ပြင်ပနတ်ဘုရား ဆွေတော်မျိုးတော်

၃၃ ဘုံ။

ရေခဲကျွန်းဒေသ။

ဤနေရာသည် တာ့ဇိုင်နတ်ဘုရားနယ်မြေနှင့် ဝေးကွာပြီး ယဉ်ကျေးမှု မထွန်းကားသေးသော အရိုင်းဒေသဖြစ်သည်။ အသက်ရှင်သန်ရန် ခက်ခဲသော နေရာများ၊ တားမြစ်နယ်မြေများ ပေါများပြီး အမျိုးမျိုးသော မိစ္ဆာ၊ သရဲ၊ ဘီလူးများ ပေါက်ဖွားရာနေရာလည်း ဖြစ်သည်။

၃၃ ဘုံတွင် မပျက်သုဉ်းနိုင်သော နတ်ဘုရားဂိုဏ်းကြီးများ စောင့်ကြပ်နေပြီး၊ အင်မော်တယ်နန်းတော် ဟူသော အချက်အချာ အဓိကနေရာရှိနေသော်လည်း၊ ၎င်းတို့ လက်လှမ်းမမီသော နေရာဒေသများ ရှိနေသည်မှာ ရှောင်လွှဲ၍မရပေ။

အစွမ်းထက်သော မပျက်သုဉ်းနိုင်သော ရွှေနတ်ဘုရားများပင်လျှင် ဤကဲ့သို့သော နေရာမျိုးသို့ မလာချင်ကြပေ။

ထို့အပြင် ဤကဲ့သို့သော နေရာမျိုးသည် ပြင်ပနတ်ဘုရား စွမ်းအားများ၏ စိမ့်ဝင်မှုကို ခံရရန် ပိုမို လွယ်ကူသည်။

နက်ရှိုင်းသော တောင်ကြားတစ်ခု အတွင်း၌ လူရိပ်အချို့သည် တင်ပျဉ်ခွေထိုင်နေသူကထိုင်၊ မတ်တတ်ရပ်နေသူကရပ်၊ ကျောက်ကမ်းပါးကို မှီနေသူကမှီဖြင့် ရှိနေကြသည်။ လူတိုင်းသည် မိမိတို့၏ အရှိန်အဝါကို ထိန်းချုပ်ထားသော်လည်း အားလုံးမှာ အစွမ်းထက်သူများဖြစ်ကြသည်။

ရွှစ်!

ရုတ်တရက် ဝေဟင်ထက်မှ လူရိပ်တစ်ခု ဆင်းသက်လာသည်။ အစိမ်းရောင်ဝတ်ရုံကို ဝတ်ဆင်ထားသူ ဖြစ်သည်။

လီချန်ပင်။

လီချန် ရောက်ရှိလာမှုသည် ရှိနေသူများ၏ အာရုံစိုက်မှုကို ရရှိသွားသည်။

သို့သော် လီချန်ကို မည်သူမှန်းမသိကြသဖြင့် အားလုံး အနည်းငယ်အံ့သြသွားကြသည်။

"တာအိုရောင်းရင်းရဲ့ မည်ကို သိခွင့်ရှိမလား" လူတစ်ယောက်က မေးလိုက်သည်။

"ဟုန်ယွင်နတ်ဘုရားဂိုဏ်းရဲ့ ဧည့်အကြီးအကဲ လီချန် ပါ။ တာအိုရောင်းရင်းတို့ အားလုံးကို နှုတ်ဆက်ပါတယ်" လီချန်က လက်သီးဆုပ်ကာ အရိုအသေပြုလိုက်သည်။

"ဪ... တာအိုရောင်းရင်းလီကိုး" ထိုလူကလည်း ပြန်လည်အရိုအသေပြုလိုက်သည်။ သို့သော် သူ့စိတ်ထဲတွင်တော့ သံသယဝင်နေဆဲပင်။ ဟုန်ယွင်နတ်ဘုရားဂိုဏ်းမှာ ဘယ်တုန်းက ဧည့်အကြီးအကဲတစ်ယောက် ပေါ်လာတာလဲ။

သို့သော် လီချန် ထုတ်ပြလိုက်သော နတ်လမ်းပြတံဆိပ်ပြားသည် ဟုန်ယွင်နတ်ဘုရားဂိုဏ်းမှ ဖြစ်ကြောင်း အတည်ပြု၍ရနေသည်။

ထို့နောက် လူတိုင်း မိမိကိုယ်ကို မိတ်ဆက်ကြသည်။

လီချန်လည်း သူတို့ကို သိခွင့်ရလိုက်သည်။

ဤလူများသည် နတ်ဘုရားဂိုဏ်းကြီးအသီးသီးမှ လာကြသူများ ဖြစ်သည်။ ထိုအထဲတွင် တာ့လုနတ်ဘုရားဂိုဏ်းနှင့် ချန်မင်းနတ်ဘုရားဂိုဏ်းမှ လူများလည်း ပါဝင်နေသည်။

အရင်တုန်းက လီချန် သတ်ခဲ့သော တာအိုပေါင်းစည်းခြင်းအဆင့် ကျင့်ကြံသူ နှစ်ဦးသည် ဤဂိုဏ်းကြီး နှစ်ခုမှဖြစ်သည်။

ထို့ကြောင့် လီချန်သည် ဤဂိုဏ်းနှစ်ခုမှ လူများကို ပိုမို အာရုံစိုက်ထားလိုက်သည်။

ယခု ကျဆုံးသူ ရှင်းလင်းရေး တာဝန်ကို ပါဝင်နိုင်သူအားလုံးသည် နိယာမနယ်ပယ် ပိုင်ဆိုင်ထားသော မပျက်သုဉ်းနိုင်သော ရွှေနတ်ဘုရားများဖြစ်ကြသည်။ ဆိုလိုသည်မှာ သူတို့၏ လောကသစ်ပင်များသည် အဆင့် ၂ သို့ ရောက်ရှိနေကြသူများဖြစ်သည်။

ထိုအချိန်တွင် ကောင်းကင်မှ နောက်ထပ် လူရိပ်တစ်ခု ဆင်းသက်လာသည်။

လီချန် အနည်းငယ် အံ့သြသွားသည်။ ရင်းနှီးနေသူတစ်ယောက် ဖြစ်နေသောကြောင့်ပင်။

ချင်းမင်နတ်ဘုရားဂိုဏ်းမှ ရွှေနတ်ဘုရား ချူယန်။

"တာအိုရောင်းရင်းလီ?" ချူယန် သည် လီချန်ကို မြင်သောအခါ အလွန်အံ့သြသွားသည်။ "ခင်ဗျားလည်း ဒီရှင်းလင်းရေးတာဝန်ကို ပါဝင်တာလား"

"တာအိုရောင်းရင်းချူယန်... ခင်ဗျားနဲ့ တာအိုရောင်းရင်းလီက သိနေကြတာလား" အခြားရွှေနတ်ဘုရားတစ်ပါးက ပြုံးမေးလိုက်သည်။

"ဟားဟား... ကျွန်တော်တို့က မိတ်ဆွေဟောင်းတွေပါ" ချူယန်က ရယ်မောကာ ပြောလိုက်ပြီး လီချန်ထံသို့ အသံလှိုင်းဖြင့် သတင်းပို့လိုက်သည်။ "တာအိုရောင်းရင်းလီ... ခင်ဗျားမှာ နောက်ခံတစ်ခုခုရှိမယ်ဆိုတာ ကျွန်တော် သိသားပဲ။ ဘယ်နတ်ဘုရားဂိုဏ်းကလဲ"

"တာအိုရောင်းရင်းချူယန်... ကျွန်တော်က ဟုန်ယွင်နတ်ဘုရားဂိုဏ်းရဲ့ ဧည့်အကြီးအကဲဖြစ်လာရုံပါပဲ" လီချန်က ပြန်ပြောလိုက်သည်။

"ကျွန်တော် ထင်သားပဲ... ဒီဟုန်ယွင်နတ်ဘုရားဂိုဏ်းက သိပ်မဟန်ပါလား။ ဒီလောက်အန္တရာယ်များတဲ့တာဝန်ကို ဧည့်အကြီးအကဲတစ်ယောက်ကို လွှတ်လိုက်တယ်ပေါ့" ချူယန်က ပြောသည်။

"တာအိုရောင်းရင်းလည်း ရောက်လာတာပဲလေ" ချူယန်၏စကားသံထဲမှ အဓိပ္ပာယ်ကို လီချန် နားလည်သဖြင့် ပြုံး၍ ပြန်ပြောလိုက်သည်။

"ကျွန်တော်က မတူဘူးလေ... ဒီတစ်ခေါက် နိယာမဝိညာဉ်ကျောက်တုံးလိုချင်လို့ စွန့်စားပြီး လာတာ" ချူယန်က ခေါင်းခါလိုက်သည်။

သူ၏လောကသစ်ပင် နိယာမ အဆင့် ၂ ရောက်သည်မှာ သိပ်မကြာသေးပေ။ အဆင့်ကို ခိုင်မာစေရန် နိယာမဝိညာဉ်ကျောက်တုံး လိုအပ်နေသည်။

"ဟားဟား... ကျွန်တော်လည်း အတူတူပါပဲ" လီချန် ရယ်လိုက်သည်။

"နေပါဦး... တာအိုရောင်းရင်းလီ... ခင်ဗျားရဲ့ လောကသစ်ပင် နိယာမက အဆင့် ၂ ရောက်သွားပြီလား" ရုတ်တရက် ချူယန် သတိဝင်လာပြီး အလွန်အမင်း အံ့သြသွားသည်။

ယခုတစ်ကြိမ် ရှင်းလင်းရမည့်သူမှာ အဆင့် ၃ ညစ်ညမ်းနေသော ကျဆုံးသူဖြစ်သည်။ နိယာမနယ်ပယ် မပိုင်ဆိုင်ထားသော ရွှေနတ်ဘုရားများအတွက် အလွန်အန္တရာယ်များသည်။

လီချန် ဒီနေရာမှာရှိနေတယ်ဆိုကတည်းက အဖြေက ရှင်းနေပြီ။

လီချန်က ဘာမှ ပြန်မပြောဘဲ ပြုံးရုံသာ ပြုံးပြလိုက်သည်။

ချူယန် ရင်ထဲတွင် အေးခနဲ ဖြစ်သွားသည်။

ဒီလီချန်ရဲ့ ကျင့်ကြံမှုနှုန်းက ကြောက်စရာကောင်းလွန်းတယ်။

ပထမဆုံး စတွေ့တုန်းက လီချန်က ဟွမ်ယွမ်တာအိုသခင်အဆင့်ပဲ ရှိသေးတာ။ အခုကျတော့ နိယာမနယ်ပယ် ပိုင်ဆိုင်တဲ့ တာအိုပေါင်းစည်းခြင်းအဆင့် ရှေးဟောင်းကျင့်ကြံသူဖြစ်နေပြီ။

ဒီလိုတိုးတက်မှုနှုန်းမျိုးကို သူ လေးစားအားကျရုံမှတစ်ပါး ဘာမှ မတတ်နိုင်တော့ပေ။

သူတို့နှစ်ဦး အသံလှိုင်းဖြင့် စကားပြောနေခြင်းဖြစ်၍ အခြားသူများ မကြားရပေ။

နောက်ထပ် အချိန်အတန်ကြာတွင် လူအချို့ ထပ်ရောက်လာကြသည်။

လူစုံသောအခါ စုစုပေါင်း ၁၃ ယောက် ရှိသည်။

အားလုံးသည် နိယာမနယ်ပယ် ပိုင်ဆိုင်ထားသော မပျက်သုဉ်းနိုင်သော ရွှေနတ်ဘုရားများ ဖြစ်ကြသည်။

တစ်ယောက်ချင်းစီက နတ်ဘုရားဂိုဏ်းတစ်ခုစီကို ကိုယ်စားပြုကြသည်။

၃၃ ဘုံတွင် နတ်ဘုရားဂိုဏ်း ၁၃ ဂိုဏ်းမက ရှိသော်လည်း၊ အကြောင်းအမျိုးမျိုးကြောင့် အချို့ဂိုဏ်းများ မပါဝင်ကြပေ။

မည်သို့ပင်ဖြစ်စေ နိယာမနယ်ပယ် ပိုင်ဆိုင်သော ရွှေနတ်ဘုရား ၁၃ ပါး ပေါင်းစည်းလိုက်ခြင်းသည် ကြောက်မက်ဖွယ်ကောင်းသော အင်အားတစ်ခုဖြစ်သည်။

၁၃ ယောက်လုံး တိုင်ပင်ဆွေးနွေးကြပြီးနောက် ခေါင်းဆောင်တစ်ဦးကို ရွေးချယ်လိုက်ကြသည်။

အန္တရာယ်များသော ကျဆုံးသူကို ရင်ဆိုင်ရာတွင် သဲတစ်ပွင့်ချင်းစီလို ကွဲပြားနေ၍မရပေ။ အမိန့်ပေး ကွပ်ကဲမည့် ခေါင်းဆောင်တစ်ဦးရှိရန် လိုအပ်သည်။

၁၃ ယောက်လုံး တောင်ကြားမှ ထွက်ခွာလာပြီး အဝေးသို့ ပျံသန်းသွားကြသည်။

......

နာရီဝက်ခန့် အကြာတွင် သူတို့သည် ကြီးမားသော ကျောက်တောင်ကြီးတစ်ခုဆီသို့ ရောက်ရှိလာကြသည်။ ကျောက်တောင်ကြီးတစ်ခုလုံးသည် ပျားအုံကြီးသဖွယ် အပေါက်တွေ ပြည့်နှက်နေသည်။

ထိုအပေါက်များထဲမှ လူပုလေးများနှင့်တူသော သတ္တဝါများ ဝင်ချည်ထွက်ချည် လုပ်နေကြသည်။

"အဲဒါတွေက မြေဝိညာဉ်တွေပဲ။ ဟိုအရင်တုန်းက ပြင်ပနတ်ဘုရား ဆွေတော်မျိုးတော်တွေ ကျန်ရစ်ခဲ့တာ..." တစ်ယောက်က ပြောလိုက်သည်။

လီချန် ကြားလိုက်သောအခါ စိတ်ထဲတွင် အတွေးတစ်ခု ဝင်လာသည်။ အမတနယ်မြေရှိ ထျန်းယွမ်မြို့အနီး တွင်းနက်ကြီးထဲတွင်လည်း မြေဝိညာဉ်မျိုးနွယ်များ ရှိခဲ့ဖူးသည်။ အတူတူပဲလား မသိဘူး။

"သတင်းအရဆိုရင် အဲဒီကျဆုံးသူက ဒီမြေဝိညာဉ် လူစုလူဝေးထဲမှာ ပုန်းနေတယ်တဲ့။ ဒီလူက နှစ်ဆယ့်နှစ်အခြေခံအဆင့် ရှိတဲ့ အစီအရင်ပညာရှင်ဆိုတော့... ကျဆုံးသွားရင်တောင် သတိကြီးကြီး ထားနေမှာပဲ"

ရှင်းလင်းရေးအဖွဲ့၏ ခေါင်းဆောင်မှာ ကျီဝေ့နတ်ဘုရားဂိုဏ်းမှ ရွှေနတ်ဘုရား ကျိုးကျန့်ဖြစ်သည်။ သူသည် ဝါအရင့်ဆုံး ရွှေနတ်ဘုရားဖြစ်ပြီး အထူးရွှေနတ်ဘုရားအဆင့်သို့ရောက်ရန် ခြေတစ်လှမ်းသာ လိုတော့သည်။

ဒါပေမဲ့ ဒီတစ်လှမ်းက ကျော်ဖြတ်ဖို့ ခက်ခဲသော ချောက်ကမ်းပါးကြီး တစ်ခုလိုပင်။

ပြီးတော့ ကျိုးကျန့်၏အသက်သည် နှစ်ပေါင်း တစ်သိန်းကျော်နေပြီဖြစ်သည်။

အကယ်၍ အထူးရွှေနတ်ဘုရား အဆင့်သို့ မတက်လှမ်းနိုင်ပါက ဟွေ့ယွမ်တစ်ခေတ်စာ သက်တမ်းသည် သူ့အတွက် အကန့်အသတ် ဖြစ်လာလိမ့်မည်။

"တာအိုရောင်းရင်းလီ... ရှင်းလင်းရေးအဖွဲ့ လူစာရင်း မိတ်ဆက်ထဲမှာ ခင်ဗျားက နှစ်ဆယ်အခြေခံ အစီအရင်ပညာရှင်လို့ ဖော်ပြထားတယ်မလား။ ဒီနေရာမှာ အစီအရင် ခြေရာလက်ရာတွေ မြင်ရလား" ရုတ်တရက် ကျိုးကျန့်က လီချန်ဘက်လှည့်ကာ မေးလိုက်သည်။

လူတိုင်းက လီချန်ကို ကြည့်လာကြသည်။

ရှင်းလင်းရေးအဖွဲ့ လူစာရင်းကို ရှိနေသူများ အားလုံးသိကြသည်။

"ကျွန်တော်က နှစ်ဆယ်အခြေခံ အစီအရင်ပညာရှင် ဖြစ်တာတော့ မှန်ပါတယ်။ ဒါပေမဲ့ ဒီကျောက်တောင်ကြီးမှာ အစီအရင်ရဲ့ အငွေ့အသက်ကို မခံစားရဘူး" လီချန် ခေါင်းခါပြီး ပြောလိုက်သည်။

တကယ်လို့ အစီအရင်ခြေရာလက်ရာရှိမယ်ဆိုရင် သူ အလွယ်တကူ အာရုံခံမိမှာပါ။

"ဒါဆိုရင် အစီအရင်ကိစ္စကို ခဏထားပြီး ဒီမြေဝိညာဉ်နိုင်ငံကို တိုက်ရိုက်တိုက်ခိုက်လိုက်ကြတာပေါ့..." ကျိုးကျန့်က ပြောလိုက်သည်။

အခြားသူများလည်း သဘောတူလိုက်ကြသည်။

ထို့နောက် ကျိုးကျန့်သည် ထိုမြေဝိညာဉ် လူစုလူဝေးကို စတင် တိုက်ခိုက်လိုက်သည်။ ကြောက်မက်ဖွယ်ကောင်းသော တိုက်ခိုက်မှုကျဆင်းသွားပြီး ဆင့်ကဲပေါက်ကွဲမှုများ ဖြစ်ပေါ်စေသည်။

ကျွီ... ကျွီ... ကျွီ...

ရုတ်တရက် ကျောက်တောင်ကြီး အတွင်းပိုင်းမှ စူးရှသော အော်သံကြီး ထွက်ပေါ်လာသည်။ ကြောက်မက်ဖွယ် အရှိန်အဝါများ ထွက်ပေါ်လာပြီး အဝါရောင်လေပြင်းများ လွှမ်းခြုံသွားကာ ကျိုးကျန့်၏တိုက်ခိုက်မှုကို တားဆီးလိုက်သည်။

ဒါက ကျိုးကျန့် အစွမ်းကုန် မသုံးလိုက်သေးသောကြောင့်လည်း ဖြစ်နိုင်သည်။

သို့သော် ထိုလိမ့်တက်လာသော အဝါရောင်လေပြင်းများသည် ကောင်းကင်နှင့် နေကိုပင် ဖုံးလွှမ်းသွားပြီး အရှိန်အဝါ အလွန်ကြီးမားလှသည်။

"ဒီမြေဝိညာဉ်တွေထဲမှာ မပျက်သုဉ်းနိုင်သောအဆင့် မြေဝိညာဉ် မွေးဖွားလာလိမ့်မယ်လို့ ထင်မထားမိဘူး" ရှိနေသူများ၏မျက်နှာများ လေးနက်သွားကြသည်။

မပျက်သုဉ်းနိုင်သောအဆင့် မြေဝိညာဉ်ဆိုသည်မှာ မပျက်သုဉ်းနိုင်သော ရွှေနတ်ဘုရားနှင့် အဆင့်တူညီသည်။

သို့သော် ကျင့်ကြံခြင်း စနစ်ချင်းတော့ မတူပေ။ မြေဝိညာဉ်ဆိုသည်မှာ ပြင်ပနတ်ဘုရား ဆွေတော်မျိုးတော်များဖြစ်ကြပြီး ကိုယ်ပိုင်အဆင့်တက်လမ်းစဉ်ရှိသည်။ ကြားတာတော့ ပြင်ပနတ်ဘုရား ဆွေတော်မျိုးတော် သွေးမျိုးဆက်နှင့် သက်ဆိုင်သည်ဆိုပဲ။

အင်မော်တယ်နန်းတော်သည် နတ်ဘုရားနယ်မြေပြင်ပမှ အရိုင်းဒေသများကို ထိန်းချုပ်မထားသော်လည်း၊ လုံးဝ ဂရုမစိုက်ဘဲ ပစ်ထားသည်ဟု မဆိုလိုပေ။

ယေဘုယျအားဖြင့် အင်မော်တယ်နန်းတော်သည် အချိန်ကာလတစ်ခုတိုင်းတွင် နတ်ဘုရားဂိုဏ်းကြီးများ၏အင်အားကိုစုစည်းပြီး မြေဝိညာဉ်ကဲ့သို့သော မိစ္ဆာ၊ သရဲ၊ ဘီလူးများကို ပုံမှန်ရှင်းလင်းလေ့ရှိသည်။ မပျက်သုဉ်းနိုင်သောအဆင့်ရှိသည့် သတ္တဝါဆန်းများ မွေးဖွားလာခြင်းကို တားဆီးရန် ဖြစ်သည်။

ယခု ဒီမြေဝိညာဉ်တွေထဲမှာ မပျက်သုဉ်းနိုင်သောအဆင့် မြေဝိညာဉ် မွေးဖွားလာတာကို အင်မော်တယ်နန်းတော်က သတင်းမရခဲ့ဘူး။

ဖြစ်နိုင်ချေတစ်ခုပဲ ရှိတယ်။ အဲဒါက ဟိုကျဆုံးသူနဲ့ ပတ်သက်နေတာပဲ။

ကျဆုံးသူဆိုတာက ပြင်ပနတ်ဘုရား စွမ်းအားရဲ့ ညစ်ညမ်းမှုကို နက်နက်ရှိုင်းရှိုင်း ခံထားရသူလေ။

မြေဝိညာဉ်လိုမျိုး ပြင်ပနတ်ဘုရား ဆွေတော်မျိုးတော်တွေနဲ့ ပေါင်းမိသွားရင် ဘယ်လိုပုံမှန်မဟုတ်တဲ့ အခြေအနေမျိုးမဆို ဖြစ်လာနိုင်တယ်။

ဘုန်း!

တောင်ခါးပန်းများ ကွဲအက်သွားသံနှင့်အတူ ရူးသွပ်ဖွယ်ရာ သိပ်သည်းလှသော အဝါရောင်လေပြင်းများ ထွက်ပေါ်လာသည်။ ဟိန်းဟောက်သံများကြားတွင် ကြောက်မက်ဖွယ် သတ္တဝါကြီးတစ်ကောင် ပေါ်ထွက်လာသည်။ မြေဝိညာဉ်ပုံစံမျိုး လုံးဝ မပေါက်တော့ဘဲ၊ တစ်ကိုယ်လုံး ကြွက်သားများ ထုံးနေပြီး ထူထဲသော ကြွက်သား သံချပ်ကာ ဝတ်ဆင်ထားသကဲ့သို့ ဖြစ်နေသည်။

"ကျွတ်... ကျွတ်... ပြင်ပနတ်ဘုရား ဆွေတော်မျိုးတော်ဆိုတာ ဒါမျိုးကိုး။ နိုးထလာပြီး မပျက်သုဉ်းနိုင်သောအဆင့် ရောက်သွားတာနဲ့ နိယာမနယ်ပယ်ကို ခုခံနိုင်စွမ်း ရှိသွားပြီပဲ" ကျိုးကျန့်က စိတ်လှုပ်ရှားစွာ ရေရွတ်လိုက်သည်။

ဒါက ပြင်ပနတ်ဘုရား ဆွေတော်မျိုးတော်တွေရဲ့ ကြောက်စရာကောင်းတဲ့ အချက်ပဲ။

မနိုးထခင်တုန်းကတော့ သာမန်သက်ရှိလောက်ပဲရှိတာ။

ဒါပေမဲ့ နိုးထလာပြီးတာနဲ့ ပြင်ပနတ်ဘုရားနဲ့ ချိတ်ဆက်မှုရသွားပြီး စစ်မှန်တဲ့ ပြင်ပနတ်ဘုရား ဆွေတော်မျိုးတော် ဂုဏ်သတ္တိတွေကို ပိုင်ဆိုင်သွားတော့တယ်။

ဒါကြောင့်လည်း အင်မော်တယ်နန်းတော်က ဒီလိုဆွေတော်မျိုးတော် သတ္တဝါတွေကို စိုးရိမ်တာ။

ဒါပေမဲ့ ဒီလိုသတ္တဝါတွေကို အမြစ်ပြတ် သုတ်သင်ဖို့ကျတော့လည်း မဖြစ်နိုင်သလောက်ပဲ။

ဘာလို့လဲဆိုတော့ တစ်စုံတစ်ရာသော သဘောတူညီချက်တွေနဲ့ ပတ်သက်နေလို့လေ။

"အားလုံးပဲ... ငါ့ကို ဝိုင်းကူကြပါဦး" ကျိုးကျန့် ပြောလိုက်သည်။

သူ့အင်အားနဲ့ ဒီမပျက်သုဉ်းနိုင်သောအဆင့် မြေဝိညာဉ်ကို သတ်ဖို့ မခက်ခဲပေမဲ့၊ စွမ်းအင် အများကြီး သုံးရလိမ့်မယ်။ အဲဒီလိုဆိုရင် နောက်ဆက်တွဲ ကျဆုံးသူကို ရင်ဆိုင်တဲ့အခါ အန္တရာယ် ပိုများသွားနိုင်တယ်။

ဒါကြောင့် အကောင်းဆုံးနည်းလမ်းကတော့ အားလုံး ဝိုင်းတိုက်ပြီး ဒီကောင်ကို အမြန်ဆုံး ရှင်းပစ်လိုက်ဖို့ပဲ။

ဝါး!

ထိုမပျက်သုဉ်းနိုင်သောအဆင့် မြေဝိညာဉ်က ရုတ်တရက် ဟိန်းဟောက်လိုက်ပြီး လက်နှင့် လှမ်းဆွဲလိုက်ရာ အဝါရောင်လေပြင်းကြီးတစ်ခု စုစည်းသွားပြီး လူအုပ်ကြီးဆီသို့ လိမ့်ဝင်လာသည်။

ချက်ချင်းပင် ရွှေနတ်ဘုရား အများအပြားက ဝိုင်းဝန်းတိုက်ခိုက်လိုက်ကြသည်။ ကြောက်မက်ဖွယ် တိုက်ခိုက်မှုများကျဆင်းသွားပြီး အဝါရောင်လေပြင်းကို ဖြိုခွင်းလိုက်ကာ ထိုမြေဝိညာဉ်ကြီးကို လွှမ်းခြုံသွားသည်။

သို့သော် နောက်တစ်စက္ကန့်တွင် ကြောက်မက်ဖွယ် အရိပ်မည်းကြီးတစ်ခုသည် စွမ်းအင်တိုက်ခိုက်မှုများကို ဖောက်ထွက်လာပြီး မျက်စိတစ်မှိတ်အတွင်း ရွှေနတ်ဘုရားတစ်ပါး၏အရှေ့သို့ ရောက်ရှိလာကာ ကြီးမားသော လက်သီးကြီးဖြင့် ထိုးချလိုက်သည်။

ထိုမပျက်သုဉ်းနိုင်သောအဆင့် မြေဝိညာဉ်ကြီးပင်ဖြစ်သည်။

သို့သော် သူ့ခန္ဓာကိုယ်မှ ကြွက်သား သံချပ်ကာများသည် စုတ်ပြတ်သတ်နေပြီး အမည်းရောင် သွေးများ စီးကျနေသည်။ ခုနက တိုက်ခိုက်မှုကြောင့် ဒဏ်ရာအကြီးအကျယ်ရသွားသည်မှာ ထင်ရှားသည်။

ရွှေနတ်ဘုရားအသီးသီးက နိယာမနယ်ပယ်များကို ထုတ်သုံးလိုက်ကြသော်လည်း ဒီမြေဝိညာဉ်ကြီးကို ဖိနှိပ်၍ မရပေ။

ပြင်ပနတ်ဘုရား ဆွေတော်မျိုးတော်များသည် နိယာမနယ်ပယ်ကို ခုခံနိုင်စွမ်းရှိကြသည်လေ။

ထိုအချိန်တွင် ကွဲအက်နေသော ကျောက်တောင်ကြီးထဲမှ နောက်ထပ် ကြောက်မက်ဖွယ် အရှိန်အဝါများ ထွက်ပေါ်လာပြီး၊ နောက်ထပ် မြေဝိညာဉ်ကြီး အများအပြား ပြေးထွက်လာကာ တိုက်ခိုက်လာကြသည်။

"သောက်ကျိုးနည်း... တစ်ကောင်တည်း မဟုတ်ဘူးဟ။ ဘယ်လိုလုပ် ဒီလောက်အများကြီး ရှိနေရတာလဲ" ကျိုးကျန့် အခြေအနေကို အာရုံခံမိပြီး မျက်နှာပျက်သွားသည်။

အခြေအနေက ထိန်းချုပ်မှု လွတ်သွားပြီ။

ဒီလို မပျက်သုဉ်းနိုင်သောအဆင့် မြေဝိညာဉ်တွေ နောက်ထပ် အကောင်နည်းနည်း ထပ်ထွက်လာရင်တောင် သူတို့ ကိုင်တွယ်နိုင်ပါသေးတယ်။

ဒါပေမဲ့ ပြဿနာက ဘာလို့ ဒီလောက်အများကြီး ထွက်လာရတာလဲ။

ဒါ သဘာဝ မကျဘူး။

ဒီမပျက်သုဉ်းနိုင်သောအဆင့် မြေဝိညာဉ်တွေက သဘာဝအတိုင်းဖြစ်လာတာ မဟုတ်နိုင်ဘူး။

ဟိုကျဆုံးသူ အစီအရင်ပညာရှင်နဲ့ ပတ်သက်နေမလား။

"နေဦး... အရေအတွက်က ပိုပိုများလာပါလား" လူတိုင်းကို ပိုပြီး ထိတ်လန့်သွားစေတာက နောက်ပိုင်းမှာ ဖြစ်လာမယ့် အရာတွေပဲ။

နောက်ထပ် ကြောက်မက်ဖွယ် အရှိန်အဝါ အများအပြားက တခြားနေရာတွေကနေ အမြန်ချဉ်းကပ်လာနေတယ်။

အားလုံးက မပျက်သုဉ်းနိုင်သောအဆင့် မြေဝိညာဉ်တွေချည်းပဲ။

လီချန် နတ်ဘုရားအာရုံဖြင့် စစ်ဆေးကြည့်လိုက်ရာ ပထမဆုံး တစ်ကောင်အပါအဝင် စုစုပေါင်း ၂၂ ကောင် အတိအကျရှိနေသည်ကို တွေ့လိုက်ရသည်။

၂၂ ကောင်?

မဟုတ်သေးဘူး...

ရုတ်တရက် လီချန် မျက်နှာ အကြီးအကျယ် ပြောင်းလဲသွားပြီး တစ်စုံတစ်ခုကို သတိရလိုက်သည်။

အဘယ်ကြောင့်ဆိုသော် ဒီမြေဝိညာဉ် ၂၂ ကောင်ရဲ့ အရှိန်အဝါတွေက ထူးဆန်းနေပြီး၊ တစ်ကောင်နဲ့တစ်ကောင် ချိတ်ဆက်နေကာ မမြင်ရတဲ့ အစီအရင်ကြီးတစ်ခု ဖွဲ့စည်းနေသလို ခံစားလိုက်ရလို့ပဲ။

"အားလုံး သတိထား... ဒါက နှစ်ဆယ့်နှစ်အခြေခံ ရုပ်သေးအစီအရင်ပဲ။ ဒီမပျက်သုဉ်းနိုင်သောအဆင့် မြေဝိညာဉ်တွေကို ဟိုကျဆုံးသူက နောက်ကွယ်ကနေ ထိန်းချုပ်နေတာ..." လီချန် ချက်ချင်း အော်ဟစ်သတိပေးလိုက်သည်။

သိသာထင်ရှားသည်မှာ ထိုနှစ်ဆယ့်နှစ်အခြေခံအဆင့် ရှိသော အစီအရင်ပညာရှင်သည် မွေးရာပါတိုက်ပွဲဝင် အစီအရင်ကို ဖန်တီးနိုင်ခဲ့ပြီဖြစ်သည်။ မပျက်သုဉ်းနိုင်သော ရွှေနတ်ဘုရားနှင့်ယှဉ်နိုင်သည့် တိုက်ခိုက်ရေးစွမ်းရည်ကို ပိုင်ဆိုင်ထားခြင်းဖြစ်သည်။

ယခုအချိန်တွင် လီချန်၏စိတ်ထဲတွင် တုန်လှုပ်နေမိသည်။ ထိုကျဆုံးသူ အစီအရင်ပညာရှင်သည် တကယ့်ကို လက်ရဲဇက်ရဲနိုင်လှသည်။ အစွမ်းထက်သော မပျက်သုဉ်းနိုင်သောအဆင့် မြေဝိညာဉ် ၂၂ ကောင်ကို အသုံးပြုပြီး ကြောက်မက်ဖွယ် မွေးရာပါတိုက်ပွဲဝင်အစီအရင်အဖြစ် ဖန်တီးထားခဲ့သည်။

ဘယ်လိုလုပ်ခဲ့လဲ ဆိုတာကို တွေးတောင် မတွေးရဲပေ။

မပျက်သုဉ်းနိုင်သောအဆင့် မြေဝိညာဉ် ၂၂ ကောင်က အစီအရင် ဖွဲ့စည်းလိုက်သည်နှင့် ဟင်းလင်းပြင်ကြီးတစ်ခုလုံး တွန့်လိမ်သွားပြီး၊ ကြောက်မက်ဖွယ် စွမ်းအင်စက်ကွင်းတစ်ခု ပြည့်နှက်လာကာ လီချန် အပါအဝင် ရွှေနတ်ဘုရား ၁၀ ယောက်ကျော်ကို လွှမ်းခြုံသွားသည်။

"မြန်မြန်... အားလုံး ကိုယ့်ရဲ့ နိယာမနယ်ပယ်တွေကို ချိတ်ဆက်လိုက်ကြ" ခေါင်းဆောင်ဖြစ်သူ ကျိုးကျန့်က အော်ဟစ်လိုက်သည်။

တကယ်လို့ သာမန် မပျက်သုဉ်းနိုင်သောအဆင့် မြေဝိညာဉ် ၂၂ ကောင် သက်သက်ဆိုရင် သူတို့ ၁၀ ယောက်ကျော်နဲ့ နိုင်အောင် တိုက်လို့ရပါသေးတယ်။

ဘာလို့လဲဆိုတော့ ပြင်ပနတ်ဘုရား ဆွေတော်မျိုးတော်ဆိုတဲ့ အကောင်တွေက နိယာမနယ်ပယ်ကို ခုခံနိုင်စွမ်းမြင့်မားတယ်ဆိုပေမဲ့၊ သူတို့ရဲ့ စွမ်းအားက သွေးမျိုးဆက်အပေါ်မှာ အများကြီး မှီခိုနေရတာလေ။ တကယ့်လက်တွေ့ တိုက်ပွဲမှာကျတော့ သိပ်မစွမ်းလှဘူး၊ နည်းနည်း ရှုပ်ရုံလောက်ပဲ ရှိတာ။

ဒါပေမဲ့ အခုက မတူတော့ဘူး။

နှစ်ဆယ့်နှစ်အခြေခံအဆင့်ရှိတဲ့ ကျဆုံးသူ အစီအရင်ပညာရှင် တစ်ယောက်က မွေးရာပါတိုက်ပွဲဝင်အစီအရင်အဖြစ် ဖန်တီးထားတာဆိုတော့ ထွက်ပေါ်လာမယ့် စွမ်းအားက ၁ ပေါင်း ၁ ညီမျှခြင်း ၂ ဆိုတာလောက် ရိုးရှင်းမှာ မဟုတ်တော့ဘူး။

ပြီးတော့ အခု လူတိုင်းက အစီအရင်ထဲမှာ ပိတ်မိနေကြပြီ ဆိုတော့ ရင်ဆိုင်ရမယ့် အန္တရာယ်က ပိုကြီးသွားပြီ။

အခု လုပ်ရမှာက လူတိုင်းရဲ့ နိယာမနယ်ပယ်တွေကို ချိတ်ဆက်လိုက်ပြီး ဒီတိုက်ပွဲဝင်အစီအရင်ရဲ့ စွမ်းအားကို ခုခံဖို့ပဲ။

တစ်ခဏချင်းမှာပင် နိယာမနယ်ပယ်အသီးသီး ပေါ်ထွက်လာပြီး အချင်းချင်း ချိတ်ဆက်သွားကာ ပိုမို ခိုင်ခံ့သော နိယာမနယ်ပယ်ကြီးတစ်ခု ဖြစ်ပေါ်လာသည်။

ဒီနိယာမနယ်ပယ်ကြီးအတွင်းမှာ အမျိုးမျိုးသော နိယာမစွမ်းအားတွေ ပါဝင်နေသည်။

အတိအကျ ပေါင်းစပ်လို့မရဘဲ အနည်းငယ် ရှုပ်ထွေးနေသော်လည်း ကာကွယ်ရေးစွမ်းရည်ကတော့ အလွန်မြင့်မားသည်။

ထိုအချိန်တွင် လူရိပ်တစ်ခုသည် မြေကြီးထဲမှ လျင်မြန်စွာ ပျံသန်းထွက်ပေါ်လာပြီး မပျက်သုဉ်းနိုင်သောအဆင့် မြေဝိညာဉ်တစ်ကောင်အပေါ်တွင် ရပ်တန့်လိုက်သည်။

ထိုသူသည် ဝတ်ရုံနက်ကို ဝတ်ဆင်ထားပြီး တစ်ကိုယ်လုံးကို လွှမ်းခြုံထားကာ ထူးဆန်းပြီး ကြောက်မက်ဖွယ်ကောင်းသော အရှိန်အဝါများ ထုတ်လွှတ်နေသည်။

"မုရုံယင်း... မင်း နောက်ဆုံးတော့ ထွက်လာပြီပေါ့" ကျိုးကျန့်သည် ထိုဝတ်ရုံနက်လူရိပ်ကို မြင်သောအခါ ချက်ချင်း အော်ဟစ်လိုက်သည်။

အဘယ်ကြောင့်ဆိုသော် ဤမုရုံယင်းဆိုသူမှာ ကျဆုံးသွားသော နှစ်ဆယ့်နှစ်အခြေခံအဆင့် အစီအရင်ပညာရှင် ဖြစ်နေသောကြောင့်ပင်။

နှစ်ဆယ့်နှစ်အခြေခံအဆင့် အစီအရင်ပညာရှင်ဆိုသည်မှာ အင်မော်တယ်နန်းတော်တွင်ပင် ထိပ်တန်း အစီအရင်ပညာရှင်အဆင့်ဖြစ်သည်။

"ငါ ဒီလောက်ထိ ပုန်းနေတာတောင် မင်းတို့က ဘာလို့ ဒီလောက်ထိလိုက်ပြီး ဖိနှိပ်နေရတာလဲ" ဝတ်ရုံနက် ဝတ်ဆင်ထားသော မုရုံယင်းက သက်ပြင်းချလိုက်သည်။ သူ့အသံသည် အက်ကွဲနေပြီး ရှုပ်ထွေးသောခံစားချက်များ ပါဝင်နေသည်။

"ဟွန်း... မင်းက ပြင်ပနတ်ဘုရားကို ကိုးကွယ်တယ်၊ ကိုယ့်ကိုယ်ကိုယ် အောက်တန်းကျအောင် လုပ်တယ်၊ ဂိုဏ်းသားတွေကို သတ်ဖြတ်တယ်၊ နတ်ဘုရားလမ်းစဉ်ကို သစ္စာဖောက်တယ်... ဒီလောက် အပြစ်တွေ ကျူးလွန်ထားတာကို မင်းက အပြစ်မရှိဘူးလို့ ပြောချင်တာလား" ကျိုးကျန့်က နှာခေါင်းရှုံ့ကာ တရားမျှတသော လေသံဖြင့် ပြောလိုက်သည်။

"အဲဒါတွေက ဘာဖြစ်လဲ။ ငါ့လမ်းကို ပိတ်တဲ့ကောင် ဘယ်သူမဆို သေရမှာပဲ" မုရုံယင်းက တည်ငြိမ်စွာ ပြောလိုက်သည်။

သူ့ရဲ့ အစီအရင်ပညာက နှစ်ဆယ့်နှစ်အခြေခံအဆင့်မှာတင် လမ်းဆုံးနေပြီ။ ရှေ့ဆက်တက်ဖို့ ဘယ်လိုမှ မဖြစ်နိုင်တော့ဘူး။ ပြင်ပနတ်ဘုရားလမ်းစဉ်ကိုလိုက်မှသာ အခြေခံအဆင့် ၂၃ ကို တက်လှမ်းဖို့ အခွင့်အရေး ရှိမှာ။

အခု သူ ဒီတံခါးဝကို ထိတွေ့မိနေပြီ။

ဒါကြောင့် သူ လုပ်ခဲ့သမျှ ဘာကိုမှ နောင်တမရဘူး။

လူဆိုတာ ကိုယ့်အတွက်ကိုယ်မကြည့်ရင် မိုးကြိုးပစ်ခံရမှာပဲ။

သူတို့ပြောတဲ့ မှန်ကန်တဲ့လမ်းစဉ်ဆိုတာ သူ့မျက်လုံးထဲမှာတော့ ဘာမှ မဟုတ်ဘူး။ တောက်ပြောင်တဲ့ အပြင်ပန်းအောက်မှာ ညစ်ပတ်မှုတွေနဲ့ အရုပ်ဆိုးမှုတွေပဲရှိတာ။

အစွမ်းထက်တဲ့ အင်အားကို ပိုင်ဆိုင်ထားခြင်းကသာ ပဓာနကျတယ်။

သူသာ လုံလောက်အောင်စွမ်းအားကြီးလာရင် ကိုယ့်ကိုယ်ကိုယ် မှန်ကန်ပါတယ်လို့ ကြွေးကြော်နေတဲ့ အင်မော်တယ်နန်းတော်တောင် သူ့ရှေ့မှာ ဒူးထောက်ခေါင်းငုံ့ရမှာပဲ။

***