ကျီမိသားစု

အချိန်ခေါင်းလောင်း လှိုဏ်ဂူကောင်းကင်ဘုံ။

ကျင့်ကြံခြင်း ပြီးမြောက်ခါစ လီချန်သည် ရှောင်ဟေးကို စနောက်နေသည်။

အချိန်ခေါင်းလောင်း၏ ခေါင်းလောင်းသံ အကူအညီဖြင့် ရှောင်ဟေးသည် မျိုးစေ့စုစည်းခြင်းဟူသော အကြီးမားဆုံး အတားအဆီးကို ကျော်ဖြတ်နိုင်ခဲ့ပြီး၊ စစ်သည်တော်သားရဲတစ်ကောင် အောင်မြင်စွာဖြစ်လာခဲ့သည်။

သို့သော် ရှောင်ဟေး၏ပါရမီက သာမန်ဆန်လွန်းသည်။

ထို့ကြောင့် သူ၏ စစ်သည်တော်သားရဲ လမ်းခရီးသည် နတ်ဘုရားလက်နက် အချိန်ခေါင်းလောင်း၏ အကူအညီပါနေရင်တောင်မှ အတော်လေး ကြမ်းတမ်းခက်ခဲဦးမည်။

လီချန်ကတော့ သူ့အပေါ် ဘာမျှော်လင့်ချက်မှ မထားပါဘူး။

မထင်မှတ်ထားတာကတော့ ဒီရှောင်ဟေးက အလွန်ကြိုးစားခြင်းပင်။

သားရဲတစ်ကောင်က စိတ်ချင်းဆက်သွယ်ခြင်းအဆင့် ရောက်ပြီးတာနဲ့ ဒီလောက် ကြိုးကြိုးစားစား ကျင့်ကြံလိမ့်မယ်လို့ တွေးကြည့်ဖို့တောင် ခက်ခဲသည်။

ပုံမှန်အားဖြင့် သားရဲထိန်းကျောင်းသူနဲ့ စစ်သည်တော်သားရဲကြားမှာ အပြန်အလှန် အထောက်အကူပြုတဲ့ ဆက်ဆံရေးရှိကြတယ်။ ကျင့်ကြံတဲ့အခါမှာလည်း တပြိုင်နက်တည်း လုပ်ဆောင်လေ့ရှိကြတယ်။

ဒါပေမဲ့ လီချန်ကတော့ ရှောင်ဟေးနဲ့အတူတူ ကျင့်ကြံပေးဖို့ ဘယ်လိုလုပ်ဖြစ်နိုင်မှာလဲ။ သူ့ကိုယ်ပိုင် ကျင့်ကြံခြင်း၊ အစီအရင်လေ့လာခြင်း စတာတွေနဲ့တင် အလုပ်ရှုပ်လွန်းလို့နေတာ။ သားရဲထိန်းကျောင်းခြင်းပညာအတွက် အချိန်ဘယ်ပေးနိုင်ပါ့မလဲ။

လီချန်သည် မလှမ်းမကမ်းတွင် ဝပ်နေသော ရှောင်ဟေးကို တစ်ချက်ကြည့်လိုက်သည်။ ရှောင်ဟေး၏ ခန္ဓာကိုယ်ပေါ်တွင် ဝိညာဉ်စွမ်းအင် အနည်းငယ်လှုပ်ရှားနေသည်ကို ကြည့်ခြင်းအားဖြင့် သူ ကျင့်ကြံနေမှန်း သိသာသည်။

....

ရုတ်တရက် လီချန်၏မျက်နှာတွင် အံ့သြရိပ်များ ပေါ်လာသည်။ ထို့နောက် နေရာကူးပြောင်းခြင်းအစီအရင်မှတဆင့် ၂၁ ခုမြောက်ဘုံရှိ ဝူရှင်းစံအိမ်သို့ ရောက်ရှိသွားသည်။

ယခုအချိန်တွင် ဝူရှင်းစံအိမ်၏ ကာကွယ်ရေးအစီအရင်ကြီး စတင်လည်ပတ်နေပြီဖြစ်သည်။

အစွမ်းထက်သော အရှိန်အဝါ ၃ ခုသည် ကာကွယ်ရေးအစီအရင်၏ အပြင်ဘက်တွင် ရပ်တန့်နေပြီး၊ အစီအရင်ကို တရစပ် တိုက်ခိုက်နေကြသည်။

သို့သော် ဝူရှင်းစံအိမ်၏ ကာကွယ်ရေးအစီအရင်သည် လီချန် ပျင်းနေတုန်း လုပ်ပေးထားခဲ့ခြင်း ဖြစ်သော်လည်း၊ ၂၁ အခြေခံအဆင့်ရှိသည်။

၂၁ အခြေခံအဆင့်ရှိသော အစီအရင်တစ်ခုကို... မပျက်သုဉ်းနိုင်သော ရွှေနတ်ဘုရားကိုယ်တိုင် လာရောက်တိုက်ခိုက်မှသာ ချိုးဖျက်နိုင်မည်ဖြစ်သည်။

ရွှေနတ်ဘုရားကိုယ်တိုင်လာရင်တောင် အချိန်အတော်ကြာ အားထုတ်ရဦးမည်။

ဝူရှန်းနတ်ဘုရားဂိုဏ်းမှ ဟွမ်ယွမ်တာအိုသခင် ၃ ဦးသည် ယခုအချိန်တွင် အတော်လေး ကြောင်အ နေကြသည်။

ဘယ်ကမှန်းမသိပေါ်လာတဲ့ ဝူရှင်းစံအိမ် သေးသေးလေးတစ်ခုမှာ ဟွမ်ယွမ်တာအိုသခင်ရှိနေတာကို လက်ခံလို့ ရပါသေးတယ်။ ဒါပေမဲ့ ဒီလိုအဆင့်ရှိတဲ့ ကာကွယ်ရေးအစီအရင်ကြီးရှိနေတာကတော့ လွန်လွန်းနေပြီ။

ဒီကာကွယ်ရေးအစီအရင်က သေချာပေါက် အခြေခံ ၂၀ အထက်မှာရှိတယ်။

သူတို့ ဝူရှန်းနတ်ဘုရားဂိုဏ်းရဲ့ ဂိုဏ်းကာကွယ်ရေးအစီအရင်တောင် အခြေခံ ၂၀ ပဲ ရှိတာလေ။

.....

ဝူရှင်းစံအိမ်အတွင်း၌။

လီချန် ပေါ်လာသည်နှင့် ယန်ဖန်း နှင့် ဝမ်ဝမ်တို့ ချက်ချင်း သတိထားမိလိုက်ကြသည်။

"ဆရာသခင်" နှစ်ဦးသား အလျင်အမြန် အရိုအသေ ပြုလိုက်ကြသည်။

"ဟွေ့ယွမ်ကပ်ဘေး စတင်နေပြီ ထင်တယ်... ဒါပေမဲ့ ငါတို့တွေ နည်းနည်းလောက် သိုသိုသိပ်သိပ်နေကြရအောင်။ ဝူရှန်းနတ်ဘုရားဂိုဏ်း နဲ့ ဆွေးနွေးလို့ရရင် ဆွေးနွေးကြည့်လိုက်ပါ" လီချန် ပြောလိုက်သည်။

ခေါင်းထောင်တဲ့ငှက် အရင်ပစ်ခံရတယ်ဆိုတဲ့ သဘောတရားကို သူ ကောင်းကောင်း နားလည်သည်။

လောလောဆယ် ကိုယ့်အင်အားအစစ်ကို ထုတ်မပြသင့်သေးဘူး။ အထူးသဖြင့် အင်မော်တယ်နန်းတော်နဲ့ ပဋိပက္ခ မဖြစ်စေရဘူး။

"ဟုတ်ကဲ့ပါ ဆရာ" ယန်ဖန်း ခေါင်းညိတ်လိုက်သည်။

ဒါကြောင့်လည်း သူက ပြန်မတိုက်ခိုက်ဘဲ ကာကွယ်ရေးအစီအရင်ကိုပဲ ဖွင့်ထားခဲ့တာ။

မဟုတ်ရင် ယွီဟွာနတ်ဘုရားနန်းတော်ရဲ့ အင်အားကို လှမ်းခေါ်ပြီး အပြင်က ဝူရှန်းနတ်ဘုရားဂိုဏ်း ဟွမ်ယွမ်တာအိုသခင် ၃ ယောက်ကို အလွယ်တကူ ဖမ်းချုပ်လိုက်လို့ရနေပြီ။

........

လီချန် ခန္ဓာကိုယ်လှုပ်ရှားလိုက်ပြီး ဝူရှင်းစံအိမ်ကိစ္စကို ဆက်မစွက်ဖက်တော့ဘဲ ဝူရှင်းစံအိမ်မှ တိုက်ရိုက် ထွက်ခွာသွားသည်။ ၂၁ ခုမြောက်ဘုံအတွင်း လျင်မြန်စွာ ပျံသန်းသွားပြီးနောက်၊ ကျယ်ပြောလှသော တောင်တန်းဒေသတစ်ခုသို့ ရောက်ရှိသွားသည်။

ဤကျယ်ပြောလှသော တောင်တန်းဒေသ၏ ကောင်းကင်ယံတွင် မှေးမှိန်ပြီး ဝါးတားတား ဖြစ်နေသော အနက်ရောင် မျဉ်းကြောင်းတစ်ကြောင်းသည် အဝေးကြီးသို့ ဆန့်တန်းနေသည်။

ဒီနေရာက အထင်ရှားဆုံးဖြစ်သည်။

"ထင်တဲ့အတိုင်းပဲ... ဒီဟင်းလင်းပြင်အက်ကွဲကြောင်းတွေက လုံးဝ ပျောက်ကွယ်သွားတာ မဟုတ်ဘူး။ ဘုံကမ္ဘာအဆင့်မြင့်လေလေ ကြာချိန်ပိုရှည်လေလေပဲ..." လီချန် တစ်ကိုယ်တည်း ရေရွတ်လိုက်သည်။

ဟိုအောက်ပိုင်းဘုံတွေမှာပေါ်ခဲ့တဲ့ ဟင်းလင်းပြင်အက်ကွဲကြောင်းတွေက အများဆုံး ၃-၄ ရက်လောက်နဲ့ ပျောက်သွားတာ။

အလယ်ပိုင်းဘုံတွေရောက်တော့ ၁၀ ရက်၊ လဝက်လောက် ကြာလာတယ်။

အခု ၂၁ ခုမြောက်ဘုံက ဟင်းလင်းပြင်အက်ကွဲကြောင်းဆိုရင် တစ်လကျော်ကြာနေပြီ။

ဒါတင်မကသေးဘူး။ အထက်ပိုင်းဘုံတွေမှာလည်း ဟင်းလင်းပြင်အက်ကွဲကြောင်းတွေ စတင် ပေါ်လာနေပြီ။

ဒါကိုကြည့်ရင် ဟွေ့ယွမ်ကပ်ဘေးကို ဖြစ်စေတဲ့ ဟင်းလင်းပြင်အက်ကွဲကြောင်းတွေက အောက်ပိုင်းဘုံတွေကနေစတင်ပြီး အထက်ပိုင်းဘုံတွေဆီ တဖြည်းဖြည်း ကူးစက်လာနေတာဖြစ်မယ်။

၃၃ ဘုံ တစ်ခုလုံးမှာ ဟင်းလင်းပြင်အက်ကွဲကြောင်းတွေ ပေါ်လာတဲ့အချိန်ကျရင် ဟွေ့ယွမ်ကပ်ဘေးက ၃၃ ဘုံ တစ်ခုလုံးကို လွှမ်းခြုံသွားလိမ့်မယ်။

အဲဒီအချိန်ကျမှ ဟွေ့ယွမ်ကပ်ဘေးရဲ့ အစစ်အမှန် သက်ရောက်မှုတွေ ပေါ်လာလိမ့်မယ်။

ဒီတစ်ခေါက် ဝူရှန်းနတ်ဘုရားဂိုဏ်းက ဝူရှင်းစံအိမ်ကို ရုတ်တရက် ထတိုက်တာက တကယ်တော့ နိမိတ်လက္ခဏာတစ်ခုပဲ။

ပုံမှန်ဆိုရင် ဟွမ်ယွမ်တာအိုသခင်ရှိတဲ့ ဝူရှင်းစံအိမ်ကို ဝူရှန်းနတ်ဘုရားဂိုဏ်းက ဒီလောက် ပြတ်ပြတ်သားသား တိုက်ခိုက်မှာ မဟုတ်ဘူး။

ဝူရှန်းနတ်ဘုရားဂိုဏ်းမှာလည်း ဟွမ်ယွမ်တာအိုသခင်အဆင့်ပဲရှိတာလေ။

နောက်ကွယ်က ရွှေနတ်ဘုရားတွေရှိတယ် ဆိုပေမဲ့... ဒီလောက် ကိစ္စသေးသေးလေးအတွက်နဲ့ ရွှေနတ်ဘုရားတွေက ဝူရှန်းနတ်ဘုရားဂိုဏ်းအတွက် ဝင်ပါပေးပါ့မလား။

ဝူရှန်းနတ်ဘုရားဂိုဏ်း ပျက်စီးလုနီးပါးအန္တရာယ်ကြုံလာမှသာ နောက်ကွယ်က ရွှေနတ်ဘုရားတွေ ဝင်ပါလာနိုင်ချေ ရှိတာ။ ဒါတောင် သေချာတာမဟုတ်ဘူး... ရွှေနတ်ဘုရားတွေက သံယောဇဉ် ဘယ်လောက်ရှိလဲဆိုတဲ့အပေါ် မူတည်သေးတယ်။

ဒါပေမဲ့ ဟွေ့ယွမ်ကပ်ဘေးရောက်လာတော့ အခြေအနေတွေ ပြောင်းသွားပြီ။

အန္တရာယ်ကို ကြိုတင်ရှင်းလင်းထားဖို့အတွက် ဝူရှန်းနတ်ဘုရားဂိုဏ်းက ကြီးမားတဲ့စွန့်စားမှု ပြုပြီး ဝူရှင်းစံအိမ်ကို တိုက်ခိုက်တာက သဘာဝကျသွားပြီ။

ဟွေ့ယွမ်ကပ်ဘေးဆိုတာ ဖရိုဖရဲဖြစ်ခြင်းကို ကိုယ်စားပြုတယ်လေ။

"ဘုံကမ္ဘာအသီးသီးက ယွီဟွာနတ်ဘုရားနန်းတော် တပည့်တွေကို အတတ်နိုင်ဆုံး သိုသိုသိပ်သိပ် နေခိုင်းရတော့မယ်" လီချန် စိတ်ထဲတွင် တွေးလိုက်သည်။

ဒါပေမဲ့ မွေးရာပါဝိညာဉ်ပစ္စည်းလိုမျိုး အရင်းအမြစ်တွေ ရှာဖွေဖို့အတွက် ယွီဟွာနတ်ဘုရားနန်းတော် တပည့်တွေက လုံးဝပုန်းအောင်းနေလို့လည်း မဖြစ်ဘူး။

သူတစ်ယောက်တည်း ရှာရင် ဘယ်လောက်ရှာနိုင်မှာမို့လို့လဲ။

ဒီနှစ်တွေအတွင်း အခြေခံတည်ဆောက်ခြင်းဆေးလုံး လိုအပ်ချက်ကို ဖြည့်ဆည်းပေးနိုင်ခဲ့တာက ဘုံကမ္ဘာအသီးသီးကို ရောက်နေတဲ့ တပည့်တွေက မွေးရာပါဝိညာဉ်ပစ္စည်းတွေ ရှာဖွေပေးနိုင်ခဲ့လို့ပဲ။

လျှို့ဝှက်ရှန်ထျန်းဟွေ့နဲ့ ဟုန်ယွင်နတ်ဘုရားဂိုဏ်းကိုလည်း လုံးဝ အားကိုးထားလို့မရဘူး။ ဟွေ့ယွမ်ကပ်ဘေး ရောက်လာရင် ပိုပြီးတောင် အပြောင်းအလဲတွေ များလာဦးမယ်။

မွေးရာပါဝိညာဉ်ပစ္စည်းရနိုင်မယ့် လမ်းကြောင်းတွေကို တိုးချဲ့ထားမှရမယ်။

ဘာပဲဖြစ်ဖြစ် ဟွေ့ယွမ်ကပ်ဘေး အစောပိုင်းကာလမှာတော့ ယွီဟွာနတ်ဘုရားနန်းတော် တပည့်တွေအနေနဲ့ အင်မော်တယ်နန်းတော်ရဲ့ စောင့်ကြည့်ခြင်းကို လုံးဝမခံရအောင်နေရမယ်။

အလယ်ပိုင်းနဲ့ နောက်ပိုင်းကာလ ရောက်လို့ ၃၃ ဘုံ တစ်ခုလုံး ဖရိုဖရဲဖြစ်ပြီး တိုက်ပွဲတွေ ဖြစ်လာတဲ့အချိန်ကျရင်တော့ ယွီဟွာနတ်ဘုရားနန်းတော်က လှုပ်ရှားမှုကြီးကြီးမားမား လုပ်ရင်တောင် သိပ်ပြီး ထူးခြားတော့မှာ မဟုတ်ဘူး။

အချိန်ခေါင်းလောင်း လှိုဏ်ဂူကောင်းကင်ဘုံထဲ ပြန်ရောက်တာနဲ့ လီချန်က တပည့်တွေအားလုံးကို အမိန့်ပေးလိုက်သည်။ ကမ္ဘာအသီးသီးမှာရှိတဲ့ တပည့်တွေအနေနဲ့ အတတ်နိုင်ဆုံး သိုသိုသိပ်သိပ်နေကြဖို့၊ ဒေသခံအင်အားကြီးဂိုဏ်းတွေနဲ့ ပဋိပက္ခမဖြစ်အောင်နေကြဖို့ မှာကြားလိုက်သည်။

ဒါကြောင့် နောက်ဆက်တွဲ ဆယ်စုနှစ် အနည်းငယ်အတွင်း ပဋိပက္ခအနည်းငယ်ဖြစ်ပွားခဲ့သော်လည်း အားလုံးကို အတိုင်းအတာတစ်ခုအထိ ထိန်းချုပ်နိုင်ခဲ့သည်။

ဝူရှင်းစံအိမ်ဆိုလျှင်လည်း ဝူရှန်းနတ်ဘုရားဂိုဏ်းမှ ဟွမ်ယွမ်တာအိုသခင် ၃ ဦး တိုက်ခိုက်မှု မအောင်မြင်ဘဲ ပြန်လှည့်သွားရပြီးနောက်၊ ဝူရှင်းစံအိမ်၏အင်အားကို သိရှိသွားသလို ဝူရှင်းစံအိမ်ဘက်ကလည်း ဦးဆောင်ပြီး ဆွေးနွေးညှိနှိုင်းခဲ့သဖြင့် နောက်ဆုံးတွင် ပြေလည်မှုရရှိသွားခဲ့သည်။ ဝူရှင်းစံအိမ်က ဝူရှန်းနတ်ဘုရားဂိုဏ်းနှင့် မွေးရာပါဝိညာဉ်ပစ္စည်းကဲ့သို့သော အဆင့်မြင့် အရင်းအမြစ်များကို နတ်ဘုရားချီဖြင့် လဲလှယ်ခြင်းများပင် ပြုလုပ်ခဲ့သည်။

ဝူရှန်းနတ်ဘုရားဂိုဏ်းက ချက်ချင်း ကောက်ချက်ချလိုက်သည်မှာ ဝူရှင်းစံအိမ်၏ နောက်ကွယ်တွင်လည်း မပျက်သုဉ်းနိုင်သော ရွှေနတ်ဘုရား ကျောထောက်နောက်ခံရှိနိုင်သည်ဟူ၍ပင်။ မဟုတ်လျှင် ဝူရှင်းစံအိမ်က နတ်ဘုရားချီကို ဘယ်ကရမှာလဲ။

ဝူရှန်းနတ်ဘုရားဂိုဏ်းကိုယ်တိုင် နတ်ဘုရားချီ ရလမ်းရှိနေရင်တောင်မှ၊ နတ်ဘုရားချီကို သုံးပြီး ကုန်သွယ်မှုလုပ်ဖို့အထိတော့ မချမ်းသာဘူးလေ။

ဒါကြောင့် ဝူရှန်းနတ်ဘုရားဂိုဏ်းသည် ဝူရှင်းစံအိမ်ကို သတိထားနေရသလို၊ မဆင်မခြင်လည်း မလုပ်ရဲတော့ဘဲ ငြိမ်းချမ်းရေးယူလိုက်ရသည်။

နောက်ပိုင်း ဆယ်စုနှစ်တွေအတွင်း ဝူရှင်းစံအိမ်က အလွန်သိုသိုသိပ်သိပ်နေထိုင်ပြီး ဝူရှန်းနတ်ဘုရားဂိုဏ်းနဲ့ အကျိုးစီးပွားချင်း ပဋိပက္ခမဖြစ်သည့်အပြင် ပူးပေါင်းဆောင်ရွက်မှုတွေပါ ရှိလာသဖြင့် ဝူရှန်းနတ်ဘုရားဂိုဏ်း၏ သတိထားမှုလည်း လျော့နည်းသွားခဲ့သည်။

ဟွေ့ယွမ်ကပ်ဘေး၏လက္ခဏာများ ပိုမိုထင်ရှားလာသည်နှင့်အမျှ၊ နတ်ဘုရားဂိုဏ်းကြီးများ အချင်းချင်း ပဋိပက္ခများလည်း မကြာခဏ ဖြစ်ပွားလာသည်။

ဝူရှင်းစံအိမ်၏နမူနာကိုယူပြီး လီချန်သည် မဟာဗျူဟာကို ပြောင်းလဲလိုက်သည်။ ကမ္ဘာအသီးသီးရှိ ယွီဟွာနတ်ဘုရားနန်းတော် တပည့်များကို ဒေသခံနတ်ဘုရားဂိုဏ်းများနှင့် ဆက်သွယ်စေပြီး... နတ်ဘုရားချီကို အသုံးပြုကာ မွေးရာပါဝိညာဉ်ပစ္စည်းကဲ့သို့သော အဆင့်မြင့်အရင်းအမြစ်များကို လဲလှယ်သည့် ကုန်သွယ်မှုများ ပြုလုပ်စေလိုက်သည်။

ယခုအခါ ကောင်းကင်တာအိုနယ်ပယ်သည် အတော်လေး ကျယ်ဝန်းလာပြီဖြစ်၍ သူသည် နတ်ဘုရားချီ လိုအပ်ချက်ကို ဖြည့်ဆည်းပေးနိုင်ရုံသာမက အနည်းငယ် ထုတ်ရောင်းဖို့ပါ လုံလောက်နေပြီဖြစ်သည်။

ဒီနည်းအားဖြင့် လီချန်သည် အချိန်တိုအတွင်း မွေးရာပါဝိညာဉ်ပစ္စည်းအပါအဝင် အခြေခံတည်ဆောက်ခြင်းအရင်းအမြစ် အမြောက်အမြားကို ရရှိလိုက်သည်။

သေချာတာကတော့ ဒီလိုကုန်သွယ်မှုမျိုးကို ရေရှည်လုပ်လို့မရဘူး။ မဟုတ်ရင် အင်မော်တယ်နန်းတော်ရဲ့ မျက်စိကျတာ ခံရလိမ့်မယ်။

ရှားပါးလှတဲ့ နတ်ဘုရားချီတွေက ကမ္ဘာအသီးသီးမှာ ရုတ်တရက် ပျံ့နှံ့လာတာကို သတိမထားမိဘဲ ဘယ်နေမလဲ။

တကယ်တမ်းတွင် အင်မော်တယ်နန်းတော်က သတိထားမိနေပြီဖြစ်သည်။

ကုန်သွယ်မှုတွေကို ဘယ်လောက်ပဲ လျှို့ဝှက်ထားပါစေ၊ အတိုင်းအတာ ကျယ်ပြန့်လာပြီး အကြိမ်ရေ များလာရင် သဲလွန်စတွေ ပေါ်လာစမြဲပဲ။

ကံကောင်းတာက လီချန် အချိန်မီ လက်ရှောင်လိုက်ခြင်းပင်။ အရင်းအမြစ်အမြောက်အမြားရရှိပြီးတာနဲ့ တပည့်တွေကို အချိန်ခေါင်းလောင်း လှိုဏ်ဂူကောင်းကင်ဘုံထဲ ပြန်ခေါ်လိုက်ပြီး လူလုံးမပြခိုင်းတော့ဘူး။ ဒါကြောင့် အင်မော်တယ်နန်းတော်ဘက်က သဲလွန်စ ရှာမရတော့ဘဲ၊ အချိန်ကြာလာတော့ အမှုပိတ်လိုက်ရသည်။

......

အင်မော်တယ်နန်းတော်။

ဝမ်ရှန်း ရတနာခန်းမဆောင်တွင် အစည်းအဝေးတစ်ခု ကျင်းပနေသည်။ မပျက်သုဉ်းနိုင်သော နတ်ဘုရားဂိုဏ်းကြီး ၁၀ ခုကျော်မှ ရွှေနတ်ဘုရားများ စုဝေးကာ ဟွေ့ယွမ်ကပ်ဘေးကို မည်သို့ ရင်ဆိုင်မည်နည်းဆိုသည်ကို ဆွေးနွေးနေကြသည်။

ဟွေ့ယွမ်ကပ်ဘေး၏ နိမိတ်လက္ခဏာများ ပိုမို ထင်ရှားလာပြီဖြစ်ရာ၊ နတ်ဘုရားဂိုဏ်းကြီးများ အားလုံး အထူးအလေးထားနေကြသည်။

အစည်းအဝေးကို ဦးစီးသူမှာ အင်မော်တယ်နန်းတော်သခင်ဖြစ်သည်။

သို့သော် အင်မော်တယ်နန်းတော်သခင်ဆိုသည်မှာ အဆောင်အယောင် သက်သက်သာဖြစ်ပြီး၊ အာဏာအစစ်အမှန်မရှိပေ။

အဘယ်ကြောင့်ဆိုသော် အင်မော်တယ်နန်းတော်၏ အာဏာစက်ကို အမှန်တကယ် ချုပ်ကိုင်ထားသူများမှာ အထူးနတ်ဘုရားဂိုဏ်းကြီး ၄ ခု ဖြစ်ကြသည်။ ထိုဂိုဏ်းကြီး ၄ ခုတွင် မပျက်သုဉ်းနိုင်သော ရွှေနတ်ဘုရား အရေအတွက် အလွန်များပြားပြီး၊ အထူးရွှေနတ်ဘုရားများလည်း မနည်းမနော ရှိကြသည်။

ထို့အပြင် ပိုမို ကြောက်မက်ဖွယ်ကောင်းသော ရှန်းကျွင်း(နတ်မင်းကြီး)အဆင့်များပင် ရှိနေကြသည်။

ရှန်းကျွင်း ဆိုသည်မှာလည်း အထူးရွှေနတ်ဘုရားအဆင့်တွင် ပါဝင်သော်လည်း၊ လောကသစ်ပင် နိယာမ အဆင့် ၅ နှင့်အထက် ရောက်ရှိနေသော ကြောက်မက်ဖွယ်ပုဂ္ဂိုလ်များဖြစ်ကြသည်။

အထူးနတ်ဘုရားဂိုဏ်းကြီး ၄ ခုသည် ရှန်းကျွင်းအဆင့် ပုဂ္ဂိုလ်များရှိနေသောကြောင့်သာ အင်မော်တယ်နန်းတော်ကို အမှန်တကယ် ထိန်းချုပ်ထားနိုင်ခြင်းဖြစ်သည်။

အခြားသော နတ်ဘုရားဂိုဏ်းကြီးများမှာမူ အထူးရွှေနတ်ဘုရား ၃-၅ ပါးလောက် ရှိလျှင်ပင် အတော်ဟုတ်နေပြီ။

အညံ့ဆုံး အဆင့် ၁ နတ်ဘုရားဂိုဏ်းများဆိုလျှင် အထူးရွှေနတ်ဘုရား တစ်ပါးမှမရှိဘဲ နိယာမနယ်ပယ် ပိုင်ဆိုင်သော အဆင့် ၂ ရွှေနတ်ဘုရားများလောက်သာရှိကြသည်။

မပျက်သုဉ်းနိုင်သော နတ်ဘုရားဂိုဏ်း အဆင့် ရောက်နေရင်တောင်မှ အဆင့်အတန်း ခွဲခြားမှုက တင်းကျပ်နေဆဲပင်။

ထို့ကြောင့် အင်မော်တယ်နန်းတော်၏ ဖွဲ့စည်းပုံမှာ အထူးနတ်ဘုရားဂိုဏ်းကြီး ၄ ခုကို အဓိကထားပြီး အရပ်လေးမျက်နှာ နတ်မင်းကြီးနန်းတော်များကို တည်ထောင်ထားသည်။ ထို့နောက် အင်အားကြီး နတ်ဘုရားဂိုဏ်း ၁၂ ခုကို ကိုယ်စားပြုသော ရွှေနတ်ဘုရား ၁၂ ပါး ခန်းမဆောင်များ ရှိကြသည်။

ဒီနတ်ဘုရားဂိုဏ်း ၁၆ ခုသည် အင်မော်တယ်နန်းတော်၏အာဏာကို အမှန်တကယ် ချုပ်ကိုင်ထားသူများ ဖြစ်ကြသည်။

ကျန်သော နတ်ဘုရားဂိုဏ်းများသည်... အရေအတွက် မနည်းသော်လည်း အင်အားမရှိသဖြင့် ဤကဲ့သို့သော အစည်းအဝေးများသို့ တက်ရောက်ခွင့်ပင် မရကြပေ။

သို့သော် ခြွင်းချက်တော့ရှိသည်။

ဥပမာအားဖြင့် လက်ရှိအင်မော်တယ်နန်းတော်သခင်သည် သာမန် နတ်ဘုရားဂိုဏ်းတစ်ခုမှ လာသူဖြစ်သည်။

ထိုဂိုဏ်းတွင် သာမန် ရွှေနတ်ဘုရား ၂-၃ ပါးလောက်သာရှိပြီး၊ အစွမ်းအထက်ဆုံးမှာ လောကသစ်ပင် အဆင့် ၂ သာရှိသော ဤအင်မော်တယ်နန်းတော်သခင်ပင် ဖြစ်သည်။

ဒါက အင်မော်တယ်နန်းတော်၏ ထုံးတမ်းစဉ်လာတစ်ခုလည်း ဖြစ်သည်။

အင်မော်တယ်နန်းတော်သခင်နေရာကို အလှည့်ကျ ရွေးချယ်ရာတွင် သာမန်နတ်ဘုရားဂိုဏ်းများထဲမှသာ ရွေးချယ်လေ့ရှိသည်။

အကြောင်းရင်းက ရှင်းပါသည်။ အင်အားကြီး နတ်ဘုရားဂိုဏ်းတစ်ခုခုက အခွင့်ကောင်းယူပြီး အာဏာသိမ်းကာ လက်ရှိအင်မော်တယ်နန်းတော်ဖွဲ့စည်းပုံကို ပြောင်းလဲပစ်မည်ကို ကာကွယ်ရန်ဖြစ်သည်။

သာမန်နတ်ဘုရားဂိုဏ်းက လူတစ်ယောက် အင်မော်တယ်နန်းတော်သခင်ဖြစ်လာတော့ ရုပ်ပြအနေနဲ့ ကြိုးဆွဲရုပ်သေးအရုပ်လေးအနေနဲ့ပဲ ထားလို့ရတာပေါ့... အင်အားစု အသီးသီးကြားမှာ ချိန်ခွင်လျှာ ညီမျှအောင် လုပ်ပေးတဲ့ သဘော။

ဒါပေမဲ့ သာမန် နတ်ဘုရားဂိုဏ်းတွေကိုလည်း ပါဝင်ပတ်သက်ခွင့်ပေးထားသလို ဖြစ်စေတယ်။

အင်မော်တယ်နန်းတော်သခင် ဝမ်ရုံရွှေနတ်ဘုရားသည် ပလ္လင်ပေါ်တွင် ထိုင်နေပြီး နှာခေါင်းကိုကြည့်၊ နှာခေါင်းက ရင်ဘတ်ကိုကြည့် (တရားမှတ်နေသလို) ဖြင့်၊ အောက်မှ ရွှေနတ်ဘုရားများ၏ ဆွေးနွေးငြင်းခုံမှုများကို စိတ်မဝင်စားသကဲ့သို့ နေနေသည်။

သူ့အတွက်တော့ ဒီအစည်းအဝေးကိုတက်ရောက်တာ၊ ဦးစီးတာက ဟန်ပြသက်သက်ပါပဲ။

သူ့သဘောဆန္ဒကိုထုတ်ပြောလိုက်ရင် စည်းကျော်ရာ ရောက်သွားလိမ့်မယ်။

ဘာပဲပြောပြော သူက ဒီအင်မော်တယ်နန်းတော်သခင်နေရာကို ရထားတာဆိုတော့ အကျိုးကျေးဇူးတချို့တော့ ရှိပါသေးတယ်။ အနည်းဆုံးတော့ သူ့ဂိုဏ်းအတွက် မပျက်သုဉ်းနိုင်သော ရွှေလိုမျိုး အဆင့်မြင့် အရင်းအမြစ် ခွဲတမ်းတွေကို ပိုရအောင် လုပ်ပေးနိုင်တာပေါ့။

"အရင်တုန်းက အလယ်ပိုင်းဘုံတွေနဲ့ အောက်ပိုင်းဘုံတွေက ကမ္ဘာအသီးသီးမှာ နတ်ဘုရားချီ အရောင်းအဝယ်တွေ အများကြီးဖြစ်ခဲ့တယ်။ အခုထိ ဇာစ်မြစ်ကို ရှာမတွေ့သေးဘူး... ဒါက အလားအလာအရမ်းကြီးတဲ့ ခြိမ်းခြောက်မှုတစ်ခုပဲ" တစ်ယောက်က ရုတ်တရက် စကားလမ်းကြောင်း လွှဲလိုက်သည်။

"အဲဒါ အရင်က စုံစမ်းပြီးပြီ မဟုတ်ဘူးလား။ ရှာမတွေ့မှတော့ ဘာတတ်နိုင်မှာလဲ"

"ဒီကိစ္စက တော်တော်ဒုက္ခပေးမယ့်ပုံပဲ။ အခု ဟွေ့ယွမ်ကပ်ဘေး ရောက်လာပြီဆိုတော့ ပြည်ပရန် မနှိမ်နင်းခင် ပြည်တွင်းရန် အရင်ငြိမ်းအောင်လုပ်ရမယ်" အခြားသူများက ဝင်ပြောကြသည်။

"တာအိုရောင်းရင်းလင်းချီ... ခင်ဗျား ဒီကိစ္စကို ရုတ်တရက် ထပြောတာ တစ်ခုခုတွေ့ထားလို့လား" နောက်တစ်ယောက်က မေးလိုက်သည်။

စကားစလိုက်သူ လင်းချီ ရွှေနတ်ဘုရားသည် အင်အားကြီးဂိုဏ်း ၁၂ ဂိုဏ်းထဲမှ တစ်ခုဖြစ်သော တာ့လုနတ်ဘုရားဂိုဏ်းမှ ဖြစ်သည်။

"ဟုတ်တယ်။ ငါတို့ တာ့လုနတ်ဘုရားဂိုဏ်းက သတင်းတစ်ခုရထားတယ်။ အောက်ပိုင်းဘုံ ဖြစ်တဲ့ ၁၀ ခုမြောက်ဘုံမှာ ယွီဟွာနတ်ဘုရားဂိုဏ်းဆိုတဲ့ ဂိုဏ်းတစ်ခု ရှိတယ်။ အဲဒီဂိုဏ်းမှာ ရုတ်တရက် ရှေးဟောင်းကျင့်ကြံသူတွေ အများကြီး ပေါ်ထွက်လာတယ်။ အခြေခံတည်ဆောက်ခြင်းအဆင့်၊ အမြုတေဖွဲ့စည်းခြင်းအဆင့်တင်မကဘဲ ပိုမြင့်တဲ့အဆင့်တွေ၊ တာအိုပေါင်းစည်းခြင်းအဆင့် ကျင့်ကြံသူတွေတောင် ပါတယ်..."

လင်းချီ ရွှေနတ်ဘုရားက လေးနက်စွာ ပြောလိုက်သည်။ "တာအိုရောင်းရင်းယွင်ရှူး... ဒီကိစ္စကို ခင်ဗျား အသိဆုံးဖြစ်မှာပါ။ ခင်ဗျားပဲ ရှင်းပြလိုက်ပါတော့"

လင်းချီ ရည်ညွှန်းလိုက်သော အခြားရွှေနတ်ဘုရားတစ်ပါးမှာ ဟုန်ယွင်နတ်ဘုရားဂိုဏ်းမှ သက်လတ်ပိုင်း အမျိုးသမီးကြီးတစ်ဦးဖြစ်သည်။ သူမ မျက်မှောင်ကြုတ်လိုက်သည်။ ဒီကိစ္စကို တာ့လုနတ်ဘုရားဂိုဏ်းက သိသွားပြီဆိုတော့ ဟန်ဆောင်နေလို့ မရတော့ဘူး။

ဟုန်ယွင်နတ်ဘုရားဂိုဏ်းက တာ့လုနတ်ဘုရားဂိုဏ်းနဲ့ ဗြောင်အတိုက်အခံလုပ်ချင်တယ်ဆိုရင်တော့ တစ်မျိုးပေါ့။

"တာအိုရောင်းရင်းလင်းချီ ပြောသလိုပါပဲ။ ယွီဟွာနတ်ဘုရားဂိုဏ်းမှာ တာအိုပေါင်းစည်းခြင်းအဆင့် ကျင့်ကြံသူတွေရှိနေတာ အမှန်ပါပဲ။ သူတို့က ရှေးဟောင်းကျင့်ကြံသူတွေကို ပျိုးထောင်မယ့်နည်းလမ်း ရထားပုံရတယ်" ယွင်ရှူး ရွှေနတ်ဘုရားမက ခေါင်းညိတ်ပြီး ဝန်ခံလိုက်သည်။

"တာအိုရောင်းရင်းယွင်ရှူးက ဘယ်လိုလုပ်သိတာလဲ။ ပြီးတော့ ရှေးဟောင်းကျင့်ကြံနည်းအရ အခြေခံတည်ဆောက်ခြင်းအဆင့်က ပြဿနာမဟုတ်ပေမဲ့... အမြုတေဖွဲ့စည်းခြင်းအဆင့် ရောက်ဖို့အတွက် နိယာမမျိုးစေ့ အညှောင့်ပေါက်ဖို့ လိုတယ်။ အဲဒါအတွက် နတ်ဘုရားချီ လိုအပ်တယ်လေ... ၁၀ ခုမြောက်ဘုံက ဂိုဏ်းတစ်ခုက နတ်ဘုရားချီ ဘယ်ကရတာလဲ" ရွှေနတ်ဘုရားတစ်ပါးက စူးစမ်းမေးမြန်းလိုက်သည်။

"အဲဒါကလည်း ကျွန်တော် ဒီကိစ္စကို ထည့်ပြောရတဲ့ အဓိကအချက်ပဲ" တာ့လုနတ်ဘုရားဂိုဏ်းမှ လင်းချီက ဝင်ပြောလိုက်သည်။ "အရင်တုန်းက ဘုံကမ္ဘာအသီးသီးမှာ ပေါ်ပေါက်ခဲ့တဲ့ နတ်ဘုရားချီ အရောင်းအဝယ်တွေရဲ့ ဇာစ်မြစ်က ဒီယွီဟွာနတ်ဘုရားဂိုဏ်းနဲ့ ဆက်စပ်နေမယ်လို့ ကျွန်တော် သံသယရှိတယ်။ ကျွန်တော် ရထားတဲ့ သတင်းအရဆိုရင် ယွီဟွာနတ်ဘုရားဂိုဏ်းက တာအိုပေါင်းစည်းခြင်းအဆင့် ကျင့်ကြံသူဟာ အထက်ပိုင်းဘုံတွေက လေလံပွဲတွေမှာ မွေးရာပါဝိညာဉ်ပစ္စည်းတွေ အများကြီး ဝယ်ယူခဲ့ဖူးတယ်။ အဲဒီမှာ နတ်ဘုရားချီတွေ သုံးခဲ့တယ်..."

တာ့လုနတ်ဘုရားဂိုဏ်းလို အင်အားကြီး ဂိုဏ်းမျိုးက စုံစမ်းချင်တယ်ဆိုရင် သဲလွန်စ ရှာတွေ့ဖို့က လွယ်လွယ်လေးပါ။

တာ့လုနတ်ဘုရားဂိုဏ်းက တိုက်ဆိုင်စွာနဲ့ ဟုန်ယွင်နတ်ဘုရားဂိုဏ်း နဲ့ ယွီဟွာနတ်ဘုရားဂိုဏ်း တို့ရဲ့ ပူးပေါင်းဆောင်ရွက်မှုကို တွေ့ရှိသွားခဲ့ပြီး၊ အဲဒီကနေတဆင့် ဆက်စုံစမ်းလိုက်ရာ ပိုပြီး တုန်လှုပ်စရာကောင်းတဲ့ သတင်းတွေကို ရရှိခဲ့တာဖြစ်သည်။

လူအများအပြားက ဟုန်ယွင်နတ်ဘုရားဂိုဏ်းမှ ယွင်ရှူးကို ကြည့်ပြီး တွေးတောနေကြသည်။ ဟုန်ယွင်နတ်ဘုရားဂိုဏ်း နဲ့ ယွီဟွာနတ်ဘုရားဂိုဏ်းကြားမှာ နက်ရှိုင်းတဲ့ ပတ်သက်မှုတစ်ခုခုရှိနေမယ်လို့ သူတို့ ခန့်မှန်းမိကြသည်။

"ဒါကြောင့် ကျွန်တော် သံသယရှိတာက ဒီယွီဟွာနတ်ဘုရားဂိုဏ်းရဲ့ နောက်ကွယ်မှာ... အင်အားကြီးမားတဲ့ လက်မည်းကြီးတစ်ခုရှိနေပြီး၊ ကျွန်တော်တို့ ၃၃ ဘုံ အတွင်းမှာ အကွက်ချ စီစဉ်နေတာ ဖြစ်မယ်။ ဒီတစ်ခေါက် ဟွေ့ယွမ်ကပ်ဘေး အတွက် ကြိုတင်ပြင်ဆင်နေတာ ဖြစ်နိုင်တယ်။ ကျွန်တော်တို့ ဒီအခွင့်အရေးကို သုံးပြီး အဲဒီလက်မည်းကြီးကို ဆွဲထုတ်ရမယ်" လင်းချီက လေးနက်စွာ ပြောလိုက်သည်။

တကယ်လို့ သာမန်ယွီဟွာနတ်ဘုရားဂိုဏ်းသက်သက်ဆိုရင် ဒီနေရာမှာ ဆွေးနွေးစရာတောင် မလိုဘူး။ တာ့လုနတ်ဘုရားဂိုဏ်း နဲ့ ဟုန်ယွင်နတ်ဘုရားဂိုဏ်း နှစ်ခုပေါင်းပြီး ဖြေရှင်းလိုက်လို့ ရတယ်။

ဒါပေမဲ့ ဒါက ဟွေ့ယွမ်ကပ်ဘေး နဲ့ ပတ်သက်နေတာမို့ တာ့လုနတ်ဘုရားဂိုဏ်းက ခေါင်းမခံရဲဘဲ အင်မော်တယ်နန်းတော်ရဲ့အင်အားကို အသုံးပြုချင်နေတာပင်။

"ရှေးဟောင်းကျင့်ကြံနည်းက ကျွန်တော်တို့ ၃၃ ဘုံမှာ အမြစ်တွယ်ဖို့ ခက်ခဲတယ်။ ဟိုလျှို့ဝှက်ရှန်ထျန်းဟွေ့တစ်ခုပဲ တင်းခံနေတာ... လျှို့ဝှက်ရှန်ထျန်းဟွေ့ရဲ့ ထျန်းဝိုက်ထျန်းက ကျီမိသားစုနဲ့ ပတ်သက်ဆက်နွယ်မှုတွေ ရှိနေတယ်။ ဒီတစ်ခေါက် ယွီဟွာနတ်ဘုရားဂိုဏ်းမှာ ရှေးဟောင်းကျင့်ကြံသူတွေ အများကြီးပေါ်လာတာကိုကြည့်ရင်..."

လင်းချီက ဆက်ပြောလိုက်သည်။ "ကျီမိသားစုက ကျွန်တော်တို့ ၃၃ ဘုံကို တရားဝင် ဝင်ရောက်စွက်ဖက်ဖို့ ကြံစည်နေတာများလားလို့ ကျွန်တော် သံသယဖြစ်မိတယ်"

ဒီစကားကြောင့် လူတိုင်း၏မျက်နှာများ လေးနက်သွားကြသည်။

ကျီမိသားစုဆိုတာ နောက်ခံရာဇဝင် အရမ်းကြီးလွန်းတယ်။

ဟွေ့ယွမ်ကပ်ဘေး ပေါင်းများစွာတိုင်အောင် လူလုံးမပြခဲ့ပေမဲ့ သူတို့ရဲ့ ဂုဏ်သတင်းက ကြီးမားနေဆဲပဲ။

ဘာပဲပြောပြော သူတို့က ရှန်ရှောင်မသေမျိုးဧကရာဇ်ဆီကနေ ဆင်းသက်လာတဲ့ ရှေးဟောင်း နတ်ဘုရားမျိုးနွယ်စုကြီးလေ။ ပျက်စီးသွားတဲ့ ရှန်ထျန်းနတ်ဘုရားဂိုဏ်းနဲ့ယှဉ်ရင် သူတို့က ပိုပြီး တရားဝင်တဲ့ မျိုးဆက်တွေပဲ။

***