ချုန်ရှန်း၊ ကောင်းကင်ဘုံ၏ ရွေးချယ်ခံရသူ

ချွမ်မျိုးနွယ်စု၏ လူငယ်မျိုးဆက်သစ်ပြိုင်ပွဲကို တက်ရောက်ကြည့်ရှုရန် စဉ်းစားခဲ့စဉ်က ပိုင်ကျီဟန် အနေဖြင့် ထွေထွေထူးထူး မတွေးတောခဲ့ပေ။

"ဒီဘက်ကို ကြွပါခင်ဗျာ။"

ချွမ်လင်းရှုသည် အထူးဧည့်သည်တော်များအတွက် သီးသန့်ပြင်ဆင်ထားသော မြင့်မားသည့် စင်မြင့်ဆီသို့ ဦးဆောင်ခေါ်သွားသည်။

ထိုနေရာမှာ အထင်ကရအရှိဆုံး ပုဂ္ဂိုလ်များအတွက်သာ သီးသန့်ဖယ်ချန်ထားသော နေရာဖြစ်သည်မှာ သိသာလှသည်။

နုညံ့သော ပိုးထည်ကုလားကာများသည် ဘေးပတ်ပတ်လည်တွင် ဝန်းရံထားပြီး အောက်ဘက်ရှိ ပြိုင်ပွဲကွင်းပြင် တစ်ခုလုံးကို အပေါ်စီးမှ အထင်းသား မြင်တွေ့နိုင်သည်။

အလယ်ဗဟိုတွင် ဝိညာဉ်သစ်သားဖြင့် ထုလုပ်ကာ ကျောက်စိမ်းများ စီခြယ်ထားသော ကျယ်ဝန်းသည့် ထိုင်ခုံကြီးတစ်ခု ရှိသည်။ ၎င်းမှာ မျိုးနွယ်စုခေါင်းဆောင် ချွမ်လင်းရှု ကိုယ်တိုင် ထိုင်သည့် ခုံဖြစ်သည်။

သို့သော် ယခုအခါ ထိုခုံကို မင်းသမီး စွန်းယောင်ချင်းအား လေးစားစွာဖြင့် ကမ်းလှမ်းထားပြီး ခုံ၏ ဘေးပတ်လည်တွင် ရွှေလင်ဗန်းများဖြင့် တည်ခင်းထားသော လက်ဖက်ရည်

နှင့် ဝိညာဉ်သစ်သီးများဖြင့် ပြည့်နှက်နေသည်။

၎င်း၏ ဘေးတွင် အခြား ခန့်ညားသည့် ထိုင်ခုံတစ်ခုကိုလည်း အသင့်ပြင်ဆင်ထားသည်။ ထိုခုံ၏ တည်နေရာနှင့် အရည်အသွေးကို ကြည့်ရုံဖြင့် ပိုင်ကျီဟန်အတွက် ရည်ရွယ်ထားခြင်းဖြစ်ကြောင်း သိသာလှသည်။

ချွမ်လင်းရှုသည် ခုံနှစ်ခုလုံးကို ဝိညာဉ်သစ်သားဖြင့်ပင် ပြုလုပ်ထားပြီး အဆင့်မြင့် ပိုးထည်များ၊ ရှားပါး ဝိညာဉ်သစ်သီးများဖြင့် တူညီသော ဂရုစိုက်မှုမျိုးဖြင့် ပြင်ဆင်ပေးထားသည်။

သို့သော် အကဲခတ်တတ်သူတစ်ဦးအဖို့မူ သိမ်မွေ့သော ကွဲပြားချက်ကို သတိပြုမိလိမ့်မည်။

ပိုင်ကျီဟန်၏ ထိုင်ခုံမှာ အနည်းငယ် ပို၍ မြင့်သော နေရာတွင် ရှိနေပြီး ခုံ၏ ကျောမှီတွင် အလင်းရောင်နှင့် ဟပ်နေသည့် သိမ်မွေ့သော ရွှေချည်ထိုး ပန်းလက်ရာများ ပါရှိသည်။ ၎င်းမှာ ချွမ်လင်းရှုဘက်မှ ရည်ရွယ်ချက်ရှိရှိ လုပ်ဆောင်ထားသော သိမ်မွေ့သည့် အပြုအမူတစ်ခု ဖြစ်သည်။

၎င်းမှာ ဧည့်သည်တော် နှစ်ဦးအနက် ပိုင်ကျီဟန်၏ အဆင့်အတန်းသည် မင်းသမီး စွန်းယောင်ချင်းထက်ပင် သာလွန်ကြောင်း ချွမ်လင်းရှု၏ တိတ်တဆိတ် အသိအမှတ်ပြုမှုပင် ဖြစ်သည်။

မင်းသမီး စွန်းယောင်ချင်းမှာမူ ထိုအချက်ကို ထွေထွေထူးထူး မစဉ်းစားမိပေ။ အကယ်၍ သတိထားမိခဲ့လျှင်ပင် သူမအနေဖြင့် သဘောတူရမည်သာ ဖြစ်သည်။

အခြားတစ်ဖက်တွင်မူ ပိုင်ကျီဟန်သည် ထိုအချက်ကို သတိပြုမိသော်လည်း လုံးဝ ဂရုမစိုက်ပေ။ ချွမ်လင်းရှုသည် သူ့ကို ဖားရန် ကြိုးစားနေသည့် ပထမဆုံးလူ မဟုတ်

သောကြောင့် ဖြစ်သည်။

ထိုစဉ်မှာပင်

[ကောင်းကင်ဘုံ၏ ရွေးချယ်ခံရသူကို ရှာဖွေတွေ့ရှိပါသည်။]

စနစ်သည် ထင်မှတ်မထားဘဲ ကောင်းကင်ဘုံ၏ ရွေးချယ်ခံရသူတစ်ဦးကို ရှာဖွေတွေ့ရှိခဲ့သည်။

ပိုင်ကျီဟန်သည် အံ့အားသင့်ကာ မျက်လုံးများ ပြူးသွားခဲ့သည်။

[စကင်ဖတ်နေသည်...]

[ကောင်းကင်ဘုံ ရွေးချယ်ခံရသူ၏ ကိုယ်ရေးမှတ်တမ်းကို ဖွင့်လိုက်ပါပြီ]

အမည်: ချုန်ရှန်း

အသက်: ၁၉ နှစ်

ကံကြမ္မာ အဆင့်အတန်း: (ကြယ်သုံးပွင့်)

ကျင့်ကြံခြင်းအဆင့်: ချီသန့်စင်ခြင်း (အလယ်အလတ်အဆင့်)

ဘဝမှတ်တမ်း:တစ်ချိန်က ကမ္ဘာတစ်ဝန်းတွင် ချောက်နက် ဘုရင်မင်းမြတ်ဟု ကျော်ကြားခဲ့သူ ဖြစ်သည်။ သူသည် များပြားလှစွာသော နတ်ဆိုးဂိုဏ်းများကို မိမိ၏ အလိုတော်အောက်တွင် စည်းလုံးစေခဲ့သည့် အထွတ်အထိပ် နတ်ဆိုးအရှင်သခင် အမတကျင့်ကြံသူတစ်ဦး ဖြစ်ခဲ့သည်။

ရာစုနှစ်များစွာတိုင်အောင် သူ၏ အမည်ကို ကြားရုံမျှဖြင့် ကောင်းကင်ဘုံပင် တုန်လှုပ်ရပြီး တရားသော ကျင့်ကြံသူများမှာ ကြောက်ရွံ့မှုကြောင့် စုစည်းခဲ့ကြရသည်။

သူ၏ သွေးသည် စစ်တပ်ကြီးများကို သန့်စင်ပေးနိုင်ပြီး သူ၏ ဝိညာဉ်သည် သူတော်စင်များကို ဝါးမြိုကာ သူ၏ လမ်းစဉ် မှာ သတ်ဖြတ်ခြင်းနှင့် ပျက်စီးခြင်းများပေါ်တွင် တည်ဆောက်ထားသည်ဟု ဆိုစမှတ်ပြုကြသည်။

မိမိ ဂိုဏ်းသားများ၏ သစ္စာဖောက်မှုကို ခံခဲ့ရပြီးနောက် အမတ အရှင်သခင်များ ဦးဆောင်သော မဟာမိတ်တပ်ဖွဲ့၏ ဝိုင်းရံတိုက်ခိုက်ခြင်းကို ခံခဲ့ရကာ နတ်ဘုရားအဆင့်သို့ တက်လှမ်းခါနီးအချိန်တွင် သေဆုံးခဲ့ရသည်။

သို့သော် သူ၏ နာကျည်းမှုများမှာ မှေးမှိန်သွားခြင်း မရှိပေ။ သူ၏ ဝိညာဉ်သည် ဟင်းလင်းပြင်ကို ဖြတ်သန်းကာ သံသရာစက်ဝန်းကို ဖောက်ထွက်၍ အစေခံလေး ချုန်ရှန်း၏ လူသားခန္ဓာကိုယ်အတွင်း နိုးထလာခဲ့သည်။

ယခုအခါ ချွမ်မျိုးနွယ်စုတွင် နိမ့်ကျသော အစေခံတစ်ဦးအဖြစ် ပြန်လည်မွေးဖွားလာခဲ့သော်လည်း ချုန်ရှန်း၏ နတ်ဆိုးအမြုတေ သည် လူသားအသွေးအသားအောက်တွင် အိပ်ပျော်နေဆဲ ဖြစ်သည်။ ချိပ်ပိတ်ခံထားရသော်လည်း ဒေါသမာန်ဟုန်များဖြင့် တငွေ့ငွေ့ လောင်မြိုက်နေသည်။

သူ၏ ကံကြမ္မာသည် ကစားလိုစိတ်များဖြင့် တောက်လောင်နေသည်—တစ်ဖန်ပြန်လည် ထွန်းကားလာပြီး ကောင်းကင်ဘုံတစ်ခုလုံးကို လက်စားချေကာ သွေးစက်များဖြင့် စိုရွှဲစေမည့် ဝိညာဉ်ပင် ဖြစ်သည်။

ထင်မှတ်မထားဘဲ ပိုင်ကျီဟန်သည် အခြားသော ကောင်းကင်ဘုံ၏ ရွေးချယ်ခံရသူတစ်ဦးနှင့် ထပ်မံတွေ့ဆုံခဲ့ပြန်ပြီ။

ထိုသူမှာလည်း အားနည်းမည့်ပုံ မပေါ်ပေ။

တစ်ခုတည်းသော ပြဿနာမှာ သူသည် လက်ရှိတွင် အလွန်အားနည်းနေပြီး မကြာသေးမီကမှ ဝိညာဉ်ကူးပြောင်း ဝင်စားထားခြင်းပင် ဖြစ်သည်။

သို့မဟုတ်ပါက တစ်နှစ်၊ နှစ်နှစ်ခန့် အချိန်ပေးလိုက်လျှင် သူသည် ယခင်ဘဝက ကျင့်ကြံခြင်းအဆင့်များကို ကျော်ဖြတ်ခဲ့ဖူးသည့် အတွေ့အကြုံများကြောင့် နီဖန်းကျိုးထက်ပင် ပိုမို သန်စွမ်းလာနိုင်ချေ ရှိသည်။

သို့သော် သူက ပို၍ အန္တရာယ်ရှိသည်ဟု ယူဆရပါလျက်နှင့် အဘယ်ကြောင့် သူ၏ ကံကြမ္မာအဆင့် မှာ ကြယ်သုံးပွင့်သာ ရှိနေပြီး နီဖန်းကျိုးမှာမူ ကြယ်လေးပွင့် ဖြစ်နေရသနည်း?

(ဒီအဆင့်သတ်မှတ်ချက်က ဘာကို ကိုယ်စားပြုတာလဲ?)

၎င်းသည် လက်ရှိအင်အားကို ကိုယ်စားပြုခြင်း မဟုတ်သည်မှာ အသေအချာပင်။ အကယ်၍ အင်အားကို ကိုယ်စားပြုပါက ချုန်ရှန်းသည် ကြယ်တစ်ပွင့်အဆင့်ပင် ရှိမည်မဟုတ်ပေ။

အလားအလာကိုလား?

ထိုသို့ ဖြစ်နိုင်သော်လည်း လုံးဝကြီး မှန်ကန်နေသည်ဟု သူ မထင်ပေ။

မည်သို့ပင်ဖြစ်စေ၊ ပိုင်ကျီဟန် မှတ်မိသလောက် အထွတ်အထိပ် အမတဆိုသည်မှာ လက်ရှိကမ္ဘာတွင် အမြင့်ဆုံးသော ကျင့်ကြံခြင်းအဆင့်၌ ရှိနေသူကို ခေါ်ခြင်းဖြစ်သည်။

၎င်းမှာ နီဖန်းကျိုး၏ ဆရာဖြစ်သူ တုချန်ရှန်း နှင့် အဆင့်တူပင် ဖြစ်သည်။

သို့သော် ချုန်ရှန်းကို စနစ်က ကြယ်သုံးပွင့်သာ သတ်မှတ်ပြီး တုချန်ရှန်းကိုမူ ကြယ်ငါးပွင့်အဖြစ် သတ်မှတ်ထားသည်။

သူတို့နှစ်ဦးလုံးသည် ယခင်က အထွတ်အထိပ် အမတများ ဖြစ်ခဲ့ကြသော်လည်း စနစ်က ကွဲပြားသော ကြယ်အဆင့်များကို ပေးထားသည်။

(ဘာလို့လဲ?)

၎င်းမှာ သူ လက်ရှိတွင် နားမလည်နိုင်သေးသော အရာတစ်ခု ဖြစ်နိုင်သည်။

သို့သော် မည်သို့ပင်ဆိုစေကာမူ ချုန်ရှန်းသည် နတ်ဆိုးလမ်းစဉ်ကို လျှောက်လှမ်းခဲ့သော အထွတ်အထိပ် အမတဟောင်းတစ်ဦး ဖြစ်သည့်အတွက် လျှော့တွက်၍မရသော ခြိမ်းခြောက်မှုတစ်ခု ဖြစ်သည်မှာ အမှန်ပင်။

နတ်ဆိုးကျင့်ကြံသူများသည် အင်အားကိုသာ အလေးထားကြပြီး ထိုအင်အားအတွက်ဆိုလျှင် တရားသောကျင့်ကြံသူများနှင့်မတူဘဲ လိုအပ်သည့်အရာမှန်သမျှကို လုပ်ဆောင်ရန် ဝန်မလေးကြပေ။

သူတို့သည် ပရိယာယ်ကြွယ်ဝပြီး အခြားသူများကို လှည့်ဖြားရာတွင်လည်း ကျွမ်းကျင်ကြသည်။

ပိုင်ကျီဟန်အနေဖြင့် အထွတ်အထိပ် အမတအဆင့်အထိ ရောက်ခဲ့သည်ဆိုသော ချောက်နက်ဘုရင်မင်းမြတ်အကြောင်းကို မကြားဖူးခြင်းမှာ ပုံမှန်ပင် ဖြစ်ပါလိမ့်မည်။

သူ၏ ကျင့်ကြံခြင်းအဆင့်မှာ အလွန်မြင့်မားလွန်းသဖြင့် သူသည် ဗဟိုတိုက်ကြီးသို့မဟုတ် ထိုအနီးတစ်ဝိုက်မှ လာသူဖြစ်ရမည်။

ထိုဒေသများ၏ သတင်းအချက်အလက်သည် ကောင်ကင် အင်ပါယာတွင် အလွန်ရှားပါးလှသည်။

ဘာပဲဖြစ်ဖြစ် တစ်ခုတော့ အသေအချာပင်။ ချုန်ရှန်းသည် အလွန်အမင်း အန္တရာယ်ရှိသည်။

သူ ဆိုလိုသည်မှာ လက်ရှိစွမ်းအားအရ ပုရွက်ဆိတ်တစ်ကောင်ကဲ့သို့ ချုန်ရှန်းသည် အန္တရာယ်ရှိခြင်း မဟုတ်သည့်တိုင် သူ့စိတ်ဓာတ်မှာ အန္တရာယ်ရှိနေခြင်းဖြစ်သည်။

နတ်ဆိုးလမ်းစဉ်မှ လာသူများ၊ အထူးသဖြင့် ခေါင်းဆောင်တစ်ဦး ဖြစ်ခဲ့ဖူးသူများသည် ပါးနပ်ပြီး ကရုဏာမဲ့တတ်ကြသည်။ သူ ယခင်က တွေ့ခဲ့ဖူးသော တုချန်ရှန်းကလွဲလျှင် အခြား ကောင်းကင်ဘုံ၏ ရွေးချယ်ခံရသူများမှာ အဖြူထည် သက်သက်သာ ရှိကြသေးသည်။

(ဘာပဲဖြစ်ဖြစ် ဒီလိုလူမျိုးက သေသွားတာပဲ အကောင်းဆုံး ဖြစ်လိမ့်မယ်။)

ပိုင်ကျီဟန်သည် ချုန်ရှန်းအပေါ် ကျေးဇူးပြုခဲ့လျှင်ပင် ချုန်ရှန်းသည် ထိုကျေးဇူးကို ကောင်းမွန်စွာ ပြန်ဆပ်မည်လား၊ သို့မဟုတ် သူ့ကို ပြန်လည်အသုံးချသွားမည်လား ဆိုသည်ကို စိုးရိမ်မိနေသည်။

ထိုလူမျိုးတွေအနေဖြင့် သူတို့ကို ကူညီသည်ဖြစ်စေ၊ မကူညီသည်ဖြစ်စေ နောက်ပိုင်းမှာ နောက်ကျောကနေ ဓားနဲ့ ပြန်ထိုးမည့်သူတွေသာ ဖြစ်၏

နောင်ရေးအတွက် ပြဿနာမတက်အောင် အခုကတည်းက သတ်ပစ်လိုက်တာက သစ္စာဖောက်မှုများကို ဖိတ်ခေါ်လာမည့် ကျေးဇူးတရားများထက် ပိုကောင်းပါလိမ့်မည်။

ချုန်ရှန်းသည် မြေကမ္ဘာကျင့်ကြံခြင်း နည်းစနစ်အချို့ကိုပေးရုံဖြင့် စိတ်လှုပ်ရှားပြီး ကျေးဇူးတင်သွားမည့် လင်းရွှမ်လို လူမျိုးမဟုတ်ပေ

ပိုင်ကျီဟန်အနေနဲ့ သူ့ကို သူတော်စင်အဆင့် ကျင့်စဉ်များ ပေးခဲ့လျှင်ပင် သူက သစ္စာရှိမည်လား၊ ဒါမှမဟုတ် ကွယ်ရာမှာပဲ ပရိယာယ်တွေ ဆင်ဦးမည်လားဆိုတာ မည်သူသိနိုင်မည်နည်း

ဒါတင်မကသေးပေ။ ပိုင်ကျီဟန်သည် အခုလောလောဆယ်၌ သူတော်စင်အဆင့် ကျင့်စဉ် ဝယ်နိုင်သည့် အနေအထားမှာလည်း ရှိမနေချေ။

ဘာမှမလုပ်ဘဲ ဒီအတိုင်းလွှတ်ထားဖို့ကလည်း မဖြစ်နိုင်ပေ

အကယ်၍ စောင့်ကြည့်မနေဘဲ လွှတ်ထားမည်ဆိုပါက ချုန်ရှန်းသည် သူ့ထက်တောင် ပိုပြီး မြန်မြန်ဆန်ဆန် ကြီးထွားလာနိုင်သော အရည်အချင်းရှိနေ၏

မည်သို့ပင်ဖြစ်စေ ၊ အထွတ်အထိပ် အမတဟောင်းတစ်ယောက်ဖြစ်တာကြောင့် သူ့ အသိပညာနှင့် အတွေ့အကြုံအားလုံးကို အသုံးချနိုင်စွမ်းရှိပေသည်။

လိုအပ်သော အခြေခံဗဟုသုတ ရှိပြီးသားဖြစ်တာကြောင့် ကျင့်ကြံသည့်အခါ ဘေးထွက်ဆိုးကျိုးများကိုလည်း စိုးရိမ်နေစရာ မလိုပေ။

နတ်ဆိုးကျင့်ကြံသူများ၏ ခေါင်းဆောင်ဖြစ်ခဲ့စဉ်က ကျင့်စဉ်များစွာကို သင်ယူခဲ့ပြီးသားဖြစ်တာကြောင့် ကျင့်စဉ်အတွက်လည်း စိတ်ပူစရာမလိုပေ

အခုလောလောဆယ် ချန်ရှန်းမှာ လိုအပ်နေတာက ကျင့်ကြံခြင်းဆိုင်ရာ အရင်းအမြစ်နှင့်လက်နက်ကိရိယာသာ ဖြစ်သည်။

(သူ ဒီပြိုင်ပွဲဝင်နေတာဟာ ဆုလာဘ်တွေကြောင့် ဖြစ်ရမယ်။)

ဒါကို သိဖို့အတွက် ဉာဏ်ကြီးရှင်တစ်ယောက် ဖြစ်နေစရာတောင် မလိုပေ

(ကဲ... ငါ သူ့ကို ဘယ်လို ကိုင်တွယ်ရမလဲ?)

ကွင်းအတွင်းမှာတော့ သခင်လေး ချွမ်ကျီယန်သည် သူ့ကိုယ်သူ အပြည့်အဝ ယုံကြည်မှု ရှိနေဆဲဖြစ်ပြီး ဘာသံသယမှ ရှိမနေပေ

"စတင်စေ”

အကြီးအကဲ၏ အသံဆုံးသည်နှင့် နှစ်ဦးကြားရှိ လေထုမှာ တင်းမာသွားသည်။

ချွမ်ကျီယန်သည် လှောင်ပြုံးပြုံးလိုက်ရင်း လေ့ကျင့်ရေး သစ်သားဓားကို ဆွဲထုတ်လိုက်သည်။

"ချုန်ရှန်း... မင်းသမီးစွန်းက ငါ့တိုက်ပွဲကို ကြည့်နေတာကွ။ မင်းကတော့ တစ်ချက်တည်းနဲ့ လဲမသွားအောင် သတိထားဦးပေါ့။"

ချွမ်ကျီယန်က ကြေညာသလို ပြောလိုက်

သည်။

"ကောင်းပါပြီ”

ချုန်ရှန်းက လှောင်ပြုံးဖြင့် ပြန်လည်ဖြေကြားလိုက်ရာ ချွမ်ကျီယန်ကို အကြီးအကျယ် ဒေါသထွက်သွားစေသည်။

"ဟွန်း”

ချွမ်ကျီယန်သည် ရှေ့သို့ ခုန်ဝင်လိုက်ပြီး သူ၏ဓားကို ပြင်းထန်သော အရှိန်ဖြင့် ဝေ့ယမ်းလိုက်သည်။

ဝှူး

ဓားသွားက လေထုကိုသာ ဖြတ်သန်းသွားသည်။

ချုန်ရှန်းသည် ရှောင်တိမ်းပြီး သူ၏ ခန္ဓာကိုယ်သည် တည်ငြိမ်နေသော ရေမျက်နှာပြင်ပေါ်က လှိုင်းတွန့်လေးများကဲ့သို့ သိမ်မွေ့ကျော့ရှင်းစွာဖြင့် ဘေးသို့ ရှောင်ထွက်သွားခဲ့သည်။

နောက်ထပ် တိုက်ခိုက်မှုတစ်ခု၊ ပြီးတော့ နောက်တစ်ခု—ချီသန့်စင်ခြင်း၏ အရိပ်အယောင်များ ပါရှိသော ခုတ်ချက်၊ ထိုးချက်များ ဆက်တိုက် ထွက်ပေါ်လာသည်။

ပရိသတ်များသည် ချွမ်ကျီယန်၏ အရှိန်နှင့် စွမ်းအားကို ကြည့်ပြီး ချီးကျူးနေကြသည်။ သို့သော်လည်း ထိုမြင်ကွင်းက ခဏချင်းမှာပင် ပြောင်းလဲသွားတော့သည်။

အကြောင်းမှာ ချွမ်ကျီယန်၏ တိုက်ခိုက်မှုတိုင်းမှာ လွဲချော်နေသောကြောင့် ဖြစ်သည်။

ချုန်ရှန်းသည် စစ်မြေပြင်ပေါင်းများစွာကို ဖြတ်သန်းခဲ့ဖူးသူတစ်ဦးကဲ့သို့ အေးအေးဆေးဆေးပင် လှုပ်ရှားနေသည်။

သူ၏ လှုပ်ရှားမှုများသည် တိကျပြီး အပိုအလို မရှိလှပေ—တိုက်ခိုက်မှုတစ်ခုချင်းစီက မည်သည့်နေရာကို ကျရောက်လာမည်ဆိုသည်ကို မစတင်မီကတည်းက ကြိုတင်သိရှိနေသကဲ့သို့ပင်။

"ဘာဖြစ်တာလဲ?"

ချုန်ရှန်းက သရော်သလို မေးလိုက်သည်။

"သခင်လေးက ကျွန်တော့်အတွက် ငဲ့ညှာပြီး အရှိန်လျှော့ပေးနေတာလား? ဒီကျွန်အတွက် စိတ်မပူပါနဲ့၊ သခင်လေးရဲ့ အစွမ်းကုန်နဲ့သာ တိုက်စမ်းပါ”

ထိုစကားကြောင့် ချွမ်ကျီယန်၏ မျက်နှာသည် ဒေါသကြောင့် နီမြန်းသွားသည်။ သူသည် အစွမ်းကုန် တိုက်ခိုက်နေသော်လည်း တစ်

ချက်မျှပင် မထိမှန်နိုင်သေးချေ။

"... ဒီယုတ်မာတဲ့ကောင်”

သူက အော်ဟစ်လိုက်ပြီး သူ၏ဓားဘေးပတ်လည်တွင် ချီစွမ်းအင်များကို ကြမ်းတမ်းစွာ လှည့်ပတ်စေလိုက်သည်။

"မင်း သတ္တိရှိရင် ဒီအတိုင်း ငြိမ်ငြိမ်ရပ်နေစမ်း”

ပရိသတ်များကြားမှ ရယ်မောသံများ ထွက်ပေါ်လာသည်။

"ဟားဟားဟား၊ သူက သူ့ပြိုင်ဘက်ကို ငြိမ်ငြိမ်ရပ်နေဖို့ ပြောလိုက်တာလား?"

"ဒီကမ္ဘာမှာ ဘယ်သူက တိုက်ပွဲထဲမှာ အဲဒီလိုစကားမျိုး ပြောလို့လဲ?"

"အစေခံတွေတောင် သူ့ကို ရယ်နေကြပြီ”

"တောက်၊ အသုံးမကျတဲ့ အမှိုက်။ အစေခံတစ်ယောက်ကိုတောင် မနိုင်ဘူး။ သူ့ကိုယ်ထဲမှာ ချွမ်မျိုးနွယ်ရဲ့ သွေးပါနေလဲ ဘာထူးမှာလဲ?"

ချွမ်ကျီယန်၏ မျက်နှာမှာ ဒေါသကြောင့် ရှုံ့မဲ့သွားသည်။

"တောက်! ဒါတွေအားလုံး မင်းကြောင့်ပဲ”

သူသည် ရမ်းသမ်း၍ ခုတ်ယမ်းလိုက်ရာ ဓားသွားသည် လေထုကို အကြိမ်ကြိမ် ဖြတ်သန်းသွားသော်လည်း ၎င်းမှာ မီးခိုးငွေ့ကို ဖမ်းရန် ကြိုးစားနေသကဲ့သို့သာ ဖြစ်နေသည်။

ချုန်ရှန်းသည် တိုက်ခိုက်မှုတိုင်းကို အသာအယာ ရှောင်ထွက်သွားသည်—ငုံ့လိုက်၊ တိမ်းလိုက်၊ ဘေးတိုးလိုက်ဖြင့် သူ၏ လှုပ်ရှားမှုများမှာ စီးဆင်းနေသကဲ့သို့ ရှိပြီး လှောင်ပြောင်နေသယောင်ပင် ဖြစ်သည်။

တစ်ခါတစ်ရံတွင် သူသည် နောက်ဆုံးမိနစ်ကျမှသာ လှုပ်ရှားသကဲ့သို့ ထင်ရပြီး ဓားသွားမှာ သူ၏ အသားကို မထိဘဲ အဝတ်အစားကိုသာ ပွတ်ကာ ဖြတ်သွားစေသည်။

၎င်းမှာ အရှိန်တစ်ခုတည်းကြောင့် မဟုတ်ဘဲ ချုန်ရှန်းသည် တိုက်ပွဲကို အလွန်လွယ်ကူစွာ ထိန်းချုပ်ထားနိုင်ခြင်းကြောင့် ဖြစ်သည်။

လှုပ်ရှားမှုတိုင်းသည် ရည်ရွယ်ချက်ရှိရှိဖြစ်ပြီး ရှောင်တိမ်းမှုတိုင်းမှာလည်း တစ်ဖက်လူ အရှက်ရစေရန် တွက်ချက်ထားခြင်း ဖြစ်သည်။

"ဒါပဲလား?"

ချုန်ရှန်း၏အသံမှာ ကွင်းပြင်တစ်ခုလုံးသို့ ပျံ့လွင့်သွားသည်။

"မင်း... သေလိုက်တော့”

ချွမ်ကျီယန်သည် မျက်လုံးများ နီမြန်းကာ အော်ဟစ်လိုက်သည်။ သူသည် ချီစွမ်းအင်များကို စုစည်းလိုက်ပြီး ဓားသွားပေါ်တွင် တောက်ပသော စွမ်းအင်အကွေးတစ်ခုကို ဖန်တီးလိုက်သည်။

"ဒါကို ခံစားကြည့်စမ်း”

ဓားခုတ်ချက်သည် လေကို ခွင်းလျက် ချုန်ရှန်း၏ ရင်ဘတ်ဆီသို့ စူးရှသော အသံဖြင့် ဆင်းသက်လာသည်။

အစေခံများမှာ ထိတ်လန့်သွားကြသည်။

သို့သော် ချုန်ရှန်းသည် ရှေ့သို့သာ တစ်လှမ်း တိုးလိုက်သည်။ တိကျသေချာသော ခြေလှမ်းတစ်ခုသည် သူ့ကို ဘေးဘက်သို့ လက်မအနည်းငယ်မျှသာ ရွှေ့လိုက်စေသည်။

ဓားသွားသညလ သူ့ဘေးမှ ဘာအန္တရာယ်မှ မပေးနိုင်ဘဲ ဝဲပျံသွားသည်။

ဗုန်း!

ကျယ်လောင်သော အသံနှင့်အတူ သစ်သားဓားသည် ချွမ်ကျီယန်၏ လက်ထဲမှ လွတ်ကျသွားသည်။ အရှိန်လွန်သွားသော သူ၏ တိုက်ခိုက်မှုစွမ်းအားသည် သူ့ကိုယ်သူ ဟန်ချက်ပျက်သွားစေသည်။

ခဏတာအတွင်း သူ၏ ခန္ဓာကိုယ်သည် တောင့်တင်းသွားကာ လွဲချော်သွားသော အင်အား၏ တန်ပြန်သက်ရောက်မှုကြောင့် ကြွက်သားများမှာ တစ်ဆို့သွားရသည်။

သူ၏ လက်ခြေများသည် စကားနားမထောင်တော့ဘဲ ခေတ္တမျှ ကြောင်အသွားပြီး မိမိ၏ တိုက်ခိုက်မှု မည်မျှ ပျက်ပြားသွားရသည်ကို မယုံကြည်နိုင်သော မျက်လုံးများဖြင့် စိုက်ကြည့်နေမိသည်။

ထိုကဲ့သို့သော အခွင့်အရေးမျိုးကို ချုန်ရှန်းက အလွတ်ပေးပါမည်လော?

"ဟားဟား... သခင်လေးက ကျွန်တော့်ကို လူစွမ်းပြဖို့ အခွင့်အရေး ပေးနေတာပဲ။ အဲဒီလိုဆိုမှတော့ ငြင်းပယ်လိုက်ရင် ရိုင်းရာကျမှာပေါ့။"