ပြီးဆုံးခြင်း

လီချန်သည် သိုလှောင်အိတ်တစ်ခုချင်းစီကို စစ်ဆေးကြည့်ရှုလိုက်ရာ အတွင်းမှ မကောင်းဆိုးဝါးမျိုးစေ့အများအပြားကို ရှာဖွေတွေ့ရှိခဲ့၏။

အရည်အသွေး သိပ်မကောင်းလှသော်လည်း အရေအတွက် များပြားလှသည်။

ထို့အပြင် သူ တွေ့ရှိရသည်မှာ ထိုတာအိုပေါင်းစည်းခြင်းအဆင့် ကျင့်ကြံသူ လေးဦး၏ သိုလှောင်အိတ်များထဲတွင် ပစ္စည်းကောင်းများ မနည်းလှပေ။

တာအိုအဆင့်ကိရိယာချည်းပင် စုစုပေါင်း ဆယ်ဂဏန်းကျော်ရှိ၏။

အရေးကြီးဆုံးမှာ မပျက်သုဉ်းနိုင်သော ရွှေလည်း ပါဝင်နေသေး၏...

သိုလှောင်အိတ် လေးလုံးစလုံးတွင် ပါဝင်နေသည်။

တစ်ခုစီတိုင်းတွင် ကီလိုဂရမ် နှစ်ရာ၊သုံးရာခန့်မျှသော မပျက်သုဉ်းနိုင်သောရွှေများ ပါဝင်နေ၏။

လေးခု ပေါင်းလိုက်လျှင် တစ်တန်နီးပါးရှိသည်။

"ဒါက အရမ်းချမ်းသာလွန်းနေပြီ။ သူတို့ နတ်ဘုရားမိစ္ဆာစစ်မြေပြင်ထဲ ဝင်လာတာ ဒီလောက်များတဲ့ မပျက်သုဉ်းနိုင်သော ရွှေတွေကို သယ်လာကြတာ သူတို့က နတ်ဘုရားမိစ္ဆာစစ်မြေပြင်ထဲမှာ တိုက်ရိုက် မပျက်သုဉ်းနိုင်သော ရွှေနတ်ဘုရားအဆင့်ကို ထိုးဖောက်ဖို့ ကြံစည်ထားတာများလား။"

လီချန် ရေရွတ်လိုက်၏။

ဘယ်သူကများ ဒီလောက်များပြားတဲ့ပစ္စည်းကောင်းတွေကိုသယ်ပြီး နတ်ဘုရားမိစ္ဆာစစ်မြေပြင် အတွင်းကို ဝင်ရောက်မှာမလို့လဲ။

ဖြစ်နိုင်သည်မှာ လေးဦးစလုံး ယုံကြည်မှု တော်တော်လေးရှိပြီး၊ သူတို့ အန္တရာယ်ကြုံတွေ့ရမည်ကို လုံးဝ မကြောက်ရွံ့ကြခြင်းဖြစ်ပေမည်။

မည်သို့ပင်ဖြစ်စေ သူတို့၏ နောက်ခံအင်အားမှာ သာမန် မဟုတ်ဘဲ တာအိုပေါင်းစည်းခြင်း အဆင့် တာအိုသခင်ကြီးများဖြစ်ကြရာ... ဤနတ်ဘုရားမိစ္ဆာစစ်မြေပြင်ပေါ်တွင် အန္တရာယ် ကြုံတွေ့နိုင်မည်ကို စဉ်းစား၍ မရနိုင်လောက်ပေ။

ကံမကောင်းစွာဖြင့်၊ သူတို့ လီချန်နှင့် ကြုံတွေ့ခဲ့ရပြီး ကံဆိုးမိုးမှောင်ကျခဲ့ရခြင်းဖြစ်သည်။

ဤမျှ များပြားသော ပစ္စည်းကောင်းများသည် လီချန်အတွက် အချောင်ဖြစ်သွားခဲ့သည်။

"ဒီတစ်ခေါက်တော့ တကယ်အမြတ်ကြီးရပြီ။"

လီချန် ကျေနပ်ပီတိ ဖြစ်နေ၏။

ထို့နောက် သူသည် မကောင်းဆိုးဝါးမျိုးစေ့များကို စတင် စုပ်ယူလေတော့သည်။

.....

မိစ္ဆာမကောင်းဆိုးဝါးချောက်နက်အပြင်ဘက်။

အင်အားကြီးမားသော အငွေ့အသက် ဆယ်ဂဏန်းကျော်သည် အရပ်မျက်နှာအသီးသီးမှ ရုတ်တရက် ထိုးဖောက် ဝင်ရောက်လာကြ၏။

အားလုံးမှာ မပျက်သုဉ်းနိုင်သော ရွှေနတ်ဘုရားများဖြစ်ကြသည်။

ထို့အပြင်၊ ဦးဆောင်သူ လေးဦး၏ အငွေ့အသက်မှာ ချောက်နက်ကြီးကဲ့သို့ နက်ရှိုင်းပြီး၊ မျက်နှာထားများမှာလည်း အေးစက်လေးနက်နေကြ၏။

"သောက်ကျိုးနည်း၊ ဘယ်သူက ငါ့သမီးကို သတ်လိုက်တာလဲ။"

စကားပြောလိုက်သူမှာ အရပ်ရှည်ပြီး ကိုယ်လုံးကြီးမားကာ မုတ်ဆိတ်မွေးအနက်ရောင်နှင့် အဘိုးအိုတစ်ဦးဖြစ်ပြီး တစ်ကိုယ်လုံး ကြမ်းတမ်းသော အငွေ့အသက်များ ပျံ့နှံ့နေကာ၊ အလွန်အမင်း ဒေါသထွက်နေပုံရ၏။

သူသည် ယွဲ့ကျီ၏ ဖခင်ဖြစ်ပြီး၊ ရှေးဟောင်းမိစ္ဆာဂိုဏ်း၏ အလွန်အရေးပါအရာရောက်သော အထူးမပျက်သုဉ်းနိုင်သော ရွှေနတ်ဘုရားတစ်ပါးလည်းဖြစ်သည်။

သမီးဖြစ်သူ ကျဆုံးသွားကြောင်း သိရှိလိုက်ရသည်နှင့် ချက်ချင်းပင် နတ်ဘုရားမိစ္ဆာစစ်မြေပြင်သို့ ရောက်ရှိလာခဲ့ခြင်းဖြစ်သည်။

"မင်းတို့ အင်မော်တယ်နန်းတော်က လုပ်လိုက်တာ မဟုတ်ဘူးလား။"

ရုတ်တရက်၊ မုတ်ဆိတ်မွေးအနက်ရောင်နှင့် အဘိုးအိုသည် မျက်နှာချင်းဆိုင်မှ အင်မော်တယ်နန်းတော်၏ မပျက်သုဉ်းနိုင်သော ရွှေနတ်ဘုရားကိုကြည့်ကာ ဒေါသတကြီး မေးလိုက်၏။

"မိစ္ဆာအိုကြီးယန်၊ ငါ့ရဲ့ တပည့်လည်း ကျဆုံးသွားပြီကွ။ ငါတောင် မင်းတို့ ရှေးဟောင်းမိစ္ဆာဂိုဏ်း ကလုပ်တာလို့ မပြောရသေးဘူး။"

မျက်နှာချင်းဆိုင်မှ လျှော်အဝတ်အစား ဝတ်ဆင်ထားသော ပိန်ပါးသည့် အဘိုးအိုတစ်ဦးက အေးစက်စွာ ပြောလိုက်၏။

"တော်ကြပါတော့၊ အခု အရေးအကြီးဆုံးက အမှန်တရားကို စုံစမ်းစစ်ဆေးဖို့ပဲ။"

အခြားသော ငှက်မွေးသရဖူဆောင်းထားသည့် စာပေပညာရှင်ပုံစံ လူလတ်ပိုင်းအရွယ် အမျိုးသားတစ်ဦးလည်းရှိသေးသည်။

သူသည် တာလုနတ်ဘုရားဂိုဏ်း၏ အထူးမပျက်သုဉ်းနိုင်သော ရွှေနတ်ဘုရား နှစ်ပါးထဲမှ တစ်ပါး ဖြစ်ပြီး၊ အမူအရာတည်ငြိမ်နေသော်လည်း၊ လက်တွေ့တွင် ရင်ထဲ၌ အေးစက်နေ၏၊ သူသည် ဤတပည့်အပေါ်တွင် မျှော်လင့်ချက်များစွာ ပုံအောထားခဲ့သည်။

သူ သတ်မှတ်ထားသော တစ်ဦးတည်းသော အမွေဆက်ခံသူလည်းဖြစ်၏။

မည်သို့ပင်ဖြစ်စေ သူသည် ဤတစ်ကြိမ် ဟွေ့ယွမ်အတိဒုက္ခကို ကျော်ဖြတ်နိုင်ရန် ခက်ခဲလှသည်။

အထူးမပျက်သုဉ်းနိုင်သော ရွှေနတ်ဘုရားဖြစ်ပြီး အတိဒုက္ခကို အကြိမ်များစွာ ကျော်ဖြတ်အောင်မြင်ခဲ့သော်လည်း အကန့်အသတ် ရှိနေသေး၏။

နေရာ၌ရှိနေသော လေးဦး... လက်တွေ့တွင် အားလုံး အလားတူအခြေအနေမျိုးရှိနေကြသဖြင့် အမွေဆက်ခံသူကို ပျိုးထောင်ရန် ရွေးချယ်ကြပြီး ထိုမှတစ်ဆင့် အတိဒုက္ခကျော်ဖြတ်ရာတွင် ကျရှုံးမသွားမီ အထူးမပျက်သုဉ်းနိုင်သော ရွှေနတ်ဘုရား အသစ်တစ်ပါးကို ပျိုးထောင်ပေးနိုင်ရန် ရည်ရွယ်ကြခြင်းဖြစ်သည်။

"ဘယ်လို စုံစမ်းမလဲ။ ဒီနေရာက မိစ္ဆာမကောင်းဆိုးဝါးချောက်နက်လေ။ ဘာခြေရာလက်ရာမှ ကျန်ခဲ့မှာ မဟုတ်ဘူး..."

စကားပြောလိုက်သူမှာ အခြားသော ရှေးဟောင်းမိစ္ဆာဂိုဏ်း၏ အထူးမပျက်သုဉ်းနိုင်သော ရွှေနတ်ဘုရားတစ်ပါးဖြစ်ပြီး ဝဖြိုးသော အဘိုးအိုတစ်ဦးဖြစ်ကာ မျက်လုံးများ သေးငယ်နေသော်လည်း၊ အလွန်ထူးဆန်းသည်မှာ ဤဝဖြိုးသောအဘိုးအို၏ ကျောဘက်တွင် တတိယမြောက် လက်တစ်ဖက် ပေါက်နေခြင်းဖြစ်၏။

မဟုတ်သေးဘူး၊ လက် မဟုတ်ဘဲ၊ ခြေသည်းလက်သည်းနှင့် ပိုတူသည်။

နေရာ၌ရှိနေသောလူတိုင်း တိတ်ဆိတ်သွားကြ၏။

ဟုတ်သားပဲ။

မိစ္ဆာမကောင်းဆိုးဝါးချောက်နက်။

မိစ္ဆာမကောင်းဆိုးဝါးဝိညာဉ် မွေးဖွားရာ နေရာ။

အလွန် ထူးခြားလှ၏။

သို့သော် တာအိုပေါင်းစည်းခြင်းအဆင့် ကျင့်ကြံသူ လေးဦးစလုံး ဤနေရာတွင် တပြိုင်နက်တည်း ကျဆုံးသွားလိမ့်မည်ဟု မည်သူက ထင်မှတ်ထားမှာလဲ။

"သက်ဆိုင်ရာ နတ်ဘုရားမိစ္ဆာစစ်မြေပြင် ဝင်ပေါက်တွေကို စောင့်ကြပ်ပြီး၊ အသေးစိတ်စစ်ဆေးမှုတွေပြုလုပ်ရုံပဲရှိတော့တယ်။ တစ်ယောက်ယောက်က လက်စလက်နပြခဲ့တယ်ဆိုရင် သေချာပေါက် သဲလွန်စကျန်ခဲ့မှာပဲ။"

တစ်စုံတစ်ယောက်က ပြောလိုက်၏။

"တာအိုပေါင်းစည်းခြင်းအဆင့် လေးယောက်ကို သတ်ဖြတ်ဖို့ဆိုတာ သာမန် မပျက်သုဉ်းနိုင်သော ရွှေနတ်ဘုရားတောင်မှ လုပ်နိုင်ချင်မှလုပ်နိုင်မှာ။"

လက်သုံးဖက်နှင့် ဝဖြိုးသော မိစ္ဆာကျင့်ကြံသူ အဘိုးအိုက ခေါင်းခါလျက် ပြောလိုက်သည် "ဒီကိစ္စက ရိုးရှင်းမှာ မဟုတ်ဘူး။ ငါ သံသယဝင်မိတာက နတ်ဘုရားမိစ္ဆာစစ်မြေပြင်ထဲမှာ တတိယ အင်အားစုတစ်စု ဝင်ရောနေပြီး၊ ငါတို့ နှစ်ဖက်စလုံးက လူတွေကို မိစ္ဆာမကောင်းဆိုးဝါးမျိုးစေ့ ရယူမှာကို တားဆီးနေတာဖြစ်လောက်တယ်..."

ဤကဲ့သို့ စွမ်းရည်ရှိသော အင်အားစုသည် သေချာပေါက် အင်မော်တယ်နန်းတော်နှင့် ရှေးဟောင်းမိစ္ဆာဂိုဏ်းထက် မနိမ့်ကျသော အင်အားကြီးမားသည့် အင်အားစုဖြစ်ပေမည်။

ဤအဆင့်ရှိသော အင်အားစုမျိုး၊ နနတ်ဘုရားလောကအုပ်စုနယ်ပယ် တစ်ခုလုံးတွင် ရာဂဏန်းအောက် မနည်းရှိနေသည်။

ဤအင်အားစုများသည် အနည်းနှင့်အများဆိုသလို အင်မော်တယ်နန်းတော် သို့မဟုတ် ရှေးဟောင်းမိစ္ဆာဂိုဏ်းနှင့် ပဋိပက္ခအငြိုးအတေးများရှိကြရာ... ထို့ကြောင့် စုံစမ်း ဖော်ထုတ်ရန် အခက်အခဲ မည်မျှ ကြီးမားမည်ကို ခန့်မှန်းနိုင်ပေသည်။

ထို့ထက်... စုံစမ်း ဖော်ထုတ်နိုင်ခဲ့လျှင်တောင်....

ဘာဖြစ်မှာလဲ။

စစ်တိုက်ကြမှာလား။

"ဒါမှမဟုတ်၊ ဒီအင်အားစုရဲ့ရည်ရွယ်ချက်က ငါတို့အင်မော်တယ်နန်းတော် နဲ့ ရှေးဟောင်းမိစ္ဆာဂိုဏ်းအကြား အပြန်အလှန်သံသယဖြစ်စေပြီး အဲ့ဒီကတစ်ဆင့် ပဋိပက္ခဖြစ်ပွားစေပြီး ကြားကနေ အကျိုးအမြတ်ရယူချင်တာဖြစ်လောက်တယ်။"

ငှက်မွေးသရဖူဆောင်းထားသည့် စာပေပညာရှင်ပုံစံ လူလတ်ပိုင်းအရွယ် အမျိုးသားက စကား ပြောလိုက်၏။

"ဒါတွေက ခန့်မှန်းချက်တွေပဲ။ ငါ့သမီး အလကား သေဆုံးသွားလို့ မဖြစ်ဘူး၊ ဒီ လူသတ်တရားခံကို ငါ သေချာပေါက် ဆွဲထုတ်ပြီး၊ ပြင်းထန်တဲ့ ပေးဆပ်မှုတွေ ပြုလုပ်စေရမယ်။"

မုတ်ဆိတ်မွေးအနက်ရောင်နှင့် အဘိုးအို မိစ္ဆာအိုကြီးယန်က ရက်စက်ကြမ်းကြုတ်စွာ ပြောလိုက်၏။

အထူးမပျက်သုဉ်းနိုင်သော ရွှေနတ်ဘုရားလေးပါး ဆွေးနွေးတိုင်ပင်ပြီးနောက် နေရာကို ထပ်မံ စစ်ဆေးကြည့်ရှုလိုက်သည်။ ချောက်နက်ကြီးအတွင်းသို့ ဝင်ရောက်ခြင်းနှင့်ပတ်သက်၍မူ သူတို့ မလုပ်ဆောင်ခဲ့ကြပေ။

အဘယ်ကြောင့်ဆိုသော် ချောက်နက်ကြီးအတွင်း၌ ကြီးမားသော ကြောက်မက်ဖွယ် အန္တရာယ်များ ရှိနေသောကြောင့်ပင်။

သူတို့ ခြေမချလိုကြပေ။

မကြာမီ၊ လေးဖက်လေးတန်မှ လူအုပ်စုများသည် ထွက်ခွာသွားကြတော့သည်။

......

အချိန်ခေါင်းလောင်း လှိုဏ်ဂူကောင်းကင်ဘုံအတွင်း။

လီချန်သည် ဤနေရာတွင် ဆက်တိုက် လဝက်ကျော် နေထိုင်ခဲ့သည်။

မကောင်းဆိုးဝါးမျိုးစေ့အားလုံး၊ ထိုမိစ္ဆာမကောင်းဆိုးဝါးမျိုးစေ့အပါအဝင် အားလုံးကို အသုံးပြုခဲ့ပြီးပြီ ဖြစ်သည်။

ယခုအချိန်တွင် သူသည် စနစ်မျက်နှာပြင်ကို ဆင့်ခေါ်လိုက်ပြီး နောက်ဆုံး သတင်းအချက်အလက်များကို ကြည့်ရှုလိုက်၏။

အိမ်ရှင်: လီချန်။

နတ်ဝိညာဉ် (နတ်ဘုရားသဘာဝ)။

တာအိုပေါင်းစည်းခြင်း (အစပိုင်း ၅/၁၀၀)။

အချိန်ခေါင်းလောင်း (နတ်ဘုရားကိရိယာ ၈၇၁၅၈/၁၀၀၀၀၀၀၀)။

ကောင်းကင်ဘုံသတ္တမဓား (ဗလာနယ်ဖောက်ခွဲခြင်း၊ သံချပ်ကာဖောက်ခွဲခြင်း၊ နယ်မြေချိုးဖျက်ခြင်း၊ ဝိညာဉ်ချိုးဖျက်ခြင်း၊ လျှပ်စီး၊ ကောင်းကင်ခွဲ၊ နတ်ဘုရားကွပ်မျက်)၊ ကောင်းကင်ဘုံ အဋ္ဌမမြောက်ဓား (အစပျိုးမဝင်ရောက်သေး ၁၉/၁၀၀)။

မျက်လုံးခြောက်လုံးပိုင်ဆိုင်သော ပရမ်းပတာ လျှို့ဝှက်နတ်ဘုရား သက်ဆင်းခြင်းပညာ (ကြီးမားသော သက်ဆင်းခြင်း ၉၉/၁၀၀)။

လင့်တုန်းလောကသစ်ပင် (အဆင့်နှစ် ၅၆/၁၀၀)။

ချန်ယွမ်အစီအရင်ကျမ်း (ဆယ့်ကိုးအခြေခံ ၉၉/၁၀၀)။

ဝိညာဉ်ဆေးပင်စိုက်ပျိုးသူ(အဆင့်ကိုး ၉၉/၁၀၀)။

လက်နက်သန့်စင်သူ (အဆင့်ကိုး ၅၇/၁၀၀)။

အဂ္ဂိရတ်ဆရာ (အဆင့်တစ်ဆယ် ၉၉/၁၀၀)။

သူ၏ လင့်တုန်းလောကသစ်ပင်သည် အဆင့်နှစ် ၅၆ မှတ် တိုးတက်မှုသို့ ရောက်ရှိသွားခဲ့ပြီဖြစ်သည်။

စုစုပေါင်း ၄၅ မှတ် တိုးလာခဲ့ခြင်းပင်။

ထိုအထဲတွင် မိစ္ဆာမကောင်းဆိုးဝါးမျိုးစေ့ တစ်လုံးတည်းကပင် ၄၃ မှတ် တိုးတက်မှုကို ပေးစွမ်းခဲ့သည်။

ဤမိစ္ဆာမကောင်းဆိုးဝါးမျိုးစေ့သည် တာအိုပေါင်းစည်းခြင်းအဆင့် ကျင့်ကြံသူများ၏ နိယာမလောကသစ်ပင်ကို အဆင့်နှစ်သို့ တက်လှမ်းစေနိုင်လောက်အောင် အဖိုးတန်သည်မှာ အံ့ဩစရာ မဟုတ်တော့ပေ။

သူ၏နိယာမလောကသစ်ပင်သည် အဆင့်နှစ်သို့ရောက်ရှိနေပြီဖြစ်သော်လည်း စုပ်ယူပြီးနောက် ၄၃ မှတ် တိုးတက်မှုကို ရရှိစေနိုင်ခဲ့သေးသည်။

အကယ်၍ နောက်ထပ် မိစ္ဆာမကောင်းဆိုးဝါးမျိုးစေ့တစ်လုံး ထပ်ရနိုင်ပါက နောက်ထပ် အမှတ်သုံးဆယ် လေးဆယ်ခန့် တိုးတက်လာနိုင်ပြီး၊ အဆင့်သုံး လင့်တုန်းလောကသစ်ပင်သို့ ထိုးဖောက်ရန် မဝေးတော့ပေ။

သိထားသင့်သည်မှာ နိယာမလောကသစ်ပင် အဆင့်မြင့်လေ တိုးတက်မှု အခက်အခဲလည်း ကြီးမားလေဖြစ်သည်။

အမှတ်တစ်မှတ် တိုးတက်တိုင်း အချိန်အများအပြားလိုအပ်ပြီး ရေစက်ချ၍ ကျောက်တုံးကို ဖောက်ထွင်းသကဲ့သို့ အချိန်ယူကျင့်ကြံမှသာ ရနိုင်မည်ဖြစ်၏။

ထိုမပျက်သုဉ်းနိုင်သော ရွှေနတ်ဘုရားများပင် အဆင့်နှစ်သို့ တက်လှမ်းရန်အတွက် အခက်အခဲ အလွန်ကြီးမားလှသည်။ ချူယန်ကဲ့သို့သော မပျက်သုဉ်းနိုင်သော ရွှေနတ်ဘုရား၏ အခြေအနေကို ကြည့်ခြင်းအားဖြင့် သိသာထင်ရှားလှ၏။

လီချန်၏ လင့်တုန်းလောကသစ်ပင်သည် ဤမျှတိုတောင်းသောအချိန်အတွင်း အဆင့်နှစ် ၅၆ မှတ် တိုးတက်မှုသို့ ရောက်ရှိနိုင်ခြင်းမှာ ဒုံးပျံစီးသကဲ့သို့ လျင်မြန်နေခြင်းနှင့် မခြားနားပေ။

သို့သော် သူ သိသည်မှာ ဆက်လက်၍ လင့်တုန်းလောကသစ်ပင်တိုးတက်မှု အရှိန်အဟုန်သည် ကြီးမားစွာ နှေးကွေးသွားတော့မည်ဖြစ်ကြောင်းပင်။

"ကံကောင်းလို့ အားရို့ရဲ့သီချင်းသံက ငါ့ရဲ့ လင့်တုန်းလောကသစ်ပင်တိုးတက်မှုအရှိန်ကို နည်းနည်း မြန်ဆန်စေနိုင်တာ။"

လီချန်၏မျက်နှာပေါ်၌ ပြုံးယောင်တစ်ချက် ပေါ်ထွက်လာ၏။

သူ အားရို့ကို သွားမတွေ့သည်မှာ တစ်လကျော် ကြာမြင့်နေပြီဖြစ်သည်။

နတ်ဘုရားမိစ္ဆာစစ်မြေပြင်သို့ ပြန်သွားရန် မလိုအပ်ပါက သူ အားရို့ကို သေချာပေါက် သွားရောက် အဖော်ပြုပေးလိမ့်မည်။

သို့သော်၊ သူ အားရို့ကို ကြိုပြောထားပြီးသားပင်။

.......

နတ်ဘုရားမိစ္ဆာစစ်မြေပြင်။

ဖုံးကွယ်ထားသော နေရာတစ်ခု၌၊ လူရိပ်တစ်ရိပ် ပေါ်ထွက်လာကာ.... လီချန်ပင်။

ယခု လင့်တုန်းနိယာမလောကသစ်ပင်တိုးတက်မှု ကြီးမားစွာမြင့်တက်လာပြီး ကျင့်ကြံမှုတိုးတက်လာခြင်း မရှိသော်လည်း အစွမ်းအစမှာမူ သိသာထင်ရှားသော တိုးတက်မှုရှိလာခဲ့ပြီဖြစ်သည်။

တစ်လျှောက်လုံး ပျံသန်းသွားပြီး အတော်ကြာပြီးနောက်၊ လီချန် နောက်ဆုံးတွင် လူတွေ့လိုက်ရ၏။

မိစ္ဆာကျင့်ကြံသူတစ်ဖွဲ့ဖြစ်သည်။

အင်အားအကြီးဆုံးသူသည် ထိပ်တန်း သာ့လော်အဆင့်သို့ ရောက်ရှိနေ၏။

ခဏအကြာတွင် ထိုသာ့လော်အဆင့် မိစ္ဆာကျင့်ကြံသူတစ်ဦးတည်းသာ အသက်ရှင်ကျန်ရစ်လေသည်။

အသေးစိတ် စစ်ဆေးမေးမြန်းပြီးနောက်၊ လီချန် ကိစ္စတစ်ခုကို အတည်ပြုနိုင်လိုက်သည်။

သူ အချိန်ခေါင်းလောင်း လှိုဏ်ဂူကောင်းကင်ဘုံအတွင်းသို့ ဝင်ရောက်နေသော အချိန်အတွင်း၊ နတ်ဘုရားမိစ္ဆာစစ်မြေပြင်၌ မည်သည့် ထူးခြားမှုမျှ ပေါ်ပေါက်လာခြင်းမရှိခဲ့ပေ။

တစ်နည်းအားဖြင့်ဆိုရလျှင်၊ ထိုတာအိုပေါင်းစည်းခြင်းအဆင့် ကျင့်ကြံသူလေးဦး ကျဆုံးသွားခြင်းသည် နတ်ဘုရားမိစ္ဆာစစ်မြေပြင်အပေါ် မည်သည့် သက်ရောက်မှုမျှ မရှိခဲ့ပေ။

အင်မော်တယ်နန်းတော်နှင့် ရှေးဟောင်းမိစ္ဆာဂိုဏ်းမှ လူများသည် ဤကိစ္စကို ကြီးကျယ်အောင် မလုပ်ခဲ့ခြင်း ဖြစ်နိုင်လောက်သည်။

ရှင်းလင်းစွာ သိရှိပြီးနောက်၊ လီချန်သည် ဝူရွှမ်းနှင့် ယွီဟွာဂိုဏ်းချုပ်တို့ကို အချိန်ခေါင်းလောင်း လှိုဏ်ဂူကောင်းကင်ဘုံထဲမှ ထွက်ခွာခွင့်ပြုလိုက်၏။

မူလက လီချန်သည် ယွီဟွာဂိုဏ်းချုပ်ကို အချိန်ခေါင်းလောင်း လှိုဏ်ဂူကောင်းကင်ဘုံထဲတွင် အမြဲတမ်းထားရှိပြီး၊ နတ်ဘုရားအထောက်အထား ပြန်လည်ခွဲဝေမှု ပြီးဆုံးသွားသည့်အခါ၊ ၁၀ခုမြောက်ဘုံသို့ ပြန်ရောက်မှသာ ယွီဟွာဂိုဏ်းချုပ်ကို ထွက်ခွာခွင့်ပြုရန် စဉ်းစားထားခဲ့သည်။

သို့သော် သူ ပြန်စဉ်းစားမိသည်မှာ ဤသည်မှာ သဲလွန်စဟာကွက်များ ချန်ထားရစ်သကဲ့သို့ဖြစ်နေမည်။

အကယ်၍ အင်မော်တယ်နန်းတော်ဘက်မှ အမှန်တကယ် စုံစမ်းစစ်ဆေးပါက သံသယဖြစ်ဖွယ်ရာများ တွေ့ရှိသွားနိုင်ခြေရှိသည်။

သူ ယုံကြည်သည်မှာ ယွီဟွာဂိုဏ်းချုပ်သည် သူ တာအိုပေါင်းစည်းခြင်းအဆင့် ကျင့်ကြံသူလေးဦးကို သတ်ဖြတ်ခဲ့သည့်ကိစ္စကို အပြင်သို့ ထုတ်ဖော်ပြောဆိုမည်မဟုတ်၊ ပြောဆိုရဲမည် မဟုတ်ဟု ယုံကြည်၏။

နောက်တစ်လကျော်အတွင်း၊ သုံးယောက်သား နတ်ဘုရားမိစ္ဆာစစ်မြေပြင်ပေါ်၌ ပျင်းရိစွာ လျှောက်လည်နေကြပြီး၊ မိစ္ဆာကျင့်ကြံသူများကို တိုက်ခိုက်ခြင်း ရှားပါးသွားသည်။ မည်သို့ပင်ဖြစ်စေ ရမှတ်များ လုံလောက်နေပြီဖြစ်ရာ ပိုရယူနေရန် မလိုအပ်တော့ပေ။

သို့သော် သူသည် မကောင်းဆိုးဝါးဝိညာဉ်များကို နေရာအနှံ့ လိုက်လံရှာဖွေပြီး မကောင်းဆိုးဝါးမျိုးစေ့များကို ရယူနေခဲ့သည်။

.....

လီချန်သည် ထို စစ်မြေပြင် အမှတ်အသား အနည်းငယ်လင်းလက်လာပြီး နေရာပြောင်းရွှေ့ခြင်း လုပ်ဆောင်ချက် ပြန်လည်သက်ဝင်လာပြီဖြစ်ကြောင်း ခံစားလိုက်ရသဖြင့် သုံးယောက်သား ဤစစ်မြေပြင်အမှတ်အသားကို အသုံးပြု၍ နတ်ဘုရားမိစ္ဆာစစ်မြေပြင်မှ ထွက်ခွာခဲ့ကြ၏။

......

နတ်ဘုရားမိစ္ဆာစစ်မြေပြင် ထွက်ပေါက်အပြင်ဘက်။

လူရိပ်အများအပြား ပေါ်ထွက်လာသည်။ အားလုံး ဤတစ်ကြိမ် နတ်ဘုရားအထောက်အထား ပြန်လည်ခွဲဝေမှု၌ ပါဝင်သူများဖြစ်ကြသည်။

အဝါရောင်ဝတ်စုံနှင့် အမျိုးသားတစ်ဦး၏ ဦးခေါင်းထက်၌ ကြေးမုံပြင်တစ်ချပ်ပေါ်ထွက်လာပြီး၊ နတ်ဘုရားမိစ္ဆာစစ်မြေပြင်မှ ထွက်ခွာလာသော လူတိုင်းကို အဝါရောင် အလင်းတန်းများ ထုတ်လွှတ်ကာ စစ်ဆေးနေ၏။

အလင်းရောင်သည် လီချန်၏ကိုယ်ပေါ်သို့ ကျရောက်သွားပြီး ခန္ဓာကိုယ်ထဲသို့ စိမ့်ဝင်သွားကာ၊ လျင်မြန်စွာ လှည့်လည်သွားလာပြီးနောက် ပုံမှန် ပြန်ဖြစ်သွား၏။

လီချန် ခန့်မှန်းမိသည်မှာ ဤကြေးမုံပြင်သည် စူးစမ်းရှာဖွေရေး ရတနာတစ်မျိုးဖြစ်လောက်သည်။

ယခင်က နတ်ဘုရားမိစ္ဆာစစ်မြေပြင် အတွင်းသို့ ဝင်ရောက်စဉ်က ဤမျှ အသေးစိတ်စစ်ဆေးခြင်း မရှိခဲ့ပေ။

ကြည့်ရသည်မှာ ထိုတာအိုပေါင်းစည်းခြင်းအဆင့် ကျင့်ကြံသူလေးဦး ကျဆုံးသွားပြီးနောက် အင်မော်တယ်နန်းတော်ဘက်မှ တိုးမြှင့်လိုက်သော စူးစမ်းရှာဖွေရေး နည်းလမ်းတစ်ခုဖြစ်ပုံရ၏။

မကြာမီ၊ လီချန်တို့ သုံးဦးသည် ကြေးမုံပြင် စစ်ဆေးမှုကို အောင်မြင်သွားပြီး မည်သည့် ပုံမှန်မဟုတ်သော အခြေအနေမျှ မရှိခဲ့ပေ။

လီချန် စိတ်ထဲ၌လည်း စိတ်သက်သာရာရသွား၏။

ကြည့်ရသည်မှာ အချိန်ခေါင်းလောင်း၏ ဖုံးကွယ်ရေးနည်းလမ်းမှာ အလွန်မြင့်မားပုံရသည်။

ယွီဟွာနတ်ဘုရားဂိုဏ်းမှ အခြားသူများလည်း ထွက်လာကြ၏။

တစ်ယောက်မှ မလျော့ပေ။ ကိုးယောက် ဝင်သွားပြီး၊ ကိုးယောက် ပြန်ထွက်လာသည်။

လီချန်သည် အောက်ဘုံအလွှာမှ အခြားနတ်ဘုရားဂိုဏ်းများကို တစ်ချက်ကြည့်ရှုလိုက်ရာ... လူဦးရေ ထက်ဝက်ခန့်လျော့နည်းသွားသည်။ ကြည့်ရသည်မှာ သူတို့ နတ်ဘုရားမိစ္ဆာစစ်မြေပြင်၌ အလွန်ဆိုးရွားစွာ ကြုံတွေ့ခဲ့ရပုံရ၏။

ဤနတ်ဘုရားဂိုဏ်းမှလူများသည် အားလုံး မျက်နှာလေးနက်နေကြသည်။ စိတ်ခံစားချက် မကောင်းကြပုံပင်။

"မင်းတို့ ငါ့နောက် လိုက်ခဲ့။"

ယခင်က အောက်ဘုံအလွှာ နတ်ဘုရားအထောက်အထား ပြန်လည်ခွဲဝေမှုကို တာဝန်ယူခဲ့သော ထိုဟွမ်ယွမ်တာအိုသခင်ကြီးသည် နေရာ၌ရှိနေဆဲဖြစ်ပြီး ပြောလိုက်ခြင်းပင်။

ထို့ကြောင့်၊ များပြားလှသော နတ်ဘုရားဂိုဏ်း ကျင့်ကြံသူများသည် အလျင်အမြန် နောက်သို့ လိုက်ပါသွားကြသည်။

လူအများ အဆောက်အအုံတစ်ခုအတွင်းသို့ ဝင်ရောက်သွားကြ၏။

"အခု ရမှတ် စာရင်းပေါင်းမယ်။ မင်းတို့ စစ်မြေပြင် အမှတ်အသားတွေကို ထုတ်လိုက်ကြ။ တန်းစီပြီး နတ်ဘုရားဂိုဏ်းတစ်ခုချင်းစီ လာကြ။"

မကြာမီ၊ နတ်ဘုရားဂိုဏ်းတစ်ခုမှလူများ ရှေ့တိုးလာပြီး စစ်မြေပြင် အမှတ်အသားများကို ထုတ်လွှတ်လိုက်ကြ၏။

ဤနတ်ဘုရားဂိုဏ်းတွင် ငါးယောက်သာ ကျန်ရှိတော့သည်။

"ဝူရိပ်နတ်ဘုရားဂိုဏ်း၊ ရမှတ် ၁၇မှတ်။"

ဟွမ်ယွမ်တာအိုသခင်ကြီးက ချက်ချင်း ရမှတ်ကို အော်ဟစ်ကြေညာလိုက်၏။

"ဒီလောက်များတာလား။ ပထမဆုံးတက်ပြီး စာရင်းပေါင်းရဲတာ မဆန်းတော့ပါဘူး။"

နေရာ၌ရှိနေသော အခြားနတ်ဘုရားဂိုဏ်းများက ဝူရိပ်နတ်ဘုရားဂိုဏ်းသည် တစ်ဆယ့်ခုနစ်မှတ် ရရှိထားသည်ကို တွေ့မြင်လိုက်ရရာ၊ ချက်ချင်း တစ်ယောက်ချင်းစီ မျက်နှာသိပ်မကောင်းတော့ပေ။

နတ်ဘုရားမိစ္ဆာစစ်မြေပြင်သည် အလွန်အမင်း အန္တရာယ်များလှသည်။ ရမှတ် ဆယ်မှတ် ပြည့်မီရန်ပင် ဘယ်လောက်တောင် ခက်ခဲလိုက်လဲ။

ထို့ကြောင့် ရမှတ် ရရှိရန်အတွက် အသက်ကို ဦးစွာ ထိန်းသိမ်းထားနိုင်မှဖြစ်မည်။

ဆက်လက်၍ ဒုတိယ၊ တတိယ နတ်ဘုရားဂိုဏ်းများလည်း တက်ရောက် စာရင်းပေါင်းကြ၏။

"ဇီရှားနတ်ဘုရားဂိုဏ်း၊ ရမှတ် ၁၂ မှတ်။"

"ဟန်ယွဲ့နတ်ဘုရားဂိုဏ်း၊ ရမှတ် ၁၁ မှတ်။"

"လင်းယွင်နတ်ဘုရားဂိုဏ်း၊ ရမှတ် ၉ မှတ်။"

"ရွှမ်းယိုနတ်ဘုရားဂိုဏ်း၊ ရမှတ် ၅ မှတ်။"

"ပိဟိုင်နတ်ဘုရားဂိုဏ်း၊ ရမှတ် ၁ မှတ်။"

အဆင့်တစ်ရရှိထားသော ဝူရိပ်နတ်ဘုရားဂိုဏ်းသည် ဤအခြေအနေကို မြင်တွေ့လိုက်ရရာ၊ အသက်ရှင် ကျန်ရစ်သော ငါးဦးစလုံး အပြုံးများပေါ်ထွက်လာကြ၏။

ဆုံးရှုံးမှုများပြားခဲ့ပြီး၊ တာအိုသခင်ကြီး တစ်ပါးပင် ကျဆုံးခဲ့ရသော်လည်း ဤတစ်ကြိမ် နတ်ဘုရားအထောက်အထား ပြန်လည်ခွဲဝေမှုတွင် ပထမနေရာ ရရှိနိုင်ခဲ့ပြီဖြစ်ရာ အရာအားလုံး တန်ဖိုး ရှိ၏။

"မင်းတို့ နတ်ဘုရားဂိုဏ်း နှစ်ခု၊ ဘာလို့ တက်မလာသေးတာလဲ။"

ဟွမ်ယွမ်တာအိုသခင်ကြီးက ကျန်ရှိနေသော နတ်ဘုရားဂိုဏ်းနှစ်ခုကို ကြည့်လိုက်သည်။ ထိုအထဲမှ တစ်ခုမှာ ယွီဟွာနတ်ဘုရားဂိုဏ်းဖြစ်သည်။

"သခင်ကြီး၊ ကျွန်တော်တို့မှာ ရမှတ် မရှိပါဘူး..."

အခြားသော နတ်ဘုရားဂိုဏ်း တစ်ခုတွင် လူနှစ်ဦးသာ အသက်ရှင်လျက် ထွက်လာနိုင်ခဲ့ပြီး၊ ဤနှစ်ဦးစလုံးမှာလည်း ထျန်းနတ်ဘုရားများ ဖြစ်ကြသည်... တစ်နည်းအားဖြင့် ဆိုရလျှင်

နတ်ဘုရားဂိုဏ်းသည် တာအိုသခင်ကြီး သုံးပါး၊ ရွှမ်းနတ်ဘုရား သုံးပါး၊ ထျန်းနတ်ဘုရား တစ်ပါး ဆုံးရှုံးခဲ့ရသည်... ဤကဲ့သို့သော ဆုံးရှုံးမှုမှာ ကြီးမားလှသည်ဟုဆိုရပေမည်။

နေရာ၌ရှိနေသော အခြားနတ်ဘုရားဂိုဏ်းများသည် ဤနတ်ဘုရားဂိုဏ်းမှ ကျန်ရစ်သော ထျန်းနတ်ဘုရား နှစ်ပါးကိုကြည့်ပြီး၊ သနားဂရုဏာသက်သော အရိပ်အယောင်များ ပေါ်ထွက်လာကြ၏။

သူတို့သည်လည်း ဆုံးရှုံးမှု မနည်းလှသော်လည်း အနည်းဆုံးတော့ ဤမျှမကြီးမားလှပေ။

မကြာမီ၊ သူတို့၏အကြည့်များ ယွီဟွာနတ်ဘုရားဂိုဏ်းမှ လူများအပေါ်သို့ ကျရောက်သွား၏။

ယွီဟွာနတ်ဘုရားဂိုဏ်းသည် နတ်ဘုရားဂိုဏ်း အားလုံးထဲတွင် လူအစုံဆုံး ဖြစ်သည်... တစ်ယောက်မှ မသေဆုံးခဲ့ပေ။

"ဝူရွှမ်းတာအိုသခင်မ၊ ခင်ဗျားတို့ ယွီဟွာနတ်ဘုရားဂိုဏ်းလည်း ရမှတ် တစ်မှတ်မှ မရှိဘဲ နေမှာ မဟုတ်ပါဘူးနော်။ ဒါပေမဲ့ ဒီလောက် လူအများကြီး တစ်ယောက်မှ မသေတာ၊ ကြည့်ရတာ နေရာတစ်နေရာရှာပြီး ပုန်းနေကြတာဖြစ်လောက်တယ်..."

ဝူရိပ်နတ်ဘုရားဂိုဏ်းမှ ထိုအစိမ်းရောင်ဝတ်စုံနှင့် အမျိုးသား ရယ်မောလျက် ပြောလိုက်သည်။ လေသံထဲတွင် လှောင်ပြောင်သရော်လိုသည့်သဘောထား အလွန်ထင်ရှားနေ၏။

မည်သို့ပင်ဖြစ်စေ ဤတစ်ကြိမ် ဝူရိပ်နတ်ဘုရားဂိုဏ်း ပထမ ရရှိထားပြီး အကျိုးအမြတ် ကြီးမားလှသည်။

သူသည် ဝူရွှမ်းတာအိုသခင်မ၏ စိတ်ပျက်ခြင်းနှင့် မကျေနပ်ခြင်း အမူအရာများကို အလွန်မြင်တွေ့ချင်နေ၏။

"ဒီကိစ္စကို ရှင် စိတ်ပူပေးစရာ မလိုပါဘူး။"

ဝူရွှမ်းက သူ့အား တစ်ချက်စောင်းကြည့်လိုက်ပြီး အေးဆေးစွာပြောလိုက်ကာ၊ ထို့နောက် ရှေ့သို့ လျှောက်သွားပြီး သူမ၏စစ်မြေပြင် အမှတ်အသားကို ထုတ်လွှတ်လိုက်ရာ ဓမ္မကိရိယာတစ်ခုက စုပ်ယူသွား၏၊ ယွီဟွာနတ်ဘုရားဂိုဏ်းမှ အခြားသူများလည်း တစ်ယောက်ပြီးတစ်ယောက် ရှေ့တိုးသွားကြသည်။

"မရှိတော့ဘူးလား။"

ထိုဟွမ်ယွမ်တာအိုသခင်ကြီးသည် ဤအရာအားလုံးကို မြင်တွေ့လိုက်ရရာ အံ့အားသင့်သွားပြီး ထပ်မံမေးလိုက်၏။

အဘယ်ကြောင့်ဆိုသော် လီချန်နှင့် ယွီဟွာဂိုဏ်းချုပ် မတက်ရောက်ရသေးသောကြောင့်ဖြစ်သည်။

"မရှိတော့ပါဘူး။"

လီချန်က ရယ်မောလျက် ပြောလိုက်သည်။

သူသည် သူ၏ စစ်မြေပြင်အမှတ်အသားကို ထုတ်ဖော်မပြသခဲ့ပေ။ အကြောင်းကတော့ မလိုအပ်သောကြောင့် ဖြစ်သည်။ ရှိပြီးသား ဤရမှတ်များသည် အခြားနတ်ဘုရားဂိုဏ်းများကို ဖိနှိပ်ရန် လုံလောက်နေသည်။

"အင်း၊ ဒါဆိုရင် ငါ စာရင်းပေါင်းလိုက်တော့မယ်။"

ဟွမ်ယွမ်တာအိုသခင်ကြီးက ခေါင်းညိတ်လိုက်ပြီး၊ "ယွီဟွာနတ်ဘုရားဂိုဏ်း၊ ရမှတ် ၃၉ မှတ်။"

စကားသံ ဆုံးသွားသည်နှင့် များပြားလှသော နတ်ဘုရားဂိုဏ်းမှ လူများအားလုံး တုန်လှုပ်သွားကြ၏။

၃၉ မှတ်?

အထူးသဖြင့် ဝူရိပ်နတ်ဘုရားဂိုဏ်းမှလူများ၊ မူလက ပထမနေရာ သေချာပေါက်ရပြီဟု ထင်မှတ်ထားသော်လည်း၊ ယွီဟွာနတ်ဘုရားဂိုဏ်း ရုတ်တရက် ထွက်ပေါ်လာလိမ့်မည်ဟု မမျှော်လင့်ထားခဲ့ပေ။

"ဒါ၊ ဒါ ဘယ်လိုလုပ် ဖြစ်နိုင်မှာလဲ။ ရမှတ် ၃၉ မှတ်? ဒါ အနည်းဆုံးတော့ သာ့လော်အဆင့် မိစ္ဆာသခင်တစ်ပါးကို သတ်ဖြတ်နိုင်မှ၊ စုဆောင်းနိုင်မယ့် ပမာဏပဲ။ ခင်ဗျားတို့ ယွီဟွာနတ်ဘုရားဂိုဏ်းမှာ ဘယ်လိုလုပ် ဒီလောက်အစွမ်းအစရှိမှာလဲ။"

အစိမ်းရောင် ဝတ်စုံနှင့် အမျိုးသား မယုံကြည်နိုင်စွာ ပြောလိုက်၏။

ထျန်းမိစ္ဆာ၊ ရွှမ်းမိစ္ဆာ နှင့် သာမန်မိစ္ဆာသခင်များကို သတ်ဖြတ်ရုံသက်သက်ဖြင့် ရမှတ် သုံးဆယ့်ကိုးမှတ် စုဆောင်းရန် အခက်အခဲမှာ အလွန်ကြီးမားလှသည်။

မည်သို့ပင်ဖြစ်စေ ထျန်းမိစ္ဆာ၊ ရွှမ်းမိစ္ဆာ တစ်ပါးလျှင် တစ်မှတ်သာ တန်ဖိုးရှိသည်။

သာမန် မိစ္ဆာသခင် တစ်ပါးလျှင် သုံးမှတ် တန်ဖိုးရှိသည်။

ထိုက်ယိအဆင့် မိစ္ဆာသခင် တစ်ပါးလျှင်၊ ငါးမှတ်သာ တန်ဖိုးရှိသည်။

သာ့လော် အဆင့် မိစ္ဆာသခင် တစ်ပါးသာလျှင်၊ ဆယ်မှတ် တန်ဖိုးရှိ၏။

သို့သော် ယွီဟွာနတ်ဘုရားဂိုဏ်းတွင် သာ့လော်အဆင့် မိစ္ဆာသခင်ကို သတ်ဖြတ်နိုင်သော အစွမ်းအစ ရှိလို့လား။

လုံးဝ မဖြစ်နိုင်ပေ။

သူ့ ဝူရိပ်နတ်ဘုရားဂိုဏ်းတွင် ယခုလေးတင် အဆင့်တက်ထားသော သာ့လော်တာအိုသခင်ကြီး တစ်ပါးရှိနေသော်လည်း၊ သာ့လော်အဆင့် မိစ္ဆာသခင်ကို သတ်ဖြတ်ရန် မဖြစ်နိုင်ဘဲ အသက်ရှင်အောင် ကာကွယ်ရုံသာ တတ်နိုင်ပေမည်။

"သူမက ဟွမ်ယွမ်တာအိုသခင်ပဲ။ ဒီအစွမ်းအစရှိမရှိ မင်း ဘယ်လိုထင်လဲ။"

အင်မော်တယ်နန်းတော်၏ ဟွမ်ယွမ်တာအိုသခင်ကြီးက စကားပြောလိုက်၏။ "ကဲပါ၊ ရမှတ် စာရင်းပေါင်းတာ ပြီးဆုံးပါပြီ။ ယွီဟွာနတ်ဘုရားဂိုဏ်းက ပထမ၊ ဝူရိပ်နတ်ဘုရားဂိုဏ်းက ဒုတိယ၊ ဇီရှားနတ်ဘုရားဂိုဏ်းက တတိယ။"

အမှန်တကယ်တွင် သူသည်လည်း အနည်းငယ်သိချင်မိသည်။ ၁၀ခုမြောက်ဘုံရှိ နတ်ဘုရားဂိုဏ်းတစ်ခုမှ ဟွမ်ယွမ်တာအိုသခင်ကြီးတစ်ပါး မွေးဖွားလာခဲ့သည်။ ကြည့်ရသည်မှာ ဤအမျိုးသမီးသည် ပါရမီ ကောင်းမွန်ရုံသာမက အခွင့်အရေးကြီးတစ်ခုလည်း ရရှိခဲ့ပုံပင်။

သူ၏ စကားတစ်ခွန်းသည် နေရာ၌ရှိနေသော နတ်ဘုရားဂိုဏ်းသားများ အားလုံးကို လုံးဝတုန်လှုပ်သွားစေခဲ့သည်။

ဝူရိပ်နတ်ဘုရားဂိုဏ်းမှလူများ ဝူရွှမ်းကို ကြည့်သောအကြည့်များမှာ ပို၍ပင် တုန်လှုပ်ချောက်ခြားသွားကြ၏။

အစိမ်းရောင်ဝတ်စုံနှင့် အမျိုးသားသည် အနည်းငယ် တုန်ခါသွားပြီး၊ မျက်လုံးများ ကြောက်ရွံ့လာကာ၊ ဘာမှ ထပ်မပြောရဲတော့ပေ။

ဒါဟာ ဟွမ်ယွမ်တာအိုသခင်ကြီး ဖြစ်ပေသည်။

တစ်ယောက်တည်းဖြင့် သူ့ ဝူရိပ်နတ်ဘုရားဂိုဏ်းတစ်ခုလုံးကို မျိုးဖြုတ်ပစ်နိုင်သော ကြောက်မက်ဖွယ် ဖြစ်တည်မှုပင်။

***