အခန်း (၁၂၄၄-၁၂၄၆)

အခန်း (၁၂၄၄) သံယောဇဉ်အကြောင်း မပြောကြေး

ရှန်ဟိုင်းမော်တော်ကားအုပ်စုမှ ဥက္ကဋ္ဌကျိုးနှင့် လီမင်တေတို့၏ မေးခွန်းထုတ်မှုများကြောင့် ယခုတစ်ကြိမ် အမေးအဖြေကဏ္ဍသည် လျင်မြန်စွာပင် ပြီးဆုံးသွားခဲ့လေသည်။ ဥက္ကဋ္ဌကျောက်၏မျက်နှာတွင် ယခင်ကကဲ့သို့ ယုံကြည်ချက်အပြည့်ရှိသော အမူအရာများ မရှိတော့ဘဲ အနေခက်ဟန်များသာ လွှမ်းမိုးနေတော့သည်။

“လောင်မင်... ဒီတစ်ခေါက် နှီးနှောဖလှယ်ပွဲကို ပင်းစီးတီးမှာ မကျင်းပဖြစ်လို့ ခင်ဗျား စိတ်ထဲမှာ မကျေမနပ်ဖြစ်နေတာ ကျွန်တော် သိပါတယ်။ ဒါပေမဲ့ မျက်နှာချင်းဆိုင်ကြီးတော့ အခုလို အရှက်ခွဲစရာ မလိုပါဘူး” ဝန်ကြီးဌာနမှ အရာရှိဖြစ်သလို မော်တော်ကားစက်မှုလုပ်ငန်းရှင်များအသင်း၏ ဥက္ကဋ္ဌလည်းဖြစ်သူ ဝမ်တုန်းဟွေးက လာရောက်ဖျန်ဖြေလေသည်။

“ဥက္ကဋ္ဌဝမ်... ကျွန်တော့်စိတ်ထဲမှာ မကျေမနပ်ဖြစ်တာကတော့ အမှန်ပဲ၊ ဒါပေမဲ့ အဲဒီလောက်ထိတော့ မဟုတ်ပါဘူး။ ပြဿနာက သူတို့တွက်ချက်ထားတဲ့ အချက်အလက်တွေက မှားနေတာလေ၊ အဲဒါကို သူတို့က မဝန်ခံကြဘူး။ အဲဒီအချက်အလက်တွေကို အရင်ကတည်းက ကျွန်တော်တို့ဘက်က FAW ကို ပေးထားပြီးသား။ သူတို့က တမင်သက်သက် ပြောင်းလဲပစ်လိုက်တာလေ၊ အဲဒါကို ဘယ်လို ရှင်းပြမလဲ” လီမင်တေက ပြန်လည်မေးခွန်းထုတ်လိုက်သည်။

“စာရင်းဇယားတွေ တွက်ချက်တဲ့အခါမှာ အမှားအယွင်း ရှိတာမျိုးကတော့ မရှောင်သာပါဘူး။ နောက်မှ ကျွန်တော် သူ့ကို သေချာပြောလိုက်ပါ့မယ်” ဝမ်တုန်းဟွေးက ကြားဝင်စေ့စပ်ပေးသည့်အနေဖြင့် ပြောလိုက်သည်။

လီမင်တေသည် ခနဲ့တဲ့တဲ့ ရယ်မောလိုက်ပြီး ဘာမှထပ်မပြောတော့ပေ။ စာရင်းတွက်တာ မှားတာဆိုတဲ့စကားကို ကိုယ်တိုင်ရော ယုံရဲ့လား။

တရုတ်နိုင်ငံတွင် ကိုယ်ပိုင်အမှတ်တံဆိပ်ရှိသော မော်တော်ကားထုတ်လုပ်ရေး ကုမ္ပဏီကြီးငယ် ဒါဇင်ပေါင်းများစွာ ရှိနေသလို၊ အပိုပစ္စည်း ထုတ်လုပ်သည့် စက်ရုံများစွာလည်း ရှိနေသည်။

လက်ရှိ တရုတ်နိုင်ငံ၏မော်တော်ကားလုပ်ငန်းကဏ္ဍသည် နေ့စဉ်နှင့်အမျှ တိုးတက်ပြောင်းလဲနေသည်ဟု ဆိုနိုင်ပေသည်။ နိုင်ငံခြားကုမ္ပဏီများနှင့် ပူးပေါင်းဆောင်ရွက်ခြင်းကြောင့် သူတို့၏နည်းပညာများသည်လည်း လျင်မြန်စွာ တိုးတက်လာခဲ့သည်။ ယခင်က နိုင်ငံခြားမှာသာ ထုတ်လုပ်နိုင်သည့် တိကျသော စက်ပစ္စည်းအစိတ်အပိုင်းများကို ယခုအခါ ပြည်တွင်း၌ပင် ထုတ်လုပ်နိုင်နေပြီ ဖြစ်သည်။

သို့သော် တရုတ်မော်တော်ကား ကုမ္ပဏီများနှင့် နိုင်ငံခြားကုမ္ပဏီကြီးများအကြား ကွာဟချက်မှာ ထင်ရှားနေဆဲပင်။ အချက်အလက်တစ်ခုတည်းဖြင့်ပင် အခြေအနေကို သိရှိနိုင်ပေသည်။ Toyota ကုမ္ပဏီ တစ်ခုတည်း၏ နှစ်စဉ် ထုတ်လုပ်မှုနှင့် ရောင်းအားသည် တရုတ်နိုင်ငံရှိ ကားကုမ္ပဏီအားလုံး၏ စုစုပေါင်းထက် နှစ်ဆနီးပါး သာလွန်နေလေသည်။

ပင်းစီးတီး စက်မှုထုတ်လုပ်ရေး ကုမ္ပဏီအုပ်စုသည် ပြည်ပသတင်းအချက်အလက်များကို အမြဲမပြတ် စုဆောင်းနေခဲ့သလို အခြားသော ကုမ္ပဏီများလည်း ထိုသို့ပင် လုပ်ဆောင်ကြလိမ့်မည်ဟု ယုံကြည်ရသည်။ သို့သော် သူတို့သည် မိမိတို့၏ တိုးတက်မှုများကိုသာ မြင်တွေ့နေကြပြီး၊ ကမ္ဘာ့ထိပ်တန်း ကုမ္ပဏီကြီးများနှင့် ကွာဟချက် ကြီးမားနေသေးသည်ကိုမူ သတိမမူမိကြပေ။

အကယ်၍ ယခုအချိန်တွင် ကိုယ့်ကိုယ်ကိုယ် ကျေနပ်သာယာနေကြမည်ဆိုပါက အနာဂတ်တွင် နိုင်ငံခြားကုမ္ပဏီများ၏ ဖိနှိပ်မှုကို ဆက်လက်ခံနေရဦးမည်သာ ဖြစ်သည်။

နေ့လယ်စာ စားသောက်ပြီးနောက် နှီးနှောဖလှယ်ပွဲကို ဆက်လက်ကျင်းပခဲ့သည်။ သို့သော် ယခုတစ်ကြိမ် နှီးနှောဖလှယ်ပွဲတွင် အခြားသော ရည်ရွယ်ချက်တစ်ခုလည်း ရှိနေသေးရာ ၎င်းမှာ နောက်ဆက်တွဲ ကုန်ကြမ်းနှင့် အပိုပစ္စည်း ထောက်ပံ့သည့် စက်ရုံများအတွက် မော်တော်ကားကုမ္ပဏီကြီးများနှင့် ချိတ်ဆက်ကာ အော်ဒါများ ရရှိနိုင်မည့် အခွင့်အရေးကို ဖန်တီးပေးခြင်းပင် ဖြစ်သည်။

ပင်းစီးတီး စက်မှုထုတ်လုပ်ရေး အုပ်စုပင်လျှင် ကားအစိတ်အပိုင်းအားလုံးကို ကိုယ်တိုင်ထုတ်လုပ်သည် မဟုတ်ဘဲ အချို့ကို အပြင်ကုမ္ပဏီများသို့ အပ်နှံလုပ်ကိုင်ရသည်။ သို့သော် ကုမ္ပဏီအများစုမှာ ပင်းစီးတီး စက်မှုအုပ်စုနှင့် ပူးပေါင်းဆောင်ရွက်ရသည်ကို သိပ်ပြီး မပျော်ပိုက်ကြပေ။ အကြောင်းမှာ ပေးသည့်ဈေးနှုန်း အလွန်နည်းပါးသောကြောင့် ဖြစ်သည်။

အမြတ်အစွန်းတော့ ကျန်အောင် လုပ်ပေးထားသော်လည်း အခြားကုမ္ပဏီများပေးသော အမြတ်ထက် နည်းပါးလှသည်။ သို့သော် သူတို့ မည်သို့ပင် ကြိုးစားညှိနှိုင်းစေကာမူ ပင်းစီးတီးဘက်က ဈေးတိုးပေးလေ့ မရှိပေ။

ခင်ဗျားတို့ မလုပ်ချင်လည်း လုပ်ချင်တဲ့သူတွေ တန်းစီနေတာပဲလေ။ ဒီဈေးနှုန်းက အမြတ်ကျန်အောင် တွက်ပေးထားပြီးသားပဲ၊ အပိုပစ္စည်းထုတ်တဲ့ ကုမ္ပဏီလုပ်ပြီးတော့ အမြတ်ကြီးစား ချင်နေလို့ ဘယ်ဖြစ်မလဲ။

ပင်းစီးတီး စက်မှုထုတ်လုပ်ရေး အုပ်စုဆီမှ အော်ဒါများမှာ အမှန်တကယ်ပင် များပြားလှသဖြင့်သာ ထိုကုမ္ပဏီများမှာ ဆက်လက်လုပ်ကိုင်နေကြခြင်း ဖြစ်သည်။ အော်ဒါပမာဏ များပြားခြင်းက သူတို့အတွက် ပုံမှန်ဝင်ငွေကို ရရှိစေသည်ကိုတော့ သူတို့ ဝန်ခံကြရသည်။ ထို့ပြင် ကုန်ကြမ်းဈေးနှုန်းများ တက်လာပါကလည်း ပင်းစီးတီး စက်မှုအုပ်စုက ဈေးနှုန်းကွာဟချက်ကို ပြန်လည်ညှိနှိုင်း ပေးတတ်သဖြင့် အတော်လေး လူသားဆန်သည်ဟု ဆိုနိုင်ပေသည်။

ယခုလည်း စက်ရုံအသေးစားလေးအချို့သည် လီမင်တေထံသို့ လာရောက်ဆက်သွယ်ကြသော်လည်း လီမင်တေက ငြင်းပယ်လိုက်သည်။ ပင်းစီးတီး စက်မှုအုပ်စု၏အပိုပစ္စည်း ထောက်ပံ့သူများသည် အတိုင်းအတာတစ်ခုအထိ အင်အားရှိရပေမည်။ မြို့နယ်အဆင့် စက်ရုံငယ်လေးများ၏ ထုတ်လုပ်နိုင်စွမ်းမှာ နည်းပါးလှသဖြင့် ထည့်သွင်းစဉ်းစားစရာ မလိုပေ။

“ဥက္ကဋ္ဌလီကတော့ တကယ်ကို သတ္တိရှိတာပဲ။ ဒီစက်ရုံငယ်လေးတွေကိုတော့ အဖက်တောင် မလုပ်ဘူးပဲ” ဥက္ကဋ္ဌကျောက်က လီမင်တေ၏ဘေးသို့ လျှောက်လာပြီး စိန်ခေါ်သည့် လေသံဖြင့် ပြောလိုက်သည်။

“ဥက္ကဋ္ဌကျောက်က ပူးပေါင်းလို့ရတယ်လို့ ယူဆရင် FAW ကနေ သူတို့ကို အော်ဒါတွေ ပေးလိုက်ပါလား” လီမင်တေက ပြန်လည်တိုက်စစ်ဆင်လိုက်သည်။

ဥက္ကဋ္ဌကျောက်သည် ဟားဟား တစ်ချက် ရယ်လိုက်ပြီး ဘာမှထပ်မပြောတော့ပေ။

ထိုစက်ရုံငယ်လေးများ၏ နည်းပညာ ညံ့ဖျင်းသည်ကို ထားပါဦး၊ ထုတ်လုပ်နိုင်စွမ်းလည်း မရှိသည့်အပြင် အလှမ်းဝေးကွာသဖြင့် သယ်ယူပို့ဆောင်ရေး စရိတ်ကပင် မနည်းလှရာ တွက်ခြေကိုက်မည် မဟုတ်ပေ။

အထက်လူကြီးများက ထိုစက်ရုံငယ်များကို ကူညီရန် ညွှန်ကြားထားသော်လည်း၊ သူတို့ကို ကူညီရန်အတွက် မိမိတို့က အရှုံးခံ၍ မရပေ။

“လောင်မင်... ကျွန်တော်တို့ကြားမှာ ပူးပေါင်းဆောင်ရွက်မှုတွေ လုပ်လို့ရတာပဲ။ ဥပမာ နည်းပညာဖလှယ်တာမျိုး၊ ဖြန့်ချိရေးလမ်းကြောင်းတွေ ဖလှယ်တာမျိုးပေါ့” ဥက္ကဋ္ဌကျောက်က စကားလမ်းကြောင်း ပြောင်းလိုက်သည်။

လီမင်တေက ဥက္ကဋ္ဌကျောက်ကို တစ်ချက်ကြည့်လိုက်ပြီး ပြန်ပြောလိုက်သည်။ “နည်းပညာဖလှယ်မယ် ဟုတ်လား။ ဘာတွေ ဖလှယ်မှာလဲ။ FAW မှာ ကျွန်တော်တို့ ကုမ္ပဏီအတွက် တကယ်လိုအပ်တဲ့ နည်းပညာ ရှိနေတယ်လို့ ကျွန်တော် မထင်ဘူး”

“ဟေ့... လောင်မင်၊ အချို့သော နယ်ပယ်တွေမှာတော့ ကျွန်တော်တို့က ခင်ဗျားတို့ထက် ပိုတော်တယ်ဆိုတာတော့ ဝန်ခံရမယ်နော်”

“ဥပမာ ဘာတွေလဲ”

“တာယာနည်းပညာတို့၊ ကားကိုယ်ထည် ကုန်ကြမ်းနည်းပညာတို့၊ ပြီးတော့ Piston နည်းပညာတွေပေါ့”

“ဩော်... ဒါဆို ခင်ဗျားက ကျွန်တော်တို့ဆီက ဘယ်နည်းပညာကို လိုချင်လို့လဲ”

“ခင်ဗျားတို့ ကုမ္ပဏီရဲ့ အင်ဂျင်နည်းပညာက မဆိုးဘူးလို့ ထင်တယ်၊ ကျွန်တော်တို့နဲ့ ဖလှယ်ကြည့်ရင်ရော ဘယ်လိုလဲ” ဥက္ကဋ္ဌကျောက်က သူ၏ ရည်ရွယ်ချက်အစစ်အမှန်ကို ထုတ်ပြောလိုက်လေသည်။

လီမင်တေသည် ဥက္ကဋ္ဌကျောက်ကို အထင်သေးစွာ ကြည့်လိုက်သည်။ ငါတို့ရဲ့ အင်ဂျင်နည်းပညာကို ခင်ဗျားတို့ရဲ့ အသုံးမကျတဲ့ နည်းပညာတွေနဲ့ လာလဲမယ် ဟုတ်လား။ တော်တော်လေး အိပ်မက်ယဉ်နေတာပဲ။

ထိုနည်းပညာအချို့မှာ သူတို့က သာလွန်နိုင်သော်လည်း၊ ပိုက်ဆံပေးဝယ်လျှင်လည်း ထိုမျှမများလှသလို လျှို့ဝှက်နည်းပညာများလည်း မဟုတ်ပေ။ သို့သော် အင်ဂျင်နည်းပညာမှာမူ လုံးဝ မတူညီပေ။ သုတေသန စရိတ် မြင့်မားသည်ကို ထားပါဦး၊ နည်းပညာပိုင်းအရလည်း အလွန်ခက်ခဲလှသည်။

“ဖလှယ်ဖို့ဆိုတာကတော့ မဖြစ်နိုင်ပါဘူး။ တကယ်လို့ ခင်ဗျားတို့ စိတ်ဝင်စားတယ်ဆိုရင်တော့ အင်ဂျင်နည်းပညာကို အသုံးပြုခွင့် ပေးနိုင်ပါတယ်။ ဒါပေမဲ့ ငွေကြေးကတော့ ဈေးကွက်ပေါက်ဈေးအတိုင်းပဲ ဖြစ်ရလိမ့်မယ်။ မမေ့ပါနဲ့ဦး... ဒီနည်းပညာမျိုးကို တခြားဘယ်ကုမ္ပဏီဆီကမှ ခင်ဗျားတို့ ဝယ်လို့ရမှာ မဟုတ်ဘူး” လီမင်တေက ပြုံးစစဖြင့် ပြောလိုက်သည်။

နိုင်ငံခြားမှ နည်းပညာ ပိတ်ဆို့မှုများ၊ အထူးသဖြင့် စက်မှုနည်းပညာ ပိတ်ဆို့မှုများသည် တရုတ်နိုင်ငံအပေါ် အလွန်ပြင်းထန်လှသည်။ တရုတ်နိုင်ငံသည် ယခင်က ဂျပန်နှင့် ဘာကြောင့် သံတမန်ဆက်ဆံရေး ထူထောင်ပြီး ဆက်ဆံရေး ကောင်းမွန်အောင် လုပ်ခဲ့ရသနည်း။ အနောက်နိုင်ငံများက ပိတ်ဆို့ထားသော နည်းပညာအချို့ကို ဂျပန်ထံမှ ရရှိနိုင်ရန်မှာ အဓိက အကြောင်းရင်းတစ်ခု ဖြစ်ခဲ့သည်။

ယခုအခါ ပိတ်ဆို့မှုများမှာ ယခင်ကလောက် မပြင်းထန်တော့သလို၊ တရုတ်နိုင်ငံ၏ စက်မှုနည်းပညာအချို့သည်လည်း တိုးတက်လာခဲ့ပြီ ဖြစ်သည်။ သို့သော် အနည်းဆုံး မော်တော်ကား စက်မှုလုပ်ငန်းတွင်မူ ကမ္ဘာ့ထိပ်တန်း ကုမ္ပဏီကြီးများနှင့် နည်းပညာ ကွာဟချက် ကြီးမားနေဆဲပင် ဖြစ်သည်။

လီမင်တေ၏ စကားကို ကြားသောအခါ ဥက္ကဋ္ဌကျောက်၏ မျက်နှာမှ အပြုံးများ ပျောက်ကွယ်သွားပြီး စိတ်ထဲမှလည်း မြေခွေးအိုကြီးဟု ကျိန်ဆဲနေတော့သည်။ ပိုက်ဆံပေးဝယ်ရမယ်ဆိုရင် ဘယ်လောက်တောင် ပေးရမှာလဲ။ ပြီးတော့ ခင်ဗျားတို့က နိုင်ငံခြားသားတွေလိုပဲ မကောင်းကြံပြီး ခေတ်နောက်ကျနေတဲ့ နည်းပညာတွေ၊ ဒါမှမဟုတ် အသုံးမကျတော့တဲ့ နည်းပညာတွေကို လာရောင်းနေမလား ဘယ်သူသိမှာလဲ။

“လောင်မင်... ဒီလိုတော့ မပြောပါနဲ့။ ကျွန်တော်တို့ ညီအစ်ကို ဌာနတွေကြားမှာ ဘာမဆို ပိုက်ဆံနဲ့ပဲ တွက်နေလို့ ဘယ်ဖြစ်မလဲ။ ပိုက်ဆံအကြောင်းပြောရင် သံယောဇဉ်တွေ ပျက်ကုန်မှာပေါ့။ ကျွန်တော်တို့ကြားမှာ ညီအစ်ကို သံယောဇဉ်တွေ ရှိသေးတယ် မဟုတ်လား”

လီမင်တေက ဥက္ကဋ္ဌကျောက်ကို တစ်ချက်ကြည့်လိုက်ပြီး အေးစက်စက် လေသံဖြင့် တုံ့ပြန်လိုက်သည်။”သံယောဇဉ်အကြောင်း ပြောရင် ပိုက်ဆံ ထိခိုက်တာပေါ့။ ကျွန်တော့်မှာ ကုမ္ပဏီအပေါ် တာဝန်ရှိသလို ရှယ်ယာရှင်တွေနဲ့ ဝန်ထမ်းတွေ အားလုံးအပေါ်မှာလည်း တာဝန်ရှိတယ်။ တော်တဲ့ စီမံခန့်ခွဲသူဆိုတာ အလုပ်ထဲမှာ ပုဂ္ဂိုလ်ရေး ခံစားချက်တွေကို ဘယ်တော့မှ ရောထွေးမှာ မဟုတ်ဘူး”

ဥက္ကဋ္ဌကျောက်သည် ဒေါသထွက်လွန်းသဖြင့် အော်ဟစ်ဆဲဆိုချင်စိတ်များ ပေါက်လာတော့သည်။ မလဲချင်ရင်လည်း မလဲဘူးပေါ့၊ ဘာလို့ ငါ့ကို လာပြီး ဆရာလုပ်နေရတာလဲ။ မင်းက ငါ့ရဲ့ အထက်လူကြီးလည်း မဟုတ်ဘဲနဲ့။ ပိုက်ဆံလေး နည်းနည်းရှိတာနဲ့ပဲ ဘာတွေ ဒီလောက် မောက်မာနေတာလဲ။

“လောင်မင်... ဒီတစ်ခေါက် နှီးနှောဖလှယ်ပွဲမှာ ခင်ဗျား တင်ပြစရာ အဆိုပြုချက်တစ်ခု ရှိတယ်ဆိုတာ ကျွန်တော် သိပါတယ်။ ကျွန်တော်တို့က အိမ်ရှင်တွေဆိုတော့၊ တကယ်လို့ ကျွန်တော်က ခင်ဗျားတို့ကို ထောက်ခံပေးမယ်ဆိုရင် အဲဒီအဆိုပြုချက်က အလွယ်တကူ အောင်မြင်သွားမှာပါ။ လောင်မင်... ခင်ဗျားအနေနဲ့ အခြေအနေအရပ်ရပ်ကို ငဲ့ညှာသင့်တယ်နော်”

“အခြေအနေအရပ်ရပ်ကို ငဲ့ညှာလို့ပဲ ခင်ဗျားနဲ့ ပိုက်ဆံအကြောင်း ပြောနေတာပေါ့၊ ဒါက ဈေးကွက်စီးပွားရေးစနစ်နဲ့ အကိုက်ညီဆုံးပဲ။ ကျွန်တော့်ရဲ့ အဆိုပြုချက်အတွက်တော့ ဥက္ကဋ္ဌကျောက် ပူနေစရာ မလိုပါဘူး၊ သေချာပေါက် အောင်မြင်မှာပဲလို့ ကျွန်တော် ယုံကြည်တယ်”

******

အခန်း (၁၂၄၅) တိုက်မိမှုစမ်းသပ်ခြင်း ဓာတ်ခွဲခန်း

အစည်းအဝေးသို့ တက်ရောက်လာကြသော ကိုယ်စားလှယ် အသီးသီးတို့သည် အဆိုပြုချက်များကို တင်ပြကြပြီးနောက် အများသဘောတူ တိုးတက်မှုရှိစေရန် ဆွေးနွေးကြလေသည်။

သို့သော် နှစ်စဉ်တင်ပြသော အဆိုပြုချက်များမှာ များသောအားဖြင့် ဆင်တူကြသည်သာ ဖြစ်သည်။ မော်တော်ကား ကုမ္ပဏီငယ်များက ကုမ္ပဏီကြီးများအနေဖြင့် လိုက်လျောမှုများ ပြုလုပ်ပေးရန်နှင့် နည်းပညာအချို့ကို အခမဲ့ ပေးစေလိုကြသည်။ မော်တော်ကား ကုမ္ပဏီကြီးများကမူ ကုမ္ပဏီငယ်များကို ဝယ်ယူပေါင်းစည်းကာ မိမိတို့၏ လုပ်ငန်းပမာဏကို တိုးချဲ့လိုကြသည်။ စက်ရုံသစ် တည်ဆောက်သည်ထက် ကုမ္ပဏီတစ်ခုကို ဝယ်ယူခြင်းက ပိုမိုတွက်ခြေကိုက်သည့်အပြင် ကျွမ်းကျင်လုပ်သားများကိုပါ တစ်ပါတည်း ရရှိနိုင်သောကြောင့် ဖြစ်သည်။

အပိုပစ္စည်း ထုတ်လုပ်သည့် စက်ရုံများကမူ အော်ဒါများ ပိုမိုရရှိလိုကြသလို အပိုပစ္စည်း ဈေးနှုန်းများကိုလည်း မြှင့်တင်လိုကြသည်။ သို့သော် သူတို့ ထုတ်လုပ်နေသည်မှာ နည်းပညာ အနိမ့်ဆုံး အစိတ်အပိုင်းများသာ ဖြစ်သဖြင့် ဈေးဆစ်နိုင်သည့် အနေအထားတွင် မရှိသည်ကိုမူ သူတို့ ထည့်မစဉ်းစားကြပေ။

ယခုနှစ်တွင်မူ ပင်းစီးတီး စက်မှုထုတ်လုပ်ရေး ကုမ္ပဏီအုပ်စုက အဆိုပြုချက်အသစ် တစ်ခုကို တင်ပြခဲ့ရာ ဝမ်တုန်းဟွေး၏ အာရုံစိုက်မှုကို ချက်ချင်း ရရှိခဲ့လေသည်။ ပင်းစီးတီး စက်မှုထုတ်လုပ်ရေး အုပ်စုသည် သူတို့၏ ဓာတ်ခွဲခန်းများကို ချဲ့ထွင်ရန်အတွက် ငွေအမြောက်အမြား ရင်းနှီးမြှုပ်နှံလိုပြီး၊ ဥရောပ၊ အမေရိကန်နှင့် ဂျပန်တို့ကဲ့သို့ပင် တရုတ်နိုင်ငံ၏ NCAP (New Car Assessment Program) အကဲဖြတ် စနစ်တစ်ခုကို ပူးပေါင်းတည်ထောင်ရန် အခြားသော မော်တော်ကား ကုမ္ပဏီများကို တိုက်တွန်းနှိုးဆော်လိုက်ခြင်း ဖြစ်သည်။

ဤသို့ ပြုလုပ်ခြင်းဖြင့် အကျိုးကျေးဇူးအချို့ ရှိပေသည်။ ပထမအချက်မှာ အားလုံးက ဓာတ်ခွဲခန်းတစ်ခုတည်းတွင် တိုက်မိမှုစမ်းသပ်ခြင်းကို ပြုလုပ်ခြင်းဖြင့် ဓာတ်ခွဲခန်းများ ထပ်ခါတလဲလဲ တည်ဆောက်ရမည့် စရိတ်ကို သက်သာစေမည် ဖြစ်သည်။ ဒုတိယအချက်မှာ ဓာတ်ခွဲခန်းတစ်ခုတည်းတွင် စမ်းသပ်ခြင်း ဖြစ်သဖြင့် အကဲဖြတ်မှု စံနှုန်းများမှာ တူညီနေမည် ဖြစ်ကာ အချင်းချင်း စောင့်ကြည့်နိုင်သဖြင့် အချက်အလက်များ လိမ်လည်နိုင်ခြေ မရှိဘဲ စားသုံးသူများအတွက် ပိုမိုယုံကြည်စိတ်ချရမည် ဖြစ်သည်။ တတိယအချက်မှာ နိုင်ငံတကာ စံနှုန်းများနှင့် ပိုမိုလျင်မြန်စွာ ချိတ်ဆက်နိုင်မည်ဖြစ်သည်။ ဤကဲ့သို့သော အကဲဖြတ်စနစ်မှာ ကမ္ဘာက အသိအမှတ်ပြုထားခြင်း ဖြစ်သဖြင့် ပြည်တွင်း မော်တော်ကားကုမ္ပဏီများ ပြည်ပသို့ ခြေဆန့်ရာတွင် များစွာအထောက်အကူ ဖြစ်စေမည် ဖြစ်သည်။

လက်ရှိတွင် မော်တော်ကား ကုမ္ပဏီတိုင်း၌ ကိုယ်ပိုင် တိုက်မိမှုစမ်းသပ်ခန်းများ ရှိကြသော်လည်း ပင်းစီးတီး စက်မှုထုတ်လုပ်ရေး အုပ်စုမှလွဲ၍ ကျန်ဓာတ်ခွဲခန်းများမှာ အဆင့်မမီကြပေ။ သူတို့ ထုတ်လုပ်သော မော်ဒယ်အများစုမှာ နိုင်ငံခြား ကုမ္ပဏီများနှင့် ဖက်စပ်ထုတ်လုပ်ခြင်း ဖြစ်သဖြင့် နိုင်ငံခြားတွင် စမ်းသပ်မှုများ ပြုလုပ်ပြီးသားဖြစ်ရာ ပြည်တွင်း၌ စမ်းသပ်မှုကို ရိုးရိုးရှင်းရှင်းသာ လုပ်ဆောင်ကြခြင်း ဖြစ်သည်။

ကုမ္ပဏီငယ်များ၏ တိုက်မိမှုစမ်းသပ်ချက်များမှာမူ ပို၍ပင်အဆင့်မမီလှပေ။ အချို့ဆိုလျှင် အထက်လူကြီးများကို လှည့်စားရန်အတွက် အချက်အလက် အတုများကိုသာ တင်ပြကြသည်။ တိုက်မိမှုစမ်းသပ်ချက် တစ်ကြိမ် ပြုလုပ်ရန်အတွက် ကုန်ကျသော ငွေကြေးပမာဏမှာ မနည်းလှပေ။

ထိပ်တန်းအဆင့် စမ်းသပ်ရုပ် တစ်ခုတည်းတင် တန်ဖိုးမှာ ယွမ် ၁ သန်းကျော် ရှိသည်။ တိုက်မိမှု တစ်ကြိမ် စမ်းသပ်တိုင်း အနည်းဆုံး ယွမ် ၁ သိန်း၊ ၂ သိန်းခန့် ကုန်ကျပြီး တန်ဖိုးကြီးကားများကို စမ်းသပ်လျှင်မူ ထိုထက်မက ပိုမိုကုန်ကျပေလိမ့်မည်။

ကားမော်ဒယ်သစ် တစ်ခုကို စမ်းသပ်ရန်အတွက် တိုက်မိမှုစမ်းသပ်ချက် အကြိမ်ပေါင်းများစွာ ပြုလုပ်ရသဖြင့် ကုန်ကျစရိတ်မှာ အလွန်ပင်ကြီးမားလှပေသည်။ ပြည်တွင်းရှိ ကုမ္ပဏီငယ်များမှာ ထိုဒဏ်ကို လုံးဝ မခံနိုင်ကြပေ။

Songjiang မော်တော်ကားများ ပြည်ပတွင် ရောင်းအား သိပ်မကောင်းခြင်းမှာ NCAP ကြယ်ပွင့် အဆင့်သတ်မှတ်ချက် နည်းပါးခြင်းနှင့်လည်း သက်ဆိုင်နေသည်။ ဥရောပ စံနှုန်းအရ Songjiang Guo Ao၏ အကောင်းဆုံး အဆင့်မှာ ၄ ကြယ်ပွင့်သာ ရရှိပြီး အခြားကားများမှာ ၃ ကြယ်ပွင့်သာ ရရှိကြသည်။ Songjiang Elf ဆိုလျှင် ၂ ကြယ်ပွင့်သာ ရရှိလေသည်။

ဥရောပနှင့် အမေရိကတွင် မော်တော်ကားမှာ အဓိက သွားလာရေး ယာဉ်ဖြစ်သလို ယာဉ်တိုက်မှု ဖြစ်ပွားနှုန်းလည်း မြင့်မားလှသည်။ ထို့ကြောင့် သူတို့သည် မော်တော်ကား၏ လုံခြုံရေး စွမ်းဆောင်ရည်ကို အလွန် အလေးထားကြသည်။ မိမိတို့ကိုယ်တိုင် အန္တရာယ် ကြုံတွေ့ရမည်ကို မည်သူကမျှ အလိုမရှိကြသည် မဟုတ်ပါလား။

တရုတ်နိုင်ငံတွင်မူ လုံခြုံရေးနှင့် ပတ်သက်၍ အလေးထားမှုမှာ များစွာ လိုအပ်နေသေးသည်။ ဖုန်းယွီသည် မနှစ်ကမှ ဈေးကွက်အတွင်း၌ ကလေးလုံခြုံရေး ထိုင်ခုံများ စတင်ရောင်းချနေသည်ကို တွေ့ရှိရသည်။ ယခင်က လူကြီးများသည် ကားမောင်းရင်း ကလေးကို ပေါင်ပေါ်တင်ထားခြင်း သို့မဟုတ် လက်ထဲတွင် ပွေ့ချီထားခြင်းများ ပြုလုပ်ကြသလို၊ ကလေးကို နောက်ခန်းတွင် ဒီအတိုင်း ထိုင်ခိုင်းထားလေ့ ရှိသည်။ လုံခြုံရေး ပတ်ကြိုးကိုပင် ပတ်ရမှန်း မသိကြပေ။

ကလေးလုံခြုံရေး ထိုင်ခုံတစ်ခုသည်ပင် ကလေးများအတွက် များစွာသော ဘေးကင်းလုံခြုံမှုကို ပေးစွမ်းနိုင်ပေသည်။ ဖုန်းယွီသည် ဤကလေးထိုင်ခုံများကို ပင်းစီးတီး စက်မှုထုတ်လုပ်ရေး အုပ်စုအား ထုတ်လုပ်ခိုင်းခဲ့သော်လည်း ဈေးကွက်တွင် လူကြိုက်နည်းနေဆဲ ဖြစ်သည်။ လူအများစုက ထိုအရာမှာ အသုံးမဝင်ဟု ယူဆနေကြသည်။

ပေါ့ပေါ့ဆဆ နေတတ်သူများ၏ အမြင်တွင်မူ ယာဉ်တိုက်မှု ဖြစ်ပွားပါက ကလေးထိုင်ခုံ ရှိသည်ဖြစ်စေ၊ မရှိသည်ဖြစ်စေ ထူးခြားမည် မဟုတ်ဘဲ ဒဏ်ရာရမည်သာ ဖြစ်သည်ဟု ယူဆကြသည်။ အချို့ကမူ ကလေးကို ပေါင်ပေါ်တင်ထားခြင်း သို့မဟုတ် ပွေ့ချီထားခြင်းက ပို၍ဘေးကင်းကြောင်း၊ အန္တရာယ် ကြုံလာပါက မိမိ၏ခန္ဓာကိုယ်ဖြင့် ကလေးကို ကာကွယ်ပေးနိုင်ကြောင်းပင် ထင်မှတ်နေကြသည်။

သီအိုရီအရ လူ့ခန္ဓာကိုယ်က အတိုင်းအတာတစ်ခုအထိ ကာကွယ်ပေးနိုင်သည်ဟု ဆိုနိုင်သော်လည်း၊ ဖုန်းယွီကမူ ကလေးလုံခြုံရေး ထိုင်ခုံကသာ ပိုမိုထိရောက်မည်ဟု ယူဆထားသည်။ လူကြီးများတွင် ပေါ့ဆမှုများ ရှိနိုင်သော်လည်း ထိုင်ခုံတွင်မူ ထိုသို့ မရှိနိုင်ပေ။ ထို့ပြင် အန္တရာယ် ကြုံလာသောအခါ လူကြီးများအနေဖြင့် အချိန်မီ တုံ့ပြန်နိုင်ရန်မှာလည်း မလွယ်ကူပေ။

အကယ်၍ အကာအကွယ် တစ်ထပ် ထပ်လိုသည်ဆိုပါက လူကြီးအနေဖြင့် ကလေး၏ ဘေးတွင် ထိုင်ခြင်းကသာ ကလေးအတွက် ပိုမို ဘေးကင်းစေမည် ဖြစ်သည်။

အရင်ဘဝတုန်းက တရုတ်နိုင်ငံသည် ၂၀၀၅ ခုနှစ်မှသာ C-NCAP ကို တည်ထောင်နိုင်ခဲ့ခြင်း ဖြစ်သည်။ ထိုစဉ်ကလည်း ပုဂ္ဂလိက ကုမ္ပဏီများက ဦးဆောင်ခဲ့ခြင်းဖြစ်ပြီး ဦးဆောင်သူမှာ လီတာဖူပင် ဖြစ်သည်။ အစိုးရပိုင် ကုမ္ပဏီများမှ လူများမှာမူ အချင်းချင်း အားပြိုင်နေကြဆဲ ဖြစ်သည်။

ယခုဘဝတွင် တရုတ်မော်တော်ကားများ ပြည်ပသို့ စောစီးစွာ တင်ပို့နိုင်ခဲ့သဖြင့်၊ ဤကြယ်ပွင့် အဆင့်သတ်မှတ်ချက်ကိုလည်း စောစောစီးစီး တည်ထောင်ကာ တရုတ်မော်တော်ကား ကုမ္ပဏီများ၏ယှဉ်ပြိုင်နိုင်စွမ်းကို မြှင့်တင်ပေးသင့်သည်ဟု ဖုန်းယွီက ယူဆလိုက်ခြင်း ဖြစ်သည်။

နိုင်ငံခြားတွင်လည်း ဤစံနှုန်း တည်ထောင်မှုမှာ ထိုမျှ မကြာသေးပေ။ ဩဇာအရှိဆုံး ဖြစ်သည့် ဥရောပ အကဲဖြတ်စနစ်သည်ပင် ၁၉၉၇ ခုနှစ်မှ စတင်ခဲ့ခြင်း ဖြစ်သည်။ ထို့ကြောင့် ယခုအချိန်တွင် စတင်တည်ထောင်ပါက ကွာဟချက်မှာ ထိုမျှမကြီးမားနိုင်ပေ။ နောက်ထပ် နှစ်အနည်းငယ် ထပ်စောင့်မည်ဆိုပါက လိုက်မီရန် ပိုမိုခက်ခဲသွားပေလိမ့်မည်။

တရုတ်နိုင်ငံ၏ အကဲဖြတ်စနစ်ကို ဥရောပက အသိအမှတ်ပြုလိုက်သည်နှင့် တစ်ကမ္ဘာလုံးကလည်း အသိအမှတ်ပြုလိုက်ပြီဟု ဆိုနိုင်သည်။ ဥပမာအားဖြင့် အမေရိကန်၏ Chevrolet ကားတစ်စီးသည် အမေရိကန်၏ အကဲဖြတ်မှုတွင် ၄ ကြယ်ပွင့်အထက် ရရှိသော်လည်း၊ ဥရောပ ဓာတ်ခွဲခန်း၏ အကဲဖြတ်မှုတွင်မူ ၂ ကြယ်ပွင့်သာ ရရှိလေသည်။

ယခုအချိန်တွင် ဤအကဲဖြတ်မှုစံနှုန်း၌ အပြတ်အသတ် ဦးဆောင်နေသူမှာ အရင်ဘဝက တရုတ်ကုမ္ပဏီတစ်ခုက ဝယ်ယူခဲ့သော Volvoပင် ဖြစ်သည်။ ထိုဗော်လ်ဗိုကို ဝယ်ယူခဲ့ခြင်းကြောင့်ပင် တရုတ်နိုင်ငံ၏ အကဲဖြတ်စနစ်ကို နိုင်ငံတကာက အမှန်တကယ် အသိအမှတ်ပြုခဲ့ခြင်း ဖြစ်သည်။

“အားလုံးပဲ... ဥက္ကဋ္ဌလီရဲ့ဒီအဆိုပြုချက်အပေါ်မှာ ဘယ်လို ထင်မြင်ချက်တွေ ရှိကြလဲဗျ” ဝမ်တုန်းဟွေးက မေးလိုက်သည်။

“ကျွန်တော်ကတော့ ဒါမျိုး မလိုအပ်ဘူးလို့ ထင်တယ်။ ကျွန်တော်တို့ဆီမှာလည်း ကိုယ်ပိုင် ဓာတ်ခွဲခန်းတွေ ရှိတာပဲ။ ဘာကိစ္စ တခြားလူရဲ့ ဓာတ်ခွဲခန်းမှာ သွားပြီး စမ်းသပ်ရမှာလဲ။ လောင်မင်... ခင်ဗျားတို့ ကုမ္ပဏီကလည်း ပိုက်ဆံအများကြီး မြတ်နေတာပဲ။ ဒီကိစ္စမှာတောင် ညီအစ်ကို ကုမ္ပဏီတွေဆီက ပိုက်ဆံ ထပ်လိုချင်သေးတာလားဗျာ” ဟု FAW မှ ဥက္ကဋ္ဌကျောက်က ခနဲ့တဲ့တဲ့ လေသံဖြင့် ပြောလိုက်သည်။

“ဥက္ကဋ္ဌကျောက် မေးမှတော့ ကျွန်တော် ရှင်းပြရတာပေါ့။ ကျွန်တော်တို့ ကုမ္ပဏီမှာ ကိုယ်ပိုင် ဓာတ်ခွဲခန်းတွေ ရှိပါတယ်။ အဲဒီထဲမှာ ကုန်ကြမ်းစမ်းသပ်ခန်း၊ အပိုပစ္စည်းစမ်းသပ်ခန်း၊ အင်ဂျင်စမ်းသပ်ခန်း၊ တစ်စီးလုံးစမ်းသပ်ခန်း၊ အိပ်ဇောစမ်းသပ်ခန်း၊ ဆူညံသံစမ်းသပ်ခန်း၊ တုန်ခါမှုစမ်းသပ်ခန်း၊ ခံနိုင်ရည်စမ်းသပ်ခန်း၊ လေခွင်းအားစမ်းသပ်ခန်းနဲ့ တိုင်းတာရေး ဗဟိုဌာနတွေ အကုန်ပါဝင်ပါတယ်။ ကျွန်တော် မေးချင်တာက ခင်ဗျားတို့ထဲက ဘယ်ကုမ္ပဏီမှာ ကျွန်တော်တို့ထက် ပိုပြီးပြည့်စုံတဲ့ ဓာတ်ခွဲခန်း ရှိသလဲဆိုတာပါပဲ”

“ဒီတိုက်မိမှုစမ်းသပ်ခန်း တစ်ခုတည်းတင် ကျွန်တော်တို့ ဒေါ်လာ သန်း ၂၀၀ ရင်းနှီးမြှုပ်နှံဖို့ စီစဉ်ထားတယ်။ မှတ်ထားပါ... ဒေါ်လာ သန်း ၂၀၀ နော်။ အထဲက စမ်းသပ်ရုပ် တစ်ခုတည်းရဲ့ တန်ဖိုးတင် ယွမ် ၁ သန်းကျော်တယ်။ အဲဒါကို နိုင်ငံခြားကနေပဲ ဝယ်လို့ရတာ၊ ကျွန်တော်တို့ ပြည်တွင်းမှာ ဒီလောက် တိကျတဲ့ အရုပ်မျိုး မထုတ်နိုင်သေးဘူး။ ကားတစ်စီးကို စမ်းသပ်တဲ့အခါ ရှေ့တည့်တည့်ကော ဘေးတိုက်ပါ စမ်းသပ်ရတာပဲ။ အရုပ်ကို နေရာအမျိုးမျိုးမှာ ထားပြီး အချက်အလက်တွေ ရအောင် အကြိမ်ပေါင်း ဒါဇင်နဲ့ချီ၊ ရာနဲ့ချီ စမ်းသပ်ရတာ။ အခု ကျွန်တော်တို့ အဲဒီလို လုပ်နိုင်နေပြီ၊ ခင်ဗျားတို့ထဲက ဘယ်သူ လုပ်နိုင်လဲ”

“ဒီလို စမ်းသပ်မှုတွေ မလုပ်ဘဲနဲ့ ကျွန်တော်တို့ ကားတွေက ပြည်ပမှာ အသိအမှတ်ပြုခံရဖို့ ခက်လိမ့်မယ်။ ဥရောပနဲ့ အမေရိကကို တင်ပို့တဲ့ ကားတွေကို ဟိုဘက်မှာ စမ်းသပ်မှုတွေ ပြုလုပ်ရတယ်။ အားလုံး အထင်တော့ ကျွန်တော်တို့ ကားတွေက လုံခြုံရေး မဆိုးဘူးလို့ ထင်ကြမှာပေါ့။ ဒါပေမဲ့ ဥရောပနဲ့ အမေရိက ကားတွေနဲ့ ယှဉ်ရင် ကွာဟချက်က မသေးဘူးဗျ။ လုံခြုံရေး ဆိုတာက မိသားစုတိုင်း ကားဝယ်တဲ့အခါ အဓိက ထည့်တွက်တဲ့ အချက်ပဲလေ”

“ခင်ဗျားတို့က တစ်သက်လုံး ပြည်တွင်းမှာပဲ ကုတ်ကပ်နေချင်တာလား။ နိုင်ငံခြားဝင်ငွေ ရှာပေးဖို့ မစဉ်းစားကြဘူးလား။ ခင်ဗျားတို့က ဖက်စပ်ကားတွေ ထုတ်ဖို့ပဲ သိတယ်၊ ကိုယ်ပိုင် အမှတ်တံဆိပ်ကားတွေ ထုတ်ဖို့ မစဉ်းစားကြဘူးလား။ တစ်သက်လုံး သူများနည်းပညာ ဝယ်သုံးပြီးတော့၊ ကိုယ့်နည်းပညာက သူများကို ကျော်တက်သွားအောင် မလုပ်ချင်ကြဘူးလား”

“ဒီတိုက်မိမှုစမ်းသပ်ခန်းသစ်ကို ကျွန်တော်တို့ ပင်းစီးတီး စက်မှုထုတ်လုပ်ရေး အုပ်စုက အပြည့်အဝ ရင်းနှီးမြှုပ်နှံမှာပါ။ ဒါဟာ နိုင်ငံတော်အဆင့် ဓာတ်ခွဲခန်း ဖြစ်လာလိမ့်မယ်။ ကျွန်တော်တို့ရဲ့ တခြား ဓာတ်ခွဲခန်းတွေလည်း နိုင်ငံတော်အဆင့်တွေချည်းပါပဲ။ ကျွန်တော်တို့က အာရှမှာ အကြီးဆုံး မော်တော်ကား အင်ဂျင်နီယာ ဓာတ်ခွဲခန်းကြီးတစ်ခု ဖြစ်အောင် လုပ်မှာ။ ကျွန်တော်တို့ရဲ့ စံနှုန်းကို သူများတွေ ယုံကြည်လာအောင် လုပ်မှာ။ တကယ်လို့ တစ်သက်လုံး ကိုယ့်နိုင်ငံထဲမှာပဲ အောင်းနေပြီး၊ နိုင်ငံခြားသားတွေ လာပြီး ပိုက်ဆံရှာသွားတာကိုပဲ ထိုင်ကြည့်ချင်တယ် ဆိုရင်တော့ ကျွန်တော် ခုနကပြောတဲ့ စကားတွေကို မကြားဘူးလို့ပဲ သဘောထားလိုက်ပါ။ ကျွန်တော်တို့ ပင်းစီးတီး စက်မှုထုတ်လုပ်ရေး အုပ်စုကတော့ ကျွန်တော်တို့ဘာသာ ဆက်လုပ်သွားမှာပဲ”

******

အခန်း (၁၂၄၆) ဓာတ်ခွဲခန်း ဝင်းကြီး

လီမင်တေ၏စကားများသည် တစ်ဖက်လူ၏ အားနည်းချက်ကို တည့်တည့်မှန်အောင် ထိုးနှက်လိုက်ခြင်းပင် ဖြစ်သည်။ သို့သော် လီမင်တေတွင် ဤသို့ပြောဆိုနိုင်သည့် အရည်အချင်းရှိနေသဖြင့် အခြားသူများမှာ ပြန်လည်ချေပနိုင်စွမ်း မရှိကြပေ။ ငါတို့က နှစ်စဉ် နိုင်ငံခြားဝင်ငွေ ရှာဖွေပေးနေသူတွေ ဖြစ်ပေမဲ့လည်း၊ ခင်ဗျားတို့ကတော့ နှစ်စဉ်ရရှိတဲ့ အမြတ်အစွန်းတွေကို နိုင်ငံခြားသားတွေကို ခွဲဝေပေးနေရသူတွေဖြစ်လို့ ဘယ်လို နှိုင်းယှဉ်နိုင်မှာလဲ။

အားလုံးမှာ တစ်ဦးကိုတစ်ဦး ကြည့်လျက် တိတ်ဆိတ်နေကြသည်။

FAW ကဲ့သို့သော ကုမ္ပဏီကြီးများက အခြားသူများ အရင်စကားပြောလာမည်ကို စောင့်ဆိုင်းနေကြပြီး၊ ကုမ္ပဏီငယ်များကမူ အများသဘောအတိုင်းလိုက်ရန် ပြင်ဆင်နေကြသည်။ မူလကတည်းက သူတို့သည် တိုက်မိမှုစမ်းသပ်ချက်များကို မည်သည့်အခါမျှ မလုပ်ဆောင်ခဲ့ဖူးပေ။ အပိုပစ္စည်း ထုတ်လုပ်သည့် စက်ရုံပိုင်ရှင်များမှာမူ အနာဂတ်တွင် သူတို့၏ပစ္စည်းများကို ပင်းစီးတီး စက်မှုထုတ်လုပ်ရေးအုပ်စု၏ ဓာတ်ခွဲခန်းသို့ ပေးပို့ကာ စစ်ဆေးမှုများ ခံယူရတော့မည်လားဟူ၍ တစ်ဦးကိုတစ်ဦး မျက်ရိပ်ပြနေကြတော့သည်။

လေခွင်းအားစမ်းသပ်ခန်းက ဘာလဲ။ တိုင်းတာရေး ဗဟိုဌာနဆိုတာကကော ဘာလဲ။

မည်သူမျှ စကားမပြောသည်ကို မြင်သောအခါ ဝမ်တုန်းဟွေးက ကြားဝင်ပြောဆိုလိုက်သည်။

“ကျွန်တော့်အမြင်ပြောရရင် ဒီအဆိုပြုချက်က သိပ်ကောင်းပါတယ်။ ကျွန်တော်တို့ရဲ့ ရည်မှန်းချက်က အာရှကိုကျော်ဖြတ်ပြီး ကမ္ဘာကို ခြေဆန့်ဖို့ပဲလေ။ ကမ္ဘာ့အခြေခံစံနှုန်းတွေကိုတောင် မမီဘူးဆိုရင် ဘယ်လိုလုပ် ကမ္ဘာ့ဈေးကွက်ကို သွားမလဲ။ ဒီကိစ္စမှာ ပင်းစီးတီး စက်မှုထုတ်လုပ်ရေး အုပ်စုက အတွေ့အကြုံ အရှိဆုံးမို့ ကျွန်တော်တို့ သင်ယူရပါလိမ့်မယ်”

“ဥက္ကဋ္ဌဝမ်... ကျွန်တော် တစ်ခုမေးပါရစေ။ အဲဒီဓာတ်ခွဲခန်းက သူတို့ကုမ္ပဏီပိုင် ဖြစ်နေမှာ မဟုတ်လား။ ဒါဆိုရင် အကဲဖြတ်မှု ရလဒ်တွေရဲ့ မျှတမှုကို ဘယ်လို ထိန်းသိမ်းမှာလဲဗျ” ရှန်ဟိုင်းမော်တော်ကားအုပ်စုမှ ဥက္ကဋ္ဌကျိုးက မေးလိုက်သည်။

လီမင်တေက တည်ငြိမ်စွာပင် ပြန်လည်ဖြေကြားလိုက်သည်။

“ကျွန်တော် ပြောခဲ့ပြီးပါပြီ။ တည်ဆောက်မယ့် ဓာတ်ခွဲခန်းအသစ်မှာ ကုမ္ပဏီတိုင်းက ဝန်ထမ်းတွေ ပါဝင်ခွင့်ရမှာပါ။ အကဲဖြတ်မှု ရလဒ်တွေကိုလည်း အားလုံးက ပူးပေါင်းစောင့်ကြည့်သွားမှာဖြစ်လို့ အမြင့်ဆုံးသော မျှတမှုကို အာမခံပါတယ်။ ဒီဓာတ်ခွဲခန်းဟာ အကျိုးအမြတ် မယူတဲ့ အဖွဲ့အစည်း ဖြစ်မှာမို့လို့ စမ်းသပ်ခတွေကိုလည်း ရင်းနှီးမြှုပ်နှံမှု ပြန်ရဖို့ထက် ကုန်ကျစရိတ် ကာမိရုံလောက်ပဲ ကောက်ခံသွားမှာပါ။ ခင်ဗျားတို့အနေနဲ့ အနာဂတ်မှာ ကားတွေကို ပြည်ပကို တင်ပို့ချင်တယ်ဆိုရင် ဒီအကဲဖြတ်မှုတွေကို သေချာပေါက် ဖြတ်ကျော်ရပါလိမ့်မယ်။ ခုနက ကျွန်တော်ပြောခဲ့တဲ့ ဓာတ်ခွဲခန်းတွေဟာ နိုင်ငံခြားက ကားကုမ္ပဏီကြီးတိုင်းမှာ မရှိမဖြစ် ရှိနေရမယ့်အရာတွေပါ”

“အကျိုးအမြတ် မယူဘူး ဟုတ်လား။ ဒါဆို ခင်ဗျားတို့ပဲ အကုန်ရင်းနှီးမြှုပ်နှံမှာလား။ ရင်းနှီးထားတဲ့ ငွေတွေကို ဘယ်လို ပြန်ယူမှာလဲ။ ခင်ဗျားတို့ ကုမ္ပဏီက အလှူအတန်း သက်သက်ပဲ လုပ်နေတာလားဗျ” ဥက္ကဋ္ဌကျောက်က သရော်လိုက်သည်။

“ကျွန်တော်တို့က အလှူအတန်း သက်သက် လုပ်နေတာတော့ မဟုတ်ပါဘူး။ အကျိုးအမြတ် မယူဘူးဆိုတာက ကျွန်တော်တို့ ကုမ္ပဏီအနေနဲ့ ဒီဓာတ်ခွဲခန်းကနေ ကုန်ကျစရိတ်ထက် ပိုတဲ့ တစ်ပြားတစ်ချပ်ကိုမှ အမြတ်အဖြစ် ထုတ်ယူမှာ မဟုတ်ဘူးလို့ ပြောတာပါ။ အကယ်၍ အနာဂတ်မှာ အပိုအလျှံ ရှိလာရင်လည်း စမ်းသပ်ကိရိယာတွေကို အဆင့်မြှင့်တင်တဲ့နေရာမှာပဲ သုံးသွားမှာပါ။ တကယ်တမ်းကျတော့ ကျွန်တော်တို့က ရင်းနှီးငွေကို ပြန်ရရုံနဲ့တင် ရှုံးနေပါပြီ။ မမေ့ပါနဲ့ဦး... ပိုက်ဆံကို ဘဏ်မှာ အပ်ထားရင်တောင် အတိုးရသေးတယ် မဟုတ်လား” လီမင်တေက ပြန်ဖြေလိုက်သည်။

“ဒါဆို ခင်ဗျားတို့ ကုမ္ပဏီက စမ်းသပ်တာကျရင်ရော ပိုက်ဆံပေးမှာလား”

“လောလောဆယ်တော့ ပေးမှာမဟုတ်ဘူး။ ဒါပေမဲ့ ရင်းနှီးထားတဲ့ ကုန်ကျစရိတ်တွေ ပြန်ရပြီဆိုတာနဲ့ ကျွန်တော်တို့လည်း တခြားသူတွေလိုပဲ စမ်းသပ်ခ ပေးသွားမှာပါ”

လီမင်တေသည် ဤနေရာတွင် ပရိယာယ်တစ်ခုကို သုံးထားခြင်း ဖြစ်သည်။ ဆိုလိုသည်မှာ ဤဓာတ်ခွဲခန်း၏ ကုန်ကျစရိတ်ကို အခြားသော မော်တော်ကား ကုမ္ပဏီများက ပေးဆောင်နေရခြင်းပင်။ ပင်းစီးတီး စက်မှုအုပ်စုက ငွေကြိုတင်စိုက်ထုတ်ထားပြီး နောက်မှ တဖြည်းဖြည်း ပြန်လည်ရယူခြင်း ဖြစ်သည်။ သူတို့အတွက် အတိုးမှာမူ ထိုဓာတ်ခွဲခန်းကို အချိန်အကြာကြီး အခမဲ့ အသုံးပြုခွင့် ရရှိခြင်းပင် ဖြစ်သည်။

“ဥက္ကဋ္ဌလီ... ဒါဆို ခင်ဗျားတို့က အသာစီး ရသွားတာပေါ့”

“ဒါဆို ခင်ဗျားတို့ ရင်းနှီးမြှုပ်နှံပါလား။ ကျွန်တော် တွက်ပြမယ်... တိုက်မိမှုစမ်းသပ်ခန်း တစ်ခုတည်းတင် ဒေါ်လာ သန်း ၂၀၀ ကျော်မယ်။ တခြား ဓာတ်ခွဲခန်းတွေရဲ့ ဈေးနှုန်းတွေကလည်း မတူကြဘူး။ စုစုပေါင်း ရင်းနှီးမြှုပ်နှံမှုက ဒေါ်လာ ၁.၅ ဘီလီယံ (သန်း ၁၅၀၀) ဝန်းကျင် ရှိမယ်။ ဒါက မြေနေရာဖိုး မပါသေးဘူးနော်။ ခင်ဗျားတို့ထဲက ဘယ်သူ စိုက်မှာလဲ” လီမင်တေက ပရိသတ်ကို ဝေ့ကြည့်လိုက်ရာ မည်သူမျှ သူ၏ မျက်လုံးကို တည့်တည့်မကြည့်ရဲကြပေ။

ဒေါ်လာ ၁.၅ ဘီလီယံ ဆိုသည်မှာ နည်းပါးသော ပမာဏ မဟုတ်ပေ။ မည်သည့် ကုမ္ပဏီမျှ ဤမျှလောက်သော ငွေကြေးကို ထုတ်ပေးနိုင်စွမ်း မရှိကြပေ။ ပင်းစီးတီး စက်မှုထုတ်လုပ်ရေး အုပ်စုကဲ့သို့သော ငွေကြေးအင်အား တောင့်တင်းသည့် ကုမ္ပဏီမျိုးမှသာ ထုတ်ပေးနိုင်ပေလိမ့်မည်။

အမှန်စင်စစ်တွင် ပင်းစီးတီး စက်မှုထုတ်လုပ်ရေး အုပ်စုသည်လည်း ဤငွေများကို တစ်ကြိမ်တည်း ထုတ်ပေးနိုင်သည် မဟုတ်ပေ။ သို့သော် ဤဓာတ်ခွဲခန်း တည်ဆောက်မှုကို အဆင့်များ ခွဲခြားထားသဖြင့် ငွေကြေးကို နှစ်နှစ်၊ သုံးနှစ်အတွင်း ခွဲဝေ သုံးစွဲသွားမည် ဖြစ်သည်။

အကယ်၍ ပင်းစီးတီး စက်မှုထုတ်လုပ်ရေး အုပ်စုသည် ဤနှစ်ပိုင်းအတွင်း နည်းပညာပိုင်း၌ အကြီးအကျယ် ရင်းနှီးမြှုပ်နှံမှု မပြုလုပ်ခဲ့ပါက ဤငွေကို သေချာပေါက် ထုတ်ပေးနိုင်ပေလိမ့်မည်။ သို့သော် သူတို့ သိထားသည်မှာ နည်းပညာပိုင်းတွင် ကမ္ဘာ့ထိပ်တန်းအဆင့်သို့ ရောက်မှသာ စစ်မှန်သော ယှဉ်ပြိုင်နိုင်စွမ်း ရှိမည်ဖြစ်ကြောင်းပင် ဖြစ်သည်။ မဟုတ်ပါက ကျန်သောအချက်များမှာ အပိုသာ ဖြစ်ပေလိမ့်မည်။

ပင်းစီးတီး စက်မှုထုတ်လုပ်ရေး အုပ်စုတွင် မူလကတည်းက ဓာတ်ခွဲခန်းအသစ်များ တည်ဆောက်ရန် စီမံကိန်း ရှိပြီးသား ဖြစ်သည်။ ယခင် ဓာတ်ခွဲခန်းငယ်လေးများမှာ ခေတ်နောက်ကျနေပြီ ဖြစ်သည်။ သို့သော် မိမိတို့ ကုမ္ပဏီတစ်ခုတည်း အသုံးပြုရန်အတွက်မှာ အလဟဿ ဖြစ်လွန်းသည်ဟု ယူဆနေစဉ် ဖုန်းယွီက အကြံပြုလိုက်သဖြင့် အခြားသော ကုမ္ပဏီများကို ဆွဲခေါ်ရန် နည်းလမ်းကို ရှာတွေ့သွားခြင်း ဖြစ်သည်။

ယခုအခါ အခြားသော ကုမ္ပဏီများမှာလည်း ငြင်းမရသော အခြေအနေသို့ ရောက်ရှိသွားကြပြီ ဖြစ်သည်။ အနာဂတ်တွင် Songjiang မော်တော်ကားများက သူတို့၏ ကားများသည် နိုင်ငံတကာ အဆင့်မီ လုံခြုံရေး စမ်းသပ်မှုများ ပြုလုပ်ထားပြီး ရလဒ်ကောင်းမွန်ကြောင်း ကြော်ငြာနေချိန်တွင်၊ အခြားကားများမှာ မည်သည့် စမ်းသပ်မှုမျှ မရှိပါက မည်သို့ ရောင်းချနိုင်ပါမည်နည်း။

ဖက်စပ်ကားများ ဖြစ်သဖြင့် မူလမော်ဒယ်များက စမ်းသပ်ပြီးသားဟု ပြောလျှင်ပင် တရုတ်ပြည်သူများက ယုံကြည်လာအောင် လုပ်ဆောင်ရဦးမည် ဖြစ်သည်။

ထို့ပြင် ဤကားကုမ္ပဏီ ဥက္ကဋ္ဌများအနေဖြင့် မိမိတို့၏ ကားများကို ပြည်ပသို့ တင်ပို့လိုကြသည်မှာ အကြီးမားဆုံးသော ဂုဏ်သိက္ခာပင် မဟုတ်ပါလော။ သို့သော် လုံခြုံရေး စမ်းသပ်မှုများ မရှိပါက လီမင်တေ ပြောသကဲ့သို့ပင် နိုင်ငံခြားက အသိအမှတ်ပြုမည် မဟုတ်ပေ။ နိုင်ငံခြားသို့ သွားရောက် စမ်းသပ်မည်ဆိုလျှင်လည်း ကုန်ကျစရိတ်မှာ ပိုမိုမြင့်မားမည် ဖြစ်သည်။ ကားများ ပို့ဆောင်ရသည့် သယ်ယူပို့ဆောင်ရေး စရိတ်မှာပင် မနည်းလှပေ။

ပင်းစီးတီး စက်မှုထုတ်လုပ်ရေး အုပ်စုက ပြည်ပတွင် စမ်းသပ်နိုင်ခြင်းမှာ သူတို့တွင် ပြည်ပ၌ ဖက်စပ်စက်ရုံများ ရှိနေသဖြင့် ကားများကို အလွယ်တကူ ပေးပို့ စမ်းသပ်နိုင်သောကြောင့် ဖြစ်သည်။ အခြားသူများမှာမူ ထိုသို့မလုပ်နိုင်ကြပေ။

ဝမ်တုန်းဟွေးက ကြားဝင်စေ့စပ်ပေးလိုက်သည်။

“ကျွန်တော့်အမြင်ပြောရရင် ဒီအဆိုပြုချက်က သိပ်ကောင်းပါတယ်။ ကျွန်တော် အထက်လူကြီးတွေကို တင်ပြပြီး ကျွန်တော်တို့ရဲ့ NCAP အကဲဖြတ်စနစ်ကို အမြန်ဆုံး တည်ထောင်သွားပါ့မယ်။ ဒီကိစ္စမှာ ပင်းစီးတီး စက်မှုထုတ်လုပ်ရေး အုပ်စုက အတွေ့အကြုံ ပိုရှိတာမို့၊ ဥက္ကဋ္ဌလီ တို့ပဲ ပင်ပန်းခံပြီး စီမံကိန်းတစ်ခုကို ဦးဆောင် ရေးဆွဲပေးပါ။ တခြား ကုမ္ပဏီတွေကလည်း ဝိုင်းဝန်း ကူညီကြရမယ်”

အခြား ကားကုမ္ပဏီဥက္ကဋ္ဌများမှာ ဒေါသထွက်သလို မတတ်သာသည့် အမူအရာများ ဖြစ်သွားကြသည်။ အဓိကမှာ သူတို့တွင် ငွေမရှိခြင်း ဖြစ်သည်။ သူတို့သာ ငွေရှိပါက လီမင်တေကို ဤမျှ အခွင့်အရေး ပေးမည် မဟုတ်ပေ။ သို့သော် ပင်းစီးတီး စက်မှုထုတ်လုပ်ရေး အုပ်စုက အရင်းအနှီး အကုန်စိုက်ထုတ်မည်ဟု ပြောထားသဖြင့် အစိုးရထံမှ ငွေတောင်းလျှင်လည်း ရတော့မည် မဟုတ်ပေ။

ထပ်ခါတလဲလဲ တည်ဆောက်ခြင်းမှာ သိသိသာသာ ဖြုန်းတီးခြင်းပင် ဖြစ်သည်။ ထို့ပြင် ဥက္ကဋ္ဌဝမ် ကိုယ်တိုင် ရှိနေသဖြင့် သူတို့ လှည့်စားရန်လည်း မလွယ်ကူပေ။

ထိုစဉ် လီမင်တေက ရုတ်တရက် ပြောလိုက်သည်။

“ဥက္ကဋ္ဌဝမ်... အာရှမှာ အကြီးဆုံးဖြစ်မယ့် ဒီမော်တော်ကား အင်ဂျင်နီယာ ဓာတ်ခွဲခန်းကို တည်ဆောက်ဖို့အတွက် အခက်အခဲ တစ်ခုတော့ ရှိနေပါသေးတယ်။ ဒါကို လူကြီးမင်းတို့ဘက်က ကူညီဖြေရှင်းပေးစေချင်ပါတယ်”

“ဘာအခက်အခဲလဲ... ပွင့်ပွင့်လင်းလင်း ပြောပါ။ နိုင်ငံတော်က သေချာပေါက် ကူညီမှာပါ” ဝမ်တုန်းဟွေးက စိတ်ထဲမှ ကျေနပ်နေသည်။ ပိုက်ဆံတောင် ခင်ဗျားတို့က စိုက်ထုတ်ပေးမှတော့ ကျန်တဲ့ အခက်အခဲက ဘာရှိဦးမှာလဲ။ လုပ်ထုံးလုပ်နည်း ကိစ္စတွေဆိုရင်တော့ အဆင်ပြေအောင် လုပ်ပေးလို့ ရတာပဲဟု တွေးနေမိသည်။

“ကျွန်တော်တို့ မြေနေရာ လိုအပ်ပါတယ်။ စတုရန်းမီတာ ၃ သိန်း ဝန်းကျင်လောက် လိုအပ်မှာပါ။ ဒီပြဿနာကို လူကြီးမင်းတို့ ကူညီပေးစေချင်ပါတယ်။ ဒီဓာတ်ခွဲခန်းက အကျိုးအမြတ် မယူတဲ့ လုပ်ငန်းဖြစ်လို့ မြေနေရာဖိုးကိုတော့ အထူးသက်သာခွင့်လေးတွေ ပေးစေချင်ပါတယ်။ မဟုတ်ရင် ကျွန်တော်တို့ဆီမှာ ရှိတဲ့ ငွေကလည်း လောက်ငှချင်မှ လောက်ငှမှာမို့လို့ပါ”

ဝမ်တုန်းဟွေး မှင်သက်သွားသည်။ ဒီလီမင်တေကတော့ တော်တော် တတ်နိုင်တဲ့လူပဲ။ မူလက သူ ထင်ထားသည်မှာ လီမင်တေတို့က ဓာတ်ခွဲခန်းတွေကို ဆောက်လက်စ၊ ဒါမှမဟုတ် ဆောက်ပြီးသားကို တိုးချဲ့မှာဟု ထင်ထားခဲ့ခြင်း ဖြစ်သည်။ သို့သော် ယခုစကားအရ မြေနေရာသစ် လိုအပ်နေသည် မဟုတ်ပါလော။

စတုရန်းမီတာ ၃ သိန်း ဆိုသည်မှာ သေးငယ်သော နေရာ မဟုတ်ပေ။

“လောင်မင်... ဘာလို့ အဲဒီလောက်အထိ အများကြီး လိုရတာလဲ။ ဓာတ်ခွဲခန်း တစ်ခုဆိုရင် စတုရန်းမီတာ ၁ သောင်းလောက်ဆို မလောက်ဘူးလား။ ခင်ဗျားပြောတဲ့ ဓာတ်ခွဲခန်း ၁၅ ခုလုံးအတွက်တောင် ၁ သိန်းခွဲဆိုရင် လုံလောက်နေပြီ မဟုတ်လား”

“တိုက်မိမှုစမ်းသပ်ခန်း တစ်ခုတည်းတင် ၁ သောင်းဆိုတာ မလုံလောက်ပါဘူး။ ကားကို အရှိန်မြှင့်ဖို့အတွက် အကွာအဝေး လိုအပ်သလို၊ စက်ပစ္စည်း အကြီးကြီးတွေကို တပ်ဆင်ဖို့ နေရာလည်း လိုပါတယ်။ နောက်ပြီး လေခွင်းအားစမ်းသပ်ခန်းတို့၊ ကုန်ကြမ်းစမ်းသပ်ခန်းတို့ဆိုတာ နေရာအကျယ်ကြီး လိုသလို တစ်ခုနဲ့တစ်ခု အနှောင့်အယှက် မဖြစ်ဖို့လည်း လိုပါတယ်။ ဒါကြောင့် ဥက္ကဋ္ဌဝမ်အနေနဲ့ နည်းလမ်းရှာပေးစေချင်ပါတယ်။ ကျွန်တော်တို့ တည်ဆောက်မှာက ဓာတ်ခွဲခန်း ဝင်းကြီးတစ်ခု ဖြစ်ပါတယ်။ အာရှမှာ အကြီးဆုံး ဖြစ်မယ့် မော်တော်ကား အင်ဂျင်နီယာ ဓာတ်ခွဲခန်း ဝင်းကြီးပါ”

လီမင်တေသည် အာရှမှာ အကြီးဆုံးဟူသော စကားကို အထူးပြု ပြောကြားသွားသည်။ ဤသည်မှာ အရာရှိကြီးများအတွက် ဂုဏ်ယူစရာ အောင်မြင်မှုတစ်ခု ဖြစ်ပေသည်။

ဝမ်တုန်းဟွေးက အံကြိတ်ကာ ဆုံးဖြတ်လိုက်သည်။

“ကောင်းပြီ... ကျွန်တော် အထက်လူကြီးတွေကို အစီရင်ခံလိုက်ပါ့မယ်။ အမြန်ဆုံး အကြောင်းပြန်ပေးနိုင်အောင် ကြိုးစားပါ့မယ်”