အနည်းငယ် အမြတ်ရခဲ့ခြင်း

"ဒါဆို ငါလည်း ဘာမှ မတတ်နိုင်ဘူး... ဖော်စပ်နည်း သိလာတဲ့အခါကျမှ ခင်ဗျားကို ရောင်းပေးတော့မယ်"

ချန်ဖေးက လက်ဝှေ့ယမ်းပြလိုက်ပြီး လှည့်ထွက်သွားလေသည်။

ဝိညာဉ်အလင်းဆေးလုံး ဖော်စပ်နည်း သိရှိပြီးနောက် ချန်ဖေး အနေဖြင့် ၎င်းမှာ တန်ဖိုး ပိုရှိသဖြင့် ရောင်းချမည်မှာ အမှန်ပင်။ မြဲမြံဆေးလုံး အတွက်မူ သူသည် သိရှိလျှင်လည်း ရောင်းချမည် မဟုတ်ပေ။

သာမန်လူ တစ်ယောက်မှာ အပြစ်မရှိသော်လည်း ရတနာ ပိုင်ဆိုင်ထားခြင်းက ပြစ်မှု ဖြစ်လေသည်။ ချန်ဖေး၏ လက်ရှိ ခွန်အားမှာ မိမိကိုယ်ကိုယ် ကာကွယ်ရန် မလုံလောက်သေးပေ။

ဆေးဖော်စပ်ခြင်း သက်သက်သာ ပြုလုပ်နိုင်သော အဂ္ဂိရတ်ပညာရှင်များ အဖြစ် လွယ်ကူစွာ ဖမ်းဆီး ခေါ်ဆောင်သွားခံရနိုင်သည်။

မှောင်ခိုဈေးကွက်မှ ထွက်ခွာလာပြီးနောက် ချန်ဖေးသည် နောက်မှ လိုက်ပါလာသော နောက်ယောင်ခံသမား အနည်းငယ်ကို ခါချလိုက်သည်။

ချန်ဖေးသည် မှောင်ခိုဈေးကွက်တွင် မြက်ပြန်နု ဆေးလုံး စတင် ရောင်းချလာသည်နှင့် အမျှ သူ့နောက်သို့ လိုက်ပါလာသူများ ပိုမို များပြားလာသည်။ ကံကောင်းသည်မှာ ချန်ဖေး၏ ခြေလှမ်းကျင့်စဉ်များမှာ ယခုအခါ အလွန် အဆင့်မြင့်နေပြီ ဖြစ်သဖြင့် သာမန်လူများ အနေနှင့် သူ့အရှိန်ကို မမီနိုင်ကြပေ။

ပြီးတော့ ဒီမြက်ပြန်နု ဆေးလုံးလောက်နှင့် မည်သည့် အားကောင်းသော ကျွမ်းကျင်သူကိုမျှ ဆွဲဆောင်နိုင်လိမ့်မည် မဟုတ်ပေ။

ခရိုင်မြို့ကို အကြိမ်အနည်းငယ် ပတ်ပြီးနောက် ချန်ဖေးသည် ဆေးဖော်စပ်ခန်း ရှိရာ အိမ်ဝိုင်းသို့ ပြန်ရောက်လာခဲ့သည်။

ငွေအိတ်ကို ဖွင့်ကြည့်လိုက်ပြီး တောက်ပနေသော ငွေရောင်များကို မြင်လိုက်ရသောအခါ ချန်ဖေး မပြုံးဘဲ မနေနိုင်တော့ချေ။

ငွေ ၆၀၀ နီးပါး ဆိုသည်မှာ သာမန်လူများ၏ အမြင်တွင် ကြီးမားသော ပမာဏ ဖြစ်သော်လည်း ချန်ဖေးသည် ထိုငွေပမာဏကို ရက်အနည်းငယ် အတွင်း စုဆောင်းနိုင်ခဲ့ခြင်းဖြစ်သည်။

အဂ္ဂိရတ်ပညာသည် အရေးပါသော အခန်းကဏ္ဍမှ ပါဝင်သည်မှာ သံသယ ဖြစ်ဖွယ် မရှိသော်လည်း ချန်ဖေး၏ ကိုယ်ပိုင် ကျင့်ကြံမှုနှင့် လျင်မြန်မှုတို့မှာလည်း ထပ်တူ အရေးကြီးလှသည်။ အာဏာမရှိဘဲ စည်းစိမ်ဥစ္စာကို ထိန်းသိမ်းထား၍ မရနိုင်ပေ။

ချန်ဖေး ငွေရှာရခြင်း၏ ရည်ရွယ်ချက်မှာ အမြဲတမ်း သူ့ကိုယ်ပိုင် ခွန်အားကို စဉ်ဆက်မပြတ် တိုးတက်စေရန် ဖြစ်သည်။ သို့မဟုတ်ပါက သူသည် မိုက်မဲစွာဖြင့် ငွေကို ဖက်တွယ်ထားသူ ဖြစ်လာမည် ဖြစ်ပြီး သူ့ငွေများ မည်သည့်အချိန်တွင် ပျောက်ဆုံးသွားမည်ကို သိရှိလိမ့်မည် မဟုတ်ချေ။

"စနစ်... နတ်ဘုရား လမ်းညွှန်ချက်ကို ရိုးရှင်းအောင် လုပ်မယ်"

"နတ်ဘုရား လမ်းညွှန်ချက်ကို ရိုးရှင်းအောင် ပြုလုပ်နေသည်။ ရိုးရှင်းအောင် ပြုလုပ်ခြင်း အောင်မြင်သည်။ နတ်ဘုရား လမ်းညွှန်ချက် - လက်ချောင်းဖြင့် ခေါက်ခြင်း!"

ရိုးရှင်းအောင် ပြုလုပ်ခြင်းက ချန်ဖေးကို စိတ်ပျက်စေခြင်း မရှိခဲ့ပေ။ သူသည် စားပွဲခုံကို လက်ချောင်းဖြင့် ဖြည်းညင်းစွာ ခေါက်လိုက်သည်။ နောက်တစ်ခဏတွင် "နတ်ဘုရား လမ်းညွှန်ချက်" ဓားသိုင်းနှင့် ပတ်သက်သော ထိုးထွင်းသိမြင်မှုများ ချန်ဖေး၏ စိတ်ထဲတွင် ပေါ်လာပြီး သူ အလိုအလျောက် မျက်လုံးမှိတ်ထားလိုက်မိသည်။

ဤသည်မှာ ချန်ဖေး ကြုံတွေ့ဖူးသမျှ အနက်ရှိုင်းဆုံးနှင့် အသေသပ်ဆုံး ဓားသိုင်း ဖြစ်သည်။ ယခု သူ နားလည် သဘောပေါက်သွားပြီ ဖြစ်ရာ ချန်ဖေးသည် အလိုအလျောက် ဈာန်ဝင်စားသွားလေ၏။

သူ့လက်ချောင်းများ မသိစိတ်ဖြင့် ခေါက်နေစဉ် စနစ်မျက်နှာပြင်ပေါ်ရှိ "နတ်ဘုရား လမ်းညွှန်ချက်" အတွက် အတွေ့အကြုံ အမှတ်များ ဆက်လက် တိုးပွားလာပြီး ချန်ဖေး၏ မျက်နှာပေါ်တွင် အပြုံးတစ်ခု ပေါ်လာသည်။ ၄င်းက ဉာဏ်အလင်း ရရှိလိုက်ခြင်း၏ ပျော်ရွှင်မှုပင်။

နောက်တစ်နေ့ နံနက်တွင် ချန်ဖေးသည် လန်းဆန်းတက်ကြွသော စိတ်ဖြင့် ကျန်းမိသားစု အိမ်တော်သို့ သွားရောက်ခဲ့သည်။

ကျင့်စဉ် - နတ်ဘုရား လမ်းညွှန်ချက် (ကျွမ်းကျင်မှု ၂၀၁/၁၀၀၀)

တစ်ညတည်းဖြင့် ချန်ဖေးသည် "နတ်ဘုရား လမ်းညွှန်ချက်" ဓားသိုင်းကို တကယ့် တိုက်ပွဲတွင် အသုံးပြုနိုင်သည့် အဆင့်အထိ တတ်မြောက်ခဲ့လေပြီ။ အကယ်၍ မနေ့ညက ဓားသိုင်း၏ နက်နဲသော လျှို့ဝှက်ချက်များက ချန်ဖေးကို ဖမ်းစားထားခြင်း မရှိခဲ့လျှင် လက်ချောင်းဖြင့် ခေါက်ရန် မေ့လျော့သွားစေခြင်း မရှိခဲ့လျှင် ယခုဆိုပါက သူ၏ ကျွမ်းကျင်မှုမှာ ပိုမို မြင့်မားနေပေလိမ့်မည်။

သို့သော် ချန်ဖေးသည် အတော်လေး ကျေနပ်နေပြီ ဖြစ်သည်။ ရက်အနည်းငယ် အတွင်း သူသည် နတ်ဘုရား လမ်းညွှန်ချက် ကျင့်စဉ်၏ ပြီးပြည့်စုံခြင်း အဆင့်သို့ ရောက်ရှိလိမ့်မည်ဟု ခန့်မှန်းထားသည်။ ထိုအချိန် ရောက်လျှင် ဖျင်းယင်း ခရိုင်ရှိ ကြွက်သားသန့်စင်ခြင်း အဆင့်တွင် မည်သူမျှ ချန်ဖေးကို ယှဉ်နိုင်လိမ့်မည် မဟုတ်ပေ။

ဤသည်မှာ နတ်တိမ်ဓားဂိုဏ်းမှ ဓားကွက်တစ်ခု ဖြစ်သည်။ ၎င်း၏ တိုက်ကွက် တစ်ကွက်သာ ဖြစ်သော်လည်း ၎င်း၏ နက်နဲမှုမှာ ဖျင်းယင်း ခရိုင်ရှိသိုင်းပညာရှင်များထက် များစွာ သာလွန်နေလေသည်။

"အကယ်လို့ တစ်ယောက်ယောက်က အရိုးသန့်စင်ခြင်းအဆင့် ကျင့်ကြံသူ တစ်ဦးကို ဒီလို ဓားကွက်မျိုးနဲ့ ရုတ်တရက် တိုက်ခိုက်လိုက်မယ် ဆိုရင် သူတို့ တော်တော်လေး ဒုက္ခရောက်သွားမှာပဲ..."

ချန်ဖေးက တိတ်တဆိတ် တွက်ချက်ကြည့်လိုက်သည်။ သူ ယခင်က တွေ့ဆုံခဲ့သော ကျန့်လျန်နှင့် မနေ့ညက ရင်ဆိုင်ခဲ့ရသော စွန်းရှုတို့သည် အကယ်၍ တဖက်လူက ပေါ့ဆနေပါက အမှန်တကယ် ပြင်းထန်စွာ ဒဏ်ရာ ရသွားနိုင်သည်။ အကယ်၍ သူက "နတ်ဘုရား လမ်းညွှန်ချက်" နည်းစနစ်ကို အကြိမ်အနည်းငယ် ထပ်မံ အသုံးပြုလိုက်ပါက သူတို့ကို သတ်ဖြတ်နိုင်ပေလိမ့်မည်။

နည်းစနစ်ကို ထပ်ခါတလဲလဲ အသုံးပြုခြင်းက အခြားသူများ အတွက် အားနည်းချက်ကို ရှာဖွေရန် လွယ်ကူစေသည်။ သို့သော် အခြားသူ အားလုံးမှာ ပြင်းထန်စွာ ဒဏ်ရာရနေပြီ ဖြစ်သဖြင့် အားနည်းချက် ရှာဖွေရန် အချိန်ရလိမ့်မည် မဟုတ်ပေ။

ချန်ဖေး အနည်းငယ် ပိုမို လုံခြုံသည်ဟု ခံစားလိုက်ရသော်လည်း ဤမျှလောက်နှင့် မလုံလောက်သေးပေ။ ချန်ဖေးသည် ပိုမို ကြိုးစားရန် လိုအပ်သေးသည်ဟု ခံစားမိသည်။

"သခင်မလေး..."

တံခါးငယ်မှ ဝင်ရောက်ပြီး ခြံဝင်းထဲသို့ လျှောက်သွားလိုက်ရာ ချန်ဖေးသည် ကျန်းစီနန်ကို တွေ့လိုက်ရသည်။ သူမသည် နားနေဆောင်ဆောင်တွင် အတွေးထဲ မျောနေပုံ ရပြီး ချန်ဖေးက ဘေးမှ လှမ်းခေါ်လိုက်သည်။

"ရောက်လာပြီပဲ... ထိုင်ပါ"

ကျန်းစီနန်သည် ချန်ဖေးကို မြင်သောအခါ သူ၏ ရည်ရွယ်ချက်ကို သိရှိပုံ ရလေသည်။ ကျန်းစီနန် မျက်မှောင်အနည်းငယ် ကြုတ်လိုက်ပြီး ပြောလိုက်သည်။ "ဝိညာဉ်အလင်းဆေးလုံးရဲ့ ဆေးနည်း အတွက်လား"

"ဟုတ်ပါတယ်... ကျေးဇူးပြုပြီး ခွင့်ပြုပေးပါ သခင်မလေး..." ချန်ဖေးက ဦးညွှတ်၍ ပြောလိုက်သည်။

"ဒီ ဝိညာဉ်အလင်း ဆေးလုံးရဲ့ ဆေးနည်းကို ပေးလို့ မရလောက်ဘူး ထင်တယ်" ကျန်းစီနန်က ခေတ္တမျှ တုံ့ဆိုင်းနေပြီးနောက် ပြောလိုက်သည်။

"ဘာဖြစ်လို့လဲ... အရင်က ကတိပေးထားတယ် မဟုတ်ဘူးလား"

ချန်ဖေး မျက်မှောင်ကြုတ်လိုက်သည်။ ဤသည်မှာ အရင်က ပြောထားသည်နှင့် ကွဲပြားနေလေ၏။ ဝိညာဉ်အလင်းဆေးလုံး၏ ဆေးဖော်မြူလာကြောင့် ချန်ဖေးသည် မနေ့ညက စွန်းရှု၏ လိုက်လံတိုက်ခိုက်ခြင်းကို ခံခဲ့ရပြီး ကျန်းစီနန်လည်း ထိုကိစ္စကို သိသင့်သည်။

"အကြီးအကဲ အများစုက ခံစားရတာက စွန်းရှု ကိစ္စ မပြေလည်သေးတဲ့ အတွက် မင်းက စကားတစ်ခွန်းပဲ ပြောပြီး ဝိညာဉ်အလင်း ဆေးလုံးရဲ့ ဆေးနည်း ရရှိသွားတာက ဆုလာဘ် အများကြီး ပေးသလို ဖြစ်နေတယ်တဲ့"

ကျန်းစီနန်သည် သူမ မှားယွင်းနေကြောင်း သဘောပေါက်ပုံ ရပြီး ဤအချိန်တွင် ချန်ဖေးကို နူးညံ့သိမ်မွေ့စွာ ရှင်းပြလိုက်သည်။

ချန်ဖေး မျက်မှောင်ကြုတ်လျက် တိတ်ဆိတ်နေလိုက်သည်။ ကျန်းမိသားစုသည် စွန်းရှု ကိစ္စကြောင့် သူ့အပေါ် အပြစ်ပုံချနေခြင်း ဖြစ်သည်။ သူက အစပိုင်းတွင် ကျန်းမိသားစုကို ဂုဏ်သရေရှိ လူတန်းစားများဟု ထင်မှတ်ခဲ့သော်လည်း သူ အတွေးလွန်ခဲ့ပုံ ရလေသည်။

"ကျန်းမိသားစုက လူတွေကို မတရား မဆက်ဆံပါဘူး... အခု ဝိညာဉ်အလင်း ဆေးလုံးရဲ့ ဆေးဖော်မြူလာကို မင်းကို ပေးလိုက်ရင်တောင် မင်း ဖော်စပ်နိုင်မှာ မဟုတ်ဘူး။ တခြား ဆုလာဘ်တွေနဲ့ လဲလှယ်လိုက်တာ ပိုကောင်းပါလိမ့်မယ်"

ချန်ဖေး၏ တိတ်ဆိတ်မှုက ကျန်းစီနန်ကို မနှစ်မြို့ဖြစ်သွားစေသည်။ သူမ၏ အသံမှာ အေးစက်လာ၏။

"ဆုလာဘ်က ဘာလဲ ဆိုတာ သိခွင့်ရှိမလား..."

ချန်ဖေးသည် ဒေါသတကြီး ပေါက်ကွဲခြင်း သို့မဟုတ် ငြင်းခုံခြင်း မပြုခဲ့ပေ။ အဘယ်ကြောင့်ဆိုသော် အသုံးမဝင်ကြောင်း သူ သိရှိသောကြောင့် ဖြစ်သည်။

"မင်း ကြိုက်တဲ့ ကျင့်စဉ်တွေ ဒါမှမဟုတ် လက်နက်တွေ တောင်းဆိုနိုင်တယ်... သင့်လျော်ရင် ဆုချပေးမယ်"

ချန်ဖေးက သူမကို ပူဆာခြင်း မရှိသည်ကို မြင်သောအခါ ကျန်းစီနန် ခေါင်းအနည်းငယ် ညိတ်လိုက်သည်။ ဤသည်မှာ အဓိပ္ပာယ် ရှိပေသည်။ မည်သို့ပင် ဆိုစေ ချန်ဖေးသည် ကျန်းမိသားစု၏ ကျွန်တစ်ဦး မဟုတ်သော်လည်း အစားအစာ အတွက် သူတို့ကို မှီခိုနေရသဖြင့် မိမိ၏ အနေအထားကို သတိပြုရမည် ဖြစ်သည်။

"ကျွန်တော် ဓားသိုင်း လိုချင်ပါတယ်..."

ကျင့်စဉ် အတွက် ရွေးချယ်စရာ မရှိပေ။ တိုက်ကွက်များနှင့် လက်နက်များသာ ရှိသည်။ ကျန်းမိသားစုက ဤကိစ္စနှင့် ပတ်သက်၍ တကယ်ကို စည်းကမ်းကြီးလှသည်။ သို့သော် နားလည်ပေးနိုင်ပါသည်။ သူတို့က ဆေးဖော်မြူလာ ပေးဖို့ပင် ဆန္ဒမရှိသည် မဟုတ်ပါလော။

ကျန်းစီနန် ခေါင်းညိတ်လိုက်ပြီး အစေခံ တစ်ဦးကို ခေါ်ကာ ညွှန်ကြားချက် အချို့ ပေးလိုက်သည်။ မကြာမီတွင် ဓားသိုင်းစာအုပ် လေးအုပ် ချန်ဖေးရှေ့တွင် ရောက်ရှိလာသည်။

" ဒီစာအုပ်တွေ အကုန်လုံးက တော်တော် ကောင်းပါတယ်... တစ်အုပ် ရွေးလိုက်ပါ"

"အားလုံး ကြည့်လို့ ရမလား..." ချန်ဖေးက ခေတ္တမျှ စဉ်းစားပြီးနောက် မေးလိုက်သည်။

"ရတယ်..." ကျန်းစီနန်က သဘောတူစွာ ခေါင်းညိတ်လိုက်သည်။

ချန်ဖေးသည် ပထမဆုံး စာအုပ် ဖြစ်သည့် "လေပြင်းဓားသိုင်း" ကို ကောက်ယူပြီး ဖတ်ရှုလိုက်သည်။

ချန်ဖေးက "နတ်ဘုရား လမ်းညွှန်ချက်" ဓားသိုင်းကို နားလည် သဘောပေါက်ထားသောကြောင့် ဟုတ်မဟုတ် မသေချာသော်လည်း ယခုအချိန်တွင် ချန်ဖေးက လေပြင်းဓားသိုင်းကို ကြည့်လိုက်သောအခါ ၎င်း၏ သဘောတရား အများအပြားမှာ ချက်ချင်း ရှင်းလင်းသွားလေသည်။

၁၅ မိနစ် မပြည့်ခင်မှာပင် ချန်ဖေးသည် "လေပြင်းဓားသိုင်း" စာအုပ်ကို ဖတ်ရှုပြီးသွားသည်။ ချန်ဖေးသည် စနစ်မျက်နှာပြင်ကို မသိစိတ်ဖြင့် ကြည့်လိုက်ရာ သူ့မျက်လုံးများ အရောင်တောက်သွားလေ၏။

ကျင့်စဉ် - လေပြင်းဓားသိုင်း (အစပျိုးအဆင့်)

"စာအုပ် သုံးအုပ်ကို အလကား ရနိုင်တဲ့အခွင့်အရေးပါလား"

ထိုစာကြောင်းက ချန်ဖေး၏ စိတ်ထဲတွင် အလိုအလျောက် ပေါ်လာသည်။ ချန်ဖေးသည် ကျန်းစီနန်ကို မော့ကြည့်လိုက်ရာ သူမ၏ အာရုံမှာ သူ့အပေါ် လုံးဝ မရှိကြောင်း တွေ့လိုက်ရသည်။

သူ့နှုတ်ခမ်းထောင့်များ အနည်းငယ် ကွေးညွှတ်သွားလေ၏။

လက်ထဲမှ စာအုပ်ကို ချလိုက်ပြီး ချန်ဖေးသည် ဒုတိယ ဓားသိုင်းကျမ်းစာအုပ်ကို စတင် ဖတ်ရှုလိုက်သည်။

၁၅ မိနစ် ကြာသောအခါ ချန်ဖေးသည် ကျမ်းစာအုပ်ကို ချလိုက်ပြီး တတိယမြောက် စာအုပ်ကို ကောက်ယူလိုက်သည်။ နောက်ထပ် ၁၅ မိနစ် ကြာသောအခါ ချန်ဖေးသည် စတုတ္ထမြောက် ကျမ်းစာအုပ်ကို ဖတ်ရှုပြီးသွားသည်။

"ဖတ်ပြီးပြီလား... ဘယ်ဟာ လိုချင်လဲ"

ချန်ဖေး စာအုပ်ကို ချလိုက်သည်ကို မြင်သောအခါ ကျန်းစီနန်က လှည့်ကြည့်ပြီး မေးလိုက်သည်။

ကျန်းစီနန် အနေဖြင့် ချန်ဖေးက ဤမျှ တိုတောင်းသော အချိန်အတွင်း ကိုယ်ခံပညာ စာအုပ် လေးအုပ်လုံးကို သင်ယူနိုင်လိမ့်မည်ဟု ဘယ်တုန်းကမှ ထင်မှတ်မထားပေ။ သိုင်းပညာရှင် ၉၀ ရာခိုင်နှုန်းကျော်က ထိုသို့ မလုပ်နိုင်ကြပေ။ သိုင်းပညာ နည်းစနစ်များသည် သေချာ လေ့လာရန် လိုအပ်ပြီး ကိုယ်တိုင် လေ့လာ၍ မရနိုင်သော အရာများလည်း ရှိသည်။ ဆရာတစ်ဦး၏ လမ်းညွှန်မှု မရှိမဖြစ် လိုအပ်လေသည်။

၁၅ မိနစ် ဆိုသည်မှာ စာအုပ်ကို တစ်ချက်ကျော်ကျော် ဖတ်ရှုရန်သာ လုံလောက်သော အချိန် ဖြစ်သည်။

"ဒီဟာ ယူလိုက်ပါမယ်”

ချန်ဖေးက စာအုပ်တစ်အုပ်ကို ကောက်ယူလိုက်ရာ ကျန်းစီနန်က ခေါင်းညိတ်လိုက်သည်။ ထို့နောက် ချန်ဖေးသည် ဦးညွှတ် နှုတ်ဆက်ပြီး ကျန်းမိသားစု အိမ်တော်မှ ထွက်ခွာလာခဲ့သည်။

လမ်းတွင် ချန်ဖေးသည် စနစ်မျက်နှာပြင်ပေါ်မှ အချက်အလက်များကို ကြည့်ပြီး ရယ်မောလုနီးပါး ဖြစ်သွားသည်။

ကျင့်စဉ်များ - လေပြင်းဓားသိုင်း (အစပျိုးအဆင့်)၊ မီးလျှံခုန်ပျံ ဓားသိုင်း (အစပျိုးအဆင့်)၊ သစ်ရွက်ပုံစံ ဓားသိုင်း (အစပျိုးအဆင့်)၊ လက်ဒိုင်းကာဓားသိုင်း (အစပျိုးအဆင့်)

ဝိညာဉ်အလင်းဆေးလုံး၏ ဆေးနည်းကို မရရှိခဲ့သော်လည်း အနည်းဆုံးတော့ အရှုံးမရှိခဲ့ပေ။ အနည်းငယ် အမြတ်ရလိုက်သည်ဟုပင် ထင်ရလေသည်။