တစ္ဆေကပ်ဘေး

ပေါင်လင်းမယ်တော် အသွင်ပြောင်းသွားသော ကွေ့ရှန်းပေါ်ထွက်လာပြီးနောက်ပိုင်း မြေနတ်ဘုရားကမ္ဘာသည် အလွန်အန္တရာယ်များသည့် နေရာတစ်ခု ဖြစ်လာခဲ့သည်။

လီချန် အပြင်ထွက်ခဲသလို၊ ယွီဟွာနတ်ဘုရားနန်းတော်မှ တပည့်များကိုလည်း မြေနတ်ဘုရားကမ္ဘာထဲ ဝင်ခွင့်မပေးတော့ပေ။

အစပိုင်းတွင် ထိုကွေ့ရှန်းသည် ကောင်းကင်တာအိုနယ်ပယ်,ပတ်လည်တွင် လှည့်ပတ်သွားလာနေပြီး လူရိပ်တွေ့သည်နှင့် ဟိန်းဟောက်ကာ ကိုက်ဝါးရန် ကြိုးစားလေ့ရှိသည်။

အားရို့လည်း ကောင်းကင်တာအိုနယ်ပယ် အစွန်းပိုင်းတွင် အမြဲလိုလိုစောင့်ဆိုင်းပြီး သူမ၏ မိခင်ကို ငေးကြည့်နေတတ်သည်။

သူမ၏မိခင်က သူမကို မမှတ်မိတော့သော်လည်း သူမ ဂရုမစိုက်ပါ။ နေ့တိုင်း မိခင်ကို မြင်တွေ့နေရရုံဖြင့် သူမ ကျေနပ်ပျော်ရွှင်နေရှာသည်။

အင်မော်တယ်နန်းတော်မှ ရွှေနတ်ဘုရားများသည် ကောင်းကင်တာအိုနယ်ပယ်ထဲတွင် ပုန်းအောင်းနေကြပြီး အပြင်မထွက်ရဲကြပေ။

သူတို့ ဘာကြောင့် အသက်ရှင်နေသေးလဲဆိုတာ နားမလည်ကြသော်လည်း အသက်ဘေးမှ လွတ်မြောက်ခဲ့ရသည့်အတွက် ဝမ်းသာနေကြသည်။

မူလက သူတို့ သေပြီဟု ထင်မှတ်ထားခဲ့ကြတာလေ။

အချိန်ကြာလာသည်နှင့်အမျှ ထိုကွေ့ရှန်းသည် ကောင်းကင်တာအိုနယ်ပယ် ပတ်လည်တွင် ပေါ်လာလေ့ သိပ်မရှိတော့ပေ။

သို့သော် တစ်စုံတစ်ယောက်က ကောင်းကင်တာအိုနယ်ပယ်ထဲမှ ထွက်လာသည်နှင့် ထိုကွေ့ရှန်း ရုတ်တရက် ပေါ်လာပြီး တိုက်ခိုက်တော့သည်။

လီချန်ကိုယ်တိုင်လည်း စွန့်စားပြီး အကြိမ်အနည်းငယ် ထွက်ကြည့်ခဲ့ဖူးသည်။ နတ်ဘုရားစုန်းမတားမြစ်နယ်မြေ ပတ်ဝန်းကျင်တွင် ကြီးမားသော အပြောင်းအလဲမရှိသည်ကို တွေ့ရသည်။ သိသာထင်ရှားသည်မှာ ထိုကွေ့ရှန်းသည် မြေနတ်ဘုရားကမ္ဘာရှိ သာမန်သက်ရှိများကို တိုက်ခိုက်ခြင်း မရှိပေ။

အခြားသတင်းအချက်အလက်များနှင့် ပေါင်းစပ်သုံးသပ်ကြည့်လိုက်လျှင် ဤကွေ့ရှန်း၏ ပစ်မှတ်မှာ မပျက်သုဉ်းနိုင်သော ရွှေနတ်ဘုရားများ သို့မဟုတ် နိယာမကို နားလည်သဘောပေါက်ထားသော သက်ရှိများသာ ဖြစ်ဖို့များသည်။

ဘာပဲပြောပြော ဒီကွေ့ရှန်းဟာ ဟွန်တွန်အဖွဲ့အစည်းက ဟွေ့ယွမ်ကပ်ဘေးအတွက် ရိတ်သိမ်းဖို့ ထားရှိတဲ့ လက်နက်တစ်ခုပဲလေ။

.....

ဒီလိုနဲ့ ၁၀ နှစ်ကျော် ကြာမြင့်သွားခဲ့သည်။

လီချန်အနေဖြင့် ဒီကွေ့ရှန်းဟာ ကောင်းကင်တာအိုနယ်ပယ်ထဲ ဝင်မလာရဲဘူးဆိုတာကို အခြေခံအားဖြင့် အတည်ပြုနိုင်လိုက်သည်။ ဒါကြောင့် ပေါင်လင်းမယ်တော် (ကွေ့ရှန်း) အပေါ် ထားရှိတဲ့ အာရုံစိုက်မှုကို လျှော့ချလိုက်သည်။

ဒီနှစ်ပိုင်းတွေမှာ ကျင့်ကြံမှုတိုးတက်နှုန်း နှေးကွေးနေတာကြောင့် တစ္ဆေနယ်မြေတွေကို ထပ်မံရှင်းလင်းပြီး လင့်တုန်းနိယာမနဲ့ တခြား နိယာမတွေကို မြှင့်တင်ဖို့ လိုအပ်နေပြီဟု သူ ခံစားမိသည်။

ပြီးတော့ သတင်းတွေအရ ငရဲဘုံသား တစ္ဆေမျိုးနွယ်တွေဘက်က ဘာလှုပ်ရှားမှုမှ မရှိဘူး။

ငရဲဘုံသားတွေကို ကြောက်နေလို့ တစ္ဆေနယ်မြေ ရှင်းလင်းရေးကို ရပ်ထားလို့တော့ မဖြစ်ဘူးလေ။

ဒါက သူ့အင်အားကို အမြန်ဆုံးမြှင့်တင်နိုင်မယ့် အကောင်းဆုံးနည်းလမ်းပဲ။

ထို့ကြောင့် လီချန်သည် အချိန်ခေါင်းလောင်းလှိုဏ်ဂူကောင်းကင်ဘုံမှ ထွက်ခွာပြီး အခြားဘုံများသို့ သွားရောက်ကာ တစ္ဆေနယ်မြေ ရှင်းလင်းရေး စတင်တော့သည်။

......

၃၃ ဘုံမြောက်ဘုံ။

တစ္ဆေသင်္ချိုင်းဟု ခေါ်သော လျှို့ဝှက်ဆန်းကြယ်သည့် နေရာတစ်ခုတွင်။

အင်မော်တယ်နန်းတော်၏ ဖမ်းဝရမ်းစာရင်းတွင် လျှို့ဝှက်ရှန်ထျန်းဟွေ့သည် ထိပ်ဆုံး ၁၀ စာရင်း ဝင်လောက်အောင် အဆင့်မမြင့်ပေ။

သို့သော် ဤတစ္ဆေသင်္ချိုင်းအဖွဲ့အစည်းကတော့ ဖမ်းဝရမ်းစာရင်း၏ အဆင့် ၃ နေရာတွင် အမြဲ ရပ်တည်နေသည်။

တစ္ဆေသင်္ချိုင်းသည် ငရဲဘုံသား တစ္ဆေမျိုးနွယ်များနှင့် ရှုပ်ထွေးပွေလီသော ဆက်နွယ်မှုများရှိသည်။

ဟွေ့ယွမ်ကပ်ဘေး ရောက်တိုင်း တစ္ဆေနယ်မြေ တွေ ပေါ်ပေါက်လာရာမှာ တစ္ဆေသင်္ချိုင်းရဲ့ လက်ချက်တွေ ပါဝင်လေ့ရှိသည်။

သို့သော် တစ္ဆေသင်္ချိုင်းက အလွန်လျှို့ဝှက်နက်နဲပြီး၊ ဟွေ့ယွမ်ကပ်ဘေး မရောက်မချင်း လောကထဲ ထွက်မလာတတ်ပေ။ အင်မော်တယ်နန်းတော်က နှစ်ရှည်လများ ဖမ်းဝရမ်းထုတ်ထားသော်လည်း ခြေရာခံမိဖို့ ခဲယဉ်းလှသည်။

တစ္ဆေသင်္ချိုင်း၏ဌာနချုပ်သည် ၃၃ ဘုံမြောက်ဘုံ၊ အင်မော်တယ်နန်းတော်၏ မျက်စိအောက်မှာပင် တည်ရှိနေသည်။

....

တစ္ဆေသင်္ချိုင်းလျှို့ဝှက်နယ်မြေ အတွင်း၌။

ကြောက်မက်ဖွယ်ကောင်းသော ငရဲဘုံသား ၃ ဦးသည် ရတနာပလ္လင်များပေါ်တွင် ထိုင်နေကြပြီး၊ အောက်ဘက်တွင် အနက်ရောင်ဝတ်စုံနှင့် လူအများအပြား ဒူးထောက်နေကြသည်။

ထိုလူများ၏ခန္ဓာကိုယ်မှ တစ္ဆေအငွေ့အသက်များ ထွက်ပေါ်နေပြီး တစ္ဆေလမ်းစဉ်ကို ကျင့်ကြံထားကြောင်း ထင်ရှားသည်။

"စီစဉ်ထားတာတွေ ဘယ်လိုအခြေအနေရှိလဲ" ခေါင်းဆောင်ဖြစ်သူ ငရဲဘုံသားက လေးနက်စွာ မေးလိုက်သည်။

"သခင်ကြီး... ကျွန်တော်တို့ မိစ္ဆာလှိုဏ်ဂူ၊ သားရဲမြို့တော်၊ အမှောင်နတ်ဆရာ စတဲ့ အဖွဲ့အစည်းတွေနဲ့ ဆက်သွယ်ပြီးပါပြီ။ သူတို့က မြေနတ်ဘုရားမြို့ကို အတင်းအဓမ္မ ဖွင့်ဖို့အတွက် ပူးပေါင်းဆောင်ရွက်ကြပါလိမ့်မယ်" ဒူးထောက်နေသော အနက်ရောင် ဝတ်စုံလူများထဲမှတစ်ဦးက အလျင်အမြန် ပြန်ဖြေလိုက်သည်။

"မြန်မြန် လုပ်မှဖြစ်မယ်။ အချိန်ဆွဲတာ ကြာလွန်းနေပြီ" ထိုငရဲဘုံသားက ပြောလိုက်သည်။

"သခင်ကြီး... နောက်ထပ်ကိစ္စတစ်ခု ရှိပါသေးတယ်။ ယွီဟွာနတ်ဘုရားဂိုဏ်းက ဟို လီချန် ပြန်ပေါ်လာပါပြီ။ အခု ၃၁ ဘုံမြောက်ဘုံမှာ တစ္ဆေနယ်မြေတစ်ခုကို ဖျက်ဆီးနေပါတယ်" ထိုလူက ဆက်ပြောသည်။

"ဒီကောင်က ကျီမိသားစုနဲ့ ဆက်သွယ်မှု ရှိတယ်၊ ပြီးတော့ ဒေသခံလည်းဖြစ်နေတော့ ငါတို့ တစ္ဆေမျိုးနွယ်အတွက် အန္တရာယ်ကြီးတယ်... သူက ၃၁ ဘုံမှာ ရောက်နေတာဆိုတော့... ဒီတစ်ခါ ၃၁ ဘုံမြောက်ဘုံက မြေနတ်ဘုရားမြို့ကို ရွေးဖွင့်လိုက်ကြမလား" ခေါင်းဆောင် ငရဲဘုံသားက မေးလိုက်သည်။

"သခင်ကြီး... ၃၁ ဘုံက မြေနတ်ဘုရားမြို့ကိုဖွင့်လိုက်ရင် အင်မော်တယ်နန်းတော်ကို အလစ်အငိုက် ဖမ်းတိုက်ဖို့ မဖြစ်နိုင်တော့ဘူးနော်" အနက်ရောင် ဝတ်စုံလူက သတိပေးလိုက်သည်။

ငရဲဘုံသား ၃ ဦး ခေတ္တ တိုင်ပင်ဆွေးနွေးပြီးနောက်၊ နောက်ဆုံးတွင် ၃၃ ဘုံမြောက်ဘုံက မြေနတ်ဘုရားမြို့ကိုသာ ဖွင့်လှစ်ရန် ဆုံးဖြတ်လိုက်ကြသည်။

လီချန်ရဲ့ခြိမ်းခြောက်မှုက ကြီးမားပေမဲ့... ဒီတစ်ခေါက် အဓိကပစ်မှတ်က အင်မော်တယ်နန်းတော်ဖြစ်သည်။

အင်မော်တယ်နန်းတော်ကို ရှင်းလင်းပြီးသွားရင် လီချန်ဆိုတာ ဘာမှ မဟုတ်တော့ဘူး။

အရေးအကြီးဆုံးက ဒီလီချန်ဟာ ကျီမိသားစုနဲ့ ဆက်သွယ်မှုရှိနေတော့ လောလောဆယ် မထိတာ အကောင်းဆုံးပဲ။ ကျီမိသားစု တကယ်ဝင်ပါလာရင် အခြေအနေတွေ ရှုပ်ထွေးကုန်လိမ့်မယ်။

ပြီးတော့ သူတို့ တွက်ချက်ကြည့်သလောက် လီချန် တစ္ဆေနယ်မြေ ရှင်းလင်းတဲ့ နှုန်းထားက ရေရှည်မှာသာ ထိခိုက်နိုင်တာ။

ရေတိုအတွင်း အင်မော်တယ်နန်းတော်ကို ဖြိုလဲနိုင်ရင် အားလုံး အဆင်ပြေသွားလိမ့်မယ်။

....

၃၁ ဘုံမြောက်ဘုံ။

တစ္ဆေနယ်မြေတစ်ခုအတွင်း၌ လီချန်သည် ဓားအလင်းတန်းများဝန်းရံလျက် ထူးဆန်းသော ခေါင်းလောင်းရိပ်တစ်ခု ဖန်တီးကာရှိနေသည်။

လွန်ခဲ့သော ၁၀ နှစ်ကျော်က ပေါင်လင်းမယ်တော် (ကွေ့ရှန်း) လက်ချက်ဖြင့် ပျက်စီးသွားခဲ့သော ၂၃ အခြေခံ လျန်ချီးအချိန်ခေါင်းလောင်း မွေးရာပါဓားအစီအရင်ကို ပြန်လည်ပြင်ဆင်ရန် နှစ်အတော်ကြာ အချိန်ယူခဲ့ရသည်။

ယခုအခါ ဓားအစီအရင်သည် အထွတ်အထိပ်အခြေအနေသို့ ပြန်ရောက်နေပြီ။

"တစ္ဆေနယ်မြေ ရှင်းလင်းရတာကမှ တကယ် ဇိမ်ရှိတာပဲ" လီချန်သည် သူ့ နိယာမများ တစ်စတစ်စ အားကောင်းလာသည်ကို ခံစားရင်း ကျေနပ်နေသည်။ ကိုယ့်ဖာသာ ကျင့်ကြံနေရင် အချိန်ခေါင်းလောင်း အကူအညီပါရင်တောင် ဒီလောက်မမြန်ဘူး။

ငရဲဘုံ မူလအနှစ်သာရတွေကို တိုက်ရိုက် ဝါးမျိုလိုက်တာနဲ့ ယှဉ်လို့ မရဘူးလေ။

....

ဒီလိုနဲ့ ၄ နှစ်ကျော် ကြာသွားသည်။

တစ်နေ့တွင် လီချန်သည် မြေခွေးဖြူ ကိုယ်ပွားထံမှ သတင်းတစ်ခု ရရှိလိုက်သည်။

သူက တစ္ဆေနယ်မြေထဲမှာ အမြဲနေနေရလို့ အချိန်ခေါင်းလောင်း လှိုဏ်ဂူကောင်းကင်ဘုံကို ပြန်လို့ မရဘူး။ ဒါကြောင့် သတင်းဆက်သွယ်ဖို့ မြေခွေးဖြူ ကိုယ်ပွားကို အားကိုးရသည်။

သူ တစ္ဆေနယ်မြေထဲမှ အလျင်အမြန် ထွက်ခွာပြီး၊ အချိန်ခေါင်းလောင်းလှိုဏ်ဂူကောင်းကင်ဘုံ သို့ ပြန်သွားကာ၊ ထိုမှတဆင့် နေရာကူးပြောင်းခြင်းအစီအရင်ဖြင့် ယွီဟွာနတ်ဘုရားဂိုဏ်းသို့ သွားရောက်ပြီး ကျီယင်းနှင့် တွေ့ဆုံလိုက်သည်။

"တာအိုရောင်းရင်းကျီ... ဘာကိစ္စမလို့ ဒီလောက်အရေးတကြီးခေါ်ရတာလဲ" လီချန် စူးစမ်းစွာ မေးလိုက်သည်။

"ကျွန်တော်တို့ ကျီမိသားစု ရထားတဲ့ သတင်းအရ... အစွမ်းထက်တဲ့ ကွေ့ရှန်းတစ်ကောင် မြေနတ်ဘုရားကမ္ဘာ ထဲကနေ ရုတ်တရက် ထွက်ပြေးလာပြီး ၃၃ ဘုံမြောက်ဘုံထဲ ဝင်ရောက်သွားတယ်တဲ့။ အခု အင်မော်တယ်နန်းတော် အကြီးအကျယ် အထိနာနေပြီ..." ကျီယင်းက လေးနက်သော လေသံဖြင့် ပြောလိုက်သည်။

ဒီကွေ့ရှန်းရဲ့ဇာစ်မြစ် အနည်းငယ်ကို သူ သိထားသည်။ ဘယ်လိုလုပ်ပြီး ရုတ်တရက် ကြိုတင်နိုးထလာလဲ မသိပေမဲ့၊ အခု ၃၃ ဘုံထဲ ရောက်နေပြီဆိုတော့ တကမ္ဘာလုံး ကြီးမားတဲ့အန္တရာယ်နဲ့ ရင်ဆိုင်ရတော့မယ်။

"ကွေ့ရှန်း?" လီချန် ကြောင်သွားသည်။ မြေနတ်ဘုရားကမ္ဘာထဲက ထွက်ပြေးလာတာဆိုတော့... ပေါင်လင်းမယ်တော် (ကွေ့ရှန်း) များလား။

မဖြစ်နိုင်ဘူးလေ။

အင်မော်တယ်နန်းတော်က မြေနတ်ဘုရားကမ္ဘာသွားတဲ့ ဟင်းလင်းပြင်လမ်းကြောင်းကို အသေပိတ်ထားတာ ကြာပြီပဲ။

"တာအိုရောင်းရင်းကျီ... ဒီကွေ့ရှန်းက ဘယ်လိုလုပ် ထွက်လာနိုင်တာလဲ" လီချန် အလျင်အမြန် မေးလိုက်သည်။

"ကျွန်တော် ရထားတဲ့ သတင်းအရ ငရဲဘုံသားတွေနဲ့ ပတ်သက်နေတယ်။ ငရဲဘုံသားတွေက နည်းလမ်းတစ်ခုခုသုံးပြီး မြေနတ်ဘုရားကမ္ဘာထဲက တားမြစ်နယ်မြေတစ်ခုမှာရှိနေတဲ့ ကွေ့ရှန်းကို လွှတ်ပေးလိုက်တာဖြစ်မယ်" ကျီယင်း ပြောလိုက်သည်။ "တာအိုရောင်းရင်းလီချန်... အခု ၃၃ ဘုံက အရမ်း အန္တရာယ်များနေပြီ။ အဲဒီကွေ့ရှန်းက အဆင့် ၉ နိယာမ ပိုင်ဆိုင်တဲ့ မသေမျိုးဧကရာဇ်အဆင့်နီးပါး ရှိတယ်။ ကျွန်တော်တို့ ကျီမိသားစုဘိုးဘေးကိုယ်တိုင် မဆင်းသက်လာရင် ဘယ်သူမှ မထိန်းနိုင်ဘူး"

စကြဝဠာ ကမ္ဘာပေါင်းများစွာထဲမှာ အဆင့် ၉ နိယာမ (မသေမျိုးဧကရာဇ်) ဆိုတာ မရှိသလောက်ပါပဲ။ ကျီမိသားစု ဘိုးဘေးတောင်မှ အဆင့် ၈ နိယာမ အဆင့်ပဲ ရှိတာ။

ဒါပေမဲ့ ကျီမိသားစု ဘိုးဘေးမှာ ကောင်းကင်ဘုံအဌမဓား (လုရှန်ဓား) အထွတ်အထိပ်ရှိနေလို့ ကွေ့ရှန်းကို ကောင်းကောင်းနှိမ်နင်းနိုင်စွမ်းရှိသည်။

"အင်မော်တယ်နန်းတော် အထိနာသွားတာ တော်တော်ဆိုးရွားလား" လီချန် မေးလိုက်သည်။

"အရမ်း ဆိုးရွားတယ်..." ကျီယင်းက ဆက်ပြောသည်။ "တာအိုရောင်းရင်းလီချန်... အခု အခြေအနေအရ ၃၃ ဘုံ တစ်ခုလုံး မလုံခြုံတော့ဘူး။ ကျွန်တော်နဲ့အတူ ကျီကမ္ဘာကို လိုက်ခဲ့ပါလား။ အဲဒီမှာဆိုရင် ဟွေ့ယွမ်ကပ်ဘေးရဲ့သက်ရောက်မှုမရှိဘဲ အေးအေးဆေးဆေး လုရှန်ဓားကို ဆက်လက် လေ့ကျင့်နိုင်မှာပါ"

သူ လာတွေ့ရတဲ့ ရည်ရွယ်ချက်က လီချန်ကို ကျီကမ္ဘာဆီ ခေါ်သွားဖို့ပဲ။

၃၃ ဘုံမှာ ဆက်နေတာက အရမ်းအန္တရာယ်များတယ်။

ပေါင်လင်းမယ်တော် (ကွေ့ရှန်း) မဟုတ်တဲ့ တခြားကွေ့ရှန်းတစ်ကောင် ထွက်လာပြီ။

ပြီးတော့ ငရဲဘုံသားတွေကလည်း အခွင့်ကောင်းချောင်းနေကြတယ်။ နောက်ပိုင်း ၃၃ ဘုံက ဗရပွ ဖြစ်ကုန်တော့မှာ။

"တာအိုရောင်းရင်းကျီ... ကျွန်တော် ဘာလို့ တစ္ဆေနယ်မြေတွေကို လိုက်ရှင်းနေလဲသိလား" လီချန် ပြောလိုက်သည်။

"တာအိုရောင်းရင်းက ကိုယ့်ရဲ့ ကျူရှန်နိယာမစွမ်းအင်တွေ ကုန်ခမ်းတာတောင် ဂရုမစိုက်ဘဲ တစ္ဆေနယ်မြေ တွေကို ရှင်းလင်းပေးနေတာ ကျွန်တော် တကယ် လေးစားမိပါတယ်" ကျီယင်းက ပြောသည်။

တကယ်တမ်းကျတော့ သူ နားမလည်ပါဘူး။ တစ္ဆေနယ်မြေ ရှင်းလင်းဖို့အတွက် ကျူရှန်နိယာမ ကို သုံးရတာလေ။ ကိုယ့်ရဲ့ နိယာမကို ဖြုန်းတီးရာ ရောက်တာကြောင့် ကျင့်ကြံမှုအတွက် မကောင်းဘူး။

"တာအိုရောင်းရင်းကျီ ထင်သလို မဟုတ်ပါဘူး။ တကယ်တမ်းကျတော့ တစ္ဆေနယ်မြေကို ရှင်းလင်းတဲ့ လုပ်ငန်းစဉ်က ကျွန်တော့်ရဲ့ လုရှန်ဓားလေ့ကျင့်မှုကို ပိုမြန်ဆန်စေတာ တွေ့ရှိလိုက်ရလို့ပါ" လီချန်က အကြောင်းပြချက်တစ်ခု ပေးလိုက်သည်။

ကျီယင်း ကြောင်အသွားပြီး မယုံနိုင်စွာ မေးလိုက်သည်။ "တကယ်လား တာအိုရောင်းရင်း"

"သေချာတာပေါ့" လီချန် ခေါင်းညိတ်လိုက်သည်။

"ဘယ်လိုလုပ် ဖြစ်နိုင်မှာလဲ။ တစ္ဆေနယ်မြေ ရှင်းလင်းတာက လုရှန်ဓားကို ထက်မြက်စေတယ် ဆိုတာ ကျွန်တော် တစ်ခါမှ မကြားဖူးဘူး" ကျီယင်း နားမလည်နိုင် ဖြစ်နေသည်။

သူက ကျူရှန်ဓား အထွတ်အထိပ် မရောက်သေးလို့ လုရှန်ဓားကို မလေ့လာရသေးပေမဲ့ ကျီမိသားစု မှတ်တမ်းတွေထဲမှာ ဒီလိုအချက်အလက်မျိုး မရှိပါဘူး။ ရှိရင် ကျီမိသားစုက မသိဘဲဘယ်နေမလဲ။

"အဲဒါတော့ ကျွန်တော်လည်း မသိဘူး" လီချန်က ဆက်ပြောသည်။ "ဒါကြောင့်မို့ ကျွန်တော်က ဇွဲနပဲနဲ့ တစ္ဆေနယ်မြေတွေကို လိုက်ရှင်းနေတာ။ လုရှန်ဓားကို ထက်မြက်အောင် သွေးနေတာပါ"

"ဪ... ဒါဆိုရင် တာအိုရောင်းရင်းက ပါရမီထူးလွန်းလို့ ဒီလိုအကျိုးကျေးဇူးရတာ ဖြစ်မှာပါ" ကျီယင်း လက်ခံလိုက်သည်။

ဒါပေမဲ့ လီချန် ၃၃ ဘုံကနေ ထွက်ခွာချင်စိတ်မရှိဘူးဆိုတာ သူ သဘောပေါက်လိုက်သည်။

ဒါကြောင့် သူ ဆက်မပြောတော့ပေ။

.....

အချိန်ခေါင်းလောင်း လှိုဏ်ဂူကောင်းကင်ဘုံသို့ ပြန်ရောက်ပြီးနောက်၊ လီချန် မြေနတ်ဘုရားကမ္ဘာထဲဝင်ပြီး ပေါင်လင်းမယ်တော် (ကွေ့ရှန်း) ကို လိုက်ရှာကြည့်သည်။ ထင်တဲ့အတိုင်းပဲ ရှာမတွေ့ဘူး။

အားရို့လည်း သူမ မေမေကို မတွေ့တာကြာပြီလို့ ပြောသည်။

လီချန် ၃၃ ဘုံမြောက်ဘုံကို ကိုယ်တိုင်သွားကြည့်ဖို့ ဆုံးဖြတ်လိုက်သည်။

အန္တရာယ်ရှိပေမဲ့၊ ကွေ့ရှန်းနဲ့ တွေ့ရင် အချိန်မရွေး ပြန်ပြေးလို့ ရတာပဲ။

.....

၃၃ ဘုံမြောက်ဘုံ။

လီချန်သည် ဟုန်ယွင်နတ်ဘုရားဂိုဏ်းနယ်မြေထဲရှိ တစ္ဆေနယ်မြေအနီးသို့ ရောက်ရှိလာသည်။

မူလက သူ ရှင်းလင်းထားလို့ တော်တော်လေး ကျုံ့ဝင်သွားခဲ့သော တစ္ဆေနယ်မြေသည် ယခုအခါ မူလအခြေအနေသို့ ပြန်ရောက်နေရုံသာမက ပိုမိုကြီးမားလာသည်ကို တွေ့လိုက်ရသည်။

တစ္ဆေနယ်မြေနားမှာ ဟုန်ယွင်နတ်ဘုရားဂိုဏ်းက လူ တစ်ယောက်မှ မရှိတော့ပေ။ သတ္တဝါဆန်းတွေပဲ သောင်းကျန်းနေကြသည်။

ကြည့်ရတာ ဟုန်ယွင်နတ်ဘုရားဂိုဏ်း အခြေအနေ မကောင်းတော့ဘူး။

ဒါနဲ့ သူ ဟုန်ယွင်နတ်ဘုရားဂိုဏ်း တည်ရှိရာ တောင်တန်းဆီ သွားကြည့်လိုက်တော့ ဂိုဏ်းတစ်ခုလုံး မြေလှန်ခံထားရသလို ပျက်စီးနေတာ တွေ့လိုက်ရသည်။

တိုက်ပွဲပြင်းထန်ခဲ့ပုံရသည်။

သူ ကျောက်စိမ်းပြားတစ်ခုထုတ်ပြီး ယဲ့ယွီကို သတင်းပို့လိုက်သည်။

ယဲ့ယွီ အသက်ရှင်နေသေးဖို့ မျှော်လင့်ရတာပဲ။

မကြာမီ ကျောက်စိမ်းပြား တုံ့ပြန်လာသည်။

ကံကောင်းတယ်... ယဲ့ယွီ အသက်ရှင်နေသေးတယ်။

......

ပိုင်ကျူနတ်ဘုရားမြို့တော်။

လီချန် ဒီမြို့ကို နောက်တစ်ကြိမ် ရောက်လာခဲ့သည်။

အရင်ကနဲ့ယှဉ်ရင် ပိုင်ကျူနတ်ဘုရားမြို့တော်က အလွန်ဆွေးမြေ့ပျက်စီးနေပြီး တိုက်ပွဲဒဏ်ရာဒဏ်ချက်တွေ ပြည့်နေသည်။ ကျင့်ကြံသူတွေ အများကြီးရှိနေသေးပေမဲ့ အားလုံးက ဗလာနတ်ဘုရား၊ မြေနတ်ဘုရား၊ ထျန်းနတ်ဘုရား၊ ရွှမ်းနတ်ဘုရား အဆင့်တွေလောက်သာ ရှိကြသည်။

နိယာမပိုင်ဆိုင်တဲ့ ရွှေနတ်ဘုရားတစ်ယောက်မှ မရှိဘူး။

အရင်တုန်းကဆိုရင် ဒီမြို့မှာ တာအိုသခင်တွေ အများကြီး ရှိခဲ့တာ။

အခုတော့ အရိပ်အယောင်တောင် မတွေ့ရတော့ဘူး။

ဒီမြို့မှာပဲ လီချန်က ယဲ့ယွီနဲ့ တွေ့ဆုံလိုက်သည်။

"တာအိုရောင်းရင်းယဲ့ယွီ... ဘာတွေ ဖြစ်ကုန်တာလဲ" လီချန် မေးလိုက်သည်။

"တာအိုရောင်းရင်းလီချန်... ပြောရရင် ရင်လေးစရာပါပဲ။ လွန်ခဲ့တဲ့ ၂ နှစ်လောက်က တစ္ဆေသင်္ချိုင်း၊ မိစ္ဆာလှိုဏ်ဂူ စတဲ့ အဖွဲ့တွေပေါင်းပြီး မြေနတ်ဘုရားမြို့ကို ဖောက်ဝင်ပြီး ကြောက်မက်ဖွယ် ကွေ့ရှန်း တစ်ကောင်ကို လွှတ်ပေးလိုက်တယ်။ အဲဒီကွေ့ရှန်း က ၃၃ ဘုံမြောက်ဘုံမှာ သောင်းကျန်းနေတာ... ကျွန်တော်တို့ ဟုန်ယွင်နတ်ဘုရားဂိုဏ်း တင်မကဘူး၊ တခြား ဂိုဏ်းတွေ၊ အထူးနတ်ဘုရားဂိုဏ်းကြီး ၄ ခု အပါအဝင် အကုန်လုံး တိုက်ခိုက်ခံလိုက်ရတယ်..." ယဲ့ယွီက ခါးသက်စွာ ပြောပြသည်။

အင်မော်တယ်နန်းတော် အင်အားစုတွေ မျိုးတုန်းသွားတာမျိုးမဟုတ်ပေမဲ့ အကြီးအကျယ် ဆုံးရှုံးလိုက်ရသည်။ အင်မော်တယ်နန်းတော်တစ်ခုလုံးရဲ့ အင်အား ၃ ပုံ ၁ ပုံကျော် ဆုံးရှုံးသွားခဲ့ရသည်။

ပြီးတော့ ခွေးပြေးဝက်ပြေး ထွက်ပြေးပုန်းအောင်းနေရပြီး၊ ကွေ့ရှန်းရဲ့တိုက်ခိုက်မှုကို ရှောင်တိမ်းနေရသည်။

"ဒီလောက်တောင် ဆိုးရွားတာလား" လီချန် အံ့သြသွားသည်။ "စောစောက ကျွန်တော် တစ္ဆေနယ်မြေဘက် သွားကြည့်ခဲ့သေးတယ်။ ငရဲဘုံသားတွေရော ထွက်မလာကြဘူးလား"

"ငရဲဘုံသားတွေ မထွက်ရဲပါဘူး။ သူတို့က ဒီကွေ့ရှန်းကို ထိန်းချုပ်နိုင်စွမ်းမှ မရှိတာ" ယဲ့ယွီ ခေါင်းခါလိုက်သည်။

"ဒါဆို ငရဲဘုံသားတွေက ဘာလို့ ဒီကွေ့ရှန်းကို လွှတ်ပေးလိုက်ရတာလဲ။ သူတို့အတွက် ဘာကောင်းကျိုးမှ မရှိဘဲနဲ့" လီချန် နားမလည်နိုင် ဖြစ်နေသည်။

"ဟွန်တွန်အဖွဲ့အစည်းနဲ့ သဘောတူညီချက်တစ်ခုခု ရထားလို့ ဖြစ်မယ်" ယဲ့ယွီ သက်ပြင်းချလိုက်သည်။

"ငရဲဘုံသားတွေက ဟွန်တွန်အဖွဲ့အစည်းဘက် ခိုလှုံသွားပြီလား" လီချန် အံ့သြသွားသည်။

"ခိုလှုံတယ်လို့တော့ ပြောလို့ မရဘူး။ ဟွန်တွန်အဖွဲ့အစည်း အတွက်ကတော့ ရိတ်သိမ်းခြင်း တာဝန် ပြီးမြောက်ဖို့က အဓိကပဲ။ စကြဝဠာထဲက အင်အားစုတွေ အတွက်ကတော့... ကိုယ်အသက်ရှင်ဖို့အတွက် သူများတွေကို များများသေစေရမှာလေ" ယဲ့ယွီ ပြောပြသည်။

အင်မော်တယ်နန်းတော်က ကိုယ်တိုင်ကျင့်ကြံခြင်းအုပ်စုဖြစ်သလို အင်အားလည်း နည်းတော့ ဝါးမျိုခြင်းအုပ်စုရဲ့ ပစ်မှတ်ဖြစ်နေတာ သဘာဝပါပဲ။

"ဟွန်တွန်အဖွဲ့အစည်းက ဒီလောက်စွမ်းအားကြီးနေရင် ဘာလို့ ငရဲဘုံသားတွေရဲ့လက်ကို ငှားပြီး ကွေ့ရှန်း ကို လွှတ်ခိုင်းနေရတာလဲ။ ကိုယ့်ဖာသာ လွှတ်လိုက်ရင်ရတာပဲကို" လီချန် မျက်မှောင်ကြုတ်လိုက်သည်။

"အဲဒါတော့ မသိဘူး။ ဒါပေမဲ့ သမိုင်းတစ်လျှောက် ဟွေ့ယွမ်ကပ်ဘေးတွေမှာ ဟွန်တွန်အဖွဲ့အစည်းက အစပိုင်းမှာ ဝင်မပါလေ့မရှိဘူး။ အလယ်ပိုင်းရောက်ရင်တောင် ပါခဲတယ်။ နောက်ဆုံးပိုင်း အားလုံးရှင်းလင်းရေးလုပ်မှသာ ထွက်လာတတ်ကြတာ" ယဲ့ယွီ ခေါင်းခါလိုက်သည်။

"ဆိုလိုတာက... ဟွန်တွန်အဖွဲ့အစည်း ဝင်ပါဖို့အတွက် ကန့်သတ်ချက်တစ်ခုခုရှိနေတယ်ပေါ့" လီချန် သုံးသပ်လိုက်သည်။

"ဖြစ်နိုင်ပါတယ်" ယဲ့ယွီ ခေါင်းညိတ်လိုက်သည်။

ထိုအချိန်တွင် လီချန် မျက်မှောင်ကြုတ်လိုက်သည်။ သူ့ရင်ထဲတွင် စိုးရိမ်စိတ် တစ်ခု ရုတ်တရက် ပေါ်လာသည်။

ချက်ချင်းပင် သူ့မျက်နှာ ပြောင်းလဲသွားသည်။ ဒီစိုးရိမ်စိတ်ရဲ့ဇာစ်မြစ်ကို သူ သိလိုက်ပြီ။

ပေါင်လင်းမယ်တော် (ကွေ့ရှန်း) ပေါ်လာပြီ။

ယဲ့ယွီ တစ်စုံတစ်ခု ပြောမလို့ ပြင်လိုက်စဉ်မှာပင် သူ ရုတ်တရက် တုန်ခါသွားသည်။ "မ... မကောင်းတော့ဘူး... ကွေ့ရှန်း ရောက်လာပြီ... ဘယ်လိုလုပ် ဒီလောက်မြန်မြန် ရောက်လာရတာလဲ"

သူ ဒီတစ်ခေါက် လီချန်နဲ့ လာတွေ့တာက အန္တရာယ်ကြီးတဲ့ စွန့်စားမှုတစ်ခုပဲ။

ဒါကြောင့်လည်း ဒီပိုင်ကျူနတ်ဘုရားမြို့တော်လို လူများတဲ့နေရာကို ရွေးခဲ့တာ။

နိယာမမရှိတဲ့ သာမန်ကျင့်ကြံသူတွေ အများကြီးရှိနေရင် ကွေ့ရှန်းရဲ့အာရုံခံမှုကို နှောင့်ယှက်နိုင်ပြီး၊ သူတို့လို ရွှေနတ်ဘုရားတွေရဲ့ တည်နေရာကို ဖုံးကွယ်နိုင်မယ်လို့ တွက်ဆထားတာ။

ဝုန်း!

ကောင်းကင်နှင့်မြေကြီးကို ဆွဲဖြဲပြီး ဧရာမ လက်ကြီးတစ်ဖက် ရုတ်တရက် ကျဆင်းလာကာ အောက်ဘက်ရှိ လီချန် နှင့် ယဲ့ယွီတို့ကို ဖမ်းယူရန် လာနေသည်။

သို့သော် လီချန် အာရုံခံမိလိုက်သည်။ သူက ရောယောင်ပြီး ပါသွားရုံပဲ။

ကွေ့ရှန်းရဲ့ အရှိန်အဝါက သူ့ကို သတ်မှတ်မထားဘူး။

ဘာလို့လဲဆိုတော့ သူက သူ့အရှိန်အဝါကို လုံးဝ ဖုံးကွယ်ထားလို့ပဲ။

အရင်တုန်းက နတ်ဘုရားစုန်းမတားမြစ်နယ်မြေမှာ ကွေ့ရှန်း သူ့ကို မှတ်မိသွားတာက သူ ဝင်တိုက်လိုက်လို့ အရှိန်အဝါ ယိုစိမ့်သွားလို့လေ။

"သွားပြီ... အကုန်သွားပြီ..."

ယဲ့ယွီ ခေါင်းမော့ပြီး ကျဆင်းလာသော လက်ကြီးကိုကြည့်ကာ မျက်နှာ ဖြူဖပ်ဖြူရော ဖြစ်သွားသည်။

ကြောက်မက်ဖွယ် ကွေ့ရှန်းတစ်ကောင်ရဲ့ ပစ်မှတ်ထားခြင်း ခံလိုက်ရပြီဆိုတော့... သူ သေဖို့ပဲ ရှိတော့သည်။

ဒီတစ်ခေါက် ၃၃ ဘုံ တစ်ခုလုံးကို ဖြိုဖျက်နေတဲ့ တစ္ဆေကပ်ဘေးမှာ အင်မော်တယ်နန်းတော်ရဲ့ အဆင့် ၃၊ အဆင့် ၄ အထူးရွှေနတ်ဘုရားတွေတောင် အများကြီး သေဆုံးခဲ့ရတာလေ။

***