ကိုယ်တွယ်ဖြေရှင်းခြင်း

ကျီကမ္ဘာ။

စကြဝဠာ ကမ္ဘာပေါင်းများစွာအနက် အဆန်းကြယ်ဆုံး ကမ္ဘာကြီးတစ်ခု ဖြစ်ပြီး၊ ကျီမိသားစုသည် ဤကမ္ဘာကြီး၏ စစ်မှန်သော အရှင်သခင်များ ဖြစ်ကြသည်။

ကျီကမ္ဘာ တစ်ခုလုံးရှိ လူအများစုသည် အနည်းနှင့်အများ ဆိုသလို ကျီမိသားစု၏ သွေးစည်း ပါဝင်ကြသည်ဟု ဆိုကြသည်။

ကျီမိသားစု၏ ဘိုးဘွားပိုင်မြေတွင်။

ကျီမိသားစု၏ အထက်အဆင့် မျိုးနွယ်စုအကြီးအကဲများနှင့် အထွတ်အထိပ် မျိုးနွယ်စုအကြီးအကဲ တစ်ဒါဇင်ကျော် စုဝေးနေကြသည်။

"ကျီယင်း... အဲဒီလူက လုရှန်ဓားကို တကယ်ပဲ အခြေခံအဆင့် ဝင်သွားပြီလို့ မင်း သေချာလား" အထွတ်အထိပ် မျိုးနွယ်စုအကြီးအကဲဖြစ်သူ အကြီးအကဲရှန့်က လေးနက်စွာ မေးလိုက်သည်။

မယုံတာတော့ မဟုတ်ပေမဲ့၊ ဒီကိစ္စက တုန်လှုပ်စရာ အရမ်းကောင်းလွန်းလို့ ဖြစ်သည်။

"အကြီးအကဲရှန့်... ကျွန်တော် ရာနှုန်းပြည့် သေချာပါတယ်" ကျီယင်း ခေါင်းညိတ်ပြီး ပြောလိုက်သည်။

"ဒါဆို ဒီကိစ္စကို ဘိုးဘေးဆီ အစီရင်ခံမှဖြစ်တော့မယ်" အခြား အထွတ်အထိပ် မျိုးနွယ်စုအကြီးအကဲ တစ်ဦးက ပြောလိုက်သည်။

ကောင်းကင်ဘုံကိုးလွှာဓားကိစ္စက အလွန် အရေးကြီးသည်။ အခု မသေမျိုးဧကရာဇ်၏ သွေးမျိုးဆက်ဖြစ်ပြီး လုရှန်ဓားကို တတ်မြောက်ထားသူ တစ်ယောက် အပြင်မှာ ရောက်နေတယ်။ ဒီလူကို ကျီမိသားစုထဲ ဆွဲမခေါ်နိုင်ရင် အရမ်းနှမြောစရာကောင်းသွားလိမ့်မယ်။

ထိုအချိန်တွင် ကောင်းကင်မှ အလင်းတန်းတစ်ခု ကျဆင်းလာပြီး ခန်းမဆောင်၏ ပလ္လင်ပေါ်တွင် ဝိုးတဝါးပုံရိပ်တစ်ခု ပေါ်လာသည်။

ရှိနေသော အကြီးအကဲများအားလုံး မတ်တတ်ထရပ်ပြီး အရိုအသေ ပြုလိုက်ကြသည်။ "ဘိုးဘေးကို ဂါရဝပြုပါတယ်"

ထိုဝိုးတဝါး ပုံရိပ်သည် ကျီမိသားစုဘိုးဘေးပင် ဖြစ်သည်။

"လုရှန်ဓားဆိုတာ အတုလုပ်လို့ရတဲ့အရာ မဟုတ်ဘူး... ဒီကောင်လေးက လုရှန်ဓားကို ကိုယ့်ဖာသာ တတ်မြောက်နိုင်တယ်ဆိုကတည်းက၊ သူ့ဆီမှာ မသေမျိုးဧကရာဇ်ရဲ့ အသန့်စင်ဆုံး သွေးမျိုးဆက်ရှိနေတယ်ဆိုတာ ပြသနေတယ်။ အနာဂတ်မှာ ၉ ကွက်မြောက် ဓားသိုင်းကို နားလည်သဘောပေါက်နိုင်မယ့် မျှော်လင့်ချက် ရှိကောင်း ရှိနိုင်တယ်"

ကျီမိသားစုဘိုးဘေး၏ ဝိုးတဝါးပုံရိပ်ဆီမှ ရှေးကျပြီး အိုမင်းသောအသံ ထွက်ပေါ်လာသည်။ "ငါတို့ ကျီမိသားစုအနေနဲ့ ၃၃ ဘုံ မှာ စခန်းတစ်ခု တည်ထောင်ဖို့လိုပြီ။ အထက်အဆင့် မျိုးနွယ်စုအကြီးအကဲတစ်ယောက်ကိုစေလွှတ်ပြီး အဲဒီမှာ အမြဲတမ်း နေထိုင်စေရမယ်။ အဲဒီပုဂ္ဂိုလ်နဲ့ ဆက်ဆံရေး ကောင်းမွန်အောင် တည်ဆောက်ပြီး သူ့လိုအပ်ချက်မှန်သမျှကို အတတ်နိုင်ဆုံး ဖြည့်ဆည်းပေးကြ..."

"ဘိုးဘေး... တစ်ဖက်လူက ကျီမိသားစုထဲဝင်ဖို့ ငြင်းဆန်ထားတာလေ။ ဒီလောက်ထိ လိုက်လျောပေးစရာ လိုလို့လား" အထွတ်အထိပ် မျိုးနွယ်စုအကြီးအကဲတစ်ဦးက မနေနိုင်ဘဲ မေးလိုက်သည်။

ဆက်ဆံရေးကောင်းအောင်နေတာက ပြဿနာ မရှိပေမဲ့၊ လိုချင်တာအကုန် ဖြည့်ဆည်းပေးရမယ် ဆိုတာက နည်းနည်း များလွန်းနေသလားလို့။

အခြားအကြီးအကဲများလည်း ထိုအတိုင်း တွေးမိကြသည်။

"မင်းတို့ ဘာသိလို့လဲ။ ငါက နောက်ထပ် ဟွေ့ယွမ်ကပ်ဘေး ဘယ်နှစ်ကြိမ်မှ ခံနိုင်တော့မှာ မဟုတ်ဘူး။ ငါ သေသွားပြီးတဲ့နောက် ကျီမိသားစုထဲမှာ လုရှန်ဓား အထွတ်အထိပ်ရောက်တဲ့သူ တစ်ယောက်မှ ထပ်မပေါ်လာရင်၊ ကျီမိသားစုကြီးတစ်ခုလုံး ပျက်စီးကိန်း ဆိုက်လိမ့်မယ်" ကျီမိသားစုဘိုးဘေးက အေးစက်စွာ ပြောလိုက်သည်။

သူ၏ ကျင့်ကြံမှုသည် အတိဒုက္ခကျော်ဖြတ်ခြင်းတွင် ရပ်တန့်နေသည်မှာ နှစ်ပေါင်း သောင်းချီ ကြာမြင့်နေပြီ။ ဝမ်းနည်းစရာက သူ ကပ်ဘေးကို မကျော်ဖြတ်နိုင်သလို၊ ကျော်ဖြတ်ဖို့လည်း မဖြစ်နိုင်တော့ပေ။

သူ အချိန်ဆွဲထားခဲ့တာ ကြာလှပြီ။ အခု ဆက်ဆွဲထားဖို့ မဖြစ်နိုင်တော့ဘူး။

မိုးကြိုးကပ်ဘေး ကျရောက်လာတာနဲ့ သူ သေချာပေါက် သေဆုံးရတော့မည်။

ရှိနေသူများ ရင်ထဲထိတ်ခနဲဖြစ်သွားပြီး ဘိုးဘေး၏စကားကို နားလည်လိုက်ကြသည်။

ကျီမိသားစုတွင် မိုးကြိုးကပ်ဘေးကို ရွှေ့ဆိုင်းထားနိုင်သော နည်းလမ်းရှိသော်လည်း အကန့်အသတ်မရှိ ရွှေ့ဆိုင်းထား၍ မရပေ။ ကျီမိသားစုသမိုင်းကြောင်းတွင် လူအများအပြားသည် ဆက်လက် မရွှေ့ဆိုင်းနိုင်တော့ဘဲ နောက်ဆုံးတွင် မိုးကြိုးကပ်ဘေးအောက်၌ သေဆုံးသွားခဲ့ကြရသည်။

မိုးကြိုးကပ်ဘေးကို ရွှေ့ဆိုင်းရန် အကောင်းဆုံးနည်းလမ်းမှာ ကောင်းကင်ဘုံကိုးလွှာဓားကို ကျင့်ကြံခြင်းဖြစ်သည်။ နားလည်သဘောပေါက်မှု မြင့်မားလေလေ ကြာကြာရွှေ့ဆိုင်းထားနိုင်လေလေ ဖြစ်သည်။

ကြားတာတော့ ၉ ကွက်မြောက် ဓားသိုင်း အထွတ်အထိပ် ရောက်သွားရင် ကပ်ဘေးကင်းစင်ပြီး ထာဝရ မပျက်သုဉ်းနိုင်သောအခြေအနေကို ရောက်ရှိသွားမည်ဟု ဆိုကြသည်။

ယခုရှိနေသော အထွတ်အထိပ် မျိုးနွယ်စုအကြီးအကဲများသည် ရှန် (မသေမျိုး) အဆင့် ဓားသိုင်း (လုရှန်ဓား) ကို အခြေခံအဆင့် ဝင်ရောက်ထားကြသော်လည်း၊ အထွတ်အထိပ်ရောက်အောင် ကျင့်ကြံဖို့ဆိုတာ မဖြစ်နိုင်သလောက်ပင်။

ဘိုးဘေးသာ ကပ်ဘေးကြောင့် သေဆုံးသွားခဲ့ရင် ကျီမိသားစုသည် ကျောထောက်နောက်ခံ တိုင်မရှိတော့ဘဲ ဖြစ်သွားမည်။ နောင်လာမည့် ဟွေ့ယွမ်ကပ်ဘေးများကို ခုခံကာကွယ်ရန် ခက်ခဲသွားလိမ့်မည်။

ဘိုးဘေး၏ဆိုလိုရင်းကို သူတို့ သဘောပေါက်လိုက်သည်။

အနာဂတ်မှာ ဘိုးဘေး မရှိတော့တဲ့အခါ၊ မိသားစုထဲမှာ လုရှန်ဓား အထွတ်အထိပ်ရောက်သူ မရှိခဲ့ရင်၊ တစ်ခုတည်းသော နည်းလမ်းက ဟိုပုဂ္ဂိုလ်ကို ကျီမိသားစုထဲ ဖိတ်ခေါ်ပြီး ကျီကမ္ဘာကို စောင့်ရှောက်ခိုင်းဖို့ပဲ ရှိတော့တယ်။

ဒါကြောင့် အခုကတည်းက အဲဒီလူနဲ့ ဆက်ဆံရေးကောင်းမွန်အောင် တည်ဆောက်ထားဖို့ လိုအပ်တာ။

"ကျီယင်း" ဘိုးဘေးက ရုတ်တရက် ခေါ်လိုက်သည်။

"ရှိပါတယ် ဘိုးဘေး" ကျီယင်း အလျင်အမြန် ထူးလိုက်သည်။

"မင်းက အဲဒီလူနဲ့ ထိတွေ့ဖူးတာဆိုတော့... နောက်ပိုင်း ၃၃ ဘုံမှာ အမြဲတမ်းနေထိုင်မယ့်တာဝန်ကို မင်း ယူလိုက်ပါ" ဘိုးဘေးက အမိန့်ပေးလိုက်သည်။

"ဟုတ်ကဲ့ပါ ဘိုးဘေး" ကျီယင်း ချက်ချင်း ခေါင်းညိတ် လက်ခံလိုက်သည်။

ကျီကမ္ဘာနဲ့ဝေးကွာပြီး အပြင်မှာနေရတာ အန္တရာယ်များပေမဲ့...

ဟိုလူနဲ့ ဆက်ဆံရေး တည်ဆောက်ခွင့်ရမယ်ဆိုရင် တန်ပါသေးတယ်။

...

အချိန်ခေါင်းလောင်း လှိုဏ်ဂူကောင်းကင်ဘုံ။

လီချန်က လျှို့ဝှက်ရှန်ထျန်းဟွေ့ကို ယွီဟွာနတ်ဘုရားနန်းတော်ထဲ ပေါင်းထည့်လိုက်သည့် ကိစ္စကို ဝူရွှမ်းအား ပြောပြလိုက်သည်။

"လီချန်... ရှင်က ကျီမိသားစုရဲ့ဖိတ်ခေါ်မှုကို ငြင်းလိုက်တော့ သူတို့ မကျေမနပ် ဖြစ်မသွားဘူးလား" ဝူရွှမ်း မေးလိုက်သည်။

ကျီမိသားစုက တာအိုပေါင်းစည်းခြင်းအဆင့်ကျင့်ကြံသူတစ်ယောက်ကို လွှတ်လိုက်ရုံနဲ့ ဒီလောက် စွမ်းအားကြီးနေမှတော့၊ ကျီမိသားစုရဲ့ အင်အားအစစ်အမှန်က ဘယ်လောက်တောင် ကြီးမားမလဲ တွေးကြည့်လို့ ရနေပြီ။

"သူ့ရဲ့ တုံ့ပြန်ပုံအရဆိုရင်တော့... ပြဿနာ မရှိလောက်ပါဘူး" လီချန် ခေါင်းခါလိုက်သည်။

သူ ဝင်မပူးပေါင်းရုံနဲ့ သူ့ကို ရန်သူလို သဘောထားပြီး တိုက်ခိုက်မယ့် အဖွဲ့အစည်းမျိုးဆိုရင် ဒီလောက် နှစ်ပေါင်းများစွာ တည်တံ့နေမှာ မဟုတ်ဘူး။

"ပြီးတော့ ငါတို့လည်း စိုးရိမ်စရာ မလိုပါဘူး။ အဆိုးဆုံးအခြေအနေရောက်လာရင် ပုန်းနေလိုက်ရုံပဲလေ" လီချန်က ပေါ့ပါးစွာ ရယ်မောလိုက်သည်။

"လျှို့ဝှက်ရှန်ထျန်းဟွေ့က လူတွေ ဝင်လာပြီဆိုတော့... သူတို့ကို လှိုဏ်ဂူကောင်းကင်ဘုံထဲ ဝင်ခွင့်ပေးမှာလား" ဝူရွှမ်း ထပ်မေးလိုက်သည်။

"လှိုဏ်ဂူကောင်းကင်ဘုံက လျှို့ဝှက်ချက်မှ မဟုတ်တော့တာ။ သေချာပေါက် ဝင်ခွင့်ပေးရမှာပေါ့" လီချန် ပြောလိုက်သည်။

အခုဆိုရင် အချိန်ခေါင်းလောင်း လှိုဏ်ဂူကောင်းကင်ဘုံက အများကြီးကျယ်ဝန်းလာပြီ။ ကောင်းကင်တာအိုနယ်ပယ်နဲ့ ပေါင်းစပ်လိုက်တော့ လွှမ်းခြုံထားတဲ့ ဧရိယာက အံ့မခန်း ကြီးမားနေပြီ။

လျှို့ဝှက်ရှန်ထျန်းဟွေ့က တာအိုပေါင်းစည်းခြင်းအဆင့် ၃ ယောက်က စိတ်ရင်းမှန်နဲ့ ဝင်လာတာ မဟုတ်ရင်တောင် ပြဿနာ မရှိဘူး။ သူတို့ မကောင်းကြံစည်တာနဲ့ လီချန်က လက်တစ်ဖက်တည်းနဲ့ ဖိနှိပ်ပစ်လိုက်လို့ ရတယ်။

"ဝူရွှမ်း... မင်း လူလွှတ်ပြီး လျှို့ဝှက်ရှန်ထျန်းဟွေ့ရဲ့အခြေအနေကို အတွင်းကျကျ စုံစမ်းခိုင်းလိုက်ပါဦး" လီချန် မှာကြားလိုက်သည်။

"ကောင်းပြီ" ဝူရွှမ်း ခေါင်းညိတ်လိုက်သည်။ သူမ လီချန်ရဲ့သဘောကို နားလည်သည်။ လျှို့ဝှက်ရှန်ထျန်းဟွေ့ ခေါင်းဆောင် ၃ ယောက်ကို စမ်းသပ်ချင်တာ။ တကယ်လို့ သူတို့က ပူးပေါင်းဆောင်ရွက်တယ်ဆိုရင် စိတ်ရင်းမှန်နဲ့ ဝင်ရောက်တာဖြစ်ပြီး၊ ဟိုရွှေ့ဒီရွှေ့လုပ်နေရင်တော့ တစ်ခုခု ကြံစည်နေတာဖြစ်မယ်။

"စုယွမ်နတ်ဘုရားမြို့တော်ဘက်က တစ္ဆေနယ်မြေကိစ္စကို ဘယ်လိုလုပ်မလဲ" ဝူရွှမ်း ထပ်မေးလိုက်သည်။

"ငါ ကိုယ်တိုင် သွားကြည့်လိုက်မယ်" လီချန် ပြောလိုက်သည်။

ဒီကိစ္စက ငရဲဘုံသား တစ္ဆေမျိုးနွယ်တွေနဲ့ ပတ်သက်နေတာ။ တကယ်လို့များ ဒီတစ္ဆေနယ်မြေ ကနေတဆင့် ငရဲဘုံသားတွေ ဆင်းသက်လာရင် အတော်ဒုက္ခရောက်လိမ့်မယ်။

ဖြစ်နိုင်ချေနည်းပေမဲ့ ကြိုတင်ကာကွယ်ထားတာ ကောင်းတယ်။

ဟွေ့ယွမ်ကပ်ဘေးကာလ ကြာလာတာနဲ့အမျှ နောက်ပိုင်း ပိုပြီးရှုပ်ထွေးလာမှာ။ ဒါကြောင့် ဒီတစ္ဆေနယ်မြေ ပြဿနာကို စောစောစီးစီး ရှင်းပစ်တာ အကောင်းဆုံးပဲ။

ကျင့်ကြံခြင်းဧရိယာသို့ ပြန်ရောက်သောအခါ လီချန် တင်ပျဉ်ခွေထိုင်ပြီး ပုံမှန်ကျင့်ကြံခြင်းကို စတင်လိုက်သည်။

ဘယ်လောက်ပဲ အလုပ်ရှုပ်ရှုပ် ကျင့်ကြံခြင်းကို သူ ဘယ်တော့မှ မလျှော့ခဲ့ဘူး။

ဒါပေမဲ့ သူ့ရဲ့ တာအိုပေါင်းစည်းခြင်းအဆင့်ကျင့်ကြံမှုက လွန်ခဲ့တဲ့ နှစ် ၂၀ ကျော်ကတည်းက နှောင်းပိုင်း ၉၉/၁၀၀ မှာ ရပ်တန့်နေခဲ့တာ။ အတိဒုက္ခကျော်ဖြတ်ခြင်းကို တက်လှမ်းဖို့ ခက်ခဲနေတယ်။

သူ ထင်တာတော့ လင့်တုန်းလောကသစ်ပင်က အဆင့် ၅ မရောက်သေးလို့ ဖြစ်မယ်။

ဒါကြောင့် အခု သူက နိယာမတွေကို နားလည်သဘောပေါက်ဖို့နဲ့ လုရှန်ဓားကို လေ့ကျင့်ဖို့ အဓိကထားနေတာ။

အစီအရင်၊ ဆေးဖော်၊ လက်နက်သွန်းလုပ် စတာတွေကိုလည်း အချိန်ပေးလေ့လာနေတယ်။

အချိန်မည်မျှ ကြာသွားသည်မသိ။ လီချန် မျက်လုံးဖွင့်လိုက်ပြီး သက်ပြင်းတစ်ချက် ချလိုက်သည်။ သူ့ကိုယ်ပေါ်တွင် ပုံသဏ္ဍာန်မဲ့သော နိယာမအငွေ့အသက်များ လွှမ်းခြုံနေပြီး အချိန်အတော်ကြာမှ ငြိမ်သက်သွားသည်။

ရုတ်တရက် သူ စနစ်မျက်နှာပြင်ကို ခေါ်ထုတ်လိုက်သည်။

အိမ်ရှင်: လီချန်။

နတ်ဝိညာဉ် (ကောင်းကင်တာအို)။

တာအိုပေါင်းစည်းခြင်း (နှောင်းပိုင်း ၉၉/၁၀၀)။

အချိန်ခေါင်းလောင်း (နတ်ဘုရားကိရိယာ ၃၇၈၅၀၆/၁၀၀၀၀၀၀၀)။

ကောင်းကင်ဘုံဓား သတ္တမအထိ: (ကျွမ်းကျင်)။

ကောင်းကင်ဘုံအဌမဓား (အဆင့်ငယ်အောင်မြင်မှု ၆/၁၀၀)။

မျက်လုံးခြောက်လုံးပိုင်ဆိုင်သော ဟွန်တွန်လျှို့ဝှက်နတ်ဘုရား သက်ဆင်းခြင်းပညာ (ကြီးမားသော သက်ဆင်းခြင်း ၉၉/၁၀၀)။

လင့်တုန်းလောကသစ်ပင် (အဆင့် ၄ ၈၄/၁၀၀)။

ချန်ယွမ်အစီအရင်ကျမ်း (နှစ်ဆယ့်နှစ်အခြေခံ ၈၉/၁၀၀)။

ဝိညာဉ်ဆေးပင်စိုက်ပျိုးသူ(အဆင့်ဆယ့်တစ် ၃၇/၁၀၀)။

လက်နက်သန့်စင်သူ (အဆင့်တစ်ဆယ် ၉၉/၁၀၀)။

အဂ္ဂိရတ်ဆရာ (အဆင့်ဆယ့်တစ် ၉၉/၁၀၀)။

သားရဲထိန်းကျောင်းသူ (အဆင့် ၅ ၆၆/၁၀၀)။

လင့်တုန်းလောကသစ်ပင်က အဆင့် ၄ (၈၄/၁၀၀) ရောက်နေပြီ။ နောက်ထပ် နှစ် ၁၀၀ လောက်ဆိုရင် အဆင့် ၅ ရောက်တော့မယ်။

"ငါ့ လောကသစ်ပင်သာ အဆင့် ၅ ရောက်သွားရင်... အနည်းဆုံးတော့ ဒီ၃၃ ဘုံ အတွင်းမှာ ငါ့ကို ခြိမ်းခြောက်နိုင်သူ သိပ်ရှိတော့မှာ မဟုတ်ဘူး" လီချန် စိတ်ထဲတွင် တွေးလိုက်သည်။

သူ သိသလောက် နတ်ဘုရားနန်းတော်က အစွမ်းအထက်ဆုံး အထူးရွှေနတ်ဘုရားတွေတောင် နိယာမ အဆင့် ၆ လောက်ပဲ ရှိတာ။

အဆင့် ၇ ဆိုတာ မရှိသေးဘူး။

အဆင့် ၇ နိယာမ ပိုင်ဆိုင်တဲ့ အထူးရွှေနတ်ဘုရားဆိုရင် ရှန်ဝမ် (မသေမျိုးဘုရင်) လို့ ခေါ်ကြတာလေ။

ထို့နောက် လီချန် စိတ်ကို လှုပ်ရှားလိုက်ရာ ခန္ဓာကိုယ်ထဲမှ ဓားအလင်းတန်း အမြောက်အမြား ထွက်ပေါ်လာပြီး ဓားမြစ်တစ်စင်းသဖွယ် သူ့ပတ်လည်တွင် လှည့်ပတ်စီးဆင်းနေကာ နောက်ဆုံးတွင် ခေါင်းလောင်းပုံသဏ္ဍာန် အကာအကွယ်တစ်ခုအဖြစ် သူ့ကို လွှမ်းခြုံလိုက်သည်။

"အခြေခံ ၂၂ အဆင့် အချိန်ခေါင်းလောင်း ဓားအစီအရင်ကတော့ အခြေခံအားဖြင့် အထွတ်အထိပ် ရောက်နေပြီ..." လီချန် ရေရွတ်လိုက်သည်။

ဒါပေမဲ့ တော်တော် မစွမ်းသေးသလို ခံစားနေရတယ်။ ဒီဓားအစီအရင်ကို ထိန်းချုပ်တဲ့အခါ အရမ်းလွယ်ကူလွန်းနေသလိုပဲ။

စုစုပေါင်း တာအိုဓား ၁၉၈ လက်ပဲ ရှိတာကိုး။ နည်းနည်း နည်းနေသလားလို့။

"တကယ်လို့ ငါက ဒီထက်ပိုပြီး ချဲ့ထွင်လိုက်မယ်ဆိုရင်ရော... အခြေခံအစီအရင်တစ်ခုချင်းစီကို လျန်ချီး၊ စန်းချန်၊ စစ်ရှန်၊ ဝူရှင်း၊ လျို့ကျောင်း၊ ချီရှင်း၊ ပါးကွ၊ ကျိုကုန်း၊ ရှီဖန် စသဖြင့် ပုံစံမျိုးစုံနဲ့ ခွဲခြားပေါင်းစပ်လိုက်ရင် တာအိုဓားအရေအတွက် ပိုများလာမလား" လီချန် စဉ်းစားခန်း ဝင်သွားသည်။

သေချာတာကတော့ တာအိုဓားအရေအတွက်များလာရင် ထိန်းချုပ်ရခက်ခဲလာမယ်။

ထိန်းချုပ်မှုလွဲချော်သွားရင် စွမ်းအားကျဆင်းသွားနိုင်သလို၊ ကိုယ့်ကိုယ်ကိုယ် ပြန်ထိခိုက်နိုင်တယ်။ ဒါကြောင့် သတိထားရမယ်။

လောလောဆယ်တော့ စိတ်ကူးပဲရှိသေးတာ။ တကယ်တမ်း လက်တွေ့ အကောင်အထည် ဖော်ဖို့ အချိန်ယူရဦးမယ်။

အဲဒီအချိန်ကျရင် တာအိုဓားတွေ ပိုလုပ်ရမယ်ဆိုတော့ လက်နက်သွန်းလုပ်ရေး ပစ္စည်းတွေ ပိုလိုလာလိမ့်မယ်။

ကံကောင်းတာက သူ့လက်ထဲမှာ မပျက်သုဉ်းနိုင်သော ရွှေတွေ အများကြီး ရှိနေသေးတယ်။

ဒါကြောင့် ဓားအစီအရင် ပိုမိုရှုပ်ထွေးနက်နဲအောင် လေ့လာရင်းနဲ့ တာအိုဓားတွေကို တပြိုင်နက်တည်း သွန်းလုပ်သွားဖို့ သူ စဉ်းစားထားသည်။

သူ့ ရည်မှန်းချက်ကတော့ ပါးကွ၊ ကျိုကုန်း၊ ရှီဖန် အဆင့်တွေအထိ တက်လှမ်းဖို့ပဲ။ စဉ်းစားကြည့်ပါ... တာအိုဓား ၁၀၀၀ လောက်နဲ့ ခင်းကျင်းထားတဲ့ ဓားအစီအရင်... တွေးကြည့်ရင်တောင် ရင်ခုန်စရာကောင်းနေပြီ။

မကသေးဘူး... နည်းနေသေးတယ်။

တာအိုဓား ၁၀၀၀၀ (တစ်သောင်း) လောက်နဲ့ ကန့်လန့်ဖြတ် ပျံသန်းတိုက်ခိုက်ရင် ဘယ်လောက်တောင် ခမ်းနားလိုက်မလဲ။

လီချန် ခေါင်းခါလိုက်သည်။ လောလောဆယ်တော့ စိတ်ကူးယဉ်သက်သက်ပါပဲ။

တာအိုဓား တစ်သောင်းသွန်းလုပ်ဖို့ဆိုတာ တွေးလိုက်တာနဲ့တင် ခေါင်းကိုက်ချင်စရာကောင်းနေပြီ။

အခု ရှိတဲ့ တာအိုဓား ၁၀၀ ကျော်ကို အဆင့် ၃ ရောက်အောင် လုပ်တာတောင် သူ့ရဲ့ သွေးတွေ ချွေးတွေ အများကြီး ရင်းနှီးခဲ့ရတာ။

အတိုချုပ်ပြောရရင် လက်နက်သွန်းလုပ်တယ်ဆိုတာ လွယ်ကူတဲ့ကိစ္စ မဟုတ်ဘူး။

......

ရက်အနည်းငယ် ကြာပြီးနောက်။

လီချန်သည် အချိန်ခေါင်းလောင်း လှိုဏ်ဂူကောင်းကင်ဘုံမှထွက်ခွာပြီး စုယွမ်နတ်ဘုရားမြို့တော် သို့ သွားရောက်ခဲ့သည်။

စုယွမ်မြို့၏ အရှေ့ဘက် မိုင် ၃၀၀၀ အကွာတွင် ယန်ချွဲ့တောင်ရှိသည်။

မူလက ဒီနေရာမှာ နတ်ဘုရားဂိုဏ်းတစ်ခု ရှိခဲ့ဖူးသော်လည်း၊ တစ္ဆေနယ်မြေပေါ်လာပြီးနောက် ပြောင်းရွှေ့သွားခဲ့သည်။

တစ္ဆေနယ်မြေပတ်လည် မိုင်ရာချီအတွင်းရှိ ရွာတွေ၊ မြို့တွေ အကုန်လုံးလည်း ပြောင်းရွှေ့ကုန်ကြပြီ။

တစ္ဆေနယ်မြေအတွင်းမှ ထူးဆန်းသော သတ္တဝါများ ထွက်ပေါ်လာပြီး ပတ်ဝန်းကျင်ကို နှောင့်ယှက်နေကြလို့ ဖြစ်သည်။

ယခုအခါ ယွီဟွာနတ်ဘုရားဂိုဏ်းသည် တစ္ဆေနယ်မြေအစွန်းပိုင်းတွင် ကျင့်ကြံသူများ စေလွှတ်ပြီး စောင့်ကြည့်နေသည်။ အစီအရင်များဖြင့် ပိတ်ဆို့ဖို့ ကြိုးစားခဲ့သော်လည်း သိပ်မထိရောက်ပေ။

....

တောင်ခြေတစ်ခုရှိ ရွာပျက်ကြီး တစ်ခုတွင်။

လူမရှိတော့ဘဲ တိတ်ဆိတ်ခြောက်ကပ်နေသည်။

ယွီဟွာနတ်ဘုရားဂိုဏ်းမှ တပည့် ဒါဇင်အနည်းငယ်သာ တပ်စွဲထားသည်။ သူတို့သည် နေ့စဉ် တစ္ဆေနယ်မြေ ပတ်လည်ကို ကင်းလှည့်ပြီး နယ်မြေချဲ့ထွင်မှု နှုန်းထားကို စောင့်ကြည့်ကြသည်။

"ဒီတစ္ဆေနယ်မြေ ချဲ့ထွင်မှုနှုန်းက ပိုမြန်လာသလိုပဲ။ ဒီအတိုင်းသာဆက်သွားရင် နှစ် ၁၀၀ မပြည့်ခင် စုယွမ်မြို့အထိ ရောက်လာလိမ့်မယ်" ရွှမ်းနတ်ဘုရားအဆင့် ကျင့်ကြံသူတစ်ဦးက သက်ပြင်းချလိုက်သည်။

"ငါတို့လည်း ဘာမှမတတ်နိုင်ဘူးလေ။ အင်မော်တယ်နန်းတော်ကလည်း လာမရှင်းပေးဘူး" အခြား ကျင့်ကြံသူတစ်ဦးက ပြောသည်။

"ဝူရွှမ်းတာအိုနန်းတော်ဘက်က ဝင်ပါလာမလား မသိဘူးနော်" တစ်ယောက်က တိုးတိုးလေး မေးလိုက်သည်။

အင်မော်တယ်နန်းတော်ကလူတွေ ပြန်သွားကြပြီဖြစ်ပေမဲ့၊ ယွီဟွာနတ်ဘုရားဂိုဏ်း တပည့်တွေက သတိထားပြီး ပြောဆိုနေကြဆဲဖြစ်သည်။ သူတို့က ဝူရွှမ်းတာအိုနန်းတော် (ယွီဟွာနတ်ဘုရားနန်းတော်) ကို အရင်နာမည်အတိုင်း ခေါ်ဝေါ်နေကြဆဲ။

"ဝင်ပါချင်ရင်တောင် နည်းလမ်းရှိပါ့မလား။ ကြားတာတော့ တစ္ဆေနယ်မြေ ချဲ့ထွင်မှုကို တကယ် တားဆီးချင်ရင် အခြေခံ ၂၀ အထက်ရှိတဲ့ အစီအရင်လိုတယ်တဲ့"

"တာအိုသခင်လီချန်က အစီအရင်ဘက်မှာ တော်တော် စွမ်းတယ်လို့ ကြားဖူးတယ်။ သူ နည်းလမ်း ရှိနိုင်မလား"

"တာအိုသခင်လီချန်က စွမ်းတာတော့ မှန်ပါတယ်။ ဒါပေမဲ့ အခြေခံ ၂၀ အစီအရင်ဆရာ ဟုတ်ချင်မှ ဟုတ်မှာပါ"

လူအများ ဆွေးနွေးနေကြသည်။

ယွီဟွာနတ်ဘုရားဂိုဏ်းအတွင်းမှာတော့ လီချန်က ဒဏ္ဍာရီတစ်ခု ဖြစ်နေပါပြီ။

တစ်ကိုယ်တော် စွမ်းရည်နဲ့ ဝူရွှမ်းတာအိုနန်းတော်ဆိုတဲ့ သာမန်နန်းတော်လေးတစ်ခုကို ဂိုဏ်းတစ်ခုလုံးကို လွှမ်းမိုးနိုင်တဲ့ အင်အားကြီးနန်းတော် ဖြစ်လာအောင် လုပ်ဆောင်ခဲ့သူလေ။ တခြား နန်းတော်တွေ အကုန်လုံး သူ့အောက်မှာ ပြားပြားဝပ်သွားပြီး၊ နောက်ဆုံးတော့ ဝူရွှမ်းတာအိုနန်းတော်ရဲ့ အုပ်ချုပ်မှုအောက် ရောက်သွားကြရတာ။

ထိုအချိန်တွင် တစ္ဆေနယ်မြေဘက်ခြမ်းမှ ပြင်းထန်သော ဝိညာဉ်စွမ်းအင် လှိုင်းများ ထွက်ပေါ်လာသည်။

"ဟိုမှာ ဘာဖြစ်တာလဲ" လူတိုင်း လှမ်းကြည့်လိုက်ကြရာ မယုံနိုင်စရာ မြင်ကွင်းကို တွေ့လိုက်ကြရသည်။

မီးခိုးရောင် အငွေ့များ လွှမ်းခြုံနေသော ဧရိယာအပေါ်တွင် ကောင်းကင်ယံမှ ကြီးမားသော ဓားကြီးများ ရုတ်တရက် ကျဆင်းလာပြီး မြေကြီးထဲ စိုက်ဝင်သွားကာ ဧရာမ ဓားကျောက်တိုင်ကြီးများသဖွယ် ဖြစ်ပေါ်လာသည်။

ထိုဓားကျောက်တိုင် တစ်တိုင်ချင်းစီ ပေါင်းစပ်သွားပြီး ဟင်းလင်းပြင်တွင် ကြီးမားသော ဝိုးတဝါး ခေါင်းလောင်းရိပ်ကြီး တစ်ခု ဖြစ်ပေါ်လာကာ တစ္ဆေနယ်မြေတစ်ခုလုံးကို လွှမ်းခြုံသွားသည်။

သူတို့ ကောင်းကင်ပေါ်သို့ ပျံတက်ပြီး အဝေးမှ လှမ်းကြည့်လိုက်ကြသည်။

ဝိုးတဝါး ခေါင်းလောင်းရိပ်ကြီးမှတဆင့် ကြီးမားသော ဓားကျောက်တိုင်ကြီးများမှ ပြင်းထန်သော ဓားအလင်းရောင်များ ထုတ်လွှတ်နေပြီး မီးခိုးရောင် မြူများကို ခွင်းထုတ်နေသည်ကို မြင်တွေ့ရသည်။ မရေမတွက်နိုင်သော ထူးဆန်းသည့် သတ္တဝါများ (တစ္ဆေများ) ထိတ်လန့်တကြား ပြေးလွှားနေကြသော်လည်း ဓားကျောက်တိုင်များမှ ထွက်ပေါ်လာသော ကြောက်မက်ဖွယ်စွမ်းအင်များကြောင့် အမှုန့်ချေခံလိုက်ရပြီး ပျောက်ကွယ်သွားကြသည်။

"နတ်... နတ်ဘုရားနန်းတော်က အစွမ်းထက် ပုဂ္ဂိုလ်ကြီး ဆင်းသက်လာပြီး ဒီတစ္ဆေနယ်မြေကို ရှင်းလင်းနေတာလား" ရှိနေသူများ အားလုံး တုန်လှုပ်သွားကြသည်။

တစ္ဆေနယ်မြေနားကို သူတို့ မကပ်ရဲကြပေ။ ဓားကျောက်တိုင်များမှ ဖြစ်ပေါ်လာသော ခေါင်းလောင်းရိပ်ကြီး၏ အရှိန်အဝါက ကြောက်စရာ ကောင်းလွန်းသည်။

တစ္ဆေနယ်မြေအထက် ကောင်းကင်ယံတွင် လူတစ်ယောက် လက်နောက်ပစ်ကာ ရပ်နေသည်။

တစ္ဆေနယ်မြေ ကို ရှင်းလင်းရန် ရောက်လာသော လီချန်ပင် ဖြစ်သည်။

သူသည် တစ္ဆေနယ်မြေကို သေချာလေ့လာကြည့်ပြီးနောက်၊ ဒါက နယ်မြေဖြတ်ကျော် လမ်းကြောင်းတစ်ခုနဲ့ တူနေကြောင်း တွေ့ရှိလိုက်သည်။ တစ္ဆေနယ်မြေအတွင်းမှ ဟင်းလင်းပြင်က အလွန်မတည်မငြိမ်ဖြစ်နေပြီး၊ ပုံသဏ္ဍာန်မဲ့သော ငရဲဘုံအငွေ့အသက်များ စိမ့်ထွက်နေသည်။

ငရဲဘုံသား တစ္ဆေမျိုးနွယ်တွေသာ ၁၀ ခုမြောက်ဘုံကို ဆင်းသက်ချင်ရင် ဒီတစ္ဆေနယ်မြေကနေတဆင့် အလွယ်တကူဝင်လာလို့ရတယ်။

ပြီးတော့... သူ ပိုပြီး အံ့သြစရာကောင်းတဲ့ အရာတစ်ခုကို တွေ့လိုက်ရတယ်။

အဲဒါကတော့ ဒီတစ္ဆေနယ်မြေ အငွေ့အသက်တွေထဲမှာ ထူးခြားတဲ့ နိယာမ မူလအနှစ်သာရတွေ ပါဝင်နေတာပဲ။

သူ့အထင်တော့ ဒါက ငရဲဘုံကနေ လာတဲ့ ငရဲဘုံ မူလအနှစ်သာရစွမ်းအားတွေ ဖြစ်ပြီး၊ ဒီကမ္ဘာကို တိုက်စားနေတာဖြစ်မယ်။

သူ နည်းနည်း စုပ်ယူကြည့်လိုက်တော့... အရသာက တော်တော်မိုက်တယ်။

ကံကောင်းလို့ အချိန်ခေါင်းလောင်းက ချက်ချင်း သန့်စင်ပေးလိုက်တာ။ မဟုတ်ရင် ဒီငရဲဘုံ အငွေ့အသက်တွေက သူ့ရဲ့ ဝိညာဉ်ကို ကြီးမားတဲ့ ထိခိုက်မှု ဖြစ်စေလိမ့်မယ်။

ဒါကြောင့် သူက ပထမဦးဆုံးအနေနဲ့ အခြေခံ ၂၂ အချိန်ခေါင်းလောင်း ဓားအစီအရင်ကို ခင်းကျင်းပြီး တစ္ဆေနယ်မြေ တစ်ခုလုံးကို ပိတ်ဆို့လိုက်ခြင်းဖြစ်သည်။

ဒီလိုလုပ်လိုက်တော့ တစ္ဆေနယ်မြေ ဆက်လက်မချဲ့ထွင်နိုင်တော့ဘူး။

ဒီတစ္ဆေနယ်မြေကို ဘယ်လို အပြီးတိုင်ဖျက်ဆီးမလဲဆိုတာကိုတော့ သူ သေချာ လေ့လာရဦးမယ်။ ဒီပြဿနာကို အမြစ်ပြတ် ရှင်းပစ်မှရမယ်။

ငရဲဘုံ မူလအနှစ်သာရကို စုပ်ယူတာက အကျိုးရှိတယ်ဆိုပေမဲ့... သူ မစွန့်စားရဲဘူး။

တကယ်လို့များ အစွမ်းထက်တဲ့ ငရဲဘုံသားတွေက သူ့ကို တွေ့သွားရင် ဒုက္ခရောက်ကုန်လိမ့်မယ်။

ဒီငရဲဘုံ မူလအနှစ်သာရ နည်းနည်းလေးရဖို့အတွက်နဲ့ အဲဒီလို အန္တရာယ်မျိုး အဖြစ်မခံနိုင်ဘူး။

အခြေခံ ၂၂ အချိန်ခေါင်းလောင်း ဓားအစီအရင်ကို ခင်းကျင်းပြီးနောက်၊ လီချန်သည် တစ္ဆေနယ်မြေအတွင်းရှိ ငရဲဘုံ မူလအနှစ်သာရများကို အစွမ်းကုန် စုပ်ယူလိုက်သည်။ သူ စုပ်ယူလိုက်သည်နှင့် တစ္ဆေနယ်မြေတစ်ခုလုံး၏ အားအင်များ ယုတ်လျော့သွားသည်ကို တွေ့လိုက်ရသည်။

"ကောင်းတယ်... တော်တော် ထိရောက်တာပဲ" လီချန် ဝမ်းသာသွားသည်။

ဒီငရဲဘုံ မူလအနှစ်သာရ တွေက တစ္ဆေနယ်မြေ ဖြစ်ပေါ်လာအောင် ထောက်ပံ့ပေးထားတာပဲ။ မူလအနှစ်သာရ တွေကို သူ အကုန် စုပ်ယူလိုက်ရင် ဒီတစ္ဆေနယ်မြေ က သူ့အလိုလို ပြိုကွဲသွားမှာ သေချာတယ်။

***