အခန်း (၂၆၁)

အခန်း။ ၂၆၁

ရှန်းယွီသည် အလင်းကိုယ်ပွားအား အချိန်နယ်ပယ်ကို သုတေသနပြုရန် အရေးကြီးသော ဘေးထွက်တာဝန်တစ်ခုကိုလည်း ပေးအပ်ခဲ့သည်။ ဤသည်မှာ သူက ရုတ်တရက် စိတ်ကူးပေါက်၍ သို့မဟုတ် အမှတ်မထင် ဆုံးဖြတ်ခဲ့ခြင်း မဟုတ်ပေ။

ရှေးယခင်က ဧကရီသည် ၎င်းတို့အား အချိန်နယ်ပယ်၏ အစွမ်းကို သရုပ်ပြခဲ့စဉ်က ရှန်းယွီသည် သူ့အား အတိုင်းအဆမရှိ ဆွဲဆောင်နိုင်သည့် သိသိသာသာကွဲပြားသော ဖြစ်စဉ်နှစ်ခုကို ကိုယ်တိုင်မြင်တွေ့ခဲ့ရသည်။

ပထမတစ်ခုမှာ အချိန်နယ်ပယ်၏ လွှမ်းမိုးမှုမရှိဘဲ အချိန်များ သဘာဝအတိုင်း စီးဆင်းနေဆဲဖြစ်သော နယ်မြေကို မြင်တွေ့ခဲ့ရခြင်း ဖြစ်သည်။ ဒုတိယတစ်ခုမှာမူ အချိန်များ လုံးဝစီးဆင်းခြင်းမရှိတော့ဘဲ ထာဝရအခိုက်အတန့်တစ်ခုအဖြစ် လုံးဝအေးခဲရပ်တန့်နေသော နယ်မြေကို မြင်တွေ့ခဲ့ရခြင်း ဖြစ်သည်။

ဧကရီက အချိန်ရပ်တန့်ခြင်းစွမ်းရည်ကို အသက်သွင်းလိုက်ချိန်တွင် သူ၏ကိုယ်ပွားမှာ သဘာဝအတိုင်း အချိန်စီးဆင်းနေသည့် နယ်ပယ်အတွင်း၌ ရှိမနေခဲ့ဘဲ ရပ်တန့်သွားသော အချိန်၏ အစိတ်အပိုင်းတစ်ခု ဖြစ်သွားခဲ့ရသည်။

သူ၏ကိုယ်ပွားများအားလုံးမှာ ခန္ဓာကိုယ်အပြားပြား၌ တစ်ပြိုင်နက်တည်း တည်ရှိနေသော သူကိုယ်တိုင်ပင် ဖြစ်သဖြင့် အချိန်များ ရပ်တန့်နေသည့် ထိုခဏအတောအတွင်း၌ သူသည် ထာဝရကာလကဲ့သို့ ရှည်လျားလှသော ခံစားချက်ကို ကြုံတွေ့ခဲ့ရသည်။ ထိုခံစားချက်မှာ သူ ယခင်က တစ်ခါမျှ မကြုံဖူးသည့် အရာမျိုးဖြစ်၏။

သူ၏ခန္ဓာကိုယ်မှာ လုံးဝရွေ့လျား၍မရဘဲ ငြိမ်သက်နေသော်လည်း သူ၏အသိစိတ်မှာမူ အဆုံးအစမရှိ ဆန့်ထွက်သွားသော အခိုက်အတန့်တစ်ခုအတွင်း၌ ပိတ်မိနေခဲ့သည်။

အဆုံးမရှိဘူးဟု ထင်မှတ်ရသော ထိုထာဝရကာလအတွင်း၌ သူသည် အေးခဲနေသည့်အချိန်

အတွင်း ပိတ်မိနေရသော ပျင်းရိငြီးငွေ့မှုကို ဖြေဖျောက်ရန်နှင့် ထိုကဲ့သို့သော စွမ်းအားမျိုး မည်သို့အလုပ်လုပ်သည်ကို အမှန်တကယ် သိလိုစိတ်ရှိ၍ ထိုနယ်ပယ်၏ အခြေခံသဘောတရားများကို နားလည်နိုင်ရန် အသည်းအသန် ကြိုးစားခဲ့သည်။

အချိန်ကာလမဲ့နေသော ထိုအခိုက်အတန့်များအတွင်း သူ၏ သေချာစွာ စူးစမ်းလေ့လာမှုနှင့် ဆန်းစစ်မှုများမှတစ်ဆင့် အချိန်ကာလကို ထိန်းချုပ်ခြယ်လှယ်ခြင်းဆိုင်ရာ သဘောတရား၏ အစိတ်အပိုင်း အနည်းငယ်မျှကို သူ နားလည်သဘောပေါက်နိုင်ခဲ့သည်။

သို့သော် ဤသည်မှာ အလွန်တရာ နက်နဲခက်ခဲလှသော ပဟေဠိကြီးတစ်ခု၏ အပိုင်းအစလေးတစ်ခုမျှသာ ဖြစ်ပြီး လက်တွေ့အသုံးချနိုင်သည့် အဆင့်သို့ရောက်ရန်မှာမူ အလှမ်းဝေးကွာနေဆဲပင်။

အချိန်နယ်ပယ်၏ အလုပ်လုပ်ပုံမှာ အလွန်ပင် နက်နဲသိမ်မွေ့လှသဖြင့် သူ၏ ခေတ္တမျှ ထိတွေ့ခဲ့ရမှုမှာ ထိုလျှို့ဝှက်ချက်၏ မျက်နှာပြင်လေးကို ကုတ်ခြစ်မိရုံမျှသာ ရှိသေးသည်။

သို့သော် ဤသည်က သူ့ကို အားလျှော့သွားစေခြင်း အလျဉ်းမရှိပေ။ သူ၏ အဆင့် ၁၀ ရှိသော စိတ်စွမ်းအားကြောင့် ထိုအတွေ့အကြုံမှ ရရှိခဲ့သည့် ဗဟုသုတနှင့် အာရုံခံစားမှုဆိုင်ရာ မှတ်ဉာဏ်အားလုံးကို အသေးစိတ် မပျောက်မပျက် မှတ်သားထားနိုင်ခဲ့သည်။

ထိုစုဆောင်းထားသော အချက်အလက်များကို အသုံးချ၍ အချိန်နယ်ပယ်၏ အမှန်တကယ် အလုပ်လုပ်ပုံကို တဖြည်းဖြည်းချင်း အဖြေရှာနိုင်ရန်အတွက် အလင်းကိုယ်ပွားအား အချိန်အလုံအလောက်ပေးကာ သုတေသနပြုစေလိုခြင်း ဖြစ်သည်။

အကယ်၍သာ သူသည် အချိန်ကို မည်သို့ခြယ်လှယ်ထိန်းချုပ်ရမည်ကိုသာ ရှာဖွေတွေ့ရှိသွားခဲ့မည်ဆိုလျှင်... “ဟွန်းဟွန်း….ဘာတွေဖြစ်လာမလဲဆိုတာကတော့...”

ယခုအခါ သူသည် ကိုယ်ပွားများအားလုံးအတွက် တာဝန်များကို ခွဲဝေပေးပြီးဖြစ်ရာ သူကိုယ်တိုင် လုပ်ဆောင်ရမည့် တာဝန်များကို သတ်မှတ်ရန် အချိန်တန်ပြီဖြစ်သည်။

သူ့အနေဖြင့် ကျင့်ကြံခြင်းနှင့် တစ်နေ့တာလုံး တိုက်ပွဲဝင်ပုံစံတူ စမ်းသပ်မှုများပြုလုပ်ခြင်းတို့ကိုသာ အာရုံစိုက်လုပ်ဆောင်မည် ဖြစ်သည်။

အစပိုင်းတွင် လေကိုယ်ပွားကို ပုံစံတူစမ်းသပ်မှုများ အစဉ်တစိုက် လုပ်ဆောင်ရန် တာဝန်ပေးရန် စဉ်းစားခဲ့သော်လည်း ကိုယ်ပွားများမှာ သူ၏အစိတ်အပိုင်းများပင် ဖြစ်သော်ငြား အခြားကိုယ်ပွားများမှတစ်ဆင့် စနစ်၏ မျက်နှာပြင်ကို အသုံးပြု၍မရသည်မှာ အံ့သြစရာပင်။

ဤသည်မှာ စနစ်၏ တည်ဆောက်ပုံအရ ဘေးကင်းလုံခြုံရေးအတွက် ကြိုတင်သတ်မှတ်ထားခြင်း ဖြစ်နိုင်သဖြင့် သူ များစွာ သံသယမဝင်တော့ဘဲ သူ၏ နှစ်ရှည်လများ မက်ခဲ့သော အိပ်မက်ကို နောက်ဆုံးတွင် အကောင်အထည်ဖော်နိုင်ခဲ့ခြင်းအတွက်သာ ကျေနပ်နေမိသည်။ အစားအစာ ပြင်ဆင်ချိန်နှင့် ဂျူနီယာညီမလေး လာရောက်လည်ပတ်ချိန်များမှလွဲ၍ ကျန်ရှိသော တစ်နေ့တာလုံးကို သူသည် ကျင့်ကြံခြင်းသက်သက်အတွက်သာ အသုံးပြုနိုင်တော့မည် ဖြစ်သည်။

နောက်ဆုံးတွင်တော့ သူ အမြဲတစေ စိတ်ကူးယဉ်ခဲ့သော အမြင့်ဆုံးအဆင့် အတွေ့အကြုံယူရာ နယ်မြေကို အမှန်တကယ် တည်ဆောက်နိုင်ခဲ့ပြီ ဖြစ်သည်။

တိုးတက်လာသော သူ၏ စွမ်းရည်များကို စမ်းသပ်ရန်အတွက် တိုက်ပွဲဝင်ပုံစံတူ စမ်းသပ်မှုတစ်ခုဖြင့် စတင်ရန် သူ ဆုံးဖြတ်လိုက်သည်။ ထုံးစံအတိုင်းပင် ပြိုင်ဘက်အဖြစ် အခြေတည်ဝိညာဉ်အဆင့်ရှိ လီယောင်း၏ ပုံစံတူကို ရွေးချယ်လိုက်၏။ ပထမဆုံး တိုက်ပွဲဝင်ပုံစံ အနည်းငယ်ကို သူ အလွယ်တကူပင် အနိုင်ယူနိုင်ခဲ့သည်။ ယခင်က သူနှင့် အင်အားချင်း တူညီခဲ့သော အကန့်အသတ်မဲ့ပုံစံကိုပင် ယခုအခါ အလွယ်တကူ အနိုင်ရရှိခဲ့ရာ ၎င်းမှာ သူ၏ သွေးမျိုးဆက် ပြောင်းလဲမှုကြောင့် ခန္ဓာကိုယ်ကျင့်ကြံခြင်းတွင် အဆင့်တက်လှမ်းနိုင်ခဲ့ခြင်းကြောင့် ဖြစ်ပေလိမ့်မည်။

ယခုမူ အမှန်တကယ် စိန်ခေါ်မှုဖြစ်သော ထူးဆန်းနက်နဲသည့် ပုံစံသစ်နှင့် ရင်ဆိုင်ရန် အချိန်တန်ပြီ ဖြစ်သည်။

သူသည် တိုက်ပွဲအတွက် အသင့်ပြင်လိုက်စဉ် ဘေးပတ်ဝန်းကျင် တစ်ခုလုံး ရုတ်တရက် ရပ်တန့်သွားသည်ကို တွေ့လိုက်ရသဖြင့် သူ ချက်ချင်းပင် လှည့်ကြည့်လိုက်၏။ ထိုထူးဆန်းသော ပုံစံသစ်နှင့် သူ ပထမဆုံးအကြိမ် မျက်နှာချင်းဆိုင်လိုက်ရသည်။

သူမသည် အကန့်အသတ်မဲ့ပုံစံရှိ လီယောင်းနှင့် ဆင်တူသော်လည်း သူမ၏ ခန္ဓာကိုယ်မှာ စင်ကြယ်သော ရေခဲပြင်အဖြစ် ပြောင်းလဲသွားပုံရသည်။

ထိုရေခဲပြင်ပေါ်တွင် မရေမတွက်နိုင်သော အက်ကြောင်းများ ပျံ့နှံ့နေပြီး အောက်ခြေမှ မှောင်မိုက်သော မိစ္ဆာအငွေ့အသက်များ စိမ့်ထွက်နေသည်။ သူမသည် တည်ငြိမ်အေးစက်သော အမူအရာဖြင့် သူ့ထံသို့ လက်တစ်ဖက် ကမ်းထုတ်လိုက်လေသည်။

သူမ၏ လက်မှာ နှေးကွေးစွာ လှုပ်ရှားနေသည်ကို သူ မြင်နေရသော်လည်း သူ၏ ခန္ဓာကိုယ်ကိုမူ အနည်းငယ်မျှ လှုပ်ရှား၍ မရပေ။ ထို့နောက် သူမသည် ဆန့်ထုတ်ထားသော လက်ကို ဆုပ်ကိုင်လိုက်သည်။ ဖန်သားပြင်များ ကွဲအက်သကဲ့သို့ သူမ၏ ခန္ဓာကိုယ်မှ အပိုင်းအစများမှာ စတင်ကွဲထွက်သွားပြီး ထိုလှုပ်ရှားမှုနှင့်အတူ ရှန်းယွီ၏ ပတ်ဝန်းကျင်ရှိ ဟင်းလင်းပြင်ကြီးမှာလည်း သူနှင့်အတူ တစ်စစီ ကြေမွသွားတော့သည်။

သူသည် လက်တွေ့ကမ္ဘာတွင် မျက်လုံးများ ပြန်ပွင့်လာကာ မူလအခြေအနေသို့ ရောက်ရှိလာခဲ့သည်။

ယခုကဲ့သို့ စွမ်းရည်များ တိုးတက်လာသော်လည်း သူမနှင့် ယှဉ်လျှင်မူ များစွာ ထူးခြားမလာသေးဘူးဟု သူ တွေးမိသည်။ သို့သော် သူမသည် သူ မျှော်လင့်ထားသကဲ့သို့ အလွန်အမင်း အစွမ်းထက်နေခြင်း မဟုတ်ဘဲ သူမ၏ ခန္ဓာကိုယ်မှာပင် ပြိုကွဲပျက်စီးနေကြောင်း သူ အတည်ပြုနိုင်ခဲ့သည်။

သူမသည် ဟင်းလင်းပြင်နှင့် သက်ဆိုင်သော နယ်မြေစွမ်းရည်တစ်မျိုးကို အသုံးပြုနေခြင်းသာ ဖြစ်၏။ အကယ်၍ သူ့တွင်လည်း ထိုစွမ်းရည်ကို ခုခံနိုင်မည့် ကိုယ်ပိုင်နယ်မြေစွမ်းရည်သာ ရှိမည်ဆိုပါက...

သူ ပြုံးလိုက်မိသည်။ အခြားသော တိုးတက်မှုတစ်ခုမှာ သူ၏ အနာဂတ်ကို ကြိုတင်မြင်နိုင်စွမ်းမှာ ယခုအခါ ငါးစက္ကန့်အထိ တိုးတက်လာခြင်း ဖြစ်သည်။ ၎င်းမှာ သူ၏ စိတ်စွမ်းအားအဆင့် မြင့်တက်လာပြီးနောက် တိုးလာခြင်းပင်။

...

အကြီးအကဲဟွမ်သည် ဝမ်ကျန့်နှင့် လျိုဖုန်းတို့ကို ဂိုဏ်းချုပ်၏ ရုံးခန်းရှိရာ စင်္ကြံလမ်းအတိုင်း ခေါ်ဆောင်လာစဉ် သူတို့နှစ်ဦးစလုံးမှာ တည်ကြည်လေးနက်သော အမူအရာများ ရှိနေကြလေသည်။

သူတို့ လျှောက်လှမ်းလာစဉ်မှာပင် လမ်းတည့်တည့်၌ တစ်စုံတစ်ခု ဖြစ်ပျက်နေသည်ကို ရုတ်တရက် သတိပြုမိလိုက်ကြသည်။

လီယောင်းသည် သူမ၏ စီနီယာအစ်ကို အလုပ်လုပ်သည်ကို ကြည့်ရှုရန်နှင့် သူနှင့်အတူ အချိန်ပိုပေးရန် တားဆီးပိတ်ပင်နေသော ဧကရီကြောင့် နှုတ်ခမ်းလေးဆူကာ ရုံးခန်းရှိရာသို့ လျှောက်လာနေ၏။

[မင်းပြောနေတာတွေကို ပြန်နားထောင်ပါဦး။ အဲဒါက ဘယ်လိုလုပ်ပြီး အကျိုးရှိမယ့်အလုပ် ဖြစ်မှာလဲ]

ဧကရီက ကျိုးကြောင်းပြသရန် ကြိုးစားသော်လည်း လီယောင်းကမူ မကျေမနပ်ဖြင့် နှာခေါင်းရှုံ့ကာ လက်ခံရန် ငြင်းဆန်နေလေသည်။

ဧကရီက သက်ပြင်းအရှည်ကြီး ချလိုက်မိသည်။

[ဟူး... ငါ ငယ်ငယ်တုန်းက ရှာဖွေတွေ့ရှိခဲ့တဲ့ ၁၀ မှတ်ပေး ၁၀ မှတ်တန်က လုံးဝအလုပ်ဖြစ်

မယ်လို့ အာမခံထားတဲ့ ဆွဲဆောင်မှုအတတ်ပညာတစ်ခုတော့ ရှိသားပဲ...]

သူမက စကားစလိုက်သည်။

ထိုစကားကို ကြားလိုက်သည်နှင့် လီယောင်း၏ အာရုံမှာ ချက်ချင်းပင် ရောက်ရှိသွားတော့သည်။ စိတ်အာရုံပင်လယ်အတွင်း၌ ရှန်းယွီကို အရုပ်တစ်ခုကဲ့သို့ လွှဲရမ်းကစားနေသော လီယောင်းလေးပင်လျှင် ဤစကားဝိုင်းကို အာရုံစိုက်နားထောင်ရန် ကစားနေသည်ကို ရပ်တန့်လိုက်၏။

[ဒီအတတ်ပညာကို အသုံးမပြုဘဲ ပျောက်ကွယ်မသွားစေဖို့ တကယ့်ကို ကြိုးစားအားထုတ်တဲ့သူတစ်ယောက်ကို ငါ လက်ဆင့်ကမ်းပေးချင်ခဲ့တာ။ ဒါပေမဲ့ ဒီဘဝမှာတော့ ဘယ်တော့မှ ဖြစ်လာမှာ မဟုတ်တော့ဘူးထင်ပါရဲ့။ နှမြောစရာပဲ အဲဒါက တကယ့်ကို တန်ဖိုးရှိတဲ့ အတတ်ပညာမျိုးလေ။ အဲဒါကို ရဖို့အတွက် ငါက အချစ်နတ်ဘုရားမကိုတောင် ရိုက်နှက်ခဲ့ရတာ... အင်း... နှမြောစရာပါပဲ]

ဧကရီက သူမ၏ လေသံထဲတွင် စိတ်ပျက်မှုများ အပြည့်ထည့်ကာ ပို၍ပင် ဟန်ဆောင်ကောင်းကောင်းဖြင့် သက်ပြင်းချလိုက်ပြန်သည်။

“ယောင်းယောင်းက ကြိုးစားတဲ့သူပါ... သင်ပေးပါ...”

လီယောင်းလေးက စိတ်အားထက်သန်စွာ ပြောရန် ကြိုးစားသော်လည်း ရှန်းယွီက သူမ၏ ပါးစပ်ကို လက်ဖြင့် အလျင်အမြန်ပင် ပိတ်လိုက်သည်။

“မရဘူး အဲဒါက လူကြီးတွေအတွက်ပဲ။ မင်းကို တခြားအတတ်ပညာတစ်ခု သင်ပေးမယ်”

ရှန်းယွီက ပြောလိုက်၏။

“ဒါပေမဲ့ ယောင်းယောင်းက အဲဒါကိုပဲ လိုချင်တာ။ ယောင်းယောင်းက ကလေးမဟုတ်တော့ဘူး” သူမက ရှန်းယွီ၏ လက်ထဲမှ ရုန်းကန်နေသော်လည်း ရှန်းယွီကမူ အလျှော့မပေးဘဲ သူမကို ဆွဲခေါ်သွားလေသည်။

ဤအပြန်အလှန်စကားများကို ကြားလိုက်ရသောအခါ ပြင်ပရှိ လီယောင်း၏ မျက်နှာမှာ ပြတ်သားသော ဆုံးဖြတ်ချက်များဖြင့် တည်ကြည်သွားတော့သည်။

“ဂိုဏ်းချုပ်တစ်ယောက်အနေနဲ့ ဂိုဏ်းရဲ့တာဝန်တွေကို သေချာထမ်းဆောင်ဖို့က ကျွန်မရဲ့ အရေးကြီးဆုံး တာဝန်ပဲ။ ဘယ်လိုလုပ်ပြီး အပျင်းထူပြီး တာဝန်မဲ့နေနိုင်မှာလဲ ကျွန်မ ကိုယ့်

ကိုကိုယ် တကယ် ရှက်မိပါတယ်”

ထိုသို့ပြောကာ သူမ၏ ရုံးခန်းရှိရာသို့ အရှိန်မြှင့်ကာ လျှောက်လှမ်းသွားတော့သည်။

ဧကရီသည် လီယောင်း၏ တုံ့ပြန်မှုကို ကြားသောအခါ သိတတ်နားလည်စွာ ပြုံးလိုက်မိသည်။ ထိုဆွဲဆောင်မှုအတတ်ပညာမှာ ၁၀ မှတ်ပေး ၁၀ မှတ်တန် အလုပ်ဖြစ်သည်မှာ အမှန်ပင်ဖြစ်သော်လည်း ထိုကိန်းဂဏန်းများမှာ အလုပ်မဖြစ်သောသူတိုင်းကို သတ်ပစ်ခဲ့သည့် အရင်ပိုင်ရှင်ဟောင်းဆီမှ ရရှိခဲ့ခြင်း ဖြစ်သဖြင့် သူမအနေဖြင့်မူ...

လီယောင်းသည် သူမ၏ ရုံးခန်းဆီသို့ အမြန်လျှောက်သွားနေစဉ် တစ်စုံတစ်ဦးက ရှေ့မှပိတ်ကာ လမ်းကို တားဆီးလိုက်သည်။ လီယောင်း မော့ကြည့်လိုက်သောအခါ လီမိန်ဖြစ်နေသည်ကို တွေ့လိုက်ရ၏။

လီမိန်သည် ယခင်က တွေ့ဆုံမှုကြောင့် စိတ်ဒဏ်ရာရနေဆဲဖြစ်သဖြင့် သိသိသာသာ တုန်လှုပ်နေသော်လည်း သတ္တိကို မွေးကာ ပြောလိုက်သည်။

“လီယောင်း... မျိုးနွယ်စုခေါင်းဆောင်ရဲ့ အမိန့်အရ နင် တစ်ပတ်အတွင်း မိသားစုပင်မခွဲဆီကို ပြန်လာရမယ်။ ဒါက တောင်းဆိုချက် မဟုတ်ဘူး”