အဆင့် ၆

နောက်ပိုင်း နှစ်အနည်းငယ်အတွင်း လီချန်သည် တံခါးပိတ်ကျင့်ကြံခြင်းပြုလုပ်ခဲ့သည်။ ကိစ္စရပ်များ ငြိမ်သက်သွားသည့် အချိန်ရောက်မှ ၃၃ ခုမြောက်ဘုံသို့ ပြန်သွားပြီး ဟုန်ယွင်နတ်ဘုရားဂိုဏ်း၏ တစ္ဆေနယ်မြေကို ဆက်လက်ရှင်းလင်းပေးခဲ့သည်။

သို့သော် သူသည် ဟုန်ယွင်နတ်ဘုရားဂိုဏ်း၏ တစ္ဆေနယ်မြေကို အပြီးတိုင် ရှင်းလင်းမပေးခဲ့ဘဲ နှစ်အနည်းငယ်ကြာသောအခါ အချိန်ခေါင်းလောင်း လှိုဏ်ဂူကောင်းကင်ဘုံသို့ ပြန်လာခဲ့သည်။

အဘယ်ကြောင့်ဆိုသော် လင့်တုန်းလောကသစ်ပင်သည် အဆင့် ၅ (၉၉/၁၀၀) ရောက်ပြီးနောက် ရှေ့ဆက်မတိုးတော့ဘဲ ရပ်တန့်နေသောကြောင့်ဖြစ်သည်။

သူ့ ကျင့်ကြံမှုအဆင့်ကြောင့် မဟုတ်မှန်း သူ ခန့်မှန်းမိသည်။ ကျီမိသားစုက ရှေးဟောင်းကျင့်ကြံသူတွေဆိုရင် အတိဒုက္ခကျော်ဖြတ်ခြင်းမှာ ရပ်တန့်နေတာတောင် နိယာမကို အဆင့် ၇ အထက်အထိ တက်လှမ်းနိုင်ကြတယ်လေ။

ဒါကြောင့် သူ အချိန်ခေါင်းလောင်း လှိုဏ်ဂူကောင်းကင်ဘုံထဲပြန်လာပြီး သေချာလေ့လာဆန်းစစ်ကြည့်လိုက်ရာ... နောက်ဆုံးမှာ ဖြစ်နိုင်ချေတစ်ခုကို တွေ့ရှိလိုက်သည်။ အဲဒါကတော့ တခြား အရန်နိယာမ ၇ ခုကြောင့် ဖြစ်ရမယ်။

ဒါကြောင့် သူ တံခါးပိတ်ကျင့်ကြံရာမှ ပြန်ထွက်လာပြီးနောက် ထိုက်ရွှမ်းနတ်ဘုရားဂိုဏ်းရှိရာ တစ္ဆေနယ်မြေသို့ တိုက်ရိုက်သွားရောက်ခဲ့သည်။

ဒီတစ္ဆေနယ်မြေရှိနေမှုကြောင့် ထိုက်ရွှမ်းနတ်ဘုရားဂိုဏ်းက လူတွေမှာ ပြောမပြတတ်အောင် ဒုက္ခရောက်နေကြရသည်။ နည်းလမ်းပေါင်းစုံသုံးပြီး တားဆီးပေမဲ့ တစ္ဆေနယ်မြေချဲ့ထွင်မှုကို မရပ်တန့်နိုင်ခဲ့ဘူး။

ဒါ့အပြင် တစ္ဆေနယ်မြေထဲက သတ္တဝါဆန်းတွေ မကြာခဏထွက်လာပြီး တိုက်ခိုက်နေတာကြောင့် ထိုက်ရွှမ်းနတ်ဘုရားဂိုဏ်း ခေါင်းဆောင်ပိုင်းတွေ စိတ်ရောကိုယ်ပါ ပင်ပန်းနွမ်းနယ်နေကြပြီ။ ဒီအတိုင်းသာ ဆက်သွားရင် ထိုက်ရွှမ်းနတ်ဘုရားဂိုဏ်းတစ်ခုလုံး ပြိုကွဲသွားနိုင်တယ်။

ထိုက်ရွှမ်းနတ်ဘုရားဂိုဏ်းက ယွီဟွာနတ်ဘုရားဂိုဏ်းဆီ အကူအညီတောင်းဖို့ စဉ်းစားခဲ့ပေမဲ့၊ အင်မော်တယ်နန်းတော်က ဂိုဏ်းကြီးတွေ ယွီဟွာနတ်ဘုရားဂိုဏ်းဆီ ဆက်တိုက် ရောက်လာနေကြတာ မြင်တော့ သူတို့ မျှော်လင့်ချက် မရှိတော့ဘူးလို့ တွေးမိလိုက်ကြသည်။ အခု ထိုက်ရွှမ်းနတ်ဘုရားဂိုဏ်းရဲ့ အဆင့်အတန်းက ယွီဟွာနတ်ဘုရားဂိုဏ်းနဲ့ စကားပြောဖို့ မလုံလောက်တော့ဘူးလေ။

သူတို့ မျှော်လင့်နိုင်တာက... ယွီဟွာနတ်ဘုရားဂိုဏ်းက ဟို ရှေးဟောင်းကျင့်ကြံသူကြီး (လီချန်) က ၁၀ ခုမြောက်ဘုံမှာ နောက်ထပ် တစ္ဆေနယ်မြေတစ်ခု ကျန်နေသေးတယ်ဆိုတာကို သတိထားမိပါစေဆိုပြီး ဆုတောင်းရုံသာ ရှိတော့သည်။

ထိုနေ့တွင်... မရေမတွက်နိုင်သော ကြီးမားခမ်းနားသည့် ဓားအလင်းတန်းများ ကောင်းကင်မှ ကျဆင်းလာပြီး၊ ကြီးမားသော ဝိုးတဝါးခေါင်းလောင်းရိပ်ကြီးတစ်ခု ဖန်တီးကာ တစ္ဆေနယ်မြေတစ်ခုလုံးကို လွှမ်းခြုံလိုက်သည်။ ထိုက်ရွှမ်းနတ်ဘုရားဂိုဏ်းသားများ ဝမ်းသာလွန်းလို့ မျက်ရည်များပင် ကျလာကြသည်။

နောက်ဆုံးတော့ ထိုက်ရွှမ်းနတ်ဘုရားဂိုဏ်း ကယ်တင်ရှင် ရောက်လာပြီ။

ယခုအချိန်တွင် တစ္ဆေနယ်မြေအတွင်း၌ လီချန် တင်ပျဉ်ခွေထိုင်ကာ ငရဲဘုံ မူလအနှစ်သာရများကို အစွမ်းကုန် စုပ်ယူနေသည်။

ဟုန်ယွင်နတ်ဘုရားဂိုဏ်းက တစ္ဆေနယ်မြေနဲ့ယှဉ်ရင်၊ ဒီထိုက်ရွှမ်းနတ်ဘုရားဂိုဏ်းက တစ္ဆေနယ်မြေက အများကြီး အားနည်းပါတယ်။

လီချန်က လင့်တုန်းလောကသစ်ပင်ကို ဆက်လက် စုပ်ယူခိုင်းပေမဲ့ ဘာမှထူးခြားမှုမရှိပေ။

ဒါပေမဲ့... လင့်တုန်းလောကသစ်ပင်ပေါ်မှာ တွဲလောင်းကျနေတဲ့ နိယာမအသီး ၇ လုံးကတော့ အပြောင်းအလဲတချို့ရှိနေတယ်။

အပြောင်းအလဲက သေးငယ်ပေမဲ့ ရှိနေတာတော့ သေချာတယ်။

လီချန် စိတ်ဝင်စားသွားသည်။ အရန်နိယာမအသီး ၇ လုံးက သန့်စင်ပြီးသား ငရဲဘုံ မူလအနှစ်သာရတွေကို တိုက်ရိုက် မစုပ်ယူနိုင်ဘဲ၊ လောကသစ်ပင်ကို ကြားခံနယ်အနေနဲ့ သုံးပြီးမှ စုပ်ယူလို့ ရတာကိုး။

တကယ်တမ်းကျတော့ ကျင့်ကြံသူတစ်ယောက်က နိယာမတစ်ခုကိုပဲ နားလည်သဘောပေါက်ခွင့် ရှိတာ။ တစ်ခါရွေးပြီးရင် ပြင်လို့မရတော့ဘူး။

လီချန်က ဒီလောက်များတဲ့ အရန်နိယာမတွေကို ကျင့်ကြံနိုင်တာက ကောင်းကင်ဘုံကိုးလွှာဓား ကြောင့်ပဲ။

ပုံမှန်အားဖြင့် ဒီလို နတ်ဘုရားစွမ်းရည်ကနေ ပါလာတဲ့ နိယာမတွေက အဆင့်ထပ်တက်လို့ မရဘူး။

စွမ်းရည်ဖြစ်တည်လာတဲ့အချိန်မှာ ပါလာတဲ့အဆင့်အတိုင်း ပုံသေဖြစ်နေတတ်ကြတာ။

ဒါပေမဲ့ အခု သူ့ရဲ့ အရန်နိယာမ ၇ ခုက တိုးတက်လာနေတယ်။ နှေးကွေးပေမဲ့ တိုးတက်နေတာ အမှန်ပဲ။ ဒါက ပုံမှန်မဟုတ်ဘူး။

လောကသစ်ပင်တိုးတက်မှု ရပ်တန့်နေတာနဲ့ ပေါင်းစပ်စဉ်းစားကြည့်လိုက်တော့ ဒီအရန်နိယာမတွေကြောင့်ဖြစ်မယ်ဆိုတာ လီချန် သေချာသွားပြီ။

အခု ပြဿနာက ဒီအရန်နိယာမတွေကို ဘယ်လိုအဆင့်မြှင့်တင်မလဲဆိုတာပဲ။

ဒါကြောင့် လီချန်က ငရဲဘုံမူလအနှစ်သာရတွေကို သန့်စင်ရင်းနဲ့ တဖက်ကလည်း လေ့လာစမ်းသပ်မှုတွေ ပြုလုပ်နေခဲ့သည်။

....

နှစ်ဝက်ခန့်အကြာမှာ လီချန် ဖြေရှင်းနည်းကို ရှာတွေ့သွားသည်။

ငရဲဘုံ မူလအနှစ်သာရတွေကို အတင်းအဓမ္မစုပ်ယူပြီး လင့်တုန်းလောကသစ်ပင်ထဲကို ထိုးထည့်လိုက်ရင် အရန်နိယာမ ၇ ခုက ဆက်လက်တိုးတက်လာနိုင်တယ်။

အစပိုင်းမှာ နှေးကွေးပေမဲ့ အချိန်ကြာလာတာနဲ့အမျှ စုပ်ယူနှုန်းက မြန်ဆန်လာတယ်။

နှေးကွေးပေမဲ့ အရန်နိယာမတွေ အဆင့်တက်နိုင်တယ်ဆိုတာက လီချန်အတွက် မမျှော်လင့်ထားတဲ့ အံ့အားသင့်စရာပါပဲ။

၁၀ နှစ်ကျော်ကြာပြီးနောက် တစ္ဆေနယ်မြေထဲက ငရဲဘုံ မူလအနှစ်သာရ အများစုကို စုပ်ယူပြီးသွားပြီ။

ဒီနှုန်းထားက တော်တော်နှေးကွေးတယ်လို့ ပြောရမယ်။

ဒါပေမဲ့ လီချန်ရဲ့ရိတ်သိမ်းရရှိမှုက ကြီးမားပါတယ်။

ဘာလို့လဲဆိုတော့ သူ့ လောကသစ်ပင်ပေါ်က နိယာမအသီး ၇ လုံးက အပင်ပေါ်ကနေ ကြွေကျလာပြီး... အညှောင့်ပေါက်လာကြလို့ပဲ။

ဒီမြင်ကွင်းကိုကြည့်ပြီး လီချန် အလွန်အံ့သြသွားသည်။ နိယာမအသီးတွေကလည်း အညှောင့်ပေါက်ပြီး ကောင်းကင်နှင့်မြေကြီးမှာ အမြစ်တွယ်ကာ လောကသစ်ပင်တွေ ဖြစ်လာနိုင်တာလား။

လီချန်က ထိုက်ရွှမ်းနတ်ဘုရားဂိုဏ်းက တစ္ဆေနယ်မြေကို လုံးဝ ရှင်းလင်းလိုက်တဲ့ အချိန်မှာ နိယာမအသီး ၇ လုံးရဲ့ အညှောင့်ပေါက်မှုက အတိုင်းအတာ တစ်ခုအထိ ရောက်ရှိနေပြီ။

ထို့နောက် လီချန် လှိုဏ်ဂူကောင်းကင်ဘုံထဲ ပြန်ဝင်ပြီး ခမအနားယူကာ၊ ၃၀ ခုမြောက်ဘုံသို့ သွားရောက်ပြီး အခြားနတ်ဘုရားဂိုဏ်းကြီးများ၏ တစ္ဆေနယ်မြေများကို စတင်ရှင်းလင်းပေးလိုက်သည်။

သေချာတာကတော့ စွမ်းဆောင်ရည်က သိပ်မမြင့်သေးဘူး။

နိယာမအသီးတွေက လုံးဝအညှောင့်ပေါက် ကြီးထွားလာခြင်းမရှိသေးလို့ ငရဲဘုံ မူလအနှစ်သာရ စုပ်ယူနိုင်စွမ်းက သိပ်မကောင်းသေးဘူး။

ဒါပေမဲ့ အရင်ကထက်စာရင်တော့ အများကြီး မြန်လာပါပြီ။

နောက်ပိုင်း ပိုမြန်လာမှာ သေချာတယ်။

ဘာပဲပြောပြော အရန်နိယာမ ၇ ခုလေ။

တကယ်လို့ ၇ ခုစလုံး လောကသစ်ပင်ဖြစ်လာရင် စုပ်ယူနှုန်းက ကြောက်စရာ ကောင်းလောက်အောင် မြန်ဆန်သွားမှာ။

......

တကယ်လည်း အဲဒီအတိုင်းဖြစ်လာသည်။

၁၀ နှစ်ကျော်ကြာပြီးနောက် အရန်နိယာမအသီး ၇ လုံးက လုံးဝကြီးထွားလာပြီး အမြစ်တွေထွက်လာကာ... နောက်ဆုံးမှာ လင့်တုန်းလောကသစ်ပင် (ပင်မနိယာမ) ပေါ်မှာပဲ ပြန်ပြီး အမြစ်တွယ်သွားကြသည်။

"ဟမ်..." လီချန် အံ့သြသွားသည်။

သူ ထင်ထားတာက ဒီအရန်နိယာမတွေကလည်း လင့်တုန်းနိယာမလိုပဲ ကောင်းကင်နှင့်မြေကြီးမှာ သီးခြား အမြစ်တွယ်ပြီး လောကသစ်ပင်တွေဖြစ်လာမယ် ထင်နေတာ။

အခုတော့ အဲဒီလို မဟုတ်ဘူး။

အရန်နိယာမ ၇ ခုက လင့်တုန်းလောကသစ်ပင်ပေါ်မှာ အမြစ်တွယ်လိုက်တာနဲ့ ငရဲဘုံ မူလအနှစ်သာရ စုပ်ယူနှုန်းက အံ့မခန်း မြင့်တက်သွားသည်။

အရေးအကြီးဆုံးကတော့ လင့်တုန်းလောကသစ်ပင်ကိုယ်တိုင်လည်း ပြင်းထန်စွာ ပြောင်းလဲလာခြင်းပင်။

အရန်နိယာမအသီး ၇ လုံးကနေ ပေါက်ဖွားလာတဲ့ ပျိုးပင်လေးတွေက လင့်တုန်းလောကသစ်ပင်ရဲ့ ခန္ဓာပွားတွေ ဖြစ်လာသလိုပါပဲ။

ဒီအခိုက်အတန့်မှာ လီချန်၏မျက်နှာပေါ်တွင် အပြုံးတစ်ခု ပေါ်လာသည်။ နောက်ဆုံးတော့ အဆင့်တက်သွားပြီ။

လင့်တုန်းလောကသစ်ပင်က အဆင့် ၆ ကို ရောက်ရှိသွားပြီ။

တပြိုင်နက်တည်းမှာပင် အရန်နိယာမ ၇ ခုကလည်း အဆင့် ၂ ကို ရောက်ရှိသွားကြသည်။

လင့်တုန်းနိယာမ (ပင်မနိယာမ) အဆင့်တက်သွားပြီးနောက် ငရဲဘုံ မူလအနှစ်သာရ စုပ်ယူနှုန်းက ဒုံးပျံတပ်ထားသလို မြန်ဆန်လာသည်။

နောက်ဆက်တွဲ နှစ်ပေါင်းများစွာအတွင်း သူသည် တစ္ဆေနယ်မြေများကို ရူးသွပ်စွာ လိုက်လံရှင်းလင်းခဲ့သည်။

ဒါပေမဲ့ သူက တစ္ဆေနယ်မြေတစ်ခုကို ဘယ်တော့မှ အပြီးတိုင် ရှင်းလင်းမပစ်ဘူး။ "အမြီး" နည်းနည်း ချန်ထားလေ့ရှိတယ်။

ဘာလို့လဲဆိုတော့ ဒီတစ္ဆေနယ်မြေတွေက မပျက်သုဉ်းနိုင်သော နတ်ဘုရားဂိုဏ်းကြီးတွေရဲ့ အားနည်းချက်တွေဖြစ်နေလို့ပဲ။

သူတို့ရဲ့အားနည်းချက်ကို ဆုပ်ကိုင်ထားသရွေ့ ကိုယ့်အတွက် အခွင့်အရေးရှိနေမှာ။

သူက ဂိုဏ်းကြီးတွေကို ခြိမ်းခြောက်ဖို့ စိတ်ကူးမရှိပေမဲ့ ကြိုတင်ကာကွယ်တဲ့အနေနဲ့ ဒီလိုလုပ်ထားတာ ပိုစိတ်ချရတယ်။

ဒီကာလအတွင်းမှာ လီချန်ရဲ့ လင့်တုန်းလောကသစ်ပင် တိုးတက်မှုနှုန်းက အများကြီး တက်လာခဲ့တယ်။

.....

အချိန်ခေါင်းလောင်း လှိုဏ်ဂူကောင်းကင်ဘုံ။

လီချန် တင်ပျဉ်ခွေထိုင်နေပြီး ကျင့်ကြံခြင်း ပြီးဆုံးခါစဖြစ်သည်။

သူ စနစ်မျက်နှာပြင်ကို ခေါ်ယူလိုက်သည်။

အိမ်ရှင်: လီချန်။

နတ်ဝိညာဉ် (ကောင်းကင်တာအို)။

မဟာယာနနယ်ပယ် (ကနဦးပိုင်း ၁၅/၁၀၀)။

အချိန်ခေါင်းလောင်း (နတ်ဘုရားကိရိယာ ၄၁၉၀၅၁/၁၀၀၀၀၀၀၀)။

ကောင်းကင်ဘုံအဌမဓား (အဆင့်ငယ်အောင်မြင်မှု ၉၃/၁၀၀)။

မျက်လုံးခြောက်လုံးပိုင်ဆိုင်သော ဟွန်တွန်လျှို့ဝှက်နတ်ဘုရား သက်ဆင်းခြင်းပညာ (ကြီးမားသော သက်ဆင်းခြင်း ၉၉/၁၀၀)။

လင့်တုန်းလောကသစ်ပင် (အဆင့် ၆ ၄၃/၁၀၀)။

အရန်နိယာမများ

ဗလာနယ်ဖောက်ခွဲနိယာမ (အဆင့် ၄ ၅၇/၁၀၀)။

သံချပ်ကာဖောက်ခွဲနိယာမ (အဆင့် ၄ ၅၇/၁၀၀)။

နယ်မြေချိုးဖျက်နိယာမ (အဆင့် ၄ ၅၇/၁၀၀)။

ဝိညာဉ်ချိုးဖျက်နိယာမ (အဆင့် ၄ ၅၇/၁၀၀)။

မိုးကြိုးနိယာမ (အဆင့် ၄ ၅၇/၁၀၀)။

ကောင်းကင်ခွဲနိယာမ (အဆင့် ၄ ၅၇/၁၀၀)။

ကျူရှန်နိယာမ (အဆင့် ၄ ၅၇/၁၀၀)။

ချန်ယွမ်အစီအရင်ကျမ်း (နှစ်ဆယ့်သုံးအခြေခံ ၇၉/၁၀၀)။

ဝိညာဉ်ဆေးပင်စိုက်ပျိုးသူ(အဆင့်ဆယ့်တစ် ၈၈/၁၀၀)။

လက်နက်သန့်စင်သူ (အဆင့်ဆယ့်တစ် ၉၀/၁၀၀)။

အဂ္ဂိရတ်ဆရာ (အဆင့်ဆယ့်နှစ် ၆၈/၁၀၀)။

သားရဲထိန်းကျောင်းသူ (အဆင့် ၆ ၇၆/၁၀၀)။

အဆင့် ၆ ရောက်သွားတော့ တိုးတက်ရခက်ခဲလာသည်။ အဆင့် ၆ (၄၃/၁၀၀) လောက်ပဲ ရောက်သေးတယ်။ ဒီလောက်ခက်ခဲမှတော့ အင်မော်တယ်နန်းတော်လို အဖွဲ့အစည်းကြီးမှာတောင် ရှန်းကျွင်း (အဆင့် ၅/၆) တွေပဲ ရှိပြီး၊ အဆင့် ၇ အထက်ရှိတဲ့ ရှန်ဝမ် (မသေမျိုးဘုရင်) တစ်ပါးမှ မရှိတာ မဆန်းပါဘူး။

ဒါပေမဲ့ တခြားအရန်နိယာမ ၇ ခုရဲ့ တိုးတက်မှုနှုန်းကတော့ ကြောက်စရာကောင်းလောက်အောင် မြန်ဆန်နေတယ်။ အားလုံး အဆင့် ၄ (၅၇/၁၀၀) အထိ ရောက်နေကြပြီ။

၃၃ ဘုံ စံနှုန်းနဲ့ကြည့်ရင် သူ့ရဲ့ အရန်နိယာမတစ်ခုချင်းစီက အထူးရွှေနတ်ဘုရားတစ်ပါးစီနဲ့ ညီမျှနေပြီ။

ပြီးတော့ အရန်နိယာမ ၇ ခု တိုးတက်လာတာက သူ့ရဲ့ စွမ်းအားကို အဆပေါင်းများစွာ မြှင့်တင်ပေးလိုက်တယ်။

အခု သူ ဘယ်လောက် စွမ်းအားကြီးနေပြီလဲဆိုတာ သူကိုယ်တိုင်တောင် မခန့်မှန်းနိုင်တော့ဘူး။ ဒါပေမဲ့ သေချာတာတစ်ခုကတော့... အရန်နိယာမတွေ အဆင့်မတက်ခင်က သူ့ကိုယ်သူ ပြန်တိုက်မယ်ဆိုရင် အလွယ်တကူ အနိုင်ယူလိုက်လို့ ရတယ်။

ဒါတောင်မှ လီချန်က သိုသိုသိပ်သိပ်နဲ့ သတိထားနေဆဲဖြစ်ပြီး ယွီဟွာနတ်ဘုရားနန်းတော်က လူတွေကို အပြင်ထွက်ခွင့် ကန့်သတ်ထားဆဲဖြစ်သည်။ သူ သိနေတယ်... သူ့အင်အားက ပြိုင်ဘက်ကင်းတဲ့အဆင့် မရောက်သေးဘူး။

တစ်နေ့နေ့မှာ အဆင့် ၉ နိယာမ ပိုင်ဆိုင်တဲ့ မသေမျိုးဧကရာဇ်အဆင့် ရောက်ရင်တော့... နေဦး... အဲဒါလည်း မလုံလောက်သေးဘူး။

နတ်ဘုရားကမ္ဘာကြီး တစ်ခုလုံးတောင် ပျက်စီးသွားခဲ့တာလေ။ နတ်ဘုရားကမ္ဘာကြီးကို ဖျက်ဆီးပစ်ခဲ့တဲ့ ဟွန်တွန်ပြင်ပနတ်ဘုရားတွေက ဘယ်လောက်တောင် ကြောက်စရာကောင်းမလဲဆိုတာ တွေးကြည့်လို့တောင် မရဘူး။

***