ဝိညာဉ်စွမ်းအင် ဗဟိုချက်

ယီထျန်းယွမ်သည် ၎င်းတို့၏ အကြည့်များကို ဂရုမစိုက်ဘဲ အောက်သို့သာ ဆက်လက် ပြေးဆင်းနေခဲ့သည်။ သူသည် သူ၏ ခွန်အားအားလုံးကို ထုတ်ဖော်ခြင်း မရှိဘဲ ပုံမှန်အရှိန်ဖြင့်သာ အနက်ဆုံးနေရာသို့ ဆင်းသက်နေခြင်း ဖြစ်သည်။

မည်သူမျှ သူ၏ အရှိန်ကို မလှောင်ပြောင်ဝံ့ကြတော့ချေ။ သူသည် အလွန် သန်မာလှသဖြင့် ထူးကဲသော အရည်အချင်း ရှိသည်ဟုသာ လူတိုင်းက ယူဆထားကြသည်။ အခြားသူများမှာ လှုပ်ရှားရန်ပင် ခက်ခဲနေချိန်တွင် သူကမူ ရှေ့သို့ ဆက်လက် တိုးဝင်နိုင်နေခြင်းက လူတိုင်းကို မှင်တက်မိစေခဲ့သည်။

သူသည် တဖြည်းဖြည်းနှင့် မီတာ ကိုးသောင်းအထိ ရောက်ရှိသွားပြီးနောက် မီတာ တစ်သိန်းအထိ ဆက်လက် ပြေးဆင်းသွားခဲ့သည်။ ဤသည်မှာ ဤလူသားမျိုးနွယ်သည် အောက်ခြေအထိ ရောက်ရှိနိုင်လိမ့်မည်ဟု လူတိုင်းကို ထင်မှတ်သွားစေခဲ့သည်။

ဤအခြေအနေမှာ အပြင်ဘက်ရှိ အကြီးအကဲများကိုပါ လျင်မြန်စွာ သိရှိသွားစေခဲ့သည်။ မကြာမီမှာပင် အကြီးအကဲယုနှင့် အခြားသူများ ရောက်ရှိလာကြသည်။ ၎င်းတို့သည် ဤအခြေအနေကို မြင်သည့်အခါ မနေနိုင်ဘဲ ခေါင်းခါလိုက်ကြသည်။

“ဒီကောင်လေးက မီတာ ကိုးသောင်းအထိတောင် ရောက်နေပြီလား... သူ ဘယ်လိုများ ကျင့်ကြံခဲ့တာလဲ... မကြာခင်မှာ သူ ငါတို့လို အဘိုးကြီးတွေကိုတောင် ကျော်တက်သွားလိမ့်မယ်လို့ ငါ ထင်တယ်...”

ယုယန်လုံနှင့် မင်ယုချင်း တို့သည် ခေါင်းခါလျက်ပင် မည်သို့ ပြောရမှန်း မသိတော့ပေ။ အချိန်အနည်းငယ်အတွင်းမှာပင် ယီထျန်းယွမ်သည် ဤမျှသော အောင်မြင်မှုကို ရရှိခဲ့ခြင်းပင် ဖြစ်သည်။ ဤအတိုင်းဆိုလျှင် ယီထျန်းယွမ်သည် ၎င်းတို့ကို အလွယ်တကူ ကျော်တက်သွားပေလိမ့်မည်။

“အကြီးအကဲနှစ်ဦးက နှိမ့်ချလွန်းနေပါပြီ... သူ အောက်ခြေအထိ ရောက်နိုင်ရင်တောင် အကြီးအကဲတို့ကို ချက်ချင်း ကျော်တက်နိုင်မယ်လို့တော့ အတတ်ပြောလို့ မရသေးပါဘူး...”

ဘေးနားရှိ အုပ်ထိန်းသူ တစ်ဦးက ဆိုသည်။

ဤစကားမှာ အနည်းငယ် မြှောက်ပင့်ပြောဆိုခြင်း ဖြစ်သော်လည်း လိမ်ညာခြင်း မဟုတ်ချေ။ ၎င်းတို့နှစ်ဦးမှာ အဆင့် ၇ သို့မဟုတ် ၈ မြေကမ္ဘာအရှင် အဆင့်မှ ထိုးဖောက်လာသူများ ဖြစ်ကြသည်။ ကောင်းကင်သခင် ဒုတိယအဆင့် ကျင့်စဉ်သာ ရှိသော်လည်း နတ်ဆိုးမီးလျှံ၏ စွမ်းအားနှင့် ပေါင်းစပ်လိုက်လျှင် သာမန် ကောင်းကင်သခင်များထက် များစွာ သာလွန်လှသည်။ အမှန်တကယ် ထုတ်ဖော်လိုက်ပါက သာမန် ပဉ္စမ သို့မဟုတ် ဆဋ္ဌမအဆင့် ကောင်းကင်သခင်များပင် ၎င်းတို့ကို တားဆီးနိုင်မည် မဟုတ်ပေ။

ကျင့်စဉ်အဆင့်မှာ အလွန် အရေးကြီးသော်လည်း အခြေခံ ခိုင်မာမှုမှာ ပို၍ အရေးကြီးသည်။ အခြေခံ ခိုင်မာပါက အဆင့်ကျော်၍ သတ်ဖြတ်ရန်မှာ ပြဿနာ မဟုတ်ပေ။ ၎င်းတို့၏ ကျင့်ကြံခြင်း တိုးတက်မှု နှေးကွေးခြင်းမှာ မီးလျှံနှင့် ပတ်သက်သော ပြဿနာကြောင့်သာ ဖြစ်သည်။

နတ်ဆိုးမီးလျှံကြောင့် ၎င်းတို့၏ ထိုးဖောက်မှုမှာ အနည်းငယ် နှေးကွေးနေသော်လည်း ၎င်းတို့မှာ အားနည်းသည်ဟု မဆိုလိုပေ။ သို့မဟုတ်ပါက ကောင်းကင်သခင် ဒုတိယ သို့မဟုတ် တတိယအဆင့်ဖြင့် အကြီးအကဲ ဖြစ်လာနိုင်မည် မဟုတ်ပေ။ အရည်အချင်း မရှိပါက လူတိုင်း၏ လေးစားမှုကို ရရှိရန် မဖြစ်နိုင်ချေ။

“ဒီလို စကားတွေ ပြောနေဖို့ မလိုပါဘူး... သူသာ မြန်မြန် သန်မာလာမယ်ဆိုရင် ငါတို့ ပိုပြီးတော့တောင် ဝမ်းသာမိဦးမှာပါ...”

မည်သည့် ဆရာမဆို မိမိ၏ တပည့်က မိမိထက် သာလွန်သွားကာ ပိုမို သန်မာလာသည်ကို မြင်လိုကြသည်သာ ဖြစ်သည်။ တပည့်က ဆရာ့ထက် သာလွန်သွားခြင်းက ဆရာ့အတွက် ဂုဏ်ယူစရာ အကောင်းဆုံး ကိစ္စပင် မဟုတ်ပါလား။

သို့သော် ၎င်းတို့ အနည်းငယ်တော့ အနေရခက်နေကြသည်။ အမှန်တကယ်တော့ ၎င်းတို့သည် နတ်ဆိုးမီးလျှံ အကြောင်းကိုသာ အနည်းငယ် သင်ကြားပေးခဲ့ရခြင်း ဖြစ်ပြီး ကျန်ရှိသည်များကိုမူ သင်ကြားပေးခဲ့ဖူးခြင်း မရှိပေ။ ဤသည်မှာ ၎င်းတို့ သင်ကြားပေးခဲ့သော တပည့်ဟု ပြောရန်မှာ အနည်းငယ် အတင်းအကျပ် ဆန်နေသကဲ့သို့ပင်။

“ဒါက အကြီးအကဲနှစ်ဦးရဲ့ တပည့်သစ်လား... ကြည့်ရတာ ဒီတစ်ကြိမ် နတ်ဘုရားတက်လှမ်းခြင်းတိုက်ပွဲ အတွက်တော့ အကြီးမားဆုံးသော အားကိုးရာ တစ်ခု ဖြစ်လာတော့မှာပဲ...”

ထိုအချိန်တွင် အပြင်ဘက်မှ အကြီးအကဲ အချို့ လျှောက်လာကြသည်။ ၎င်းတို့သည် ယီထျန်းယွမ်ကို မြင်သည့်အခါ ခေါင်းညိတ်ပြကြပြီး အလွန်ပင် ချီးကျူးလိုက်ကြသည်။ ဤမျှသော ခွန်အားကို မြင်တွေ့လိုက်ရသည်ဖြစ်ရာ အခြား ပြောစရာ မရှိတော့ပေ။

ယခုအခါ ၎င်းတို့သည် လူသားမျိုးနွယ် အဆင့်အတန်းကို ထည့်သွင်းစဉ်းစားနေမည်ဆိုပါက ၎င်းတို့၏ အမြင်ကျဉ်းမြောင်းမှုသာ ဖြစ်ပေလိမ့်မည်။ အကြီးအကဲ အဆင့်အတန်းသို့ ရောက်ရှိနိုင်သူများသည် ကိုယ်ကျိုးထက် အဖွဲ့အစည်း၏ အကျိုးအမြတ်ကိုသာ အဓိကထားကြသူများ ဖြစ်သည်။

“ဟုတ်ပါပေ့... ဒါကို ကြည့်ခြင်းအားဖြင့် ငါတို့ နတ်ဘုရားတက်လှမ်းခြင်းတိုက်ပွဲမှာ အားကိုးရမယ့်သူ နှစ်ယောက် ရှိနေပြီပေါ့။ အရေးကြီးဆုံးက သူက ငါတို့ရဲ့ တပည့်ရင်း ဖြစ်နေတာပဲ။ မုရုန်ရှောင်း ကတော့ ငါတို့ ထျန်ယုနတ်ဘုရားနယ်မြေရဲ့ တပည့် မဟုတ်ပါဘူး... ငါတို့ကို ကူညီဖို့အတွက် ဖိတ်ခေါ်ထားတဲ့ တပည့်ပဲလေ...”

၎င်းတို့အားလုံး ခေါင်းခါလိုက်ကြသည်။ မိမိတို့ဘက်မှ အဓိကခန်းမ၏ ပထမဆုံးသော တပည့်ကြီးမှာ မုရုန်ရှောင်းနှင့် များစွာ ကွာခြားနေသည်ကို ၎င်းတို့ မြင်တွေ့နေရသည်။ နှစ်ဦးသားကြားရှိ ကွာခြားချက်မှာ ချောက်ကမ်းပါးကြီး တစ်ခုအလားပင်။ ကျင့်စဉ်ချင်း တူညီနေလျှင်ပင် အဘယ်ကြောင့် ဤမျှအထိ ကွာခြားနေရသနည်း။

ကံကောင်းသည်မှာ ယီထျန်းယွမ်သည် ၎င်းတို့ကို ကျေနပ်အားရစေခဲ့သည်။ ဤကဲ့သို့သော ထူးချွန်သည့် ပါရမီရှင်တစ်ဦး ပေါ်ထွက်လာခြင်းက နတ်ဘုရားတက်လှမ်းခြင်းတိုက်ပွဲတွင် ကောင်းမွန်သော အဆင့်တစ်ခု ရရှိသည့်အခါ အကျိုးအမြတ်များကို များစွာ ခွဲဝေပေးရန် မလိုတော့ပေ။ ယီထျန်းယွမ်မှာ မိမိတို့၏ တပည့်ဖြစ်သဖြင့် အကျိုးအမြတ်များကို ခွဲဝေပေးရန် မလိုသော်လည်း မုရုန်ရှောင်း အတွက်မူ အများအပြား ခွဲဝေပေးရမည် ဖြစ်ကာ ၎င်းတို့အနေဖြင့် အနည်းငယ်သာ ရရှိပေလိမ့်မည်။

ဤပေးဆပ်ရမှုမှာ အလွန်ပင် မြင့်မားလှသော်လည်း ထျန်ယုနတ်ဘုရားနယ်မြေ၏ ဂုဏ်သိက္ခာကို ထိန်းသိမ်းရန်အတွက်မူ ဤသို့ လုပ်ဆောင်ရခြင်းပင် ဖြစ်သည်။

ထိုအချိန်တွင် အကြီးအကဲနျန် လျင်မြန်စွာ ရောက်ရှိလာသည်။ သူမသည်လည်း ဤသတင်းကြောင့် စိတ်ဝင်စားသွားခြင်း ဖြစ်ရပေလိမ့်မည်။ သူမသည် လှေကားထစ်များမှတစ်ဆင့် အောက်သို့ ငုံ့ကြည့်လိုက်သည့်အခါ ယီထျန်းယွမ်သည် ပန်းတိုင်သို့ ရောက်ရှိလုနီးပါး ဖြစ်နေသည်ကို မြင်တွေ့လိုက်ရသဖြင့် ရယ်မောလိုက်သည်။

“ငါက အချိန်အကြာကြီး ယူရလိမ့်မယ်လို့ ထင်ထားတာ... ငါ ထွက်သွားတာ မကြာသေးဘူး... သူက အောက်ခြေကိုတောင် ရောက်တော့မှာပဲ...”

“အကြီးအကဲနျန်... ယီထျန်းယွမ်က ဘယ်လိုဖြစ်ပြီး ဒီလောက် မြန်မြန် ထိုးဖောက်နိုင်ရတာလဲ... အခြေခံကော ခိုင်မာရဲ့လား...”

ယုယန်လုံသည် အကြီးအကဲနျန်ကို မြင်သည့်အခါ အလျင်အမြန်ပင် လာရောက် မေးမြန်းလိုက်သည်။

အကြီးအကဲနျန်က ယီထျန်းယွမ်ကို ခေါ်ဆောင်လာပြီးကတည်းက သူသည် သိသိသာသာ ပြောင်းလဲသွားခဲ့သည်။ သို့သော် ဤပြောင်းလဲမှုမှာ ၎င်းတို့ကို စိုးရိမ်ပူပန်စေခဲ့သည်။

“ဘာမှမဖြစ်ပါဘူး... အခြေခံ မခိုင်မာရင်တောင် အခု အောက်မှာ ကျင့်ကြံရင်းနဲ့ ခိုင်မာအောင် လုပ်လို့ ရတာပဲလေ။ ဒီအောက်မှာ ကျင့်ကြံမယ်ဆိုရင်တော့ နတ်ဘုရားတက်လှမ်းခြင်းတိုက်ပွဲ မစခင်မှာ ကျင့်စဉ်ကို အပြည့်အဝ ခိုင်မာသွားအောင် လုပ်နိုင်မှာပါ...”

အကြီးအကဲနျန်က ပြုံးလျက် ဆိုသည်။

“ဒါကတော့ ဟုတ်ပါတယ်...”

၎င်းတို့၏ အကြည့်များမှာ ယီထျန်းယွမ်ထံသို့ ပြန်လည် ရောက်ရှိသွားကြပြီး သူ အောက်ခြေအထိ ရောက်နိုင်မလားဆိုသည်ကို စောင့်ကြည့်နေကြသည်။ ၎င်းတို့အတွက်မူ အောက်ခြေမှာ ခက်ခဲသော နေရာ မဟုတ်သော်လည်း လူသစ်တစ်ဦးအတွက်မူ အခက်အခဲ မသေးလှပေ။

တစ်ချိန်တည်းမှာပင် ယီထျန်းယွမ်သည် အောက်ခြေသို့ လျင်မြန်စွာ ပြေးဆင်းနေခဲ့သည်။ အောက်ခြေနှင့် နီးကပ်လာလေလေ တစ်စုံတစ်ရာကို မြင်တွေ့လာရလေလေ ဖြစ်သည်။ သူသည် လှေကားဘေးမှနေ၍ အောက်သို့ ငုံ့ကြည့်လိုက်သည့်အခါ အောက်ခြေတွင် အလွန် ကြီးမားလှသော စိမ်းလဲ့လဲ့ ရတနာကျောက်တုံးကြီး တစ်ခုကို တွေ့လိုက်ရသည်။

“ဒါက အရင်က ဝိညာဉ်မျိုးနွယ်တွေရဲ့ ဝိညာဉ်စွမ်းအင်ပုလဲ မဟုတ်လား...”

ယီထျန်းယွမ်သည် ဤအရာကို မြင်သည့်အခါ မှင်တက်မိသွားသော်လည်း သေသေချာချာ ကြည့်လိုက်သည့်အခါ ဝိညာဉ်စွမ်းအင်ပုလဲ မဟုတ်ကြောင်း သိရှိလိုက်ရသည်။

- ဂြိုဟ်ဗဟိုချက်: ဂြိုဟ်၏ ဝိညာဉ်စွမ်းအားများ လည်ပတ်မှုကို ထိန်းသိမ်းပေးသော ဗဟိုချက် ဖြစ်သည်။ အကယ်၍ ဤဗဟိုချက် ပျက်စီးသွားပါက ဂြိုဟ်ပေါ်တွင် သက်ရှိများ ဆက်လက် မပေါက်ဖွားနိုင်တော့ပေ။ ၎င်းသည် အကန့်အသတ်မဲ့သော စွမ်းအင်များကို ထုတ်ပေးနိုင်ပြီး ဤဗဟိုချက်မှာ ဝိညာဉ်စွမ်းအင် ဗဟိုချက် ဖြစ်သဖြင့် ထိတ်လန့်ဖွယ်ကောင်းသော စိတ်ဝိညာဉ်စွမ်းအားများကို ပိုင်ဆိုင်ထားပါသည်။

“ဒါက ဂြိုဟ်ရဲ့ ဗဟိုချက်ကိုး...”

ယီထျန်းယွမ်သည် ယခင်က ယုံမင်နတ်ဆိုးမျိုးနွယ်များ ပြောခဲ့သော စကားကို သတိရသွားသည်။ ၎င်းတို့ သုံးဘုံလောကသို့ လာရခြင်း၏ အဓိက အချက်မှာ ဗဟိုချက်ကြောင့်ပင် ဖြစ်သည်။ သူသည် သုံးဘုံလောက၏ ဗဟိုချက်မှာ မည်မျှ ကြီးမားမည်ကို မသိသော်လည်း အကယ်၍ ဤအရာနှင့် တူညီနေမည်ဆိုပါက ထိတ်လန့်ဖွယ်ကောင်းသော စွမ်းအင်များ ရှိနေမည်မှာ သေချာလှသည်။

သူသည် ယခင်က ဤအချက်အလက်များကို ဖတ်ဖူးခဲ့သည်။ ဂြိုဟ်တိုင်းတွင် ဗဟိုချက် ရှိနေခြင်း မဟုတ်ပေ။ အချို့သော ကိုယ်တွင်းကမ္ဘာငယ်လေးများတွင်သာ ဗဟိုချက် ရှိတတ်သဖြင့် အလွန်ပင် တန်ဖိုးကြီးလှသည်။

“ဒါကြောင့်လည်း ဒီနေရာက အကောင်းဆုံး ကျင့်ကြံရေးနေရာလို့ ပြောကြတာကိုး... ဒီလောက်အထိ ဝိညာဉ်စွမ်းအင်တွေနဲ့ နီးကပ်နေမှတော့ ကျင့်ကြံရတာ မကောင်းဘဲ နေပါ့မလား...”

ယီထျန်းယွမ် ခေါင်းညိတ်လိုက်သည်။ အဘယ်ကြောင့် ဤမျှ တင်းကျပ်သော သတ်မှတ်ချက်များ ထားရှိရသလဲဆိုသည်ကို သူ နားလည်သွားခဲ့ပြီ ဖြစ်သည်။ အကယ်၍ မည်သူမဆို ဝင်ရောက် စုပ်ယူခွင့်ပေးမည်ဆိုပါက ဤဗဟိုချက်မှာ မကြာမီမှာပင် ခန်းခြောက်သွားပေလိမ့်မည်။

ထို့ကြောင့် ပံ့ပိုးမှုအမှတ်များအပေါ် မူတည်ပြီးမှသာ ဝင်ရောက်ခွင့် ပေးခြင်း ဖြစ်သည်။

သူသည် ဤကြီးမားလှသော ဗဟိုချက်ကို ကြည့်ကာ ရင်ထဲတွင် အနည်းငယ် စိတ်လှုပ်ရှားသွားမိသည်။ အကယ်၍ ဤ ဝိညာဉ်စွမ်းအင် ဗဟိုချက်မှ အစိတ်အပိုင်း အနည်းငယ်မျှသာ ယူသွားနိုင်မည်ဆိုပါက ဝိညာဉ်မျိုးနွယ်ဝင်များကို လျင်မြန်စွာ ဖွံ့ဖြိုးတိုးတက်လာအောင် လုပ်ဆောင်နိုင်မည် မဟုတ်ပါလား။

ထို ဝိညာဉ်စွမ်းအင်ပုလဲ ဆိုသည်မှာ ဤဗဟိုချက်၏ သေးငယ်သော ပုံစံငယ်မျှသာ ဖြစ်ပြီး သဲကန္တာရထဲမှ သဲတစ်ပွင့်နှင့်သာ တူညီချေသည်။ ရှေ့မှ ဤ ကြီးမားလှသော ဗဟိုချက်မှာ အောက်ခြေတွင် နက်ရှိုင်းစွာ မြုပ်နှံထားပြီး မည်မျှ ကြီးမားမည်ကို မသိနိုင်ပေ။ အနည်းဆုံးတော့ တိုက်ကြီးတစ်ခုစာမျှ ကျယ်ဝန်းပေလိမ့်မည်။

အခန်း ၉၆၂ ပြီးပါပြီ။