အခန်း (၂၄၉)

အခန်း။ ၂၄၉

ဝူရွှမ်ဝူကျိခန်းမဟု ကြားလိုက်ရချိန်တွင် အထူးလေ့ကျင့်ရေးစခန်းမှ ကျောင်းသားများ၏ ပထမဆုံး တုံ့ပြန်မှုမှာ လှောင်ပြောင်လိုသော အမူအရာပင်။ မှော်ဆရာတစ်ယောက်က သိုင်းပညာရှင်များလေ့ကျင့်ရာ ဝူကျိခန်းမကဟု မိတ်ဆက်နေခြင်းမှာ သူတို့အတွက် ရယ်စရာတစ်ခု ဖြစ်နေသည်။

သို့သော် လန်ကမူ အသာအယာ ပြုံးလိုက်ပြီး ယွင်ရှန်း၏ လက်ကို ဆုပ်ကိုင်ထားရာမှ ရုတ်တရက် အင်အားသုံး၍ ဖိညှစ်လိုက်သည်။ နှစ်ဦးသား လက်ချင်း ဆုပ်ကိုင်ထားစဉ်မှာပင် လန်၏ လက်ဖဝါးဆီမှ ပြင်းထန်သော မှော်စွမ်းအင်များ ယွင်ရှန်း၏ ကိုယ်ထဲသို့ စီးဝင်လာသည်။

ငါ့ကို စမ်းသပ်ချင်တာလား။

လန်သည် အမှန်တကယ်ပင် အရှုံးမပေးလိုသော စိတ်ဓာတ်ရှိသူ ဖြစ်သည်။ ယွင်ရှန်းထံမှ ဆေးဖော်နည်းကို ကြားသိခဲ့ရသော်လည်း သူမကိုယ်တိုင် မစမ်းသပ်နိုင်သည့်အတွက် ယွင်ရှန်း

နှင့် အားပြိုင်လိုသောဆန္ဒက ရင်ထဲတွင် တဖွားဖွား ပေါ်ပေါက်လာခဲ့ခြင်း ဖြစ်သည်။

ယွင်ရှန်းသည်လည်း လန်၏ ရည်ရွယ်ချက်ကို ချက်ချင်း ရိပ်မိလိုက်သည်။

အကယ်၍ သူမ လက်ကို ယခုပင် ရုပ်သိမ်းလိုက်ပါက ဒဏ်ရာမရဘဲ ဆုတ်ခွာနိုင်သော်လည်း ယွင်ရှန်းသည် အရှုံးပေးတတ်သူ မဟုတ်ပေ။ အထူးလေ့ကျင့်ရေးစခန်းမှ လူများမှာ မွေးရာပါ မာန်မာနရှိကြသူများ ဖြစ်သည်။

မည်သို့ပင်ဖြစ်စေ လော့ရှမြို့တွင် သူတို့နှင့် ထိပ်တိုက်တွေ့ရမည်မှာ သေချာသဖြင့် ယခု မှော်ညွှန်ကြားရေးမှူးချုပ်အဆင့်ရှိသော သူမအနေဖြင့် မြင့်မြတ်မှော်ဆရာတစ်ဦးနှင့် မည်မျှကွာခြားသည်ကို သိလိုစိတ် ပြင်းပြနေမိသည်။

ယွင်ရှန်းက လက်ကို မရုပ်သိမ်းသည့်အပြင် သူမ၏ မှော်ဝိညာဉ်ကိုပါ စတင်လှုပ်ရှားလိုက်သည်ကို မြင်သောအခါ လန်၏ မျက်လုံးများထဲတွင် စိတ်လှုပ်ရှားမှုများ ဖျတ်ခနဲ ပေါ်လာခဲ့သည်။

အခြားကျောင်းသားများကမူ ယွင်ရှန်းကို အထင်သေးစွာ ကြည့်နေကြသည်။ စီနီယာလန်၏ စွမ်းအားမှာ အထူးလေ့ကျင့်ရေးစခန်းတွင် အဆင့် ၂၀ အတွင်း၌ ရှိပြီး ရေဓာတ်မှော်ပညာတွင် အဝါရောင်အဆင့်ကိုပင် ကျွမ်းကျင်စွာ အသုံးပြုနိုင်သူ ဖြစ်သည်။

အေးစက်လှသော မှော်စွမ်းအင်များမှာ ယွင်ရှန်း၏ လက်ကို ဖြတ်ကျော်ကာ ကိုယ်ထဲသို့ ထိုးဖောက်ဝင်ရောက်လာသည်။ ယွင်ရှန်းသည် သူမ၏ ဓာတ်ငါးပါး မှော်ဝိညာဉ်စွမ်းအားလုံးကို အသုံးမပြုဘဲ လန်၏ ဓာတ်သဘာဝကို တုံ့ပြန်ရန်အတွက် မီးဓာတ်မှော်ဝိညာဉ်ကိုသာ ရွေးချယ်အသုံးပြုလိုက်သည်။

အေးစက်သော စွမ်းအင်များကြောင့် ယွင်ရှန်း၏ ကိုယ်ပေါ်တွင် အပြာရောင် ရေခဲပွင့်လွှာလေးများ ချက်ချင်း ဖုံးလွှမ်းသွားသည်။ ဤသည်ကို မြင်သောအခါ ချီယီက စိုးရိမ်တကြီးဖြင့် ရှေ့သို့ တိုးလာခဲ့သည်။ အဆင့်ချင်း ကွာခြားလွန်းလှသဖြင့် ယွင်ရှန်းအတွက် အန္တရာယ်ရှိနိုင်သောကြောင့် ဖြစ်သည်။

ဒီလောက်နဲ့ ငါ့ကို အရှုံးပေးခိုင်းလို့ ရမယ် ထင်နေလား။

ယွင်ရှန်းက စိတ်ထဲမှ လှောင်ပြောင်လိုက်သည်။

လန်သည် ယွင်ရှန်းမှာ မှော်ညွှန်ကြားရေးမှူးချုပ်အဆင့်သာရှိသည်ကို သိသွားပြီး စွမ်းအားကို ပြန်လည်ရုပ်သိမ်းရန် ပြင်ဆင်လိုက်သည်။ သို့သော် ထိုအချိန်မှာပင် ရေခဲရိုက်နေသော ယွင်

ရှင်က သူမ၏ မှော်လှံတံကို ထုတ်ယူကာ လျင်မြန်စွာ ဝှေ့ယမ်းလိုက်သည်။

မှော်ဝိညာဉ်ကျောက် နှစ်လုံးမှာ တစ်ပြိုင်နက်တည်း တောက်ပလာခဲ့သည်။

လန်ထက် မှော်စွမ်းအား အဆပေါင်းများစွာ နည်းပါးနေသော ယွင်ရှန်း၏ ကိုယ်ပေါ်မှ ရေခဲများမှာ ချက်ချင်းပင် အရည်ပျော်ကျသွားတော့သည်။

"ဒါက ဘာလဲ"

လန်သည် ယွင်ရှန်း၏ မှော်လှံတံကို မျက်မှောင်ကြုတ်ကြည့်လိုက်သော်လည်း ၎င်းကို မည်သည့်မိစ္ဆာသားရဲအရိုးဖြင့် ပြုလုပ်ထားသည်ကို ချက်ချင်း မခွဲခြားနိုင်ပေ။ သို့သော် လှံတံပေါ်ရှိ မှော်ဝိညာဉ်ကျောက် နှစ်လုံးကိုမူ သူမ မှတ်မိလိုက်သည်။

ပထမတစ်ခုမှာ အနှစ်တစ်ရာသက်တမ်းရှိသော သွေဖည်မိစ္ဆာဝိညာဉ်ကျောက်ဖြစ်ပြီး ဒုတိယတစ်ခုမှာ ပို၍ပင် အံ့အားသင့်ဖွယ်ကောင်းသော ညှို့ဓာတ်ဝိညာဉ်ကျောက်ဖြစ်နေသည်။ ဤကဲ့သို့ ပေါင်းစပ်မှုကို အထူးလေ့ကျင့်ရေးစခန်းတွင်ပင် တွေ့ရခဲသည်။

"ကြည့်ရတာ မင်းက ဓာတ်ပေါင်းစုံမှော်ဝိညာဉ် ပိုင်ရှင်ပဲ ဓာတ်တွေအားလုံးကို တစ်ပြိုင်နက် သုံးနိုင်တာကိုး"

ထိုသို့ပြောကာ လန်သည် ယွင်ရှန်းအပေါ် ထားရှိသော အထင်သေးစိတ်များကို အပြီးတိုင် စွန့်

ပယ်လိုက်တော့သည်။ လနတ်သမီး၏ ချီးမွမ်းခြင်းကို ဖော်စပ်နိုင်သော မှော်ဆရာတစ်ဦးမှာ မည်သို့မျှ သာမန်လူ မဖြစ်နိုင်ကြောင်း သူမ နားလည်သွားသည်။

လော့ရှမြို့သို့ လာရောက်သည့် ဤခရီးတွင် ဤမျှအထိ တော်လွန်းသော ပြိုင်ဘက်တစ်ဦးနှင့် တွေ့ဆုံရလိမ့်မည်ဟု သူမ မထင်မှတ်ထားခဲ့ပေ။

လန်သည် စိတ်ပျက်သွားခြင်းမရှိသည့်အပြင် အမှန်တကယ်ပင် ဝမ်းသာသွားခဲ့သည်။ သူမထက် အသက်ငယ်ပြီး မှော်အဆင့်အတန်း နိမ့်ပါးသော်လည်း သူမနှင့် ရင်ဘောင်တန်းနိုင်သည့် ပြိုင်ဘက်ကောင်းတစ်ဦးကို တွေ့ရှိခဲ့ခြင်းကြောင့်ပင်။

"ဒါဆိုရင်တော့ သတိထားတော့နော်"

ယွင်ရှန်းက ခပ်အေးအေးလေး ပြုံးကာ ပြောလိုက်သည်။

သူမသည် မြေဓာတ်မှော်ဝိညာဉ်ကို ဖြည်းဖြည်းချင်း စတင်ခေါ်ယူလိုက်သည်။ ရှေးစကားအတိုင်း ရန်သူလာလျှင် ဗိုလ်ချုပ်နှင့်ဆီး ရေလာလျှင် မြေနှင့်တား ဟူသကဲ့သို့ မီးဓာတ်တစ်ခုတည်းနှင့် မလုံလောက်ပါက မြေဓာတ်ကို အသုံးပြုခြင်းက အကောင်းဆုံးပင်။

လန်၏ ပါရမီမှာ အမှန်တကယ် ထူးချွန်သော်လည်း အသက်အရွယ်နှင့် အတွေ့အကြုံအရကြည့်လျှင် ဘဝနှစ်ခုစာ ဖြတ်သန်းဖူးသော ယွင်ရှန်းကို မမီသေးပေ။

ယွင်ရှန်းသည် ဆရာဝန်တစ်ဦး၏ တည်ငြိမ်ရင့်ကျက်မှုကို အသုံးပြုကာ သူမ၏ ခန္ဓာကိုယ်အတွင်းမှ မှော်ဝိညာဉ်စွမ်းအားများကို စနစ်တကျ စုစည်းလိုက်သည်။

လန်သည် သူမ၏ ရေဓာတ်မှော်စွမ်းအားများမှာ တံတိုင်းတစ်ခုနှင့် တိုးမိသွားသကဲ့သို့ ယွင်ရှန်း၏ကိုယ်ထဲသို့ ယခင်ကဲ့သို့ အလွယ်တကူ ထိုးဖောက်၍မရတော့ကြောင်း ချက်ချင်း ခံစားလိုက်ရသည်။

ဒီပြိုင်ဘက်ရဲ့ ဓာတ်နှစ်ပါးမှော်ဝိညာဉ်က ဒီလောက်တောင် စွမ်းတာလား။

မကြာမီမှာပင် လန်သည် ယွင်ရှန်း၏ ထူးခြားချက်ကို သတိပြုမိသွားသည်။ ယွင်ရှန်းသည် အခြေအနေမဟန်သည့် အချိန်တွင်ပင် အလွန်တည်ငြိမ်စွာ ဆုံးဖြတ်ချက် ချနိုင်စွမ်းရှိသည်။

ထို့ပြင် သူမသည် မှော်အဆင့်အတန်းအရ လန်ထက် နှစ်ဆင့်မျှ နိမ့်ပါးနေသော်လည်း ဝိညာဉ်စွမ်းအား တိုက်ပွဲကို ၁၅ မိနစ်ကြာသည်အထိ ကြံ့ကြံ့ခံနိုင်နေခြင်းမှာ မယုနိုင်စရာပင်။

ယွင်ရှန်း၏ မှော်စွမ်းအားမှာ လျော့နည်းသွားခြင်းမရှိသည့်အပြင် ဓာတ်နှစ်ပါးစွမ်းအားကို ပေါင်းစပ်လိုက်ချိန်တွင် ကုန်ဆုံးခြင်းမရှိသော စမ်းရေတွင်းတစ်ခုကဲ့သို့ အဆက်မပြတ် စီးထွက်နေတော့သည်။

လန်၏ စွမ်းအားမှာ ပြင်းထန်သော မြစ်ကြီးတစ်စင်းနှင့် တူပါက ယွင်ရှန်း၏ စွမ်းအားမှာ တသွင်သွင်စီးနေသော စမ်းချောင်းလေးနှင့် တူသည်။ အရှိန်အဟုန် မပြင်းသော်လည်း အလွန်ပင် ခံနိုင်ရည်ရှိပြီး မည်သည့်အခါမျှ ခန်းခြောက်သွားမည့်ပုံ မပေါ်ပေ။

မြေဓာတ်စွမ်းအားများမှာ လှိုင်းလုံးများကဲ့သို့ လာနေပြီး တစ်ခါတစ်ရံတွင် မီးဓာတ်၏ ပြင်းထန်သောအပူရှိန်နှင့် ရောယှက်နေသည်။ ထိုအချိန်တွင် လန်သည် သူမကိုယ်တိုင် မီးလောင်တော့မည့်အတိုင်း ခံစားလိုက်ရသည်။

သူမသည် မနေနိုင်တော့ဘဲ သူမ၏ မှော်လှံတံကို ဆုပ်ကိုင်လိုက်ရာ လှံတံပေါ်ရှိ မှော်ဝိညာဉ်ကျောက် နှစ်လုံးမှာလည်း တောက်ပလာတော့သည်။

စီနီယာလန်သည် သာမန်မှော်ကျောင်းသူလေးတစ်ဦးနှင့် ယှဉ်ပြိုင်ရာတွင် သူမ၏ မှော်လှံတံစွမ်းအားကိုပါ ထုတ်သုံးလိုက်သည်ကို မြင်သောအခါ အထူးလေ့ကျင့်ရေးစခန်းမှ ကျောင်းသားနှစ်ဦးမှာ မှင်တက်သွားကြသည်။ စီနီယာလန် တစ်ကယ်ကို အတည်အပေါက် ဖြစ်နေပြီဆိုသည်မှာ သိသာလှသည်။

လန်က သူမ၏ မှော်လှံတံကို ထုတ်ဖော်လိုက်သည်နှင့် ယွင်ရှန်းသည် လန်၏ကိုယ်တွင်းမှ မှော်ဓာတ်များ ပြောင်းလဲသွားသည်ကို ခံစားလိုက်ရသည်။ ၎င်းမှာ ရေဓာတ်ပင်ဖြစ်သော်လည်း တစ်ခဏအတွင်းမှာပင် ပုံစံပြောင်းလဲသွားခြင်းဖြစ်သည်။ ပြင်းထန်သော အအေးဓာတ်တစ်ခုက ယွင်ရှန်း၏ မျက်နှာကို ရိုက်ခတ်လာသည်။

၎င်းမှာ ရေဓာတ်မှော်ပညာကို အဆင့်မြင့်စွာ ကျွမ်းကျင်ပြီးနောက် ရရှိလာသော ရေခဲမှော်ပညာပင်။ လန်၏ မှော်စွမ်းအားများ နောက်တစ်ကြိမ် တိုးဝင်လာချိန်တွင် ယွင်ရှန်း၏ မျက်နှာမှာ အအေးဒဏ်ကြောင့် ဖြူဖျော့သွားတော့သည်။

သူမ၏ နှုတ်ခမ်းများ၊ ဆံပင်များနှင့် မျက်ခုံးများပေါ်တွင် နှင်းခဲများ ဖုံးလွှမ်းသွားပြီး အအေးဒဏ်ကို မတောင့်ခံနိုင်တော့ဘဲ သွားများပါ တကပ်ကပ် မြည်လာသည်။

ချီယီက ဝင်ရောက်တားဆီးရန် ရှေ့သို့ တိုးလိုက်သော်လည်း ဘေးမှ ယီပိုင်မင်းက တားဆီးလိုက်သည်။

"ဇွတ်အတင်း ရှေ့မတိုးနဲ့ဦး။ ကြောင်မလေးက သူမရဲ့ တကယ့်စွမ်းရည်ကို ထုတ်မသုံးရသေးဘူး"

ယီပိုင်မင်းက ယွင်ရှန်းကို ယုံကြည်မှုအပြည့်ဖြင့် ကြည့်ရင်း ပြောလိုက်သည်။ ယွင်ရှန်းသည် သူတို့၏ အကြီးမားဆုံး လျှို့ဝှက်ချက်ဖြစ်သော ဓာတ်ငါးပါး မှော်ဝိညာဉ်ကို အပြင်လူများရှေ့တွင် မထုတ်ပြဘဲ ထိန်းသိမ်းထားကြောင်း သူ ရိပ်မိသည်။

ထိုစဉ်မှာပင် ယွင်ရှန်းသည် မှော်ဝိညာဉ်စွမ်းအားကို ဘယ်လို အသုံးချရမလဲဟု အပြင်းအထန် စဉ်းစားနေမိသည်။ အကယ်၍ သူမသာ မှော်ဝိညာဉ်စွမ်းအားကို မသုံးပါက လန်ကို ဘယ်လိုလုပ် အနိုင်ယူနိုင်မှာလဲ။

ရေခဲ... ရေခဲမှော်ဓာတ်တွေပေါ့ ဟုတ်လား။

ယွင်ရှန်းသည် လန်ကဲ့သို့ အဆင့်မြင့်မှော်ပညာများကို မတတ်မြောက်သေးသလို ဒုတိယအဆင့် မှော်ဓာတ်များကိုလည်း နားမလည်သေးသော်လည်း... သူမတွင် ရေခဲတိမ်အိမ်မက်အိပ်စက်ခြင်းရှိနေသည်။

တစ်စုံတစ်ခုကို သတိရသွားသကဲ့သို့ ယွင်ရှန်းသည် မျက်လုံးများကို မှိတ်လိုက်ပြီး ရေခဲတိမ်အိမ်မက်အိပ်စက်ခြင်း၏ ဂါထာကို စိတ်ထဲမှ တိုးတိုးလေး ရွတ်ပြောလိုက်သည်။ သူမ မျက်လုံး ပြန်ဖွင့်လိုက်ချိန်တွင် မျက်ဝန်းများမှာ ကြည်လင်တောက်ပနေတော့သည်။

ထိုအချိန်မှာပင် လန်၏ မျက်နှာမှာ ထိတ်လန့်တကြား ဖြစ်သွားရသည်။ သူမသည် ယွင်ရှန်းကို မယုံကြည်နိုင်သလို ကြည့်နေမိသည်။ အကြောင်းမှာ ထိုခဏအတွင်းမှာပင် သူမ၏ ကိုယ်တွင်းမှ ရေခဲမှော်စွမ်းအားများမှာ...