင်ပေါ်၌ အလောင်းကောင်အဖြစ် တောင့်တင်းနေလောက်ပြီ ဖြစ်သည်။

ဤအကြောင်းကို တွေးမိသည်နှင့် ချန်ဖေးသည် သူ၏ စနစ်မျက်နှာပြင်ကို မကြည့်ဘဲ မနေနိုင်တော့ချေ။

အမည် - ချန်ဖေး

အလုပ်အကိုင် - သိုင်းပညာရှင်

ကျင့်စဉ် - ကျိရှန်းလက်သီးသိုင်း (ကျွမ်းကျင်အဆင့် ၃၀၇/၁၀၀၀)၊ ကျိရှန်းအသက်ရှူနည်းစနစ် (မဟာအောင်မြင်မှုအဆင့်)

နယ်ပယ် - အရေပြားသန့်စင်ခြင်းအဆင့် (၂/၁၀၀၀)

ကျိရှန်းလက်သီးသိုင်းသည် ကျွမ်းကျင်အဆင့်သို့ ရောက်ရှိနေပြီဖြစ်ပြီး လက်သီးသိုင်းနှင့် သက်ဆိုင်သော ဗဟုသုတအချို့သည် ချန်ဖေး၏ စိတ်ထဲတွင် ပဲ့တင်ထပ်နေဆဲ ဖြစ်သည်။ ဤရိုးရှင်းအောင် ပြုလုပ်ခြင်း လုပ်ဆောင်ချက်သည် အမှန်တကယ်ပင် စွမ်းအားကြီးမားလှသည်ဟု ဆိုရပေမည်။

“အရေပြားသန့်စင်ခြင်းအဆင့်ရဲ့ တိုးတက်မှုကတော့ ပြောင်းလဲခြင်း မရှိပါလား...”

ချန်ဖေးသည် သူ၏ ကျင့်ကြံခြင်းအဆင့်ကို ကြည့်ကာ မျက်မှောင်အနည်းငယ် ကြုတ်လိုက်မိသည်။ သူ အဆင့်မတက်လှမ်းမီက မဟာအောင်မြင်မှုအဆင့် ကျိရှန်းအသက်ရှူနည်းစနစ်သည် ကျင့်ကြံခြင်းတန်ဖိုး ၁၀ မှတ်ခန့် ပေးစွမ်းနိုင်ခဲ့သည်။ သို့သော် ချန်ဖေး အဆင့်တက်လှမ်းပြီးနောက် နေ့ဝက်ခန့် ကြာမြင့်သွားပြီ ဖြစ်သော်လည်း ၁ မှတ်သာ တိုးလာခဲ့လေသည်။

“ငါ့ရဲ့ ကျင့်ကြံခြင်းအဆင့် မြင့်လာတာနဲ့အမျှ ကျိရှန်းအသက်ရှူနည်းစနစ်က အဆင့်တက်ဖို့ခက်ခဲသွားတာလား.”

ဤအတွေးသည် ချန်ဖေး၏ စိတ်ထဲတွင် ပေါ်လာခဲ့ပြီး ခေတ္တမျှ စဉ်းစားပြီးနောက် ၎င်းသည် ဖြစ်နိုင်ချေ အလွန်များကြောင်း တွေ့ရှိလိုက်ရသည်။ သို့ပေမယ့် ဤအသက်ရှူနည်းစနစ်သည် အလွန်အခြေခံကျလှသည်။ ကျိရှန်းသိုင်းပညာသင်တန်းကျောင်းက ကျောင်းသားများကို အိတ်သွန်ဖာမှောက် သင်ကြားပေးနိုင်လောက်အောင် အခြေခံကျလွန်းသည်။

အကယ်၍ ၎င်းသည် အမှန်တကယ် နက်နဲသော အသက်ရှူနည်းစနစ်သာ ဖြစ်ပါက နည်းပါးလှသော သင်တန်းကြေးဖြင့် မည်သို့ လဲလှယ်နိုင်မည်နည်း။

“ရက်အနည်းငယ်လောက် စောင့်ကြည့်ပြီးရင် ကျိရှန်းအသက်ရှူနည်းစနစ်က ကျင့်ကြံခြင်းတန်ဖိုး ဘယ်လောက်တိုးပေးနိုင်မလဲဆိုတာ သိရမှာပါ”

ချန်ဖေးသည် အကြည့်လွှဲလိုက်ပြီး အိပ်စက်ခြင်း မပြုတော့ချေ။ သရဲတစ္ဆေနှင့် ရင်ဆိုင်ခဲ့ရပြီးဖြစ်သဖြင့် ဖျင်းယင်းခရိုင်၏ မြို့ရိုးအောက်သို့ ရောက်နေသော်လည်း ချန်ဖေးသည် အိပ်စက်ရဲခြင်း မရှိ။ ချန်ဖေး အချိန်ကို အလဟဿ မဖြုန်းတီးဘဲ မီးပုံဘေးတွင် ထိုင်ကာ သူ၏လက်များကို ဖြည်းညင်းစွာ လှုပ်ရှား လေ့ကျင့်လိုက်သည်။

သူ၏လက်များကို လှုပ်ရှားလိုက်သည်နှင့် ကျိရှန်းလက်သီးသိုင်းနှင့် ပတ်သက်သော ဉာဏ်အလင်းရိပ်များသည် ချန်ဖေး၏ စိတ်ထဲတွင် ဖြည်းညင်းစွာ ပေါ်လာလေသည်။ ကြိုးစားအားထုတ်မှု၏ အကျိုးကျေးဇူးကို ခံစားရသော ဤခံစားချက်ကြောင့် ချန်ဖေးသည် မသိစိတ်ဖြင့် ဈာန်ဝင်သွားခဲ့သည်။

ဘေးပတ်ဝန်းကျင်ရှိ လူများသည် လက်များကို အဆက်မပြတ် ဝှေ့ယမ်းနေသော ဤလူငယ် ဘာလုပ်နေသည်ကို နားမလည်နိုင်သဖြင့် ထူးဆန်းစွာ ကြည့်နေကြသည်။ သူ ဝက်ရူးပြန်နေခြင်းများလား။

ထိုသို့ တွေးမိကာ အချို့လူများသည် ချန်ဖေးနှင့် ဝေးရာသို့ မသိမသာ ရွှေ့သွားကြသည်။

လူတစ်ဦးသည် တစ်စုံတစ်ခုကို အာရုံစိုက်လိုက်သောအခါ အချိန်ကုန်မှန်း မသိ ကုန်ဆုံးသွားတတ်စမြဲ ဖြစ်သည်။ မျက်စိတစ်မှိတ်အတွင်း၌ ကောင်းကင်ယံသည် လင်းလက်လာပြီး ဖျင်းယင်းခရိုင်၏ မြို့တံခါးများ ပွင့်လာ၏။

ချန်ဖေးသည် လူအုပ်ကြီးနှင့်အတူ ဖျင်းယင်းခရိုင်ထဲသို့ ဝင်ရောက်လာပြီး ချင်းကျိန့်ဆေးခန်းသို့ ချက်ချင်း ပြေးသွားလိုက်သည်။

“ဒါဆို မနေ့ညက မင်းတစ်ယောက်တည်း အသက်ရှင်ခဲ့ပြီး ကျန်တဲ့သူတွေအားလုံး သေကုန်တာပေါ့...” ကြီးကြပ်ရေးမှူးဆွေသည် ချန်ဖေးကို ကြည့်ရင်း သူ၏ မျက်နှာထားမှာ အနည်းငယ် တင်းမာနေသည်။

အလုပ်ကြမ်းသမား(အလုပ်သင်)များသည် တန်ဖိုးမရှိသော်လည်း ဆေးခန်း၏ ပိုင်ဆိုင်မှုများ ဖြစ်ကြသည်။ ယခုအခါ လူတစ်ဒါဇင်ကျော် သေဆုံးသွားရုံသာမက အရေးအကြီးဆုံးမှာ ဆေးမြစ်များ မရရှိခဲ့ခြင်းက ဆေးခန်းအတွက် အလွန်ပြဿနာ ကြီးမားလှသည်။

အကယ်၍ သခင်ကြီးက နောက်ပိုင်းတွင် မေးခွန်းထုတ်လာပါက သူသည် တာဝန်ယူရဖွယ် ရှိနေသည်။

“ကျန်တဲ့သူတွေ သေလား၊ ရှင်လားဆိုတာ ကျွန်တော်လဲ မသိပါဘူး... ဒါပေမဲ့ မနေ့ညက မြို့တံခါးမှာ တခြားဘယ်သူ့ကိုမှ မတွေ့ခဲ့ရတာတော့ အမှန်ပါပဲ” ချန်ဖေးက တိုးညှင်းစွာ ပြောလိုက်သည်။

“ကျန်တဲ့သူတွေအားလုံး သေကုန်တာတောင် မင်းက ဘာလို့ ကောင်းကောင်းမွန်မွန် အသက်ရှင်နေရတာလဲ...” အက်ကွဲကွဲ အသံတစ်သံသည် စွပ်စွဲလိုသော လေသံဖြင့် ထွက်ပေါ်လာသည်။

ချန်ဖေး မော့ကြည့်လိုက်ရာ ဆေးခန်းမှ အစောင့်တစ်ဦးဖြစ်သော ဖုလျောင် ဖြစ်နေသည်။ ချန်ဖေးသည် လက်နှစ်ဖက်ကို ဆုပ်ကိုင် အရိုအသေပြုရင်း ပြောလိုက်၏။ “ကျွန်တော်မျိုး အရေပြားသန့်စင်ခြင်းအဆင့်ကို တက်လှမ်းနိုင်ခဲ့လို့ ဒီဘေးအန္တရာယ်ကနေ လွတ်မြောက်လာခဲ့တာပါ...”

ချန်ဖေးက ပြောပြောဆိုဆိုဖြင့် လက်သီးတစ်ချက် ထိုးထုတ်လိုက်ရာ လေထုထဲတွင် ဘုန်းခနဲ မြည်သံတစ်သံ ပဲ့တင်ထပ်သွားသည်။

ဘေးပတ်ဝန်းကျင်ရှိ လူအနည်းငယ်၏ မျက်နှာအမူအရာများ အနည်းငယ် ပြောင်းလဲသွားကြသည်။ ဤကဲ့သို့သော လက်သီးစွမ်းအားမျိုးကို သာမန်လူများ မည်သို့မျှ မလုပ်ဆောင်နိုင်ချေ။ အလုပ်ကြမ်းသမားများကြားထဲမှ တစ်စုံတစ်ယောက်သည် သိုင်းပညာ ကျင့်ကြံခြင်းကို အရေပြားသန့်စင်ခြင်းအဆင့်ထိ တက်လှမ်းနိုင်ခဲ့သည်မှာ သူတို့အတွက် အံ့အားသင့်စရာ ဖြစ်နေသည်။

အရေပြားသန့်စင်ခြင်းအဆင့်သည် ပြောပလောက်သော အရာမဟုတ်သော်လည်း သာမန်လူများထက် သာလွန်နေပြီး သိုင်းပညာ ပါရမီ အတိုင်းအတာတစ်ခုအထိ မရှိပါက မည်သူမျှ ရောက်ရှိနိုင်မည် မဟုတ်ပေ။ ထို့အပြင် အရေပြားသန့်စင်ခြင်းအဆင့်ဖြင့် ဂရုတစိုက် နေထိုင်ပါက ထူးဆန်းသော ဖြစ်ရပ်ဆိုးအချို့ကို အမှန်တကယ်ပင် ရှောင်ရှားနိုင်ပေသည်။

“မဆိုးဘူး”

ကြီးကြပ်ရေးမှူးဆွေက ခေါင်းညိတ်လိုက်ပြီး သူ၏ မျက်နှာထား အနည်းငယ် ပျော့ပျောင်းသွားသည်။ အလုပ်ကြမ်းသမားများကြားတွင် အရေပြားသန့်စင်ခြင်းအဆင့် ကျင့်ကြံသူတစ်ဦး ပေါ်ထွက်လာခြင်းသည် အလုပ်ကြမ်းသမားများ ဆုံးရှုံးမှုကို အတိုင်းအတာတစ်ခုအထိ ပြန်လည်ကာမိစေသည်။ မည်သို့ပင်ဆိုစေကာမူ အလုပ်ကြမ်းသမားများကို ထပ်မံ ငှားရမ်းနိုင်သော်လည်း အရေပြားသန့်စင်ခြင်းအဆင့် သိုင်းပညာရှင်တစ်ဦးကို ငှားရမ်းရန်မှာမူ ပိုမိုခက်ခဲပြီး ၎င်းတို့၏ တန်ဖိုးများသည် ကွာခြားလှသည်။

“ဒီကိစ္စကို သခင်ကြီးဆီ ငါ တင်ပြလိုက်မယ်... မင်းကတော့ ဒီနေ့ကစပြီး ဆေးခန်းမှာ အစောင့် လုပ်လို့ရပြီ”

ကြီးကြပ်ရေးမှူးဆွေက ပြောပြီးနောက် ဖုလျောင်ဘက်သို့ လှည့်ကာ ညွှန်ကြားလိုက်သည်။ “အလုပ်ကြမ်းသမား ဘဝကနေ လွတ်မြောက်လာပြီဆိုတော့ သူလည်း ငါတို့ ချင်းကျိန့်ဆေးခန်းရဲ့ အမွေအနှစ်တချို့ကို သင်ယူခွင့် ရှိသွားပြီ... ဖုလျောင်... မင်း သူ့ကို ငါတို့ ချင်းကျိန့်ရဲ့ အသက်ရှူနည်းစနစ်နဲ့ တိုက်ခိုက်ရေး နည်းလမ်းတချို့ သင်ပေးလိုက်”

“ကောင်းပါပြီ” ဖုလျောင်က ခေါင်းညိတ်ကာ ချန်ဖေးကို တစ်ချက်ကြည့်ပြီး ဘာမှ ဆက်မပြောတော့ချေ။

ချန်ဖေး၏ မျက်နှာပေါ်တွင် အပြုံးတစ်ခု ပေါ်လာသည်။ ပြန်မလာခင်က ချန်ဖေးသည် ချင်းကျိန့်ဆေးခန်းတွင် ဆက်နေသင့်လား သို့မဟုတ် ကျိရှန်းသိုင်းပညာသင်တန်းကျောင်းသို့ သွားသင့်လားဟု စဉ်းစားခဲ့သေးသည်။

အရေပြားသန့်စင်ခြင်းအဆင့်သို့ ရောက်ရှိသွားပြီဖြစ်၍ ချန်ဖေးသည် ယခုအခါ ရွေးချယ်ပိုင်ခွင့် ရှိလာပြီ ဖြစ်သည်။ ထည့်သွင်းစဉ်းစားရမည့် တစ်ခုတည်းသော အရာမှာ နှစ်ဖက်စလုံး၏ အားသာချက်နှင့် အားနည်းချက်များပင် ဖြစ်သည်။

ချင်းကျိန့်ဆေးခန်းတွင် ဆက်နေခြင်းက ဆေးခန်း၏ အမွေအနှစ်အချို့ကို ရရှိနိုင်မည်ဟု ဆိုလိုသည်။ နက်နဲခြင်း မရှိနိုင်သော်လည်း ကျိရှန်းအသက်ရှူနည်းစနစ်နှင့် အလားတူ ကျင့်စဉ်များထက်တော့ သာလွန်ပေလိမ့်မည်။

သို့သော် ချင်းကျိန့်ဆေးခန်းတွင် နေထိုင်ခြင်းက အစေခံတစ်ဦး ဖြစ်နေဆဲဖြစ်ပြီး သူ၏ လွတ်လပ်ခွင့်မှာ အတိုင်းအတာတစ်ခုအထိ ကန့်သတ်ခံရပေမည်။ ကျိရှန်းသိုင်းပညာသင်တန်းကျောင်းသို့ သွားခြင်းက လုံလောက်သော လွတ်လပ်မှုကို ပေးစွမ်းနိုင်သည်။ ၎င်းသည် ဂိုဏ်းတစ်ခုနှင့် ဆက်ဆံရေးမျိုး ဖြစ်ပြီး ၎င်း၏ အမွေအနှစ်သည်လည်း ဆေးခန်းထက် မနိမ့်ကျပေ။ သို့သော် ဆေးခန်းမှ ထွက်ခွာခြင်းက ချန်ဖေးအနေဖြင့် ကြီးမားသော လျော်ကြေးငွေ ပေးဆောင်ရန် လိုအပ်လိမ့်မည်။

အရေပြားသန့်စင်ခြင်းအဆင့်သို့ ရောက်ရှိရန် ချန်ဖေးသည် လေးလနီးပါး အချိန်ယူခဲ့ရသည်။ ဤပါရမီအဆင့်သည် ကျိရှန်းသိုင်းပညာသင်တန်းကျောင်းတွင် သာမန်အဆင့်မျှသာ ဖြစ်သည်။ ကျိရှန်းသိုင်းပညာသင်တန်းကျောင်းအနေဖြင့် ချန်ဖေးအတွက် လျော်ကြေးငွေ ပေးချေမည် မဟုတ်သလို ချန်ဖေးကိုယ်တိုင်တွင်လည်း ငွေကြေး မရှိချေ။

ချန်ဖေး ဆေးခန်းတွင် ဆက်နေရန် ဆုံးဖြတ်လိုက်ရသည့် အဓိက အကြောင်းအရင်းမှာ သူတန်ဖိုးထားသော ဆေးပညာနှင့် ဆေးဖော်စပ်ခြင်း အတတ်ပညာအချို့ကို ထိုနေရာတွင် သင်ယူနိုင်သောကြောင့် ဖြစ်သည်။

ကြီးကြပ်ရေးမှူးဆွေနှင့် အခြားသူများက ချန်ဖေးကို မေးခွန်းအနည်းငယ် ထပ်မေးပြီးနောက် တစ်ယောက်ပြီးတစ်ယောက် ထွက်ခွာသွားကြသည်။

“ငါ ဒီရက်ပိုင်း အလုပ်ရှုပ်နေတယ်။ နောက်ရက်နည်းနည်းကြာမှ ငါ့ဆီ လာရှာ အဲဒီကျမှ မင်းကို ကျင့်စဉ် သင်ပေးမယ်...” ဖုလျောင်က ချန်ဖေးအနားသို့ လျှောက်လာပြီး ပြောကာ လှည့်ထွက်သွားသည်။

လူအားလုံး ထွက်ခွာသွားသောအခါ ချန်ဖေးသည် သက်ပြင်းအနည်းငယ် ချလိုက်မိသည်။ ဤအခက်အခဲကို ကျော်ဖြတ်နိုင်ခဲ့ပြီ။ အကယ်၍သာ အရေပြားသန့်စင်ခြင်းအဆင့် ကျင့်ကြံခြင်း မရှိခဲ့ပါက ရိုက်နှက် ဆဲဆိုခံရခြင်းကို ရှောင်လွှဲနိုင်မည် မဟုတ်ပေ။

ယခု သူသည် တန်ဖိုးရှိသော လူတစ်ယောက် ဖြစ်လာပြီ ဖြစ်သဖြင့် ထိုအရာအားလုံးမှ ကင်းလွတ်ခွင့် ရရှိခဲ့သည်။

ဆေးခန်းသည် ချန်ဖေးအတွက် သီးသန့်အခန်းတစ်ခန်း စီစဉ်ပေးခဲ့သည်။ သေးငယ်သော်လည်း ယခင်က ဆက်ဆံခံရပုံနှင့် နှိုင်းယှဉ်လျှင် ကွာခြားလှသည်။ ကျင့်ကြံအားထုတ်နေစဉ် အတွင်းရေး ပေါက်ကြားမည်ကို စိုးရိမ်စရာ မလိုတော့သဖြင့် ချန်ဖေးသည် အတော်လေး ကျေနပ်မိသည်။

သုံးရက်တာ အချိန်သည် မျက်စိတစ်မှိတ်အတွင်း ကုန်ဆုံးသွားခဲ့သည်။

ပြဿနာ မဖြစ်ပေါ်စေရန် ဆေးခန်း၏ ပင်မခန်းမ၌ ကင်းစောင့်ရသည့် ပုံမှန်တာဝန်မှလွဲ၍ ချန်ဖေးသည် အချိန်အများစုကို သူ၏အခန်းထဲတွင် ကျင့်ကြံအားထုတ်ရင်း ကုန်ဆုံးစေခဲ့သည်။

သုံးရက်ဆိုသည်မှာ မကြာမြင့်သော်လည်း ချန်ဖေးအနေဖြင့် ကျိရှန်းလက်သီးသိုင်းကို မဟာအောင်မြင်မှုအဆင့်အထိ ကျင့်ကြံရန် လုံလောက်သော အချိန်ဖြစ်သည်။

သူ၏ အရေပြားသန့်စင်ခြင်းအဆင့် ကျင့်ကြံခြင်းနှင့် မဟာအောင်မြင်မှုအဆင့် ကျိရှန်းလက်သီးသိုင်း ပေါင်းစပ်လိုက်သောအခါ ချန်ဖေး၏ တိုက်ခိုက်စွမ်းရည်သည် ယခင်ကထက် ငါးဆယ်ရာခိုင်နှုန်းကျော် ပိုမိုမြင့်မားလာခဲ့သည်။ အရေပြားသန့်စင်ခြင်းအဆင့် အတွင်းမှာပင် ချန်ဖေး၏ လက်ရှိခွန်အားသည် မဆိုးလှပေ။

မည်သို့ပင်ဆိုစေကာမူ အရေပြားသန့်စင်ခြင်းအဆင့် ကျင့်ကြံသူတိုင်း အခြေခံလက်သီးသိုင်းတစ်ခုကို မဟာအောင်မြင်မှုအဆင့်အထိ ကျင့်ကြံနိုင်သည် မဟုတ်ချေ။

ချန်ဖေး မကျေမနပ် ဖြစ်ရသည့် တစ်ခုတည်းသော အရာမှာ သူ၏ ကျင့်ကြံခြင်း တိုးတက်မှုနှုန်းပင် ဖြစ်သည်။ သုံးရက်အတွင်း သူ၏ အရေပြားသန့်စင်ခြင်းအဆင့် အတွေ့အကြုံတန်ဖိုးသည် ၃ မှတ်သာ တိုးလာခဲ့သည်။

အရေပြားသန့်စင်ခြင်းအဆင့် အတွေ့အကြုံတန်ဖိုး ၁၀၀၀ ပြည့်ရန် တစ်ရက်လျှင် ၁ မှတ်နှုန်းဖြင့် ဆိုပါက ချန်ဖေးသည် ကျိရှန်းအသက်ရှူနည်းစနစ် တစ်ခုတည်းအပေါ် မှီခိုနေလျှင် နောက်တစ်ဆင့်သို့ တက်လှမ်းရန် သုံးနှစ်ခန့် ကြာမြင့်ပေလိမ့်မည်။