မဟာယာနနယ်ပယ်သို့ ချိုးဖျက်ဝင်ရောက်ခြင်း

အချိန်တွေ တစ်ရက်ပြီးတစ်ရက် ကုန်ဆုံးသွားသည်။

တစ္ဆေနယ်မြေသည် ကြီးမားသော ဓားကျောက်တိုင်များမှ ဖြစ်ပေါ်လာသည့် ဝိုးတဝါး ခေါင်းလောင်းရိပ်ကြီး၏ လွှမ်းခြုံမှုအောက်တွင် နေ့စဉ်နှင့်အမျှ ကျုံ့ဝင်လာသည်။

တစ္ဆေနယ်မြေကို စောင့်ကြပ်နေသော ယွီဟွာနတ်ဘုရားဂိုဏ်းမှ တပည့်များသည် ဤမြင်ကွင်းကို မြင်သောအခါ အလွန် ဝမ်းသာသွားကြသည်။

သတင်းရရှိသော ဂိုဏ်းအကြီးအကဲများလည်း ချက်ချင်း လာရောက်ကြည့်ရှုကြပြီး၊ နောက်ပိုင်းတွင် ယွီဟွာနတ်ဘုရားနန်းတော်နှင့် ဆက်သွယ်မေးမြန်းကြည့်မှ လီချန်ကိုယ်တိုင် လာရောက်ရှင်းလင်းပေးနေခြင်းဖြစ်ကြောင်း သိလိုက်ရသည်။

ဒီလိုနဲ့ နှစ်ဝက်လောက် ကြာပြီးနောက် တစ္ဆေနယ်မြေ လုံးဝပျောက်ကွယ်သွားသည်။

လီချန်သည် နောက်ဆုံးကျန်ရှိနေသော ငရဲဘုံ မူလအနှစ်သာရအငွေ့အသက်ကို စုပ်ယူလိုက်ပြီးနောက် သက်ပြင်းချလိုက်သည်။ ဒီနှစ်ဝက်လုံးလုံး သူသည် တစ္ဆေနယ်မြေထဲမှာပဲ အချိန်ကုန်ဆုံးခဲ့ရသည်။

လင့်တုန်းလောကသစ်ပင်၏ တိုးတက်မှုနှုန်းကို ကြည့်လိုက်ရာ ၈၉ /၁၀၀) သို့ ရောက်ရှိနေပြီ။

ဆိုလိုတာက တစ္ဆေနယ်မြေထဲက ငရဲဘုံ မူလအနှစ်သာရတွေကို စုပ်ယူလိုက်တာကြောင့် တိုတောင်းလှတဲ့ နှစ်ဝက်ကာလအတွင်းမှာတင် တိုးတက်မှုနှုန်း ၅ မှတ်လောက် တက်လာခဲ့တာ။

ဒါက အလွန်မြန်ဆန်တယ်လို့ ပြောရမယ်။

"တကယ်လို့ ငါသာ တခြားတစ္ဆေနယ်မြေတွေက ငရဲဘုံ မူလအနှစ်သာရတွေကိုပါ ဆက်ပြီးစုပ်ယူနိုင်မယ်ဆိုရင်၊ သိပ်မကြာခင်မှာ လင့်တုန်းလောကသစ်ပင် အဆင့် ၅ ရောက်သွားလောက်တယ်" လီချန် စိတ်ထဲတွင် တွေးလိုက်သည်။

ပုံမှန်အတိုင်း ကျင့်ကြံမယ်ဆိုရင် နှစ် ၁၀၀ ကျော်လောက် ကြာဦးမှာ။

ဒီတစ္ဆေနယ်မြေက သူ့အတွက် အကျိုးကျေးဇူး အများကြီး ပေးတယ်လို့ ပြောရမယ်။

သူ သိသလောက် ၁၀ ခုမြောက်ဘုံမှာ တစ္ဆေနယ်မြေ တစ်ခုတည်းရှိတာ မဟုတ်ဘူး။ အများကြီး ရှိတယ်။ အထူးသဖြင့် ထိုက်ရွှမ်းနတ်ဘုရားဂိုဏ်းပိုင်နက်ထဲက တစ္ဆေနယ်မြေဆိုရင် အစောဆုံး ပေါ်ပေါက်ခဲ့တာဖြစ်ပြီး ဧရိယာလည်း အကျယ်ဆုံးပဲ။

အဲဒီတစ္ဆေနယ်မြေထဲက ငရဲဘုံ မူလအနှစ်သာရတွေကိုပါ စုပ်ယူနိုင်ရင် လင့်တုန်းလောကသစ်ပင် အများကြီး တိုးတက်လာမှာ သေချာတယ်။

ဒါပေမဲ့... အဲဒီတစ္ဆေနယ်မြေထဲမှာ အစွမ်းထက်တဲ့ ငရဲဘုံသားတွေ ပေါ်ထွက်ဖူးတယ်လို့ ကြားသိရတယ်။ တိုက်ရိုက် သွားစုပ်ယူမယ်ဆိုရင် အန္တရာယ်များလွန်းတယ်။

ပုံမှန်မဟုတ်တဲ့ လှုပ်ရှားမှုမရှိသေးတဲ့ တစ္ဆေနယ်မြေတွေကို အရင်ရှင်းလင်းတာ ပိုကောင်းမယ်။

....

နှစ်နှစ်ကျော် ကြာပြီးနောက်။

၁၀ ခုမြောက်ဘုံ။

ယောင်ချီနတ်ဘုရားဂိုဏ်း ပိုင်နက်အတွင်းရှိ တစ္ဆေနယ်မြေတစ်ခု။

ကြီးမားသော ဓားကျောက်တိုင်ကြီးများ မတ်မတ်ရပ်တည်နေပြီး ဧရာမ ဝိုးတဝါး ခေါင်းလောင်းရိပ်ကြီးတစ်ခုဖန်တီးကာ တစ္ဆေနယ်မြေတစ်ခုလုံးကို လွှမ်းခြုံထားသည်။

သို့သော် ယခုအခါ တစ္ဆေနယ်မြေသည် အတော်လေးကျုံ့ဝင်သွားပြီဖြစ်ပြီး ပျောက်ကွယ်လုနီးပါး ဖြစ်နေပြီ။

ယောင်ချီနတ်ဘုရားဂိုဏ်းမှ လူများသည်လည်း အနီးအနားတွင် စောင့်ကြည့်နေကြသည်။

လွန်ခဲ့သော ၂ နှစ်ခန့်က ကောင်းကင်မှ ဓားကျောက်တိုင်ကြီးများ ရုတ်တရက် ကျဆင်းလာပြီး ခေါင်းလောင်းရိပ်ကြီး ဖန်တီးကာ တစ္ဆေနယ်မြေကို စတင်ဖိနှိပ်ခဲ့သည်။

ယောင်ချီနတ်ဘုရားဂိုဏ်းသားများ အလွန်ဝမ်းသာသွားကြသည်။ အကြောင်းမှာ ယွီဟွာနတ်ဘုရားဂိုဏ်း ဘက်က တစ္ဆေနယ်မြေလည်း ဒီလိုနည်းနဲ့ ပျောက်ကွယ်သွားခဲ့တာကိုး။

တစ္ဆေနယ်မြေပြဿနာက ယောင်ချီနတ်ဘုရားဂိုဏ်းကို အချိန်ကြာမြင့်စွာ ဒုက္ခပေးနေခဲ့တာ။

တစ္ဆေနယ်မြေက အမြဲတမ်း ချဲ့ထွင်နေပြီး အတွင်းထဲက သတ္တဝါဆန်းတွေက ပြင်ပလောကကို ခြိမ်းခြောက်နေခဲ့တာ။

ယခုအချိန်တွင် တစ္ဆေနယ်မြေအတွင်း၌ လီချန်သည် လေထဲတွင် ရပ်တန့်နေသည်။ ငရဲဘုံ မူလအနှစ်သာရ အမျှင်တန်းလေးများ သူ့ခန္ဓာကိုယ်ထဲသို့ ဝင်ရောက်လာပြီး၊ အချိန်ခေါင်းလောင်းက သန့်စင်ပေးလိုက်သည်နှင့် လင့်တုန်းလောကသစ်ပင်က စုပ်ယူလိုက်သည်။

ရုတ်တရက်... လီချန်၏ ခန္ဓာကိုယ်အတွင်းရှိ လင့်တုန်းလောကသစ်ပင်သည် ရုတ်တရက် တုန်ခါသွားပြီး လျင်မြန်စွာ ကြီးထွားလာသည်။

"နောက်ဆုံးတော့ အဆင့် ၅ ရောက်သွားပြီ" လီချန် မျက်နှာပေါ်တွင် အပြုံးတစ်ခု ပေါ်လာသည်။

အဆင့် ၅ နိယာမဆိုတာ စကြဝဠာ ကမ္ဘာပေါင်းများစွာမှာ ရှန်းကျွင်းအဆင့် အထူးရွှေနတ်ဘုရားတွေနဲ့ ညီမျှနေပြီ။

ဒီတစ္ဆေနယ်မြေက တကယ့်ကို မမျှော်လင့်ထားတဲ့ လက်ဆောင်မွန်ပါပဲ။

နိယာမအဆင့် ၅ ရောက်သွားပြီဆိုတော့ ကျင့်ကြံမှုအဆင့်ကိုလည်း ချိုးဖျက်ဝင်ရောက်နိုင်တော့မယ်။

သူ၏ တာအိုပေါင်းစည်းခြင်းအဆင့် နှောင်းပိုင်း (အထွတ်အထိပ်) ကျင့်ကြံမှုသည် လှုပ်ရှားနေပြီ ဖြစ်ပြီး အချိန်မရွေး အဆင့်တက်သွားနိုင်ကြောင်း ခံစားလိုက်ရသည်။

သို့သော် ဒီတစ္ဆေနယ်မြေက လုံးဝ ပျောက်ကွယ်မသွားသေးဘူး။ ဆက်လက်စုပ်ယူရဦးမယ်။

.....

နောက်ထပ် နှစ်လလောက်ကြာမှ တစ္ဆေနယ်မြေ လုံးဝ ပျောက်ကွယ်သွားသည်။ လီချန်သည် အခြေခံ ၂၂ အချိန်ခေါင်းလောင်း ဓားအစီအရင်ကို ပြန်လည်သိမ်းဆည်းလိုက်ပြီး အချိန်ခေါင်းလောင်း လှိုဏ်ဂူကောင်းကင်ဘုံထဲသို့ တိုက်ရိုက်ပြန်ဝင်သွားလိုက်သည်။

တစ္ဆေနယ်မြေ နှင့် ဓားကျောက်တိုင်ကြီးများ ပျောက်ကွယ်သွားသည်နှင့် ယောင်ချီနတ်ဘုရားဂိုဏ်းမှ လူများသည် မူလ တစ္ဆေနယ်မြေတည်ရှိခဲ့ရာနေရာသို့ ချက်ချင်း ဝင်ရောက်စစ်ဆေးကြသည်။

ထိုနေရာတွင် မြက်တစ်ပင်မျှ မပေါက်တော့ဘဲ သေမင်းတမန် မြေရိုင်းပြင်ကြီးဖြစ်နေကာ တစ္ဆေအငွေ့အသက်များ ကျန်ရှိနေသေးသော်လည်း... သက်ရှိများကို တိုက်စားသည့် ကြောက်မက်ဖွယ် ငရဲဘုံ အငွေ့အသက်များတော့ မရှိတော့ပေ။

"အင်မော်တယ်နန်းတော်က ဘယ်စီနီယာကြီး လာပြီးကူညီပေးသွားတာပါလိမ့်" ယောင်ချီနတ်ဘုရားဂိုဏ်းမှ တာအိုသခင်တစ်ဦးက သက်ပြင်းချရင်း ပြောလိုက်သည်။

"ကြားတာတော့... အင်မော်တယ်နန်းတော်က လူ မဟုတ်ဘဲ၊ ယွီဟွာနတ်ဘုရားဂိုဏ်းက ဟိုတစ်ယောက် လုပ်တာတဲ့..."

"ဟို... ရှေးဟောင်းကျင့်ကြံသူလို့ သတင်းထွက်နေတဲ့ တာအိုသခင်လီချန်ကို ပြောတာလား"

"ဟုတ်တယ်။ အဲဒီတာအိုသခင်လီချန်က ရှေးဟောင်းကျင့်ကြံသူဖြစ်ပြီး တာအိုပေါင်းစည်းခြင်းအဆင့် ရောက်နေပြီလို့ ပြောကြတယ်"

"အင်မော်တယ်နန်းတော်က ယွီဟွာနတ်ဘုရားဂိုဏ်းကနေ တပ်ဆုတ်သွားပြီဆိုတော့၊ အဲဒီလူ ပြန်ရောက်လာတာဖြစ်မယ်"

"တကယ်လို့ အဲဒီလူလက်ချက်သာဆိုရင်တော့ ငါတို့ ယောင်ချီနတ်ဘုရားဂိုဏ်းက သူ့ကို တကယ်ကျေးဇူးတင်ရမှာပဲ"

၁၀ ခုမြောက်ဘုံရှိ နတ်ဘုရားဂိုဏ်းကြီးများ၏ ယွီဟွာနတ်ဘုရားဂိုဏ်းအပေါ် သဘောထားမှာ အလွန်ရှုပ်ထွေးသည်။

ယခင်က ယွီဟွာနတ်ဘုရားဂိုဏ်း (ဝူရွှမ်းတာအိုနန်းတော်) အင်အားကြီးစဉ်က အားလုံး အဖိနှိပ်ခံခဲ့ရသည်။

နောက်ပိုင်း အင်မော်တယ်နန်းတော်က ဝင်ရောက်စွက်ဖက်ပြီး ယွီဟွာနတ်ဘုရားဂိုဏ်း ကျဆင်းသွားသောအခါမှသာ သူတို့ အသက်ရှူချောင်ခဲ့ရသည်။

ယခု ဟွေ့ယွမ်ကပ်ဘေး ရောက်လာပြီး ဖရိုဖရဲဖြစ်နေချိန်၊ အင်မော်တယ်နန်းတော်က ကိုယ့်ပြဿနာနဲ့ကိုယ် ရှုပ်နေပြီး အောက်ခြေကမ္ဘာတွေကို ဂရုမစိုက်နိုင်တော့ချိန်တွင်...

ယွီဟွာနတ်ဘုရားဂိုဏ်းမှ တာအိုပေါင်းစည်းခြင်းအဆင့်ကျင့်ကြံသူ ပေါ်ထွက်လာပြီး တစ္ဆေနယ်မြေကို ရှင်းလင်းပေးလိုက်ခြင်းသည် ယောင်ချီနတ်ဘုရားဂိုဏ်းအတွက် ကောင်းကင်ဘုံကပေးသော လက်ဆောင်ဖြစ်နေသည်။

.........

တပြိုင်နက်တည်းမှာပင် အခြားဂိုဏ်းများဖြစ်သော ထိုက်ရွှမ်း၊ ဝမ်ဟွာ၊ ထောင်ယန် အစရှိသော နတ်ဘုရားဂိုဏ်းများသည် ယွီဟွာနတ်ဘုရားဂိုဏ်း နှင့် ယောင်ချီနတ်ဘုရားဂိုဏ်းတို့ရှိ တစ္ဆေနယ်မြေများ ပျောက်ကွယ်သွားသည်ကို သိရှိလိုက်ကြသည်။ သူတို့လည်း မျှော်လင့်ချက် ဝင်လာကြသည်။ ဟိုပုဂ္ဂိုလ်ကြီး လာပြီး သူတို့ဆီက တစ္ဆေနယ်မြေတွေကိုပါ ရှင်းလင်းပေးမလားလို့ပေါ့။

အထူးသဖြင့် ထိုက်ရွှမ်းနတ်ဘုရားဂိုဏ်းဆိုလျှင် တစ္ဆေနယ်မြေဒုက္ခကို အဆိုးရွားဆုံး ခံစားနေရတာ။

အရင်တုန်းက တစ္ဆေမီးတိုက်ခိုက်မှုကြောင့် အထိနာခဲ့သလို၊ တစ္ဆေနယ်မြေ ချဲ့ထွင်နှုန်း မြန်ဆန်လွန်းလို့ မြို့တော်ရဲ့တစ်စိတ်တစ်ပိုင်းတောင် ပါသွားပြီ။ မကြာခဏဆိုသလို သတ္တဝါဆန်းတွေ ထွက်လာပြီး တိုက်ခိုက်လို့ ကျင့်ကြံသူတွေ အများကြီး သေဆုံးခဲ့ရတယ်။

ဒါကြောင့် ထိုက်ရွှမ်း၊ ဝမ်ဟွာ၊ ထောင်ယန် ဂိုဏ်းကြီးတွေက ယွီဟွာနတ်ဘုရားဂိုဏ်းဆီ သံတမန်တွေ လျှို့ဝှက်စေလွှတ်ပြီး အကူအညီတောင်းခံကြသည်။

သို့သော် ယွီဟွာနတ်ဘုရားဂိုဏ်း၏ အဖြေကတော့ ရေလုံပြာလုံပါပဲ။ အားလုံးက အင်မော်တယ်နန်းတော်ရဲ့လက်ချက်ပါ၊ သူတို့နဲ့ မဆိုင်ပါဘူးဆိုပြီး ငြင်းလိုက်ကြသည်။

အင်မော်တယ်နန်းတော်ကလူတွေ ပြန်သွားကြပြီဆိုပေမဲ့၊ ယွီဟွာနတ်ဘုရားနန်းတော် (လီချန်တို့အဖွဲ့) ပြန်ရောက်နေပြီဆိုတာကို ထုတ်ပြောလို့ မဖြစ်ဘူးလေ။

ဘယ်လိုပဲဖြစ်ဖြစ် ဝန်ခံလို့ မရဘူး။

......

အချိန်ခေါင်းလောင်း လှိုဏ်ဂူကောင်းကင်ဘုံ။

လီချန် တင်ပျဉ်ခွေထိုင်နေသည်။ သူ့နောက်ကျောရှိ အချိန်ခေါင်းလောင်းမှ အလင်းရောင်ဖျော့ဖျော့များထွက်ပေါ်နေပြီး သူ့ကို ဘုရားသခင်သဖွယ် ထင်မှတ်ရစေသည်။

လင့်တုန်းလောကသစ်ပင် အဆင့် ၅ ရောက်သွားပြီ။ အခု အတိဒုက္ခကျော်ဖြတ်ခြင်းကို တက်လှမ်းလို့ ရပြီ။

အရာအားလုံး အဆင်သင့် ဖြစ်နေပြီ။

နတ်ဘုရားချီလည်း လုံလောက်တယ်။

ကျယ်ပြန့်လှတဲ့ ကောင်းကင်တာအိုနယ်ပယ် နဲ့ အချိန်ခေါင်းလောင်းရဲ့ သန့်စင်မှုနှုန်းထားကြောင့် နတ်ဘုရားချီတွေက သုံးမကုန်အောင် ရှိနေပြီ။

လီချန် အသက်ပြင်းပြင်း ရှူလိုက်ပြီး အချိန်အတော်ကြာ တည်ငြိမ်အောင် လုပ်ယူလိုက်သည်။ ထို့နောက် ရွှမ်မင်မူလရင်းမြစ်ကျမ်းကို စတင်လည်ပတ်လိုက်ရာ၊ ကြီးမားသော လင့်တုန်းလောကသစ်ပင်ကြီးသည် ကောင်းကင်ကို ဖုံးလွှမ်းသွားသည်အထိ မြင့်တက်လာသည်။

တပြိုင်နက်တည်းမှာပင် အချိန်ခေါင်းလောင်းဆီမှ နတ်ဘုရားချီများသည် ဒီရေအလား လိမ့်ဆင်းလာသည်။

လီချန်၏ခန္ဓာကိုယ်သည် တွင်းနက်ကြီးတစ်ခုသဖွယ် နတ်ဘုရားချီများကို ရူးသွပ်စွာ စုပ်ယူနေသည်။

အချိန်မည်မျှ ကြာသွားသည်မသိ။ ကောင်းကင်တာအိုနယ်ပယ် တစ်ခုလုံး၏ နတ်ဘုရားချီ သိပ်သည်းဆသည် အလွန်နိမ့်ကျသွားသည့်အချိန်ကျမှ လီချန် စုပ်ယူမှုကို ရပ်တန့်လိုက်သည်။

တာအိုပေါင်းစည်းခြင်းအဆင့် မှ အတိဒုက္ခကျော်ဖြတ်ခြင်းသို့ ကူးပြောင်းရာတွင် လိုအပ်သော နတ်ဘုရားချီပမာဏက အံ့မခန်းများပြားလှသည်။

နောက်ဆုံးတွင် လီချန်၏ခန္ဓာကိုယ်သည် ဝါးတားတား ဖြစ်သွားပြီး၊ ကြီးမားသော နှင်းဖြူရောင် လင့်တုန်းလောကသစ်ပင်ကြီးတစ်ပင်သာ မတ်မတ်ရပ်တည်နေကာ အဆုံးမဲ့အလင်းရောင်များ ထုတ်လွှတ်နေသည်။

ဤဖြစ်စဉ်သည် လပေါင်းများစွာ ကြာမြင့်ခဲ့သည်။

နောက်ဆုံးတွင် လီချန်၏ ခန္ဓာကိုယ် ပြန်လည်စုစည်းလာသည်။ လင့်တုန်းလောကသစ်ပင်သည်လည်း အလင်းစက်များအဖြစ် ပြောင်းလဲပြီး သူ့ခန္ဓာကိုယ်ထဲသို့ ဝင်ရောက်သွားသည်။

ယခု လီချန်သည် လုံးဝ ပြောင်းလဲသွားပြီ။

သူ၏အတွင်းကမ္ဘာထဲတွင် တောင်များ၊ မြစ်များ ပေါ်ပေါက်လာသည်။ တာအိုစွမ်းအားများက ကမ္ဘာ့လေထုအဖြစ် ပြောင်းလဲသွားပြီး၊ လင့်တုန်းလောကနိယာမများက ကမ္ဘာ့နိယာမများ အဖြစ် ပြောင်းလဲသွားသည်။

သက်ရှိမရှိသေးတာကလွဲရင် တကယ့် ကမ္ဘာစစ်စစ်ကြီးတစ်ခုလို ဖြစ်လာပြီ။

ဤအတွင်းကမ္ဘာပြောင်းလဲမှုသည် ကြီးမားလှသော နတ်ဘုရားချီ ပမာဏကို အသုံးပြုပြီး တည်ဆောက်ခဲ့ရခြင်းဖြစ်သည်။

"အတွင်းကမ္ဘာမှာ သက်ရှိ မရှိသေးတာက... ကပ်ဘေး မကျော်ဖြတ်ရသေးလို့ပဲ" လီချန် ရေရွတ်လိုက်သည်။

မိုးကြိုးအတိဒုက္ခကို ကျော်ဖြတ်ပြီး၊ မိုးကြိုးစွမ်းအားကို အတွင်းကမ္ဘာထဲ ဆွဲခေါ်နိုင်မှသာ သက်ရှိဇီဝဖြစ်စဉ်တွေ စတင်နိုင်မှာဖြစ်သည်။

"နေဦး... ငါ့မှာ မိုးကြိုးနိယာမရှိနေတယ်လေ။ အတွင်းကမ္ဘာထဲမှာ မိုးကြိုးကို တိုက်ရိုက်ဖန်တီးပြီး သက်ရှိဖြစ်စဉ် စတင်လို့မရဘူးလား" ရုတ်တရက် လီချန် စိတ်ကူးတစ်ခုရသွားသည်။

သူ မိုးကြိုးနိယာမကို လှုံ့ဆော်လိုက်သည်နှင့် အတွင်းကမ္ဘာထဲတွင် မိုးကြိုးများ တလိမ့်လိမ့် ထွက်ပေါ်လာသည်။ လောင်စာမီးပွားတစ်ခုက တောမီးကြီးဖြစ်စေသကဲ့သို့၊ အတွင်းကမ္ဘာ တစ်ခုလုံး ချက်ချင်း ပြောင်းလဲသွားသည်။

ထူးခြားသော သက်ရှိစွမ်းအင်တစ်ခု အတွင်းကမ္ဘာထဲတွင် စတင်မွေးဖွားလာသည်။

လီချန် တစ်ကိုယ်လုံး တုန်ခါသွားပြီး မျက်နှာပေါ်တွင် မယုံနိုင်မှုများ ပေါ်လာသည်။ ထို့နောက် စနစ်မျက်နှာပြင်ကို အလျင်အမြန် ခေါ်ယူလိုက်သည်။

အိမ်ရှင်: လီချန်။

နတ်ဝိညာဉ် (ကောင်းကင်တာအို)။

မဟာယာနနယ်ပယ် (ကနဦးပိုင်း ၁/၁၀၀)။

အချိန်ခေါင်းလောင်း (နတ်ဘုရားကိရိယာ ၃၇၈၆၂၁/၁၀၀၀၀၀၀၀)

ကောင်းကင်ဘုံဓား သတ္တမအထိ: (ကျွမ်းကျင်)။

ကောင်းကင်ဘုံအဌမဓား (အဆင့်ငယ်အောင်မြင်မှု ၇/၁၀၀)။

မျက်လုံးခြောက်လုံးပိုင်ဆိုင်သော ဟွန်တွန်လျှို့ဝှက်နတ်ဘုရား သက်ဆင်းခြင်းပညာ (ကြီးမားသော သက်ဆင်းခြင်း ၉၉/၁၀၀)။

လင့်တုန်းလောကသစ်ပင် (အဆင့် ၅ ၂/၁၀၀)။

ချန်ယွမ်အစီအရင်ကျမ်း (နှစ်ဆယ့်နှစ်အခြေခံ ၉၀/၁၀၀)။

ဝိညာဉ်ဆေးပင်စိုက်ပျိုးသူ(အဆင့်ဆယ့်တစ် ၃၉/၁၀၀)။

လက်နက်သန့်စင်သူ (အဆင့်တစ်ဆယ် ၉၉/၁၀၀)။

အဂ္ဂိရတ်ဆရာ (အဆင့်ဆယ့်တစ် ၉၉/၁၀၀)။

သားရဲထိန်းကျောင်းသူ (အဆင့် ၅ ၇၁/၁၀၀)။

"မဟာယာနနယ်ပယ်... ငါက အတိဒုက္ခကျော်ဖြတ်ခြင်းနယ်ပယ်ကို တိုက်ရိုက်ကျော်သွားတာလား" လီချန် အံ့အားသင့် ဝမ်းသာသွားသည်။

သူ့ ထင်မြင်ချက် မှန်ကန်ခဲ့ရင်၊ သူက အတိဒုက္ခကျော်ဖြတ်ခြင်းကို တကယ်ဖြတ်သန်းစရာမလိုတော့ဘူး။

တစ်နည်းအားဖြင့်ပြောရရင် အတိဒုက္ခကျော်ဖြတ်ခြင်းဆိုတာက ကြားခံ အဆင့်တစ်ခုသက်သက်ပဲ။

သူ ဘာလို့ ဒီအဆင့်ကို ကျော်သွားနိုင်တာလဲဆိုတော့... သူ့မှာ မိုးကြိုးနိယာမရှိနေလို့ အတွင်းကမ္ဘာထဲမှာ မိုးကြိုးဖန်တီးပြီး သက်ရှိဖြစ်စဉ် စတင်နိုင်ခဲ့တာကြောင့်လည်းပါသလို...

ပိုအရေးကြီးတာက သူ့မှာ ကောင်းကင်တာအိုဂုဏ်သတ္တိ ရှိနေလို့ပဲ။

ငါသည် ကောင်းကင်တာအို ဖြစ်သည်။

ဒါကြောင့် အတိဒုက္ခ ခံယူစရာမလိုဘူး။

အတိဒုက္ခဆိုတာ ကောင်းကင်တာအိုက သက်ရှိတွေကို စမ်းသပ်ဖို့ ဖန်တီးထားတဲ့ စည်းမျဉ်းတစ်ခုပဲ။

နတ်ဘုရားကမ္ဘာ ပျက်စီးပြီးနောက်ပိုင်း ရှေးဟောင်းကျင့်ကြံသူတွေ ကပ်ဘေးမအောင်မြင်ကြတာက၊ ဒီမူလတည်ငြိမ်နေတဲ့ စည်းမျဉ်းကို ဟွန်တွန်ပြင်ပနတ်ဘုရားတွေက ဖျက်ဆီးလိုက်လို့ ဖြစ်တယ်။

ဒါပေမဲ့ လီချန်က မတူဘူး။

သူက ကောင်းကင်တာအိုဂုဏ်သတ္တိရှိနေတယ်။ ဒါကြောင့် အတိဒုက္ခခံယူခြင်းဆိုတဲ့ စမ်းသပ်မှုကို ကျော်သွားတာက ယုတ္တိရှိတယ်။

ပြီးတော့... သူက အချိန်ခေါင်းလောင်း လှိုဏ်ဂူကောင်းကင်ဘုံ၊ ကောင်းကင်တာအိုနယ်ပယ်ထဲမှာ ရှိနေတာ။ ဒီနေရာမှာ သူက စစ်မှန်တဲ့ အရှင်သခင်ပဲ။

"ဒါကိုကြည့်ရင်... အတိဒုက္ခကျော်ဖြတ်ခြင်းမှာ ကျင့်ကြံမှုတိုးတက်ဖို့မရှိဘဲ ရပ်တန့်နေတတ်တာက ပုံမှန်ပဲ။ ကပ်ဘေးအောင်မြင်ပြီး မဟာယာနအဆင့်ရောက်မှသာ ကျင့်ကြံမှုအစစ်အမှန် တိုးတက်လာတာ။ ဒါကြောင့် ကျီမိသားစုက အတိဒုက္ခကျော်ဖြတ်ခြင်း ကျင့်ကြံသူတွေဟာ ကျင့်ကြံမှု မတိုးတက်နိုင်လို့ နိယာမ နဲ့ ကောင်းကင်ဘုံကိုးလွှာဓားကိုပဲ အာရုံစိုက် လေ့ကျင့်နေကြရတာ ဖြစ်မယ်" လီချန် သုံးသပ်လိုက်သည်။

ဆိုလိုတာက သူ့ရဲ့ လက်ရှိကျင့်ကြံမှုအဆင့်ဟာ စကြဝဠာ ကမ္ဘာပေါင်းများစွာမှာ ရှေးဟောင်းကျင့်ကြံနည်းအရ နံပါတ် ၁ ဖြစ်နေလောက်ပြီ။

သေချာတာကတော့ နတ်ဘုရားကမ္ဘာ မပျက်စီးခင်က ကျန်ရစ်ခဲ့တဲ့ ရှေးဟောင်းဘိုးဘေးကြီးတွေ အသက်ရှင်နေသေးလားဆိုတာတော့ ထည့်မတွက်ထားဘူးပေါ့။

.....

၃၃ ဘုံ။

အင်မော်တယ်နန်းတော်။

ဝမ်ရှန်းရတနာခန်းမဆောင်။

နောက်ထပ် အစည်းအဝေး တစ်ခု ကျင်းပနေပြန်သည်။ လွန်ခဲ့သော ဆယ်စုနှစ်များအတွင်း ထျန်းဝိုက်ထျန်းမှ အင်အားစုများ မကြာခဏ ကျူးကျော်လာကြသည်။ အသေးစား တိုက်ခိုက်မှုတွေသာ ဖြစ်ပေမဲ့ အင်မော်တယ်နန်းတော်ကို ခေါင်းကိုက်စေသည်။

ဒါတွေက အကြီးစား ကျူးကျော်မှုကြီးရဲ့ နိဒါန်းပျိုးမှုတွေပဲ ဖြစ်တယ်။

အခုဆိုရင် ထျန်းဝိုက်ထျန်း အင်အားစု အသီးသီးက ၃၃ ဘုံ ကို ထိုးဖောက်ဝင်ရောက်ဖို့ ကြိုးစားနေကြပြီ။

သမိုင်းတစ်လျှောက် ဟွေ့ယွမ်ကပ်ဘေးတွေမှာ ၃၃ ဘုံက အထိနာဆုံးကမ္ဘာကြီး ဖြစ်လေ့ရှိတယ်။

အဓိကကတော့ ၃၃ ဘုံရဲ့ တည်နေရာကြောင့်ပဲ။

၃၃ ဘုံရဲ့ ပတ်လည်မှာ ဝံပုလွေအုပ်ကြီး ဝိုင်းနေသလိုပဲ။ ရှေးဟောင်းမိစ္ဆာဂိုဏ်းရှိတဲ့ ကမ္ဘာက အနီးဆုံးဖြစ်လို့ ပဋိပက္ခ အများဆုံးဖြစ်တယ်။ ဟွေ့ယွမ်ကပ်ဘေး မဟုတ်ရင်တောင် ရှေးဟောင်းမိစ္ဆာဂိုဏ်းက ရည်မှန်းချက်ကြီးကြီးနဲ့ ၃၃ ဘုံကို ကျူးကျော်ဖို့ အမြဲကြံစည်နေတာ။

တချိန်တုန်းက ဟွေ့ယွမ်ကပ်ဘေးတစ်ခုမှာ ၃၃ ဘုံ အကြီးအကျယ်ခံလိုက်ရပြီး၊ မိစ္ဆာတွေ ကြီးစိုးကာ နတ်ဘုရားလမ်းစဉ် မှေးမှိန်သွားခဲ့ဖူးတယ်။ နောက် ဟွေ့ယွမ်ကပ်ဘေးတစ်ခုရောက်မှသာ အခြေအနေ ပြန်လှန်နိုင်ခဲ့ပြီး အင်မော်တယ်နန်းတော် ပြန်လည်အခြေကျနိုင်ခဲ့တာ။

တခြားကမ္ဘာကြီးတွေကလည်း ၃၃ ဘုံကို မျက်စိကျနေကြတယ်။

ဘာလို့လဲဆိုတော့ ကမ္ဘာကြီးတွေ အားလုံးထဲမှာ ၃၃ ဘုံရဲ့ အင်အားက အလယ်အလတ်အောက် အဆင့်လောက်ပဲ ရှိလို့လေ။

သစ်သီးပျော့ပျော့လေးကို ဘယ်သူမဆို ဖဲ့ချင်ကြတာ သဘာဝပဲ။

ဟွေ့ယွမ်ကပ်ဘေးမှာ ထူးခြားချက်တစ်ခုရှိတယ်။ သေဆုံးရမယ့် မပျက်သုဉ်းနိုင်သော ရွှေနတ်ဘုရား ရာခိုင်နှုန်းက အမြဲတမ်းတည်ငြိမ်နေတယ်။

အကြမ်းဖျင်းအားဖြင့် ၉၉ ရာခိုင်နှုန်းလောက် သေဆုံးလေ့ရှိတယ်။

တကယ်လို့ တခြားကမ္ဘာက ရွှေနတ်ဘုရားတွေ များများသေသွားရင်၊ ကိုယ့်ဘက်က ရွှေနတ်ဘုရားတွေ ရှင်သန်နိုင်မယ့် အခွင့်အရေး ပိုများလာမှာပေါ့။

ဒါကြောင့် အားနည်းတဲ့ကမ္ဘာတွေက အမြဲတမ်း အများအပြားအသတ် ခံရပြီး၊ တခြား အင်အားကြီး ကမ္ဘာတွေရဲ့ လက်အောက်ခံ ဖြစ်သွားတတ်ကြတယ်။

"လက်ရှိ အခြေအနေအရဆိုရင် နောက်ထပ် နှစ် ၁၀၀ အတွင်း ဟိုကမ္ဘာကြီးတွေက အလုံးအရင်းနဲ့ ဝင်တိုက်လာတော့မယ်... ပြီးတော့ သဲလွန်စတွေအရ သူတို့အချင်းချင်း လျှို့ဝှက်သဘောတူညီချက်တွေ ရထားပုံရတယ်" ချန်မင်းနတ်ဘုရားဂိုဏ်းမှ ရွှေနတ်ဘုရားတစ်ပါးက လေးနက်စွာ ပြောလိုက်သည်။

ကိုယ့်ကမ္ဘာထဲမှာ တိုက်ရင် ကမ္ဘာ့စည်းမျဉ်းအရ အားသာချက်ရှိတယ်ဆိုပေမဲ့၊ တခြားကမ္ဘာတွေ အများကြီးက ဝိုင်းတိုက်လာရင်တော့ မလွယ်လှဘူး။

"ရှေးဟောင်းမိစ္ဆာဂိုဏ်းက ငါတို့နဲ့ သဘောတူညီချက်ရထားပြီးပြီ မဟုတ်ဘူးလား။ နတ်ဘုရားသွေး ရှားမန်ဂိတ်နဲ့ ငရဲဘုံသား တစ္ဆေမျိုးနွယ်တွေက ပိုအင်အားကြီးမှန်း သိလျက်နဲ့၊ သူတို့က နောက်ထပ် ပစ်မှတ်ဖြစ်လာမှာကို မကြောက်ကြဘူးလား" ရွှေနတ်ဘုရားတစ်ပါးက ဒေါသတကြီး ပြောလိုက်သည်။

အင်မော်တယ်နန်းတော် နဲ့ ရှေးဟောင်းမိစ္ဆာဂိုဏ်းကြားမှာ ရန်ငြိုးတွေ ရှိပေမဲ့၊ ပြင်ပ ရန်သူတွေရဲ့ ဖိအားကြောင့်၊ အထူးသဖြင့် ဟွေ့ယွမ်ကပ်ဘေးကာလမှာ ပူးပေါင်းဆောင်ရွက်မှုတချို့ ရှိတတ်ကြတယ်။

အထူးသဖြင့် ပြီးခဲ့တဲ့ ဟွေ့ယွမ်ကပ်ဘေးတုန်းက ရှေးဟောင်းမိစ္ဆာဂိုဏ်း အကြီးအကျယ် အထိနာခဲ့ပြီး မျိုးတုန်းလုနီးပါး ဖြစ်ခဲ့တာ။ ဒါကြောင့်လည်း နှစ်ပေါင်းများစွာ ငြိမ်သက်ပျောက်ကွယ်နေခဲ့ပြီး လွန်ခဲ့တဲ့ နှစ်ရာချီမှ ပြန်ပေါ်လာခဲ့တာ။

"ဒါတွေ ပြောနေလို့ ဘာထူးမှာလဲ။ နောက်ဆုံးတော့ အင်အားကသာ အဆုံးအဖြတ်ပဲ" ဟုန်ယွင်နတ်ဘုရားဂိုဏ်းမှ ရွှေနတ်ဘုရားက ပြောလိုက်သည်။

ထိုအချိန်တွင် လူရိပ်တစ်ခု ရတနာပလ္လင်တစ်ခုပေါ်သို့ ဆင်းသက်လာသည်။

ရှိနေသော ရွှေနတ်ဘုရားများ အားလုံး အံ့သြသွားကြသည်။

အဘယ်ကြောင့်ဆိုသော် ထိုပလ္လင်သည် ရှန်းကျွင်းပိုင်ဆိုင်သော အထူးနတ်ဘုရားဂိုဏ်းကြီး ၄ ခု ကို ကိုယ်စားပြုသောကြောင့်ဖြစ်သည်။

ပုံမှန်အားဖြင့် ဒီလိုအစည်းအဝေးမျိုးကို အထူးနတ်ဘုရားဂိုဏ်းကြီး ၄ ခုက တက်ရောက်ခဲလှသည်။ အထူးအရေးကြီးသော ကိစ္စရှိမှသာ ပေါ်လာတတ်ကြသည်။

မကြာမီ နောက်ထပ် လူရိပ် ၃ ခုပါ ကျန်သော ပလ္လင်များပေါ်သို့ အသီးသီး ရောက်ရှိလာကြသည်။

ရွှေနတ်ဘုရားများ ပို၍ တုန်လှုပ်သွားကြသည်။

အထူးနတ်ဘုရားဂိုဏ်းကြီး ၄ ခုစလုံး တပြိုင်နက်တည်း ရောက်လာကြတယ် ဟုတ်လား။

"ခုလေးတင် သတင်းရလိုက်တယ်။ ကျီမိသားစုက ၁၀ ခုမြောက်ဘုံမှာ လူလွှတ်ပြီး အမြဲတမ်း စခန်းချတော့မယ်တဲ့" လူရိပ်တစ်ခုက ပြောလိုက်သည်။

ထိုသူသည် အထူးနတ်ဘုရားဂိုဏ်းကြီး ၄ ခုအနက်မှ တစ်ခုဖြစ်သော ထုံထျန်းနတ်ဘုရားဂိုဏ်းမှ ရွှေနတ်ဘုရား ကွေ့လင်းဖြစ်သည်။

"ဘာ..." ရှိနေသော ရွှေနတ်ဘုရားများ အားလုံး တုန်လှုပ်သွားကြပြီး မယုံနိုင်ဖြစ်ကုန်ကြသည်။

ကျီမိသားစုဆိုတာ လောကနဲ့ အဆက်အသွယ် မလုပ်သလောက်ပဲလေ။

ဟွေ့ယွမ်ကပ်ဘေးကာလမှာတောင် ကျီမိသားစုသတင်း ကြားရခဲတယ်။ ကြားရသလောက်တော့ ဟွေ့ယွမ်ကပ်ဘေးတိုင်းမှာ ကျီမိသားစုက အထိအခိုက်အနည်းဆုံးနဲ့ အကောင်းပကတိ ကျန်ရစ်လေ့ ရှိတယ်တဲ့။

ဒါကြောင့် လက်ရှိ ကျီမိသားစု ဘယ်လောက်တောင် အင်အားကြီးမားလဲ ဘယ်သူမှ မသိကြဘူး။

အခု ကျီမိသားစုက ၃၃ ဘုံမှာ အမြဲတမ်း စခန်းလာချမယ်တဲ့။

နေဦး... ဘာလို့ ၁၀ ခုမြောက်ဘုံ ဖြစ်ရတာလဲ။

အမြဲတမ်း စခန်းချမယ်ဆိုရင်တောင် အမြင့်ဆုံးဖြစ်တဲ့ ၃၃ ဘုံမြောက်ဘုံ မှာ လာချသင့်တာ မဟုတ်ဘူးလား။

***