ကြီးမားသော ရိတ်သိမ်းမှု

ဒီလိုနှင့် တစ်လကျော် ကြာမြင့်သွားသည်။ လီချန်သည် အချိန်ခေါင်းလောင်း လှိုဏ်ဂူကောင်းကင်ဘုံထဲတွင်နေပြီး အပြင်ဘက်ကို စောင့်ကြည့်နေခဲ့သည်။

သာမန်အချိန်ဆိုရင် သူ ဒီလောက်ဇွဲကောင်းမှာ မဟုတ်ပါဘူး။

ဒါပေမဲ့ အဲဒီကျဆုံးသူက နှစ်ဆယ့်နှစ်အခြေခံအဆင့်ရှိတဲ့ အစီအရင်ပညာရှင် ဖြစ်နေတယ်။ သူ့ကိုယ်ပေါ်မှာ အစီအရင်နဲ့ပတ်သက်တဲ့ ပစ္စည်းကောင်းတွေ အများကြီးရှိမှာ သေချာတယ်။

အချိန်နည်းနည်း ပိုပေးရမယ်ဆိုရင်တောင် တန်ပါတယ်။

"နောက်ထပ် ရက်နည်းနည်းလောက် ထပ်စောင့်ကြည့်မယ်။ ပေါ်မလာရင်တော့ လက်လျော့လိုက်တော့မယ်" လီချန် ဒီလိုတွေးမိတာ အကြိမ်ကြိမ်ရှိနေပြီ။

အဓိကက ပျင်းစရာ အရမ်းကောင်းလွန်းလို့လေ။

ကျင့်ကြံလို့လည်း မရ။ တခြားကိစ္စတွေလည်း လုပ်လို့မရ။ အမြဲတမ်း စောင့်ကြည့်နေရတာ။

တခြားလူကို စောင့်ခိုင်းလို့ကလည်း မရဘူး။ အချိန်ခေါင်းလောင်း လှိုဏ်ဂူကောင်းကင်ဘုံထဲကနေ အပြင်ကိုလှမ်းကြည့်နိုင်တဲ့စွမ်းရည်က သူတို့မှာမှမရှိတာ။ ပြီးတော့ သူတို့ ကျင့်ကြံမှုအဆင့်ကလည်း မမီဘူး။

ရုတ်တရက် လီချန် စိတ်လှုပ်ရှားသွားသည်။ သူ၏ နတ်ဘုရားအာရုံက အပြင်ဘက်မှာ လှုပ်ရှားမှုတစ်ခုကို အာရုံခံမိလိုက်လို့ပင်။

သူ ဘာမှတွေးမနေတော့ဘဲ အချိန်ခေါင်းလောင်း လှိုဏ်ဂူကောင်းကင်ဘုံထဲကနေ ချက်ချင်း ထွက်လိုက်ပြီး၊ အားကောင်းလှသော နိယာမနယ်ပယ်ကို ဖြန့်ကျက်ကာ ဝတ်ရုံနက် လူရိပ်ကို ချက်ချင်း လွှမ်းခြုံ ဖမ်းချုပ်လိုက်သည်။

"မင်း..." ဝတ်ရုံနက် ဝတ်ဆင်ထားသော မုရုံယင်းသည် လေထဲကနေ ရုတ်တရက် ပေါ်လာသော လီချန်ကို မြင်သောအခါ ကြောင်အသွားသည်။

သူ ဒီလောက်အကြာကြီး ပုန်းနေခဲ့တာ။ ဒီနေ့မှ စိတ်ချရပြီထင်လို့ ထွက်လာတာလေ။ သူ့သည်းခံနိုင်စွမ်းက အလုံအလောက်ရှိခဲ့ပါတယ်။

ဒါပေမဲ့ ဒီနေရာမှာ ယုန်စောင့်ဖမ်းသလို စောင့်ဖမ်းနေတဲ့သူရှိနေလိမ့်မယ်လို့ ဘယ်သူက ထင်မှာလဲ။

ဒါက ယုတ္တိမရှိလွန်းဘူး။

"မုရုံယင်း... ခင်ဗျားကိုစောင့်ရတာ ကျွန်တော် တော်တော်ဒုက္ခရောက်တာပဲ" လီချန်က သက်ပြင်းချရင်း ပြောလိုက်သည်။

တစ်လကျော်ကျော်ကြီး... ပျင်းလွန်းလို့ သေတော့မယ်။

ဒီကောင်က တော်တော်သည်းခံနိုင်စွမ်းရှိတာပဲ။

"ငါ မထွက်သွားသေးဘူးဆိုတာကို မင်း ဘယ်လိုသိတာလဲ။ ပြီးတော့... မင်း ဘယ်လို ပုန်းနေတာလဲ" မုရုံယင်း၏ လေသံထဲတွင် မယုံနိုင်မှုများ ပြည့်နှက်နေသည်။

"ခင်ဗျားလည်း ပုန်းနေတာပဲလေ။ ကျွန်တော်တို့ရှာတာ ဒီလောက်ကြာတာတောင် ရှာမတွေ့ခဲ့ဘူးမလား" လီချန်က ပြုံးစစဖြင့် ပြောလိုက်သည်။

"ငါ့ကို ဘယ်လိုလုပ်မှ လွှတ်ပေးမှာလဲ" မုရုံယင်းက သက်ပြင်းချလိုက်သည်။ "ငါ့ရဲ့ မွေးရာပါတိုက်ပွဲဝင်အစီအရင် ပျက်စီးသွားပြီဆိုပေမဲ့... မင်း ငါ့ကို အတင်း လိုက်ဖိအားမပေးနဲ့။ မဟုတ်ရင် မင်းလည်း ကောင်းကောင်းနေရမှာမဟုတ်ဘူး"

"ကျွန်တော် လုပ်မှာကတော့..." လီချန်က တည်ငြိမ်စွာ ပြောလိုက်သည်။ "ခင်ဗျားကို သတ်မှာ... ဒီကျဆုံးသူကောင်ရဲ့"

နောက်တစ်စက္ကန့်တွင် တောက်ပသော ဓားအလင်းတန်းတစ်ခု ပေါ်ထွက်လာပြီး မုရုံယင်း၏ မျက်ခုံးနှစ်ခုကြားကို ဖောက်ထွင်းသွားသည်။

ချက်ချင်းပင် မုရုံယင်း၏ ခန္ဓာကိုယ်ပေါ်မှ ထူးဆန်းပြီး ဝါးတားတား အရိပ်မည်းတစ်ခု ပေါ်ထွက်လာပြီး ကြောက်မက်ဖွယ် နတ်ဘုရားစွမ်းအားအရှိန်အဝါများ ထုတ်လွှတ်လိုက်သည်။

သို့သော် ခဏလေးအတွင်းမှာပင် ထိုဝါးတားတား အရိပ်မည်းကြီးသည် ပြိုပျက်သွားသည်။

မုရုံယင်း၏ ခန္ဓာကိုယ်သည် ဖယောင်းရုပ်တုတစ်ခုလို လျင်မြန်စွာ အရည်ပျော်ကျသွားပြီး နောက်ဆုံးတွင် ရေမည်းတစ်အိုင်အဖြစ် ကျန်ရစ်ခဲ့သည်။

ထိုရေမည်းအိုင်သည် အလွန်နက်မှောင်သိပ်သည်းပြီး ကြောက်ခမန်းလိလိ အငွေ့အသက်များ ထုတ်လွှတ်နေသည်။

"ရှီး... လုရှန်ဓားက တကယ် မိုက်တာပဲ။ အခြေခံအဆင့်ပဲရှိသေးတာတောင် စွမ်းအားက ဒီလောက် ကြောက်စရာကောင်းနေပြီ" လီချန် ရင်ထဲတွင် အံ့သြတုန်လှုပ်သွားသည်။

စောစောက မုရုံယင်း ကိုယ်ပေါ်က ထွက်လာတဲ့ အရိပ်မည်းကြီးက သိသာထင်ရှားစွာပဲ ပြင်ပနတ်ဘုရားရဲ့ စွမ်းအားပဲ။

အဲဒီစွမ်းအားက ဟိုတုန်းက ရတနာခုနစ်ပါးခန်းမဆောင်မှာတုန်းက အစီအရင်ပညာရှင်တွေ ကိုယ်ပေါ်က ညစ်ညမ်းစွမ်းအားတွေထက် အဆပေါင်းများစွာ ပိုအားကောင်းတယ်။

ဒါပေမဲ့ အဲဒီလောက် အားကောင်းတာတောင် လုရှန်ဓား (ကောင်းကင်ဘုံအဌမမြောက်ဓား) အောက်မှာ ချက်ချင်း ပြာကျသွားတယ်။

"ကြည့်ရတာ လုရှန်ဓားက သဘာဝအရကို ပြင်ပနတ်ဘုရားစွမ်းအားတွေကို ဖိနှိပ်နိုင်စွမ်းရှိပုံရတယ်" လီချန် တွေးလိုက်သည်။

လီချန်သည် ထိုရေမည်းအိုင်ကို ချက်ချင်းသိမ်းဆည်းလိုက်သည်။ ပြီးတော့ လက်စွပ်တစ်ကွင်း... ပြောစရာ မလိုပါဘူး၊ ဒါက မုရုံယင်းရဲ့ သိုလှောင်လက်စွပ်ပဲနေမှာ။

ဒီတစ်ခေါက်တော့ တကယ်ကြီး ပွပြီ။

လီချန် တွန့်ဆုတ်မနေတော့ဘဲ အချိန်ခေါင်းလောင်း လှိုဏ်ဂူကောင်းကင်ဘုံ အတွင်းသို့ ချက်ချင်း ပြန်ဝင်သွားလိုက်သည်။

.....

အချိန်ခေါင်းလောင်းရှေ့တွင်။

လီချန်သည် တင်ပျဉ်ခွေထိုင်နေပြီး သူ့ရှေ့တွင် ရေမည်းတစ်အိုင် ဝဲပျံနေသည်။ ထူးဆန်းသော အမည်းရောင် အငွေ့အသက်များ တပွက်ပွက်ထနေသည်။

"ဒီနိယာမညစ်ညမ်းပစ္စည်းတွေက ငါ့ရဲ့ လင့်တုန်းလောကသစ်ပင်ကို အဆင့် ၄ ရောက်အောင် ပို့ပေးနိုင်မလား မသိဘူး" လီချန် စိတ်ထဲတွင် တွေးလိုက်သည်။

ထိုသို့ တွေးမိသည်နှင့် သူ တွန့်ဆုတ်မနေတော့ဘဲ ထိုရေမည်းများကို စတင်သန့်စင်လိုက်သည်။

ချက်ချင်းပင် ထူးဆန်းပြီး ကြောက်မက်ဖွယ်ကောင်းသော ရေမည်းများသည် သူ့ခန္ဓာကိုယ်ထဲသို့ စိမ့်ဝင်သွားပြီး သူ့တစ်ကိုယ်လုံးကို အနက်ရောင်ဆိုးဆေးများ သုတ်လိုက်သကဲ့သို့ ဖြစ်သွားစေသည်။ မရေမတွက်နိုင်သော အနက်ရောင် အစင်းကြောင်းများ သူ့ခန္ဓာကိုယ်ပေါ်တွင် တွားသွားနေပြီး၊ သူ့ကို လုံးဝ ညစ်ညမ်းစေကာ ကျဆုံးသူတစ်ယောက်အဖြစ် ပြောင်းလဲပစ်တော့မယောင် ဖြစ်နေသည်။

ဒေါင်!

သူ့နောက်ကျောရှိ အချိန်ခေါင်းလောင်းသည် ရုတ်တရက် တုန်ခါသွားပြီး ကြည်လင်ပြတ်သားသော ခေါင်းလောင်းသံ ထွက်ပေါ်လာကာ ပဲ့တင်ထပ်သွားသည်။

ချက်ချင်းပင် လီချန်၏ကိုယ်ပေါ်ရှိ အနက်ရောင်အစင်းကြောင်းများသည် လျင်မြန်စွာ ဆုတ်ခွာသွားပြီး မီးခိုးငွေ့များအဖြစ် ပြောင်းလဲကာ ပျောက်ကွယ်သွားသည်။

သို့သော် ခေါင်းလောင်းသံ တိတ်သွားသည်နှင့် အနက်ရောင်အစင်းကြောင်းများ ပိုမိုများပြားစွာ ပြန်လည်ပေါ်ပေါက်လာပြန်သည်။

ဤသို့ဖြင့် အကြိမ်ကြိမ်အခါခါ ဖြစ်ပျက်ပြီးနောက် အချိန်အတော်ကြာမှ အနက်ရောင် အစင်းကြောင်းများ လုံးဝပျောက်ကွယ်သွားသည်။

လီချန်သည် အနက်ရောင် ရေမည်းထဲတွင် ပါဝင်သော များပြားလှသည့် နိယာမ ပင်မစွမ်းအင်များကို စုပ်ယူလိုက်သဖြင့် သူ၏ လင့်တုန်းလောကသစ်ပင်သည်လည်း လျင်မြန်စွာ တိုးတက်လာကြောင်း ခံစားလိုက်ရသည်။

လင့်တုန်းလောကသစ်ပင်၏ပြောင်းလဲမှုသည် မျက်မြင်ကိုယ်တွေ့ပင် ဖြစ်သည်။

အချိန်မည်မျှ ကြာသွားသည်မသိ။ လီချန်သည် လင့်တုန်းလောကသစ်ပင်၏တိုးတက်မှု ရပ်တန့်သွားသည်ကို ခံစားလိုက်ရသဖြင့် စနစ်မျက်နှာပြင်ကို အလျင်အမြန် ခေါ်ယူလိုက်သည်။

အိမ်ရှင်: လီချန်။

နတ်ဝိညာဉ် (ကောင်းကင်တာအို)။

တာအိုပေါင်းစည်းခြင်း (အစပိုင်း ၂၉/၁၀၀)။

အချိန်ခေါင်းလောင်း (နတ်ဘုရားကိရိယာ(၉၆၉၁၁/၁၀၀၀၀၀၀၀)

ကောင်းကင်ဘုံဓား သတ္တမအထိ: (ကျွမ်းကျင်)။

ကောင်းကင်ဘုံ အဋ္ဌမဓား (အစပျိုးဝင်ရောက် ၃/၁၀၀)။

မျက်လုံးခြောက်လုံးပိုင်ဆိုင်သော ပရမ်းပတာ လျှို့ဝှက်နတ်ဘုရား သက်ဆင်းခြင်းပညာ (ကြီးမားသော သက်ဆင်းခြင်း ၉၉/၁၀၀)။

လင့်တုန်းလောကသစ်ပင် (အဆင့် ၃ ၉၉/၁၀၀)။

ချန်ယွမ်အစီအရင်ကျမ်း ( နှစ်ဆယ်အခြေခံ ၇၈/၁၀၀)။

ဝိညာဉ်ဆေးပင်စိုက်ပျိုးသူ(အဆင့်တစ်ဆယ် ၁၁/၁၀၀)။

လက်နက်သန့်စင်သူ (အဆင့်ကိုး ၇၆/၁၀၀)။

အဂ္ဂိရတ်ဆရာ (အဆင့်တစ်ဆယ် ၉၉/၁၀၀)။

"အဆင့် ၃ (၉၉/၁၀၀) မှာတင် ရပ်သွားတာလား" လီချန် မျက်နှာ အနည်းငယ် မဲသွားသည်။

ဒါကြောင့်ကိုး... လင့်တုန်းလောကသစ်ပင်က အများကြီး တိုးတက်လာပေမဲ့ ပြီးပြည့်စုံတဲ့ အသွင်ပြောင်းလဲမှု မဖြစ်လာတာ။

ဒါကိုကြည့်ရင် နိယာမညစ်ညမ်းပစ္စည်းတွေကို အားကိုးရုံသက်သက်နဲ့ သူ့ရဲ့ လောကသစ်ပင်ကို အဆင့် ၄ ရောက်အောင် လုပ်လို့မရဘူး။

ဒါမှမဟုတ် ပြင်ပပစ္စည်း အကူအညီသက်သက်နဲ့ အဆင့် ၄ ကို တက်လို့ မရတာလား။

လီချန် မေးစေ့ကိုပွတ်သပ်လိုက်သည်။ ဝမ်းနည်းစရာကောင်းတာက သူ့ကို လမ်းပြပေးမယ့် ဆရာသမား မရှိဘူး။ အရာအားလုံး ကိုယ့်ဖာသာကိုယ် စမ်းသပ်ရှာဖွေနေရတာ။

မူလကတော့ နိယာမညစ်ညမ်းပစ္စည်းတွေ များများရှာပြီး လောကသစ်ပင်အဆင့်ကို အမြန်တင်မယ်လို့ စိတ်ကူးထားတာ။ အခုတော့ ဒီလမ်းကမဖြစ်နိုင်တော့ဘူး။

ဟူး... လီချန် ခေါင်းခါလိုက်ပြီး ဆက်မတွေးတော့ပေ။

ဘာပဲပြောပြော တိုတောင်းလှတဲ့ အချိန်ကာလလေးအတွင်းမှာ အဆင့် ၃ အထွတ်အထိပ်ကို ရောက်လာတာတောင် တော်တော်ကြောက်စရာကောင်းတဲ့ နှုန်းထားဖြစ်နေပြီ။

သူ့မှာ နတ်ဘုရားကိရိယာ အချိန်ခေါင်းလောင်းရှိနေသရွေ့ လင့်တုန်းလောကသစ်ပင် အဆင့် ၄ ရောက်ဖို့ဆိုတာ အချိန်ကိစ္စပါပဲ။

ထို့နောက် လီချန်သည် ကျဆုံးသူ မုရုံယင်း၏ သိုလှောင်ပစ္စည်းများကို ထုတ်ယူလိုက်သည်။

ပိုင်ရှင် သေဆုံးသွားပြီဖြစ်၍ သိုလှောင်ပစ္စည်းကို ဖွင့်ရန်အတွက် အချိန်အများကြီး မပေးလိုက်ရပေ။

သူ၏ နတ်ဘုရားအာရုံ သိုလှောင်ပစ္စည်းထဲ ဝင်ရောက်သွားသောအခါ သူ့မျက်နှာပေါ်တွင် အံ့သြဝမ်းသာသော အမူအရာများ ပေါ်လာသည်။

ပစ္စည်းကောင်းတွေ အများကြီးပဲ။

နှစ်ဆယ့်နှစ်အခြေခံအဆင့် အစီအရင်ပညာရှင်ဆိုတော့ တော်ရုံချမ်းသာတာ မဟုတ်ဘူးပဲ။

ဆက်လက်ပြီး သူ ပစ္စည်းစာရင်းကို သေချာစစ်ဆေးလိုက်သည်။

နေ့ဝက်လောက်ကြာအောင် စစ်ဆေးပြီးမှ မုရုံယင်း ဘယ်လောက်တောင်ချမ်းသာလဲဆိုတာ လီချန် အတိအကျ သိလိုက်ရသည်။

တာအိုလက်နက်တင် ၁၀ လက်ကျော်ရှိသည်။ အများစုကတော့ အဆင့်နိမ့် တာအိုလက်နက်တွေ ဖြစ်ပေမဲ့ပေါ့။

လီချန်ကို အပျော်ဆုံးဖြစ်စေတာကတော့ သိုလှောင်ပစ္စည်းထဲမှာ မုရုံယင်း လေ့ကျင့်ခဲ့တဲ့ အစီအရင် လျှို့ဝှက်ကျမ်း ပါလာခြင်းပင်။ နာမည်က မင်ဝမ်အစီအရင်ကျမ်းတဲ့။ သူ သေချာလေ့လာကြည့်လိုက်တော့ ဒီမင်ဝမ်အစီအရင်ကျမ်းက ကြာစိမ်းအစီအရင်ကျမ်းထက် အများကြီး ပိုအဆင့်မြင့်နေတယ်။ ကြောက်စရာကောင်းလောက်အောင် ၂၆ အစီအရင်အခြေခံအထိ ရောက်နိုင်တယ်။

ပြီးတော့ ဒီမင်ဝမ်အစီအရင်ကျမ်းမှာ သူနဲ့သက်ဆိုင်တဲ့ သီးသန့်တိုက်ပွဲဝင်အစီအရင်တစ်ခု ပါလာတယ်။ နာမည်က ၂၆ ပါးအသွင်ပြောင်း မတုန်လှုပ်သောမင်ဝမ် တိုက်ပွဲဝင်အစီအရင်တဲ့။

ဒီမင်ဝမ်တိုက်ပွဲဝင်အစီအရင်က ရုပ်သေးရုပ်တွေကို အစီအရင်အခြေခံအဖြစ် သုံးရတာ... ခုနက မုရုံယင်း ထိန်းချုပ်ခဲ့တဲ့ မပျက်သုဉ်းနိုင်သောအဆင့် မြေဝိညာဉ် ၂၂ ကောင် ဆိုတာ ဒီလို ရုပ်သေးမျိုးတွေပေါ့။

မုရုံယင်းရဲ့ အစီအရင်အဆင့်က နှစ်ဆယ့်နှစ်အခြေခံအထိပဲ ရှိသေးတာ။ တကယ်လို့သာ အခြေခံ ၂၆ အထိ ရောက်သွားရင် ပြီးပြည့်စုံတဲ့ ၂၆ ပါးအသွင်ပြောင်း မတုန်လှုပ်သောမင်ဝမ် တိုက်ပွဲဝင်အစီအရင်ကို ခင်းကျင်းနိုင်မှာ ဖြစ်ပြီး၊ အဲဒီအခါကျရင် စွမ်းအားက အရမ်းကြောက်စရာကောင်းသွားလိမ့်မယ်။ အစီအရင်ခင်းကျင်းသူက မတုန်လှုပ်သောမင်ဝမ် စစ်သည်တော်ခန္ဓာကို ဖွဲ့စည်းနိုင်ပြီး နတ်ဘုရားတွေကိုပါ သတ်ဖြတ်နိုင်စွမ်းရှိလာလိမ့်မယ်။

"ဒီမုရုံယင်းက ဒီလောက်ကောင်းတဲ့ မင်ဝမ်အစီအရင်ကျမ်းကို ဘယ်ကနေ ရခဲ့တာပါလိမ့်။ အခုတော့ ငါ့အတွက် အချိုရှာသကာတွေ့ဖြစ်သွားပြီ" လီချန် မျက်လုံးများ ပိတ်သွားသည်အထိ ပြုံးလိုက်မိသည်။

ဒါက အခြေခံ ၂၆ အထိရှိတဲ့ မင်ဝမ်အစီအရင်ကျမ်းလေ။ ဆိုလိုတာက နောက်ပိုင်းကျရင် သူ့အတွက် အစီအရင်ဗဟုသုတ မလုံလောက်တော့မှာကို ပူစရာမလိုတော့ဘူး။

ဒီမင်ဝမ်အစီအရင်ကျမ်းသာရှိရင် သူ့ရဲ့အစီအရင်စွမ်းရည်က တည်ငြိမ်စွာ တိုးတက်လာတော့မယ်။

ဒါပေမဲ့ ဒီမင်ဝမ်အစီအရင်ကျမ်းမှာလည်း အားနည်းချက်တစ်ခုရှိတယ်။ အဲဒါက နည်းနည်း ရက်စက်ပြီး ယုတ်မာတဲ့လမ်းစဉ်ဖြစ်နေတာ။ ဘာလို့လဲဆိုတော့ သူက သက်ရှိတိုင်တွေကို အစီအရင်အခြေခံအဖြစ် သုံးရလို့ပဲ။ ဒါက အစီအရင်လောကမှာ လက်မခံနိုင်တဲ့ လုပ်ရပ်လေ။

သက်ရှိတိုင်ဆိုတာက အစွမ်းထက်တဲ့ သက်ရှိတွေကို အရှင်လတ်လတ် အစီအရင်တိုင်အဖြစ် သွန်းလုပ်တာကိုခေါ်တာ။

ဒီမုရုံယင်း အရင်ကလေ့ကျင့်ခဲ့တဲ့ မွေးရာပါတိုက်ပွဲဝင်အစီအရင်ဆိုတာကလည်း မပျက်သုဉ်းနိုင်သောအဆင့် မြေဝိညာဉ် ၂၂ ကောင်ကို သက်ရှိတိုင်အဖြစ် လုပ်ထားတာပဲ။

ဒီနည်းလမ်းက အလွန်အဆိပ်ပြင်းတယ်လို့ ပြောလို့ရတယ်။

သူကတော့ သေချာပေါက် ဒီလိုလုပ်မှာ မဟုတ်ဘူး။

ပြီးတော့ လီချန်က အစီအရင်လမ်းကြောင်းမှာ အမြဲတမ်း ပေါင်းစပ်ညှိနှိုင်းတဲ့လမ်းစဉ်ကို လိုက်တယ်။ အစီအရင်ဗဟုသုတအမျိုးမျိုးကို စုစည်းပြီး တစ်သားတည်းဖြစ်အောင် ပေါင်းစပ်ကာ ကိုယ်ပိုင် ဖန်တီးထားတဲ့ ချန်ယွမ်အစီအရင်ကျမ်းကို ပြီးပြည့်စုံအောင်လုပ်တာ။

ကြာစိမ်းအစီအရင်ကျမ်းပဲဖြစ်ဖြစ်၊ အခုရတဲ့ မင်ဝမ်အစီအရင်ကျမ်းပဲဖြစ်ဖြစ်... သူက တိုက်ရိုက် လေ့ကျင့်မှာ မဟုတ်ပေ။ အနှစ်သာရကိုယူပြီး အညစ်အကြေးကိုပစ်ပယ်ကာ သူ့ရဲ့ချန်ယွမ်အစီအရင်ကျမ်းထဲမှာ ပေါင်းစပ်ထည့်သွင်းလိုက်မှာ ဖြစ်သည်။

***