ဟင်းလင်းပြင် တုန်ခါပေါက်ကွဲမှု

"ဒီနေရာက အရိုင်းဒေသဖြစ်ပြီး အလယ်ပိုင်းမြေနဲ့ ဝေးကွာတယ်၊ ပြင်ပနတ်ဘုရား စွမ်းအားတွေ စိမ့်ဝင်နေတဲ့နေရာမို့ မင်းတို့ရဲ့ နိယာမနယ်ပယ်တွေကို ဖိနှိပ်ထားမယ်ဆိုတာ သိလျက်နဲ့တောင် လာရဲကြတယ်ပေါ့။ တကယ်လို့များ မင်းတို့အားလုံး ဒီနေရာမှာ သေသွားရင် အင်မော်တယ်နန်းတော်က ဒေါသထွက်ပြီး ရူးသွားမလား မသိဘူးနော်" ဝတ်ရုံနက် ဝတ်ဆင်ထားသော မုရုံယင်းက အက်ကွဲသောအသံဖြင့် ရယ်မောလိုက်သည်။

"မုရုံယင်း... မင်း တော်တော် မောက်မာပါလား။ မင်းက မပျက်သုဉ်းနိုင်သောအဆင့် မြေဝိညာဉ် ၂၂ ကောင်ကို သုံးပြီး မွေးရာပါတိုက်ပွဲဝင် အစီအရင်ကို လေ့ကျင့်ထားပေမဲ့၊ မင်းက နှစ်ဆယ့်နှစ်အခြေခံအဆင့် အစီအရင်ပညာရှင်ဆိုတဲ့ အမှန်တရားကို ပြောင်းလဲလို့ မရပါဘူး။ တကယ်လို့ မင်းသာ အခြေခံအဆင့် ၂၃ အစီအရင်ပညာရှင်ဖြစ်ခဲ့ရင် ငါတို့တွေ မင်းရဲ့ ပြိုင်ဘက် မဟုတ်လောက်ဘူး... ဒါပေမဲ့ ဝမ်းနည်းစရာပဲ၊ မင်းက မဟုတ်ဘူးလေ။ မင်းလို လေလွင့်အစီအရင်ပညာရှင် တစ်ယောက်အနေနဲ့ နှစ်ဆယ့်နှစ်အခြေခံအဆင့် ရောက်တာကိုက အကန့်အသတ်ပဲ"

ရွှေနတ်ဘုရားကျိုးကျန့်က အေးစက်စွာ ရယ်မောလိုက်သည်။

နှစ်ဆယ့်နှစ်အခြေခံအဆင့် အစီအရင်ပညာရှင်အဆင့်ဆိုတာ နိယာမနယ်ပယ် ပိုင်ဆိုင်တဲ့ မပျက်သုဉ်းနိုင်သော ရွှေနတ်ဘုရား အဆင့်နဲ့ ညီမျှတယ်။

မုရုံယင်းက မပျက်သုဉ်းနိုင်သောအဆင့် မြေဝိညာဉ် ၂၂ ကောင်ကို သုံးပြီး မွေးရာပါတိုက်ပွဲဝင် အစီအရင် ဖွဲ့စည်းထားတာကြောင့် သူ့ရဲ့ စွမ်းအားကို သာမန် နှစ်ဆယ့်နှစ်အခြေခံအဆင့် အစီအရင်ပညာရှင်တွေနဲ့ နှိုင်းယှဉ်လို့ မရပါဘူး။

ဒါ့အပြင် တစ်ဖက်လူက အဆင့် ၃ ညစ်ညမ်းမှု ခံထားရတဲ့ ကျဆုံးသူဖြစ်နေတော့ သူတို့အတွက် ကြီးမားတဲ့ ခြိမ်းခြောက်မှုဖြစ်စေတာတော့ အမှန်ပဲ။

ဒါပေမဲ့ သူတို့ကို သတ်ဖို့ဆိုရင်တော့...

အဲဒီလောက် အရည်အချင်း မရှိသေးဘူး။

ဒီမှာရှိနေတဲ့ ရွှေနတ်ဘုရားတွေအကုန်လုံးက တိုက်ပွဲပေါင်းရာချီ ကြုံဖူးတဲ့ စစ်ပြန်တွေချည်းပဲ။ ၃၃ ဘုံရဲ့ ထိပ်သီးပုဂ္ဂိုလ်တွေ။ သူတို့ကို ဖိနှိပ်နိုင်တာဆိုလို့ အထူးရွှေနတ်ဘုရားတွေပဲ ရှိတယ်။

"ဟီးဟီး... အစီအရင်နဲ့ ပြင်ပနတ်ဘုရားစွမ်းအား ပေါင်းစပ်လိုက်ရင် ဘယ်လောက် ကြောက်စရာကောင်းတဲ့ စွမ်းအားတိုးပွားမှု ဖြစ်လာသလဲဆိုတာ မင်းတို့ လုံးဝ မသိကြပါဘူး။ နောက်ဆက်ပြီး ဒီကြောက်မက်ဖွယ်ရာကို ကောင်းကောင်းခံစားကြပေတော့" မုရုံယင်းက အသံနိမ့်ဖြင့် ရယ်မောလိုက်သည်။

နောက်တစ်စက္ကန့်တွင် ကျောက်တောင်ကြီး၏ မြေအောက်တစ်လျှောက်လုံးတွင် သွေးရောင်လွှမ်းသော ထူးဆန်းသည့် အစီအရင်လမ်းကြောင်းများ လင်းလက်လာသည်။ ဒီလမ်းကြောင်းတွေက မပျက်သုဉ်းနိုင်သောအဆင့် မြေဝိညာဉ် ၂၂ ကောင်ကို အစီအရင် ဗဟိုချက်မတွေအဖြစ် အသုံးပြုပြီး ကြီးမားသော အစီအရင်ပုံစံကြီးတစ်ခု ဖြစ်ပေါ်စေသည်။

အထူးဆန်းဆုံးမှာ ထိုမြေဝိညာဉ် ၂၂ ကောင်၏လက်ထဲတွင် အယောင်ပြသံကြိုးများ လျင်မြန်စွာ ဖြစ်ပေါ်လာပြီး၊ အချင်းချင်းချိတ်ဆက်ကာ ကြီးမားသော သံကြိုးကွန်ရက်ကြီးတစ်ခု ဖန်တီးလိုက်ခြင်း ဖြစ်သည်။

ထို့နောက် မြေဝိညာဉ် ၂၂ ကောင်က ထိုအယောင်ပြသံကြိုးများကို ရုတ်တရက် ဝှေ့ယမ်းလိုက်ရာ ကြောက်မက်ဖွယ် စွမ်းအားများက ဟင်းလင်းပြင်ကို ဖြတ်တောက်ပြီး၊ လီချန်တို့အဖွဲ့ ချိတ်ဆက်ထားသော နိယာမနယ်ပယ်ကို ဆွဲဖြဲပစ်ရန် ကြိုးစားလာကြသည်။

"ကိုယ့်ဖာသာ တိုက်ခိုက်ကာကွယ်ကြ၊ ဒီညစ်ညမ်းတဲ့စွမ်းအားတွေကို အနားမကပ်စေနဲ့" ကျိုးကျန့်က အော်ဟစ်လိုက်သည်။

အင်မော်တယ်နန်းတော်သည် ဒီလိုကျဆုံးသူတွေရဲ့ တိုက်ခိုက်မှု နည်းလမ်းတွေကို ကောင်းကောင်း နားလည်ထားပြီးသားဖြစ်သည်။

မုရုံယင်းက အစီအရင်ပညာရှင်ဖြစ်နေပြီး မပျက်သုဉ်းနိုင်သောအဆင့် မြေဝိညာဉ်တွေကို သုံးကာ မွေးရာပါတိုက်ပွဲဝင်အစီအရင် ဖွဲ့စည်းထားတယ်ဆိုရင်တောင် အခြေခံသဘောတရားကတော့ အတူတူပါပဲ။

ထို့ကြောင့် ရွှေနတ်ဘုရားများသည် မိမိတို့၏ နည်းလမ်းအသီးသီးကို ထုတ်သုံးကာ ကာကွယ်လိုက်ကြသည်။ အစွမ်းထက်သော တာအိုလက်နက်များကို ထုတ်ဖော်လိုက်ပြီး အယောင်ပြသံကြိုးများကို တားဆီးလိုက်ကြသည်။

လီချန်လည်း ထိုနည်းလည်းကောင်းပင်။ သူက အစွမ်းကုန် မထုတ်သုံးဘဲ ဒုတိယအဆင့် နိယာမနယ်ပယ်ကိုသာ အသုံးပြုလိုက်သည်။

တကယ်တော့ သူ့မှာ တတိယအဆင့် လောကသစ်ပင်ရှိနေပြီဖြစ်သည်။ အစွမ်းကုန် ထုတ်သုံးလိုက်ရင် တခြားရွှေနတ်ဘုရားတွေ သေချာပေါက်ရိပ်မိသွားလိမ့်မယ်။

အဲဒီလိုဖြစ်စရာ မလိုဘူးလေ။

ကိစ္စပြီးမှ အင်မော်တယ်နန်းတော်ရဲ့စောင့်ကြည့်ခြင်းကို မခံချင်ဘူး။

ဘာပဲပြောပြော တတိယအဆင့် လောကသစ်ပင်ဆိုတာက အထူးရွှေနတ်ဘုရားအဆင့်ထဲ ဝင်နေပြီ။

လက်ရှိအဆင့်မှာ ဖုံးကွယ်နိုင်သမျှ ဖုံးကွယ်ထားတာ အကောင်းဆုံးပဲ။

ဘာပဲဖြစ်ဖြစ် လက်ရှိအခြေအနေကို သူက အေးဆေးထိုင်ကြည့်နေလို့ရတယ်။ ဘာမှ ကြောက်စရာ မလိုဘူး။

သူ့မှာ လုံလောက်တဲ့ ယုံကြည်မှုရှိတယ်။

တကယ်လို့ မနိုင်တော့ဘူးဆိုရင်တောင် ချက်ချင်း အချိန်ခေါင်းလောင်း လှိုဏ်ဂူကောင်းကင်ဘုံထဲ ဝင်ပြေးလိုက်ရုံပဲ။

ဒါကြောင့် အခုအချိန်မှာ တခြားသူတွေနဲ့အညီလိုက်နေပြီး ခေါင်းမထောင်ဘဲ နေလိုက်တာ အကောင်းဆုံးပဲ။

လီချန်သည်လည်း သူ၏ လျန်ချီးဝိညာဉ်ဓားကို ထုတ်သုံးပြီး သံကြိုးများ၏ တိုက်ခိုက်မှုကို ကာကွယ်လိုက်သည်။

"အားက တော်တော်ပြင်းတာပဲ။ ပြီးတော့ ဒီသံကြိုးတိုက်ခိုက်မှုတွေထဲမှာ ပြင်းထန်တဲ့ အပျက်သဘောဆောင် စွမ်းအားတွေ ပါဝင်နေတယ်" လီချန် ခုခံရင်း အခြေအနေကို အကဲခတ်လိုက်သည်။

သူ့ရဲ့ လျန်ချီးဝိညာဉ်ဓားက ဝိညာဉ်လက်နက်အဆင့်ပဲ ရှိသေးတာမို့ တိုက်ခိုက်အားမှာ နည်းနည်း အားနည်းနေတယ်။ ကောင်းကင်ဘုံကိုးလွှာဓား သိုင်းကို ထုတ်မသုံးရင်ပေါ့... ဒါပေမဲ့ သူက ကောင်းကင်ဘုံကိုးလွှာဓားကို သေချာပေါက် ထုတ်သုံးမှာ မဟုတ်ဘူး။

အခြား ရွှေနတ်ဘုရားများသည် လီချန်၏ မွေးရာပါလက်နက်မှာ ဝိညာဉ်ဓားအဆင့်သာ ရှိသေးသည်ကိုတွေ့သောအခါ အလွန်အံ့သြသွားကြသည်။

ဒီမှာရှိတဲ့ ရွှေနတ်ဘုရားတွေထဲမှာ တာအိုလက်နက် ၃-၄ လက် မရှိတဲ့သူ ဘယ်သူရှိလို့လဲ။

သာမန်လက်နက်တောင် မဟုတ်ဘူး၊ မွေးရာပါလက်နက်လေ။

ဝိညာဉ်လက်နက်နဲ့ တာအိုလက်နက် ကွာခြားချက်က အရမ်းကြီးမားတယ်။

ဝိညာဉ်လက်နက်က ရွှေနတ်ဘုရားတစ်ပါးရဲ့ စစ်မှန်တဲ့ စွမ်းအားကို ထုတ်ဖော်လို့ မရဘူး။

ဒါကြောင့် သူတို့ သုံးသပ်လိုက်တာက လီချန်ဟာ ဟုန်ယွင်နတ်ဘုရားဂိုဏ်းရဲ့ ဧည့်အကြီးအကဲ ဖြစ်ပေမဲ့၊ သာမန် နတ်ဘုရားဂိုဏ်းငယ်လေးက လာတာဖြစ်မယ်... ဒါမှမဟုတ် လေလွင့်ကျင့်ကြံသူဖြစ်မယ်။ ဒါကြောင့် တာအိုလက်နက် တစ်လက်တောင်မရှိတာနေမှာ။

တကယ်တမ်းကျတော့ လီချန်လက်ထဲမှာ တာအိုလက်နက်တွေ ရှိပါတယ်။

သူက တာအိုပေါင်းစည်းခြင်းအဆင့် ၄ ယောက်ကို သတ်ခဲ့ဖူးတာလေ။ ဒါပေမဲ့ အဲဒီတာအိုလက်နက်တွေနဲ့ မိစ္ဆာလက်နက်တွေကို ထုတ်ပြလို့မရဘူး။

ထုတ်သုံးလိုက်တာနဲ့ သူက လူသတ်တရားခံပါလို့ ဝန်ခံလိုက်သလို ဖြစ်သွားမှာပေါ့။

"သတိထား... သူ တိုက်ပွဲဝင်အစီအရင်ရဲ့သတ်ကွက်ကို သုံးတော့မယ်" ရုတ်တရက် ကျိုးကျန့်က အော်ပြောလိုက်သည်။

ထင်တဲ့အတိုင်းပင်။ အပြင်ဘက်တွင် တားဆီးခံထားရသော သံကြိုးများသည် ရုတ်တရက် တစ်ခုနှင့်တစ်ခု လိမ်ယှက်သွားပြီး ကြောက်မက်ဖွယ် တူကြီးတစ်လက်အသွင် ပြောင်းလဲသွားသည်။ သံကြိုးတူကြီး၏ အစွန်းတစ်ဖက်တွင် ဟင်းလင်းပြင်ထဲမှ ဆန့်ထွက်လာသော ပုံသဏ္ဍာန်မဲ့ လက်ကြီးတစ်ဖက်ကို ဝိုးတဝါးမြင်နေရသည်။

ရုတ်ခြည်းဆိုသလို ကြောက်မက်ဖွယ်အရှိန်အဝါများ လွှမ်းခြုံလာပြီး လူတိုင်း၏ရင်ထဲတွင် တုန်လှုပ်သွားကြသည်။

"ဒီကောင်က အစီအရင်နဲ့ ပြင်ပနတ်ဘုရား စွမ်းအားကို ပေါင်းစပ်ထားတာပဲ။ သူ ကျဆုံးသူ ဖြစ်သွားတာ မကြာသေးခင်ကမှ မဟုတ်လောက်ဘူး။ အချိန်အကြာကြီးရှိနေပြီဖြစ်မယ်" ရွှေနတ်ဘုရားတစ်ပါးက ဒီမြင်ကွင်းကိုကြည့်ပြီး မျက်လုံးများ အေးစက်သွားသည်။

"ဒီမုရုံယင်းက ဒီလောက်ထိ နက်နက်ရှိုင်းရှိုင်း ဖုံးကွယ်ထားနိုင်လိမ့်မယ်လို့ ထင်မထားမိဘူး။ ဒီတစ်ခါမှပဲ ပေါ်လာတော့တယ်" ရွှေနတ်ဘုရားချူယန်က သက်ပြင်းချလိုက်သည်။

"လာပြီ" ကျိုးကျန့်က အသက်ပြင်းပြင်း ရှူလိုက်သည်။

သူသည် သူ၏ နိယာမနယ်ပယ်ကို အစွမ်းကုန် ဖြန့်ကျက်လိုက်ရာ၊ မရေမတွက်နိုင်သော သစ်ပင်စိမ်း အရိပ်များ ပေါ်ထွက်လာပြီး စိမ်းလန်းစိုပြေသော ကောင်းကင်ယံတစ်ခုသဖွယ်ဖြစ်ပေါ်လာသည်။

အခြားရွှေနတ်ဘုရားများသည်လည်း မိမိတို့၏ နိယာမနယ်ပယ်များကို အစွမ်းကုန်ထုတ်ဖော်လိုက်ကြရာ ထူးဆန်းသော ပုံရိပ်အမျိုးမျိုး ပေါ်ထွက်လာကြသည်။

လီချန် ထုတ်ဖော်လိုက်သော နိယာမနယ်ပယ်တွင်တော့ လင့်တုန်းနိယာမ သာမက ကြာစိမ်းဓားအစီအရင်ပါ ပါဝင်နေသည်။ သူ့ကို ဗဟိုပြုပြီး ကြီးမားသော ကြာပန်းဓားအစီအရင်ကြီးတစ်ခု ဖွဲ့စည်းလိုက်သည်။

ကြာပန်းဓားအစီအရင် တစ်ခုလုံးတွင် စုစုပေါင်း ၁၂ ဆင့် ပါဝင်သည်။

ဒါကတော့ လီချန် ထုတ်သုံးလိုက်တဲ့ ၁၂ ဆင့် ကြာစိမ်းဓားအစီအရင်ပဲ ဖြစ်ပါတယ်။

၁၂ ဆင့် ကြာပန်းကြီး ဖြည်းညှင်းစွာ ပွင့်အာလာသည်နှင့်အမျှ အေးစက်သော ဆောင်းရာသီ အငွေ့အသက်များ ပြည့်နှက်သွားသည်။

ဝုန်း!

ကြောက်မက်ဖွယ် သံကြိုးတူကြီးသည် ပြင်းထန်စွာ ထုချလိုက်သည်။

ဟင်းလင်းပြင်ကို ဆွဲဖြဲပစ်လိုက်ပြီး အထပ်ထပ် ဖြစ်နေသော နိယာမနယ်ပယ်များပေါ်သို့ ပြင်းထန်စွာ ရိုက်ခတ်လိုက်သည်။

ကျယ်လောင်သော မြည်ဟည်းသံကြီးနှင့်အတူ ရွှေနတ်ဘုရား ၁၀ ယောက်ကျော်သည် တစ်ကိုယ်လုံး တုန်ခါသွားကြသည်။ ဒီတူကြီးက သူတို့၏ နှလုံးသားတည့်တည့်ကို ထုချလိုက်သလို ခံစားလိုက်ရပြီး အားလုံး မူးဝေသွားကြသည်။

သိသာထင်ရှားသည်မှာ ဤတူချက်တွင် ပါဝင်သော စွမ်းအားသည် နိယာမနယ်ပယ်ကိုသာမက လူတိုင်း၏ စိတ်ဝိညာဉ်ကိုပါ တိုက်ခိုက်နိုင်စွမ်း ရှိနေသည်။

မြေဝိညာဉ် ၂၂ ကောင်က လက်ကို ပြင်းထန်စွာ ဝှေ့ယမ်းလိုက်သည်နှင့် ကြီးမားသော သံကြိုးတူကြီးသည် ထပ်မံ မြင့်တက်သွားပြီးနောက် ပြင်းထန်စွာ ထုချလိုက်ပြန်သည်။

တစ်ချက်၊ နှစ်ချက်၊ သုံးချက်။

ငါးချက်၊ ဆယ်ချက်၊ အချက်နှစ်ဆယ်...

ကြောက်မက်ဖွယ် တူကြီးသည် တစ်ချက်ပြီးတစ်ချက် ထုချနေပြီး ရွှေနတ်ဘုရားများအပေါ် ကြီးမားသောဖိအားကို ဖြစ်ပေါ်စေသည်။

ထိုတူကြီးသည် အဆုံးမရှိသကဲ့သို့ပင်။

ရုတ်တရက် ရွှေနတ်ဘုရားတစ်ပါး တောင့်မခံနိုင်တော့ဘဲ နိယာမနယ်ပယ် ကွဲကြေသွားကာ ပါးစပ်မှ သွေးတစ်လုပ် အန်ထုတ်လိုက်ရသည်။

ကံကောင်းသည်မှာ အခြားသော နိယာမနယ်ပယ်များက တူကြီးကို ဆက်လက်ခုခံထားနိုင်သေးသည်။ သို့မဟုတ်ပါက ထိုတူချက်အောက်တွင် အဆိုပါရွှေနတ်ဘုရားသည် အသားပြားဖြစ်သွားလောက်သည်။

သို့သော် လီချန်သည် တူကြီး၏အရှိန်အဝါ လျော့နည်းလာသည်ကို အာရုံခံမိလိုက်သည်။

ရွှေနတ်ဘုရားများဘက်ကလည်း တူကြီးကို ခုခံရင်း စွမ်းအင်ကုန်ခမ်းမှု များပြားနေပြီ ဖြစ်သည်။

နောက်ထပ် တူတစ်ချက် ထုချလိုက်သောအခါ နောက်ထပ် ရွှေနတ်ဘုရားတစ်ပါး၏ နိယာမနယ်ပယ် ပျက်စီးသွားပြန်သည်။

ထို့နောက် တတိယမြောက်၊ စတုတ္ထမြောက်...

၈ ခုမြောက် နိယာမနယ်ပယ် ပျက်စီးသွားပြီးနောက်၊ ထပ်မံ မြင့်တက်လာသော တူကြီးသည်လည်း ပြိုကွဲသွားပြီး သံကြိုးများအဖြစ်သို့ ပြန်လည်ပြောင်းလဲသွားသည်။

မပျက်သုဉ်းနိုင်သောအဆင့် မြေဝိညာဉ်တစ်ကောင်ပေါ်တွင်ရပ်နေသော မုရုံယင်းသည် ဤမြင်ကွင်းကို မြင်သောအခါ နှမြောတသသောအမူအရာ ပေါ်လာသည်။

ဝမ်းနည်းစရာက သူ့ရဲ့ တိုက်ပွဲဝင်အစီအရင်က မပြည့်စုံသေးဘူး။

တကယ်လို့ သူ့ကို အချိန်နည်းနည်းလောက်ပေးရင် ဒီနိယာမနယ်ပယ်တွေကို အပြီးတိုင် ချိုးဖျက်နိုင်မှာဖြစ်ပြီး၊ ဒီရွှေနတ်ဘုရားတွေကို တူနဲ့ထုပြီး သတ်ပစ်နိုင်မှာ။

တကယ် နှမြောစရာပဲ။

သူ့ရဲ့မြေဝိညာဉ်တွေကို ကြည့်လိုက်တော့ အားလုံး အသက်ရှူနှုန်းမြန်ပြီး အားနည်းနေကြပြီ။

အစီအရင်တစ်ခုလုံးကို အလွန်အကျွံ အသက်သွင်းလိုက်ရတော့ ဒီမြေဝိညာဉ်တွေအတွက် ဝန်ပိသွားတာ။

ဒီမြေဝိညာဉ်တွေက သူ့ရဲ့ အားဆေးထိုး ကြီးထွားမှုကြောင့် ပြင်ပနတ်ဘုရား ဆွေတော်မျိုးတော် သွေးမျိူးဆက်နိုးထလာပြီး မပျက်သုဉ်းနိုင်သောအဆင့် ရောက်လာကြပေမဲ့... သဘာဝအတိုင်း ကြီးထွားလာတာ မဟုတ်တဲ့အတွက် အနှစ်သာရအားဖြင့် အပြစ်အနာအဆာရှိတဲ့ ပစ္စည်းတွေပဲ။

ဒီတစ်ခါ သုံးပြီးသွားရင် အကြာကြီးပြန်နားပြီး ကုစားမှရတော့မယ်။

"ထျန်းလော်တီဝမ် တားမြစ်နယ်မြေ" မုရုံယင်းသည် အသက်ပြင်းပြင်း ရှူလိုက်ပြီးနောက် မျက်လုံးများ ပြတ်သားသွားသည်။

နောက်တစ်စက္ကန့်တွင် သူက လက်ဟန်ဖြင့် ဂါထာရွတ်လိုက်ရာ မျက်ခုံးနှစ်ခုကြားတွင် ထူးဆန်းသော အမှတ်အသားတစ်ခု ပေါ်လာပြီး မီးခိုးရောင် မျက်လုံးတစ်လုံးအသွင် ပြောင်းလဲသွားကာ မျက်ခုံးကြားမှ ပြူးထွက်လာတော့မယောင်ဖြစ်နေသည်။

ထိုမျက်လုံးက ပုတ်ခတ်ပုတ်ခတ် လုပ်လိုက်သည်နှင့် မပျက်သုဉ်းနိုင်သောအဆင့် မြေဝိညာဉ် ၂၂ ကောင်သည် ရုတ်တရက် ဟိန်းဟောက်လိုက်ကြပြီး ခန္ဓာကိုယ်များ သိသိသာသာ ပြောင်းလဲလာသည်။ အရွယ်အစား ကြီးလာရုံသာ မဟုတ်ဘဲ ပုံသဏ္ဍာန်ပါ ပြောင်းလဲသွားကြသည်။

အချို့က ကြောက်မက်ဖွယ် အတောင်ပံများ ပေါက်လာပြီး တစ်ကိုယ်လုံး အစိမ်းရောင် မီးတောက်များ လောင်ကျွမ်းနေသည်။ အချို့က ခန္ဓာကိုယ်မှ အဆစ်များထွက်လာပြီး အရေပြားများက သံချပ်ကာကဲ့သို့ မာကျောလာကာ ခရုတစ်ကောင်လို ဖြစ်သွားသည်။ အချို့က တစ်ကိုယ်လုံး အနီရောင် အမွေးရှည်ကြီးများ ပေါက်လာသည်။

မြေဝိညာဉ် ၂၂ ကောင်သည် ပုံသဏ္ဍာန် ပြောင်းလဲပြီးနောက် အရှိန်အဝါများ အလွန် ကြမ်းတမ်းလာကြသည်။

ရုတ်တရက် ထိုမြေဝိညာဉ်များ၏ လှုပ်ရှားမှုသည် နှေးကွေးသွားပြီး လျင်မြန်စွာ ခဲသွားသကဲ့သို့ ဖြစ်လာသည်။

နောက်ဆုံးတွင် မြေဝိညာဉ်အားလုံးသည် ရုပ်တုများအဖြစ် ပြောင်းလဲသွားကြသည်။

ထူးဆန်းသည်မှာ မြေဝိညာဉ်များ ရုပ်တုအဖြစ် ပြောင်းလဲသွားသည့်အချိန်တွင် အယောင်ပြသံကြိုးများလည်း လုံးဝ ပျောက်ကွယ်သွားပြီး၊ ထူးခြားသော အကာအရံ နယ်မြေတစ်ခု ဖြစ်ပေါ်လာကာ လူအားလုံးကို လွှမ်းခြုံထားလိုက်သည်။

အတွင်း၌ ရှိနေသူများသည် ပြင်ပကမ္ဘာနှင့် အဆက်အသွယ် ပြတ်တောက်သွားသလို ခံစားလိုက်ကြရသည်။

ဘေးနားက လူတွေတောင် ပျောက်သွားသလိုပဲ။

"ဒါ ဘာအစီအရင်လဲ" လီချန်သည် ၁၂ ဆင့် ကြာစိမ်းဓားအစီအရင်ကို ထိန်းထားရင်း ဟင်းလင်းပြင်ထဲမှ ပုံသဏ္ဍာန်မဲ့သော စွမ်းအားတစ်ခုက သူ့ကို ချိန်ရွယ်ထားကြောင်း ခံစားလိုက်ရသည်။

သူက နတ်ဘုရားအာရုံဖြင့် အစီအရင်၏ပြောင်းလဲမှုကို အစွမ်းကုန် အာရုံခံကြည့်သော်လည်း၊ သူက နှစ်ဆယ်အခြေခံ အစီအရင်ပညာရှင်သာဖြစ်သဖြင့် တစ်ဖက်လူနှင့် အဆင့်ကွာခြားလွန်းရာ ဤအစီအရင်၏ လည်ပတ်ပုံကို နားမလည်နိုင်ပေ။

ဤအစီအရင်သည် ကောင်းကင်နှင့်မြေကြီးကိုပါ ပေါင်းစပ်ထားသကဲ့သို့ပင်။

ရုတ်တရက် လီချန်၏ရင်ထဲတွင် အန္တရာယ် အငွေ့အသက်များ တက်လာသဖြင့် တွေဝေမနေတော့ဘဲ ၁၂ ဆင့် ကြာစိမ်းဓားအစီအရင်ကို အစွမ်းကုန်လှုပ်ရှားပြီး ကိုယ့်ကိုယ်ကိုယ် လုံးဝ ပိတ်လှောင် ကာကွယ်လိုက်သည်။

ထိုအချိန်လေးအတွင်းမှာပင် ဟင်းလင်းပြင်ကြီးတစ်ခုလုံး ရုတ်တရက် တုန်ခါသွားပြီး ကွဲအက်ပြိုကျသွားသကဲ့သို့ ဖြစ်ကာ ကြောက်မက်ဖွယ်စွမ်းအင်များ ပေါက်ကွဲထွက်ပေါ်လာပြီး ဤဟင်းလင်းပြင်အတွင်းရှိ အရာအားလုံးကို ဖျက်ဆီးပစ်တော့သည်။

လီချန်သည် ၁၂ ဆင့် ကြာစိမ်းဓားအစီအရင်ကို ရူးသွပ်ဖွယ် စွမ်းအင်များက တိုက်ခိုက်နေသည်ကို ခံစားလိုက်ရသည်။

သူ မတတ်နိုင်တော့ဘဲ လင့်တုန်းနိယာမ နယ်ပယ်၏ စွမ်းအားကို မြှင့်တင်လိုက်ရပြီး၊ နောက်ဆုံးတွင် တတိယအဆင့် နိယာမစွမ်းအား နီးပါး ရောက်သွားမှသာ ၁၂ ဆင့် ကြာစိမ်းဓားအစီအရင်က တောင့်ခံနိုင်သွားသည်။

"ဒါ ဘာတိုက်ခိုက်မှုလဲ" လီချန် တိတ်တဆိတ် ထိတ်လန့်သွားသည်။

ရူးသွပ်ဖွယ်စွမ်းအင်များ အနည်းငယ် လျော့ကျသွားမှသာ လီချန် ပတ်ဝန်းကျင်အခြေအနေကို အာရုံခံနိုင်တော့သည်။ အခြား ရွှေနတ်ဘုရား ၁၀ ယောက်ကျော်သည် အနည်းနှင့်အများ ဒဏ်ရာရထားကြပြီး အချို့ဆိုလျှင် ဒဏ်ရာပြင်းထန်သည်။

ဒါပေမဲ့ ဘယ်သူမှ မသေကြပါဘူး။

ဒါကလည်း ပုံမှန်ပါပဲ။ အားလုံးက နိယာမနယ်ပယ် ပိုင်ဆိုင်ထားတဲ့ ရွှေနတ်ဘုရားတွေလေ။ ဘယ်လွယ်လွယ်နဲ့ သေပါ့မလဲ။

ပြီးတော့ တစ်ယောက်ချင်းစီမှာ အသက်ကယ် ဝှက်ဖဲတွေ ရှိကြတာပဲ။

တချို့လူတွေရဲ့ နှမြောတသဖြစ်နေတဲ့ မျက်နှာတွေကို ကြည့်ရင်၊ စောစောက ကြောက်မက်ဖွယ်ရာ ဟင်းလင်းပြင် တုန်ခါပေါက်ကွဲမှုကို ခုခံဖို့အတွက် တန်ဖိုးကြီး ပေးဆပ်လိုက်ရတယ်ဆိုတာ သိသာတယ်။

"သောက်ကျိုးနည်း... သူက မွေးရာပါတိုက်ပွဲဝင် အစီအရင်ကို သုံးပြီး ဟင်းလင်းပြင်ကို ဖောက်ခွဲပစ်လိုက်တာပဲ။ ကိုယ့်ကိုယ်ကိုယ် ပြန်ထိခိုက်မှာ မကြောက်ဘူးလား" ကျိုးကျန့်က ဖုန်တွေ သဲတွေ ပေကျံလျက် မျက်နှာပျက်နေသည်။

ဒဏ်ရာ အရမ်းမပြင်းပေမဲ့ စွမ်းအင်ကုန်ခမ်းမှုက မနည်းလှဘူး။

အဲဒီလို ဟင်းလင်းပြင်တုန်ခါပေါက်ကွဲမှုမျိုးက စွမ်းအားအရမ်းကြီးလွန်းတော့ သူလည်း အသက်ကယ် ဝှက်ဖဲကို ထုတ်သုံးလိုက်ရတာ။

ယခုအချိန်တွင် အခင်းဖြစ်ပွားရာ၌ ရွှေနတ်ဘုရား ၁၀ ယောက်ကျော်မှလွဲ၍ မပျက်သုဉ်းနိုင်သောအဆင့် မြေဝိညာဉ် ၂၂ ကောင်လုံး ပျောက်ချင်းမလှ ပျောက်သွားကြပြီ။

ဝတ်ရုံနက် ဝတ်ဆင်ထားသော မုရုံယင်းလည်း ပျောက်ကွယ်သွားပြီ။

"ထူးဆန်းတယ်... ဒီလူ ဘယ်လိုထွက်ပြေးသွားတာလဲ" ချူယန်က မျက်မှောင်ကြုတ်ထားသည်။

ပုံမှန်ဆိုရင် အဲဒီကျဆုံးသူက ခြေရာလက်ရာ ကျန်ရစ်ခဲ့ရမှာ။

"စောစောက ဟင်းလင်းပြင် တုန်ခါပေါက်ကွဲမှုဖြစ်တုန်း အခွင့်ကောင်းယူပြီး ဟင်းလင်းပြင် ကူးသန်းခြင်းနဲ့ ထွက်ပြေးသွားတာ ဖြစ်နိုင်မလား" လီချန်က ပြောလိုက်သည်။

"အင်း... ဖြစ်နိုင်ချေရှိတယ်။ ဒါပေမဲ့... ဟင်းလင်းပြင် တုန်ခါပေါက်ကွဲမှုကို အမှီပြုပြီး ကူးသန်းသွားတာဆိုရင် အဝေးကြီးရောက်မှာမဟုတ်ဘူး" ကျိုးကျန့်က အသက်ပြင်းပြင်း ရှူပြီး ခေါင်းညိတ်လိုက်သည်။ "အဲဒီကျဆုံးသူက မွေးရာပါတိုက်ပွဲဝင် အစီအရင်ကို ဖောက်ခွဲလိုက်လို့ သူ့အင်အားက ၁၀ ပုံ ၁ ပုံတောင် ကျန်မှာမဟုတ်ဘူး။ ငါတို့ နှစ်ယောက်တစ်တွဲ ရှာဖွေကြမယ်။ လုံးဝ အလွတ်ပေးလို့မဖြစ်ဘူး"

တကယ်လို့ မုရုံယင်းကို မသတ်နိုင်ရင် ဒီတစ်ခေါက် ရှင်းလင်းရေးတာဝန်က ကျရှုံးတာပဲ။

ပြီးတော့ တစ်ဖက်လူက မပျက်သုဉ်းနိုင်သောအဆင့် မြေဝိညာဉ် ၂၂ ကောင်ကို သုံးပြီး မွေးရာပါတိုက်ပွဲဝင် အစီအရင် လုပ်နိုင်တယ်ဆိုကတည်းက၊ မပျက်သုဉ်းနိုင်သောအဆင့် မြေဝိညာဉ်တွေကို အစုလိုက်အပြုံလိုက် မွေးမြူနိုင်တဲ့နည်းလမ်းရထားတာ သေချာတယ်။

ဒီလူ့ကို အချိန်ထပ်ပေးလိုက်ရင် နောင်ကျ ဒုက္ခရောက်ကုန်လိမ့်မယ်။

မကြာခင်မှာပဲ အဖွဲ့ခွဲလိုက်ကြသည်။

လီချန် နဲ့ ချူယန်တို့က တစ်ဖွဲ့ ဖြစ်သွားသည်။

သူတို့နှစ်ဦး လမ်းတစ်လျှောက် ရှာဖွေခဲ့သော်လည်း ဘာမှ မတွေ့ရပေ။ အဲဒီကျဆုံးသူက လုံးဝ ပျောက်ချင်းမလှ ပျောက်သွားသလိုပဲ။

"တကယ်ကြီး လွတ်သွားတာတော့ မဟုတ်ပါဘူးနော်" ချူယန်က စိတ်ပျက်လက်ပျက် ပြောလိုက်သည်။

ကျဆုံးသူ ထွက်ပြေးလွတ်မြောက်သွားရင် သူတို့တာဝန် ကျရှုံးပြီ။ ဘာအကျိုးအမြတ်မှ မရတဲ့အပြင် ဆုံးရှုံးမှုတောင် များသေးတယ်။

သူဆိုရင် ကာကွယ်ရေး တာအိုလက်နက်တစ်လက် ဆုံးရှုံးသွားရသလို၊ ဒဏ်ရာလည်း မနည်းဘူး။

သူ့ လောကသစ်ပင် နိယာမက အဆင့် ၂ ရောက်တာ သိပ်မကြာသေးတော့ စောစောက ဟင်းလင်းပြင် တုန်ခါပေါက်ကွဲမှုမှာ တော်တော် ထိခိုက်သွားတာ။

လဝက်လောက်ကြာအောင် ပိုက်စိပ်တိုက် ရှာဖွေပြီးနောက်၊ ပတ်ဝန်းကျင် တစ်ခွင်လုံး ပြောင်းပြန်လှန်မတတ် ရှာဖွေခဲ့သော်လည်း ကျဆုံးသူ၏ အရိပ်အယောင်ကို မတွေ့ရပေ။

လူအားလုံး မူလနေရာသို့ ပြန်လည် စုဝေးရောက်ရှိလာကြသည်။

လက်မခံချင်ပေမဲ့ ဒီလောက်ရက်ကြာတဲ့အထိ ရှာမတွေ့တော့ဘူးဆိုမှတော့ ဒီတာဝန်က ကျရှုံးသွားပြီလို့ သတ်မှတ်ရမှာပဲ။

"ငါ အရင်သွားနှင့်တော့မယ်" တာ့လုနတ်ဘုရားဂိုဏ်းမှ ရွှေနတ်ဘုရားက ပြောပြီးသည်နှင့် ကောင်းကင်သို့ ပျံတက်သွားကာ ချက်ချင်းပျောက်ကွယ်သွားသည်။

ဆက်ရှာနေလည်း အချိန်ဖြုန်းရာပဲ ကျမယ်လေ။

အခြားသူများလည်း တစ်ယောက်ပြီးတစ်ယောက် ထွက်ခွာသွားကြသည်။

"တာအိုရောင်းရင်းလီ... ကျွန်တော့်ရဲ့ ချင်းမင်နတ်ဘုရားဂိုဏ်းကို လာလည်ဖို့ စိတ်ကူးရှိလား" ချူယန်က ဖိတ်ခေါ်လိုက်သည်။

"တာအိုရောင်းရင်းချူ... နောက်မှ အားတဲ့အချိန် လာခဲ့ပါ့မယ်" လီချန်က ပြောလိုက်သည်။

"ကောင်းပြီလေ" ချူယန် ခေါင်းညိတ်လိုက်ပြီး လျင်မြန်စွာ ထွက်ခွာသွားသည်။

......

လူအားလုံး ထွက်ခွာသွားပြီးနောက် လီချန် မေးစေ့ကို ပွတ်သပ်လိုက်သည်။ ထို့နောက် သူ့ခန္ဓာကိုယ် လှုပ်ရှားလိုက်ပြီး ပျောက်ကွယ်သွားကာ အချိန်ခေါင်းလောင်း လှိုဏ်ဂူကောင်းကင်ဘုံ အတွင်းသို့ တိုက်ရိုက် ဝင်ရောက်သွားသည်။

သို့သော် သူသည် နတ်ဘုရားအာရုံတစ်မျှင်ကို အပြင်သို့ ထုတ်လွှတ်ထားပြီး ပတ်ဝန်းကျင် လှုပ်ရှားမှုများကို အာရုံခံနေလိုက်သည်။

ထိုကျဆုံးသူ ဘယ်လိုနည်းလမ်းနဲ့ ထွက်ပြေးသွားလဲဆိုတာ သူ မသိပေမဲ့... လီချန် သံသယရှိတာက... တစ်ဖက်လူက အခင်းဖြစ်ပွားရာနေရာကနေ ထွက်မပြေးဘဲ၊ ထူးခြားတဲ့ နည်းလမ်းတစ်ခုခု သုံးပြီး ဒီနေရာမှာပဲ ပုန်းအောင်းနေတာဖြစ်မယ်။

သူ တခြားသူတွေကို ထုတ်မပြောခဲ့ခြင်းမှာ၊ ရည်ရွယ်ချက် တစ်ခုတည်း ရှိသည်။ အဲဒါကတော့ တစ်ယောက်တည်း အပိုင်စီးချင်လို့။

တကယ်လို့ သူ့ထင်မြင်ချက်သာ မှန်ခဲ့ရင်...

ဒီကျဆုံးသူက နှစ်ဆယ့်နှစ်အခြေခံအဆင့် အစီအရင်ပညာရှင်ဖြစ်တဲ့အတွက် သူ့ကိုယ်ပေါ်မှာ နှစ်ဆယ့်နှစ်အခြေခံအဆင့် အစီအရင်ကျမ်းတွေပါလာမှာ သေချာတယ်။

ဒါကိုသာ ရလိုက်ရင် ရှယ်ပဲ။

နောက်ပြီး နိယာမညစ်ညမ်းပစ္စည်းတွေလည်း ရှိသေးတယ်။

အန္တရာယ်ရှိတာတော့ ရှိတာပေါ့။

ဒါပေမဲ့ စွန့်စားသင့်တဲ့ အန္တရာယ်မျိုးဆိုရင် စွန့်စားရမှာပဲ။

အဲဒီကျဆုံးသူကို ဖမ်းမိလိုက်ရင် အကျိုးအမြတ်က အရမ်း များလွန်းတယ်။

***