ချန်ဇီယွင်၊ ဆွဲဆောင်မှုပေါင်းများစွာနှင့် ပြီးပြည့်စုံသော ရင့်ကျက်သည့်အမျိုးသမီး(၂)။

ဝှစ်...

တစ်ခဏအတွင်း ချူတျဲယီသည် သူမ၏ အလယ်အလတ်အဆင့် ဝိညာဉ်ရတနာ မိစ္ဆာတိမ်တိုက် ယပ်တောင်ကို လှုပ်ရှားလိုက်ပြီး၊ ကြောက်မက်ဖွယ် အနက်ရောင် မိစ္ဆာအလင်းတန်း တစ်ခု ချက်ချင်း ထွက်ပေါ်လာကာ ချီဟန်ကို တိုက်ရိုက် တိုက်ခိုက်လိုက်သည်။

ဤသည်မှာ ကြီးမားသော ဖျက်ဆီးရေး စွမ်းအားများ ပါဝင်သည့် မိစ္ဆာတိမ်တိုက် ယပ်တောင်၏ ဖျက်ဆီးခြင်း မိစ္ဆာအလင်းတန်း ဖြစ်သည်။

ထိမှန်သွားသည်နှင့် တပြိုင်နက် ခန္ဓာကိုယ်သာမက ဝိညာဉ်ကိုပါ ဖျက်ဆီးပစ်နိုင်ပြီး အခြေခံအားဖြင့် သေချာပေါက် သေဆုံးစေနိုင်သည်။

"မင်း ကျုပ် ချီဟန်ကို အဲ့ဒီလောက် လွယ်လွယ်နဲ့ သတ်လို့ မရပါဘူး..."

ချီဟန်သည် ဆံပင်များ ထောင်ထလာပြီး သေစေနိုင်သော ခြိမ်းခြောက်မှုကို ခံစားလိုက်ရသည်။

သူသည် ခန္ဓာကိုယ်မှ အဆင့်နိမ့် ကာကွယ်ရေး ဝိညာဉ်ရတနာတစ်ခုဖြစ်သော ရွှမ်သံပျံသန်းခြင်းဒိုင်းကို ချက်ချင်း ထုတ်လိုက်သည်။ ၎င်းသည် အေးစက်သော ယင်နယ်မြေမှ ရရှိသော ရွှမ်သံအပိုင်းအစကြီးဖြင့် ပြုလုပ်ထားသည့် အလွန် ရှားပါးသော ကာကွယ်ရေး ဝိညာဉ်ရတနာ ဖြစ်သည်။

၎င်းသည် မယုံကြည်နိုင်လောက်အောင် မာကျောရုံသာမက ဂါထာမန္တန်ဖြင့် လှုံ့ဆော်လိုက်သည်နှင့် တပြိုင်နက် အသုံးပြုသူ၏ ပတ်လည်တွင် အလိုအလျောက် အကာအကွယ်တစခု ဖွဲ့စည်းပေးနိုင်ပြီး ဝိညာဉ်သန္ဓေသား ကျင့်ကြံသူတစ်ဦး၏ တိုက်ခိုက်မှုကိုပင် ခံနိုင်ရည် ရှိသည်။

သူသည် သေမှာကို အလွန် ကြောက်ရွံ့သော ဝိညာဉ်သန္ဓေသား ကျင့်ကြံသူတစ်ဦး ဖြစ်သောကြောင့်၊ ဤအဆင့်နိမ့် ကာကွယ်ရေး ဝိညာဉ်ရတနာကို တန်ဖိုးကြီးပေး၍ ဝယ်ယူခဲ့သည်ဟု ဆိုနိုင်သည်။

ဒိုင်းအကာအရံ အများအပြား သူ့ပတ်လည်တွင် ချက်ချင်း ပေါ်လာပြီး သူ့ခန္ဓာကိုယ်ကို ရစ်ပတ်ထားလိုက်သည်။

ယင်းသည် အပြည့်အဝ ကာကွယ်ရေးပင်။

"ဝိညာဉ်ဖြန့်ကျက် အဆိပ်ဆူး..."

သို့သော် ထိုအချိန်တွင် ကျိုးစွေ့ လှုပ်ရှားလိုက်ပြီး ဝိညာဉ်လျှို့ဝှက်ပညာရပ်တစ်ခုဖြစ်သော ဝိညာဉ်ဖြန့်ကျက် အဆိပ်ဆူးကို ချက်ချင်း အသုံးပြုလိုက်သည်။

အကြီးစားအောင်မြင်မှု နယ်ပယ်သို့ ရောက်ရှိနေသော ဝိညာဉ်ဖြန့်ကျက် အဆိပ်ဆူးသည် ယခင်ကထက် (၁၀)ဆ ပိုမို စွမ်းအားကြီးမားသည်။

ထို့အပြင် ကျိုးစွေ့သည် ယခုအခါ ဝိညာဉ်သန္ဓေသား ခန္ဓာကိုယ်ကျင့်ကြံခြင်း အဆင့်တွင် ရှိနေပြီဖြစ်ရာ သူ၏ ဝိညာဉ်စွမ်းအားသည် သိသိသာသာ တိုးတက်လာခဲ့သည်။

ဆိုလိုသည်မှာ ဝိညာဉ်ဖြန့်ကျက် အဆိပ်ဆူး၏ စွမ်းအားသည် ယခင်ကထက် ပိုမို ကြောက်မက်ဖွယ် ကောင်းနေသည်။

ရွှမ်သံပျံသန်းခြင်းဒိုင်းသည် ရုပ်ပိုင်းဆိုင်ရာနှင့် ပညာရပ်တိုက်ခိုက်မှု အမျိုးမျိုးကို ပိတ်ဆို့နိုင်သော်လည်း ဝိညာဉ်တိုက်ခိုက်မှုများကို မပိတ်ဆို့နိုင်ပေ။ တစ္ဆေဆန်ဆန် ဝိညာဉ်ဆူးချွန်တစ်ခုသည် သူ့ကို ချက်ချင်း ဗုံးကြဲတိုက်ခိုက်လိုက်တော့သည်။

ဒုန်း...

တိုက်ခိုက်မှု တစ်ချက်တည်းဖြင့် ဝိညာဉ်ဖြန့်ကျက် အဆိပ်ဆူးသည် ချီဟန်၏ ဝိညာဉ်ကို ထိမှန်သွားပြီး စုတ်ဖြဲပစ်လိုက်ရာ၊ ပုရွက်ဆိတ် ထောင်ပေါင်းများစွာ ကိုက်ဖြတ်နေသကဲ့သို့ စူးရှသော နာကျင်မှုတစ်ခု သူ့ထံမှ ပေါက်ကွဲထွက်ပေါ်လာသည်။

"သေစမ်း... မင်းက ဝိညာဉ်တိုက်ခိုက်တဲ့ လျှို့ဝှက်ပညာရပ်ကို တတ်မြောက်ထားတာကိုး..."

ချီဟန် စိတ်ရှုပ်ထွေးသွားပြီး ပြင်းထန်သော နာကျင်မှုကြောင့် အဆင့်နိမ့် ကာကွယ်ရေး ဝိညာဉ်ရတနာကို မထိန်းချုပ်နိုင်တော့သဖြင့် သူ၏ ကာကွယ်ရေးတွင် ဟာကွက်တစ်ခု ဖြစ်ပေါ်သွားစေသည်။

ချူတျဲယီသည် ဤဟာကွက်ကို ချက်ချင်း အခွင့်ကောင်းယူလိုက်ပြီး ဖျက်ဆီးခြင်း မိစ္ဆာအလင်းတန်းတစ်ခု တိုက်ခိုက်လိုက်လေသည်။

ဘုန်း...

ဤဖျက်ဆီးခြင်း မိစ္ဆာအလင်းတန်းသည် ချီဟန်ကို ရက်စက်စွာ ရိုက်ခတ်သွားပြီး သူ၏ ခန္ဓာကိုယ်သည် ဖရဲသီးတစ်လုံးကဲ့သို့ ကွဲကြေသွားကာ၊ ပင်လယ်ပြင်ပေါ်သို့ သွေးများ ဖိတ်စင်ကျလာပြီး ရေပြင်ကို နီရဲသွားစေသည်။

တိုက်ခိုက်မှု တစ်ချက်တည်းဖြင့် ဝိညာဉ်သန္ဓေသား အစောပိုင်းအဆင့် မိစ္ဆာကျင့်ကြံသူ ချီဟန်သည် ပြန်လည်တိုက်ခိုက်နိုင်စွမ်း မရှိဘဲ ချူတျဲယီ၏ လက်ချက်ဖြင့် သေဆုံးသွားခဲ့ရသည်။

သူ ရုန်းကန်ခြင်းပင် မပြုနိုင်လိုက်ပေ။

ဝှစ်...

ချီဟန် သေဆုံးသွားသော အချိန်တွင် အနက်ရောင် အလင်းတန်းတစ်ခုသည် ထူးကဲသော အရှိန်အဟုန်ဖြင့် ချူတျဲယီ၏ ခန္ဓာကိုယ်ထဲသို့ ဝင်ရောက်ရန် ကြိုးစားလိုက်သည်။

ယင်းသည် အငြိုးအတေး လက်နက်ပျံ ဖြစ်သည်။

သို့သော် ချူတျဲယီသည် တည်ငြိမ်အေးဆေးစွာဖြင့် သူမ၏ ခန္ဓာကိုယ်မှ ကောက်ရိုးအရုပ်တစ်ရုပ်ကို ထုတ်လိုက်ပြီး သူမရှေ့တွင် အတားအဆီးတစ်ခု ချက်ချင်း ဖွဲ့စည်းလိုက်သည်။

အနက်ရောင် အလင်းတန်းသည် ကောက်ရိုးအရုပ်တွင် ချက်ချင်း တွယ်ကပ်သွားပြီး အရုပ်ကို မဲနက်သွားစေသည်။

"ဟတ်ဟတ်... ရှင်က သေပြီးတာတောင် ငါ့ကို ကျိန်စာတိုက်ချင်သေးတာပဲ... အဲ့လောက် လွယ်မလား..."

ချူတျဲယီသည် ဤအရာကို မျှော်လင့်ထားပြီးဖြစ်ပုံရကာ မဲ့ပြုံးပြုံးလိုက်သည်။

"အဲ့ဒါ ဘာလဲ..."

ကျိုးစွေ့ စူးစမ်းလိုစိတ်ဖြင့် မေးလိုက်သည်။

"ယောက်ျား... ဒါက ကျွန်မတို့ ကောင်းကင်မိစ္ဆာဂိုဏ်းရဲ့ သီးသန့် ရုပ်သေး လျှို့ဝှက်ပညာရပ်... ကိုယ်ပွားရုပ်သေးလေ..."

"ဝိညာဉ်လျှို့ဝှက်ပညာရပ်ကို ပိတ်ဆို့လို့ မရပေမယ့် လွှဲပြောင်းလို့ ရပါတယ်..."

"ဒါကြောင့် ကျွန်မတို့ ကောင်းကင်မိစ္ဆာဂိုဏ်းရဲ့ ဘိုးဘေးတွေက ထူးခြားတဲ့ လျှို့ဝှက်ပညာရပ်တစ်ခုကို ဖန်တီးခဲ့ကြတယ်... အစားထိုးရုပ်သေးပေါ့..."

"ရုပ်သေးကို ဖန်တီးနေစဉ်မှာ ကျွန်မတို့ရဲ့ ကိုယ်ပိုင် အရှိန်အဝါကို ထည့်သွင်းထားသရွေ့... လက်တွေ့သဘောအရ ကျွန်မတို့ရဲ့ ကိုယ်ပွား ဖြစ်လာတယ်..."

"ဒါပေမဲ့ ဝိညာဉ်လျှို့ဝှက်ပညာရပ်မှာ ဉာဏ်ရည်ဉာဏ်သွေး မရှိဘူး... အရှိန်အဝါပေါ် မူတည်ပြီး ခြေရာခံတာ..."

"ဒီလိုလုပ်ခြင်းအားဖြင့် ကျွန်မတို့က ရုပ်သေးကို အစားထိုး အသုံးပြုပြီး ဝိညာဉ်လျှို့ဝှက်ပညာရပ်ရဲ့ စွမ်းအားကို ခံနိုင်ရည် ရှိစေတယ်..."

"အချိန်တန်ရင် ရုပ်သေးကို ဖျက်ဆီးလိုက်ရုံနဲ့ ဝိညာဉ်လျှို့ဝှက်ပညာရပ်ရဲ့ စွမ်းအား ပျောက်ကွယ်သွားရော..."

"ဒါ့အပြင် ရုပ်သေးတွေက ဝိညာဉ်လျှို့ဝှက်ပညာရပ်ကို ပိတ်ဆို့နိုင်ရုံတင်မကဘူး... ကျိန်စာအမျိုးမျိုးကို ကာကွယ်နိုင်ပြီး ဒဏ်ရာတွေကိုလည်း လွှဲပြောင်းပေးနိုင်တယ်..."

"အနည်းဆုံး ပြောရရင် ဒီလျှို့ဝှက်ပညာရပ်က အကန့်အသတ် မရှိဘူး..."

ချူတျဲယီ ရှင်းပြလိုက်သည်။

ဤသည်မှာ ကောင်းကင်မိစ္ဆာဂိုဏ်းက ဝိညာဉ်လျှို့ဝှက်ပညာရပ်ကို ကိုင်တွယ်ဖြေရှင်းမည့် နည်းလမ်းတစ်ခုလည်း ဖြစ်သည်။

မည်သို့ပင်ဆိုစေ သူမသည် (၁၅) နှစ်တာအချိန်ကို အလကား ဖြုန်းတီးခဲ့ခြင်း မဟုတ်ပေ။

ကောင်းကင်မိစ္ဆာဂိုဏ်း၏ စာကြည့်တိုက်မှ လျှို့ဝှက်ပညာရပ် မြောက်မြားစွာကို ရရှိခဲ့သည်။

ဤပညာရပ် တစ်ခုစီသည် ချန်လန်ပင်လယ်ဒေသကို တုန်လှုပ်စေနိုင်သည်။

"ငါ သဘောပေါက်ပြီ..."

ကျိုးစွေ့ ရုတ်တရက် သဘောပေါက်သွားသည်။ ရုပ်သေးပညာ၏ မူလသဘောတရားများသည် သူ၏ ကိုယ်ပွားပညာရပ်နှင့် များစွာ ကွာခြားခြင်း မရှိပေ။

ရုပ်သေးကိုယ်ပွားများသည် ထုတ်လုပ်ရန် ဈေးသက်သာပြီး ပုံမှန်နည်းလမ်းတစ်ခုအဖြစ် အသုံးပြုနိုင်သည်သာ ကွာခြားသည်။

မိစ္ဆာကျင့်ကြံသူများသည် အတော်လေး ဉာဏ်ကောင်းကြသည်။

ဤလျှို့ဝှက်ပညာရပ်ကို မိစ္ဆာဂိုဏ်းက ဖန်တီးခဲ့ခြင်း ဖြစ်သောကြောင့် သဘာဝကျကျပင် မိစ္ဆာဂိုဏ်းမှ လူတစ်ယောက်က ဖြေရှင်းရပေမည်။

စောစောပိုင်းက သူသည် ဝူကျိမဟာမိတ်အဖွဲ့တွင် ဝိညာဉ်လျှို့ဝှက်ပညာရပ်ကို ခုခံနိုင်မည့် သက်ဆိုင်ရာ ပညာရပ်ကို ရှာဖွေရန် မျှော်လင့်ခဲ့သည်။ သူ လမ်းကြောင်းမှား ရှာဖွေနေခဲ့မှန်း မသိခဲ့ပေ။ မည်သည့်နေရာတွင်မျှ ရှာမတွေ့ခဲ့ချေ။ ကောင်းကင်မိစ္ဆာဂိုဏ်းမှ ကျင့်ကြံသူတစ်ဦး၏ အကူအညီကို သူ လိုအပ်နေဆဲပင်။

ချူတျဲယီသည် ကောင်းကင်မိစ္ဆာဂိုဏ်း၏ သူတော်စင်မ ဖြစ်ပြီး လက်ရှိတွင် ကောင်းကင်မိစ္ဆာဂိုဏ်း၏ ဝိညာဉ်သန္ဓေသား စီနီယာကျင့်ကြံသူ ဖြစ်သောကြောင့် ထိုကဲ့သို့သော ပညာရပ်များကို ပိုင်ဆိုင်ထားခြင်းမှာ အတော်လေး ပုံမှန်ဖြစ်သည်။

"ဒီလျှို့ဝှက်ပညာရပ်ကို ကိုယ့်ကို သင်ပေးလို့ ရမလား..."

ကျိုးစွေ့ မေးလိုက်သည်။

"သေချာတာပေါ့... ပြဿနာ မရှိပါဘူး..."

"တကယ်တော့ ရှင်က ဗဟုသုတ ကြွယ်ဝပြီး ကျင့်ကြံခြင်း အတတ်ပညာတစ်ရာကို လေ့လာရတာ နှစ်သက်မှန်း ကျွန်မ သိပါတယ်..."

"ဒါကြောင့် ဒီတစ်ခါ ကောင်းကင်မိစ္ဆာဂိုဏ်း စာကြည့်တိုက်မှာ အမွေအနှစ် ကျင့်ကြံခြင်း နည်းလမ်းတွေ အများကြီးကို ကျွန်မ ကူးယူခဲ့တယ်..."

"ကောင်းကင်မိစ္ဆာဂိုဏ်းက ကန့်သတ်မထားတဲ့ဟာ အကုန်လုံးကို ကျွန်မ ကူးယူခဲ့တာ..."

"ဒါကြောင့်သာ မဟုတ်ရင် ကျွန်မ ‌အစောကြီးကတည်းက ပြန်ရောက်လာလောက်ပြီ...”

ချူတျဲယီသည် ကျိုးစွေ့ကို ချစ်ခင်မြတ်နိုးစွာ ကြည့်လိုက်သည်။

သူမသည် ကျိုးစွေ့အတွက် အရာရာ လုပ်ဆောင်ပေးခဲ့သည်။

"ဘာရယ်..."

ကျိုးစွေ့ မျက်တောင်ခတ်လိုက်မိသည်။ သူ စိတ်လှုပ်ရှားမှုဖြင့် ပြည့်နှက်သွားသည်။

အကယ်၍ ကောင်းကင်မိစ္ဆာဂိုဏ်းမှ ကျင့်ကြံသူ မျိုးဆက်ပေါင်းများစွာသာ ချူတျဲယီ လုပ်ဆောင်ခဲ့သည်ကို သိရှိပါက ဒေါသထွက်ကြပေလိမ့်မည်။ နှစ်ပေါင်းထောင်ချီ ဂရုတစိုက် ထိန်းသိမ်းထားခဲ့သော သူတို့၏ အမွေအနှစ် ကျင့်ကြံခြင်း နည်းလမ်းများကို ယခု သူတော်စင်မက ပေးလိုက်ပြီ ဖြစ်သည်။

သို့သော် သူ့အတွက်မူ ၎င်းသည် သိသာထင်ရှားသော ကြီးပွားချမ်းသာမှုပင်။

မည်သို့ပင်ဆိုစေ ‘စာအုပ်ကူ’သည် ကြီးထွားရန်အတွက် ကျင့်ကြံခြင်း လျှို့ဝှက်ချက်များနှင့် အမွေအနှစ် ကျောက်စိမ်းမှတ်တမ်း အမြောက်အမြား လိုအပ်သည်။

ကောင်းကင်မိစ္ဆာဂိုဏ်းသည် ဝိညာဉ်သန္ဓေသား ဂိုဏ်းတစ်ခုဖြစ်ပြီး ၎င်းစုဆောင်းထားသော ကျင့်ကြံခြင်း လျှို့ဝှက်ချက် ပမာဏသည် သာမန် ကျင့်ကြံသူများ၏ နားလည်နိုင်စွမ်းထက် ကျော်လွန်နေသည်။

ဝိညာဉ်သန္ဓေသား အင်အားစုဖြစ်သော ဝူကျိမဟာမိတ်အဖွဲ့ပင်လျှင် ကောင်းကင်မိစ္ဆာဂိုဏ်းကဲ့သို့သော ရှေးဟောင်း မိစ္ဆာဂိုဏ်းနှင့် မယှဉ်နိုင်ပေ။

"ကျန်နေတဲ့ ဝိညာဉ်သန္ဓေသား မိစ္ဆာကျင့်ကြံသူ နှစ်ယောက်ကိုလည်း ရှင်းပစ်ရအောင်..."

ကျိုးစွေ့သည် ကောင်းကင်မိစ္ဆာဂိုဏ်း၏ လျှို့ဝှက်မှတ်တမ်း အမျိုးမျိုးကို အရင်ဦးဆုံး ရယူချင်နေသော်လည်း ယခုအချိန်သည် ထိုအရာများကို လုပ်ဆောင်ရမည့်အချိန် မဟုတ်ပေ။ သူတို့သည် ကျန်ရှိနေသော ဝိညာဉ်သန္ဓေသား မိစ္ဆာကျင့်ကြံသူ နှစ်ဦးကို အရင် ကိုင်တွယ်ရပေမည်။

အရိုးဖြူဘိုးဘေးနှင့် သရဲနီဘိုးဘေးတို့သည် လောလောဆယ် အိပ်မက်နယ်မြေထဲတွင် ပိတ်မိနေကြသော်လည်း မည်မျှကြာကြာ ထိန်းထားနိုင်မည်ကို မည်သူမျှ မသိနိုင်ပေ။

ပြဿနာကို တတ်နိုင်သမျှ မြန်မြန် ဖြေရှင်းလိုက်ခြင်းက ပိုကောင်းပေသည်။

ဝှစ်...

တစ်ခဏချင်းတွင် သူ၏ ပုံရိပ်သည် လက်ခနဲ ဖြစ်သွားပြီး အရိုးဖြူဘိုးဘေးထံသို့ ချက်ချင်း သတ်ဖြတ်ရန် သွားလိုက်သည်။

"နောက်ဆုံးတော့ ပေါ်လာပြီပေါ့... ဟမ့်..."

"ပုံရိပ်ယောင် ပညာရပ်တစ်ခုက ငါ အရိုးဖြူဘိုးဘေးကို ကိုင်တွယ်နိုင်မယ်လို့ မင်း ထင်နေတာလား..."

"အရိုးဖြူ ဝိညာဉ်အိုကြီးက ဓားသိုင်းအကြောင်း ရှင်းရှင်းလင်းလင်း နားလည်ထားတဲ့ ထိပ်တန်း ဓားသိုင်းကျင့်ကြံသူဆိုတာ မင်း သိထားသင့်တယ်..."

"ဘယ်လို ပုံရိပ်ယောင် ပညာရပ်မျိုးကိုမဆို ငါ လွယ်လွယ်လေး ဖောက်ထွင်းမြင်နိုင်တယ်... သေလိုက်တော့..."

အရိုးဖြူဘိုးဘေးက မဲ့ပြုံးပြုံးလိုက်ပြီး ရှေးဟောင်း မိစ္ဆာများ၏ အရိုးများဖြင့် ပြုလုပ်ထားသော အဆင့်နိမ့် ဝိညာဉ်ရတနာ အရိုးဖြူဓားကို ချက်ချင်း ဆွဲထုတ်လိုက်သည်။ ဓားသွားသည် ဖြူဖွေးနေပြီး ပြိုင်ဘက်ကင်းအောင် ထက်ရှနေချေသည်။

အရိုးဖြူဓားတွင် အေးစက်ပြီး နက်နဲယင်စွမ်းအားများပင် ပါရှိသည်။

ပြိုင်ဘက်ကို ထိခိုက်လိုက်သည်နှင့် ရန်သူကို လွယ်ကူစွာ စုတ်ဖြဲနိုင်ပြီး ပြိုင်ဘက်ထဲသို့ နက်နဲယင်စွမ်းအားများ စိမ့်ဝင်သွားစေနိုင်သည်။

ခုတ်ချက်တစ်ချက်တည်းက အေးစက်သော ဓားစွမ်းအင်ကို ထုတ်လွှတ်နိုင်ပြီး ပြိုင်ဘက်ကို ဘာမျှမကျန်အောင် ဖြစ်စေနိုင်သည်။

ဘုန်း...

တစ်ခဏအတွင်း အရိုးဖြူဘိုးဘေး လှုပ်ရှားလိုက်ပြီး အရိုးဖြူဓားကို ဝှေ့ယမ်းကာ ပေတစ်ရာရှည်သော အဖြူရောင် ဓားအလင်းတန်းကို စေလွှတ်လိုက်သည်။ အဆိပ်ပြင်း မြွေတစ်ကောင်၏ အသက်ရှူသံကဲ့သို့ ပေါက်ကွဲထွက်ပေါ်လာပြီး ကောင်းကင်ကို ထိုးဖောက်ကာ ကြောက်မက်ဖွယ် ဓားဆန္ဒပါဝင်နေသည်။

ပတ်ဝန်းကျင် နေရာလပ်တွင် ဖြူဖွေးသော အရိုးများနှင့် သွေးပင်လယ် အလောင်းကောင်များ ပြည့်နှက်နေသကဲ့သို့ ဓားဆန္ဒသည် ခြိမ်းခြောက်နေ၏။ သေခြင်းတရား၏ အရှိန်အဝါသည် အလွန်တရာ ကြောက်မက်ဖွယ် ကောင်းလှသည်။

"မဖြစ်နိုင်တာ... ငါ့ရဲ့ အရိုးဖြူဓားက မင်းကို မသတ်နိုင်ဘူးလား..."

သို့သော် နောက်တစ်စက္ကန့်တွင် အရိုးဖြူဘိုးဘေး မှင်တက်သွားရသည်။ အဘယ်ကြောင့်ဆိုသော် ရုတ်တရက် ပေါ်လာသော ပုံရိပ်ကို သူ၏ ဓားက ရှင်းလင်းစွာ ထိမှန်သွားသည်ကို ခံစားလိုက်ရသောကြောင့် ဖြစ်သည်။

သို့သော် ဓားချက်များသည် မပျက်စီးနိုင်သော သတ္တုရိုင်းကို ရိုက်ခတ်မိသကဲ့သို့ မီးပွားများ ထွက်ပေါ်လာသည်။

သူ၏ အရိုးဖြူ ဓားချီသည် သူ့ရှေ့မှ လူကို နှစ်ပိုင်း မဖြတ်နိုင်ခဲ့ပေ။

ဤသည်မှာ မကြုံစဖူး အတွေ့အကြုံဖြစ်သဖြင့် သူ အံ့အားသင့်သွားရသည်။

ဝိညာဉ်သန္ဓေသား ကျင့်ကြံသူတစ်ဦး အဆင့်နိမ့် ကာကွယ်ရေး ဝိညာဉ်ရတနာကို ဝတ်ဆင်ထားလျှင်ပင် သူ၏ ဓားကို ခံနိုင်ရည်ရှိရန် ခက်ခဲပေလိမ့်မည်။

သို့သော် ရုတ်တရက် ပေါ်လာသော ရန်သူသည် သူ၏ အရိုးဖြူ ဓားချီကို ပိတ်ဆို့နိုင်ခဲ့သည်။

ယင်းသည် ရိုးရိုးရှင်းရှင်းပင် မယုံကြည်နိုင်လောက်စရာ ဖြစ်သည်။