ချွမ်မျိုးနွယ်စု၏ ပြိုင်ပွဲ

နေခြည်နုနုသည် ကျယ်ပြောလှသော ချွမ်မျိုးနွယ်စု၏ အိမ်တော်ကြီးပေါ်သို့ ဖြာကျလာသည်။

လူအများစုအတွက်မူ ၎င်းသည် သာမန်နေ့သစ်တစ်ခု၏ အစပြုခြင်းသာ ဖြစ်၏

ချုန်ရှန်းအတွက်မူ ထိုထက်မက ပိုမိုကြီးမားသော အရာတစ်ခု၏ အစပျိုးခြင်းပင် ဖြစ်သည်။

သူသည် မိမိ၏ တဲစုတ်အတွင်းရှိ အက်ကွဲနေသော မှန်ချပ်ရှေ့တွင် ရပ်နေရင်း မှန်ထဲမှ ဖျော့တော့သော ပုံရိပ်ကို စိုက်ကြည့်နေမိသည်။

ဖူးရောင်နေသော ဒဏ်ရာများနှင့် ပြတ်ရှရာများသည် ပျောက်ကွယ်သွားခဲ့ပြီဖြစ်ကာ ထိုနေရာတွင် အားမန်အနည်းငယ် ပါရှိသည့် တင်းရင်းသော အသားအရေဖြင့် အစားထိုး ဝင်ရောက်လာခဲ့ပြီ ဖြစ်သည်။

တစ်ချိန်က ပိန်ချောင်ပြီး အားအင်ချည့်နဲ့ခဲ့သော သူ၏ ခန္ဓာကိုယ်သည် ယခုအခါ သန်စွမ်းမှု အရိပ်အယောင်များ ပေါ်လွင်နေပြီဖြစ်သည်။

နံနက်ခင်း အလင်းတန်းအောက်တွင် သူ၏ မျက်ဝန်းများသည် ဖျော့တော့သော နီကျင်ကျင်အရောင်ဖြင့် တောက်ပနေပြီး တစ်ချိန်က ချောက်နက် နတ်ဆိုးဂိုဏ်းတစ်ခုလုံးကို တုန်လှုပ်ချောက်ချားစေခဲ့သော စွမ်းအားများ၏ ပဲ့တင်ထံပင် ဖြစ်သည်။

သူ၏ နှုတ်ခမ်းအစုံတွင် ခပ်ဖျော့ဖျော့ အပြုံးတစ်ခု ပေါ်လာသည်။

"မဆိုးဘူးပဲ" သူက တိုးတိုးလေး ရေရွတ်လိုက်သည်။ "တစ်ပတ်အတွင်းမှာတင် ချီသန့်စင်ခြင်း အလယ်အလတ်အဆင့် ကို ရောက်သွားပြီ။"

သူ ဝင်စားခဲ့သည်မှာ တစ်ပတ်နီးပါး ရှိခဲ့ပြီ ဖြစ်သည်။

သူ၏ လက်ချောင်းများကို ကွေးဆန့်ကြည့်လိုက်ရာ အရေပြားအောက်တွင် ပါးလွှာသော်လည်း အားကောင်းသော ချီစွမ်းအင်များ စီးဆင်းနေသည်ကို ခံစားလိုက်ရသည်။

(ငါ့မှာသာ အရင်းအမြစ်တွေ ပိုရှိခဲ့ရင် အထွတ်အထိပ်အဆင့်ကိုတောင် ရောက်နေလောက်ပြီ။)

အနည်းဆုံးတော့ သူသည် ဆေးဖော်စပ်နည်း ကို သိရှိထားပြီး တောင်ပေါ်မှ ရှာဖွေရရှိသည့် ဆေးဖက်ဝင်အပင်များကို အသုံးပြုကာ ဆေးလုံးများ ဖော်စပ်နိုင်ခဲ့သည်။ ထိုသို့သာ မဟုတ်ပါက သူသည် အလယ်အလတ်အဆင့်သို့ပင် ရောက်ရှိနိုင်မည် မဟုတ်ပေ။

သူ စုဆောင်းထားသော ညှိုးနွမ်းနေသည့် ဆေးပင်အကြွင်းအကျန်များကို စီစစ်နေစဉ် ချုန်ရှန်း၏ စိတ်အာရုံမှာ လွင့်ပျံ့သွားသည်။

သူဖော်စပ်ခဲ့သော အကြမ်းစား ဆေးလုံးများသည် ခန္ဓာကိုယ်ကို ပြန်လည်ကုသရန်နှင့် ချီစွမ်းအင် နိုးထလာစေရန်အတွက် လုံလောက်ရုံသာ ရှိသေးပြီး အဆင့်ထပ်တက်လိုပါက ပိုမိုရှားပါးသော ပါဝင်ပစ္စည်းများနှင့် ပိုမိုအစွမ်းထက်သော ဆေးလုံးများ လိုအပ်သည်။

သို့သော်လည်း ချွမ်အိမ်တော်အတွင်း၌ ထိုကဲ့သို့သော အရာများကို တင်းကျပ်စွာ ထိန်းချုပ်ထားသည်။ သူကဲ့သို့ အစေခံတစ်ဦးမှာ မျိုးနွယ်စု၏ တကယ့် အရင်းအမြစ်များကို ရယူပိုင်ခွင့် မရှိပေ။

သူသည် မျက်မှောင်ကြုတ်လိုက်ကာ ကြမ်းတမ်းသော သစ်သားကြမ်းပြင်ပေါ်သို့ လက်ချောင်းလေးများဖြင့် ခေါက်ရင်း စဉ်းစားနေမိသည်။

ထိုစဉ် ခန္ဓာကိုယ်ဟောင်း၏ မှတ်ဉာဏ်တစ်ခုမှာ ဖျော့တော့သော်လည်း ရှင်းလင်းစွာ ပေါ်ထွက်လာသည်။

ချွမ်မျိုးနွယ်စု၏ ပြိုင်ပွဲ

၎င်းကို တစ်နှစ်လျှင် တစ်ကြိမ် ကျင်းပလေ့ရှိပြီး အစေခံများ၊ ပြင်ပတပည့်များနှင့် မျိုးနွယ်စု၏ လူငယ်မျိုးဆက်သစ်များသည် အကြီးအကဲများရှေ့တွင် ယှဉ်ပြိုင်ရသည့် ပွဲကြီးပွဲကောင်းတစ်ခု ဖြစ်သည်။

လူအများစုအတွက်မူ ၎င်းသည် ပါရမီပြရုံသာ ဖြစ်၏ အစေခံတစ်ဦးအတွက်မူ ဆင်းရဲဒုက္ခများမှ လွတ်မြောက်နိုင်မည့် တစ်ခုတည်းသော လမ်းစဉ်ဖြစ်သည်။

ယခင်က သူသည် တပည့်အဖြစ် ရွေးချယ်ခံရနိုးဖြင့် ဒဏ်ရာဗရပွ၊ မျှော်လင့်ချက်မဲ့စွာနှင့် အကြိမ်ကြိမ် ဝင်ရောက် ယှဉ်ပြိုင်ခဲ့ဖူးသည်ကို သူ မှတ်မိနေသည်။

ထိုစဉ်က ကြိုးစားမှုတိုင်းမှာ လူအများရှေ့တွင် အရိုက်အနှက်ခံရရုံဖြင့်သာ အဆုံးသတ်ခဲ့ရသည်။

သို့သော် ယခုအကြိမ်တွင်မူ အခြေအနေများ ပြောင်းလဲသွားခဲ့ပြီ။

သူသည် ရွှံ့နွံထဲတွင် တွားသွားခဲ့ရသော အရင်က ချုန်ရှန်းမဟုတ်တော့ပေ။

ထို့ပြင် လာမည့်ပြိုင်ပွဲသည်... သူ လိုအပ်နေသော အရာကို အတိအကျ ပေးစွမ်းနိုင်ပေလိမ့်မည်။ မျိုးနွယ်စု၏ တပည့်များအတွက်မူ ၎င်းသည် ဂုဏ်သိက္ခာ၊ ဆုလာဘ်များနှင့် တိုးတက်မှုအတွက် အခွင့်အရေးတစ်ခုပင် ဖြစ်တော့သည်။

သူ့ကဲ့သို့ အစေခံတစ်ဦးအတွက်မူ ဤပြိုင်ပွဲသည် လုံးဝခြားနားသော အရာတစ်ခု ဖြစ်သည်။

အကယ်၍ အကြီးအကဲများ၏ အာရုံစိုက်မှုကို ဆွဲဆောင်နိုင်ခဲ့ပါက ချွမ်မျိုးနွယ်စု၏ တပည့်များအဖြစ် အခွင့်အရေးပေးခံရမည်

ဖြစ်ပြီး ကျင့်ကြံခြင်းခရီးလမ်းကို စတင်နိုင်မည်ဖြစ်သည်။

ထို့အပြင် ဆုလာဘ်များတွင် ဆေးလုံးများ၊ လက်နက်များနှင့် ကျင့်စဉ် များလည်း ပါဝင်သည်။

သူ့တွင် ချွမ်မျိုးနွယ်စုထက် အဆပေါင်းများစွာ သာလွန်သည့် ကျင့်စဉ်များ ရှိပြီးသားဖြစ်၍ ကျင့်စဉ်များကို မလိုအပ်သော်လည်း ကျင့်ကြံခြင်းဆိုင်ရာ အရင်းအမြစ်များကိုမူ အလွန်အမင်း လိုအပ်နေသည်။

"တပည့်တစ်ယောက် ဖြစ်လာဖို့လား၊ ဟွန်း..." သူက မျက်မှောင်ကြုတ်ရင်း တိုးတိုးလေး ရေရွတ်လိုက်သည်။ "သူတို့ရဲ့ သစ္စာဆိုတာတွေ၊ သစ္စာစောင့်သိမှုဆိုတာတွေကို ငါ ဂရုစိုက်နေလို့တော့ မဟုတ်ဘူး။"

သို့သော်လည်း သူသည် လက်ရှိအခြေအနေကို ငြင်းပယ်၍မရပေ။

ချွမ်မျိုးနွယ်စုသည် ဤဒေသတစ်ခုလုံး၏ အငြင်းပွားဖွယ်မရှိသော အုပ်ချုပ်သူများ ဖြစ်ကြသည်။ သူတို့၏ အရင်းအမြစ်များ၊ သြဇာအာဏာနှင့် တောင်ပိုင်းနယ်မြေများအပေါ် ထိန်းချုပ်နိုင်မှုတို့အရ သူတို့ကို မည်သူမျှ မထိရဲသည့် အနေအထားတွင် ရှိနေစေသည်။

အကယ်၍ သူသည် ထိပ်တန်းသို့ တက်လှမ်းချင်ပါက ချွမ်မျိုးနွယ်စု၏ ထောက်ပံ့မှုကို ရယူထားခြင်းက ကောင်းမွန်ပေလိမ့်မည်။ ထို့အပြင် ထိပ်တန်းသို့ ရောက်ရှိပါက ရရှိမည့် ဆုလာဘ်များကလည်း မဆိုးလှပေ။

ကံကောင်းသည်မှာ ပြိုင်ပွဲကျင်းပရန် ရက်အနည်းငယ်—အတိအကျပြောရလျှင် တစ်ပတ်ခန့်ကျန်ရှိနေသေးသဖြင့် သူသည် ချီသန့်စင်ခြင်း အထွတ်အထိပ်အဆင့်သို့ ရောက်ရှိရန် ဆက်လက်ကျင့်ကြံနိုင်မည်ဖြစ်ကာ ပြိုင်ပွဲတွင် အနိုင်ရရန် အခွင့်အလမ်း ပိုမိုများပြားလာမည်ဖြစ်သည်။

ပြိုင်ပွဲနေ့သို့ ရောက်သောအခါ အစေခံများ၊ တပည့်များ၊ အကြီးအကဲများနှင့် ဧည့်သည်တော်များ အပါအဝင် ရာနှင့်ချီသော လူအုပ်ကြီး စုရုံးရောက်ရှိနေကြသည်။

ကွင်းပြင်၏ ချောမွေ့သော ကျောက်သားကြမ်းပြင်ပေါ်သို့ နေရောင်ခြည် ဖြာကျနေပြီး ချွမ်မျိုးနွယ်စု၏ အထိမ်းအမှတ်တံဆိပ် ပါရှိသော အလံများသည် ဂုဏ်ယူဝင့်ကြွားစွာ လွင့်ပျံနေကြသည်။

ပြိုင်ပွဲဝင်တန်းစီနေသူများထဲတွင် လေ့ကျင့်ရေးဝတ်စုံများ ဝတ်ဆင်ထားသည့် လူငယ်မောင်မယ်များ ပါဝင်ပြီး သူတို့၏မျက်နှာတွင် စိုးရိမ်စိတ်၊ ယုံကြည်ချက်နှင့် ရည်မှန်းချက်များ ရောပြွမ်းနေကြသည်။

ထိုသူများထဲတွင် ချုန်ရှန်းလည်း ရပ်နေသည်။

သူ၏ ဟောင်းနွမ်းနေသော အဝတ်အစားများသည် တပည့်များ၏ ပိုးထည်ဝတ်ရုံများနှင့် နှိုင်းယှဉ်လျှင် နိမ့်ကျနေသော်လည်း သန့်ရှင်းစင်ကြယ်အောင် လျှော်ဖွတ်ထားသည်။

(ငါ ချီသန့်စင်ခြင်း အထွတ်အထိပ်အဆင့်ကို မရောက်နိုင်သေးဘူးပဲ။)

သင့်တော်သော အရင်းအမြစ်များ မရှိဘဲ မိမိ၏ အသိပညာ ဗဟုသုတတစ်ခုတည်းကိုသာ အားကိုးပြီး နောက်တစ်ဆင့်သို့ တက်လှမ်းရန်မှာ အမှန်တကယ်ပင် ခက်ခဲလှသည်။

သို့သော်လည်း သူသည် အထွတ်အထိပ်အဆင့်သို့ ရောက်ရန် အလွန်ပင် နီးစပ်နေပြီဖြစ်သည်။

အစေခံများက နှာခေါင်းရှုံ့နေကြသလို တပည့်များသည်လည်း တိုးတိုးတိုးတိုးဖြင့် အတင်းပြောနေကြသည့် ပတ်ဝန်းကျင်မှ ရန်လိုသော အရိပ်အယောင်များကို သူ ခံစားနေရသည်။

"ဟိုဒါ ပြီးခဲ့တဲ့အပတ်က သေလုမတတ် အရိုက်ခံရတဲ့ အစေခံမဟုတ်လား?"

"သူ အသက်ရှင်သေးတာလား?... ထပ်ပြီး အရိုက်ခံရဖို့ ရောက်လာတာ ဖြစ်မှာပေါ့။"

"တချို့လူတွေက သူတို့ ဘယ်နေရာမှာ နေရမလဲဆိုတာ ဘယ်တော့မှ သင်ခန်းစာမရဘူး”

ချုန်ရှန်းသည် ထိုသူအားလုံးကို လျစ်လျူရှုထားလိုက်သည်။

တစ်ချိန်က သူသည် ဘုရင်မင်းမြတ်များကို ရင်ဆိုင်ခဲ့ပြီး ရှေးဟောင်း သားရဲကြီးများကိုပင် ဝါးမြိုခဲ့သူ ဖြစ်သည်။ ထိုအရာများနှင့် ယှဉ်လျှင် ဟောင်နေသော ခွေးအနည်းငယ်မှာ ဘာပြောပလောက်သနည်း?

ထိုစဉ် စင်မြင့်ပေါ်မှ ကျယ်လောင်သော အသံတစ်ခု ထွက်ပေါ်လာသည်။

"နှစ်စဉ်ကျင်းပမြဲဖြစ်တဲ့ ချွမ်မျိုးနွယ်စုရဲ့ ပြိုင်ပွဲကြီး အခုပဲ စတင်ပါပြီ။"

အကြီးအကဲများသည် ပျင်းရိငြီးငွေ့ဟန်နှင့် သူတို့၏ ထိုင်ခုံများတွင် နေရာယူလိုက်ကြစဉ် လူအုပ်ကြီးထံမှ အားပေးသံများ ဟိန်းထွက်လာသည်။

"ပြိုင်ပွဲဝင်တွေအနေနဲ့" အခမ်းအနားမှူးက ဆက်ပြောလေ၏ "လူရွေးထုတ်တဲ့ အဆင့်ဆင့်ကို ဖြတ်ကျော်ရပါမယ်။ ထိပ်တန်း (၁၆) ဦးထဲ ပါဝင်သူတွေကို ဆုလာဘ်တွေ ပေးအပ်မှာဖြစ်သလို အဆင့်အတန်း မြှင့်တင်ပေးမှာ ဖြစ်ပါတယ်။ ထိပ်တန်း (၃) ဦးကတော့ တန်ဖိုးမဖြတ်နိုင်တဲ့ ရတနာတွေကို ရရှိမှာဖြစ်ပြီး ပါရမီရှိသူတွေကိုတော့ ချွမ်မျိုးနွယ်စုရဲ့ တိုက်ရိုက်တပည့်အဖြစ် ကိုယ်တိုင်ကိုယ်ကျ လက်ခံသွားမှာ ဖြစ်ပါတယ်။"

လူအုပ်ကြီးအတွင်း တီးတိုး ပြောဆိုသံများ ဆူညံသွားသည်။ တပည့်များပင်လျှင် မျက်နှာများ တည်ကြည်သွားကြသည်။

အမှန်စင်စစ် ဤသည်မှာ သူတို့၏ အရည်အချင်းကို ထုတ်ဖော်ပြသနိုင်မည့် ရှားပါးသော အခွင့်အရေး ဖြစ်သည်။

အကယ်၍ သူတို့၏ စွမ်းဆောင်ရည် အလွန်ကောင်းမွန်နေပါက ချွမ်မျိုးနွယ်စုသည် သူတို့အား မြို့တော်ရှိ ဂိုဏ်းကြီးဆီသို့ စေလွှတ်ပေးမည်ဖြစ်ကာ ထိုနေရာတွင် ပိုမိုကောင်းမွန်သော ကျင့်စဉ်များနှင့် အရင်းအမြစ်များကို ရရှိနိုင်မည်ဖြစ်သည်။

သို့သော်လည်း ထိုကဲ့သို့ ဂိုဏ်းကြီးတစ်ခုတွင် တပည့်ဖြစ်ရန် စေလွှတ်ခြင်းမှာ အလွန်အမင်း ကုန်ကျစရိတ်များသဖြင့် တစ်ဆယ်စုနှစ်တစ်ခုမှ တစ်ကြိမ်သာ ဖြစ်ပေါ်လေ့ရှိသည့် ရှားပါးအခွင့်အရေးလည်း ဖြစ်သည်။

၎င်းမှာ မျိုးနွယ်စု၏ အမွေခံများ သို့မဟုတ် အလားအလာ အရှိဆုံးသူများအတွက်သာ ရည်ရွယ်ထားခြင်း ဖြစ်သည်။

ပွဲစဉ်များ စတင်သည်နှင့်အမျှ ကွင်းပြင်အတွင်း ရုန်းရင်းဆန်ခတ်မှုများနှင့် စိတ်လှုပ်ရှားမှုများ ပြည့်နှက်သွားသည်။ တိုက်ပွဲပေါင်းများစွာ တစ်ပြိုင်နက်တည်း ဖြစ်ပွားနေသည်—အစေခံအချင်းချင်း တိုက်ခိုက်နေကြသည့် တိုက်ပွဲများနှင့်အတူ တပည့်များကလည်း တောက်လောင်သော ကျင့်စဉ်များဖြင့် ယှဉ်ပြိုင်နေကြပြီး နေရာအနှံ့တွင် ချီစွမ်းအင်များ ပွင့်ထွက်နေသည်။ ဖုန်မှုန့်များနှင့် အားပေးသံများသည် လေထုထဲတွင် လွှမ်းမိုးထားသည်။

ချုန်ရှန်သည် သူ၏အလှည့်ကို စောင့်နေသော်လည်း သူ၏အလှည့်ရောက်ရန် အတော်အတန် ကြာဦးမည်ဖြစ်သည်။

ထိုအချိန်အတွင်း သူသည် ပြိုင်ပွဲဝင်များ၏ အဆင့်အတန်းကို အကဲခတ်ကြည့်ရှုနေမိသည်။

ကျင့်ကြံခြင်း မရှိသော်လည်း မိမိတို့၏ ခံနိုင်ရည်နှင့် ပါရမီကို ပြသရန် ကြိုးစားနေကြသော အစေခံနှင့် ကျွန်များစွာ ရှိနေသည်။

သို့သော် ကျင့်ကြံသူများနှင့် ယှဉ်လျှင်မူ သူတို့သည် အခွင့်အရေး လုံးဝမရှိပေ။ သူတို့ချင်း ယှဉ်ပြိုင်ရာတွင်လည်း ကြမ်းတမ်းရိုးရှင်းသော တိုက်ခိုက်ရေးပုံစံများကိုသာ ပြသနိုင်ကြသည်။

ယခုအခါ ကျင့်ကြံခြင်း စွမ်းအားရှိနေပြီဖြစ်သော ချုန်ရှန်းအတွက်မူ သူတို့သည် ယှဉ်ပြိုင်ဘက် မဟုတ်ကြတော့ပေ။

ကျင့်ကြံခြင်း ခရီးလမ်းကို စတင်ရုံသာ ရှိသေးသည့် ချီသန့်စင်ခြင်းအဆင့်ရှိသူများမှာလည်း ထိုနည်းအတိုင်းပင် ဖြစ်သည်။

ပါရမီရှိသူများကမူ အခြေခံအုတ်မြစ်တည်ဆောက်ခြင်းအဆင့်တွင် ရှိနေကြသည်။

သူတို့ကို ချွမ်မျိုးနွယ်စု၏ ပါရမီရှင်များအဖြစ် သတ်မှတ်ထားကြပြီး မျိုးနွယ်စု၏ ကျင့်စဉ်အချို့ကိုလည်း တတ်မြောက်ထားကြသူများ ဖြစ်သည်။

၎င်းတို့မှာ ပြိုင်ပွဲတွင် အစွမ်းထက်သူများ ဖြစ်ကြပြီး ချုန်ရှန်းထက် အဆင့်တစ်ဆင့် ပိုမြင့်နေသော်လည်း သူတို့သည် ပြဿနာ ကြီးကြီးမားမား ဖြစ်လာမည်ဟု သူ မထင်ပေ။

အကြောင်းမှာ သူ၏ အဆင့်မြင့်မားသော တိုက်ခိုက်ရေး ပညာနှင့် အတွေ့အကြုံများအရ ကျင့်ကြံခြင်းအဆင့် ကွာဟချက်ကို ဖြည့်ဆည်းရန်မှာ သူ့အတွက် အလွန်ခက်ခဲသည့် ကိစ္စမဟုတ်သောကြောင့် ဖြစ်သည်။

သို့သော် အကယ်၍ ပြိုင်ဘက်သည် အဓိက ဖွဲ့စည်းပုံအဆင့်သာ ဖြစ်နေမည်ဆိုပါက တစ်မျိုးတစ်ဖုံ ပြောင်းလဲသွားနိုင်ပေသည်။

ကံကောင်းထောက်မစွာပင် ထိုအဆင့်ရှိသူ တစ်ဦးမျှ မရှိသေးပေ—သို့မဟုတ် အနည်းဆုံးတော့ မည်သူမျှ ထိုအဆင့်အထိ ကျင့်ကြံထားကြောင်း ထုတ်ဖော်မပြသကြသေးချေ။

ပြိုင်ပွဲအလယ်သို့ ရောက်သောအခါ တစ်စုံတစ်ခု ဖြစ်ပျက်သွားသည်ကို ချုန်ရှန်းသတိပြုမိလိုက်သည်။

အစေခံတစ်ဦးသည် ချွမ်လင်းရှုထံသို့ စိုးရိမ်တကြီးဖြင့် ရောက်ရှိလာပြီးနောက် ချွမ်မျိုးနွယ်စုခေါင်းဆောင်သည် ချက်ချင်းပင် ထွက်ခွာသွားသဖြင့် ချုန်ရှန်းနှင့် သတိပြုမိသူများအားလုံး ဇဝေဇဝါ ဖြစ်သွားကြသည်။

ချွမ်လင်းရှု ကိုယ်တိုင် ထွက်ခွာသွားခြင်းမှာ အလွန်အရေးကြီးသော ကိစ္စတစ်ခုခု ဖြစ်ပွားခဲ့ခြင်းပင် ဖြစ်ရမည်။

ချုန်ရှန်းအနေဖြင့် စိတ်ဝင်စားမိသော်လည်း ဖြစ်ကြောင်းကုန်စင်ကို သိရှိနိုင်မည့် နည်းလမ်းမရှိပေ။ သူ၏ အဓိက အာရုံစိုက်မှုမှာ ပြိုင်ပွဲပေါ်တွင်သာ ရှိသည်။

မကြာမီ သူ၏အလှည့် ရောက်လာခဲ့ပြီး သူ၏ပြိုင်ဘက်မှာ အခြားသူမဟုတ်ဘဲ ချုန်ရှန်းကို သတ်ခဲ့သည့် ချွမ်မျိုးနွယ်စု၏ သခင်လေးပင် ဖြစ်သည်။

သူ့ကို သခင်လေးဟု ခေါ်ဆိုရသော်လည်း သူသည် အမွေခံ သို့မဟုတ် ချွမ်မျိုးနွယ်စုတွင် အရေးပါသူတစ်ဦး မဟုတ်ပေ။

သူသည် တိုက်ရိုက်မျိုးဆက်တစ်ခုမှ ဖြစ်ပြီး ချွမ်မျိုးနွယ်စု၏ သွေးသားတော်စပ်ရုံမျှသာ ဖြစ်သည်။

ထို့အပြင် သူ၏ပါရမီမှာလည်း သာမန်မျှသာဖြစ်ပြီး ချွမ်မျိုးနွယ်စု၏ အခြားတပည့်များထက် ထူးထူးခြားခြား ဆက်ဆံခံရသူ မဟုတ်ပေ။

ထိုအချက်ကပင် သူ့ကို အမြဲတမ်း စိတ်ပျက်ဒေါသထွက်စေသည့် အကြောင်းရင်းတစ်ခုဖြစ်ပြီး ချုန်ရှန်းမှာ သူ၏ဒေါသအိုး ဖြစ်လာခဲ့ရသည်။

(ငါ ထင်ထားတာထက် ပိုမြန်မြန်ပဲ ဒီခန္ဓာကိုယ်အတွက် ကစားနိုင်တော့မှာပဲ)

ချုန်ရှန်းသည် ပြိုင်ပွဲကွင်းအတွင်းသို့ လျှောက်လှမ်းရင်း ပြုံးလိုက်မိသည်။

သူ ကွင်းအတွင်းသို့ လျှောက်သွားစဉ်မှာပင် ရုတ်ရုတ်သဲသဲ ဖြစ်သွားခဲ့ပြီး ချွမ်မျိုးနွယ်စုခေါင်းဆောင် အဘယ်ကြောင့် အလျင်အမြန် ထွက်ခွာသွားရသနည်းဆိုသည့် အဖြေမှာ ပေါ်ထွက်လာတော့သည်။

မင်းသမီး စွန်းယောင်ချင်း

သူမ ရောက်ရှိလာခြင်းပင် ဖြစ်သည်။ အစေခံများနှင့် မျိုးနွယ်စုခေါင်းဆောင်ပင်လျှင် အလွန်အရေးကြီးသော ပြိုင်ပွဲကြီးကို ထားရစ်ကာ စိုးရိမ်တကြီး ထွက်သွားခဲ့ရသည်ကို နားလည်နိုင်ပေသည်။ ချုန်ရှန်းသည် မင်းသမီး စွန်းယောင်ချင်းကို စိတ်ဝင်တစားဖြင့် ကြည့်လိုက်သည်။ အမှန်ပင် သူ မြင်တွေ့ခဲ့ဖူးသမျှ အလှနတ်သမီးများထဲတွင် သူမသည် ထိုသူများကိုပင် ယှဉ်ပြိုင်နိုင်လောက်သည့် အလှတရားမျိုး ပိုင်ဆိုင်ထားသည်။

ရုတ်တရက် သူသည် သားကောင်ကို စိုက်ကြည့်နေသော သားရဲတစ်ကောင်၏ အကြည့်ကို ခံလိုက်ရသလိုမျိုး တစ်ကိုယ်လုံး စိမ့်တက်သွားသည်။

သူသည် မည်သူဖြစ်ကြောင်း သိရှိရန် ဘေးဘယ်ညာသို့ ကြည့်လိုက်သော်လည်း သူ၏ လက်ရှိ အားနည်းနေသော အာရုံခံစားမှုများဖြင့် ရှာမတွေ့ခဲ့ပေ။

(ငါ့စိတ်က ထင်တာများလား?)

သူ တွေးလိုက်မိသည်။

တစ်စုံတစ်ဦး၏ အာရုံစိုက်မှုကို ခံရလောက်သည့် အရာမျိုး သူ ဘာမှမလုပ်ရသေးဟု ထင်နေခဲ့သည်။

သူသည် ကွင်းအတွင်းသို့ လျှောက်လှမ်းလာရာ သူ၏ ပထမဆုံးပြိုင်ဘက်ဖြစ်ပြီး သူ့ကို အမြဲအောက်ကျို့စေကာ ညှဉ်းပန်းနှိပ်စက်ခဲ့သူက စောင့်ကြိုနေသည်။

"ငါ့ပြိုင်ဘက်က ဒီလို အားနည်းတဲ့ကောင် ဖြစ်နေတာတင်မကဘဲ မင်းသမီးရဲ့ ရှေ့မှာပါ ငါ့အရည်အချင်းကို ပြခွင့်ရတော့မယ်။ ငါ့ရဲ့ ဂုဏ်တက်မယ့် အချိန်ရောက်ပြီပဲ”

ချုန်ရှန်းသည် ထိုစကားကို ကြားသောအခါ ပြုံးလိုက်သည်။

(ဟုတ်ပါတယ်... မျိုးနွယ်စုခေါင်းဆောင်နဲ့ မင်းသမီးရဲ့ ရှေ့မှာ အရှက်ကွဲရတာက မင်းအတွက်တော့ အကောင်းဆုံး သင်ခန်းစာ ဖြစ်မှာပါ)