အခန်း (၉)
Vol. 1 Ch. 9
အပိုင်း (၉)
"ဗိုက်အရမ်းဆာနေပြီ ဆရာ့ကိုနေ့လယ်စာ ဘာစားမလဲ အရင်သွားမေးမှပဲ"
ချန်ဟေးထန် တောင်အောက်သို့ပြေးဆင်းလာလေ၏။
"ဆရာသခင် ဆရာသခင်"
ချန်ဟေးထန် အော်ဟစ်ပြေးလာလေ၏။
ဝမ်လော့လီမှာ ချန်ဟေးထန်ပြေးလာသည်ကိုမြင်လိုက်ရသောအခါ သူ့ကျင့်ကြံခြင်းအဆင့်ကို အလိုလိုစစ်ဆေးကြည့်လိုက်သည်။
ချီကျင့်ကြံခြင်း အဆင့် ၄။
ထင်ထားတဲ့အတိုင်းပါပဲ
သူတို့က လေလွင့်ကျင့်ကြံသူဆရာတပည့်တွေပါလား။
တပည့်က ချီကျင့်ကြံခြင်း အဆင့်၄ပဲရှိသေးရင် သူ့ဆရာကရော ဘယ်လောက်မြင့်နိုင်မှာမလို့လဲ။
သရဲဘုရင်ဂိုဏ်းသာရောက်လာရင် သူတို့ ဒုက္ခရောက်ကုန်ကြလိမ့်မယ်။ဒီဆရာတပည့်နှစ်ယောက်ကို မပတ်သက်စေဘဲ အရင်ထွက်သွားသည်ကသာ ပိုကောင်းပေလိမ့်မည်။
ဝမ်လော့လီ နှုတ်ခမ်းလေးအားဖွင့်ဟကာအသာပြောလိုက်၏။
"စီနီယာရဲ့စေတနာကို ကျေးဇူးတင်ပါတယ်ပေမဲ့ ကျွန်မရန်သူတွေထဲမှာ အခြေခံအုတ်မြစ်တည်ဆောက်ခြင်းအဆင့်ကျင့်ကြံသူတွေ ပါနေပါတယ်"
အခြေခံအုတ်မြစ်တည်ဆောက်ခြင်းအဆင့် ဟုတ်လား။
ထိုစကားကြားလိုက်ရသောအခါ ဘာဖြစ်နေမှန်းမသိသည့် ချန်ဟေးထန်မှာ ငယ်ရွယ်၍စိတ်မြန်လက်မြန်ရှိသူပီပီ လက်ကိုဝှေ့ယမ်းကာ ပြောလိုက်လေ၏။
"အခြေခံအုတ်မြစ်တည်ဆောက်ခြင်းအဆင့်က ဘာမလို့လဲ၊ကျွန်တော့်ဆရာရဲ့ လက်တစ်ဖက် လှုပ်ရှားလိုက်ရုံနဲ့တင် အဲ့လိုလူမျိုးအယောက်ရှစ်ဆယ် တစ်ရာလောက်ကို သတ်ပစ်နိုင်တယ်"
လက်တစ်ဖက်လှုပ်ရှားလိုက်ရုံနဲ့ အယောက်ရှစ်ဆယ် တစ်ရာလောက်ကိုသတ်ပစ်နိုင်တယ်ပေါ့လေ ဟုတ်လား။
ဝမ်လော့လီရယ်မောလိုက်မိရာ သူမ၏အလှမှာပြိုင်ဘက်ကင်းလွန်းသဖြင့် ချန်ဟေးထန်ခမျာငေးမောသွားရချေ၏။
သူမ ခေါင်းယမ်းကာပြန်ပြောလိုက်သည်။
"မောင်လေး မဆင်မခြင်စကားမပြောပါနဲ့၊ဝမ်လော့လီက ရှင်တို့နှစ်ယောက်ကို ဒုက္ခမပေးချင်ပါဘူး၊နောက်ကလိုက်လာတဲ့သူတွေထဲမှာ အခြေခံအုတ်မြစ်တည်ဆောက်ခြင်းအဆင့် ကျင့်ကြံသူ တစ်ယောက်မကပါသလို သူတို့က ကောင်းကင်တာအိုမဟာမိတ်အဖွဲ့ရဲ့ အဆင့်၉ဂိုဏ်းဖြစ်တဲ့ သရဲဘုရင်ဂိုဏ်းက လူတွေပါ"
ဝမ်လော့လီမျက်လုံးများထဲတွင် လေးနက်မှုအပြည့်ဖြင့် ပြောလိုက်လေ၏။
ကျန်းပေချန် တိတ်တဆိတ်ပင်ခေါင်းငြိမ့်လိုက်မိပြီး ဤမိန်းကလေးမှာ စိတ်သဘောထားပြည့်ဝပြီး သူတပါးအတွက် စဉ်းစားပေးတတ်သူဟု တွေးလိုက်မိသည်။
သရဲဘုရင်ဂိုဏ်းလိုမျိုး အဆင့်၉ဂိုဏ်းအကြောင်းကို သူကောင်းကောင်းကြီးသိထားပေ၏။ကောင်းကင်တာအိုမဟာမိတ်အဖွဲ့၌ အဆင့်၉ဂိုဏ်းအဖြစ် စာရင်းဝင်ဖို့ဆိုလျှင် အခြေခံအုတ်မြစ်တည်ဆောက်ခြင်းအဆင့် ကျင့်ကြံသူ၃ဦးနှင့်ရွှေအမြုတေအဆင့်ကျင့်ကြံသူတစ်ဦး ရှိရမည်ဖြစ်သည်။
ထို့ပြင် ဂိုဏ်းသားအရေအတွက်အနည်းဆုံး၂၀ရှိရပေမည်။
"ဒီတပည့်ကိုလက်ခံချင်ပေမယ့် အဆင့်၉ဂိုဏ်းကိုတော့ သွားမစတာကောင်းမယ်"
ကျန်းပေချန်တွေးလိုက်ပြီး စကားပြောရန်ပြင်လိုက်သော်လည်း သူ့အချစ်တော်တပည့်လေးမှ ဦးအောင်ပြောလိုက်လေ၏။
"အဆင့်၉ဂိုဏ်းက ဘာမလို့လဲ၊ကျွန်တော့်ဆရာမျက်လုံးထဲမှာတော့ ပုရွက်ဆိတ်တွေပါပဲ"
ချန်ဟေးထန်မှာ ဂုဏ်ယူဝင့်ကြွားသည့်မျက်နှာထားဖြင့် ပြောလိုက်သည်။
ချန်ဟေးထန် တော်လောက်ပြီထင်တယ်နော်။ကြွားလုံးထုတ်လွန်းအားကြီးလို့ လျှာကိုက်မိမှာမကြောက်ဘူးလား။ငါ့မှာ တစ်ကယ်ကြီးအဲ့လောက်အစွမ်းအစ ရှိနေသလိုမျိုးလုပ်ပြမနေစမ်းနဲ့။
တစ်ကယ်လို့ ငါသာထွက်ပြေးရရင် မင်းကို စောင့်ရှောက်နိုင်မှာ မဟုတ်ဘူးနော်။
"အိုး ဟုတ်လား"
ဝမ်လော့လီ ပြုံးလိုက်သည်။
"ရှင့်ဂိုဏ်းက ကောင်းကင်တာအိုမဟာမိတ်အဖွဲ့ထဲမှာ ဘယ်အဆင့်ရှိလဲလို့ မေးလို့ရမလား"
ကျန်းပေချန် ချန်ဟေးထန်ကိုတားရန်ပြင်လိုက်စဉ်မှာပင် ချန်ဟေးထန်မှာ မေးပင့်ကာယမန်နေ့မှ သူ့ဆရာလေသံကို တုပပြီးမာနကြီးကြီးမျက်နှာထားဖြင့် ပြောလိုက်လေ၏။
"သာမန်ကောင်းကင်တာအိုမဟာမိတ်အဖွဲ့လောက်ကို ထည့်ပြောစရာဘာလိုလို့လဲ"
သာမန်ကောင်းကင်တာအို မဟာမိတ်အဖွဲ့လောက်ကို ထည့်ပြောစရာမလိုဘူး ဟုတ်လား။
ဝမ်လော့လီ ချက်ချင်းကြောင်အသွားပြီး လူငယ်လေး၏ လုပ်ကြံပြောဆိုမှုကြောင့် တုန်လှုပ်သွားရချေ၏။
ချီကျင့်ကြံခြင်းအဆင့်၄ပဲရှိသေးတဲ့ ဒီကောင်လေးက ကောင်းကင်တာအိုမဟာမိတ်အဖွဲ့ကိုတောင် အထင်သေးရဲတယ်ပေါ့လေ။
ကောင်းကင်တာအိုမဟာမိတ်အဖွဲ့ထဲက ဘယ်သူမဆို သူ့ကိုလက်တစ်ဖက်တည်းနဲ့တင် ဖုန်မှုန့်ဖြစ်သွားအောင် လုပ်ပစ်နိုင်တာကို ဒီလောက်သတ္တိတွေ ဘယ်ကရလာလဲ။ဒါမှမဟုတ် သူ့ကိုယ်သူလမ်းမှားရောက်နေတယ်ဆိုတာတောင်မသိတော့တာလား။
ဝမ်လော့လီပြန်ဖြေရန် ပါးစပ်ဟလိုက်စဉ်မှာပင် အဝေးမှနေတိမ်တိုက်မည်းမည်းကြီးတစ်ခုရောက်လာပြီး ဖိအားပြင်းအငွေ့အသက်များကို သယ်ဆောင်လာလေ၏။
ဤသည်ကိုမြင်လိုက်ရသောအခါ ဝမ်လော့လီမျက်နှာထား ပြောင်းလဲသွားသည်။သရဲဘုရင်ဂိုဏ်းက လူတွေရောက်လာကြပြီ။
လိုက်ဖမ်းမည့်သူများ ရောက်လာပြီဖြစ်ရာထွက်ပြေးရန်အချိန်မရှိတော့ပေ။ဝမ်လော့လီ ချက်ချင်းကြောက်လန့်သွားပြီး မျက်နှာမှာဖြူဖျော့သွားရ၏။
"ဒီမှာအချိန်ဖြုန်းမိသွားတာ ငါ့အမှားပဲ၊ငါ့အသက်တင်မကဘူး အပြစ်မဲ့တဲ့လူတွေကိုပါ ငါနဲ့အတူဆွဲချမိတော့မယ် ဒုက္ခပဲ"
သူမစိတ်အခြေအနေမှာ နောင်တများဖြင့်ပြည့်နှက်နေပြီး မျက်နှာထက်တွင်လည်း မျှော်လင့်ချက်မဲ့မှုများပေါ်လာလေ၏။
သူမသည် သရဲဘုရင်ဂိုဏ်းကျင့်ကြံသူများ၏ နည်းလမ်းများကို သိထားသည်။သူတို့လက်ထဲ ရောက်သွားလျှင် တွေးရဲစရာပင်မရှိပေ။ဒီလေလွင့်ကျင့်ကြံသူဆရာတပည့်ဆိုရင်ပိုတောင်ဆိုးလိမ့်မယ်။
ထိုအချိန်တွင် သရဲဘုရင်ဂိုဏ်းကျင့်ကြံသူများသည် အနားရောက်ရှိနေပြီဖြစ်ပြီး တစ်ဖက်ကမ်းတွင်ရပ်နေကြလေ၏။သူတို့ကိုဦးဆောင်လာသူမှာ ဝမ်လော့လီ၏ဆွေမျိုးရင်းဖြစ်သော ဒုတိယဦးလေးနှင့်အခြေခံအုတ်မြစ်တည်ဆောက်ခြင်းအဆင့်ကျင့်ကြံသူနှစ်ဦးဖြစ်ကာ ကျန်သူများမှာတော့ချီကျင့်ကြံခြင်း အဆင့်၈မှ ၉ထိရှိကြသည်။
ထိုသရဲဘုရင်ဂိုဏ်းကျင့်ကြံသူအားလုံးသည် ဝိညာဉ်ခေါ်အလံတိုင်များကို ကိုင်ဆောင်ထားကြပြီး ထိုအလံတိုင်များမှနေသနားစဖွယ် အော်ဟစ်ငိုယိုသံများ အဆက်မပြတ်ထွက်ပေါ်နေလေ၏။
သူတို့မျက်နှာများမှာ ပိန်ချုံးနေပြီး သရဲတစ္ဆေပုံပေါက်နေကာ ကြည့်လိုက်သည်နှင့် ကျောချမ်းသွားစေသော သရဲအငွေ့အသက်များထွက်ပေါ်နေသည်။လောလောဆယ်တွင် သူတို့သည် တစ်ဖက်ကမ်း၌ရပ်လျက် ကျန်းပေချန်နှင့်ဟေးထန်တို့ကို ကြည့်ရှုနေကြလေ၏။
သရဲဘုရင်ဂိုဏ်းမှလူများ ရောက်ရှိလာသည်ကို မြင်သောအခါ ဝမ်လော့လီသည် ရှေ့သို့တစ်လှမ်းတိုးလိုက်ပြီး ကျန်းပေချန်နှင့်ဟေးထန်တို့ကို ကာကွယ်လိုက်ကာ အသံကျယ်ကျယ်ဖြင့်ပြောလိုက်သည်။
"ရှင်တို့သရဲဘုရင်ဂိုဏ်းနဲ့ဖြစ်တဲ့ ငါ့ကိစ္စက အခြားလူတွေနဲ့ မဆိုင်ဘူး"
ဝမ်လော့လီမျက်နှာတွင် မျှော်လင့်ချက်မဲ့မှုများ ပြည့်နှက်နေသည်။
ဤအခြေအနေထိရောက်မှတော့ သူမထံတွင်နောက်ဆုတ်စရာ လမ်းမရှိတော့ပေ။သူမဒဏ်ရာများမှာ ပြင်းထန်လွန်းသဖြင့် အဝေးကြီးမပြေးနိုင်တော့သလို နောက်တွင်လည်းသူစိမ်းနှစ်ဦးရှိနေသေးသည်။
ကျန်းပေချန်သည် ငါးမျှားတံကိုကိုင်ထားလျက် အပြင်ပန်းတွင်အလွန်တည်ငြိမ်ပြီး ဘာမှမဖြစ်သလိုရှိနေသော်လည်း တစ်ကယ်တမ်းတွင်မူ လိပ်ပြာလွင့်မတတ်ထိတ်လန့်နေပြီ ဖြစ်သည်။
ဒီလူတွေထဲက တစ်ယောက်လောက်နဲ့တင် ငါ့ကိုအလွယ်တကူချေမြွပစ်နိုင်တယ်လေ။ဒါတွေအားလုံး ဟေးထန်ကြောင့်ဖြစ်ရတာ။ငါ့မှာထွက်ပြေးဖို့ကြံနေတုန်းကို အခုတော့ဘာဆက်လုပ်ရတော့မှာလဲ။
သူတို့ကို ဒုက္ခပင်လယ်ထဲရောက်အောင် လှည့်စားလိုက်ရင်ရော။
ကျန်းပေချန် စိုးရိမ်ပူပန်နေစဉ်မှာပင် စိတ်ကြီးဝင်ကာနိုင်စားတတ်ကြသည့် သရဲဘုရင်ဂိုဏ်းမှကျင့်ကြံသူများသည် တစ်ဖက်ကမ်းတွင်ရပ်လျက် ခွက်ထိုးခွက်လန်ရယ်မောကုန်ကြတော့၏။
"ဟားဟား ဝမ်မိသားစုကကောင်မလေး မပြေးတော့ဘူးလား၊ဒီညငါ့ကို ကောင်းကောင်းပြုစုပေးမယ်ဆိုရင် မင်းကိုအစေခံအနေနဲ့ ငါ့နားမှာထားဖို့ စဉ်းစားပေးမယ်၊ဒါပေမဲ့ ဒီမှာရေကန်လေးရှိနေတာပဲ၊ငါတို့အရင်ဆုံး ရေတူတူချိုးကြရင်မကောင်းဘူးလား"
လူအုပ်ရှေ့တွင်ရပ်နေသူ၏စကားသံများသည် တစ်ဖက်ကမ်းရှိ လူသုံးဦးနားထဲသို့ရောက်ရှိလာပြီး လေသံမှာအလွန်တရာနားကြားပြင်းကပ်စရာပင်။
ကျန်းပေချန် စိတ်ကိုအတင်းအကြပ်ငြိမ်သက်အောင်လုပ်လိုက်ပြီး မျက်လုံးကိုမှေးစဥ်းကာ အသာမေးလိုက်၏။
"သူက ဘယ်သူလဲ"
တုန်လှုပ်နေဆဲဖြစ်သော ဝမ်လော့လီသည် ထိုလူ့စကားကို ကြားလိုက်ရပြီး တစ်ကိုယ်လုံး တုန်ယင်လာကာ အထစ်ထစ်အငေါ့ငေါ့ဖြင့် ပြန်ပြောလိုက်သည်။
"သူက သူကကျွန်မကို လိုက်ဖမ်းနေတဲ့သူပါ"
ကျန်းပေချန် ငါးမျှားတံကိုမ တင်လိုက်ပြီး အသာရယ်မောလိုက်ကာ လုံးဝဂရုမစိုက်သည့်ပုံစံ ဟန်ဆောင်လိုက်လေ၏။
ငါပြေးလို့မလွတ်မှတော့ ဒုက္ခပင်လယ်ကိုပဲ အားကိုးရတော့မယ်။
စနစ်ရေ စနစ်ရဲ့ ငါ့ကိုစိတ်ပျက်အောင်မလုပ်နဲ့နော်။ငါ့အသက်နဲ့ခန္ဓာရှိသမျှအရာအားလုံးက မင်းလက်ထဲမှာပဲ ရှိတော့တယ်။
ထိုစကားကြားလိုက်ရသောအခါ ချန်ဟေးထန်သည် သရဲဘုရင်ဂိုဏ်းသားများထံ မလိုလားသောအကြည့်ဖြင့် ကြည့်လိုက်ပြီးနောက် ပျာယာခတ်နေသော ဝမ်လော့လီကိုကြည့်ကာ နှစ်သိမ့်လိုက်လေသည်။
"မကြောက်နဲ့နော် ကျွန်တော့်ဆရာက ခင်ဗျားကိုကာကွယ်ပေးပါလိမ့်မယ်"
ထို့နောက် ချန်ဟေးထန်သည် မတ်တပ်ထရပ်လိုက်ပြီး သရဲဘုရင်ဂိုဏ်းသားများကို လက်ညှိုးထိုးကာ ဒေါသတကြီးပြောလိုက်လေတော့သည်။
"ဟိုဘက်ကမ်းကလူတွေ နားထောင်ကြစမ်း၊မင်းတို့အဘိုးက ရှန်းတာအိုဂိုဏ်းရဲ့ပထမဆုံး တပည့်ကြီးကွ၊ငါ့ဘေးကလူက ရှန်းတာအိုဂိုဏ်းရဲ့ ဂိုဏ်းချုပ်ကြီးပဲ၊မင်းတို့ ဘာလို့အမြန်ပြန်မဆုတ်ကြသေးတာလဲ"