နောက်ဆုံးတော့ သူ့ကိုရှာတွေ့ပြီ သတ်ကြ

အချိန်က တတိတိ ကုန်ဆုံးသွားပြီး ကျန်းရီ၏ အရေပြားသည် ပိုနီရဲလာတော့၏။ သူ၏တစ်ကိုယ်လုံးက ပိုမိုတုန်ယင်လာပြီး သူ့ကိုယ်ပေါ်ရှိ အဝတ်အစားများက အမည်းရောင် အညစ်အကြေးများဖြင့် လွှမ်းနေပြီဖြစ်သည်။

ကျန်းရီက ကရုတစိုက် စစ်ဆေးကြည့်လိုက်ရာ သူ၏ခန္ဓာကိုယ်သည် နှေးကွေးသည့်နှုန်းဖြင့် အသွင်ပြောင်းနေတာကို သိလိုက်ရသည်။ ဥပမာအနေဖြင့် သူ၏ချီသွေးကြောအချို့က ပြန့်ကားလာပြီး အချို့က ကျုံ့နေ၏။ အရိုးအချို့က ရှည်လာပြီး ကြွက်သားများ ဖောင်းကြွလာတော့သည်။ ထိုရှာဖွေတွေ့ရှိမှုက ကျန်းရီကို ထိတ်လန့်သွားစေ၏။ ဤအသွင်ပြောင်းလဲမှုသည် သူ၏ခန္ဓာကိုယ်ကို ထိခိုက်စေပြီး ချီသွေးကြောများကို ပျက်စီးစေခဲ့လျှင် သူက ဒုက္ခိတလုံးလုံး ဖြစ်သွားပေလိမ့်မည်။

ကံကောင်းသည်မှာ ယင်းက အသေးအဖွဲ ပြောင်းလဲမှုသာဖြစ်သည်။ နဂါးညှိုးရော်မြက်သည် လူတစ်ယောက်၏ ခန္ဓာကိုယ်ကို ပြန်လည်ဖွဲ့တည်ပေးတာဖြစ်သည်။ သုံးစွဲသူ၏ ခန္ဓာကိုယ်၌ မည်သည့်ပြောင်းလဲမှုမှ မဖြစ်ပေါ်ခဲ့လျှင် ခန္ဓာကိုယ် ပြန်ဖွဲ့တည်မှုဟု မည်သူက ခေါ်တော့မည်နည်း။ ထို့ကြောင့်သူသည် ၎င်းကိုအာရုံမစိုက်ဘဲ နဂါးညှိုးရော်မြက်ကို သန့်စင်ရန် သူ၏အတွင်းအားကို ထိန်းချုပ်ဖို့သာ ဆက်အာရုံစိုက်လိုက်သည်။ ခန္ဓာကိုယ်ထဲသို့ စွမ်းအင်များ ဝင်ရောက်ခွင့် ပေးထားပြီး ခန္ဓာကိုယ်ဖွဲ့စည်းပုံကို ပြန်ဖွဲ့တည်ခိုင်းနေ၏။

နဂါးညှိုးရော်မြက်ကို သန့်စင်ခြင်းက အလွန်နှေးကွေးပြီး ကျန်းရီက ဖြစ်စဉ်ကို မမြန်ရဲချေ။ လက်ရှိအခြေအနေကို အကဲဖြတ်ကြည့်လျှင် သူသည် သန့်စင်မှု အပြည့်အဝ ပြီးဆုံးရန်အတွက် အနည်းဆုံး အချိန်သုံးလ လိုအပ်ပေလိမ့်မည်။ ကျန်းရီက အတော်ပျင်းရိလာ၏။ သုံးလလုံးလုံးသူ စိတ်ကူးယဉ်နေလို့ မရဘူးမလား။

“ဒါဆို မှော်အတတ်တွေကို ဆင်ခြင်နေသင့်တယ်”

အစောပိုင်းအဆင့်ထဲ၌ မှော်အတတ်များစွာ ရှိသည်။ ကျန်းရီသည် သူ၏ခန္ဓာကိုယ်ကို အာရုံမစိုက်တော့ဘဲ မှော်အတတ်ပညာများကို နားလည်သုံးသပ်ရန်သာ အာရုံစိုက်နေလိုက်သည်။ အတိတ်တုန်းက သူသည် ပတ်ဝန်းကျင်ကို ထောက်လှမ်းရန် မိုးနှင့်မြေ တစ်သားတည်း အခြေအနေကိုသာ အမြဲတမ်း အသုံးပြုခဲ့သည်။ ဤအခြေအနေသည် ဆင်ခြင်သုံးသပ်ခြင်းအတွက် အသုံးတည့်မည်ဆိုတာ မသိပေ။

သူ၏စိတ်တစ်ပိုင်းကို နဂါးညှိုးရော်မြက်ပင်ကို သန့်စင်နေသော အတွင်းအားကို ထိန်းချုပ်ရန် ခွဲထားလိုက်၏။ မည်သည့်နည်းနှင့်မဆို နဂါးညှိုးရော်မြက်မှ စွမ်းအင်သည် ခန္ဓာကိုယ်ထဲ ဝင်သွားသည်နှင့် ၎င်းကပျောက်ကွယ်သွားမှာပဲ ဖြစ်သည်။ ထို့ကြောင့်ယင်းကို စိတ်အနှောက်အယှက် ဖြစ်ခံနေစရာ မလိုတော့သောကြောင့် သူသည် အင်္သေချေကိုယ်ခွဲကို စတင်ဆင်ခြင်သုံးသပ်တော့၏။

အဆုံးတွင်မူ သူဆင်ခြင်သုံးသပ်နေစဉ် တစ်စုံတစ်ခု ဖြစ်သွားသည်။ မိုးနှင့်မြေ တစ်သားတည်း အခြေအနေထဲ ဝင်ရောက်နေစဉ် မှော်အတတ်များကို ဆင်ခြင်သည့်အရှိန်က မြင့်တက်လာ၏။ သူနားမလည်နိုင်သည့် လျို့ဝှက်ဆန်းကြယ်မှု များစွာကို အလွန်လျှင်လျင်မြန်မြန် ရှာဖွေဖော်ထုတ်နိုင်လာသည်။ သုံးရက်အတွင်းမျှဖြင့် သူသည် မှော်အတတ်များကို ဆင်ခြင်သုံးသပ်ခြင်းက ရက်ပေါင်းသုံးဆယ်ကြာ နားလည်သဘောပေါက်အောင် ပြုလုပ်ခြင်းထက် ပိုတောင်မြန်ဆန်နေသည်။

“ဒီအခြေအနေက တကယ်ဆန်းကြယ်တာပဲ။ ငါ့ရဲ့ နားလည်သဘောပေါက်တဲ့ အရှိန်က ဆယ်ဆတိုးလာပြီ။ ဒါတောင်ငါ လုံးဝသတိမပြုမိဘူးပဲ”

ကျန်းရီက စိတ်ထဲအံ့သြသွားပြီး ထိတ်တောင်ထိတ်လန့်သွားသည်။ သူသည် ရှင်သန်ရေးအတွက် အထီးကျန်အရှေ့ပိုင်း ပင်လယ်ထဲတွင် အခြေအနေကို ဆင်ခြင်သုံးသပ်ခဲ့၏။ မိုးနှင့်မြေ တစ်သားတည်း အခြေအနေသို့ သူသည် ဆန်းကြယ်နတ်ဘုရား နန်းတော်၏ ကူကယ်ရာမဲ့တံတားတွင် ရှိစဉ်က မိုးနှင့်မြေ တစ်သားတည်း ပထမဆုံးအဆင့်သို့ ဝင်ရောက်ခဲ့ပြီး ယင်းက မတော်တဆ ဖြစ်လာခဲ့တာပင်။ ဤကဲ့သို့ အကျိုးသက်ရောက်မှုကြီး ဆောင်ယူလာပေးလိမ့်မည်ဟု သူမထင်ထားပေ။

ရီချန်းနှင့် ကျန်သည့်သူများက ကျန်းရီ၏ သင်ယူမှုအကြောင်း သိရှိခဲ့လျှင် သူတို့ကသူ့ကို တုံးအသူဟူ၍ ကျိန်ဆဲမှာသေချာသည်။ ရီချန်းနှင့် ယဉ်ရို့ပင်းတို့က ကျန်းရီကို မြင့်မားစွာ တွေးထားရခြင်းမှာ ဤကဲ့သို့ နားလည်သဘောပေါက်သည့် အခြေအနေ ရှိနေသောကြောင့် ဖြစ်သည်။

ယင်းက အင်မတန် ဆန်းကြယ်သော အခြေအနေတစ်ရပ်ဖြစ်သည်။ ကျင့်ကြံသူတစ်ဦးသည် ဤအခြေအနေထဲ ရှိနေစဉ် မိုးနှင့်မြေကို ပေါင်းစည်းနိုင်သော ခန္ဓာကိုယ်တစ်ခု ဖွဲ့တည်နိုင်သည်။ ထိုလူသည် မိုးနှင့်မြေဖြစ်သွားပြီး မိုးနှင့်မြေက ထိုလူဖြစ်လာသည်။ လူတစ်ဦးက မိုးနှင့်မြေတို့ဖြင့် အတူတကွ ပေါင်းစည်းလိုက်ချိန်တွင် မိုးနှင့်မြေက သူနှင့်ပိုနီးကပ်လာပြီး မိုးနှင့်မြေမှ တာအိုပုံစံများကို နားလည်သဘောပေါက်အောင် ဆင်ခြင်ရာ၌ အလွယ်တကူ ဖြစ်သွားစေသည်။

မိုးနှင့်မြေ တစ်သားတည်း အခြေအနေသည် တာအိုပုံစံများနှင့် ကောင်းကင်နှင့်မြေကြီး၏ နိယာမများကို နားလည်သဘောပေါက်ရန် အကောင်းဆုံး အခြေအနေဖြစ်၏။ ထိုအခြေအနေကို တောင့်တနေသည့် သိုင်းပညာရှင်များ များပြားလွန်းပြီး ဤအခြေအနေထဲသို့ ဝင်ရောက်ရန်အတွက် အထွတ်အထိပ် သိုင်းပညာရှင်အထိ ကျင့်ကြံနိုင်သည့် သူများကတောင် ထိုအခြေအနေထဲ ဝင်ရောက်ရန် မလိုအပ်လောက်ပေ။ ပုံမှန်ဆို ဤအဆင့်ထဲ ဝင်ရောက်နိုင်သည့်သူက သူတို့က အရွယ်မတိုင်မီ မသေဆုံးခဲ့လျှင် ဒေသတစ်ခုကို လွှမ်းမိုးနိုင်စွမ်း ရှိနေလေရာ အောင်မြင်ကျော်ကြားမှုအချို့ ရတတ်ကြသည်။

အတွင်းအားသည် ကျင့်ကြံသူတစ်ဦး၏ ကျင့်ကြံခြင်း အုတ်မြစ်ဖြစ်ပြီး တာအိုပုံစံက လူတစ်ယောက်မည်မျှ သန်မာနိုင်သည်ဆိုတာ ဆုံးဖြတ်နိုင်သော အရင်းအမြစ်ဖြစ်သည်။

အတွင်းအားကို အလွယ်တကူ ကျင့်ကြံ၍ရသည့် မဟာမျိုးနွယ်စုများသည် အတွင်းအားကို ဆယ်ဆ၊ အဆတစ်ရာ၊ အဆတစ်ထောင်တောင် သိပ်သည်းလာစေနိုင်သော ရတနာများ ပိုင်ဆိုင်ထားသည်။ ကျင့်ကြံခြင်း အရှိန်ကိုလည်း ဆယ်ဆ၊ အဆတစ်ရာ၊ အဆတစ်ထောင်တောင် ပိုမြန်နိုင်သည်။ သို့သော် တာအိုပုံစံများက သူတို့ဘာသာ နားလည်သဘောပေါက်အောင် ပြုလုပ်ရတာဖြစ်သည်။ စိတ်ဝိညာဉ်တာအို အက်ကွဲမှုပုံစံကို မသန့်စင်သ၍ ဖြတ်လမ်းမရှိပေ။ သို့သော် ထိုအက်ကွဲမှု ပုံစံများကို သန့်စင်လိုက်သည်နှင့် ဘဝပျက်စီးမည်ဖြစ်ကာ ရှေ့ဆက်မတတ်နိုင်တော့ပေ။

ထိုအကြောင်းအရင်းကြောင့် ရီချန်းသည် အထီးကျန် အရှေ့ပိုင်း ပင်လယ်ထဲ၌ ကျန်းရီမိုးနှင့်မြေ တစ်သားတည်း အခြေအနေသို့ ဝင်ရောက်နိုင်ခဲ့သောအခါ သူ့ကိုခေါ်ချင်ခဲ့တာပဲဖြစ်သည်။ ကံဆိုးသည်မှာ ရီချန်းက ထိုအခြေအနေကို များများစားစား နားလည်သဘောပေါက်ခြင်း မရှိပေ။ ထို့အပြင် ကျန်းရီသည် ကောင်းကင်ဘုံ ကျောက်တုံးများကို သန့်စင်ခဲ့စဉ်က သူ၏ခန္ဓာကိုယ်က ထိခိုက်ပြီးသားဖြစ်၏။ နဂါးညှိုးရော်မြက်သည် ရရှိရန် အလွန်ခက်ခဲနေသောကြောင့် သူမသည် ဗုဒ္ဓဧကရာဇ်မြို့ဆီသို့ သူ့ကိုခေါ်မလာခဲ့တာပဲ ဖြစ်သည်။

မိုးနှင့်မြေ တစ်သားတည်း အခြေအနေက အလွန်ဆန်းကြယ်ကြောင်း ကျန်းရီကို မည်သူမျှ မပြောပြခဲ့ပေ။ ထို့ကြောင့်သူက အံ့သြဆွံ့အနေလေ၏။ နေ့ဝက်ခန့် ကြာပြီးနောက် စိတ်လှုပ်ရှားမှုတို့ တိုးလာရုံသာရှိသည်။ အရာအားလုံးကို လျစ်လျူရှုထားပြီး သူ၏စိတ်ဝိညာဉ်ကို မှော်အတတ်များ ဆင်ခြင်ရာ၌သာ နှစ်မြှုပ်ထားသည်။ သူက ခန္ဓာကိုယ်ကို ပြန်လည်ဖွဲ့တည်ရန်အတွက် ဖြစ်လာသမျှ အရာအားလုံးကိုလည်း လျစ်လျူရှုထားသည်။

အချိန်က လျင်မြန်စွာ ကုန်ဆုံးသွား၏။ မျက်တောင်တစ်ခတ်အတွင်း တစ်လကုန်လွန်သွားခဲ့သည်။

ရှီးဖေးနှင့် ကျန့်ဝူယင်က အနားမရနိုင် ဖြစ်နေ၏။ ပြီးခဲ့သည့်လ၌ မျိုးနွယ်စုနှစ်စု၏ ကျန်းရှင်းကျားများသည် သုံးရက်လျှင်တစ်ကြိမ် ကျန်းရှင်းရှုဖြင့် နတ်ဘုရားအတတ်ကို ထုတ်ဖော်ခဲသည့် အချိန်တိုင်း၌ သူတို့သည် ကျန်းရီ၏ အရှိန်အဝါတည်ရှိမှုကို မရှာနိုင်ခဲ့ပေ။ ရှီးဖေးသည် ထိုနေရာရှိ ရာသီဥတု အခြေအနေကိုကြည့်ပြီး လူတစ်စုကို ကျွန်းပေါ်သို့ ခေါ်လာခဲ့သည်။ သူက အင်မတန် ပျင်းရိနေပြီး ကျင့်ကြံလိုစိတ်လည်း မရှိပေ။ ထိုမျှစုတ်ပျက်နေသော ဘဝက ငယ်ရွယ်စဉ်ကတည်းက မင်းသားလေးတစ်ပါးနှယ် အလိုလိုက်ခံရသော သခင်လေးကို သေစေနိုင်လောက်သည်။

ကျန့်ဝူယင်က အတော်ပိုကောင်းသေး၏။ နေ့စဉ်နေ့တိုင်း သူသည် သောက်စားနေကာ နတ်မြင်းပျံ အင်ပါယာ၏ တောင်ဘက်အကျဆုံးမြို့တွင် ဧကရာဇ်တစ်ပါးသဖွယ် နေထိုင်နေလေသည်။ ဖေးချီကလည်း နေ့စဉ်နေ့တိုင်း သူ့ဆီမိန်းမလှလေးများ ပို့ပေး၏။ သို့သော် သူသည် ကျန်းရီရှိနေသည့် တည်နေရာကို မရှာလျှင် မဖြစ်နိုင်သောကြောင့် အရိပ်အပိုင်းအစတစ်ခုသည် သူ့ရင်ထဲရှိ ကျေနပ်အားရမှုကို ပျော်ဝင်ခံစားခွင့် မပေးနိုင်ဖြစ်နေသည်။

တစ်လခွဲခန့် ကြာသွားသည်။

နှစ်ယောက်လုံးက သည်းမခံနိုင်တော့ဘဲ သွေးညအကြောက်တရား ပင်လယ်ကို ထောက်လှမ်းရန် လူလွှတ်တော့သည်။ မည်သည့်နည်းနှင့်မဆို ထိုအဖွဲ့များကလည်း ပျင်းနေပေ၏။ သူတို့အတွက် တစ်စုံတစ်ခု ရှာစရာရှိတာ ရှိကောင်းရှိမည်။ နှစ်ယောက်လုံး ရောက်လာသည် ဖြစ်သောကြောင့် ဧရိယာကို ဦးစွာရှာဖွေနိုင်မည်။ သူတို့လက်ဗလာ ပြန်သွားရမည်ဆိုလျှင် စိတ်မပါကြပေ။ ထို့အပြင် ရှီးဖေး၏အဖေက ရှီးမျိုးနွယ်စုကို အရှက်မခွဲရန် ပြောခဲ့သည်။

ရှီးမျိုးနွယ်စုမှ သိုင်းပညာရှင် အယောက်သုံးဆယ်သည် ရှီးဖေးနှင့်အတူ နတ်မြင်းပျံ အင်ပါယာထဲ စုနေကြသည်။ ကောင်းကင်ဧကရာဇ် အယောက်ခြောက်ဆယ်ကြားထဲ၌ နောက်တွင် ကျန်ရစ်ခဲ့သော ငါးယောက်မှအပ ကျန်သည့်သူများကို ကျွန်းအနှံ့ လူစုခွဲထားသည်။ နှစ်ယောက်တစ်စုစီဖြင့် သွေးညအကြောက်တရား ပင်လယ်၏ မြောက်ဘက်အရပ်ဆီသို့ ကောင်းကင်ကိုလွှမ်းသော ပိုက်ကွန်တစ်ခုသဖွယ် ပျံသန်းသွားကြတော့သည်။ ကျန့်မျိုးနွယ်စုကလည်း အယောက်သုံးဆယ် ပို့လာသည်။ နတ်မြင်းပျံ အင်ပါယာအတွင်း ကောင်းကင်ဧကရာဇ် သိုင်းပညာရှင်များ ပေါင်းလိုက်ပြီးနောက် အယောက်တစ်ရာ ရှိသွားသည်။ အားလုံးကို စေလွှတ်လိုက်တော့သည်။ ချက်ချင်းပင် သွေးညအကြောက်တရားပင်လယ်၏ မြောက်ဘက်အစွန်းက စည်ကားသိုက်မြိုက်လာတော့သည်။ ပင်လယ်နတ်ဆိုးများ အစုလိုက်အပြုံလိုက် သတ်ဖြတ်ခံရပြီး ကျွန်းများ မြေလှန်ခံရတော့သည်။

ရှာဖွေရန် သမုဒ္ဒရာထဲသို့ ရောက်လာကြသော သိုင်းပညာရှင်များတောင် ပျောက်ကွယ်ကုန်၏။ မျိုးနွယ်စုနှစ်စုမှ ကျန်းရှင်းကျားသည် ကျန်းရှင်းရှုကို သုံးသည့်အချိန်တွင် သူတို့က ကျန်းရီ၏ တည်နေရာကို ဝေဝါးဝါး ထောက်မိရာ သူသည် သွေးညအကြောက်တရား ပင်လယ်၏ မြောက်ဘက်ခြမ်းတွင် ရှိနေကြောင်း ဆိုခဲ့၏။ မျိုးနွယ်စု နှစ်စုလုံးက မြောက်ပိုင်းတစ်ခုလုံးကို မြေလှန်ရမည်ဆိုလျှင်တောင် ကျန်းရီရှိနေသည့် နေရာကိုရှာရန် ဆုံးဖြတ်ထား၏။

သွေးညအကြောက်တရား ပင်လယ်က အလွန်ကျယ်ဝန်းသည့် အတွင်း၌ နတ်ဆိုးဧကရာဇ် များစွာရှိပြီး အနည်းဆုံး ရာချီရှိသည်။ ထို့အပြင် ဤပမာဏသည် သိုင်းပညာရှင်များက ပြုလုပ်သည့် အခြေအမြစ်မဲ့ မှန်းဆချက်များသာဖြစ်သည်။ သွေးညအကြောက် တရားပင်လယ်ကို မည်သူမျှ မကျော်ဖြတ်ရဲသောကြောင့် ပမာဏအတိအကျကို မသိကြပေ။ သွေးညအကြောက်တရား ပင်လယ်၏ အလယ်၍ ကောင်းကင်ကိုဖီဆန်နိုင်သည့် နတ်ဆိုးခွန်အားကို ပိုင်ဆိုင်ထားသော မဟာနတ်ဆိုးတစ်ပါး ရှိသည်ဟု ကောလဟာလရှိ၏။ ၎င်း၏ခွန်အားက အရှေ့ပိုင်း တော်ဝင်နယ်မြေ၏ ဧကရာဇ်ကိုးပါးနှင့် ယှဉ်နိုင်သည်။

ကံကောင်းသည်မှာ ကျန်းရီက မြောက်ဘက်ခြမ်းတွင် ပုန်းနေပြီး အကြောက်တရား ပင်လယ်၏ အလယ်နှင့် အလွန်ဝေးကွာ၏။ သူသည် အကြောက်တရား ပင်လယ်အလယ်တွင် ရှိနေခဲ့လျှင် ရှီးနှင့် ကျန့်မျိုးနွယ်စုမှ သိုင်းပညာရှင်များသည် သတ္တိအဆတစ်ရာ ရှိနေလျှင်တောင် အထဲသို့ မသွားရဲချေ။ ကျန်းရီက သွေးညအကြောက်တရား ပင်လယ်၏ အလယ်သို့ သွားခဲ့လျှင် သူသည်လည်း နတ်ဆိုးဧကရာဇ်များ၏ နုတ်နုတ်စင်းခြင်းကို ခံရပေလိမ့်မည်။

မျိုးနွယ်စုနှစ်စုလုံး၏ သိုင်းပညာရှင်များသည် တစ်ဖက်နှင့်တစ်ဖက် အကြိမ်ပေါင်းများစွာ တွေးမိပြီး တစ်လတာရှာပြီးနောက် စတင်အားလျော့လာသည်။ သို့သော် အငြင်းပွားချက်များကို ပြန်ပို့ပြီးနောက် ရှီးဖေးနှင့် ကျန့်ဝူယင်တို့က သူတို့လူများကို လှုပ်ရှားခိုင်းတော့သည်။ ထို့အပြင် ရှာဖွေမှုအရှိန်ကိုလည်း တိုးစေတော့သည်။

နောက်ရက်အနည်းငယ်အတွင်း ရှီးမျိုးနွယ်စု၏ သိုင်းပညာများသည် ကျန်းရီပုန်းနေသော ပင်လယ်ဒေသနား ကပ်လာပြီဖြစ်သည်။ သူတို့သည် ပင်လယ်နတ်ဆိုးများစွာကို သွေးဆောင်မိစဉ် ရွှေရောင်မျောလွင့်နဂါး နတ်ဆိုးဧကရာဇ်က ကျွန်းထဲသို့သွားပြီး ဖုန်းလန်ဆီ ချက်ချင်း သတင်းပို့လိုက်၏။ ထို့ကြောင့် ဖုန်းလန်သည် သူမလက်ထဲရှိ ကျောက်စိမ်းအဆောင်ကို ချက်ချင်း ဖြိုခွဲလိုက်သည်။

သို့သော် ကျန်းရီက ဘေးကြပ်နံကြပ် ဖြစ်နေလေ၏။

နဂါးညှိုးရော်မြက်ကို အပြည့်အဝ သန့်စင်နိုင်ရန်အတွက် အနည်းဆုံး နောက်ထပ်အချိန် နှစ်ရက်လိုသည်။ သူယခုအချိန်၌ ထွက်သွားခဲ့လျှင် ကျန်ရှိသည့် နဂါးညှိုးရော်မြက်က အချည်းနှီး ဖြစ်သွားပေမည်။ သို့သော် သူမထွက်သွားလျှင် ဖုန်းလန်နှင့် ကျန်သည့်သူများက ရန်သူများကျွန်းကို ရှာတွေ့သွားသည်နှင့် အန္တရာယ် ဖြစ်ပေလိမ့်မည်။

ကျန်းရီသည် အသံကူးပြောင်းရန် စဉ်းစားခဲ့၏။ သူကကူးပြောင်းခဲ့သည်။ သူသည် နောက်ထပ် နှစ်ရက်တာ အချိန်ဆွဲနိုင်ရန်အတွက် အနားရှိ ကောင်းကင်ဧကရာဇ်များကို မျှားသွားရန် ရွှေရောင်မျောလွင့်နဂါးကို ခိုင်းလိုက်သည်။ ဖုန်းလန်၊ ယာ့ဇီသားရဲနှင့် ကျန်သည့်သူများကိုလည်း ဧကရီနန်းတော်ထဲသို့ ပို့လိုက်သည်။

ရောက်လာသည့်သူက ကောင်းကင်ဧကရာဇ် နှစ်ဦးသာဖြစ်သည်။ ကျန်းရီက ဤကျွန်းကိုသူတို့ ရှာတွေ့သွားလျှင်တောင် သူထွက်ပြေးနိုင်မည်ဟု ယုံကြည်ချက်ရှိသည်။

နှစ်ရက်ကြာပြီးနောက် ကျွန်း၏အလယ်စီ လျှပ်စီးပမာ ရွှေရောင်အရိပ်တစ်ရိပ် ပေါ်ထွက်လာ၏။ သူ၏ခန္ဓာကိုယ်၌ သွေးများပြည့်နေပြီး ကျွန်းထဲသို့ ဝင်ရောက်သည်နှင့် အော်လိုက်တော့သည်။

“သခင်ထွက်မလာသေးရင် ကျွန်တော် သေရပါတော့မယ်”

ဘန်း

ပင်လယ်ဧရိယာနှင့် မလှမ်းမကမ်းတွင် သမုဒ္ဒရာရေတို့က ဆူပွက်လာပြီး ရေထဲမှ လူရိပ်နှစ်ရိပ် ထွက်လာသည်။ သူတို့က ရွှေရောင်မျောလွင့်နဂါး သူတို့ကိုလိုက်နေပြီးနောက် ကျွန်းထဲသို့ဝင်ရောက်ပြီး ပျောက်ကွယ်သွားတာကို မြင်တွေ့သည့်အချိန်တွင် စိတ်ရှုပ်ထွေးသွားသည်။ နှစ်ယောက်လုံးက ကျွန်းကိုစစ်ဆေးရန် ကောင်းကင်စိတ်အာရုံကို သုံးလိုက်၏။ မြန်မြန်ဆန်ဆန်ပင် ပြဿနာတစ်ရပ်ကို ရှာတွေ့သွားသည်။ သူတို့လက်ထဲမှ ကျောက်စိမ်းအဆောင်တစ်ခုက ဖြတ်ခနဲ လှုပ်သွားလျှက် ရှီးဖေးဆီသို့ သတင်းပို့လိုက်သည်။ ကျန်သည့်တစ်ယောက်ကမူ သတ်ဖြတ်လိုသည့် ဆန္ဒတို့ဖြင့် သူ၏ခန္ဓာကိုယ်ကို ကာကွယ်ပေးထားကာ ချောက်ချားဖွယ် လေသံဖြင့် ပြောလိုက်သည်။

“နောက်ဆုံးတော့ သူတို့တွေ့ပြီ သတ်”

***