အနန္တတာအိုနိယာမ နယ်ပယ်

ခရမ်းရောင်ဝါးခြံဝင်းတွင်

ထန်ထျန်းနှင့် ဝမ်ကန်းတို့နှစ်ဦးက ရှေးဟောင်းသစ်ပင်ကြီးအောက်ရှိ ကျောက်စားပွဲဘေးတွင် ထိုင်နေကြ၏။

ဂိုဏ်းချုပ်ရာထူးကို အတည်ပြုပြီးနောက် တစ်လကျော် အချိန်ကုန်ဆုံးသွားခဲ့ပြီ ဖြစ်သည်။

ထန်ထျန်း၏ ဦးဆောင်မှုအောက်တွင် တစ်လဟူသော အချိန်တိုအတွင်း၌ ဂိုဏ်းကြီးမှာ တစ်ဖန် ပြုပြင်ပြောင်းလဲမှုများစွာ ပြုလုပ် ခဲ့သည်။

ပထမဆုံးအနေဖြင့် အာဏာတည်ဆောက်ပုံ ကဏ္ဍတွင် အတော်များများ ပြောင်းလဲသွားခဲ့သည်။

ထန်ထျန်းက ဟန်ဟိုင်ကဲ့သို့သော အဆင့်မြင့် အကြီးအကဲ များကို ဖယ်ရှားကာ အာဏာနှင့် ဝေးရာသို့ ပို့ဆောင်ခဲ့ပြီး ကျန်ရှိနေသူများနှင့် အသစ်တိုးမြှင့်ခံရသူများမှာမူ ထန်ထျန်းကို ဗဟိုပြု၍ အားကောင်းသော အဖွဲ့အစည်းတစ်ခုအဖြစ် သဘာဝအလျောက် ပုံပေါ်လာခဲ့သည်။

ဆိုးကျိုးမှာ ဤအာဏာအပြောင်းအလဲကြောင့် လူများစွာအပေါ် သက်ရောက်မှုရှိခဲ့ပြီး ရာထူးချခံရသူ သို့မဟုတ် အာဏာလက်လွတ်ဖြစ်သွားသူများ အများအပြား ရှိနေခြင်းပင် ဖြစ်သည်။

သို့သော် ကောင်းကျိုးမှာမူ အာဏာကို စုစည်းလိုက်ပြီးနောက် တစ်ဂိုဏ်းလုံး၏ လုပ်နိုင်စွမ်းမှာ ယခင်ထက် အဆင့်များစွာ မြင့်မားသွားခဲ့ကာ မကြုံစဖူးသော အခြေအနေသို့ ရောက်ရှိသွားခြင်း ဖြစ်သည်။

မည်သည့်အမိန့်မဆို လျင်မြန်စွာ ပျံ့နှံ့သွားပြီး လက်တွေ့ကျကျ အကောင်အထည်ဖော်နိုင်ခဲ့သည်။

ဒုတိယအချက်မှာ ဂိုဏ်း၏ အရှိန်အဟုန်ဖြင့် တိုးတက်လာမှုပင် ဖြစ်သည်။

ထန်ထျန်းက ရန်ပုံငွေအားလုံးကို တာဝန်ယူလိုက်သည့်အခါ ကြီးကျယ်ခမ်းနားသော ဖွံ့ဖြိုးတိုးတက်ရေးခေတ်ကြီး စတင်လာခဲ့သည်။

အချိန်တိုင်း၌ အကြီးအကဲများနှင့် တပည့်များစွာမှာ ဂိုဏ်းတည်ဆောက်ရေးတွင် ပါဝင်နေကြသည်ကို မြင်တွေ့ရ၏။

အပြင်နယ်မြေချဲ့ထွင်မှုနှင့် စီမံခန့်ခွဲမှုများမှာလည်း အရှိန်အဟုန်ဖြင့် ဆောင်ရွက်နေကြသည်။

ချင်းယွဲ့ဂိုဏ်းတစ်ခုလုံးမှာ စည်ပင်ဝပြောသော အသွင်ဆောင်နေ၏။

ဤအရာအားလုံးမှာ အမှန်စင်စစ် ထန်ထျန်း၏ ဆုံးဖြတ်ချက်နှစ်ခုကြောင့်သာ ဖြစ်သည်။

ဤသည်မှာ အဆင့်အတန်းနှင့် ရာထူးက ပေးစွမ်းနိုင်သော အင်အားကြီးမားသည့် စွမ်းအားပင် ဖြစ်ရာ လူပေါင်းများစွာမှာ ယင်းအတွက်ကြောင့် အသက်ကိုပင် ရင်းခဲ့ကြခြင်းမှာ မဆန်းတော့ပေ။

သို့သော် ထန်ထျန်းအတွက်မူ ဤအာဏာက ပေးသည့် စွမ်းအားမှာ ဆွဲဆောင်မှု သိပ်မရှိလှပေ။

သူက သူ့၏ ကိုယ်ပိုင်အစွမ်းအစကိုသာ ပို၍ အလေးထားသည်။

၎င်းမှာသာ အားကိုးထိုက်ဆုံးသော အခြေခံ ဖြစ်ပေသည်။

ထျန်းဖူနန်းတော် သို့ ထွက်ခွာရန်မှာ ၁၅ ရက်သာ လိုတော့သည်။

ထန်ထျန်းက ဤအချိန်အတွင်း သူ့ ပါရမီနှင့် ခန္ဓာ များကို အထွတ်အထိပ်သို့ ရောက်အောင် ကြိုးစားရန် ဆုံးဖြတ်လိုက်သည်။

သူက အကောင်းဆုံးသော ပုံစံဖြင့် ထျန်းဖူနန်းတော်သို့ ဝင်ရောက်လိုသည်။

"သခင်လေး... တတိယအဆင့် ဝယ်ယူခြင်း အစီအစဉ် ပြီးဆုံးသွားပါပြီ။ အဲ့ဒီ ကုန်သွယ်ရေးအသင်း လေးခုက အခုတော့ သခင်လေးရဲ့ အပိုင် ဖြစ်သွားပါပြီ"

ဝမ်ကန်းက ပြောသည်။

ထန်ထျန်းက ခေါင်းညိတ်ပြ၏။

ဝမ်ကန်းနှင့် ယခင်တစ်ခေါက် ဆွေးနွေးပြီးကတည်းက ဝယ်ယူခြင်း အစီအစဉ် မှာ လျင်မြန်စွာ ဆောင်ရွက်ခဲ့ခြင်း ဖြစ်သည်။

ထိုကုန်သွယ်ရေးအသင်း လေးခုအပြင် အလှမ်းမဝေးသော အခြားကုန်သွယ်ရေးလုပ်ငန်းများကိုလည်း သိမ်းပိုက်ရန် လုပ်ဆောင်နေသည်။

နှစ်လနီးပါး အပြင်းအထန် ချဲ့ထွင်ခဲ့ပြီးနောက် စုစုပေါင်း ရှန့်ထန်းတာအိုကျောက်စိမ်း ၁ သန်း ကျော် သုံးခဲ့ရသည်။

ဂိုဏ်းဖွံ့ဖြိုးရေးအတွက် ထည့်ဝင်မှုများနှင့် ပေါင်းလိုက်လျှင် ထန်ထျန်း၏ လက်ရှိပိုင်ဆိုင်မှုမှာ ရှန့်ထန်းတာအိုကျောက်စိမ်း သုံးသန်းကျော်သွားပြီ ဖြစ်သည်။

သုံးစွဲမှုအမှတ်များမှာလည်း ၁၅၀ ထရီလီယံကျော်အထိ စုဆောင်းမိခဲ့ပြီ ဖြစ်သည်။

နောက်ဆုံးလိုအပ်သော ပါရမီနှင့် ခန္ဓာ တို့အတွက် အလွန် နီးကပ်နေပြီ ဖြစ်သည်။

"ဆက်လုပ်..."

" ၁၅ ရက်အတွင်းမှာ နောက်ထပ် ကုန်သွယ်ရေးအသင်း အနည်းငယ်ကို ထပ်ပြီး ရအောင်ယူလိုက်တာ အကောင်းဆုံးပဲ"

ထန်ထျန်းက ပြောသည်။

သူက ဟင်းလင်းပြင် သားတော် နှင့် ဟင်းလင်းပြင် ခန္ဓာ တို့ကို တစ်ပြိုင်တည်း လဲလှယ်ယူလိုခြင်း ဖြစ်သည်။

သို့သော် ဤညွှန်ကြားချက်မှာ ဝမ်ကန်းအတွက် အခက်တွေ့စေခဲ့သည်။

"သခင်လေး... အဲ့ဒါက နည်းနည်း ခက်ခဲပါလိမ့်မယ်"

ဝမ်ကန်းက ပြော သည်။

ထန်ထျန်းက မျက်ခုံးအသာပင့်၍ "ရန်ပုံငွေ ပြဿနာလို့ ထပ်ပြောဦးမှာလား"

ဝမ်ကန်းက အလျင်အမြန် ခေါင်းခါရင်း "မဟုတ်ပါဘူး၊ ရန်ပုံငွေ ပြဿနာ မဟုတ်ပါဘူး"

သူက နဖူးမှ ချွေးကို အသာသုတ်၍ "ကျွန်တော်တို့ အခုတလော လုပ်တာတွေက အရမ်းကြီးလွန်းနေပါတယ်။ စုစုပေါင်း ပမာဏက ငါးဆထက်မက ချဲ့ထွင်ပြီးပါပြီ။"

" ရန်ပုံငွေက သခင်လေး ရှိပေမဲ့ လူအင်အားပိုင်းကို ကျွန်တော် နည်းလမ်းရှာ ဖြေရှင်းနိုင်ပါတယ်။ "

"ဒါပေမဲ့ ကျွန်တော်တို့ရဲ့ အစွမ်းအစက အကန့်အသတ် ရှိနေပြီး သြဇာလွှမ်းမိုးမှု မလုံလောက်တော့တဲ့အတွက် ဒီနှုန်းအတိုင်း ဆက်ပြီး ချဲ့ထွင်ဖို့ မဖြစ်နိုင်တော့ပါဘူး။ "

"မဟုတ်ရင် ပြဿနာတွေ အများကြီး ပေါ်လာနိုင်ပါတယ်"

ထန်ထျန်းက မေးစေ့ကို ပွတ်လိုက်၏။ ဤသည်မှာ အမှန်တကယ်ပင် ခက်ခဲသော ပြဿနာတစ်ခု ဖြစ်သည်။

လုပ်ငန်းကြီးကို တစ်ပြိုင်တည်း အကြီးကြီး ဖြန့်လိုက်သည့်အခါ အာဏာမစုစည်းနိုင်ခြင်း သို့မဟုတ် အာဏာယိုယွင်းခြင်းများ ကြုံတွေ့ရနိုင်ပေသည်။

ကောင်းကင် အင်မော်တယ် နယ်ပယ်ရှိသော လူအိုကြီး တစ်ဦးတည်းဖြင့် အရာအားလုံးကို ဖိနှိပ်ရန် မဖြစ်နိုင်ပေ။

ခဏမျှ စဉ်းစားပြီးနောက် ထန်ထျန်းက သူ့ အာဏာကို တစ်ဖန် အသုံးချရန် ဆုံးဖြတ်လိုက်သည်။

"ဒီလိုလုပ်မယ်... "

"ချဲ့ထွင်မှုကို မြန်နိုင်သမျှ မြန်မြန် ဆက်လုပ်။"

" ချင်းယွဲ့ဂိုဏ်းရဲ့ အမည်ကို သုံးပြီး ကုန်သွယ်ရေးအသင်းကို ယာယီ စောင့်ရှောက်ပေးမယ်။ နောက်ထပ် လေးငါးခုလောက် ထပ်ပြီး သိမ်းလိုက်ရင် ပြဿနာရှိမှာ မဟုတ်ဘူး"

ထန်ထျန်းက ပြော သည်။

ဝမ်ကန်းက ခဏစဉ်းစားပြီးနောက် ခေါင်းညိတ်လိုက်သည်။

ချင်းယွဲ့ဂိုဏ်း၏ အကာအကွယ် ရှိလာလျှင် ပြဿနာမှာ အတော်များများ ပြေလည်သွားပေလိမ့်မည်။

အပြင်တွင် ချင်းယွဲ့ဂိုဏ်း၏ မျက်နှာကို ဆန့်ကျင်ဝံ့သူ မရှိသလောက်ပင် ဖြစ်သည်။

သို့သော် မတည်ငြိမ်သော အချက်များ ရှိနေဆဲ ဖြစ်ကြောင်း ထန်ထျန်းလည်း သိရှိရာ "နောက်ထပ် ငါးခုလောက် ထပ်သိမ်းပြီးရင် ခဏ ရပ်ထားလို့ ရပြီ။"

" ဒီဘက်က အခြေအနေ တည်ငြိမ်သွားရင် ထျန်းဖူနန်းတော် ဆီကို ငါ့ကို လာ ရှာ။ "

"အဲ့ဒီနေရာက ငါတို့ရဲ့ ထျန်းရှထုန် ကုန်သွယ်ရေးအသင်းရဲ့ စမှတ်အသစ် ဖြစ်လာလိမ့်မယ်"

ထျန်းဖူနန်းတော် ၏ သြဇာနယ်ပယ်မှာ အလွန် ကျယ်ပြောလှသဖြင့် ဆက်လက်ချဲ့ထွင်လိုလျှင်ပင် လက်လှမ်းမမီနိုင်သော အခြေအနေမျိုး ရှိနိုင်ပေသည်။

ထို့ပြင် ၁၅ ရက်အကြာတွင် သူသည် ချင်းယွဲ့ဂိုဏ်းမှ ထွက်ခွာရမည် ဖြစ်သည်။

ထျန်းဖူနန်းတော်ဘက်တွင် အခွင့်အလမ်းများ ပိုမို ရှိနေမည်မှာ သေချာလှသည်။

ဝမ်ကန်းက ခေါင်းညိတ်၍ လက်ခံလိုက်သည်။

ထို့နောက် သူတို့ နှစ်ဦး အခြားအသေးစိတ်များကို ဆွေးနွေးပြီးနောက် ဝမ်ကန်းမှာ နှုတ်ဆက်ကာ ထွက်သွားခဲ့သည်။

ဤ ၁၅ ရက်အတွင်း နောက်ဆုံး လိုအပ်နေသော သုံးစွဲမှုအမှတ်များကို ရရှိရန် သူ မျှော်လင့်နေမိသည်။

စနစ်အတွင်းရှိ စာရင်းကို ကြည့်ပြီးနောက် ထန်ထျန်းမှာ မတ်တတ်ရပ်၍ သူ့ ကျင့်ကြံခန်းသို့ ပြန်လာခဲ့သည်။

ယခုရှိနေသော သုံးစွဲမှုအမှတ်များမှာ အနန္တတာအိုနိယာမ ကို အသေးစား အောင်မြင်မှုအဆင့်သို့ ရောက်အောင် မြှင့်တင်ရန် လုံလောက်နေပြီ ဖြစ်သည်။

တင်ပျဉ်ခွေ ထိုင်လိုက်ပြီးနောက် သူက သုံးစွဲမှုအမှတ် ၄ သိန်းခွဲကို အသုံးပြု၍ အဆင့်မြင့် အင်မော်တယ်ကျင့်စဉ် ကို ၄၅ ကြိမ်တိုင်တိုင် ဉာဏ်အလင်းပွင့် ရန် လဲလှယ်လိုက်သည်။

ထို့နောက် သူက ရွှန်ထျန်းကျဲ မှ ဝယ်လာခဲ့သော အဆင့်မြင့် အင်မော်တယ် ကျင့်စဉ် များကို ထုတ်ယူလိုက်သည်။

"စလိုက်ရအောင်..."

" အသေးစား အောင်မြင်မှုအဆင့် ရှိတဲ့ အနန္တတာအိုနိယာမ က ဘယ်လို အစွမ်း မျိုး ရှိမလဲဆိုတာ ကြည့်ရအောင်"

ထန်ထျန်းက မျက်စိမှိတ်၍ အင်မော်တယ် ကျင့်စဉ် ကို စတင် ကျင့်ကြံ လိုက်သည်။

အဆုံးမဲ့သော ကြယ်တာရာပင်လယ်မှာ သူ၏ ခန္ဓာကိုယ်မှ တစ်ဖန် ဖြန့်ကျက်ထွက်ပေါ်လာပြီး စကြဝဠာ ဟင်းလင်းပြင်ကြီးထဲ ရောက်နေသကဲ့သို့ ဖြစ်နေ၏။

မကြာမီ အချိန်အတွင်းမှာပင် တောက်ပသော ကြယ်တစ်လုံးမှာ ကြယ်တာရာပင်လယ်ထဲမှ ထွက်ပေါ်လာပြီး ယခင်က ကြယ်နှင့်အတူ ယှဉ်တွဲ တည်ရှိနေသည်။

အဆင့်မြင့် အင်မော်တယ် ကျင့်စဉ် တစ်ခုကို အကြီးစား အောင်မြင်မှုအဆင့် အထိ ကျင့်ကြံ နိုင်ခဲ့ပြီ ဖြစ်သည်။

ခဏအကြာတွင် ဒုတိယမြောက် ကြယ်တစ်လုံး ထပ်မံ ထွက်ပေါ်လာသည်။

ထို့နောက် တတိယ၊ စတုတ္ထ...

တောက်ပလာသော ကြယ်များ ပိုမို များပြားလာသည်နှင့်အမျှ နက်နဲလှသော တာအိုအငွေ့အသက် များမှာ ပို၍ ထင်ရှားလာပြီး ထန်ထျန်း၏ ခန္ဓာကိုယ်ပတ်ပတ်လည်တွင် ရစ်ဝိုင်းနေ၏။

ထန်ထျန်းက သူ့ကိုယ်သူ နိယာမများ၏ အထက်တွင် ရပ်နေသကဲ့သို့ ခံစားရပြီး ပတ်ဝန်းကျင်ရှိ အရာအားလုံးကို သူ့လက်ထဲတွင် ဆုပ်ကိုင်ထားနိုင်သည်ဟု ထင်မှတ်ရသည်။

ဒသမမြောက် ကြယ်တစ်လုံး ထွက်ပေါ်လာချိန်တွင် အသံမထွက်သော ဟိန်းဟောက်သံတစ်ခုက နားထဲ၌ ပဲ့တင်ထပ်သွားသည်။

အနန္တတာအိုနိယာမ မှာ အပြင်ရှိ ကောင်းကင်ဘုံ တာအိုနှင့် ထူးဆန်းစွာ ပဲ့တင်ထပ် သွားခဲ့သည်။

နှစ်ခုစလုံးမှာ တစ်ခုကိုတစ်ခု အထောက်အပံ့ပေးနေပြီး ကွဲပြားနေသယောင် ရှိသော်လည်း ပေါင်းစပ်သွားသလိုပင် ဖြစ်သည်။

ဤအခြေအနေတွင် ထန်ထျန်းက မျက်လုံးကို ဖြည်းဖြည်းချင်း ဖွင့်လိုက်သည်။

အလှမ်းမဝေးသော နေရာရှိ သစ်သားစားပွဲတစ်ခုကို ကြည့်ကာ လက်ညှိုးဖြင့် ထိုးလိုက်သည်။

ထူးဆန်းသော အရာတစ်ခု ဖြစ်ပျက်လာ၏။

သေဆုံးနေသည်မှာ နှစ်ပေါင်း ရာချီရှိနေပြီဖြစ်သော သစ်သားစားပွဲမှာ ဤအခိုက်အတန့်တွင် သာမန်မျက်စိဖြင့် မြင်နိုင်သော နှုန်းဖြင့် အသက်ဝင် လာခဲ့သည်။

မကြာမီ အချိန်အတွင်းမှာပင် စားပွဲပေါ်မှ နုနယ်သော သစ်ကိုင်းလေးများ ထွက်ပေါ်လာခဲ့သည်။

နောက်ဆုံးတွင် ဖြူစင်သော ပန်းပွင့်လေးတစ်ပွင့်ပင် ပွင့်လာခဲ့သည်။

ထန်ထျန်းက လက်ညှိုးကို ပြန်ရုပ်သိမ်းလိုက်ပြီး တစ်စုံတစ်ခုကို စဉ်းစားနေ၏။

ယခုလေးတင် သူက အသက်နှင့် ပတ်သက်သော တာအိုကျင့်စဉ် ကို အသုံးမပြုခဲ့ဘဲ သန့်စင်သော နိယာမစွမ်းအားကိုသာ အသုံးပြုခဲ့ခြင်း ဖြစ်သည်။

ဆိုလိုသည်မှာ အနန္တတာအိုနိယာမ အသေးစား အောင်မြင်မှုအဆင့်သို့ ရောက်ပြီးနောက် သူက အင်မော်တယ် နယ်ပယ်တွင် ရှိနေစဉ်မှာပင် နိယာမများကို ထိန်းချုပ်နိုင်စွမ်း ရရှိသွားခြင်း ဖြစ်သည်။

သို့သော် ဤထိန်းချုပ်နိုင်စွမ်းမှာ အနန္တတာအိုနိယာမ ၏ ပတ်ဝန်းကျင် မီတာ ၅၀ ခန့်အတွင်းမှာသာ ကန့်သတ်ထားသည်။

ဤနယ်ပယ်အတွင်းရှိ နိယာမများအောက်တွင် သူက နတ်ဘုရားတစ်ပါးကဲ့သို့ပင် ဖြစ်သည်။

အင်မော်တယ်ဘုရင် များပင်လျှင် သူ့ကို အနိုင် ရရန် မလွယ်ကူပေ။

အင်မော်တယ် အရှင် ဆိုလျှင်ပင် ရင်ဆိုင်တိုက်ခိုက်နိုင်စွမ်း ရှိပေလိမ့်မည်။

"တကယ်ကို ကောင်းတာပဲ"

ထန်ထျန်း၏ နှုတ်ခမ်းထောင့်တွင် ကျေနပ်သော အပြုံးတစ်ခု ပေါ်လာသည်။

ဤ သုံးစွဲမှုအမှတ် ၅၀ ထရီလီယံ မှာ အလဟဿ မဖြစ်ခဲ့ပေ။

ဤနယ်ပယ်က သူ့ကို ကြီးမားသော အကာအကွယ် ပေးစွမ်းနိုင်သည်။

"မင်းကို... "

"အနန္တတာအိုနိယာမ နယ်ပယ် လို့ပဲ ခေါ်မယ်"