အင်ပါယာ၏ ဖုံးကွယ်ထားသော အပုပ်နံ့များ

ပျံသန်းရေးသင်္ဘောပေါ်တွင် မင်းသမီး စွန်းယောင်ချင်းသည် ပိုင်ကျီဟန်အတွက် စိုးရိမ် ပူပန်နေမိသည်။

အကယ်၍သာ သူတစ်ခုခုဖြစ်သွားခဲ့လျှင် ကြယ်ကြွေ အင်ပါယာအနေဖြင့် မဖြေရှင်းနိုင်သော နိုင်ငံရေးပြဿနာတစ်ခု ဖြစ်လာပေလိမ့်မည်။

သို့သော် သူမ စိုးရိမ်စိတ်ဝင်လာရုံရှိသေး၊ ပိုင်ကျီဟန်သည် ပြန်လည်ရောက်ရှိလာခဲ့ပြီဖြစ်သည်။

"သခင်လေး! ဂုဏ်ယူပါတယ်ခင်ဗျ”

ပိုင်မျိုးနွယ်စုဝင်များသည် ပိုင်ကျီဟန် အောင်ပွဲခံပြီး ပြန်လာသည်ကို ကြိုတင်သိရှိထားသည့်အလား သူ့ကို နှုတ်ဆက်ကြသည်။

ပိုင်ကျီဟန်က ခေါင်းကိုသာ ခပ်အေးအေးငြိမ့်ပြလိုက်ပြီး မိန့်ကြားလိုက်သည်။

"သူ့ကို ဟိုအကျဉ်းသားနဲ့အတူ ထားလိုက်။"

သူသည် ဖမ်းဆီးလာသော အကြီးအကဲကို ရည်ညွှန်းနေခြင်းဖြစ်သည်မှာ သိသာလှသည်။

ပိုင်မျိုးနွယ်စုဝင်များကလည်း မည်သည့် မေးခွန်းမျှမမေးဘဲ နာခံကြသည်။

အကြီးအကဲမှာ ပိုင်မျိုးနွယ်စု၏ ပျံသန်းရေးသင်္ဘောအတွင်းပိုင်းရှိ ခိုင်ခံ့သော အကျဉ်းခန်းထဲသို့ ပစ်ချခြင်းခံလိုက်ရပြီး ကျိုးရှစ်ကျီနှင့် ဆန့်ကျင်ဘက်ထောင့်များတွင် အသီးသီး ချည်နှောင်ထားကြသည်။

လေးလံသော တံခါးကြီးသည် သတ္တုသံကျယ်ကြီးနှင့်အတူ ပိတ်သွားပြီး ဝိညာဉ်အစီအရင်များ၏ တိုးညင်းသော အသံကိုသာ ကြားရတော့သည်။

ကျိုးရှစ်ကျီမှာ မျက်နှာဖျော့တော့ကာ ပိန်ချောင်လျက် တင်ပျဉ်ခွေထိုင်နေသည်။ သူ၏ သန့်ရှင်းသပ်ရပ်ခဲ့သော ဝတ်ရုံများမှာ ယခုအခါ စုတ်ပြတ်သတ်နေပြီး သွေးကွက်များ စွန်းထင်နေပြီဖြစ်သည်။

သူသည် မျက်လုံးများကို မှိတ်ထားသော်လည်း ခြေသံများနှင့်အတူ အကြီးအကဲ၏ အရှိန်အဝါကို ခံစားမိလိုက်သည်နှင့် မျက်လုံးများကို ချက်ချင်းဖွင့်လိုက်သည်။ သူ၏ မျက်ဝန်းများမှာ အေးစက်ထက်မြက်နေပြီး ဖိနှိပ်ထားသော ဒေါသများဖြင့် ပြည့်နှက်နေသည်။

အကြီးအကဲမှာမူ အစောပိုင်းက အရှက်ရခဲ့မှုကြောင့် တုန်ရီနေဆဲဖြစ်ပြီး ကျိုးရှစ်ကျီကို စိုက်ကြည့်ကာ လူသတ်ငွေ့များကို ထုတ်ဖော်ရန် ကြိုးစားနေသော်လည်း အချုပ် အနှောင်များကြောင့် မတတ်နိုင်ပေ။

သို့သော် သူ၏ မျက်လုံးများမှာမူ အဆိပ်ပြင်းလှသည်။

"မင်း..."

သူက ဒေါသတကြီးဖြင့် တရှူးရှူးမြည်ကာ ပြောလိုက်သည်။

"ဒါတွေအားလုံး... ဒါတွေအားလုံးက မင်းကြောင့်ပဲ”

ကျိုးရှစ်ကျီသည် မျက်မှောင်ကြုတ်လိုက်ပြီး "ကျွန်တော့်ကြောင့် ဟုတ်လား?" ပြန်မေးသည်။

"မင်းသာ ပိုင်ကျီဟန်ကို သွားမဆွခဲ့ရင် ပိုင်မျိုးနွယ်စုက ငါတို့ဆီ ဘာလို့ လာရှာမှာလဲ? မင်းသာ သူတို့ကို ဒီကို ခေါ်မလာခဲ့ရင် သူတို့ ဒီနေရာကို ရှာတွေ့နိုင်မယ်လို့ မင်းထင်နေလား?" အကြီးအကဲသည် တံတွေးထွေးရင်း ဆက်ပြောသည်။

"ငါတို့ရဲ့ ဌာနခွဲတစ်ခုလုံး ပျက်စီးသွားပြီ! နှစ်ပေါင်းများစွာ တည်ဆောက်ခဲ့တဲ့ အခြေခံအုတ်မြစ်တွေ အားလုံး မင်းကြောင့် ပြာကျကုန်ပြီ။"

ကျိုးရှစ်ကျီ၏ မျက်နှာအမူအရာ တင်းသွားသော်လည်း သူ ဘာမျှပြန်မပြောခဲ့ပေ။

အကြီးအကဲ၏ အသံမှာ တစ်လုံးချင်းစီ ပြောဆိုရင်း ပို၍ စူးရှလာသည်။

"မင်းကို ကောင်းကင်အင်ပါယာက အဖွဲ့ဝင်တချို့ကို သွားစစ်ဆေးဖို့ပဲ လွှတ်လိုက်တာ။ အဲဒါကို အလုပ်မဖြစ်တဲ့အပြင် ပိုင်မျိုးနွယ်စုကို ငါတို့ဆီ တန်းတန်းမတ်မတ် ခေါ်လာခဲ့တယ်! ဒီနေ့ သေသွားတဲ့သူတိုင်းရဲ့ သွေးဟာ မင်းလက်ထဲမှာ ရှိနေတာ”

ကျိုးရှစ်ကျီ၏ နှုတ်ခမ်းဖျားမှ ခါးသီးပြီး ဟာသမြောက်ခြင်းမရှိသော ရယ်သံတစ်ခု ထွက်ပေါ်လာသည်။

"ကျွန်တော့်အမှားလား?"

ကျိုးရှစ်ကျီသည် ခေါင်းကို ဖြည်းညှင်းစွာ မော့လိုက်ရာ အလင်းမှိန်မှိန်အောက်တွင် သူ၏မျက်လုံးများသည် အရောင်တောက်နေသည်။

၎င်းမှာ သူ လုံးဝလက်မခံနိုင်သော တရား စွပ်စွဲချက်တစ်ခုပင်။

ပိုင်ကျီဟန်အပေါ် သူကိုယ်တိုင် ဘာမှမလုပ်ခဲ့ပါဘဲနှင့် ခံစားခဲ့ရသော နှိပ်စက်ညှင်းပန်းမှုများနှင့် ဒုက္ခများကို ပြန်တွေးမိတိုင်း ကျိုးရှစ်ကျီမှာ ထိတ်လန့်နေဆဲဖြစ်သည်။

ပိုင်ကျီဟန်သည် သူ့ကို လာရောက်နှောက်ယှက်ခဲ့သော အဖွဲ့အစည်း၏ ဌာနချုပ်ကြောင့်သာ ဤအစီအစဉ်များကို လုပ်ဆောင်နေခြင်းဖြစ်ကြောင်း သူ သိထားသည်။

သူသည် ထိုအကျိုးဆက်ကြောင့် ဒုက္ခရောက်ခဲ့ရခြင်း ဖြစ်သော်လည်း ယခုအခါ အကြီးအကဲသည် သူ့အပေါ် အပြစ်ပုံချနေသည်ကို သူ မည်သို့လျှင် အသာတကြည် လက်ခံနိုင်ပါမည်နည်း။

"ဟွန့်! ကိုယ့်ကိုယ်ကိုယ် ဖြောင့်မတ်သယောင် ဟန်ဆောင်မနေနဲ့။ ဟုတ်တယ်... ကျွန်တော် ခင်ဗျားတို့ကို သစ္စာဖောက်ခဲ့တယ်။ ဒါပေမဲ့ ခင်ဗျားကော အတူတူပဲ မဟုတ်ဘူးလား? မဟုတ်ရင် ခင်ဗျား ဘာလို့ ဒီမှာ အသက်ရှင်လျက် ရှိနေရတာလဲ?"

ပိုင်ကျီဟန်သည် အသုံးမဝင်သူ သို့မဟုတ် ရန်သူဘက်တော်သားဟု ယူဆပါက မည်သည့်အခါမျှ ကရုဏာသက်မည်မဟုတ်ကြောင်း ကျိုးရှစ်ကျီ နားလည်ထားသည်။

ထို့ကြောင့် အကြီးအကဲကို ဤနေရာသို့ ခေါ်ဆောင်လာရခြင်း၏ တစ်ခုတည်းသော အကြောင်းရင်းမှာ သူသည်လည်း သစ္စာဖောက်ရန်နှင့် ပိုင်ကျီဟန် လိုချင်သော အဖြေများကို ပေးရန် အဆင်သင့်ဖြစ်နေသောကြောင့်သာ ဖြစ်ပေလိမ့်မည်။

အကြီးအကဲသည် အငိုက်မိသွားသည်။ မိမိကိုယ်တိုင်လည်း အသက်ရှင်သန်ရန်အတွက် အဖွဲ့အစည်းကို သစ္စာဖောက်ခဲ့သူဖြစ်ရာ သူတစ်ပါးကို သစ္စာရှိမှုအကြောင်း တရားဟောရန် မသင့်တော်သည်မှာ အမှန်ပင်ဖြစ်သည်။

သို့သော်လည်း အကြီးအကဲသည် ဖြစ်ပျက်ခဲ့သမျှအတွက် ကျိုးရှစ်ကျီကိုသာ အပြစ်တင်နေဆဲပင်။

"မင်းသာ မရှိရင် ဒီဌာနခွဲ ပျက်စီးမှာမဟုတ်ဘူး။ အဖွဲ့အစည်းက ဒါကို ဘယ်တော့မှ ခွင့်လွှတ်မှာမဟုတ်ဘူး။"

ကျိုးရှစ်ကျီ၏ နှုတ်ခမ်းများက အနည်းငယ် တွန့်ကွေးသွားသည်။

"အဖွဲ့အစည်း? သူတို့ ခင်ဗျားကို လာကယ်မယ်လို့ ထင်နေတုန်းပဲလား? ခင်ဗျားက အခု ဝန်ထုပ်ဝန်ပိုးတစ်ခု ဖြစ်နေပြီ။ ဘာမှမကျန်တော့တဲ့ အရှုံးသမား အကြီးအကဲတစ်ယောက်ပဲ။ ကျွန်တော်သာ သူတို့နေရာမှာဆိုရင်... ခင်ဗျားကို လုပ်ကြံသတ်ဖြတ်လိုက်မှာ။"

အကြီးအကဲ၏ မျက်လုံးများ အနည်းငယ် ပြူးကျယ်သွားသော်လည်း ဒေါသဖြင့် ချက်ချင်း ပြန်ဖုံးကွယ်လိုက်သည်။

"မင်း... မင်း ရဲတင်းလှချည်လား—"

"ရဲတာလား?"

ကျိုးရှစ်ကျီသည် စကားဖြတ်ပြောလိုက်ရာ သူ၏အသံမှာ တိုးညင်းသော်လည်း ရှုံ့ချမှုများဖြင့် ပြည့်နှက်နေသည်။

"ကျွန်တော့်ကို ခြိမ်းခြောက်ဖို့ ခင်ဗျားမှာ ဘာကျန်သေးလို့လဲ? ခင်ဗျားက ဇာတ်သိမ်းပြီ”

(အင်းလေ... အဲဒါက ကျွန်တော့်အတွက်လည်း အတူတူပါပဲ။)

သာမန်အခြေအနေမျိုးတွင် သူ၏ရှေ့မှ အကြီးအကဲသည် သူ ရိုသေကိုင်းညွတ်ရမည့်သူဖြစ်သည်။

သို့သော် ယခုမူ သူတို့နှစ်ဦးစလုံးမှာ အဆင့်အတန်းတူညီနေကြပြီး ပိုင်ကျီဟန်၏ အကျဉ်းသားများသာ ဖြစ်သည်။ ထို့ကြောင့်သာ သူသည် အခြားအချိန်တွင် မည်သို့မျှ မဖြစ်နိုင်သော စကားနိုင်လုခြင်းကို ရဲရဲဝံ့ဝံ့ လုပ်ဆောင်နိုင်ခြင်း ဖြစ်လေသည်။

ထိုသူနှစ်ဦးသည် ကြောက်ရွံ့မှု၊ ကျရှုံးမှုနှင့် သစ္စာဖောက်မှုတို့မှ ဖြစ်ပေါ်လာသော အမုန်းတရားများဖြင့် တစ်ဦးကိုတစ်ဦး စိုက်ကြည့်နေကြသည်။

အမှန်စင်စစ် သူတို့နှစ်ဦးစလုံး မှားနေသည်တော့မဟုတ်ပေ။

နှစ်ဦးစလုံးသည် ပိုင်ကျီဟန်ကို လုပ်ကြံရန် ကြိုးပမ်းခဲ့သည့် သူတို့၏အဖွဲ့အစည်းကြောင့်ပင် ယခုကဲ့သို့ လောကဓံနွံထဲသို့ ကျရောက်ခဲ့ရခြင်းဖြစ်သည်။

ယခုမူ သူတို့တွင် အာဏာလည်းမရှိ၊ ဂုဏ်သိက္ခာလည်းမကျန်တော့ဘဲ မှောင်မိုက်သော အကျဉ်းခန်းထဲ၌ တစ်ဦးကိုတစ်ဦး ကျိန်ဆဲနေရုံမှတစ်ပါး အခြားမတတ်နိုင်တော့ပေ။

ပြင်ပတွင်မူ ပိုင်ကျီဟန်သည် ကြယ်ကြွေအင်ပါယာ၏ နန်းတော်သို့ ပြန်ရန် စဉ်းစားနေသည်။

မင်းသမီး စွန်းယောင်ချင်း သည် သင်္ဘောလက်ရန်းအနီးတွင် ရပ်နေပြီး သူမ၏ ပိုးသားဝတ်ရုံမှာ လေထဲတွင် တဖျတ်ဖျတ် လွင့်

နေသည်။

သူမ၏အကြည့်မှာ ကျယ်ပြောလှသော မိုးကုပ်စက်ဝိုင်းဆီသို့ ဦးတည်နေသော်လည်း စိတ်ထဲတွင်မူ မတည်မငြိမ် ဖြစ်နေသည်။

ပိုင်ကျီဟန်နှင့် ပိုင်ရမ်တို့ မြေအောက်ခန်းသို့ ဆင်းသွားပြီးနောက် ဘာဖြစ်ခဲ့သည်ကို အတိအကျသိရန် ခက်ခဲသော်လည်း ရွာသားများအသွင်ဆောင်ထားသော ရန်သူများကို တိုက်ခိုက်စဉ်က ပိုင်ကျီဟန်၏ အံ့မခန်းလှသော စွမ်းအားများကို သူမ နောက်တစ်ကြိမ် မြင်တွေ့ခံစားခဲ့ရသည်။ ပိုင်ကျီဟန် အနီးသို့ ရောက်လာသောအခါ သူမ လှည့်ကြည့်လိုက်ပြီး သူမ၏ နုနယ်သောမျက်နှာပေါ်မှ စိုးရိမ်ရိပ်များမှာ အနည်းငယ် ပြေလျော့သွားသည်။

"သခင်လေး ပိုင်ကျီဟန်" သူမက တိုးညင်းစွာ ခေါ်လိုက်သည်။ "ရှင် ဒီကိုလာတဲ့ ရည်ရွယ်ချက် ပြည့်မြောက်ခဲ့ပြီလား?"

သူမက ယဉ်ကျေးစွာ မေးမြန်းလိုက်ခြင်းဖြစ်သည်။

အစောပိုင်းက ပိုင်ကျီဟန်သည် အဖွဲ့အစည်းတစ်ခုကို ဖျက်ဆီးရန် လာခဲ့ခြင်းဖြစ်သည်ဟု ပြောခဲ့ရာ ယခုအဖွဲ့အစည်းမှာ ထိုအဖွဲ့ပင် ဖြစ်ရပေမည်။

ယင်းမှာ တော်ဝင်မိသားစုနှင့် ပတ်သက်မှုမရှိသည့် လူမသိသူမသိ အဖွဲ့အစည်းတစ်ခုသာ ဖြစ်သောကြောင့် သူမ စိတ်သက်သာရာရသွားသည်။

ယခင်ကမူ ပိုင်ကျီဟန်သည် စကားလုံးများဖြင့် လှည့်ဖြားပြီး တော်ဝင်မိသားစု၏ အရေးပါသော အရာတစ်ခုခုကို ဖျက်ဆီးရန် ကြံစည်နေသလားဟု သူမ သံသယဝင်ခဲ့မိသည်။

ကံကောင်းထောက်မစွာဖြင့် ထိုသို့ ဖြစ်မလာခဲ့ပေ။

"ဌာနခွဲကိုတော့ ရှင်းလင်းပြီးပြီ" ပိုင်ကျီဟန်က ဖြေလိုက်သည်။

သူမ၏ မျက်နှာပေါ်တွင် စိတ်သက်သာရာရသွားသော အရိပ်အယောင်များ ဖြတ်ပြေးသွားသည်။

"ဒါဆို အားလုံး ပြီးသွားပြီပေါ့နော်?"

ပိုင်ကျီဟန်က ခေါင်းခါပြလိုက်သည်။

"မပြီးသေးဘူး။ ကျွန်တော် ဖမ်းရမဲ့ လူတစ်ယောက် ကျန်သေးတယ်။ အဲဒီလူကို ဖမ်းမိပြီးရင်တော့ ကျွန်တော် ချက်ချင်း ထွက်သွားမှာပါ"

ပိုင်ကျီဟန်သည် မင်းသမီး စွန်းယောင်ချင်း ဘာကို စိုးရိမ်နေကြောင်း သိသောကြောင့် ထိုသို့ ပြန်ဖြေလိုက်ခြင်းဖြစ်သည်။

ဌာနချုပ်၏ တည်နေရာကို သိထားသူမှာ ဒုတိယမင်းသားကို ကြိုးကိုင်ခြယ်လှယ်နေပြီး ထီးနန်းရရှိအောင် ကူညီပေးနေကြောင်း အကြီးအကဲက ပြောပြခဲ့သည်။

သို့သော် ထိုမျှသာလော?

မဟုတ်နိုင်ပေ— သူ့ကို ထောက်ခံနေကြသော မှူးမတ်အချို့လည်း ရှိနေပေဦးမည်။

ထိုသူများကိုပါ သူကိုင်တွယ်ဖြေရှင်းရဖွယ်ရှိပြီး ယင်းက ကြယ်ကြွေအင်ပါယာတစ်ခုလုံးနှင့် ဆန့်ကျင်ဘက် ဖြစ်သွားရနိုင်သည်ဟု အဓိပ္ပာယ်ရပေသည်။

အနည်းဆုံးတော့ သူသည် ဒုတိယမင်းသားနှင့် ထိပ်တိုက်တွေ့ရန် ပြင်ဆင်ထားသင့်သည်။

သူသည် ကြယ်ကြွေအင်ပါယာနှင့် တော်ဝင်မိသားစုအကြောင်းကို များများစားစား မသိသော်လည်း ဤကိစ္စကို လက်ရှောင်ရန် အစီအစဉ်မရှိပေ။

"ကျွန်မ ရှင့်ကို ကူညီပါရစေ" မင်းသမီး စွန်းယောင်ချင်းက ဆိုသည်။

၎င်းမှာ ပိုင်ကျီဟန်ကို မျက်နှာလိုမျက်နှာရ လုပ်ခြင်းမျိုးမဟုတ်ဘဲ သူမကိုယ်တိုင်၏ အကျိုးစီးပွားအတွက်လည်း ဖြစ်သည်။

သူမ တစ်ခါမျှ မကြားဖူးခဲ့သော ဤအဖွဲ့အစည်းမှာ အရေးမပါဟု ထင်ခဲ့သော်လည်း ဖမ်းမိထားသော အကြီးအကဲ၏ အရှိန်အဝါကို ကြည့်ရုံနှင့်ပင် ၎င်းမှာ ကြယ်ကြွေအင်ပါယာအတွင်းရှိ အင်အားအကြီးဆုံး အဖွဲ့အစည်းများထဲမှ တစ်ခုဖြစ်ကြောင်း သူမ ခန့်မှန်းမိသည်။

ထိုကဲ့သို့သော အဖွဲ့အစည်းမျိုး လူမသိသူမသိ လှုပ်ရှားနေခြင်းမှာ အလွန်ပင် အန္တရာယ်ရှိလှပြီး သူတို့ မည်မျှအထိ ရာဇဝတ်မှုများ ကျူးလွန်ထားသည်ကို မည်သူမှ မသိနိုင်ပေ။

အင်ပါယာအတွက်မူ ဤကဲ့သို့သော အဖွဲ့အစည်းမျိုးကို အမြန်ဆုံး အမြစ်ဖြတ်ပစ်ခြင်းကသာ အကောင်းဆုံးဖြစ်သည်။

ထို့ကြောင့် ထိုအန္တရာယ်ကို ဖယ်ရှားနိုင်သရွေ့ သူမသည် ပိုင်ကျီဟန်ကို ကူညီရန် ဆန္ဒရှိနေခြင်း ဖြစ်သည်။

ပိုင်ကျီဟန်သည် မင်းသမီး စွန်းယောင်ချင်းကို ကြည့်လိုက်သည်။ အကယ်၍ သူမသာ အမှန်တကယ် ကူညီမည်ဆိုပါက ဒုတိယမင်းသား၏ နောက်ကွယ်မှလူကို အခြားသူများနှင့် ပတ်သက်စရာမလိုဘဲ ကိုင်တွယ်နိုင်ပေလိမ့်မည်။

သို့သော် ၎င်းမှာ မင်းသမီး စွန်းယောင်ချင်း၏ တော်ဝင်မိသားစုအတွင်း ဩဇာအာဏာ မည်မျှရှိသည် အပေါ်တွင်လည်း မူတည်နေသေးသည်။

ထို့ပြင် သူမ၏ အစ်ကိုဖြစ်သူကို ရန်မူတော့မည်ဟု သိသွားလျှင် သူမ ကူညီပါ့မလား မသေချာပေ။

သူသည် သူမနှင့် ဒုတိယမင်းသားတို့၏ ဆက်ဆံရေးကို သေချာမသိသောကြောင့် အမှန်အတိုင်းပြောပြလျှင် ဘာဖြစ်လာမည်ကို မခန့်မှန်းနိုင်သေးပေ။

"ကောင်းပြီလေ။ ဒါဆိုရင် ကျွန်တော်တို့ တော်ဝင်နန်းတော်ဆီကို ပြန်ကြတာပေါ့" ပိုင်ကျီဟန်က ပြောလိုက်သည်။

မင်းသမီး စွန်းယောင်ချင်းက ခေါင်းညိမ့်ပြပြီးနောက် ပိုင်ကျီဟန် သွားရောက်ခဲ့သော နေရာသို့ ခဏမျှ ငုံ့ကြည့်လိုက်သည်။

ထိုနေရာသည် ယခုအခါ မြေပြင်နှင့် တစ်ပြေးညီနီးပါး ပြာကျပျက်စီးနေပြီ ဖြစ်သည်။

မည်သို့ပင်ကြည့်ပါစေ သာမန်ရွာကလေးတစ်ခုနှင့်တူသော်လည်း ၎င်း၏အောက်တွင် အလွန်အန္တရာယ်ကြီးသော အဖွဲ့အစည်းတစ်ခု ခိုအောင်းနေခဲ့သည်။

(သူတို့က ဘယ်လိုလုပ်ပြီး ဒါမျိုးကို ဘယ်သူမှ မရိပ်မိအောင် တည်ဆောက်နိုင်ခဲ့တာလဲ?)

သူတို့နေရာ၏ အတိုင်းအတာအရ ယင်းကို ချက်ချင်းလက်ငင်း တည်ဆောက်၍ရနိုင်စရာမရှိဘဲ မလွဲမသွေ အာရုံစိုက်မှုကို ခံရမည်

ဖြစ်သည်။

သို့သော်လည်း မည်သည့်သတင်းပေးပို့ချက်မျှ မရှိသည့်အပြင် တော်ဝင်မိသားစုပင် သတိမထားမိစေဘဲ နှစ်ပေါင်းများစွာ လှုပ်ရှားနိုင်ခဲ့ကြသည်။

၎င်းမှာ နောက်ကွယ်မှ အကာအကွယ်ပေးထားသူတစ်ဦးဦး မရှိဘဲနှင့် မည်သို့မျှ မဖြစ်နိုင်ပေ။

မင်းသမီး စွန်းယောင်ချင်းသည် ဖြစ်နိုင်ခြေတစ်ခုကို တွေးမိသွားသည်နှင့် သူမ၏ မျက်လုံးများ ပြူးကျယ်သွားသည်။

"သခင်လေးပိုင်... ရှင့်မှာ အချိန် အနည်းငယ်လောက် ပိုထွက်ဦးမလား?"

"ဗျာ?"

"ကျွန်မ သွားကြည့်ပြီး စစ်ဆေးစရာရှိတဲ့ နေရာတစ်ခု ရှိနေလို့ပါ" မင်းသမီး စွန်းယောင်ချင်းက လူသတ်ငွေ့များ ပြည့်နှက်နေသော အသံဖြင့် ပြောလိုက်သည်။

ဤမျှ အန္တရာယ်ရှိသော အဖွဲ့အစည်းကို တော်ဝင်မိသားစု မသိအောင် ခွင့်ပြုထားခြင်းသည် သစ္စာဖောက်မှုနှင့် အတူတူပင်

ဖြစ်သည်။

ကြယ်ကြွေအင်ပါယာတွင် တော်ဝင်မိသားစုကို သစ္စာဖောက်သူအတွက် အပြစ်ဒဏ်မှာ သေဒဏ်သာ ရှိသည်။

မင်းသမီးကို ကြည့်ရင်း ပိုင်ကျီဟန် စိတ်ဝင်စားသွားသည်။

(သူမ တစ်ခုခုကို ရှာတွေ့သွားတာလား?)

သူ တွေးလိုက်သည်။ ပုံမှန်အားဖြင့် ပိုင်ကျီဟန်သည် အချိန်ဖြုန်းရသည်ကို မနှစ်သက်သော်လည်း ယခုကိစ္စမှာ သူလိုချင်သောအရာနှင့် ဆက်စပ်နေပုံရသည်။

"ရတာပေါ့၊ သွားကြတာပေါ့”