အခန်း (၂၆၈)

အခန်း။ ၂၆၈

ဂူယီကျဲသည် အနက်ရောင်သတ္တဝါများ မရပ်မနား လာရောက်ရိုက်ခတ်နေသည့် မမြင်ရသော အတားအဆီးရှိရာသို့ ချဉ်းကပ်သွားသည်။ ထိုသတ္တဝါများ၏ ပုံပျက်ပန်းပျက် ခန္ဓာကိုယ်

များသည် အတားအဆီးပေါ်တွင် မှင်စက်များအလား ပွင့်ထွက်သွားကြ၏။ အောက်ခြေတွင်မူ ထိုကြေမွသွားသောအသားစများသည် အရိပ်များအဖြစ်သို့ ပြန်လည်ပျော်ဝင်သွားပြီး ခန္ဓာကိုယ်ပြန်လည်ဖွဲ့စည်းကာ အတားအဆီးကို ပြန်လည်တိုက်ခိုက်ရန် ဤသံသရာကို ထပ်တလဲလဲ ပြုလုပ်နေကြသည်။

သူသည် လက်တစ်ဖက်ကို ဆန့်ထုတ်ကာ မမြင်ရသော မျက်နှာပြင်ပေါ်သို့ ဖိကပ်ကြည့်လိုက်သည်။ သူ၏မျက်စိရှေ့တွင် ကျယ်ပြောလှသော သစ်တောကြီးကိုသာ မြင်နေရသော်လည်း လက်ဖဝါးအောက်တွင်မူ ခိုင်မာလှသော အတားအဆီးတစ်ခုရှိနေသည်ကို သူ ခံစားသိရှိနေရ၏။

ယုတ်မာသောအပြုံးတစ်ခု သူ၏မျက်နှာပေါ်တွင် ပေါ်လာပြီးနောက် လက်ကို အနောက်သို့ ပြန်ဆုတ်လိုက်သည်။ ထို့နောက် ပြင်းထန်လှသော အားမာန်ဖြင့် ရှေ့သို့ ထိုးနှက်လိုက်လေတော့သည်။

သူ၏လက်ဆစ်များနှင့် အတားအဆီးထိတွေ့မိသည့် ခဏမှာပင် သူ၏လက်မောင်းတစ်လျှောက် ထူးဆန်းသော ထုံကျင်မှုတစ်ခု ပျံ့နှံ့သွားသည်။ သူ၏တိုက်ကွက်မှ ထွက်ပေါ်လာသော စွမ်းအင်များသည် အတားအဆီး၏ မျက်နှာပြင်တစ်လျှောက် ညီညာစွာ ပျံ့နှံ့သွားပြီးနောက် မည်သည့် အစအနမျှမကျန်ဘဲ ဝါးမြိုခြင်းခံလိုက်ရသည်။

သူ၏ ယုံကြည်မှုအပြည့်ရှိသော အပြုံးမှာ ပျက်ပြယ်သွား၏။ ဤအရာသည် အမှန်တကယ်ပင် စတုတ္ထအဆင့်ရှိသော အတားအဆီးတစ်ခုဖြစ်ပြီး သူ၏တိုက်ခိုက်မှုကို အက်ကြောင်းပင်မထင်ဘဲ တောင့်ခံနိုင်သည့် လက်ရာကောင်းတစ်ခုလည်း ဖြစ်သည်။

မိစ္ဆာနတ်ဘုရားက ဘာတွေတွေးပြီး သူတို့ကို ဒီလိုအရာမျိုး ပေးလိုက်ရတာလဲ။

ကောင်းပြီ... မကြာခင် ငါ သိရမှာပေါ့။

ပို၍တည်ကြည်သော အမူအရာဖြင့် သူ၏လက်သီးကို နောက်တစ်ကြိမ် ပြန်ဆုတ်လိုက်သည်။ သူ၏ပတ်ဝန်းကျင် လေထုထဲတွင် အနီရောင်ပွင့်ချပ်များ ပေါ်ထွက်လာပြီး ကျစ်ကျစ်ပါအောင် ဆုပ်ထားသော သူ၏လက်သီးပတ်လည်တွင် ဝေ့ဝဲနေတော့သည်။ အနီရောင်ပွင့်ချပ်များ ဖုံးလွှမ်းထားသော လက်သီးဖြင့် သူသည် နောက်တစ်ကြိမ် ထိုးနှက်လိုက်ပြန်ရာ ယခုတစ်ခေါက်မှာ ယခင်ကထက် များစွာ ပိုမိုပြင်းထန်လှသည်။

သို့သော် အတားအဆီးက သူ၏တိုက်ခိုက်မှုကို အပြီးအပိုင် တွန်းကန်ထုတ်လိုက်သဖြင့် သူသည် အနောက်သို့ ခြေလှမ်းအတော်များများ ယိုင်ထွက်သွားရသည်။

“ဘာ...”

သူ၏မျက်နှာမှာ အံ့ဩတုန်လှုပ်မှုကြောင့် ဖြူဖတ်ဖြူလျော် ဖြစ်သွားသည်။ ၎င်းမှာ သူ၏ အစွမ်းကုန်ထုတ်သုံးထားသော တိုက်ကွက်ဖြစ်သော်လည်း အတားအဆီးမှာမူ မည်သည့် ပျက်စီးမှုလက္ခဏာမျှ မပြပေ။

သူ၏တုန်လှုပ်နေသော အမူအရာမှာ ဒေါသအဖြစ်သို့ ပြောင်းလဲသွားသည်။

“မင်းတို့ ဘယ်လောက်အထိ တောင့်ခံနိုင်မလဲ ကြည့်ကြသေးတာပေါ့”

သူက အံကြိတ်ကာ အော်ဟစ်လိုက်သည်။ အနီရောင် အရှိန်အဝါများသည် သူ၏ခန္ဓာကိုယ်ပတ်လည်တွင် စုစည်းလာပြီး စက္ကန့်နှင့်အမျှ ပိုမိုပြင်းထန်လာ၏။

“ကြက်သွေးရောင် အိပ်မက်”

သူက ရွတ်ဆိုလိုက်သည်နှင့် အရာအားလုံး တိတ်ဆိတ်သွားတော့သည်။

ထိုခဏ၌ အချိန်မှာ ရပ်တန့်သွားသကဲ့သို့ပင်။ သူ၏ပတ်ဝန်းကျင်ရှိ အနီရောင်အရှိန်အဝါများသည် အပြင်ဘက်သို့ ရုတ်ချည်းပေါက်ကွဲထွက်သွားပြီး မီတာတစ်ရာခန့် ပတ်လည်ကို ဖုံးလွှမ်းသွားသည်။ ထိုဧရိယာတစ်ခုလုံးသည် အဆုံးမရှိသော လီကိုရစ်ပန်းခင်းကြီးတစ်ခုအဖြစ် ပြောင်းလဲသွားပြီး ပန်းပွင့်ချပ်များသည် အထက်သို့ ဖြည်းညှိးစွာ လွင့်ပျံနေကြသည်။ ထိုသူသည် လက်နှစ်ဖက်ကို မြှောက်လိုက်ရာ မရေမတွက်နိုင်သော ပွင့်ချပ်များသည် လက်ထဲတွင် စုစည်းလာသည်။

ထို့နောက် သူသည် အတားအဆီးကို ဒေါသတကြီး ဆက်တိုက် ထိုးနှက်တော့သည်။ ထိုးချက်

တိုင်းတွင် မိုးကြိုးပစ်သံကဲ့သို့ ကျယ်လောင်လှသော်လည်း အတားအဆီး၏ မျက်နှာပြင်ပေါ်

တွင် ပျက်စီးမှု လုံးဝမရှိသေးပေ။ သူသည် တိုက်ခိုက်နေရင်း ပို၍စိတ်မရှည် ဖြစ်လာသည်။ ဤသည်မှာ စတုတ္ထအဆင့် ခံစစ်အစီအရင် ဖြစ်နေဦးတော့ သူ၏ အစွမ်းကုန်တိုက်ကွက်တွေကို ဤမျှအကြာကြီး တောင့်ခံနိုင်စရာ အကြောင်းမရှိပေ။

သူသည် ရူးသွပ်စွာ ဆက်လက်ထိုးနှက်နေစဉ် တစ်စုံတစ်ခုကို ရိပ်မိသွားပြီး ရုတ်တရက် ရပ်တန့်လိုက်သည်။ သူ၏အကြည့်မှာ တစ်ဖက်သို့ ဝဲခနဲ ရောက်သွားပြီး သူ၏နတ်ဘုရားအာရုံက တစ်စုံတစ်ဦး ချဉ်းကပ်လာနေသည်ကို ထောက်လှမ်းမိလိုက်သည်။ သူ၏ပတ်ဝန်းကျင်ရှိ ဟင်းလင်းပြင်မှာ မှန်ကွဲသကဲ့သို့ အက်ကွဲသွားပြီး အတွင်းရှိ အဆုံးမရှိသော အမှောင်ထုကို ဖော်ပြနေသည်။ ထိုအက်ကွဲနေသော ဟင်းလင်းပြင်မှာ သူ့ကို တစ်ကိုယ်လုံး ဝါးမြိုသွားလေတော့သည်။

“တော်တော်လေး အပြေးမြန်တာပဲ”

အမျိုးသမီးအသံတစ်ခုက ခပ်တိုးတိုးပြောလိုက်သည်။ သူမ၏ခြေထောက်များသည် ဂူယီကျဲ ရပ်နေခဲ့သည့် နေရာတည့်တည့်သို့ ထိကပ်သွားသည်။ သူမသည် ပြန်လည်စေ့တော့မည့် ဟင်းလင်းပြင်အက်ကြောင်းများကို စိတ်ဝင်တစား စစ်ဆေးကြည့်ရှုပြီးနောက် သူမ၏လက်ကို ထိုနေရာတွင် တင်လိုက်ရာ အက်ကြောင်းမှာ ဆက်လက်မစေ့သွားဘဲ ရပ်တန့်သွား၏။

ရုတ်တရက် သူမ၏နှာခေါင်းမှာ လှုပ်ရှားသွားပြီး ရင်းနှီးနေသော အနံ့တစ်ခုကို သူမ သတိပြုမိသွားလေသည်။

“ဟင်း...”

သူမက ခပ်တိုးတိုးရေရွတ်ရင်း လက်ကို ပြန်ရုတ်လိုက်ရာ ဟင်းလင်းပြင်အက်ကြောင်းမှာ အလိုအလျောက် ပြန်လည်စေ့သွားတော့သည်။ ထို့နောက် ဂူယီကျဲ တိုက်ခိုက်နေခဲ့သည့် နေရာဘက်သို့ သူမ လှည့်ကြည့်လိုက်၏။ သူမ ချဉ်းကပ်သွားစဉ်မှာပင် အတားအဆီးကို အလွယ်တကူ ဖောက်ထွင်းမြင်လိုက်ရသည်။

“ဒီအနံ့က... ဖီးနစ်ပဲ”

သူမက အံ့သြတကြီး ကျယ်လောင်စွာ ရေရွတ်လိုက်သည်။ နောက်ထပ် တစ်စုံတစ်ခုကို ထပ်မံအာရုံခံမိလိုက်သောအခါ သူမ၏မျက်နှာပေးမှာ ထူးဆန်းသွားပြီး “ပြီးတော့ နဂါးတစ်ကောင်လည်း ပါတာပဲ” ဟု မနှစ်မြို့သော အမူအရာဖြင့် ထပ်လောင်းပြောပြောလိုက်သည်။

“နေဦး... ပြန်ပြင်ပြောရမယ် နဂါးက နှစ်ကောင်တောင်ပဲ”

သူမ ကိုယ့်ဘာသာ ပြန်ပြင်လိုက်သည်။ ထို့နောက် နောက်ထပ် ရှာဖွေတွေ့ရှိမှုတစ်ခုကြောင့် သူမ၏ မနှစ်မြို့သော အမူအရာမှာ သိသိသာသာ ပြန်လည်ဝင်းပသွားတော့သည်။

“ခဏလေး... ဒါတွေက ဝိညာဉ်တွေလား ခြောက်ယောက်တောင် ရှိတာလား”

သူမ၏ မျက်နှာတွင် ကျေနပ်အားရသော အပြုံးတစ်ခု ပေါ်လာ၏။

အရှေ့ဘက်တိုက်ကြီးမှာ ဒီလိုနေရာမျိုး ရှိနေလိမ့်မယ်လို့ ဘယ်သူက ထင်ထားမှာလဲ။

“ကဲ... ဒါဆိုရင်တော့ ငါ့ကို အားမနာပါနဲ့တော့...”

သူမက မျှော်လင့်ချက်အပြည့်ဖြင့် ပြောရင်း အတားအဆီးရှိရာသို့ လက်ကို ဆန့်ထုတ်လိုက်လေတော့သည်...

ရှန်းယွီသည် နေ့လယ်စာ စားသောက်ပြီးနောက် ပုံမှန်အတိုင်း တရားထိုင်ကာ ကျင့်ကြံရန် ပြင်ဆင်နေစဉ် တစ်စုံတစ်ခုကြောင့် ထိတ်လန့်သွားရသည်။ တစ်စုံတစ်ဦးသည် သူ၏ တိုက်ပွဲကိုယ်ပွါး ထောက်လှမ်းမှုအတွင်းသို့ စက္ကန့်ပိုင်းမျှ ဝင်ရောက်လာပြီးနောက် ပြန်လည်

ပျောက်ကွယ်သွားခြင်းပင်။

ထိုသူမှာ ဘယ်သူလဲဟု စစ်ဆေးရန် မျက်လုံးဖွင့်ကြည့်လိုက်သော်လည်း စနစ်၏ အစီရင်ခံစာကို မြင်လိုက်ရသောအခါ သူ၏အမူအရာမှာ ရုတ်ချည်းပင် မှင်သက်သွားတော့သည်။

[အမည် - ဂူယီကျဲ]

[အဆင့် - ခန္ဓာကိုယ်: ၁၇ အဆင့်၊ ဝိညာဉ်: ဟင်းလင်းပြင်ဖြတ်သန်းခြင်း ဒုတိယအဆင့်၊ စိတ်: အဆင့် ၇၊ ဝိညာဉ်: အရွယ်ရောက်ပြီး]

[မျိုးနွယ် - မိစ္ဆာ]

[ဝိညာဉ်အမြုတေ - သာလွန်ရေဓာတ်ခံ]

[အသိဉာဏ်ပွင့်မှု - အမြင့်ဆုံးအဆင့်]

[သွေးမျိုးဆက် - မိစ္ဆာနတ်ဘုရား မြင့်မြတ်သောသွေး]

[အတတ်ပညာများ - ...]

[ကျမ်းစာများ - ...]

“မိစ္ဆာနတ်ဘုရား ဟုတ်လား”

ကြောက်စိတ်များက သူ၏ခန္ဓာကိုယ်တစ်ခုလုံးကို လျှပ်စစ်စီးသကဲ့သို့ ဖြတ်သန်းသွားသည်။ မိစ္ဆာနတ်ဘုရားက တကယ်ကြီး နိုးထလာပြီလား။

သို့သော် သူ၏အတွေးများ မပြန့်ပွားခင်မှာပင် ဂိုဏ်းတစ်ခုလုံး၏ အစီအရင်ကို တစ်စုံတစ်ဦးက အသည်းအသန် ထိုးနှက်နေသည်ကို သူ အာရုံခံမိလိုက်သည်။

ထိုအခါမှသာ သူ အခြေအနေမှန်ကို နားလည်သွားပြီး သက်ပြင်းရှည်ကြီးတစ်ချက်ကို စိတ်အေးလက်အေး ချလိုက်နိုင်တော့သည်။ ဤသူသည် မိစ္ဆာနတ်ဘုရား ကိုယ်တိုင်မဟုတ်ဘဲ မိစ္ဆာနတ်ဘုရား သွေးမျိုးဆက်ရှိသည့် ပြင်ပမှ တစ်စုံတစ်ဦးသာ ဖြစ်သည်။ ရှန်းယွီ၏ ခန့်မှန်းချက်အရ ထိုသူသည် မိစ္ဆာမျှော်စင်အတွက် ရောက်လာခြင်း ဖြစ်ပေလိမ့်မည်။ ကံကောင်းထောက်မစွာဖြင့် သူသည် စတုတ္ထအဆင့် အစီအရင်ကို ကြိုတင်ပြင်ဆင်ထားခဲ့သည်။ ထိုသို့သာမဟုတ်လျှင် ဘာဖြစ်လာမည်ကို သူ စဉ်းစားရုံနှင့်ပင် ကျောချမ်းလှသည်။

သူသည် ကျင့်ကြံနေသည့်နေရာမှ ထလိုက်ပြီး မြေဓာတ်ခံကိုယ်ပွါးရှိရာသို့ လျှောက်သွားသည်။ ထို့နောက် မြေပြင်ပေါ်တွင် ပြန့်ကျဲနေသော အစီအရင်ကျောက်ပြားများကို ကောက်ယူလိုက်၏။ ၎င်းတို့မှာ ခုလေးတင် အချောသတ်ထားသော တတိယအဆင့် အစီအရင်ကျောက်ပြားများဖြစ်ပြီး တစ်ခုချင်းစီတွင် ခံစစ်၊ တိုက်စစ်၊ ဖုံးကွယ်ခြင်း၊ ပြန်လည်အားဖြည့်ခြင်းနှင့် ဝိညာဉ်စွမ်းအင် စုဆောင်းခြင်းတို့အတွက် တတိယအဆင့် သင်္ကေတဂါထာများကို ဂရုတစိုက် ထွင်းထုထားခြင်းဖြစ်သည်။

မူလက ရှန်းယွီသည် အစီအရင်အားလုံး ပြီးဆုံးသည်အထိ စောင့်ဆိုင်းပြီးမှ တစ်ပြိုင်နက်တည်း တပ်ဆင်ရန် စီစဉ်ထားခဲ့သည်။ သို့သော် ယခုအခါ ရန်သူများက သူတို့၏ အတားအဆီးကို စတင်တိုက်ခိုက်နေပြီဖြစ်ရာ ဆက်လက်စောင့်ဆိုင်းနေခြင်းမှာ မိုက်မဲရာကျပေလိမ့်မည်။ အကယ်၍ နောက်ထပ် ရန်သူတစ်ယောက် ထပ်ပေါ်လာလျှင်ကော အကယ်၍ ဤရန်သူသည် လက်ရှိ အတားအဆီးကို ဖျက်ဆီးနိုင်သည့် ထူးဆန်းသော နတ်ဘုရားလက်နက်တစ်ခုခုကို ပိုင်ဆိုင်ထားလျှင်ကော သူသည် ထိုကဲ့သို့သော စွန့်စားမှုကို မလုပ်လိုတော့ဘဲ ပြီးစီးသမျှ အဆင့်မြှင့်တင်မှုများကို ချက်ချင်း အသက်သွင်းရန် ဆုံးဖြတ်လိုက်သည်။

ယခုအခါ လျိုဖုန်း၏ ကျေးဇူးကြောင့် သူတို့တွင် ဝိညာဉ်ကျောက်တုံးများစွာ ရှိနေပြီဖြစ်သဖြင့် အစီအရင်ကို စောစီးစွာ အသက်သွင်းခြင်းက ဘာမှ ထိခိုက်စရာမရှိဟု သူ တွေးတောရင်း အစီအရင်ကျောက်ပြားများကို ကိုင်ကာ ဂူထဲမှ ထွက်လာခဲ့သည်။

သူသည် ဂိုဏ်းအတွင်း အရှိန်အကုန်ဖြင့် ပြေးလွှားလိုက်ရာ သူ၏ပုံရိပ်မှာ တစ်နေရာမှ တစ်နေရာသို့ လျှပ်စီးပမာ ပျံသန်းနေတော့သည်။ သတ်မှတ်ထားသော အချက်အချာတစ်ခုချင်းစီတွင် အစီအရင်ကျောက်ပြားများကို ဂရုတစိုက် နေရာချကာ အသက်သွင်းလိုက်သည်။ သူ အလုပ်လုပ်နေစဉ်မှာပင် အတားအဆီးအပေါ် တိုက်ခိုက်မှုများမှာ ရပ်တန့်ခြင်းမရှိဘဲ ပိုမိုပြင်းထန်လာရာ လက်ရှိအစီအရင်က တောင့်ခံထားနိုင်ဆဲဖြစ်သော်လည်း ရှန်းယွီမှာမူ အတော်လေး စိုးရိမ်လာမိသည်။

နောက်ဆုံးတွင် အရေးအကြီးဆုံးဖြစ်သော နောက်ဆုံးအချက်အချာသို့ ရောက်ရှိလာသည်။ ဤနေရာမှာ ကျူးကျော်သူ တိုက်ခိုက်နေသည့် နေရာတည့်တည့်ပင်။ ရှန်းယွီသည် အဆက်မပြတ် တိုက်ခိုက်ခံနေရသဖြင့် တဖျတ်ဖျတ် တုန်ခါနေသော အတားအဆီးရှိရာသို့ အမြန်ဆုံး ရောက်သွား၏။ သို့သော် နောက်ဆုံးကျောက်ပြားကို ချရန် ပြင်လိုက်စဉ်မှာပင် သူ၏သွေးများ အေးစက်သွားသကဲ့သို့ ခံစားလိုက်ရသည်။

စနစ်ထံမှ နောက်ထပ် အသိပေးချက်တစ်ခု သူ့ရှေ့တွင် ပေါ်လာပြန်သည်။

[အမည် - လျိုယင်းရှင်း]

[အဆင့် - ခန္ဓာကိုယ်: ၁၅ အဆင့်၊ ဝိညာဉ်: ဝိညာဉ်နှင့် ခန္ဓာ ပေါင်းစည်းခြင်း ပထမအဆင့်၊ စိတ်: အဆင့် ၈၊ ဝိညာဉ်: အရွယ်ရောက်ပြီး]

[မျိုးနွယ် - ဖီးနစ်]

[ဝိညာဉ်အမြုတေ - အမြင့်မြတ်ဆုံး မီးဓာတ်ခံ]

[အသိဉာဏ်ပွင့်မှု - အမြင့်မြတ်ဆုံးအဆင့်]

[သွေးမျိုးဆက် - ဖီးနစ် မြင့်မြတ်သောသွေး]

[အတတ်ပညာများ - ...]

[ကျမ်းစာများ - ...]