အခန်း (၄၅၉)

အလယ်ဗဟို လှေကားထစ်များပေါ်တွင် ခုံ ၁၃ လုံးသာ ရှိသည်။ ထိုခုံများသည် မြေပြင်အထက် သုံးမီတာခန့်တွင် ရှိပြီး ခန်းမဆောင်ကြီးတစ်ခုလုံးကို စီးမိုးကြည့်ရှုနိုင်သည်။

ဤ ၁၃ နေရာသည် မြို့စားမင်းငါးပါးနှင့် မဟာအကြီးအကဲရှစ်ပါးအတွက် ဖြစ်ကြောင်း တုပိုင် သိရှိလိုက်သည်။ ဤ ၁၃ ဦးသည် ပြိုင်ဘက်ကင်း မြေအောက်မြို့တော်၏ အမြင့်ဆုံး အာဏာပိုင်များ ဖြစ်ကြပြီး ၊ အလယ်ဗဟိုရှိ ရွှေရောင်ပလ္လင်သည် မဟာမြို့စားမင်းအတွက် ဖြစ်တန်ရာ၏။

မဟာမြို့စားမင်းကို မျိုးနွယ်စုကြီးငါးစုမှ ရွေးကောက်တင်မြှောက်ထားခြင်း ဖြစ်သည်။ အာဏာသည် အခြားမြို့စားမင်းလေးပါး၏ အထက်တွင် ရှိသည်။ သူသည် ပြိုင်ဘက်ကင်း မြေအောက်မြို့တော်၏ စစ်မှန်သော သခင်ဖြစ်သည်။

ဤနေရာတွင် အာဏာနှင့် အဆင့်အတန်း ခွဲခြားမှုကို နေရာတိုင်းတွင် တွေ့မြင်နိုင်သည်။

တုပိုင် ဝင်ရောက်သွားပြီးနောက် မျက်လုံးအားလုံးနီးပါးသည် တုပိုင်ထံသို့ ရောက်ရှိလာကြသည်။

မြို့စားမင်းအချို့သည် အတော်အတန် ငယ်ရွယ်သော်လည်း အကြီးအကဲများကောင်စီတွင် အဘိုးအိုများစွာ ရှိနေပြီဖြစ်ကြောင်း တုပိုင် တွေ့ရှိလိုက်ရသည်။ အသက် ၁၅၀ အထိ အသက်ရှည်နိုင်သော နေရာဖြစ်လင့်ကစား အကြီးအကဲ အများအပြား ၊ အထူးသဖြင့် မဟာအကြီးအကဲများသည် ဆံပင်ဖြူပြီး အရေးအကြောင်းများ ပြည့်နှက်နေကြသည်။

ပြိုင်ဘက်ကင်း မြေအောက်မြို့တော်၏ မျိုးနွယ်စုကြီးငါးစုမှ အုပ်ချုပ်သူ လူတန်းစားအားလုံး ဤနေရာတွင် ရောက်ရှိနေကြပြီး ၊ ဤလူရာပေါင်းများစွာသည် မြို့တော်တစ်ခုလုံး၏ အာဏာအားလုံးကို ပိုင်ဆိုင်ထားကြသည်။

ဆုံးဖြတ်ချက်ချမည့် အစည်းအဝေး ကျင်းပမှသာ ဤလူရာပေါင်းများစွာ အတူတကွ စုရုံးရောက်ရှိလာကြခြင်း ဖြစ်သည်။

ကျီမျိုးနွယ်စု၏ မြို့စားမင်းလေးသည် သူ့နေရာသို့ သွားရောက်ထိုင်လိုက်သည်။ မျိုးနွယ်စုတစ်ခု၏ မြို့စားမင်းလေး ဖြစ်သော်လည်း သူသည် အကြီးအကဲများကောင်စီ၏ သာမန်အဖွဲ့ဝင်တစ်ဦးသာ ဖြစ်သည်။

မဟာမြို့စားမင်း၏ မျိုးရိုးအမည်မှာ ဖူဖြစ်ပြီး နာမည်မှာ ဖူထျန်ယာ ဖြစ်သည်။

ကျီမျိုးနွယ်စု၏ ခေါင်းဆောင် ၊ ကျီမြို့တော်၏ မြို့စားမင်းအမည်မှာ ကျီထျန်အန်း ဖြစ်သည်။ မြို့စားမင်းလေး၏ ဖခင်ဖြစ်ပြီး ဤဆုံးဖြတ်ချက်ချမည့် အစည်းအဝေးကို စတင် ခေါ်ယူခဲ့သူလည်း ဖြစ်သည်။

မျိုးနွယ်စုခေါင်းဆောင် ကျီထျန်အန်းက မတ်တတ်ရပ်ပြီး ပြောလိုက်၏။

“တုပိုင်... ရာစုနှစ်ပေါင်းများစွာ အတွင်း နဂါးနတ်ဘုရားရဲ့ စစ်ဆေးမှုကို ဖြတ်ကျော်ပြီး ကျွန်ုပ်တို့ရဲ့ ပြိုင်ဘက်ကင်း မြေအောက်မြို့တော်ထဲ ဝင်ရောက်နိုင်ခဲ့တဲ့ တတိယမြောက် လူသား ဖြစ်တယ်။ အစိမ်းရောင် အဆိပ်ရည်ကို ရွှေရောင်ပြောင်းသွားအောင် လုပ်နိုင်ခဲ့တဲ့ တစ်ဦးတည်းသော သူလည်း ဖြစ်တယ်။ သူက ကျွန်ုပ်တို့ရဲ့ ပြိုင်ဘက်ကင်း မြေအောက်မြို့တော် ကြုံတွေ့နေရတဲ့ သေရေးရှင်ရေး အန္တရာယ်ကို နားလည်ထားပြီး ဖြေရှင်းနည်းလည်း ရှိတယ်လို့ ဆိုပါတယ်။ တုပိုင်... မင်း ပြောပါ။ မင်းရဲ့ တောင်းဆိုချက် ၊ မင်းရဲ့ အကြံဉာဏ်တွေကို ပြောပါ။ ပြီးရင် အကြီးအကဲများကောင်စီနဲ့ မြို့စားမင်းများ ညီလာခံက မင်းရဲ့ အဆိုပြုချက်ကို ဆုံးဖြတ်ပါလိမ့်မယ်”

တုပိုင်သည် ခန်းမဆောင် အလယ်ဗဟိုသို့ လျှောက်သွားပြီး လှေကားထစ်များအတိုင်း သုံးမီတာမြင့်သော စင်မြင့်ပေါ်သို့ တက်ကာ ခန်းမဆောင် ပတ်ပတ်လည်ရှိ အကြီးအကဲများကောင်စီ အဖွဲ့ဝင် ရာပေါင်းများစွာကို ဝေ့ဝဲကြည့်လိုက်သည်။

“လေးစားအပ်ပါသော မဟာမြို့စားမင်း ၊ လေးစားအပ်ပါသော မျိုးနွယ်စုခေါင်းဆောင်များ ၊ လေးစားအပ်ပါသော မဟာအကြီးအကဲများနဲ့ လေးစားအပ်ပါသော အကြီးအကဲများကောင်စီ အဖွဲ့ဝင်များ ခင်ဗျာ...”

“ပြိုင်ဘက်ကင်း မြေအောက်မြို့တော်က ကြောက်မက်ဖွယ် ကပ်ဘေးဆိုးကြီး တစ်ခုကို ကြုံတွေ့နေရပါတယ်။ ခင်ဗျားတို့ဆီမှာ လူသိရှင်ကြား သစ္စာဖောက်တစ်ယောက် ရှိနေပါတယ်။ သူက ပြိုင်ဘက်ကင်း မြေအောက်မြို့တော် တစ်ခုလုံးဆီကို ယုတ်မာအမှောင်ထုဆန်ပြီး ကြောက်မက်ဖွယ်ကောင်းတဲ့ စွမ်းအင်တွေကို ထုတ်လွှတ်နေပါတယ်”

“ဒီယုတ်မာတဲ့ စွမ်းအင်တွေက လူတိုင်းရဲ့ အသက်စွမ်းအင်တွေကို မသိမသာ ဝါးမြိုနေပါတယ်။ ဒီကပ်ဘေးကို မဖြေရှင်းနိုင်ရင် အနှစ် ၂၀ အတွင်းမှာ မျိုးနွယ်စုကြီးငါးစုက လူနှစ်သိန်းကျော် အားလုံး သေဆုံးကုန်ကြပါလိမ့်မယ်။ မျိုးနွယ်စုကြီးငါးစုလည်း မျိုးသုဉ်းပျောက်ကွယ်သွားပါလိမ့်မယ်”

ထိုစကား ထွက်ပေါ်လာသည်နှင့် လူတိုင်း ဂနာမငြိမ် ဖြစ်သွားကြသည်။

“ဒီနေရာမှာ ရှိနေတဲ့ လူတိုင်းက ပြိုင်ဘက်ကင်း မြေအောက်မြို့တော်ရဲ့ ထိပ်တန်း အာဏာပိုင်တွေ ဖြစ်တဲ့အတွက် ဘာတွေ ဖြစ်နေလဲ ဆိုတာ သေချာပေါက် သိကြမှာပါ။ လူအများအပြားက သက်တမ်းမကုန်ခင် အကြောင်းပြချက်မရှိဘဲ သေဆုံးကုန်ကြတယ်။ ကလေး အများအပြား မွေးကတည်းက ပုံပျက်ပန်းပျက် ဖြစ်နေတာ တွေ့ရပြီး မွေးပြီး မကြာခင်မှာပဲ သေဆုံးကုန်ကြတယ်။ ဒီနေရာမှာ ရှိနေတဲ့ ခင်ဗျားတို့ထဲက အများအပြားတောင် အကြောင်းပြချက်မရှိဘဲ သွားဖုံးသွေးယိုတာ ၊ ဆံပင်ကျွတ်တာတွေ ဖြစ်နေကြတယ် မဟုတ်လား”

ထိုစကားများ ထွက်ပေါ်လာသောအခါ ပရိသတ်သည် ပိုမို ဂနာမငြိမ် ဖြစ်လာကြသည်။ အဘယ်ကြောင့်ဆိုသော် တုပိုင် ပြောသည်မှာ အမှန်တရား ဖြစ်နေသောကြောင့်ပင်။

“ဒီအရာအားလုံးက အဲဒီ ကြောက်စရာကောင်းတဲ့ သစ္စာဖောက် ထုတ်လွှတ်လိုက်တဲ့ ယုတ်မာအမှောင်ထု စွမ်းအင်တွေကြောင့် ဖြစ်ရတာပါ။ အဲဒီ စွမ်းအင်တွေက ခင်ဗျားတို့ရဲ့ အသက်စွမ်းအင်တွေကို ရူးသွပ်မတတ် ဝါးမြိုနေတာပါ”

“ကျွန်တော် တုပိုင်က ဒီကပ်ဘေးကို အပြီးတိုင် ဖြေရှင်းပေးနိုင်ပါတယ်။ ပြိုင်ဘက်ကင်း မြေအောက်မြို့တော်ရဲ့ မျိုးနွယ်စုငါးစုက လူနှစ်သိန်းကျော်ရဲ့ အသက်ကို ကျွန်တော် တစ်ယောက်တည်းပဲ ကယ်တင်ပေးနိုင်ပါတယ်”

“ဒါပေမဲ့ အပြန်အလှန်အနေနဲ့ ကျွန်တော့်ရဲ့ လူလေးထောင်ကျော်ကို ပြိုင်ဘက်ကင်း မြေအောက်မြို့တော်ထဲ ဝင်ခွင့်ပြုဖို့ တောင်းဆိုပါတယ်။ ပြီးတော့ ကျွန်တော့်လူတွေ ထာဝရ နေထိုင်ဖို့ ၊ ကိုယ်ပိုင်မြို့ တည်ဆောက်ဖို့ တွင်းနက်ကြီး တစ်ခု ပေးရပါမယ်”

“လတွေ ၊ ရက်တွေ စောင့်နေစရာ မလိုပါဘူး။ ကျွန်တော် ချက်ချင်း သက်သေပြနိုင်ပါတယ်။ အခုချက်ချင်း ခင်ဗျားတို့ကို ကယ်တင်နိုင်ပါတယ်။ နာရီအနည်းငယ် အတွင်းမှာ ခင်ဗျားတို့ ရှင်းရှင်းလင်းလင်း မြင်ရပါလိမ့်မယ်။ ခင်ဗျားတို့ မျိုးနွယ်စုငါးစုရဲ့ ကံကြမ္မာကို ကယ်တင်နိုင်မှာပါ။ ကျွန်တော် မလုပ်နိုင်ရင် ခင်ဗျားတို့ ကျွန်တော့်ကို အပိုင်းပိုင်းအစစ ခုတ်ထစ်သတ်ဖြတ်နိုင်ပါတယ်”

တုပိုင် ပြောပြီးသွားသောအခါ ပရိသတ် ရာပေါင်းများစွာသည် တစ်ယောက်နှင့်တစ်ယောက် တိုးတိုးတိတ်တိတ် တိုင်ပင်နေကြသည်။

မဟာမြို့စားမင်း ဖူထျန်ယာက မေးလိုက်၏။ “တကယ်ပဲ နာရီအနည်းငယ်ပဲ လိုတာလား။ ဒီကပ်ဘေးကို ကယ်တင်နိုင်ပြီး ၊ လူတိုင်း ရှင်းရှင်းလင်းလင်း မြင်သာအောင် လုပ်ပြနိုင်သလား”

တုပိုင်က ပြောလိုက်၏။ “ဟုတ်ပါတယ်။ ကျွန်တော် မလုပ်နိုင်ရင် ကျွန်တော့်ကို မြင်းငါးကောင်ဆွဲပြီး သတ်ပစ်လို့ ရပါတယ်”

ရုတ်တရက် အခြားမြို့စားမင်းတစ်ပါးက ဖြည်းညင်းစွာ ပြောလိုက်၏။

“ဒါပေမဲ့... ကျွန်တော်တို့ရဲ့ ပရောဖက်က ပြောတယ်။ ဒါက ကောင်းကင်ဘုံရဲ့ ပြစ်ဒဏ်ခတ်မှုတဲ့။ လုံးဝ ရှောင်လွှဲလို့ မရဘူးတဲ့။ ကောင်းကင်ဘုံရဲ့ ပြစ်ဒဏ်ခတ်မှုကို တွန်းလှန်ရင် လုံးဝ ပျက်စီးသွားလိမ့်မယ်တဲ့”

ပရောဖက် ဟုတ်လား။

“ဟုတ်တယ်... ဟုတ်တယ်။ အဲဒီတုန်းက စစ်ခုန်းမျိုးနွယ်စုကို လုံးဝ မျိုးဖြုတ်သတ်ဖြတ်ပစ်လိုက်တာ ရက်စက်လွန်းရာ ကျခဲ့တယ်။ ဒါကြောင့် နတ်ဘုရားတွေက ကျွန်တော်တို့ကို ပြစ်ဒဏ်ခတ်တာ”

“ပရောဖက်က ပြောတယ်။ ကောင်းကင်ဘုံရဲ့ ပြစ်ဒဏ်ခတ်မှုကို တွန်းလှန်ဖို့ လုံးဝ မဖြစ်နိုင်ဘူးတဲ့။ မဟုတ်ရင် ကပ်ဘေးဆိုးကြီး ကျရောက်လိမ့်မယ်တဲ့”

“ပရောဖက်က ပြောသေးတယ်။ အနှစ် ၂၀ ကြာရင် ကောင်းကင်ဘုံရဲ့ ပြစ်ဒဏ်ခတ်မှု ပြီးသွားလိမ့်မယ်တဲ့”

“ပရောဖက်က အရာအားလုံး သိတယ်။ သူက ဝိညာဉ်အကြားအမြင် ရှိတယ်။ ဘယ်သူ သေရမယ်လို့ သူ ပြောလိုက်ရင် အဲဒီလူ သေချာပေါက် သေရတယ်။ ဘာအကြောင်းပြချက်မှ မရှိဘဲ သေသွားတာ”

ထိုအချိန်တွင် အပြင်ဘက်မှ အော်ဟစ်ကြေညာသံ ထွက်ပေါ်လာသည်။

“ပရောဖက် ကြွလာပါပြီ”

ရုတ်တရက် ရှိနေသူ အားလုံး မတ်တတ်ရပ်လိုက်ကြသည်။

ဤပရောဖက်သည် မည်မျှ အလေးထား ခံရကြောင်းကို တွေ့မြင်နိုင်သည်။

ထို့ပြင် ဤတိုတောင်းသော စကားဝိုင်းများမှတစ်ဆင့် ဤလူများသည် ပရောဖက်ကို ကြောက်ရွံ့ရိုသေမှု ၊ ကြောက်လန့်မှုများပင် ရှိနေကြောင်း တုပိုင် တွေ့ရှိလိုက်ရသည်။

အဘယ်ကြောင့်ဆိုသော် သူက ဘယ်သူ သေရမယ် ပြောလိုက်လျှင် ထိုလူ သေရသောကြောင့်ပင်။

ထိုလူကို စစ်သည်ထောင်ပေါင်းများစွာ စောင့်ကြပ်ထားပါစေ ၊ အခိုင်အမာဆုံး ခံတပ်ထဲတွင် နေထိုင်ပါစေ ၊ မည်သူမျှ လုပ်ကြံခြင်း မရှိ ၊ မည်သူမျှ အဆိပ်ခတ်ခြင်း မရှိဘဲ အကြောင်းပြချက်မရှိ သေဆုံးသွားရသောကြောင့် ဖြစ်သည်။

ထို့ကြောင့် လူတိုင်း၏ မျက်လုံးထဲတွင် ဤပရောဖက်သည် လုံးဝ ခန့်မှန်းရခက်သော ပုဂ္ဂိုလ်တစ်ဦး ဖြစ်နေသည်။ လူများ ကြောက်လန့်နေကြသည်မှာ မဆန်းလှပေ။

ပရိသတ် တစ်ခုလုံး တိတ်ဆိတ်ငြိမ်သက်သွားသည်။

ထို့နောက် အလွန် အိုမင်းသော လူပုလေးတစ်ဦး ဖြည်းညင်းစွာ လျှောက်ဝင်လာသည်။

သူသည် အမှန်တကယ်ပင် အလွန် အိုမင်းရင့်ရော်နေပြီ ဖြစ်သည်။ ဆံပင်များ အားလုံးနီးပါး ကျွတ်ကုန်ပြီဖြစ်ကာ မျက်နှာသည် သစ်ခေါက်ကဲ့သို့ တွန့်လိမ်နေသည်။

တုတ်ကောက်ကို အားပြု၍ ဖြည်းညင်းစွာ လျှောက်ဝင်လာသည်။

သူသည် အလွန် ပုပြီး တစ်မီတာခန့်သာ အရပ်ရှိသည်။

သူ လျှောက်ဝင်လာသောအခါ ရောက်ရှိနေသော လူရာပေါင်းများစွာသည် အသက်ရှူရပ်လုမတတ် ဖြစ်သွားကြပြီး မျက်လုံးများအားလုံး သူ့အပေါ် ရောက်ရှိနေကြသည်။

လူတိုင်း သူ့ကို ကြောက်ရွံ့ရိုသေကြကြောင်း သိသာလှသည်။

“ပရောဖက်ကို ဂါရဝပြုပါတယ်”

လူရာပေါင်းများစွာသည် တညီတညွတ်တည်း ဦးညွှတ်ဂါရဝပြုလိုက်ကြသည်။

လူပုပရောဖက်သည် လှေကားထစ်များပေါ်မှ ဆင်းလာပြီး တုပိုင်ကို မျက်လုံးမှေး၍ ကြည့်လိုက်သည်။

“ဒီမိန်းမစိုးက မွေးရာပါ ယုတ်မာတဲ့ကောင်ပဲ။ ကောင်းကင်ဘုံရဲ့ ပြစ်ဒဏ်ခတ်မှုကို တွန်းလှန်ဖို့ မင်းတို့ကို လှုံ့ဆော်ပြီး နတ်ဘုရားတွေကို ဒေါသထွက်အောင် လုပ်ခဲ့ပြီးပြီ”

ပရောဖက်က တုပိုင်ကို လက်ညှိုးထိုးပြီး ပြောလိုက်၏။

“ဒုန်း... ဒုန်း... ဒုန်း...”

ရုတ်တရက် မြေကြီး တုန်ခါသွားသည်။

အပြင်ဘက် ရင်ပြင်တွင် အက်ကွဲကြောင်းကြီးတစ်ခု ပေါ်လာသည်။

တစ်ချိန်တည်းမှာပင် ကောင်းကင်တွင် မိုးကြိုးပစ်သံ ကျယ်လောင်စွာ ထွက်ပေါ်လာပြီး ထူးဆန်းသော လျှပ်စီးကြောင်းများ ပစ်ချလာသည်။

လူတိုင်း ထိတ်လန့်သွားကြသည်။ တကယ်ပဲ နတ်ဘုရားတွေကို ပြစ်မှားမိသွားတာလား။

“သူ့ကို မီးရှို့သတ်ပစ်” ပရောဖက်က အမိန့်ပေးလိုက်သည်။

ချက်ချင်းပင် အလွန် အစွမ်းထက်သော သိုင်းပညာရှင်အချို့ ဝင်ရောက်လာပြီး စကားတစ်ခွန်းမှ မပြောဘဲ တုပိုင်ကို ဖမ်းဆီးချုပ်နှောင်လိုက်ကြသည်။

ဖြစ်စဉ်တစ်ခုလုံးတွင် တုပိုင် ခုခံခြင်း မပြုခဲ့ပေ။ သို့သော် လူပုပရောဖက်ကို အေးစက်စွာ စိုက်ကြည့်နေပြီး စိတ်ထဲတွင် ဆက်စပ်မှတ်ဉာဏ်များကို ရှာဖွေကာ စနစ်နှင့် အဆက်မပြတ် ဆက်သွယ်နေသည်။

ဖြစ်စဉ်တစ်ခုလုံးတွင် တားဆီးပြောဆိုသူ မရှိသလောက်ပင်။ မြို့စားမင်းများ အားလုံး ၊ မဟာအကြီးအကဲများ အားလုံး တားဆီးပြောဆိုခြင်း မရှိကြပေ။

ဤပရောဖက်သည် လူအများအပြားကို ကြောက်ရွံ့မှုဖြင့် သိမ်းပိုက်ထားခဲ့သည်။

မဟာမြို့စားမင်းနှင့် ကျီထျန်အန်းတို့၏ မျက်နှာ အနည်းငယ် ပျက်နေသော်လည်း စကားတစ်ခွန်းမှ ဝင်မပြောခဲ့ကြပေ။

တုပိုင်သည် သစ်သားစင်ပေါ်တွင် ချည်နှောင်ခံထားရပြီး တစ်ကိုယ်လုံးကို သံကြိုးများဖြင့် တင်းကျပ်စွာ ရစ်ပတ်ထားသည်။

သူ့အောက်တွင် ထင်းပုံများ စုပုံထားပြီး လူတစ်စုက ထင်းပုံပေါ်တွင်ရော ၊ တုပိုင်ကိုယ်ပေါ်တွင်ပါ ဆီများ လောင်းချလိုက်ကြသည်။

အမိန့်တစ်ချက် ပေးလိုက်သည်နှင့် တုပိုင် မီးလောင်ကျွမ်းပြီး မီးသွေးတုံး ဖြစ်သွားတော့မည်။

အန္တရာယ်အရှိဆုံး အချိန် ရောက်လာခဲ့ပြီ ဖြစ်သည်။ အိပ်မက်စနစ် ပြောခဲ့သလိုပင် ဤမစ်ရှင်၏ အောင်မြင်နိုင်စွမ်းသည် ၃၀ ရာခိုင်နှုန်းသာ ရှိသည်။

လူရာပေါင်းများစွာသည် ရင်ပြင်ကို ကြည့်နေကြသည်။ မြွေနက်မျက်နှာဖုံး တပ်ဆင်ထားသော စစ်သည်တစ်ဦးသည် လက်ထဲတွင် မီးတုတ်ကို ကိုင်ထားသည်။

“ဂလင်း... ဂျိန်း... ဂျိန်း...”

ကောင်းကင်တွင် ကြောက်မက်ဖွယ် လျှပ်စီးကြောင်းများ ဆက်လက် လက်နေပြီး ဤနေရာရှိ လျှပ်စီးကြောင်းများသည် ထူးဆန်းစွာ အနီရောင် ဖြစ်နေသည်။ မြေကြီးတုန်ခါမှုများ ဆက်လက် ဖြစ်ပေါ်နေပြီး မြေပြင်တွင် အက်ကွဲကြောင်းများ ဆက်တိုက် ပေါ်လာသည်။

လူပုပရောဖက်က အေးစက်စွာ ပြောလိုက်၏။

“တွေ့ကြပြီလား... ဒါ နတ်ဘုရားတွေကို ဒေါသထွက်အောင် လုပ်တဲ့ အကျိုးဆက်ပဲ”

“လွန်ခဲ့တဲ့ နှစ်တွေအတွင်း ပြိုင်ဘက်ကင်း မြေအောက်မြို့တော်မှာ ဖြစ်ပေါ်ခဲ့တဲ့ ကပ်ဘေးတွေ အားလုံးက နတ်ဘုရားတွေရဲ့ အသေးစား ပြစ်ဒဏ်ခတ်မှုတွေပဲ”

“ပြီးတော့ ဒီမိန်းမစိုး တုပိုင်က နတ်ဘုရားတွေကို တွန်းလှန်ဖို့ ၊ ကောင်းကင်ဘုံရဲ့ ပြစ်ဒဏ်ခတ်မှုကို တွန်းလှန်ဖို့ မင်းတို့ကို လှုံ့ဆော်ခဲ့တယ်။ ဒါကြောင့် ကောင်းကင်ကြီး တုန်ခါပြီး မိုးကြိုးပစ် လျှပ်စီးလက်တာပေါ့။ ဒါက ကောင်းကင်နတ်ဘုရားတွေ မင်းတို့ကို သတိပေးတာပဲ။ တုပိုင်ကို မီးရှို့လိုက်တာနဲ့ ချက်ချင်း ငြိမ်သက်သွားလိမ့်မယ်”

“နတ်ဘုရားတွေကို ပြစ်မှားတဲ့ ဒီလူက မင်းတို့ကို အောင်မြင်စွာ လှုံ့ဆော်နိုင်ပြီး သူ့ရဲ့ ညစ်ပတ်တဲ့ လူထောင်ပေါင်းများစွာကို ဝင်ခွင့်ပေးလိုက်မယ် ဆိုရင် ၊ နတ်ဘုရားတွေ လုံးဝ ဒေါသထွက်ပြီး ပြိုင်ဘက်ကင်း မြေအောက်မြို့တော် တစ်ခုလုံး ချက်ချင်း ပျက်စီးသွားလိမ့်မယ်။ အားလုံး သေကုန်ကြလိမ့်မယ်”

“ကဲ... ပြောကြစမ်း။ ဒီမိစ္ဆာကောင် တုပိုင်ကို မီးရှို့မလား”

“ဒီမိစ္ဆာကောင် တုပိုင်ကို မီးရှို့မလား”

လူရာပေါင်းများစွာသည် ကြောက်လန့်တကြား အော်ဟစ်လိုက်ကြသည်။ “မီးရှို့သတ်ပစ်... မိစ္ဆာကောင် တုပိုင်ကို မီးရှို့သတ်ပစ်”

လူပုပရောဖက်၏ မျက်နှာပေါ်တွင် အောင်နိုင်သူ အပြုံးတစ်ခု ပေါ်လာပြီး ရက်စက်စွာ ပြောလိုက်၏။

“မီးရှို့လိုက်... မိစ္ဆာကောင် တုပိုင်ကို မီးရှို့သတ်ပစ်။ နတ်ဘုရားတွေရဲ့ ဒေါသကို ငြိမ်းစေ”

ထိုအချိန်တွင် တုပိုင် မျက်လုံးဖွင့်ပြီး လူပုပရောဖက်ကို ကြည့်ကာ ဖြည်းညင်းစွာ ပြောလိုက်၏။

“ခင်ဗျား... ခင်ဗျားကမှ သစ္စာဖောက်ပဲ။ ခင်ဗျားက ပြိုင်ဘက်ကင်း မြေအောက်မြို့တော်ထဲကို ယုတ်မာအမှောင်ထုဆန်တဲ့ စွမ်းအင်တွေ သယ်ဆောင်လာခဲ့တာ။ ခင်ဗျားက မျိုးနွယ်စုငါးစုက လူနှစ်သိန်းကျော်ကို မျိုးဖြုတ်သတ်ဖြတ်ချင်နေတာ။ ခင်ဗျားက ပြိုင်ဘက်ကင်း မြေအောက်မြို့တော်ရဲ့ တော်ဝင်မိသားစုကို လုံးဝ မျိုးဖြုတ်ပစ်ချင်နေတာ”

“ဟားဟားဟား...” လူပုပရောဖက်က ရယ်မောလိုက်ပြီး ပြောလိုက်၏။

“သေခါနီးနေပြီကိုတောင် မဟုတ်မဟပ်တွေ လျှောက်ပြောနေသေးတယ်။ လူတိုင်းကို အရူးမှတ်နေတာလား”

“မီးရှို့... သူ့ကို မီးရှို့သတ်ပစ်”

တုပိုင်က အေးစက်စွာ ပြောလိုက်၏။

“ကျီခုန်းယဲ့... ခင်ဗျားနာမည်က ကျီခုန်းယဲ့ မဟုတ်ပါဘူး။ ခင်ဗျားနာမည်က စစ်ခုန်းယဲ့။ ခင်ဗျားမှာ အမွှာညီအစ်ကို နှစ်ယောက် ရှိတယ်။ တစ်ယောက်က စစ်ခုန်းမြဲ့ ၊ သူက ပေမင်ဓားဂိုဏ်းကနေ ခွဲထွက်သွားတဲ့ မြောက်ပိုင်းဂိုဏ်းရဲ့ ဆက်ခံသူပဲ။ နောက်တစ်ယောက်က စစ်ခုန်းလင်း ၊ သူက ခင်ဗျားလိုပဲ လူပုလေး ၊ စစ်မှန်တဲ့ ပရောဖက်နဲ့ ဗေဒင်ပညာရှင်ပဲ”

ကုန်းကုန်းဧကရာဇ်။ အပိုင်း ၄၅၉ ပြီး။