နတ်ဘုရားမိစ္ဆာစစ်မြေပြင်

"ဒီအစီအရင်ဆိုင်ရာ အတွေ့အကြုံမှတ်တမ်းရဲ့ဈေးက ဘယ်လောက်လဲ"

လီချန် ဖတ်ပြီးသည်နှင့် ချက်ချင်း မေးလိုက်၏။

ကောက်နုတ်ချက်အကြောင်းအရာလေးကပင် သူ့ကို များစွာအကျိုးရှိစေခဲ့ရာ ပြီးပြည့်စုံသော အစီအရင်ဆိုင်ရာ အတွေ့အကြုံမှတ်တမ်းဆိုလျှင် သေချာပေါက် ပိုကောင်းမွန်ပေလိမ့်မည်။

"ဧည့်သည်တော်... နတ်ဝိညာဉ်သလင်းကျောက် ခုနစ်သောင်း ကျသင့်ပါတယ်"

ဝန်ထမ်းက ပြောလိုက်သည်။

လီချန်သည် ကြားပြီးနောက် ဈေးကြီးသည်ဟု မထင်မှတ်ခဲ့ပေ။ အဆုံးတွင် ၎င်းသည် နှစ်ဆယ်အခြေခံအထက် အစီအရင်ဗဟုသုတများ ပါဝင်နေသဖြင့် ဈေးကြီးသည်မှာ ပုံမှန်သာ ဖြစ်သည်။

"ဒါ ယူမယ်"

လီချန်က ချက်ချင်း ပြောလိုက်သည်။

"ဒီလိုမျိုး တခြားအစီအရင်ဆိုင်ရာ အတွေ့အကြုံမှတ်တမ်းတွေရှိသေးလား"

ဤအစီအရင်မှတ်တမ်း တစ်ခုတည်းဖြင့် လုံလောက်မည် မဟုတ်ပေ။ လေလံပွဲဝင်ရန်အတွက်မူ အချိန်လုံလောက်ခြင်း မရှိတော့ချေ။ နောက်ဆုံးတွင် ယာယီတံဆိပ်ပြားများသည် အချိန်ကန့်သတ်ချက်ရှိလေသည်။

"ဧည့်သည်တော်၊ နောက်ထပ် နှစ်ခု ရှိပါသေးတယ်။ နှစ်ဆယ်အခြေခံအထက် မတူညီတဲ့ အစီအရင်ပညာရှင်တွေဆီကပါ"

ဝန်ထမ်းက ပြောလိုက်သည်။

"ကျန်တဲ့နှစ်ခုကို ပြပါဦး"

လီချန်က ပြောလိုက်၏။

"ဟုတ်ကဲ့ပါ ဧည့်သည်တော်၊ ခဏလောက် စောင့်ပေးပါ..."

အရောင်းအဝယ်ဖြစ်နိုင်ခြေမြင့်မားသည်ကို ဝန်ထမ်းသိရှိသဖြင့် အလွန်စိတ်အားထက်သန်နေကြသည်။

.....

လီချန် ရတနာခုနစ်ပါးခန်းမဆောင်မှ ထွက်လာသောအခါ တစ်နာရီခန့် ကုန်ဆုံးသွားခဲ့ပြီ ဖြစ်သည်။

အစီအရင်ဆိုင်ရာ အတွေ့အကြုံမှတ်တမ်း သုံးခုအပြင် ဝိညာဉ်ဆေးဖက်ဝင်အပင်ဆိုင်ရာ၊ လက်နက်လုပ်ခြင်းဆိုင်ရာနှင့် ဆေးလုံးသန့်စင်ခြင်းဆိုင်ရာ အတွေ့အကြုံမှတ်တမ်းများစွာ ပါဝင်ပြီး... ၁၀ခုမြောက်ဘုံတွင် မရှိသော ဆေးလုံးအချို့ကိုလည်း ဝယ်ယူခဲ့လေသည်။

သူသည် ဆေးလုံးဖော်စပ်နည်းများကို မေးမြန်းခဲ့သော်လည်း ဈေးကြီးရုံသာမက ထူးခြားသော ဆေးလုံးများစွာကို ရောင်းချခြင်း မရှိပေ။

ထို့ကြောင့် သူသည် ဆေးလုံးအချို့ကို ဝယ်ယူပြီး အိမ်ပြန်ရောက်မှ ဖော်စပ်နည်းကို ပြန်လည်ဖော်ထုတ်ရန်သာ တတ်နိုင်တော့သည်။ သူ ဤကဲ့သို့ ယခင်က ပြုလုပ်ဖူး၏။ အများဆုံး အချိန်အနည်းငယ် ပေးရုံသာဖြစ်သည်။

ဤပစ္စည်းများဝယ်ယူရန်အတွက် လီချန်သည် စုစုပေါင်း နတ်ဝိညာဉ်သလင်းကျောက် ငါးသိန်းနှစ်သောင်း သုံးစွဲခဲ့ရသည်။

ထို့ကြောင့် လီချန်သည် အလိုအလျောက် ရတနာခုနစ်ပါးခန်းမဆောင်၏ အထူးဧည့်သည်ဧည့်သည်တော် ဖြစ်လာခဲ့သည်။ နောက်တစ်နှစ်အတွက် သူသည် အထူးဧည့်သည်ဝန်ဆောင်မှုကို ခံစားရမည်ဖြစ်သည်။

သေချာသည်မှာ နောက်တစ်နှစ်တွင် အထူးဧည့်သည်ဝန်ဆောင်မှုကို ဆက်လက်ရရှိရန်အတွက် သူသည် အသင်းဝင်ကြေး သက်တမ်းတိုးရမည် (သို့မဟုတ်) နတ်ဝိညာဉ်သလင်းကျောက် ငါးသိန်းကျော်အောင် ဆက်လက်ဝယ်ယူရမည်ဖြစ်သည်။

"ဒီနေရာက ကုန်ကျစရိတ်က တကယ်ကို မြင့်တာပဲ"

ဝူရွှမ်းက သက်ပြင်းချလိုက်သည်။

ခဏလေးအတွင်းမှာပင် သူ နတ်ဝိညာဉ်သလင်းကျောက် ငါးသိန်းကျော် သုံးစွဲခဲ့သည် မဟုတ်ပါလော။

"ကုန်ကျစရိတ်များပေမယ့် ပစ္စည်းကောင်းတွေ အများကြီး ရှိတာဆိုတော့ တန်ပါတယ်"

လီချန်က ပြုံးလျက် ပြောလိုက်သည်။

သူဝယ်ယူခဲ့သော ပစ္စည်းများသည် ၁၀ခုမြောက်ဘုံတွင် လုံးဝမရရှိနိုင်သော အရာများ ဖြစ်ပေသည်။

"အဲ့ဒါတော့ ဟုတ်တယ်"

ဝူရွှမ်းက ပြုံးပြီး ခေါင်းညိတ်လိုက်သည်။

"နှမြောစရာကောင်းတာက ကျွန်တော်တို့ ဒီမှာ အကြာကြီး မနေနိုင်တာပဲ။ မဟုတ်ရင် လေလံပွဲ ဝင်ကြည့်သင့်တာ"

လီချန်က ပြောလိုက်သည်။

အဘယ်ကြောင့်ဆိုသော် သူသည် ရတနာခုနစ်ပါးခန်းမဆောင်၏ အထူးဧည့်သည်ဖြစ်လာပြီဖြစ်ရာ ဆိုင်က သူ့ကို လေလံပွဲဖိတ်စာ ပေးလိမ့်မည်ဖြစ်သည်။ သို့သော် သူ ၃၃ ဘုံမြောက်တွင် ရှိနေဦးမှသာ ဖြစ်နိုင်မည်။

...

နောက်ရက်များတွင် လီချန်နှင့် ဝူရွှမ်းတို့သည် ပိုင်ကျူနတ်ဘုရားမြို့တော်တွင် လျှောက်လည်ကြပြီး နေရာများစွာကို သွားရောက်ကာ ငွေကြေးအမြောက်အမြားသုံးစွဲခဲ့ကြသည်။

သို့သော် ဤကုန်ကျစရိတ်သည် လက်ရှိ လီချန်အတွက် ပြောပလောက်သော ပမာဏမဟုတ်ပေ။

.....

နေအိမ်။

လီချန်သည် တင်ပျဉ်ခွေထိုင်လျက် ကျောက်စိမ်းပြားတစ်ခုထဲရှိ အစီအရင်ဆိုင်ရာအတွေ့အကြုံများကို စစ်ဆေးနေသည်။

အချိန်ခေါင်းလောင်းလှိုဏ်ဂူကောင်းကင်ဘုံထဲတွင် မရှိသော်လည်း အချိန်ခေါင်းလောင်း၏ ဉာဏ်အလင်းပွင့်ခြင်းအခြေအနေသည် ပျောက်ကွယ်သွားခြင်း မရှိပေ။ ထို့ကြောင့် ယခုအခါ အစီအရင်ပညာရပ်ကို နားလည်သဘောပေါက်ရန်မှာ သူ့အတွက် အလွန်လွယ်ကူနေသည်။

ဤရက်များတွင် ဝူရွှမ်းနှင့်အတူ လည်ပတ်နေရသဖြင့် အချိန်ကုန်ဆုံးခဲ့သော်လည်း ပြန်ရောက်သည်နှင့် ချက်ချင်းပင် ဤအစီအရင်ဆိုင်ရာ အတွေ့အကြုံများကို လေ့လာမှတ်သားလေသည်။

ဤမှတ်တမ်းများသည် နှစ်ဆယ်အခြေခံအထက် အစီအရင်ပညာရှင်များ ချန်ထားခဲ့သော အရာများဖြစ်သည်ဟု ပြောရပေမည်။

နှစ်ဆယ်အခြေခံအထက် အစီအရင်လက်စွဲစာအုပ်များ မဟုတ်လျှင်ပင် လီချန်အတွက် များစွာ အထောက်အကူ ဖြစ်စေသည်။

ဤအတွေ့အကြုံများနှင့် အချိန်ခေါင်းလောင်း၏ ဉာဏ်အလင်းပွင့်ခြင်းအခြေအနေတို့ ပေါင်းစပ်လိုက်လျှင် ကိုယ်ပိုင်ကြိုးစားအားထုတ်မှုဖြင့် နှစ်ဆယ်အခြေခံ အစီအရင်ပညာရှင်အဆင့်သို့ သေချာပေါက် တက်လှမ်းနိုင်မည်ဟု သူ ယုံကြည်လေသည်။

နောက်ဆုံးတွင် အချိန်ခေါင်းလောင်း၏ ဉာဏ်အလင်းပွင့်ခြင်း စွမ်းအားသည် သံသယဖြစ်ဖွယ် မရှိပေ။

နှစ်ဆယ်အခြေခံ အစီအရင်ပညာရှင်အဆင့်တွင် ရပ်တန့်နေရခြင်းမှာ သဲလွန်စရှာမတွေ့သောကြောင့်သာ ဖြစ်သည်။

ယခု နှစ်ဆယ်အခြေခံအထက် အစီအရင်အတွေ့အကြုံများရရှိထားပြီဖြစ်ရာ ရှင်းလင်းသော လမ်းပြမြေပုံတစ်ခု ရရှိထားသကဲ့သို့ဖြစ်နေသည်။

အချိန်များစွာကြာပြီးနောက် လီချန်သည် မျက်လုံးများကို ဖြည်းညှင်းစွာဖွင့်လိုက်ရာ မျက်နှာပေါ်တွင် အပြုံးတစ်ခုပေါ်လာသည်။ ယခုလေးတင် နားလည်သဘောပေါက်မှုများမှ သူ အများကြီး ရရှိလိုက်ပြီး နှစ်ဆယ်အခြေခံ အစီအရင်ပညာရှင်ဖြစ်လာရန် ခြေတစ်လှမ်းပိုနီးစပ်သွားပြီဟု ခံစားလိုက်ရသည်။

ဝမ်းနည်းစရာကောင်းသည်မှာ သူသည် လက်ရှိ ၃၃ဘုံမြောက်တွင်ရှိနေပြီး အချိန်ခေါင်းလောင်းလှိုဏ်ဂူကောင်းကင်ဘုံသို့ မပြန်နိုင်သေးခြင်းဖြစ်သည်။ သို့မဟုတ်ပါက အစီအရင်များကို နားလည်သဘောပေါက်ရာတွင် အပြည့်အဝ နှစ်မြှုပ်ထားနိုင်မည်ဖြစ်သည်။

ထိုအချိန်တွင် အပြင်ဘက်မှ ဝူရွှမ်း၏အသံ ထွက်ပေါ်လာသည်။

"လီချန်... ကျွန်မတို့ စထွက်လို့ရပြီ"

လီချန် ဝူရွှမ်း၏ဆိုလိုရင်းကို နားလည်လိုက်သည်။

အင်မော်တယ်နန်းတော်၏ နတ်ဘုရားအထောက်အထားစာရင်း ပြန်လည်သတ်မှတ်ခြင်း စတင်တော့မည်ဖြစ်သည်။

ပါဝင်မည့် နတ်ဘုရားဂိုဏ်းသားအားလုံး ချက်ချင်း တက်ရောက်ရမည်ဖြစ်ပြီး အချိန်မှီမရောက်ရှိပါက အရှုံးပေးလိုက်ခြင်းနှင့် အတူတူပင်ဖြစ်သည်။

သူ အိမ်ထဲမှ ထွက်လာသောအခါ ကျန်လူများအားလုံး အဆင်သင့် ဖြစ်နေကြပြီ။

"သွားကြစို့"

လီချန်က ပြောလိုက်သည်။

ထို့ကြောင့် လူတိုင်း နေအိမ်မှထွက်ခွာပြီး နတ်ဘုရားအထောက်အထားစာရင်း ပြန်လည်သတ်မှတ်ခြင်း ကျင်းပရာနေရာသို့ ဦးတည်သွားကြသည်။

....

နေရာမှာ လေပေါ်ပျံဝဲနေသော ကျွန်းတစ်ကျွန်းပေါ်တွင်ဖြစ်သည်။

ပထမ အောက်ဘုံအလွှာ ၁၁ ခုမှ နတ်ဘုရားဂိုဏ်းဆယ်ခုကျော် ရောက်ရှိနေကြပြီဖြစ်သည်။

အလယ်ဘုံအလွှာ၏ နတ်ဘုရားအထောက်အထားစာရင်း ပြန်လည်သတ်မှတ်ခြင်းအတွက်မူ အခြားနေရာတစ်ခုတွင် ပြုလုပ်မည် ဖြစ်သည်။

"ဒါ ၁၀ခုမြောက်ဘုံ၊ ယွီဟွာနတ်ဘုရားဂိုဏ်းက ဝူရွှမ်းတာအိုသခင်မ မဟုတ်လား၊ နတ်ဘုရားအထောက်အထားစာရင်း ပြန်လည်သတ်မှတ်ခြင်းမှာ ပါဝင်မယ်လို့ မထင်ထားဘူး"

အံ့သြသံတစ်သံ ထွက်ပေါ်လာသည်။

လီချန် အသံလာရာဘက်သို့ ကြည့်လိုက်ရာ အစိမ်းရောင်ဝတ်ရုံဝတ် အမျိုးသားတစ်ဦးကို တွေ့လိုက်ရသည်။ ထုတ်လွှတ်နေသော အရှိန်အဝါအရ ထိုက်ယိတာအိုသခင်အဆင့်ဖြစ်လောက်သည်။

အောက်ဘုံအလွှာ ၁၁ ခုတွင် ထိုက်ယိအဆင့် တာအိုသခင်များသည် ယေဘုယျအားဖြင့် ထိပ်တန်းအဆင့်များဖြစ်ကြပြီး သာ့လော်အဆင့် တာအိုသခင်များမှာ အလွန်ရှားပါးလှသည်။ အဆုံးတွင် နတ်ဘုရားချီသန့်စင်မှုကို ရယူပြီး နိယာမမျိုးစေ့ အညှောက်ပေါက်ရန်မှာ လွန်စွာခက်ခဲလှသည်။

ထူးကဲသောပါရမီရှင်များရှိလျှင်တော့ တစ်မျိုးပေါ့... နတ်ဘုရားချီသန့်စင်ခြင်း မရှိဘဲ နိယာမမျိုးစေ့ အညှောက်ပေါက်နိုင်သည်ဟု ဆိုကြသည်။

သို့သော် ထိုကဲ့သို့သော ပြိုင်ဘက်ကင်း ပါရမီရှင်မျိုး ရှားပါးလှသည်။ ပေါ်လာလျှင်ပင် အလယ်ဘုံအလွှာ (သို့မဟုတ်) အထက်ဘုံအလွှာတွင်သာ ရှိတတ်ပြီး အောက်ဘုံအလွှာတွင် ပေါ်ပေါက်နိုင်ခြေ အလွန်နည်းပါးသည်။

သေချာသည်မှာ မဖြစ်နိုင်ဘူးဟူ၍တော့ မရှိပေ။

ဖြစ်နိုင်ခြေမည်မျှနည်းပါးစေကာမူ သမိုင်းရေစီးကြောင်းထဲတွင် ထိုကဲ့သို့ အံ့မခန်း ပါရမီရှင်များ အမြဲပေါ်ထွက်လာလေ့ရှိသည်။

"ရှင်တို့ ဝူရိပ်နတ်ဘုရားဂိုဏ်း ပါဝင်နိုင်ရုံနဲ့ ကျွန်မတို့ ယွီဟွာနတ်ဘုရားဂိုဏ်းက မပါဝင်ရတော့ဘူးလား"

ဝူရွှမ်းက သူ့ကို တစ်ချက်ကြည့်ပြီး အေးစက်စွာ ရယ်မောလျက် ပြောလိုက်သည်။ သူမ၏လေသံတွင် အေးစက်သော အဓိပ္ပာယ်များပါဝင်နေ၏။

လီချန်သည် ဝူရွှမ်းကိုကြည့်ပြီး သူမနှင့် ထိုလူကြားတွင် ရန်ငြိုးတစ်ခုခုရှိမရှိ စိတ်ဝင်စားသွားသည်။

"အဲ့လိုတော့ မဟုတ်ပါဘူး၊ ခင်ဗျားတို့ ယွီဟွာနတ်ဘုရားဂိုဏ်းရဲ့ နတ်ဘုရားအထောက်အထား ဆုံးရှုံးသွားမှာစိုးလို့ပါ"

အစိမ်းရောင်ဝတ်ရုံနှင့် လူက ပြုံးလျက်ပြောလိုက်သည်။

ပါဝင်သည့် နတ်ဘုရားဂိုဏ်း များလေလေ၊ နတ်ဘုရားအထောက်အထား ပြန်လည်သတ်မှတ်ခြင်း ခံရလေလေ ဖြစ်သည်။

နတ်ဘုရားအထောက်အထားစာရင်း ပြန်လည်သတ်မှတ်ခြင်း စည်းမျဉ်းများမှာ ရိုးရှင်းသည်။ ထိပ်ဆုံးသုံးသင်းသာလျှင် နတ်ဘုရားအထောက်အထား တိုးမြင့်လာနိုင်ပြီး ခွဲဝေမှုအချိုးအစားမှာ ခုနစ်၊ နှစ်၊ တစ် ဖြစ်သည်။

ထိပ်ဆုံးသုံးသင်း နောက်ရောက်သူများအတွက်မူ နတ်ဘုရားအထောက်အထားအသစ် မရရှိရုံသာမက လက်ရှိရှိနေသည်များကိုလည်း ဆုံးရှုံးရမည်ဖြစ်သည်။

ဤပြင်းထန်သော စည်းမျဉ်းကြောင့်ပင် နတ်ဘုရားအထောက်အထားစာရင်း ပြန်လည်သတ်မှတ်ခြင်း၌ ပါဝင်သော နတ်ဘုရားဂိုဏ်း အရေအတွက် သိပ်မများခြင်းဖြစ်သည်။

ဒီတစ်ခေါက် ဆယ်သင်းကျော်ဆိုသည်မှာ များသည်ဟု ယူဆရမည်။ အဓိကအားဖြင့် အသစ်လစ်လပ်သွားသော နတ်ဘုရားအထောက်အထား ထောင်ပေါင်းများစွာသည် နတ်ဘုရားဂိုဏ်းအများအပြားကို စိတ်လှုပ်ရှားစေခဲ့သောကြောင့်ဖြစ်သည်။

သူတို့ သေချာပေါက် စမ်းကြည့်ချင်ကြသည်။

အထူးသဖြင့် ယခင်အကြိမ်များက နတ်ဘုရားအထောက်အထား ခွဲတမ်းများ ဆုံးရှုံးခဲ့ရသော နတ်ဘုရားဂိုဏ်းအချို့သည် ဒီတစ်ခါ ပြန်လည်ရယူချင်ကြသည်မှာ အမှန်ပင်။

"အဲ့ဒါ ရှင်နဲ့ မဆိုင်ပါဘူး"

ဝူရွှမ်းက ဂရုမစိုက်သလို ပြောလိုက်သည်။

"ဟီးဟီး... ဝူရွှမ်းတာအိုသခင်မ၊ ခင်ဗျားကို သတိပေးလိုက်ဦးမယ်။ ကျုပ်တို့ ဝူရိပ်နတ်ဘုရားဂိုဏ်းမှာ သာ့လော်တာအိုသခင်တစ်ပါး ပေါ်ထွက်လာပြီ။ ဒီတစ်ခါ ပထမနေရာက သေချာပေါက် ကျုပ်တို့အပိုင်ပဲ"

အစိမ်းရောင်ဝတ်ရုံနှင့် လူက ရယ်မောလိုက်ပြီး သူ့လေသံတွင် ယုံကြည်မှုများ ထင်ဟပ်နေသည်။

ပြောပြီးနောက် သူသည် အခြားသူများနှင့်အတူ ထွက်ခွာသွားလေသည်။

"အဲ့လူက ဘာဖြစ်တာလဲ"

လီချန်က မေးလိုက်သည်။

"လွန်ခဲ့တဲ့ နှစ်၂၀၀လောက်က ၉ခုမြောက်ဘုံက နတ်ဘုရားဂိုဏ်းတစ်ခုကို ရှေးဟောင်းမိစ္ဆာဂိုဏ်း ဖျက်ဆီးခဲ့တာ မှတ်မိလား... ဒီ ဝူရိပ်နတ်ဘုရားဂိုဏ်းက ၉ခုမြောက်ဘုံကပဲ..."

ဝူရွှမ်းက ဆက်ပြောသည်။

"အကျိုးစီးပွားကိစ္စတချို့ကြောင့် ကျွန်မနဲ့သူ ပဋိပက္ခ ဖြစ်ဖူးတယ်... အဲ့ဒါကြောင့် ရန်ငြိုးရှိနေတာ"

"ဒါဆို ဒီတစ်ခေါက်က စာရင်းရှင်းဖို့ အခွင့်ကောင်းပဲ မဟုတ်ဘူးလား"

လီချန်က ရယ်မောလိုက်သည်။

"ဟုတ်တယ်"

ဝူရွှမ်းက ပြုံးလိုက်သည်။

သူမသည် လက်ရှိတွင် ကျင့်ကြံမှုအဆင့်အပြင် သူမ၏ နိယာမမျိုးစေ့သည် ကောင်းကင်နှင့် မြေကြီးတွင် အမြစ်တွယ်နေသော ကမ္ဘာ့သစ်ပင်အဖြစ် ပြောင်းလဲထားပြီဖြစ်ရာ... ဟွမ်ယွမ်တာအိုသခင်တစ်ပါးနှင့် ယှဉ်ပြိုင်နိုင်စွမ်း ရှိပေသည်။

အချိန်ကြာမြင့်စွာ စောင့်ဆိုင်းပြီးနောက် ပျံဝဲနေသောကျွန်းပေါ်တွင် ပုံရိပ်တစ်ခု ရုတ်တရက် ပေါ်လာသည်။

ပြင်းထန်သော ဖိအားတစ်ခုသည် ဧရိယာတစ်ခုလုံးကို လွှမ်းခြုံသွား၏။

"ဟွမ်ယွမ်တာအိုသခင်တစ်ပါးပဲ၊ ပြီးတော့ ထိပ်တန်းအဆင့်မှာ ရှိတယ်..."

လီချန် ချက်ချင်း အကဲဖြတ်လိုက်သည်။

သို့သော် သူသည် သူ့အရှိန်အဝါကို ထိုက်ယိတာအိုသခင်အဆင့်တွင် ထိန်းထားလိုက်သည်။

ထိပ်တန်း ရွှေနတ်ဘုရားသာမဟုတ်လျှင် သူ့ကို မည်သူမျှ ခြေရာခံနိုင်မည် မဟုတ်ကြောင်း ယုံကြည်မှုရှိသည်။

ထို့အပြင် ဤသည်မှာ အောက်ဘုံအလွှာ၏ နတ်ဘုရားအထောက်အထားစာရင်း ပြန်လည်သတ်မှတ်ခြင်းသာဖြစ်ရာ ထိပ်တန်း မပျက်သုဉ်းနိုင်သောရွှေနတ်ဘုရားများ ရှိလိမ့်မည် မဟုတ်ပေ။ သာမန် မပျက်သုဉ်းနိုင်သောရွှေနတ်ဘုရားများပင် ပေါ်လာမည် မဟုတ်ချေ။

မြင်ကွင်းတစ်ခုလုံး တိတ်ဆိတ်သွားသည်။

မျက်လုံးပေါင်းတစ်ရာကျော်သည် ထိုပုံရိပ်ပေါ်သို့ ကျရောက်သွားသည်။

"ဒီတစ်ခေါက် နတ်ဘုရားအထောက်အထားစာရင်း ပြန်လည်သတ်မှတ်ခြင်းမှာ စည်းမျဉ်းတွေ ပြောင်းလဲသွားမယ်။ ကွင်းထဲမှာ ယှဉ်ပြိုင်တဲ့ပုံစံကို သုံးတော့မှာ မဟုတ်ဘူး"

လေထဲရှိ ဟွမ်ယွမ်တာအိုသခင်က ပြောလိုက်သည်။

ရှိနေသူများ ချက်ချင်း ရုတ်ရုတ်သဲသဲ ဖြစ်သွားကြသည်။

ကွင်းထဲတွင် ယှဉ်ပြိုင်ခြင်း မရှိတော့ဘူးဆိုလျှင် ပြောင်းလဲမှုများစွာရှိလာနိုင်ပေသည်။

ဤသည်မှာ ယုံကြည်မှုရှိနေသော နတ်ဘုရားဂိုဏ်းအချို့အတွက် သဘာဝကျစွာပင် အဆင်မပြေသော ကိစ္စဖြစ်သည်။

သို့သော် နတ်ဘုရားအထောက်အထားစာရင်း ပြန်လည်သတ်မှတ်ခြင်းကို အင်မော်တယ်နန်းတော်က ကျင်းပခြင်းဖြစ်ရာ စည်းမျဉ်းပြောင်းလဲခြင်းသည်လည်း အင်မော်တယ်နန်းတော်၏ သဘောသာ ဖြစ်ပေသည်။ ရှိနေသော နတ်ဘုရားဂိုဏ်းများ မကျေနပ်လျှင်ပင် မည်သူမျှ ထုတ်မပြောရဲကြပေ။

"စီနီယာ၊ ဒီတစ်ခေါက် နတ်ဘုရားအထောက်အထားစာရင်း ပြန်လည်သတ်မှတ်ခြင်းအတွက် ဘယ်လိုနည်းလမ်းကို သုံးမှာလဲ"

နတ်ဘုရားဂိုဏ်း တာအိုသခင်တစ်ပါးက ချက်ချင်း ကျယ်လောင်စွာ မေးလိုက်သည်။

"မင်းတို့အားလုံး နတ်ဘုရားမိစ္ဆာစစ်မြေပြင်ထဲကို ဝင်ရောက်ပြီး ရှေးဟောင်းမိစ္ဆာဂိုဏ်းက မိစ္ဆာတွေကို သတ်ဖြတ်ရမယ်။ မိစ္ဆာတွေကို များများသတ်နိုင်လေ မင်းတို့ရဲ့ နတ်ဘုရားဂိုဏ်းက အကျိုးဆောင်အမှတ်တွေ များများရလေပဲ။ နောက်ဆုံးအဆင့်သတ်မှတ်ချက်ကို အမှတ်အရေအတွက်အတိုင်း တွက်ချက်သွားမယ်"

ကောင်းကင်ယံမှ ဟွမ်ယွမ်တာအိုသခင်က ပြောလိုက်သည်။

ရှိနေသူအားလုံး တစ်ယောက်ကိုတစ်ယောက် ကြည့်လိုက်ကြသည်။

ကွင်းတွင်းပြိုင်ပွဲတွင် ဒဏ်ရာရနိုင်ခြေရှိသော်လည်း သေဆုံးနိုင်ခြေ အလွန်နည်းပါးသည်။

သို့သော် လျှို့ဝှက်နယ်မြေထဲသို့ ဝင်ရောက်ပြီး ရှေးဟောင်းမိစ္ဆာဂိုဏ်းမှ မိစ္ဆာကျင့်ကြံသူများနှင့် တိုက်ခိုက်ရမည်ဆိုလျှင် သေဆုံးနှုန်း အလွန်မြင့်မားပေလိမ့်မည်။

"စီနီယာ၊ ကျုပ်တို့ရဲ့ ကျင့်ကြံမှုအဆင့် ကွာခြားချက်က သိသာလွန်းတယ်။ ထျန်းနတ်ဘုရားတွေ၊ ရွှမ်းနတ်ဘုရားတွေနဲ့ တာအိုသခင်အဆင့်တွေ ရှိနေတာလေ။ ထျန်းနတ်ဘုရားတွေနဲ့ ရွှမ်းနတ်ဘုရားတွေအတွက် အန္တရာယ်အရမ်းမများလွန်းဘူးလား"

အခြားတစ်ယောက်က မေးလိုက်သည်။

"အဲ့ဒါအတွက် စိတ်မပူပါနဲ့။ ဒီနတ်ဘုရားမိစ္ဆာစစ်မြေပြင်မှာ အလွှာသုံးလွှာ ရှိတယ်။ တာအိုသခင်တွေက မိစ္ဆာသခင်တွေနဲ့၊ ထျန်းနတ်ဘုရားတွေက ထျန်းမိစ္ဆာတွေနဲ့၊ ရွှမ်းနတ်ဘုရားတွေက ရွှမ်းမိစ္ဆာတွေနဲ့ ယှဉ်ပြိုင်ရမယ်... ဒါက စစ်မြေပြင်စည်းမျဉ်းပဲ။ ပြီးတော့... မင်းတို့ အောက်ဘုံအလွှာက နတ်ဘုရားဂိုဏ်းတွေအပြင် အလယ်နဲ့ အထက်ဘုံအလွှာက နတ်ဘုရားဂိုဏ်းတွေနဲ့ တခြားနတ်ဘုရားဂိုဏ်းတွေလည်း ဒီနတ်ဘုရားမိစ္ဆာစစ်မြေပြင်မှာ ပါဝင်ကြလိမ့်မယ်"

ဟွမ်ယွမ်တာအိုသခင်က ပြောလိုက်သည်။

ဤနတ်ဘုရားအထောက်အထားစာရင်း ပြန်လည်သတ်မှတ်ခြင်းသည် အင်မော်တယ်နန်းတော်က ရှေးဟောင်းမိစ္ဆာဂိုဏ်းနှင့် တိုက်ခိုက်ရန် အကြောင်းပြချက်တစ်ခုဖြစ်နိုင်ကြောင်း လူတိုင်း နားလည်လိုက်ကြသည်။

ဟွမ်ယွမ်တာအိုသခင်က နတ်ဘုရားမိစ္ဆာစစ်မြေပြင်တွင် စည်းမျဉ်းများရှိသည်ဟု ပြောသော်လည်း လူတိုင်း စိုးရိမ်ပူပန်နေမိကြသည်။

နောက်ဆုံးတွင် ပြိုင်ဘက်က ရှေးဟောင်းမိစ္ဆာဂိုဏ်း မဟုတ်လား။

၎င်းသည် အင်မော်တယ်နန်းတော်ကို ယှဉ်ပြိုင်နိုင်သော ထိပ်တန်းပြင်ပအင်အားစုကြီး တစ်ခုဖြစ်သည်။

ရှိနေသော နတ်ဘုရားဂိုဏ်းများသည် ရှေးဟောင်းမိစ္ဆာဂိုဏ်းအတွက် ပြောပလောက်သော အရာများ မဟုတ်ကြပေ။

မူလက ယုံကြည်မှုရှိနေသော နတ်ဘုရားဂိုဏ်းများသည် ယခုအခါ ရင်ထဲတွင် လေးလံသော ဝန်ထုပ်ဝန်ပိုးကို ခံစားလိုက်ရပြီး ယုံကြည်မှုများ ပျောက်ဆုံးသွားကြသည်။

လီချန်နှင့် ဝူရွှမ်းသာ တည်ငြိမ်နေကြသည်။

နောက်ဆုံးတွင် ဝူရွှမ်းသည် ဟွမ်ယွမ်တာအိုသခင်ဖြစ်ပြီး လီချန်သည် တာအိုပေါင်းစည်းခြင်းအဆင့်ကျင့်ကြံသူတစ်ဦး ဖြစ်ပေသည်။

ပြဿနာတစ်ခုတည်းမှာ တာအိုပေါင်းစည်းခြင်းအဆင့် ကျင့်ကြံသူဖြစ်သော လီချန်ကို နတ်ဘုရားမိစ္ဆာစစ်မြေပြင်တွင် ခြေရာခံမိသွားမလားဆိုသည်သာဖြစ်သည်။

ခြေရာခံမိလျှင် အနည်းငယ် ပြဿနာရှိနိုင်သည်။

သို့သော် အခြေအနေက ဤအဆင့်ထိရောက်လာပြီဖြစ်ရာ လီချန် နောက်ဆုတ်ရန် မဖြစ်နိုင်တော့ပေ။

"သေချာတာပေါ့၊ ဒီတစ်ခေါက် နတ်ဘုရားမိစ္ဆာစစ်မြေပြင်ကိုဝင်ရတာ အန္တရာယ်အရမ်းများတယ်။ ဒါကြောင့် မင်းတို့ထဲက နောက်ဆုတ်ချင်တဲ့သူရှိရင် အခု ဆုတ်သွားလို့ရတယ်။ ဒါပေမဲ့ နောက်ဆုတ်လိုက်တာနဲ့ ကျရှုံးတယ်လို့ သတ်မှတ်ခံရမှာဖြစ်ပြီး သက်ဆိုင်ရာ နတ်ဘုရားအထောက်အထား ခွဲတမ်းတွေကို လျှော့ချခံရလိမ့်မယ်"

လေထဲတွင် ပျံဝဲနေသော ဟွမ်ယွမ်တာအိုသခင်က ပြောလိုက်သည်။

ကွင်းပြင်တစ်ခုလုံး တိတ်ဆိတ်ငြိမ်သက်သွားသည်။

မည်သည့် နတ်ဘုရားဂိုဏ်းမျှ နောက်မဆုတ်ကြပေ။

အန္တရာယ်ကြီးမားသော်လည်း ဆုလာဘ်သည်လည်း ကြီးမားသည်။

အကယ်၍ အန္တရာယ်ကြောင့်နှင့် နောက်ဆုတ်လိုက်လျှင် သူတို့သည် ရယ်စရာလူပြက်များ ဖြစ်သွားပေလိမ့်မည်။

ရှိနေကြသော နတ်ဘုရားဂိုဏ်း တာအိုသခင်များထဲမှ မည်သူက လက်ရှိအောင်မြင်မှုရရန် မရေမတွက်နိုင်သော သေရေးရှင်ရေး အခြေအနေများကို မဖြတ်သန်းခဲ့ဖူးဘဲ ရှိပါ့မလဲ။ သူတို့၏ စိတ်ဓာတ်ကြံ့ခိုင်မှုသည် သဘာဝကျစွာပင် အလွန်ခိုင်မာနေပြီဖြစ်သည်။ နတ်ဘုရားမိစ္ဆာစစ်မြေပြင်သို့ ဝင်ရောက်ခြင်းက အန္တရာယ်များသော်လည်း ဤအချိန်တွင် နောက်ဆုတ်ရန် မဖြစ်နိုင်ပေ။

နောက်ဆုတ်လိုက်သည်နှင့် ပေးဆပ်ရမည့်တန်ဖိုးက ကြီးမားလွန်းသည်။

သူတို့၏ နတ်ဘုရားအထောက်အထား ခွဲတမ်းအချို့ လျှော့ချခံရမည်။ ထိုဆုံးရှုံးမှုကို သူတို့ မတတ်နိုင်ကြပေ။

"ဘယ်သူမှ နောက်မဆုတ်ဘူးဆိုတော့ အတည်ပဲ။ ကဲ... မင်းတို့ကို နေရာရွှေ့ပြောင်းခြင်းအစီအရင်ကို ခေါ်သွားပေးမယ်"

ဟွမ်ယွမ်တာအိုသခင်က ပြောလိုက်သည်။

ထို့နောက် ဟွမ်ယွမ်တာအိုသခင်၏ ခေါင်းဆောင်မှုအောက်တွင် နတ်ဘုရားဂိုဏ်းဆယ်ခုကျော်မှ ကျင့်ကြံသူ ၂၀၀ နီးပါးသည် သူတို့၏ ဝိညာဉ်လက်နက်များကို စီးနင်းလျက် ပျံဝဲနေသော ကျွန်းမှ ပျံသန်းထွက်ခွာသွားကြသည်။

ဤသို့ဖြင့် ကျင့်ကြံသူ ၂၀၀ နီးပါးသည် နေရာရွှေ့ပြောင်းခြင်းအစီအရင်မှတစ်ဆင့် နတ်ဘုရားမိစ္ဆာစစ်မြေပြင် ဝင်ပေါက်သို့ ရောက်ရှိသွားကြသည်။

ဤနေရာတွင် ကျင့်ကြံသူ အများအပြား စုဝေးရောက်ရှိနေကြပြီး အရေအတွက်မှာ ထောင်ပေါင်းများစွာ ရှိလေသည်။

"စီနီယာ၊ ဒီလူတွေအားလုံး နတ်ဘုရားအထောက်အထားစာရင်း ပြန်လည်သတ်မှတ်ခြင်းမှာ ပါဝင်ကြမယ့်သူတွေလား"

တစ်ယောက်က စူးစမ်းလိုစိတ်ဖြင့် မေးလိုက်သည်။

"မပါပါဘူး၊ ပြောထားသလိုပဲ ဒီနေရာက နတ်ဘုရားမိစ္ဆာစစ်မြေပြင်ရဲ့ ဝင်ပေါက်လေ။ နတ်ဘုရားမိစ္ဆာစစ်မြေပြင်က တစ်နှစ်ပတ်လုံး ဖွင့်လှစ်ထားတာ..."

ဟွမ်ယွမ်တာအိုသခင်က ခေါင်းခါလျက် ပြောလိုက်သည်။

"နတ်ဘုရားမိစ္ဆာစစ်မြေပြင်ထဲဝင်ပြီး မိစ္ဆာတွေကို သတ်နိုင်သရွေ့ အောင်မြင်မှုမှတ်တမ်းတွေ ရနိုင်တယ်။ ဒါက အင်မော်တယ်နန်းတော်က နှစ်ပေါင်းသိန်းချီ ထိန်းသိမ်းထားခဲ့တဲ့ လုပ်ဆောင်ချက်တစ်ခုပဲ။ လွန်ခဲ့တဲ့ နှစ်ထောင်ချီလောက်က ခေတ္တရပ်ဆိုင်းထားခဲ့ပေမယ့် နှစ်ရာကျော်လောက်မှာ ရှေးဟောင်းမိစ္ဆာဂိုဏ်း ပြန်ပေါ်လာတော့ နတ်ဘုရားမိစ္ဆာစစ်မြေပြင်ကို ပြန်လည်သက်ဝင်စေခဲ့တာ"

နတ်ဘုရားမိစ္ဆာစစ်မြေပြင်သို့ ဝင်ရောက်သူအများစုသည် အထက်ပိုင်း ၃၃ဘုံမြောက်ရှိ အဓိကနတ်ဘုရားဂိုဏ်းကြီးများမှ ကျင့်ကြံသူများ ဖြစ်ကြသည်။

ပိုမိုမြင့်မားသော အရင်းအမြစ်များကိုရရှိရန်အတွက် သူတို့သည် စွန့်စားရမည်၊ နတ်ဘုရားမိစ္ဆာစစ်မြေပြင်သို့ ဝင်ရောက်ရမည်။ မိစ္ဆာများကို သတ်ဖြတ်ရမည်။ အောင်မြင်မှုမှတ်တမ်းများ စုဆောင်းရမည်ဖြစ်ပြီး အရင်းအမြစ်များနှင့် လဲလှယ်ရမည်ဖြစ်သည်။

သေချာသည်မှာ ထိုနတ်ဘုရားဂိုဏ်းများသည်လည်း ကျင့်ကြံသူများကို စေလွှတ်လေ့ရှိသည်။

ထို့အပြင် ထိပ်တန်းအင်အားကြီးပုဂ္ဂိုလ်များလည်း မကြာခဏ ဝင်ရောက်လေ့ရှိသည်။

နောက်ဆုံးတွင် လုံလောက်သော အင်အားရှိသည့် ကျင့်ကြံသူများ၏ ပံ့ပိုးမှုမပါဘဲ ဝင်ရောက်ခြင်းသည် သေမင်းထံသို့ သွားရောက်ခြင်းနှင့် မခြားနားပေ။

ဟွမ်ယွမ်တာအိုသခင်ပြောသည်ကို ကြားပြီးနောက် လီချန်နှင့်အခြားသူများသည် နတ်ဘုရားမိစ္ဆာစစ်မြေပြင်၏ ရည်ရွယ်ချက်ကို နားလည်လိုက်ကြသည်။ ရှေးဟောင်းမိစ္ဆာဂိုဏ်း၏ အင်အားကို ဖြုန်းတီးပစ်ရန်ဖြစ်သည်။

သေချာသည်မှာ ရှေးဟောင်းမိစ္ဆာဂိုဏ်းကလည်း ဤနည်းလမ်းကို အသုံးပြုပြီး အင်မော်တယ်နန်းတော်၏အင်အားကို ချေမှုန်းလိုခြင်းဖြစ်သည်။

သို့သော် အချိန်ကြာမြင့်စွာ ကြာပြီးနောက် မည်သည့်ဘက်ကမျှ အခြားတစ်ဖက်ကို အမြစ်ပြတ်ချေမှုန်းနိုင်ခြင်း မရှိဘဲ ကာလရှည်ကြာ စစ်ပွဲတစ်ခု ဖြစ်လာခဲ့သည်။

လီချန် သံသယရှိသည်မှာ နတ်ဘုရားမိစ္ဆာစစ်မြေပြင်၏ လုပ်ဆောင်ချက်သည် ထိုမျှမက ရှိနိုင်သည် ဟူ၍ဖြစ်သည်။

ဖြစ်နိုင်သည်မှာ အမတကျင့်ကြံသူများနှင့် မိစ္ဆာကျင့်ကြံသူများ အလွန်များပြားလွန်းနေသဖြင့် အရေအတွက် လျှော့ချရန်နှင့် အရင်းအမြစ် သုံးစွဲမှုကို လျှော့ချရန် ဤနည်းလမ်းကို အသုံးပြုခြင်း ဖြစ်နိုင်သည်။

ထို့အပြင် ရှင်ကျန်ရစ်သူများသည် ပိုမိုမြင့်မားသော အရင်းအမြစ်များကို ရရှိနိုင်မည်ဖြစ်ရာ ဘာကြောင့် မလုပ်ဘဲ နေကြမည်နည်း။

ထိုအချိန်တွင် ကြီးမားသော ဟင်းလင်းပြင်ဝဲကတော့ကြီးတစ်ခု လေထဲတွင်ပေါ်လာပြီး နက်ရှိုင်းကာ ကြောက်မက်ဖွယ်ကောင်းလှသည်။

"ကဲ... စစ်မြေပြင်ဝင်ပေါက် ပွင့်သွားပြီ။ မင်းတို့ ဝင်သွားတာနဲ့ အမှတ်အသားတစ်ခု အလိုအလျောက် ရရှိလိမ့်မယ်။ မိစ္ဆာတွေကို သတ်နိုင်သရွေ့ အမှတ်တွေကို အလိုအလျောက် တွက်ချက်သွားလိမ့်မယ်။ သုံးလကြာမှ ပြန်ထွက်လို့ရမယ်။ မှတ်ထားပါ... မင်းတို့ အသက်ရှင်နေရင် သုံးလပြည့်တာနဲ့ ချက်ချင်း ပြန်ထွက်လာရမယ်။ အချိန်ကျော်လွန်သွားရင် ရထားတဲ့အမှတ်တွေကို နတ်ဘုရားအထောက်အထားစာရင်း ပြန်လည်သတ်မှတ်ခြင်း စာရင်းအင်းထဲမှာ ထည့်သွင်းမှာ မဟုတ်ဘူး"

ဟွမ်ယွမ်တာအိုသခင်က သတိပေးလိုက်သည်။

ထိုအချိန်တွင် ကျင့်ကြံသူအများအပြားသည် ဟင်းလင်းပြင်ဝဲကတော့ကြီးထဲသို့ ပျံသန်းဝင်ရောက်သွားကြသည်။

လီချန်နှင့် သူ့အပေါင်းအပါ ရှစ်ယောက်တို့သည် စုဝေးလိုက်ကြပြီး လူအုပ်ကြီးနှင့်အတူ ဟင်းလင်းပြင်ဝဲကတော့ဆီသို့ ပျံသန်းသွားကြလေသည်။

***