အစစ်အမှန်ရည်ရွယ်ချက်မှာ သတ်ဖြတ်ရန်ပင်

ခေါင်းနှစ်လုံးနတ်ဆိုးလူဝံသည် ဆယ်ပေခန့် အရပ်မြင့်မားပြီး ကြီးမားသော ခန္ဓာကိုယ် ကြိတ်ဆုံကျောက် အရွယ်အစားရှိ ခေါင်းနှစ်လုံးနှင့် ခန္ဓာကိုယ်တစ်ခုလုံးတွင် ထူထဲသော အမွှေးအမျှင်များ ဖုံးလွှမ်းနေသည်။

ထိုသားရဲ၏ ကြံ့ခိုင်သော ခန္ဓာကိုယ်သည် သံမဏိဖြင့် သွန်းလုပ်ထားသည့်အလားပင်။

သူ၏အရှိန်အဝါသည် ကြောက်မက်ဖွယ်ကောင်းပြီး မိုးကောင်းကင်အထိ မြင့်တက်နေကာ အလွန်ထိတ်လန့်ဖွယ် ကောင်းပေ၏။

ဆန့်ကျင်ဘက်အားဖြင့် ဆိုရလျှင် စုယဲ့သည် နိမ့်ကျသော နောက်ခံမှ ဆင်းသက်လာသူဖြစ်၍ ငယ်စဉ်ကတည်းက အစားအသောက်နှင့် အဝတ်အစား ချို့တဲ့ခဲ့ကာ အာဟာရချို့တဲ့မှုဒဏ်ကို ပြင်းထန်စွာ ခံစားခဲ့ရသူ ဖြစ်သည်။

မူဖူတောင်တွင် အချိန်တစ်ခုကြာ ပြုစုပျိုးထောင်ခြင်း ခံခဲ့ရသော်လည်း သူသည် ပိန်လှီသေးငယ်နေဆဲဖြစ်ပြီး အရပ် လေးပေခန့်သာ ရှိသေးသည်။

ဤအရွယ်အစား ကွာခြားမှုသည် ကူဝမ်နှင့် ကူလင်းအာတို့ကို စုယဲ့အနေဖြင့် ခေါင်းနှစ်လုံးနတ်ဆိုးလူဝံ၏ တစ်ကိုက်စာပင် ရှိမည်မဟုတ်ဟု ခံစားရစေပေ၏။

သို့သော် ကျုံးချင်က ဤမျှသေးငယ်သော လူတစ်ဦးကို ဤမျှကြောက်စရာကောင်းသည့် နတ်ဆိုးသားရဲနှင့် တစ်ယောက်တည်း ရင်ဆိုင်ခွင့်ပြုလိုက်သည်။

အချိန်တခဏအတွင်း သားအဖနှစ်ဦးလုံးသည် စုယဲ့အတွက် အလွန်အမင်း စိုးရိမ်ပူပန်သွားကြသည်။

"ဂါး..."

ခေါင်းနှစ်လုံးနတ်ဆိုးလူဝံသည် စုယဲ့ထံမှ စိန်ခေါ်မှုကို အာရုံခံမိပြီး ဒေါသတကြီး ဟိန်းဟောက်ကာ သူ့ထံသို့ တန်းတန်းမတ်မတ် ပြေးဝင်လာသည်။

ကြီးမားပြီး လွှမ်းမိုးချုပ်ကိုင်နိုင်သော စွမ်းအားကို သယ်ဆောင်လာသည့် လူဝံ၏ ကြီးမားသော ခန္ဓာကိုယ်သည် တောင်များကို ချေမွှနိုင်ပြီး ကမ်းပါးများကို ချိုးဖျက်နိုင်စွမ်း ရှိပုံရသည်။

ကြောက်မက်ဖွယ်ကောင်းသော နတ်ဆိုးစွမ်းအားများ သားရဲထံမှ ပျံ့နှံ့ထွက်ပေါ်လာပြီး လေဟာနယ်ကိုပင် ပြင်းထန်စွာ တုန်ခါသွားစေသည်။

ထိုသားရဲ၏စွမ်းအားသည် ပြင်းထန်ရုံသာမက အမြန်နှုန်းသည်လည်း လေပြင်းမုန်တိုင်းအလား ပြင်းထန်ကာ လျှပ်စီးကဲ့သို့ လျှင်မြန်သည်။

ခြိမ်းခြောက်လာသော ခေါင်းနှစ်လုံးနတ်ဆိုးလူဝံကို ရင်ဆိုင်ရင်း စုယဲ့သည် ခန္ဓာကိုယ်ကိုကိုင်းလိုက်ပြီး ကျားသစ်တစ်ကောင်ကဲ့သို့ ရှေ့သို့ ပြေးထွက်လိုက်၏။

မျက်စိတစ်မှိတ်အတွင်း နှစ်ဖက်လုံး ထိပ်တိုက်တွေ့ဆုံသွားကြသည်။

"ဝုန်း..."

မြေပြင်တုန်ခါသွားပြီး မိုးမျှော်ရှေးဟောင်းသစ်ပင်ကြီးများ လဲကျသွားသည်။

ကူဝမ်နှင့်ကူလင်းအာတို့ လုံးလုံးလျားလျား ကြောင်အသွားကြ၏။

သူတို့သည် အချိန်မရွေး ဝင်ရောက်ကူညီရန် ပြင်ဆင်ထားခဲ့ကြသည်။

သို့သော် ကလေးတစ်ဦးကဲ့သို့ ဖြစ်နေသေးသော စုယဲ့သည် ချန်ရွှမ်နယ်ပယ် ကျင့်ကြံသူတစ်ဦး ဖြစ်နေသည် မဟုတ်လော...

ချန်ရွှမ်နယ်ပယ်...

ဤသည်မှာ လူအများစု တစ်သက်လုံး မရောက်နိုင်သော ကျင့်ကြံဆင့်နယ်ပယ်တစ်ခုပင်။

ဥပမာအနေဖြင့် ကူဝမ်သည် ဆယ်စုနှစ်များစွာ ကျင့်ကြံခဲ့သော်လည်း ချန်ရွှမ်နယ်ပယ်သို့ ပွတ်ကာသီကာလေးသာ ရောက်ရှိခဲ့သည်။

ကူလင်းအာသည် အသက် ၁၆ နှစ်တွင် ရှန်ထျန်းနယ်ပယ်သို့ ရောက်ရှိခဲ့ပြီး မိသားစုတွင် ရာစုနှစ်တစ်ခုအတွင်း ရှားပါးသော ပါရမီရှင်တစ်ဦးအဖြစ် ချီးကျူးခံထားရသူ ဖြစ်သည်။

သို့သော် တစ်ဖက်လူကမူ...

သူ၏အရိုးသက်တမ်းကို ကြည့်ရသည်မှာ ဆယ်နှစ်သာ ရှိသေးသည် မဟုတ်လော...

ဆယ်နှစ်သားအရွယ် ချန်ရွှမ်နယ်ပယ်ကျင့်ကြံသူ ဆိုသည်မှာ မည်သည့်အရာကို ဆိုလိုသနည်း။

ဤသည်မှာ လောကကြီးထဲမှ သဘာဝလွန် ပါရမီရှင်တစ်ဦးပင်။

သူတို့ကို ပို၍အံ့အားသင့်သွားစေသည်မှာ စုယဲ့သည် ချန်ရွှမ်နယ်ပယ် အစောပိုင်းအဆင့်တွင် ရှိပြီး ခေါင်းနှစ်လုံးနတ်ဆိုးလူဝံသည် ချန်ရွှမ်နယ်ပယ် အလယ်အလတ်အဆင့်တွင် ရှိနေခြင်းပင်။

ယေဘုယျအားဖြင့် နတ်ဆိုးသားရဲများသည် အလွန်သန်မာသော ရုပ်ပိုင်းဆိုင်ရာခွန်အားကို ပိုင်ဆိုင်ကြပြီး အဆင့်တူ လူသားကျင့်ကြံသူများထက် များစွာသာလွန်လေ့ရှိသည်။

သို့သော် ရလဒ်ကမူ စုယဲ့သည် ခေါင်းနှစ်လုံးနတ်ဆိုးလူဝံကို အနိုင်ပိုင်းပြီး ထိုးကြိတ်နေသည်ကို ပြသနေသည်။

ထို့ပြင် ဤသည်က ရုပ်ပိုင်းဆိုင်ရာ ခွန်အား သက်သက်ဖြင့် တိုက်ခိုက်ခြင်း ဖြစ်သည်။

စုယဲ့၏သွေးစွမ်းအင်များ ခန္ဓာကိုယ်အနှံ့ လည်ပတ်နေချိန်တွင် မြစ်ရေဟိန်းသံအလား သွေးရောင်နေမင်းကြီး ပွင့်လန်းလာသည့်အလား အရှိန်အဝါများ ထွက်ပေါ်လာသည်။

သူသည် ရှေးဟောင်းသားရဲငယ်လေး တစ်ကောင်အလား အလွန်စွမ်းအားကြီးပြီး အံ့အားသင့်ဖွယ်ကောင်းသော ခွန်အားများ ရှိနေသည်။

ခေါင်းနှစ်လုံးနတ်ဆိုးလူဝံသည် အစပိုင်းတွင် သူ့အား တိုက်ကွက်အနည်းငယ် ပြန်လှန်တိုက်ခိုက်နိုင်ခဲ့သည်။ သို့သော် လက်သီးချက်အနည်းငယ် ခံလိုက်ရပြီးနောက် သားရဲ၏ခန္ဓာကိုယ်အစိတ်အပိုင်းများစွာသည် သွေးပန်းများ ပွင့်လန်းလာသကဲ့သို့ ပေါက်ကွဲထွက်ကုန်သည်။

ထို့ပြင် သားရဲ၏ အရှိန်အဝါသည်လည်း တိုက်ရိုက်လျော့ကျသွားပေ၏။

နောက်ဆုံးတွင် ခေါင်းနှစ်လုံးနတ်ဆိုးလူဝံသည် ရိုက်နှက်ခံရပြီး သေဆုံးသွားခဲ့သည်။

"ရက်စက်လွန်းတယ်..."

"ကြမ်းတမ်းလွန်းတယ်..."

ဤသည်က ထိုအချိန်က သားအဖနှစ်ဦး၏ အစစ်မှန်ဆုံး အတွေးများပင်။

သူတို့သည် စုယဲ့ထံ၌ အဆုံးမဲ့သော ရှေ့အလားအလာများကို မြင်တွေ့လိုက်ရသည်။

"ဆရာ... တပည့်ရဲ့ စွမ်းဆောင်ရည်က ဘယ်လိုနေလဲ"

စုယဲ့သည် လက်သီးများကို ပြန်ရုတ်သိမ်းလိုက်ပြီး သူ၏ပုံစံတစ်ခုလုံးသည် အပြစ်ကင်းစင်သော အန္တရာယ်ကင်းသော ပုံစံသို့ ပြန်ပြောင်းသွားသည်။

သူသည် အနည်းငယ် ရှက်ရွံနေပုံပင် ပေါက်နေပေ၏။

သူသည် စာမေးပွဲဖြေဆိုပြီးခါစ ကလေးတစ်ဦးက ဆရာ၏အမှတ်ပေးမှုကို စောင့်ဆိုင်းနေသည့်အလားပင်။

"မဆိုးပါဘူး"

ကျုံးချင်က မှတ်ချက်ပေးလိုက်ပြီး ဤရလဒ်အပေါ် များစွာအံ့အားသင့်မှု မရှိပေ။

မည်သို့ပင်ဖြစ်စေ စုယဲ့သည် 'ဧကရာဇ်အဆင့် နည်းစနစ်' ကို ကျင့်ကြံထားသည် မဟုတ်လော....

ဧကရာဇ်အဆင့် နည်းစနစ်များသည် သူ့အတွက် အဆင့်အတန်း သိပ်မရှိသော်လည်း ဂိုဒေါင်ထဲတွင် အိတ်များဖြင့် ထည့်ကာ ဖုန်တက်ခံထားရသော်လည်း...

ထိုအရာသည် စွမ်းအားမကြီးဟု မဆိုလိုပေ။

ဘုရင်အဆင့် နည်းစနစ်တစ်ခု ထွက်ပေါ်လာခြင်းသည် မရေမတွက်နိုင်သော လူများကို လိုချင်တပ်မက်စေပြီး မရေမတွက်နိုင်သော အင်အားစုများကို တိုက်ခိုက်စေရန် လုံလောက်သည်ဆိုလျှင်...

ဧကရာဇ်အဆင့် နည်းစနစ်တစ်ခု ထွက်ပေါ်လာခြင်းသည် ကုန်းမြေတစ်ခုလုံးကို လှုပ်ခါသွားစေရန် လုံလောက်ပေ၏။

ဧကရာဇ်အဆင့် နည်းစနစ်တစ်ခုသည် မဟာဧကရာဇ်တစ်ပါး လျှောက်လှမ်းခဲ့သော လမ်းကြောင်းကို ကိုယ်စားပြုသည်ဟု ဆိုနိုင်သည်။

မွန်းစတားအိုကြီးများ၏ အထက်တွင် ရပ်၍ ကျင့်ကြံခြင်း အခက်အခဲများကို တိုက်ထုတ်ခြင်းနှင့် အဆင့်တူ ပြိုင်ဘက်များကို ချေမှုန်းခြင်းတို့သည် အခြေခံလုပ်ဆောင်ချက်များသာ ဖြစ်သည်။

တခြားတစ်ဖက်တွင် စုယဲ့၏လုပ်ရပ်များက ကူဝမ်နှင့်ကူလင်းအာကို အံ့အားသင့်မှင်သက်သွားစေခဲ့သည်။

ကျုံးချင်၏ မှတ်ချက်များကမူ သူတို့ကို လုံးလုံးလျားလျား သိမ်ငယ်သွားစေသည်။

ချန်ရွှမ်နယ်ပယ် အစောပိုင်းအဆင့် ကျင့်ကြံဆင့်ဖြင့် အလယ်အလတ်အဆင့် နတ်ဆိုးသားရဲတစ်ကောင်ကို အနိုင်ယူသတ်ဖြတ်နိုင်ခြင်းက "မဆိုးဘူး" ဟု ဆိုသလော....

'ဒါဆို ငါတို့က ဘာတွေလဲ....'

'အသုံးမကျတဲ့လူတွေလား....'

ဤအချိန်တွင် သားအဖနှစ်ဦးသည် သွယ်ဝိုက်သောနည်းဖြင့် စော်ကားခံလိုက်ရသကဲ့သို့ ခံစားလိုက်ရသည်။

အထူးသဖြင့် ကူလင်းအာပင်။

သူမသည် အသက် ၂၀ တွင် ရှန်ထျန်းနယ်ပယ်သို့ ရောက်ရှိခဲ့သည်။

သူမကို မိသားစု၏ ရာစုနှစ်တစ်ခုအတွင်း ရှားပါးသော ပါရမီရှင်တစ်ဦးအဖြစ် ချီးကျူးခဲ့ကြ၏။

သို့ရာတွင် ပစ္စည်းချင်းယှဉ်ရင် လွှင့်ပစ်ချင်စရာ လူချင်းယှဉ်ရင် ဒေါသထွက်စရာ ကောင်းလှသည်။

စုယဲ့နှင့် ယှဉ်လိုက်လျှင် ပါရမီရှင်ဟူသော သူမသည် အမှန်တကယ်ကို သူ၏ဖိနပ်အား သယ်ပေးရန်ပင် မတန်ချေ။

ထို့ပြင် ကျုံးချင်၏မှတ်ချက်ကို စုယဲ့က အပြည့်အဝ သဘောတူပြီး သူ တိုးတက်ရန် များစွာလိုသည်ဟု ယုံကြည်နေခြင်းက ကူလင်းအာ၏နှလုံးသားကို ပြင်းထန်သော တိုက်ခိုက်မှုများ ဆက်တိုက်ပြုလုပ်လိုက်သကဲ့သို့ ဖြစ်သွားသည်။

သေချာသည်မှာ သူတို့သည် စိတ်ဓာတ်ကျနေသည့်ကြားမှ သားအဖနှစ်ဦးသည် ထွက်ပေါက်အတွက် ပို၍ကြီးမားသော မျှော်လင့်ချက်ကို မခံစားဘဲ မနေနိုင်ကြချေ။

စုယဲ့သည် ဤမျှထိ ထူးချွန်ပြောင်မြောက်နေသဖြင့် သူ၏ဆရာ ကျုံးချင်သည် အားနည်းနေမည်လော....

ဤကဲ့သို့ တပည့်မျိုးကို သင်ကြားပေးနိုင်သည်အား ကြည့်လျှင် ကျုံးချင်၏ အထောက်အထားက ပြောစရာမလိုအောင် သိသာထင်ရှားနေသည်။

ဤလူသည် ကြောက်စရာကောင်းသော ထိပ်သီးကျင့်ကြံသူတစ်ဦး ဖြစ်ရပေမည်။

သူတို့၏ စိတ်ခံစားချက်များ အတက်အကျ ဖြစ်နေစဉ်၌.....

ကျုံးချင်က သူတို့သုံးဦးကို ခရီးဆက်ရန် အချက်ပြလိုက်သည်။

ကူဝမ်နှင့် ကူလင်းအာတို့သည် မူလက ဤနေရာကို မရေမတွက်နိုင်အောင် ဖြတ်သန်းခဲ့ကြပြီး မရေမတွက်နိုင်သော ဦးတည်ချက်များကို စမ်းသပ်ခဲ့ကြသည်။

သို့သော် သူတို့ မည်သို့မျှ ထွက်ခွာနိုင်ခြင်း မရှိခဲ့ပေ။

ယခုတစ်ကြိမ်တွင် ကျုံးချင်၏ လမ်းညွှန်မှုအောက်၌ သူတို့သည် ပေတစ်ရာခန့်သာ ခရီးနှင်ပြီးနောက် ထင်ယောင်ထင်မှားဝင်္ကပါထဲမှ တိုက်ရိုက်ထွက်ခွာနိုင်ခဲ့ကြသည်။

"ငါ... ငါတို့ ထွက်လာနိုင်ပြီ"

အဝေးမှ စီးဆင်းနေသော စမ်းချောင်းလေးကို ကြည့်ရင်း သားအဖနှစ်ဦးသည် စိတ်လှုပ်ရှားလွန်း၍ မျက်ရည်များဝဲလာကာ သူတို့၏မျက်လုံးများထဲတွင် မယုံကြည်နိုင်မှုများ ပြည့်နှက်နေသည်။

သူတို့သည် ဤစမ်းချောင်းလေးကို ကောင်းစွာရင်းနှီးပေ၏။

ဤနေရာသည် သူတို့ ရောက်ရှိလာစဉ်က မဟာဝင်္ကပါအတွင်းသို့ ဝင်ရောက်ခဲ့သော နေရာအတိအကျပင်။

ကျုံးချင်နောက်သို့လိုက်လျှင် ထွက်ပေါက်တွေ့နိုင်မည်ဟု သူတို့ တွေးထင်ခဲ့သော်လည်း သူတို့ကို နှစ်ဝက်ကြာ ပိတ်လှောင်ထားသော မဟာဝင်္ကပါကြီးထဲမှ ဤမျှလွယ်ကူစွာ ထွက်ခွာနိုင်လိမ့်မည်ဟု လုံးဝမျှော်လင့်မထားခဲ့မိပေ။

ကျုံးချင်၏ရှေ့မှောက်တွင် ဤမဟာဝင်္ကပါသည် အလုပ်မလုပ်တော့သည့်အလားပင်။

"ဒါက ဘယ်လိုနည်းလမ်းမျိုးလဲ"

ကူဝမ်နှင့်ကူလင်းအာတို့သည် ကျုံးချင်ကို ရိုသေလေးစားစွာ ကြည့်လိုက်ကြ၏။

"အသက်ကယ်ပေးတဲ့အတွက် ကျေးဇူးတင်ပါတယ် စီနီယာ..."

သားအဖနှစ်ယောက်သား ချက်ချင်းပင် အလေးအနက် ဦးညွှတ်လိုက်ကြသည်။

ယခင်က ကျုံးချင်၏ အဆင့်အတန်းကို မသိ၍ တာအိုရောင်းရင်းဟု ခေါ်ဆိုခဲ့ခြင်းမှာ နားလည်ပေးနိုင်သော ကိစ္စဖြစ်သည်။

ယခု သူ၏ ထူးခြားသော သဘာဝကို သိသွားပြီဖြစ်၍ သဘာဝကျစွာပင် လေးစားသမှုဖြင့် ခေါ်ဝေါ်ရပေမည်။

ကျုံးချင်သည် ဤအရာများကို သိပ်ပြီးဂရုမစိုက်ပေ။

"ဒါက သေးငယ်တဲ့ အားထုတ်မှုလေးပါ... ယဉ်ကျေးနေဖို့ မလိုပါဘူး"

"စီနီယာအတွက်တော့ သေးငယ်တဲ့ အားထုတ်မှုလေးပါ... ဒါပေမယ့် ကျွန်တော်တို့သားအဖ အတွက်တော့ ကြီးမားတဲ့ ကယ်တင်ရှင်ပါပဲ"

ကူဝမ်က လေးလေးစားစား ပြောဆိုလိုက်သည်။

"စီနီယာရဲ့ အသက်ကယ်ကျေးဇူးကို ကျွန်တော်တို့ ဘယ်တော့မှ မမေ့ပါဘူး"

"စီနီယာ... ကျွန်တော့်မှာ ကောင်းကင်စိတ်ဝိညာဉ်မြက်ပင် တစ်ပင် ရှိပါတယ်... စီနီယာ လက်ခံပေးဖို့ မျှော်လင့်ပါတယ်"

ဤကောင်းကင်စိတ်ဝိညာဉ်မြက်သည် သူတို့၏မိသားစုတွင် လက်ဆင့်ကမ်းလာခဲ့သော အရာဖြစ်ပြီး ဆေးလုံးများ သန့်စင်ရာတွင် အရေးပါသော ပစ္စည်းတစ်ခုဖြစ်သည်ဟု ကောလာဟလများ ရှိသည်။ ဤပစ္စည်းသည် သူတို့အတွက် အလွန်တန်ဖိုးရှိသည်မှာ သေချာပေါက်ပင်။

ထိုအရာသည် သူတို့နှစ်ဦးထံတွင် ပါသော တန်ဖိုးအရှိဆုံး ပစ္စည်းလည်း ဖြစ်သည်။

သို့သော် ပစ္စည်းသည် မည်မျှထိ တန်ဖိုးရှိစေကာမူ အသက်ကယ်ကျေးဇူးနှင့် ယှဉ်လျှင် ပြောပလောက်သည် မဟုတ်ပေ။

တိုက်ဆိုင်စွာပင် ကျုံးချင်သည် မကြာသေးမီက ဆေးပညာကို စွဲလမ်းနေခဲ့သည်။

ဤကောင်းကင်စိတ်ဝိညာဉ်မြက်သည် ရှာဖွေရန် အလွန်ခက်ခဲပြီး ဆေးနည်းတစ်မျိုးအတွက် အဓိကပါဝင်ပစ္စည်းအဖြစ် ပြီးပြည့်စုံစွာ အသုံးပြုနိုင်သည်။

ကူဝမ်က အတင်းအကြပ် ပေးနေသည်ကို တွေ့ရသဖြင့် သူ ငြင်းဆန်မနေတော့ပေ။

"အဲ့ဒီလိုဆိုရင်တော့... ငါ လက်ခံလိုက်ပါမယ်"

နှစ်ဖက်လုံး ယဉ်ကျေးသော စကားများ ဖလှယ်ကြပြီးနောက် တစ်ဦးနှင့်တစ်ဦး နှုတ်ဆက်ကာ လမ်းခွဲလိုက်ကြသည်။

ကျုံးချင်အတွက်မူ ဤကိစ္စသည် သူ၏ခရီးလမ်းပေါ်မှ ကြားဖြတ်ဇာတ်လမ်းတိုလေး တစ်ပုဒ်မျှသာ ဖြစ်ပြီး မကြာခင်မှာပင် သူ မေ့ပျောက်သွားခဲ့သည်။

ဤတစ်ကြိမ်တွင် သူ၏အဓိကရည်ရွယ်ချက်မှာ သတ်ဖြတ်ရန်ပင်။