နတ်ဘုရားများ၏အကူအညီပေးခြင်းခံရသည့်အလား

'ဘယ်ဘက် နံပါတ်၇တံခါးကို ယူလိုက် …'

ထန်ရှုသည် ဝင်မည့်တံခါးကို ရွေးခါနီးဆဲဆဲတွင် ကြယ်အစားကြူးပိုးကောင်၏အတွေးသည် သူ၏စိတ်ထဲတွင် လွင့်ပျံ့လာသည်။ သူ့အမူအရာ ပြောင်းသွားပြီး ခပ်မြန်မြန်မေးလိုက်သည်။

'နံပါတ် ၇ တံခါးမှာ ဘာရှိနေတာလဲ။'

'ပင်မကွန်ပျူတာ…'

ကြယ်အစားကြူးပိုးကောင်သည် နှစ်ပေါင်းများစွာ ကြာအောင် ချိပ်ပိတ်ခံထားရသော်လည်း အကြွင်းအကျန်တစ်ခုလုံးရှိ အခြေအနေနှင့် ပို၍ရင်းနှီးလေသည်။ လူသားကျွမ်းကျင်သူများ၏ စကားများမှတဆင့် ၎င်းတို့လာရခြင်း၏ ရည်ရွယ်ချက်မှာ ဤနေရာ ဖြစ်ကြောင်းကိုလည်း နားလည်ထားသည်။ ထို့အပြင် ၎င်းတို့မျိုးနွယ်စု၏ ဘိုးဘေးများချထားခဲ့သော စည်းမျဥ်းအရ ထန်ရှုအား နှစ် ၂,၀၀၀ တာဝန်ထမ်းဆောင်ပေးရမည်ဖြစ်ရာ ၎င်း၏သခင်ကို အကောင်းဆုံးအရာများ ရရှိရန် ကူညီပေးခြင်းသည် သဘာဝကျပေသည်။

ပင်မကွန်ပျူတာသည် အကြွင်းအကျန်တစ်ခုလုံး၏ အလယ်ဗဟိုနေရာဖြစ်ပြီး လည်ပတ်မှုအားလုံးကို ထိန်းချုပ်ထားသည်။ ပင်မကွန်ပျူတာကို ထိန်းချုပ်ထားသူများသည် ခံစစ် သို့မဟုတ် ထိုးစစ်အသွင်ဖြင့်ဖြစ်စေ အကြွင်းအကျန်တစ်ခုလုံးရှိ စွမ်းအားကို အလွယ်တကူ ပြောင်းနိုင်သည်။

ထန်ရှုကိုယ်တိုင် အဆင့်မြင့်နိုင်ငံသားတစ်ဦး၏ ကြယ်တာရာ တိုက်သင်္ဘောတစ်စင်းကို မြင်ဖူးထားရာ ပင်မကွန်ပျူတာ၏အဓိပ္ပါယ်ကို သူ သိပေသည်။ တုံ့ဆိုင်းခြင်း မရှိဘဲ ဘယ်ဘက်ရှိ နံပါတ်၇တံခါးဆီသို့ အလျင်စလို ပြေးမည့်အစား ကျူးလုံဘက်သို့ လှည့်ကာ ပေါ့ပေါ့ပါးပါး ပြောလိုက်သည်။

“အခု ကျွန်တော်တို့ ဒီကို ရောက်ပြီဆိုတော့ လူစုခွဲလို့ ရပြီ။ ဒီအကြွင်းအကျန်က ကြီးမားပြီး စူးစမ်းဖို့ နေရာများစွာ ရှိတယ်။ ခင်ဗျား တံခါးတစ်ပေါက်ကို ရွေးလိုက် … ကျွန်တော် တခြားတံခါးပေါက်ကို ဝင်မယ်။"

ကျူးလုံသည် ထန်ရှု၏ခွန်အားကို မြင်ထားပြီးဖြစ်ရာ ထိုလူသည် မကြာမီ သို့မဟုတ် နောက်ပိုင်းတွင် အဖွဲ့မှ ထွက်ခွာတော့မည်ကို သိနေပြီဖြစ်သောကြောင့် သူသည် ဤအချိန်တွင် သူ့ကို မတားတော့ဘဲ ခေါင်းညိတ်လိုက်သည်။

"သတိထားပါ။ အန္တရာယ်ရှိတာနဲ့ ချက်ချင်း နေရာရွှေ့ပါ။"

ထန်ရှုက ခေါင်းညိတ်ပြသော်လည်း တံခါးကို တန်းမဝင်ဘဲ တံခါးပေါက်တစ်ခုအား ကျူးလုံတို့လေးယောက်အဖွဲ့ ရွေးကာ ဝင်သွားသည်ကို ကြည့်နေသည်။ ထို့နောက် ကျန်ရှိနေသော ဂျပန်အဖွဲ့ဝင် သုံးဦးအား စိုက်ကြည့်လိုက်သည်။

"အတော်ကြာနေပြီပဲ။"

ထန်ရှုက တည်ငြိမ်စွာ စကားဆိုလိုက်သည်။

ချန်းရွှဲ့မေ၏ရင်ထဲတွင် တုန်လှုပ်သွားပြီး ကု၀ါကိုနှင့် လူလတ်ပိုင်းအရွယ် အမျိုးသားကို လျင်မြန်စွာ မျက်လုံးစွေကြည့်ကာ အားတင်းပြုံးလိုက်ပြီး “တကယ်ကို ကြာခဲ့ပြီပဲ။ နင်က ငါတို့ နောက်ဆုံးတွေ့ခဲ့တဲ့အကြိမ်ထက် အများကြီး ပိုအစွမ်းထက်လာတာပဲ။"

ထန်ရှုက တည်ငြိမ်သော အပြုံးဖြင့် တုံ့ပြန်လိုက်သည်။ သူက ကု၀ါကိုကို ကြည့်ပြီး

"ဒီလူက ဘယ်သူလဲ။"

ကူဝါကို တခဏလောက် စဉ်းစားလိုက်ပြီး သူမလက်ထဲတွင် ဓားမြှောင်တစ်လက် ရုတ်တရက် ပေါ်လာကာ သူမ၏လှုပ်ရှားမှုကို သတိမထားမိစေရဘဲ ထိုလူလတ်ပိုင်းလူ၏နှလုံးတည့်တည့်သို့ ချက်ချင်း ဓားဖြင့် ထိုးလိုက်သည်။

"ဘာကြောင့်လဲ…"

သက်လတ်ပိုင်းအရွယ်အမျိုးသား၏မျက်နှာ အကြီးအကျယ် ပျက်သွားပြီး မယုံကြည်နိုင်ဟန်ဖြင့် ရင်ဘတ်ကို ကြိုးစားဖုံးအုပ်ပြီး အော်ဟစ်လိုက်သည်။

ကု၀ါကိုက သရော်လိုက်ပြီးနောက် ထန်ရှုအား လက်သီးစုကာ အရိုအသေပေးလိုက်ပြီး လေးလေးစားစား ပြောလိုက်သည်။

"သူက ငါ့လူမဟုတ်ဘူး။ ငါတို့က ယာယီ ပူးပေါင်းရုံပါပဲ သူဌေး။ ဒါ့အပြင် သူ့နောက်ကွယ်က အင်အားစုနဲ့လည်း ငါက ဆန့်ကျင်ဘက်ပါ။”

“ကောင်းပြီ။ မင်းမှာ မတူတဲ့ အမြင်တွေ ရှိနေပြီဆိုရင်တော့ မင်း သတ်ပစ်ရမယ်။”

ထန်ရှုက ပြုံးပြီး ခေါင်းညိတ်သည်။

သက်လတ်ပိုင်းအရွယ် အမျိုးသားသည် ထန်ရှုနှင့် ကု၀ါကိုကို မယုံကြည်နိုင်စွာ ကြည့်ရင်း

“မင်းက သူ့ကို သူဌေးလို့ ခေါ်တယ် … မင်း …”

ကု၀ါကိုက မထီတထီဟန်ဖြင့် ကြမ်းပြင်ပေါ်သို့ လဲပြိုနေသောထိုလူကို ကြည့်ပြီး

"ဒီဂျန်ကိုက မင်းရဲ့လူပဲလား သူဌေး…"

ထိုအချိန်တွင် ချန်းရွှဲ့မေသည် သူမ၏မျက်စိရှေ့ မှ အဖြစ်အပျက်ကြောင့် တုန်လှုပ်သွားရသည်။ ကု၀ါကိုသည် သူမ၏အဖွဲ့သားကို ရုတ်တရက် တိုက်ခိုက်မည်ဟု တစ်ခါမှ မထင်ခဲ့မိသလို ထန်ရှုကို 'သူဌေး' အဖြစ်ပင် ပြောဆိုလိမ့်မည်ဟု သူမ မမျှော်လင့်ခဲ့ပေ။ ကု၀ါကိုက သူမအား ရုတ်တရက် တိုက်ခိုက်လာမည်ကို စိုးရိမ်သဖြင့် ခြေလှမ်းအနည်းငယ် နောက်ပြန်ဆုတ်မိတော့သည်။

ခဏတာ တိတ်ဆိတ်သွားပြီးနောက် ထန်ရှုက ရုတ်တရက် မေးလိုက်သည်။

"မင်း လျှို့ဝှက်စစ်ဆင်ရေး လုပ်နေတာလား ရွှဲ့မေ…"

ချန်းရွှဲ့မေ တုံ့ဆိုင်းသွားပြီးနောက် ခေါင်းညိတ်သည်။

"ဟုတ်တယ်။"

"ငါနဲ့ ကု၀ါကိုကြားက ဆက်ဆံရေးကို အပြင်လူတွေ သိလို့မရဘူး။ ဒါကြောင့် အခု မင်း လျှောက်နိုင်တဲ့ လမ်းနှစ်ခု ရှိတယ်။ ပထမတစ်ခုက မင်း ငါ့အရှေ့မှာ သတ်သေလိုက်။ အကြွင်းအကျန်ထဲက ငါ ထွက်သွားတဲ့အခါ မင်းရဲ့အလောင်းကို ယူလာပေးမယ်။ ဒုတိယတစ်ခုက မင်း ငါ့ကို သစ္စာစောင့်သိဖို့ပဲ။ တိုင်းပြည်ကို ဆန့်ကျင်ရရင်တောင် ငါ့ဘက်ကို ရွေးရမယ်။ ဒီနှစ်ခုထဲကို မင်း ကြိုက်တာ ရွေးပါ။"

"နင်က တရုတ်လူမျိုး မဟုတ်ဘူးလား။"

ချန်းရွှဲ့မေ ဒေါသတကြီး အော်ဟစ်လိုက်သည်။

“ဒါပေါ့ … ဒါ​ပေမယ့်​ ငါ့​ဘက်​ကို ငါ ပိုင်ရမယ်။" ထန်ရှုက ခံစားချက်မဲ့စွာ ​ပြောလိုက်သည်။

“မင်းတို့က ငါ့ရဲ့လူတွေဆိုရင် ငါနဲ့သက်ဆိုင်တာက အရင်လာရမယ်။ မင်းတို့တိုင်းပြည်အတွက် မင်းရဲ့တာဝန်က နောက်မှ လာရမယ်။"

"ဒါဆို နင်က ငါ့ကို ဘာလုပ်စေချင်တာလဲ။"

ချန်းရွှဲ့မေက မေးသည်။

"ငါ့အတွက် မင်း ဘာမှ လုပ်ပေးဖို့မလိုဘူး။"

ထန်ရှုက စိတ်မပါလက်မပါ ပြန်ပြောသည်။ “တစ်ခုတော့ မှတ်ထားပါ … ဒီနေရာမှာ မြင်ရကြားရတာတွေကို မင်းရင်ထဲမှာပဲ ထားရမယ်။ ပြီးတော့ အပြင်က မင်းရဲ့အထက်လူကြီးကို အစီရင်ခံလို့ မရဘူး။”

မိနစ်ဝက်လောက် တိတ်ဆိတ်သွားပြီး ချန်း ရွှဲ့မေက

"ငါ ကတိပေးတယ်။"

"မင်းရဲ့စကားကို ငါ မှတ်ထားမယ်။ အခု ထွက်သွားတော့။ ကု၀ါကိုက မင်းကို နောက်ပိုင်းမှာ မထိခိုက်စေရုံသာမကဘဲ ဂျပန်က မင်းရဲ့မစ်ရှင်အတွင်း လျှို့ဝှက်စွာ ကူညီပေးလိမ့်မယ်လို့ ငါ အာမခံတယ်။"

ချန်းရွှဲ့မေက စကားတစ်ခွန်းမှ မဆိုပေ။ လက်ရှိ ထန်ရှုက သူမကို ထိတ်လန့်စေသည်။

"ကု၀ါကိုက ငါနဲ့အတူရှိနေမှာမို့ မင်း ဝင်ရမယ့်တံခါးကို မင်း ရွေးချယ်လို့ရတယ်။ မင်း အန္တရာယ်ကြုံတာနဲ့ ချက်ခြင်း ထွက်ပြေးပြီး ဘယ်ဘက်က ၇ တံခါးပေါက်မှာ ငါ့ကို လာရှာပါ။ အချိန်ရရင်လည်း မင်းညီမလေးကို ဖုန်းဆက်ဖို့ မမေ့နဲ့ဦး။"

ချန်းရွှဲ့မေ၏မျက်နှာ အနည်းငယ် ပြောင်းလဲသွားပြီး ကမန်းကတန်း မေးလာသည်။

"ငါ့ညီမရဲ့လက်ရှိအခြေအနေကို နင် သိလား။ သူ … ဘယ်လိုလဲ။”

"မင်းရဲ့အကာအကွယ်တွေ မရှိတဲ့အချိန် ဘယ်လိုအခြေအနေမျိုး ရောက်သွားမယ်လို့ မင်း ထင်လဲ။ စိတ်အေးအေးထားပါ။ မင်းတို့မိသားစုကနေ သူ ထွက်လာခဲ့ပြီးပြီ။ ငါ့အထင် သူ ပြန်မသွားလောက်တော့ဘူး။ သူ နေဖို့အတွက်ကတော့ သူကြိုက်တဲ့နေရာ … လုံခြုံတဲ့နေရာမှာ နေဖို့ ငါ စီစဉ်ပေးထားတယ်။ မင်းရဲ့မစ်ရှင် ပြီးသွားလို့ ပြည်မကြီးကို ပြန်လာရင် ငါ့ကို အရင်လာရှာလိုက်။"

"ကျေးဇူးတင်ပါတယ်။"

ချန်းရွှဲ့မေက ထန်ရှုကို ကျေးဇူးတင်စွာ စိုက်ကြည့်ပြီး တံခါးပေါက်ရွေးရန် လှည့်လိုက်သည်။

ကု၀ါကိုက ပျောက်ကွယ်သွားသော ချန်းရွှဲ့မေ၏ကျောပြင်ကို စောင့်ကြည့်ပြီး

"သူဌေး … ရှင် သူ့ကို တိုက်ရိုက်သတ်သင့်တယ်လို့ ငါ ထင်တယ်။ နို့မဟုတ်ရင် ငါတို့နှစ်ယောက်ကြားက ဆက်ဆံရေးကို ထုတ်ဖော်လိုက်ရင် ငါတို့နှစ်ယောက်အတွက် ကြီးမားတဲ့ ခြိမ်းခြောက်မှုတစ်ခု ဖြစ်လာလိမ့်မယ်။"

ထန်ရှုက ခေါင်းယမ်းလိုက်ရင်း

“မဟုတ်ဘူး။ သူမရဲ့ပင်ကိုယ်စရိုက်ကို ငါ နည်းနည်း သိပါတယ်။ ငါတို့ သူ့ကို အသုံးမချနိုင်ရင်တောင် သူ့ကတိကို ဘယ်တော့မှ ဖျက်မှာ မဟုတ်ပါဘူး။ အဲ့ဒါအပြင် သူက အရမ်းသန်မာတယ်။ သူ့ရင်ထဲက အရေးကြီးဆုံးလူက အခုငါတို့လူတွေထဲက တစ်ယောက်ပဲ။”

"သူ့ညီမလား …" ကု၀ါကိုက မေးလိုက်သည်။

"မှန်တယ် သူ့ညီမပဲ။" ထန်ရှု ခေါင်းညိတ်လိုက်သည်။ “မင်းရဲ့စိုးရိမ်ပူပန်မှုတွေကို လျှော့လို့ရတယ်။ သူ့နှလုံးသားထဲမှာ သူ့ညီမက သူ့ထက် ပိုအရေးကြီးတယ်။ မင်း ဒီအကြွင်းအကျန်က ထွက်ပြီး ဂျပန်ကို ပြန်သွားတဲ့အခါ တတ်နိုင်သလောက် သူ့တာဝန်က ဘာပဲဖြစ်ဖြစ် မင်းကို ခြိမ်းခြောက်မှု ကြီးကြီးမားမား မဖြစ်စေသရွေ့ သူ့ကို အကူအညီ ပေးလိုက်ပါဦး။"

“ကောင်းပြီ။”

ကူဝါကို လျင်မြန်စွာ သဘောတူလိုက်သည်။ ကြယ်အစားကြူးပိုးကောင်သည် သူ့အတွက် လမ်းကြောင်းကို ရွေးပေးလိုက်ပြီဖြစ်သောကြောင့် သူသည် ဘယ်ဘက်ရှိ နံပါတ်၇တံခါးသို့ တည့်တည့်သွားကာ တံခါးပေါ်ရှိ ခလုတ်ကို ညင်သာစွာ နှိပ်လျက် တံခါးဖွင့်လိုက်ပြီး ထန်ရှုနှင့် ကု၀ါကိုတို့ ဝင်လာသည်။ ဒီရေသဖွယ် လှိုင်းထနေသော အပြာရောင်စင်္ကြန်လမ်းကို ဖြတ်ကျော်ပြီးနောက် ကျယ်ဝန်းသောခန်းမကြီးတစ်ခုသည် သူတို့အရှေ့တွင် ပေါ်လာသည်။

ဝှစ်ဇ်…

အရိပ်အယောင်တစ်ခုက ချက်ချင်း သူတို့ကို တိုက်ခိုက်လာသည်။ ထိုအရာသည် မြန်လွန်းသောကြောင့် ထန်ရှုပင် ရှောင်ရန် အချိန်မရလိုက်ပေ။ သူက ကူဝါကိုအား လက်ပြန်ရိုက်ပြီး အလျင်စလို ဘေးသို့ ဖယ်ရှားလိုက်ရသောကြောင့် ထိုအရိပ်အယောင်၏တိုက်ကွက်သည် သူ၏ရင်ဘတ်ကို ထိသွားတော့သည်။ ထန် ရှု၏ရင်ဘတ်တွင် မီးတောက်တစ်ခု ဖြစ်ပေါ်လာပြီး လွင့်စဥ်သွားကာ ပါးစပ်အပြည့် သွေးတစ်လုပ် အန်လိုက်ရသည်။

"သူဌေး …"

ကူဝါကို မျက်နှာပျက်သွားသည်။ ထန်ရှု၏ဖယ်ရှားမှုကြောင့် နာကျင်မှုအနည်းငယ် ခံစားခဲ့ရသော်လည်း ဒဏ်ရာတစ်စုံတစ်ရာ မရရှိခဲ့ပေ။ သို့သော် သူ ကြမ်းပြင်ပေါ် ခြေချမိချိန်တွင် သူ့ဆီသို့ လွင့်ပျံလာသော ထန်ရှု၏ကျောပြင်ကို တွေ့လိုက်ရတော့သည်။ သူသည် တုံ့ဆိုင်းမနေဘဲ မီတာဒါဇင်များစွာအကွာအဝေးသို့ လျင်မြန်စွာ နောက်ပြန်ဆုတ်သွားကာ ထန်ရှုအား ဖမ်းမိရန် ကြိုးပမ်းလိုက်သည်။

အဟွတ် … အဟွတ် …

သူ့ခန္ဓာကိုယ်ကို ကု၀ါကိုက ဆုပ်ကိုင်ပေးထားစဉ် ထန်ရှုတစ်ယောက် ပါးစပ်အပြည့် သွေးလုပ် အနည်းငယ် ထပ်အန်လိုက်ရသည်။ ထိုးနှက်ချက်တစ်ခုမျှသာ ဖြစ်သော်လည်း သူ၏အတွင်းပိုင်းအင်္ဂါများသည် ပြင်းထန်သောနာကျင်မှုနှင့်ရောနှောကာ ပူလောင်နေသကဲ့သို့ ခံစားရသည်။ သူ၏ ကြောက်စရာကောင်းသော ရုပ်ပိုင်းဆိုင်ရာ ကြံ့ခိုင်မှုကြောင့်သာ မဟုတ်ပါက သည်တိုက်ခိုက်မှုက သူ့ခန္ဓာကိုယ်ကို နှစ်ခြမ်းကွဲသွားစေနိုင်ပေသည်။

ခန်းမထဲတွင် အစိမ်းရောင်နွယ်ပင်တစ်ပင်သည် ၎င်း၏အကိုင်းအခက်များစွာကို ရေဘဝဲကဲ့သို့ ပြုမူကာ ခြိမ်းခြောက်သည့် အနေအထားတွင် ရှိနေသော်လည်း ၎င်း၏ခန္ဓာကိုယ်ကို ဖုံးအုပ်ထားသည့် တောက်ပသော စိမ်းပြာအလင်းရောင်က ၎င်းကို ထူးထူးခြားခြား လှပစေသည်။

အစောပိုင်းက ထန်ရှုကို တိုက်ခိုက်ခဲ့သောအရာသည် ထိုအကိုင်းအခက်များထဲမှ တစ်ခုဖြစ်သည်။

"သတိထားပါ။ အဲ့ဒီအရာက အန္တရာယ်ရှိတယ်။”

ထန်ရှုသည် သူ့ပါးစပ်ထောင့်မှ သွေးများကို သုတ်လိုက်သည်။ သန့်စင်သော ဒဏ်ရာပျောက်ဆေးကို ပါးစပ်ထဲသို့ယူပြီးနောက် သူသည် ကောင်းကင်ဘုံ စကြာဝဠာပညာရပ်ကို လျင်မြန်စွာ လည်ပတ်လိုက်သည်။

ထန်ရှုက သူမကို ကယ်ခဲ့သော လုပ်ဆောင်ချက်သည် ကု၀ါကို၏ရင်ထဲသို့ အတန်ငယ် ထိရှသွားသည်။ ထိုအရာသည် ထန်ရှုက သူ့ကို ဆေးလုံးများစွာ ပေးသည့် ခံစားချက်ထက် နွေးထွေးမှု ပိုပေသည်။ သို့သော် လှပပုံရသော နွယ်ပင်သည် အမှန်တကယ်ပင် ၎င်းတို့အတွက် အန္တရာယ်ရှိသော ခြိမ်းခြောက်မှုတစ်ခု ဖြစ်ကြောင်း ချက်ချင်းပင် သူ ဆုံးဖြတ်နိုင်သည်။ သူ၏ သူဌေးထန်ရှုသည်ပင် မရှောင်နိုင်ဘဲ တန်းဒဏ်ရာရခဲ့သည်။

သူ့အား စိုးရိမ်မှု လျော့ပါးစေသည့်အချက်မှာ နွယ်ပင်သည် ထိုတိုက်ခိုက်မှုပြီးနောက် ထပ်မံမတိုက်ခိုက်တော့ခြင်းပင်ဖြစ်သည်။ အကိုင်းအခက်များ သိပ်မရှည်သောကြောင့် ဖြစ်နိုင်လေသည်။

"အခု ငါတို့ ဘာလုပ်ရမှာလဲ သူဌေး"

ကုဝါကိုက သတိကြီးစွာထားကာ မေးလိုက်သည်။

ထန်ရှုက အသက်ပြင်းပြင်းတစ်ချက် ရှူသွင်းကာ သူ့ဒဏ်ရာအခြေအနေကို ချိန်ညှိပေးရင်း တစ်ချိန်တည်းမှာပင် သူသည် ကြယ်အစားကြူးပိုးကော်င်နှင့် ဆက်သွယ်ခဲ့သည်။ ၎င်းမှရသော အတွေးဖြင့် နောက်ဆုံးတွင် သူသည် ထိုနွယ်ပင်နှင့်ပတ်သက်သည့် အခြေအနေကို ရှာဖွေတွေ့ရှိခဲ့သည်။ ထိုနွယ်ပင်ကို အဆင့်မြင့်လူသားကမ္ဘာများတွင် တောက်ပနွယ်ပင်ဟု လူသိများပြီး အလင်းရောင်ရှိသည့်နေရာတိုင်းတွင် ဆက်လက်ကြီးထွားနိုင်သည်။ နှစ်ပေါင်းများစွာ ကြီးထွားလာပြီးနောက် စိတ်၀ိညာဥ်နှင့် အသိဉာဏ်ရှိသော အပင်ဖြစ်လာပြီး နောက်ဆုံးတွင် အပင်အား နတ်ဆိုး၀ိညာဥ်အဖြစ်သို့ ပြောင်းလဲသွားစေရာ ကမ္ဘာမြေပေါ်ရှိ ကျင့်ကြံရေးအပင်များ ကျင့်ကြံခြင်းနှင့် ကိုက်ညီသည်။

ဤတောက်ပနွယ်ပင်မျိုးသည် အချိန်ကြာလာသည်နှင့် ပို၍ပို၍ အားကောင်းလာမည်။ ကြီးထွားနှုန်း လွန်စွာနှေးကွေးသော်လည်း ဤနွယ်ပင်သည် နှစ်ပေါင်းတစ်မီလီယံကျော် ကြာပြီးနောက် ကြောက်စရာအကောင်းဆုံးဖြစ်ကြောင်း သက်သေပြခဲ့သည်။ မူလက ထွန်းကားခဲ့သော အဆင့်မြင့်ကမ္ဘာတွင်ပင် လူအနည်းငယ်သာ ၎င်းထက် များစွာ အားကောင်းနိုင်ပေသည်။

'သူ့ရဲ့ သက်တမ်းကို ကန့်သတ်ထားတာအရာ မရှိဘူးလို့ ငါ့ကို မပြောနဲ့နော်။'

ထန်ရှုက မျက်မှောင်ကြုတ်ပြီး ကြယ်အစားကြူးပိုးကောင်ကို ပြောလိုက်သည်။

'မဟုတ်ဘူး။ တောက်ပနွယ်ပင်ရဲ့အသက်နဲ့ အသက်ရှည်တာနဲ့ပတ်သက်ပြီး ကန့်သတ်ချက်အချို့ ရှိပါသေးတယ်။ အလင်းစွမ်းအင် ၄၅ရက်လောက် မရရင် သေလိမ့်မယ်။ ဒါပေါ့ … ဒီစပျစ်နွယ်ပင်က အသက်ပိုရှည်လေ၊ ခံနိုင်ရည်ပိုရှိလေပါပဲ။ ဒီတောက်ပနွယ်ပင်ရဲ့ပုံသဏ္ဍာန်အရဆိုရင် နှစ်အနည်းငယ်ကြာတဲ့အထိ အလင်းရောင်စွမ်းအင် မရရှိတောင် ဆက်လက်ရှင်သန်နိုင်သေးတယ်။ ဒါပဲ … အဲ့ဒါက သန်မာတယ်။”

'ဒီအကြွင်းအကျန်နေရာက အဲ့ဒီအပင်ကို အလင်းစွမ်းအင်ပေးတာကြောင့် အခုအချိန်အထိ အသက်ရှင်နေနိုင်တယ်ဆိုတာ မင်း ဆိုလိုတာလား။' ထန်ရှုက မေးလိုက်သည်။

'ဟုတ်တယ်။' ကြယ်အစားကြူးပိုးကောင်က ပြန်ဖြေသည်။

'ငါ ဒီနေရာက ပင်မကွန်ပျူတာကို ထိန်းချုပ်ချင်တယ်။ ဒီတောက်ပတဲ့နွယ်ပင်ကို ငါ ဘယ်လို နှိမ်နင်းလို့ရမလဲ။ ငါ သတ်သင့်သလား။''

ထန်ရှု မျက်မှောင်ကြုတ်ကာ မေးလိုက်သည်။

'ခြိမ်းခြောက်ပြီး ခြိမ်းခြောက်…'

ကြယ်အစားကြူးပိုးကောင်၏အဖြေသည် အမှန်တကယ်တော့ လွန်စွာ ရိုးရှင်းလှသည်။