ကျင်းဝမ်ရှင်း၏ ဖိတ်ခေါ်မှု
Vol. 21 Ch. 233
စင်မြင့်ထက်ရှိ အင်မော်တယ်လှေကား၏ ထွက်ပေါက်တွင်
ဤနေရာတွင် လူများ ဝိုင်းအုံနေကြပြီ ဖြစ်သော်လည်း ထွက်ပေါက်နေရာက ကျယ်ဝန်းလှသဖြင့် အလွန်အမင်း တိုးဝှေ့နေရသည့် ပုံစံမျိုးတော့ မရှိပေ။
သို့သော် အရှေ့ဆုံးတွင် ရပ်နေသူများမှာမူ အင်မော်တယ်ဘုရင် အနည်းငယ်သာ ဖြစ်ကြသည်။
၎င်းတို့ ကိုယ်တိုင် ဤနေရာသို့ ရောက်လာကြခြင်း ဖြစ်သဖြင့် အခြားသူများကလည်း မျက်နှာသာပေးသည့်အနေဖြင့် ဖယ်ပေးကြရသည်။
ချင်းယွဲ့ဂိုဏ်းမှ ရောက်လာသည့် လူနှစ်ဦးပင်လျှင် သူတို့၏ နောက်ဘက် အနည်းငယ်တွင်သာ ရပ်နေကြရသည်။
ထိုအချိန်တွင် ထန်ထျန်းသည်လည်း ဤနေရာသို့ ရောက်ရှိလာခဲ့သည်။
သူက အရှေ့သို့ တိုးမသွားဘဲ အပြင်ဘက်ဆုံးနေရာတွင်သာ ရပ်နေလိုက်သည်။
၎င်းကို မြင်သောအခါ ကွမ်းယိုက သက်ပြင်းတစ်ချက် ချလိုက်မိသည်။ တော်သေးတာပေါ့၊ ဒီကောင်လေးက ဘာမှနားမလည်ဘဲ ဇွတ်တိုးမယ့် လူအမျိုးအစား မဟုတ်လို့။
စောင့်ဆိုင်းနေစဉ်အတွင်း ထန်ထျန်းက သူ့အပေါ်သို့ ကျရောက်လာသော အကြည့်တစ်ချက်ကို ရုတ်တရက် ခံစားလိုက်ရသည်။
လှည့်ကြည့်လိုက်သောအခါ ထိုအကြည့်မှာ ချင်းယွဲ့ဂိုဏ်းမှ ရောက်လာသူ နှစ်ဦးထဲမှ တစ်ဦးဖြစ်သည့် လင်းလျို့အုပ်စုမှ ပညာတတ်ပုံစံ လူငယ်ဆီမှ ဖြစ်နေသည်။
ကွမ်းယိုထံမှ သိရသည်မှာ ထိုလူငယ်၏ အမည်မှာ ကျင်းဝမ်ရှင်း ဖြစ်ပြီး နောက်ထပ် ဟွမ်တောက်စန်း အုပ်စုမှ လူလတ်ပိုင်းမှာမူ ထျန်းယွီ ဖြစ်သည်။
သူတို့နှစ်ဦး အကြည့်ချင်း ဆုံမိသောအခါ ကျင်းဝမ်ရှင်းက အနည်းငယ် မျက်မှောင်ကြုတ်သွားပြီး တစ်စုံတစ်ခုကို နားမလည်သကဲ့သို့ ရှိနေသည်။
သို့သော် မကြာမီမှာပင် အင်မော်တယ်လှေကား အဝင်ဝတွင် လှိုင်းတွန့်လေးများ ဖြစ်ပေါ်လာသဖြင့် သူက အကြည့်လွှဲလိုက်သည်။
အကြောင်းမှာ တပည့်သစ်များ မကြာမီ ထွက်လာတော့မည် ဖြစ်သောကြောင့်ပင်။
ခဏအကြာတွင် တောက်ပသော အလင်းတန်းတစ်ခု ဝင်းလက်လာပြီး လူရိပ်ပေါင်း တစ်ရာကျော်မှာ လူအများရှေ့တွင် ပေါ်လာတော့သည်။
ဤတပည့်များမှာ အင်မော်တယ်လှေကားတွင် အရှေ့ဆုံးမှ ရောက်ရှိလာသူများ ဖြစ်ကြသည်။
လူအုပ်ကြီးမှာ ချက်ချင်း လှုပ်လှုပ်ရှားရှား ဖြစ်သွားပြီး သူတို့ ကြိုတင် သတ်မှတ်ထားသည့် ပစ်မှတ်များဆီသို့ အပြေးအလွှား သွားကြတော့သည်။
အချို့က ကြိုဆိုရန်၊ အချို့က စည်းရုံးရန်၊ အချို့ကမူ စကားပြောရန် သွားကြခြင်း ဖြစ်သည်။
ကုရှောင်းရွှယ် ပေါ်လာသောအခါ အင်မော်တယ်ဘုရင် အနည်းငယ်မှာ သူမဆီသို့ ချက်ချင်း လျှောက်သွားကြသည်။
"ရှောင်းရွှယ်... ဒီကို အခုမှ ရောက်ဖူးတာဆိုတော့၊ မင်းမှာ အစီအစဉ် ရှိပြီးပြီလား"
တစ်ဦးက ဖော်ဖော်ရွေရွေ ပြုံးလျက် မေးလိုက်သည်။
အခြားတစ်ဦးမှာမူ ပို၍ တိုက်ရိုက်ကျစွာပင် အော်ပြောလိုက်သည်။ "ရှောင်းရွှယ်... ငါတို့ရဲ့ ယွီဖုန်းခန်းမ ကို လာခဲ့။ မင်း ဘာလိုချင်လဲ ပြော၊ ငါက အင်မော်တယ် တစ်ယောက်အနေနဲ့ မင်းအတွက် အကုန်ရှာပေးမယ်"
ထို့နောက် အခြားသူများလည်း လှုပ်ရှားလာကြသည်။
"ရှောင်းရွှယ်... သူ့စကား နားမယောင်နဲ့။ ငါတို့ရဲ့ မန့်ယွီမျှော်စင် ကို လာခဲ့၊ အဲ့ဒီမှာ မင်းလို မိန်းကလေးငယ်လေးတွေချည်းပဲ ရှိတာ၊ နံစော်နေတဲ့ ယောကျ်ားတစ်ယောက်မှ မရှိဘူး"
"ဟားဟား... တော်စမ်းပါ၊ မင်းတို့ မျှော်စင်က ယင်နဲ့ယန် က လုံးဝ မမျှတတော့တာလေ။ ရှောင်းရွှယ်... ငါတို့ရဲ့ ယန်ယွမ်မျှော်စင် ကို လာခဲ့ မင်းအတွက် အကောင်းဆုံး တိုးတက်မှုတွေ ရစေရမယ်"
"မင်းလည်း တော်တော့၊ ယန်ယွမ်မျှော်စင် ရဲ့ အခြေခံ လေးနဲ့တော့ ကောင်မလေးရဲ့ အချိန်တွေကို မဖြုန်းတီးနဲ့။ "
"ရှောင်းရွှယ်... ငါတို့ ထျန်းဖူနန်းတော် ကို လာခဲ့၊ အဲ့ဒါကမှ မင်းအတွက် အသင့်တော်ဆုံးပဲ"
....
အကြီးအကဲ များမှာ ပါရမီရှင်ကို လုကြရင်း သူတို့၏ သိက္ခာကိုပင် ဂရုမစိုက်နိုင်တော့ဘဲ အသီးသီး ကမ်းလှမ်းချက်များ ပေးနေကြသည်။
ရှန်းကျို့ခန်းမမှ ခန်းမသခင်၊ အင်မော်တယ်ဘုရင် အထွတ်အထိပ်ဖြစ်သူ ပိုင်နိုယီ ပင်လျှင် ဘေးနားမှနေ၍ စကားတစ်ခွန်း ဝင်ပြောလိုက်သေးသည်။
"တွေ့လား"
"အင်မော်တယ်ဘုရင် အများကြီးရဲ့ ပစ်မှတ်က ကုရှောင်းရွှယ်ပဲ၊ မင်းမှာ ဘာအခွင့်အရေးမှ မရှိဘူး။"
" အရှိတရားကို လက်ခံလိုက် စမ်းပါ"
ကွမ်းယိုက ပြော သည်။
ထန်ထျန်း မေးစေ့ကို ပွတ်လိုက်ကာ "ဟုတ်လို့လား"
ကွမ်းယိုက အော်ပြောသည်။ "ဒါပေါ့"
"မင်း အရင်က ဘယ်လိုပဲ ဖြစ်ခဲ့ဖြစ်ခဲ့၊ အခု ထျန်းဖူနန်းတော်ရဲ့ တရားဝင်တပည့် ဖြစ်လာပြီဆိုရင် အရင်က အကျင့်စရိုက်တွေကို ဖျောက်ပစ်ရမယ်၊ သတိထားတာ အကောင်းဆုံးပဲ။"
" ထျန်းဖူနန်းတော်မှာ အကြီးအကဲတွေက အပေါဆုံးပဲ။"
" တကယ်လို့ မယုံရင်လည်း သွားစမ်းကြည့်လေ၊ အဲ့ဒီ အကြီးအကဲတွေ ကြားထဲကနေ ကုရှောင်းရွှယ်ကို လုနိုင်မလားလို့"
ထန်ထျန်း ဘာမှ ပြန်မပြောပေ။ လူအများ၏ ဝိုင်းဝန်းစည်းရုံးမှုကို ခံနေရသဖြင့် ကြောင်အအနှင့် ဘာလုပ်ရမှန်း မသိဖြစ်နေသော ကုရှောင်းရွှယ်ကို ကြည့်ကာ သူမကို ကယ်တင်ပေးရန် ဆုံးဖြတ်လိုက်သည်။
ထို့နောက် သူက ချောင်းဟန့်လိုက်ကာ အသံကျယ်ကျယ်ဖြင့် အော်လိုက်သည်။ "ရှောင်းရွှယ်"
သူ့အသံက အလွန်ကျယ်လောင်ပြီး အပြင်ဘက်ဆုံးမှ ထွက်ပေါ်လာခြင်း ဖြစ်သဖြင့် လူအများ၏ အာရုံစိုက်မှုကို ချက်ချင်း ရရှိသွားသည်။
ကွမ်းယိုမှာ ကြောင်အသွားပြီး စိတ်ထဲမှ ရေရွတ်မိသည်။ ငါက ပြောရုံပဲ ပြောတာလေ၊ မင်းက တကယ်ကြီး လုပ်တာလား
ထိုအချိန်တွင် ရှောင်းရွှယ်သည်လည်း သူ့အသံကို ကြားသွားပြီး လူအုပ်ကြားမှ လှမ်းကြည့်လိုက်သည်။
ချက်ချင်းပင် သူမ၏ မျက်နှာတွင် ဝမ်းသာအားရ အရိပ်အယောင်များ ပေါ်လာတော့သည်။
သူတို့နှစ်ဦး အကြည့်ချင်း ဆုံမိသောအခါ ထန်ထျန်းက ပြုံးပြလိုက်ပြီး လူအများ၏ အကြည့်အောက်တွင် လက်လှမ်းပြကာ "ဒီကို လာခဲ့"
ကွမ်းယို စိတ်ထဲတွင် မကောင်းသော အငွေ့အသက်ကို ခံစားလိုက်ရသည်။ မင်းက စည်းရုံးနေတာမှ မဟုတ်တာ၊ ဒါက တခြားသူတွေကို ပြောင်ပြောင်တင်းတင်း စိန်ခေါ်နေတာပဲလေ၊ ဘာကမ်းလှမ်းချက်မှတောင် မပြောဘူးလား
သို့သော် နောက်ထပ် ဖြစ်ပျက်လာသော အရာက သူ့ကို လုံးဝ ဆွံ့အသွားစေသည်။
ထန်ထျန်း၏ စကားအဆုံးတွင် ကုရှောင်းရွှယ်က လူအုပ်ကို တိုးဝှေ့ကာ အပြေးအလွှား ရောက်လာတော့သည်။
ထို့နောက် လူတိုင်း၏ အံ့သြတုန်လှုပ်နေသော အကြည့်များအောက်တွင် ထန်ထျန်း၏ ရင်ခွင်ထဲသို့ ပစ်ဝင်သွားတော့သည်။
"ကျွန်မ ခုနက တစ်ချိန်လုံး ရှင့်ကို ရှာနေတာ"
"ရှင် ဘယ်တုန်းက ရောက်တာလဲ"
ကုရှောင်းရွှယ်က စိတ်လှုပ်ရှားစွာ ပြောလိုက်သည်။
လူတိုင်း ကြောင်အသွားကြသည်။
ဒါ ဘယ်လိုအခြေအနေလဲ
ဒီလူစိမ်း ကောင်လေးက ဘယ်သူလဲ
အင်မော်တယ်ဘုရင် ဆယ်ဂဏန်းကျော်က ပေးအပ်သည့် ကောင်းမွန်သော ကမ်းလှမ်းချက်များကို ကုရှောင်းရွှယ်က မျက်တောင်တစ်ချက်ပင် မခတ်ဘဲ လျစ်လျူရှုခဲ့သည်။
သို့သော် ဤလူငယ်က လက်ယပ်ခေါ်လိုက်ရုံဖြင့် သူမက ကိုယ်တိုင် အပြေးအလွှား သွားလိုက်တာလား
"ဒါက..."
လူအများမှာ ခဏမျှ ဘာပြောရမှန်း မသိ ဖြစ်သွားကြသည်။
ဘေးနားရှိ ကွမ်းယိုမှာလည်း လုံးဝ ဆွံ့အလျက် ရပ်နေမိသည်။
အာ... မင်းက တကယ်ကြီး မလိမ်ခဲ့တာပဲ
ထိုအချိန်တွင် ခုနက စည်းရုံးနေကြသော အင်မော်တယ်ဘုရင်များပင် ကြောင်အအ ဖြစ်သွားကြသည်။
သူတို့ ကုရှောင်းရွှယ်၏ အချက်အလက်ကို စစ်ဆေးစဉ်က သူမနှင့် ထျန်းဖူနန်းတော်ကြား မည်သည့် ပတ်သက်မှုမှ မရှိကြောင်း သိထား၍ စည်းရုံးခဲ့ခြင်း ဖြစ်သည်။
သို့သော် ယခုကြည့်ရသည်မှာ သူတို့ ထင်ထားသလို မဟုတ်ပုံရပေ။
"အော်... တစ်ယောက်ယောက်က အစောကြီးကတည်းက လက်ဦးမှု ယူထားတာကိုး"
"ဒါကြောင့် ကုရှောင်းရွှယ်က ငါတို့ ပေးတဲ့ ကမ်းလှမ်းချက်တွေကို စိတ်မဝင်စားတာပဲ"
"သိက္ခာကျလိုက်တာကွာ"
"ပြန်ရောက်ရင် စစ်ဆေးကြည့်စမ်း၊ ဒီကောင်လေးက ဘယ်ကလဲဆိုတာ"
အင်မော်တယ်ဘုရင်များမှာ သူတို့၏ သိက္ခာကို ငဲ့ရသေးသည်။
အကယ်၍ ကုရှောင်းရွှယ်က ဘယ်သူနှင့်မှ မပတ်သက်သူ ဖြစ်နေလျှင် သူတို့ လုယူနိုင်သော်လည်း တစ်ဦးဦးက ကြိုတင်ခေါ်ထားပြီးသား ဖြစ်နေလျှင်မူ သူတို့၏ အဆင့်အတန်းကို ငဲ့ကွက်၍ အတင်းအဓမ္မ လုယူမည် မဟုတ်ပေ။
ထိုသို့လုပ်ခြင်းက လှောင်ပြောင်စရာသာ ဖြစ်လာပေလိမ့်မည်။
အင်မော်တယ်ဘုရင်များက ခေါင်းခါကာ လူစုခွဲသွားကြပြီး အခြားသော ပစ်မှတ်များကိုသာ ရှာဖွေကြတော့သည်။
ကုရှောင်းရွှယ်ကို ရရှိပြီးနောက် ထန်ထျန်းသည်လည်း ထိုနေရာတွင် ဆက်မနေတော့ဘဲ သူမကို ခေါ်ဆောင်ကာ လူအုပ်ထဲမှ ထွက်လာခဲ့သည်။
"ရှင်သိလား... ကျွန်မ တက်လှမ်းခြင်း အဆင့်ကို ထိုးဖောက်နိုင်ခဲ့ပြီ"
လမ်းတွင် ကုရှောင်းရွှယ်က စိတ်လှုပ်ရှားစွာ ပြောပြသည်။
ထန်ထျန်းက ပြုံးလျက် ခေါင်းညိတ်ပြသည်။ "ငါ အကုန် မြင်ပါတယ်"
" တကယ် တော်တယ်"
ထန်ထျန်း၏ ချီးကျူးမှုကို ရသောအခါ ရှောင်းရွှယ်က ပို၍ ပျော်ရွှင်သွားသည်။
ထိုအချိန်တွင် ကွမ်းယိုက သူတို့နောက်မှ လိုက်လာကာ ထန်ထျန်းတို့ နှစ်ဦးကို ထူးဆန်းသော အကြည့်ဖြင့် ကြည့်လိုက်သည်။
"ညီလေး... မင်း ဒါကို တကယ်ပဲ ဘယ်လို လုပ်လိုက်တာလဲ"
" မင်းနောက်မှာ အင်အားစု တစ်ခုခု ရှိနေတာ သေချာတယ် မဟုတ်လား"
ကွမ်းယိုက မေးသည်။
ထန်ထျန်းက သက်ပြင်းချကာ "တကယ် မရှိပါဘူးဗျာ"
" ကျွန်တော်က..."
စကားမဆုံးသေးခင်မှာပင် သူတို့နောက်မှ အသံတစ်သံ ထွက်ပေါ်လာသည်။
"ထန်ထျန်းလား"
ထန်ထျန်း လှည့်ကြည့်လိုက်သောအခါ ပညာတတ်ပုံစံ လူငယ်တစ်ဦးက သူ့နောက်တွင် ရပ်နေသည်။
သူကတော့ လင်းလျို့၏ အင်အားစုမှ ကျင်းဝမ်ရှင်း ပင် ဖြစ်သည်။
"ကိစ္စ ရှိလို့လား"
ထန်ထျန်းက မေးလိုက်သည်။
ကျင်ဝင်ရှင်းက မျက်မှောင်ကြုတ်ကာ ကုရှောင်းရွှယ်ကို တစ်ချက်ကြည့်ပြီး ထပ်မေးသည်။ "ချင်းယွဲ့ဂိုဏ်းက လာတဲ့ ထန်ထျန်း လား"
ထန်ထျန်း ခေါင်းညိတ်ပြလိုက်သည်။
အမှန်စင်စစ် ခုနက သူတို့ အကြည့်ချင်း ဆုံစဉ်ကတည်းက ဤလူက သူ့ကို မှတ်မိနေလောက်သည်ဟု ထန်ထျန်း ခန့်မှန်းထားပြီးသား ဖြစ်သည်။
အတည်ပြုချက်ကို ရသောအခါ ကျင်ဝင်ရှင်း၏ မျက်မှောင်မှာ ပို၍ ကြုတ်သွားသည်။
"ဒါပေမဲ့ မင်းက ဘာလို့ ဒီနေရာကို အစောကြီး ရောက်နေတာလဲ"
" ငါ မှတ်မိသလောက်ဆိုရင် မင်းကို ဒီမှာ မြင်နေရတာ တော်တော် ကြာနေပြီ၊ အဲ့ဒါ ဘယ်လို ဖြစ်တာလဲ"
ထန်ထျန်း ထိုမေးခွန်းကို မဖြေပေ။
အကြောင်းမှာ ကျင်းဝမ်ရှင်း၏ အမူအရာမှာ အနည်းငယ် မောက်မာနေသောကြောငင့် ဖြစ်သည်။
နှုတ်ဆိတ်နေသော ထန်ထျန်းကို ကြည့်ကာ ကျင်းဝမ်ရှင်းက တစ်စုံတစ်ခုကို တွေးမိသွားပုံရပြီး သူ၏ မောက်မာမှုကို လျှော့ချလိုက်ကာ "ဪ... နားလည်မှုမလွဲ ပါနဲ့၊ ငါ့မှာ မကောင်းတဲ့ ရည်ရွယ်ချက် မရှိပါဘူး။"
" ငါတို့က ဂိုဏ်းတူတွေပဲ၊ ငါက လွန်ခဲ့တဲ့ နှစ်ပေါင်းများစွာကတည်းက ထျန်းဖူနန်းတော်ကို ရောက်နေတာ။"
" မင်းတို့က အခုမှ အသစ်ရောက်လာတာဆိုတော့ ဒီက အခြေအနေတွေကို ရင်းနှီးမှာ မဟုတ်ဘူး။"
" ငါနဲ့ အတူ လိုက်ခဲ့ပါ၊ ငါ မင်းတို့ကို ချင်းယွဲ့ဂိုဏ်းရဲ့ နေရာကို ခေါ်သွားပေးမယ်"
ကျင်းဝမ်ရှင်းက တိုက်ရိုက်ပင် ဖိတ်ခေါ်လိုက်သည်။
အကယ်၍ ထန်ထျန်းသာ ဘာမှမသိလျှင် သူနှင့်အတူ သွားကြည့်မိကောင်း သွားကြည့်မိလိမ့်မည်။
သို့သော် သူက ကွမ်းယိုထံမှနေ၍ ဤနေရာရှိ ချင်းယွဲ့ဂိုဏ်းမှာ အတွင်းပိုင်း မညီညွတ်ဘဲ ပြင်းထန်စွာ အားပြိုင်နေကြောင်း သိထားပြီး ဖြစ်သည်။
ကျင်းဝမ်ရှင်းက ထိုအချက်များကို ဖုံးကွယ်ထားပြီး ဂိုဏ်းသားအချင်းချင်းဆိုသည့် သတ်မှတ်ချက်ကို အသုံးချကာ သူ့ကိုရော ကုရှောင်းရွှယ်ကိုပါ သူတို့အုပ်စုထဲသို့ မသိမသာ ဆွဲသွင်းရန် ကြိုးစားနေခြင်း ဖြစ်သည်။
ထိုအချက်ကို ထန်ထျန်း လုံးဝ မကြိုက်ပေ။
"တောင်းပန်ပါတယ်"
"ကျွန်တော် စိတ်မဝင်စားဘူး"
ထန်ထျန်းက တိုက်ရိုက်ပင် ငြင်းဆိုလိုက်သည်။