အခန်း (၂၇၄)

အခန်း။ ၂၇၄

"ဝူရွှမ်းဝူကျိဆောင် ဒုတိယခန်းမမှူး အမိန့်ကို နာခံပါ။ ဒါကျိုးဧကရာဇ်မင်းမြတ်ရဲ့ အမိန့်တော်အရ ခင်ဗျားတို့ဆေးခန်းမက သမားတော်ကို နန်းတော်ထဲ လိုက်ပါဖို့ ဖိတ်ကြားလိုက်ပါတယ်"

ရောက်ရှိလာသူများမှာ စစ်ဘက်ဆိုင်ရာ အရာရှိအချို့ဖြစ်ပြီး သူတို့သည် မာနထောင်လွှားသော အမူအရာဖြင့် သိုင်းပညာရှင်များ၏ ဒေါသတကြီး ကြည့်နေမှုကို ဂရုမစိုက်ဘဲ အထဲသို့ ဇွတ်အတင်း ဝင်ရောက်ရန် ပြုလုပ်ကြသည်။

"ဘယ်သူက မင်းတို့ကို သိုင်းပညာခန်းမထဲ ကျူးကျော်ဝင်ရောက်ဖို့ ခွင့်ပြုလိုက်တာလဲ"

ရုတ်တရက် မိုးကြိုးပစ်ချလိုက်သကဲ့သို့ ပြင်းထန်သော အော်ဟစ်သံတစ်ခု ထွက်ပေါ်လာသည်။ သိုင်းပညာခန်းမအတွင်းမှ လူငယ်စစ်သူကြီးတစ်ဦး လမ်းလျှောက်ထွက်လာသည်ကို အားလုံး မြင်တွေ့လိုက်ရသည်။

ထိုသူကို မြင်လိုက်ရသောအခါ အင်ပါယာကိုယ်ရံတော်တပ်မှူးမှာ ရှေးဦးစွာ မှင်တက်သွားပြီးနောက် သေသေချာချာ အနီးကပ် ကြည့်လိုက်မိသည်။ ကြည့်ပြီးသည်နှင့် ကိုယ်ရံတော်တပ်မှူးမှာ တစ်ကိုယ်လုံး တုန်ရင်သွားတော့သည်။

"စစ်သူကြီးယွင်"

သူသည် မြင်းပေါ်မှ ချက်ချင်းဆင်းလိုက်ပြီး ကျန်ရှိသော ကိုယ်ရံတော်များလည်း မြင်းပေါ်မှဆင်းကာ အရိုအသေပြု နှုတ်ဆက်ကြလေသည်။

ယန်စံအိမ်သည် အထက်မှအောက်အထိ တိုင်းပြည်အပေါ် အဆုံးစွန် သစ္စာရှိမှုကြောင့် ကျော်ကြားလှသည်။ ဒါကျိုး၏ သိုင်းနတ်ဘုရား ယန်ပါးဟို လက်အောက်တွင် အမှုထမ်းခဲ့ဖူးသော အရာရှိပေါင်းမှာလည်း ရာဂဏန်းမက ရှိခဲ့သည်။ မကြာသေးမီနှစ်များအတွင်း ယန်စံအိမ်မှာ အနည်းငယ် မှေးမှိန်နေခဲ့သော်လည်း စစ်သူကြီးငယ်ယွင်ဟူသော ဘွဲ့ထူးမှာ ယနေ့တိုင် အရှိန်အဝါ ကြီးမားနေဆဲပင်။

ယန်ချန်းလန်သည်လည်း ငယ်စဉ်ကတည်းက စစ်တပ်အတွင်း၌ ရဲစွမ်းသတ္တိရှိသော စစ်သူကြီးအဖြစ် နာမည်ကျော်ကြားခဲ့သူ ဖြစ်သည်။

"အားနာစရာတွေ မလိုတော့ပါဘူး။ ဒီကိစ္စကို ဧကရာဇ်မင်းမြတ်ဆီ ငါကိုယ်တိုင်ပဲ ရှင်းပြပါ့မယ်"

ယန်ချန်းလန်က ပြောကာ အင်ပါယာကိုယ်ရံတော်များကို ခေါ်ဆောင်၍ နန်းတော်သို့ သတင်းပို့ရန် ထွက်ခွာသွားတော့သည်။

"စစ်သူကြီးယွင် ခေတ္တစောင့်ပါဦး"

ယီပိုင်မင်းက ရှေ့သို့တိုးလာပြီး ယန်ချန်းလန်၏ နားနားသို့ တိုးတိုးလေး ကပ်ပြောလိုက်သည်။

နားထောင်ပြီးနောက် ယန်ချန်းလန်က ခဏမျှ တွေးတောကာ ကျေးဇူးတင်သော အမူအရာဖြင့် ခေါင်းညိတ်ပြခဲ့သည်။

ဖြစ်ပျက်ခဲ့သမျှကို ကြည့်ပြီး ဆေးဧကရာဇ်ခန်းမမှလူစုသည် လက်လျှော့ကာ အရင်ပြန်သွားကြရုံမှတစ်ပါး အခြားမရှိတော့ပေ။ သို့သော် ပင်မမှော်ဘုရားကျောင်းမှ ဆရာတပည့်နှစ်ဦးမှာမူ မျက်နှာအမူအရာ အသီးသီး ဖြစ်နေကြသည်။

"ဆရာ... ဒီလူကပဲ လနတ်သမီး၏ချီးမွမ်းသံကို ဖော်စပ်ခဲ့တဲ့သူလို့ သံသယရှိနေတာလား"

နတ်ဘုရားအဆင့်ဆေးလုံးကို မည်သူက ဖော်စပ်နိုင်တာလဲဆိုသည်ကို ရှာဝမ်ရွှီလည်း အလွန်ပင် စိတ်ဝင်စားနေမိသည်။

"သူ ဟုတ်မဟုတ်ဆိုတာ ရက်အနည်းငယ်အတွင်း သိရမှာပါ။ ဒါပေမဲ့ ယန်ချန်းလန်ရဲ့ ကံကြမ္မာကတော့..."

ကျီယွီက မနေနိုင်ဘဲ မျက်မှောင်ကြုတ်လိုက်မိသည်။

"သူ့ဘဝက ဆင်းရဲဒုက္ခတွေနဲ့ ပြည့်နှက်နေပြီး ငယ်ငယ်ရွယ်ရွယ်နဲ့ သေဆုံးရမယ့် ကံပါခဲ့တာ။ အဲ့ဒီလိုမှမဟုတ်ရင်လည်း သာမန်ဘဝမှာပဲ ကျင်လည်ရမယ့်ကံပဲ။ ဒါပေမဲ့..."

ရှာဝမ်ရွှီနှင့် သူ၏ဆရာတို့ တစ်ဦးကိုတစ်ဦး ကြည့်လိုက်ကြသည်။ သူတို့နှစ်ဦးစလုံး လူတစ်ယောက်၏ ကံကြမ္မာကို ပထမဆုံးအကြိမ် မှားယွင်းစွာ ဟောကိန်းထုတ်မိခဲ့ကြပြီဖြစ်ကြောင်း သဘောပေါက်လိုက်ကြသည်။

ဝူရွှမ်းဝူကျိဆောင် အပြင်ဘက်ရှိ လူအုပ်ကြီးလည်း ဆေးခန်းမအတွင်းသို့ ပြန်ဝင်လာကြသည်။

"သခင်မလေး... အပြင်ကလူတွေ အကုန်လူစုခွဲသွားကြပါပြီ။ ကျွန်တော် အခုလို အထောက်အထားကို ထုတ်ဖော်လိုက်မိတာက သခင်မလေးအတွက် မလိုလားအပ်တဲ့ ဒုက္ခတွေ သယ်ဆောင်လာမှာကို စိုးရိမ်မိတယ်"

ကျုံးရန်က နောက်ကျမှ သတိရကာ ပြောလိုက်သည်။ သူသည် ဒါကျိုးနိုင်ငံ နယ်မြေအတွင်း ရှိနေပြီး အိမ်ရှေ့မင်းသားကို ဒဏ်ရာရစေခဲ့သည့် ကိစ္စက ယွင်ရှန်းအတွက် အနှောင့်အယှက် ဖြစ်လာမည်ကို စိုးရိမ်နေခြင်းဖြစ်သည်။

"ဒါကို မစိုးရိမ်ပါနဲ့ ငါ့မှာ ကိုင်တွယ်ဖြေရှင်းမယ့် နည်းလမ်းတွေ ရှိပါတယ်။ ဒါပေမဲ့ မင်းကို မေးစရာ တစ်ခုရှိတယ်... မင်း ဟုန်ဧကရာဇ်မြို့တော်အကြောင်း သိလား"

ယန်ချန်းလန်က ခုနက ဟုန်ဧကရာဇ်မြို့တော်အကြောင်းကို ခဏမျှသာ ပြောပြခဲ့သဖြင့် ယွင်ရှန်းမှာ တိုက်ကြီးပေါ်ရှိ အရေးကိစ္စများကို ကောင်းစွာ မသိသေးပေ။

ဦးလေးဖြစ်သူ၏ ရှင်းပြချက်ကို နားထောင်ပြီးနောက် ဤကိစ္စတစ်ခုလုံးတွင် သံသယဖြစ်ဖွယ် အချက်အလက်များစွာ ရှိနေကြောင်း ယွင်ရှန်း တွေးတောမိသည်။ သူမ၏ ဦးလေးလက်မောင်း ပြန်ကောင်းသွားပြီ ဆိုသော်ငြားလည်း သူ့ကို နစ်နာအောင် လုပ်ခဲ့ပြီး အပြစ်မဲ့သော ယန်မိသားစုစစ်သည်များစွာ၏ အသက်ကို နုတ်ယူခဲ့သူများကို ဤအတိုင်း အလွယ်တကူ လွှတ်ပေးရန် သူမတွင် အစီအစဉ်မရှိပေ။ ယန်ချန်းလန်သည်လည်း ဤကိစ္စကို လက်လျှော့မည့်သူ မဟုတ်ကြောင်း သူမ ယုံကြည်သည်။

ယန်ချန်းလန်သည် ယန်စံအိမ်မှ ထွက်ခွာကာ အမဲလိုက်စစ်သည်ဖြစ်လာရခြင်း၏ အဓိကအကြောင်းရင်းမှာ ဒါကျိုးစစ်တပ်နှင့် ဝေးဝေးနေရန်နှင့် ဒါကျိုးနိုင်ငံ သို့မဟုတ် ယန်စံအိမ်ကိုပါ သူ၏ပြဿနာများအတွင်းသို့ ဆွဲမသွင်းမိစေရန် ဖြစ်နိုင်သည်ဟု ယွင်ရှန်း သံသယရှိနေသည်။ တစ်နေ့တွင် သူ၏အင်အား လုံလောက်လာပါက ယန်ချန်းလန်သည် ဟုန်ဧကရာဇ်မြို့တော်မှ လူများကို ရှာဖွေကာ တိုက်ခိုက်ခံရပြီး သေဆုံးသွားခဲ့ရသော ညီအစ်ကိုများအတွက် သေချာပေါက် ကလဲ့စားချေပေလိမ့်မည်။

"ဟုန်ဧကရာဇ်မြို့တော်လား ဟဲဟဲ... သခင်မလေး အဲ့ဒီလို ကြောက်စရာကောင်းတဲ့ နေရာမျိုးနဲ့ ပတ်သက်မိတာမျိုးတော့ မဖြစ်ပါစေနဲ့လို့ ဆုတောင်းပါတယ်။ ဒါနဲ့ သခင်မလေးက ဘာလို့ ကျွန်တော့်ကို မေးနေတာလဲ တကယ်ဆိုရင် သခင်မလေးရဲ့ ဆရာကို မေးသင့်တာလေ။ သူကလည်း ဟုန်ဧကရာဇ်မြို့စားလိုပဲ ဆင့်ခေါ်ဧကရာဇ်အဆင့်ရှိတဲ့ ပုဂ္ဂိုလ်တစ်ယောက်ပဲ။ သူတို့ချင်းက နေရာတော်တော်များများမှာ အဆက်အသွယ် ရှိကြမှာပေါ့"

ကျုံးရန်က မျက်ခုံးပင့်ကာ ဇဝေဇဝါဖြင့် ပြောလိုက်သည်။

ဆင့်ခေါ်ဧကရာဇ် အဆင့်ရှိတဲ့သူတွေလား။

ဟုန်ဧကရာဇ်မြို့တော်ထဲမှာလည်း ဆင့်ခေါ်ဧကရာဇ် အဆင့်ရှိတဲ့သူတွေ ရှိနေတာလား။

"ငါ့ရဲ့ဆရာက ဒီလိုအရေးကိစ္စတွေကို စိတ်မဝင်စားဘဲ ပုန်းကွယ်နေတတ်တဲ့ ပညာရှင်တစ်ယောက်ပဲ။ ဒါမှမဟုတ် တိုက်ကြီးပေါ်မှာ ဆယ်စုနှစ်ချီ လှည့်လည်ခဲ့တဲ့ မြင့်မြတ်သောသားရဲဆင့်ခေါ်သူ ကြီးက ဟုန်ဧကရာဇ်မြို့တော်အကြောင်းကို မသိဘူးလို့ ပြောချင်တာလား"

ယွင်ရှန်းသည် သူမ၏ လက်အောက်ခံဟောင်းဖြစ်သူ၏ စိတ်နေစိတ်ထားကို ကောင်းစွာ သိရှိထားသည်။ ကျုံးရန်သည် မာနကြီးသူဖြစ်ပြီး စိန်ခေါ်လိုက်ပါက သူသိသမျှကို အကုန်အစင် ထုတ်ပြောမည့်သူ ဖြစ်သည်။

"သိတာပေါ့ သခင်မလေးရဲ့... မမေ့ပါနဲ့ဦး ကျွန်တော့်မှာ လင်းနို့ဘုရင် ရှိတယ်လေ။ လင်းနို့တွေရှိတဲ့ ဘယ်နေရာမှာမဆို ကျွန်တော် သတင်းအချက်အလက်တွေ စုံစမ်းလို့ရတယ်"

ကျုံးရန်သည် အကွက်ထဲသို့ ဆင်းလာကာ သူသိသမျှကို ဝါကြွားစွာ ပြောပြတော့သည်။

တိုက်ကြီးပေါ်ရှိ ဆင့်ခေါ်ပညာရှင် အများစုမှာ ဆင့်ခေါ်ခန်းမမှ ဖြစ်ကြသော်လည်း ဆင့်ခေါ်ဧကရာဇ် အဆင့်သို့ ရောက်ရှိသူမှာ အနည်းငယ်မျှသာ ရှိသည်။ လောလောဆယ် သက်ရှိထင်ရှားရှိသော ဆင့်ခေါ်ဧကရာဇ်များထဲတွင် ဆင့်ခေါ်ခန်းမမှလူများမှာ အများဆုံးဖြစ်ပြီး လက်ရှိ ဆင့်ခေါ်ဧကရာဇ်အပါအဝင် စုစုပေါင်း သုံးဦး ရှိသည်။ ၎င်းမှာ ယွင်ရှန်း၏ ဆရာဟု အမည်တပ်ထားသော တိုက်ကြီးပေါ်မှ အမည်မသိ ပြိုင်ဘက်ကင်း ပညာရှင်ကို မပါဝင်သေးပေ။

ထိုလူသိများသော ဆင့်ခေါ်ဧကရာဇ် သုံးဦးအနက် တစ်ဦးမှာ ဟုန်ဧကရာဇ်မြို့တော်၏ မြို့စားမင်း ဖြစ်သည်။ သို့သော် အခြားဆင့်ခေါ်ပညာရှင်များနှင့် မတူသည့်အချက်မှာ ဟုန်ဧကရာဇ်

မြို့စားသည် အခြားသူများကဲ့သို့ မှော်ဆရာတစ်ဦး မဟုတ်ပေ။

ဟုန်ဧကရာဇ်မြို့တော်မှ ဆင့်ခေါ်ဧကရာဇ်သည် ဂီတကို အသုံးပြု၍ ဆင့်ခေါ်ခြင်းဖြစ်ပြီး ဧကရာဇ်တေးသွားကို ပိပါဖြင့် တီးခတ်ကာ မိစ္ဆာသားရဲများကို ဆင့်ခေါ်ခြင်းဖြစ်သည်။ တိုက်ကြီးပေါ်တွင် ပိပါတီးခတ်သံဖြင့် နတ်ဘုရားအဆင့် မိစ္ဆာသားရဲကို တိုက်ရိုက်ဆင့်ခေါ်

နိုင်သည့် တစ်ဦးတည်းသော ပုဂ္ဂိုလ်ဖြစ်သည်ဟု ပြောကြသည်။

ကျုံးရန်က ၎င်းကို ပြောပြပြီးနောက် ခဏမျှ တွေးတောလိုက်ပြီး "ဒါနဲ့ သခင်မလေး... အခုနက ကုသမှုလုပ်နေတုန်းက သခင်မလေးဘေးက မိန်းကလေး တီးနေတဲ့ တူရိယာသံက ဧကရာဇ်တေးသွားနဲ့ တော်တော်လေး ဆင်နေသလိုပဲနော်"

ကျုံးရန်သည် လွန်ခဲ့သော ဆယ်စုနှစ်များစွာက ဟုန်ဧကရာဇ်မြို့တော်သို့ ရောက်ရှိခဲ့ဖူးပြီး ကံကောင်းထောက်မစွာဖြင့် ဧကရာဇ်တေးသွားကို တစ်ကြိမ်တစ်ခါ နားဆင်ခဲ့ဖူးသည်။

ဟွမ်ချွဲအာ၏ စွမ်းအားမှာ မလုံလောက်သေးဘဲ သူမ၏ ပိပါတီးခတ်သံမှာ နားဝင်ချိုရုံမျှသာ ရှိသော်လည်း ၎င်း၏ သံစဉ်မှာမူ ကျုံးရန် ကြားဖူးခဲ့သော ဧကရာဇ်တေးသွားနှင့် အမှန်တကယ် ဆင်တူနေခြင်းဖြစ်သည်။

ဟုန်ဧကရာဇ်မြို့တော်အတွင်း၌ အထင်ကရ အရှိဆုံး မိသားစုကြီး နှစ်စုရှိပြီး ၎င်းတို့မှာ ရွှမ်းမိသားစုနှင့် ယွမ်မိသားစုတို့ ဖြစ်ကြသည်။ ထိုမိသားစုနှစ်စုမှာ ပထမဆုံးသော မြို့စားလင်မယား၏ ဆွေမျိုးသားချင်းများမှ ဆင်းသက်လာကြသူများဟု ပြောကြသည်။ ယန်ချန်းလန် ပထမဆုံးတွေ့ရှိပြီး ချစ်ကြိုက်ခဲ့သော အမျိုးသမီးမှာ အမှန်တကယ်ပင် ယွမ်မိသားစုဝင်တစ်ဦး ဖြစ်နေခဲ့သည်။

ရွှမ်းမိသားစုနှင့် ယွမ်မိသားစုတို့တွင် သီးခြားမျိုးနွယ်စုများ အသီးသီး ရှိကြသော်လည်း ပထမဆုံး မြို့စားလင်မယား ချမှတ်ခဲ့သော စည်းမျဉ်းများအရ ရွှမ်းနှင့် ယွမ်မိသားစု၏ မျိုးဆက်တိုင်းတွင် အနည်းဆုံး အမျိုးသားတစ်ဦးနှင့် အမျိုးသမီးတစ်ဦးတို့သည် အချင်းချင်း လက်ထပ်ထိမ်းမြားရမည် ဖြစ်သည်။ ထိုစုံတွဲသည် ဧကရာဇ်တေးသွားကို အတူတကွ ပူးပေါင်းလေ့ကျင့်ရမည်ဖြစ်ပြီး ထိုသို့ပြုလုပ်မှသာ အစွမ်းအထက်ဆုံးသော ဧကရာဇ်တေးသွားကို ရရှိနိုင်မည်ဖြစ်သည်။ ဤစည်းမျဉ်းသည် ဟုန်ဧကရာဇ်မြို့တော်၌ မျိုးဆက်ပေါင်းများစွာ ဆင်းသက်လာခဲ့သည်။

ဤအချက်ကို ကြားလိုက်ရချိန်တွင် ယွင်ရှန်းသည်လည်း အခြေအနေကို ခန့်မှန်းမိသွားသည်။ ယွမ်ရှာဟူသည် မြို့စားမင်းသားနှင့်အတူ ဧကရာဇ်တေးသွားကို ပူးပေါင်းလေ့ကျင့်ရန် ဤမျိုးဆက်၏ ယွမ်မိသားစုမှ ရွေးချယ်ခံထားရသည့် မိန်းကလေး ဖြစ်နေပေလိမ့်မည်။

"ဧကရာဇ်တေးသွားကို သုံးပြီး မိစ္ဆာသားရဲတွေကို ဆင့်ခေါ်နိုင်တယ်လို့ ပြောတာလား"

ယွင်ရှန်းမှာ မယုံကြည်နိုင်လောက်အောင် ဖြစ်သွားရသည်။ သူမကိုယ်တိုင်မှာ ဆင့်ခေါ်ပညာရှင်တစ်ဦးဖြစ်ပြီး ဆင့်ခေါ်ခြင်းကို အမြဲတမ်း ဆင့်ခေါ်စက်ဝန်းများဖြင့်သာ ပြုလုပ်လေ့ရှိသောကြောင့်ပင်။

"ဟုတ်ပါတယ်။ ဧကရာဇ်တေးသွားမှာ အပိုင်းကိုးပိုင်း ရှိတယ်။ အမြင့်ဆုံးအဆင့်အထိ လေ့ကျင့်နိုင်တဲ့သူက ဧကရာဇ်တေးသွားကို သုံးပြီး နတ်ဘုရားအဆင့်မိစ္ဆာသားရဲတွေကို ဆင့်ခေါ်နိုင်တယ်လို့ ဆိုကြတယ်။ ဒါတင်မကသေးဘူး... ဧကရာဇ်တေးသွားဟာ အသုံးပြုတဲ့သူပေါ်မူတည်ပြီး အကျိုးသက်ရောက်မှုတွေ ကွဲပြားနိုင်သေးတယ်။ ဥပမာ သိုင်းပညာရှင်တစ်ဦးက သုံးရင် သူတို့ရဲ့ တိုက်ပွဲဝင်စိတ်ဝိညာဉ်ကို မြှင့်တင်ပေးနိုင်သလို မှော်ဆရာတစ်ဦးက သုံးရင် သူတို့ရဲ့ မှော်ဝိညာဉ်ကို အားကောင်းစေနိုင်တယ်"

"ဒါပေမဲ့ ဆင့်ခေါ်ပညာရှင်တစ်ဦးက သုံးမယ်ဆိုရင်တော့ နတ်ဘုရားအဆင့် သားရဲတွေကို တိုက်ရိုက်ဆင့်ခေါ်နိုင်တာပဲ။ ဒါပေမဲ့ ပထမဆုံးမျိုးဆက် မြို့စားလင်မယား ကွယ်လွန်ပြီးတဲ့နောက်မှာတော့ ဟုန်ဧကရာဇ်မျိုးနွယ်စုတွေအတွက် ဧကရာဇ်တေးသွား ကိုးပိုင်းစလုံးကို ပြည့်စုံအောင် လေ့ကျင့်ဖို့က အရမ်းခက်ခဲသွားခဲ့တယ်"

ဟုန်ဧကရာဇ်မြို့တော်ရှိ လူတိုင်းသည် အသက် ၆ နှစ်ပြည့်ပြီးနောက် ဧကရာဇ်တေးသွား၏ ပထမသုံးပိုင်းကို စတင်သင်ယူကြရသည်။ ထို့နောက် အသက် ၁၀ နှစ်ပြည့်လျှင် ပထမအကြိမ် ဧကရာဇ်တေးသွား စစ်ဆေးမှုကို ခံယူကြရသည်။ ထိုစစ်ဆေးမှုကို အောင်မြင်သူများသာ နောက်ပိုင်းအခန်းများကို ဆက်လက်သင်ယူခွင့် ရရှိကြခြင်းဖြစ်သည်။ ယွမ်ရှာဟူသည် ယန်ချန်းလန်၏ ရှေ့မှောက်တွင် ဧကရာဇ်တေးသွား၏ နောက်ပိုင်းအခန်းများကို တီးခတ်ပြခဲ့ဖူးသည်ဆိုခြင်းမှာ သူမသည် ဟုန်ဧကရာဇ်မျိုးနွယ်စုအတွင်း ဤပညာရပ်တွင် ပါရမီအထူးဆုံး ပုဂ္ဂိုလ်တစ်ဦးဖြစ်ကြောင်း သက်သေပြနေခြင်းပင်။