စည်းမျဉ်း

လီချန်သည် အားရို့ကို ခေါ်ဆောင်ပြီး နတ်ဘုရားစုန်းမတားမြစ်နယ်မြေအစွန်းတွင် ရပ်တန့်လိုက်သည်။

အတွင်းထဲ ဆက်မဝင်သေးဘဲ တားမြစ်နယ်မြေ၏ အစီအရင် တားမြစ်ပိတ်ပင်မှုများကို အသေအချာ စတင်လေ့လာဆန်းစစ်လိုက်သည်။

တားမြစ်နယ်မြေ အစီအရင်ကို ဒီလောက်အနီးကပ်လေ့လာခွင့်ရတာ ဒါ ပထမဆုံးအကြိမ်ပင်။

"ဒီအစီအရင်ရဲ့ စွမ်းအင်လှိုင်းတွေက ငါသိထားတဲ့ အစီအရင် သဘောတရားတွေနဲ့ လုံးဝ ကွဲပြားနေပါလား"

အချိန်အတော်ကြာပြီးနောက် လီချန် မျက်လုံးများ အရောင်တောက်လာသည်။

ဒီနတ်ဘုရားစုန်းမတားမြစ်နယ်မြေထဲက အစီအရင် စွမ်းအင်လှိုင်းတွေက ပိုမို ဆန်းကြယ်နက်နဲပြီး၊ စိတ်ကူးယဉ်ဆန်ကာ နားလည်ရ ခက်ခဲလွန်းသည်။ ခြေရာခံစရာ လမ်းစရှာမရသလို ဖြစ်နေသည်။

"ကြည့်ရတာ... ဒီတားမြစ်နယ်မြေအစီအရင်က ဟွန်တွန်အဖွဲ့အစည်း ဒါမှမဟုတ် ပြင်ပနတ်ဘုရားတွေနဲ့ သက်ဆိုင်နေပုံရတယ်။ ပုံမှန်အစီအရင်တွေနဲ့ အများကြီးကွာခြားနေတာ မဆန်းပါဘူး" လီချန် စိတ်ထဲတွင် ရေရွတ်လိုက်သည်။

ဒါက သူ့အတွက် အစီအရင်လမ်းကြောင်းသစ်တစ်ခုကို ဖွင့်ပေးလိုက်သလိုပါပဲ။ ဒါကြောင့် သူ ပိုပြီး စိတ်ဝင်စားလာသည်။

တကယ်တမ်းကျတော့ သူ့အဆင့်ရောက်ရင် အစီအရင်ပညာတိုးတက်ဖို့ဆိုတာ အရမ်းခက်ခဲနေပြီလေ။

ဒီလိုနဲ့ နောက်ရက်များတွင် လီချန်သည် တားမြစ်နယ်မြေအစီအရင် လေ့လာရေးတွင် စိတ်နှစ်မြှုပ်ထားလိုက်သည်။

အားရို့ကတော့ ဘေးနားတွင် ပျင်းရိငြီးငွေ့စွာ ထိုင်ကြည့်နေရှာသည်။

.....

ရက်ပေါင်း မည်မျှ ကြာသွားသည်မသိ။ ရုတ်တရက် လီချန် မျက်လုံးများ ဉာဏ်အလင်းပွင့်သွားသကဲ့သို့ ဖြစ်သွားသည်။

"သြော်... ဒါကြောင့်ကိုး... ဒီတားမြစ်နယ်မြေထဲက အစီအရင်က စည်းမျဉ်းတွေ ပုံဖော်ထားတာနဲ့ ပိုတူနေတာပဲ..."

လီချန် ရုတ်ခြည်း သဘောပေါက်သွားသည်။

မူလက သူသည် အစီအရင်၏ ဗဟိုချက် အစအနကို လိုက်ရှာနေခဲ့တာ။ ဒါကြောင့် လမ်းစပျောက်ပြီး ဝင်ပေါက်ရှာမတွေ့ခဲ့တာ။ အခု ရုတ်တရက် ဉာဏ်အလင်းပွင့်သွားတော့မှ ဒီတားမြစ်နယ်မြေ အစီအရင်ရဲ့အခရာကို တွေ့ရှိသွားတော့သည်။

"အားရို့... သွားကြစို့... ဝင်မယ်" လီချန် ချက်ချင်း မတ်တတ်ရပ်ပြီး ပြောလိုက်သည်။

"အင်း..." အားရို့က ကပျာကယာ လိုက်ပါလာသည်။

ဦးဦးလီချန်က ဘယ်သွားမယ်ပြောပြော သူမက လိုက်မှာပဲ။ ဘာမှ မမေးဘူး။

ဒီလိုနဲ့ သူတို့နှစ်ဦး နတ်ဘုရားစုန်းမတားမြစ်နယ်မြေအတွင်းသို့ ဝင်ရောက်လာခဲ့ကြသည်။

အတွင်းပိုင်းရောက်လေလေ အစီအရင်တားမြစ်ပိတ်ပင်မှုတွေက ပိုအားကောင်းလေလေ ဖြစ်သော်လည်း လီချန်၏မျက်နှာပေါ်ရှိအပြုံးက ပိုမို တည်ငြိမ်လာသည်။

သူ ထင်ထားတဲ့အတိုင်းပါပဲ။

ဒီတားမြစ်နယ်မြေအစီအရင်က သာမန်အစီအရင်တွေနဲ့ လုံးဝမတူဘူး။

လူက ဖန်တီးထားတာ မဟုတ်ဘူး။

အလွန်ထူးခြားဆန်းကြယ်သော စည်းမျဉ်းတစ်ခုကနေ အလိုအလျောက် ဖြစ်ပေါ်လာပုံရသည်။

ဒါကြောင့် ပြင်ပအရာတွေကို တွန်းလှန်ကန်ထုတ်တဲ့ သဘောသဘာဝ မရှိဘူး။

သေချာတာကတော့ အန္တရာယ်မရှိဘူးလို့ ဆိုလိုတာ မဟုတ်ပါဘူး။

ပိုလို့တောင် အန္တရာယ်များပါသေးတယ်။

ဒါပေမဲ့ လီချန်က အကြောင်းအရာတချို့ကို သဘောပေါက်ထားပြီးပြီ။ အထူးသဖြင့် ပေါင်လင်းမယ်တော် (ကွေ့ရှန်း) ထွက်ခွာသွားပြီးနောက်ပိုင်း ဒီတားမြစ်နယ်မြေအတွင်းပိုင်းက သိပ်ပြီး အန္တရာယ် မရှိတော့ဘူး။

တစ်နည်းအားဖြင့်ပြောရရင် အန္တရာယ်ရဲ့ဇာစ်မြစ်က အဲဒီကွေ့ရှန်းပဲ။

နတ်ဘုရားစုန်းမတားမြစ်နယ်မြေ အတွင်းပိုင်းတွင် ဘာမှမရှိဘဲ ခြောက်ကပ်နေသည်။ ကျောက်စက်တိုင်အများအပြားသာ ထိုးထိုးထောင်ထောင်နှင့် ပြည့်နှက်နေသည်။ သဘာဝအတိုင်း ဖြစ်နေတာလား၊ လူလုပ်ထားတာလား ဆိုတာတော့ မသိရပေ။

ဒါပေမဲ့ လီချန်ရဲ့အာရုံခံမှုအရ ဒီကျောက်စက်တိုင်တွေက ဘာမှ မထူးခြားပါဘူး။ သာမန် ကျောက်တုံးတွေပါပဲ။ ဘာစွမ်းအင်မှ မရှိသလို၊ တားမြစ်နယ်မြေအစီအရင်နဲ့လည်း ဘာမှ မသက်ဆိုင်ပါဘူး။

ဒါက သူ့ရဲ့ ထင်မြင်ယူဆချက် မှန်ကန်ကြောင်း ပိုပြီး သက်သေပြနေသည်။

သူနှင့် အားရို့ အတွင်းပိုင်းသို့ ဆက်ဝင်လာကြသည်။

ကျောက်စက်တိုင်များ၏ ဗဟိုချက် ဧရိယာတွင် ကျောက်ခေါင်းတလားတစ်ခုကို လီချန် တွေ့လိုက်ရသည်။

"ဒီနေရာပဲ"

လီချန် ကျောက်ခေါင်းတလား ရှေ့သို့ ရောက်လာသည်။ ပြင်းထန်သော အစီအရင် တားမြစ်ပိတ်ပင်မှု စွမ်းအင်လှိုင်းများက ဒီကျောက်ခေါင်းတလားထဲကနေ ထွက်ပေါ်နေခြင်း ဖြစ်သည်။

ပြောစရာ မလိုတော့ပါဘူး။ ပေါင်လင်းမယ်တော်ဖြစ်သွားတဲ့ ကွေ့ရှန်းက ဒီကျောက်ခေါင်းတလားထဲမှာပဲ အိပ်စက်ခဲ့တာဖြစ်မယ်။

"ဒါက..."

ရုတ်တရက် လီချန် တွေ့လိုက်ရသည်မှာ ကျောက်ခေါင်းတလားအတွင်း၌ လက်ဝါးအရွယ်အစားခန့်ရှိ အနက်ရောင်အကြေးခွံတစ်ခု ရှိနေခြင်းပင်။ ထိုအကြေးခွံပေါ်တွင် ထူးဆန်းသော မျဉ်းကြောင်းများ ရေးထိုးထားပြီး မျက်လုံးတစ်လုံးသဖွယ် ပုံစံပေါက်နေသည်။

လီချန် တစ်ချက်ကြည့်လိုက်ရုံဖြင့် မျက်လုံးများ စူးရှနာကျင်သွားပြီး၊ ခေါင်းထဲတွင် တီးတိုးရေရွတ်သံများ ပေါ်လာသလို ခံစားလိုက်ရသည်။

ဘေးနားက အားရို့ဆိုရင် ခေါင်းကိုအုပ်ပြီး မျက်နှာရှုံ့မဲ့ကာ နာကျင်နေသည်။

လီချန် စိတ်ထဲ ထိတ်လန့်သွားပြီး နတ်ဘုရားလက်နက် အချိန်ခေါင်းလောင်းကို ချက်ချင်း လှုံ့ဆော်လိုက်သည်။ ခေါင်းလောင်းသံများ ထွက်ပေါ်လာပြီး ဓားအစီအရင် ပတ်လည်တွင် လွှမ်းခြုံသွားသည်။

ဒေါင်!

ခေါင်းလောင်းသံကြောင့် လီချန် ချက်ချင်း သက်သာသွားသည်။ အားရို့လည်း တဖြည်းဖြည်း ပြန်ကောင်းလာသည်။

"အားရို့... မကြည့်နဲ့... နောက်ဆုတ်နေ" လီချန် အလျင်အမြန် ပြောလိုက်သည်။

အားရို့က လိမ္မာစွာဖြင့် နောက်သို့ဆုတ်လိုက်သည်။

လီချန်က လက်ဝါးအရွယ်အစားခန့် အနက်ရောင်အကြေးခွံကို ပြန်ကြည့်လိုက်သည်။ ဘယ်သတ္တဝါရဲ့အကြေးခွံမှန်း မသိရပေ။

ဒါပေမဲ့ အကြေးခွံသေးသေးလေးတစ်ခုတည်းနဲ့တင် ဒီလောက် ကြောက်မက်ဖွယ် စွမ်းအားတွေ ပါဝင်နေတာ အံ့သြစရာပါပဲ။

နတ်ဘုရားလက်နက် အချိန်ခေါင်းလောင်းသာမရှိရင် သူတောင် ခံနိုင်မှာ မဟုတ်ဘူး။

"ဟွန်တွန်ပြင်ပနတ်ဘုရား ပိုင်ဆိုင်တဲ့ ပစ္စည်းများလား" လီချန် စိတ်ကူးတစ်ခု ရလိုက်သည်။

ဒီအကြေးခွံကပဲ နတ်ဘုရားစုန်းမတားမြစ်နယ်မြေတစ်ခုလုံးက အစီအရင်တားမြစ်ပိတ်ပင်မှုတွေရဲ့ဇာစ်မြစ် ဖြစ်လောက်တယ်။

အကြေးခွံတစ်ခုတည်းနဲ့ တားမြစ်နယ်မြေတစ်ခုလုံးကို လွှမ်းခြုံနိုင်တဲ့ တားမြစ်ပိတ်ပင်မှုတွေ ဖန်တီးနိုင်တယ်ဆိုတာ သာမန်အစီအရင်တွေထက် အဆပေါင်းများစွာ သာလွန်လွန်းတယ်။

တကယ်လို့ ဒီအကြေးခွံကိုယူပြီး သေချာလေ့လာနိုင်ရင် အစီအရင်ပညာရပ်ပိုင်းမှာ ကြီးမားတဲ့ တိုးတက်မှုတွေ ရလာနိုင်မလား။

ဒီအကြေးခွံကို အမှီပြုပြီး အစီအရင်နယ်ပယ်မှာ လမ်းကြောင်းသစ်တစ်ခု ဖောက်လုပ်နိုင်မလား။

ဒါပေမဲ့ အန္တရာယ်လည်း မသေးဘူး။

တကယ်လို့ ဟွန်တွန်ပြင်ပနတ်ဘုရားပိုင်ဆိုင်တဲ့ပစ္စည်းဖြစ်နေရင် ဒါကို ယူလိုက်တာနဲ့ ပြင်ပနတ်ဘုရားရဲ့ ပစ်မှတ်ထားခြင်း ခံရနိုင်တယ်။

ပြင်ပနတ်ဘုရားက ဒီနေရာကို အမြဲစောင့်ကြည့်နေတာလည်း ဖြစ်နိုင်တယ်...

ဒီအကြေးခွံကို ယူတာက သေလမ်းရှာတာများ ဖြစ်နေမလား။

ဒါပေမဲ့ အကြေးခွံရဲ့ဆွဲဆောင်မှုက ကြီးမားလွန်းတယ်။

"မယူဘဲ... ဒီနတ်ဘုရားစုန်းမတားမြစ်နယ်မြေထဲမှာတင် လေ့လာရင်ရော" လီချန် မေးစေ့ကို ပွတ်သပ်လိုက်သည်။

အကြေးခွံကို အချိန်ခေါင်းလောင်း လှိုဏ်ဂူကောင်းကင်ဘုံထဲ ယူသွားဖို့ဆိုတာ သူ မလုပ်ရဲဘူး။

အချိန်ခေါင်းလောင်း လှိုဏ်ဂူကောင်းကင်ဘုံကို သူ အပြည့်အဝ ထိန်းချုပ်ထားနိုင်တယ်ဆိုပေမဲ့...

ဟွန်တွန်ပြင်ပနတ်ဘုရားလို ကောင်းကင်ကို အံတုနိုင်တဲ့ သက်ရှိမျိုးနဲ့ပတ်သက်လာရင်... သူ မစွန့်စားရဲဘူး။

ဒါပေမဲ့ ဒီနေရာမှာတင် လေ့လာမယ်ဆိုရင်လည်း ပေါင်လင်းမယ်တော် (ကွေ့ရှန်း) ရုတ်တရက် ပြန်ရောက်လာမှာကို သတိထားရမယ်။

ဖြစ်နိုင်ချေနည်းပေမဲ့ ကြိုတင်ကာကွယ်ထားရမယ်။

လီချန်က နတ်ဘုရားအာရုံနဲ့ အကြေးခွံကို အာရုံခံကြည့်လိုက်သည်။

တီးတိုးရေရွတ်သံတွေရဲ့ နှောင့်ယှက်မှုကလွဲရင် တခြားအန္တရာယ်မရှိပေ။ သူ ခံနိုင်ရည် ရှိသရွေ့ အတွင်းကျကျ လေ့လာလို့ ရတယ်။

"သေချာတယ်... ဒီအကြေးခွံက ဟွန်တွန်ပြင်ပနတ်ဘုရား ပိုင်ဆိုင်တာပဲ... ပါဝင်နေတဲ့ စွမ်းအားတွေက နိယာမထက် တစ်ဆင့်ပိုမြင့်နေတယ်..." လီချန် ရေရွတ်လိုက်သည်။

သူ ခံစားမိတာက အကြေးခွံပေါ်က စွမ်းအားတွေဟာ နိယာမအဆင့်ထက် ကျော်လွန်နေတယ်။

သူ သိသလောက် နိယာမအထက်မှာ ကောင်းကင်တာအို သို့မဟုတ် စည်းမျဉ်းဆိုတာ ရှိတယ်။

ယေဘုယျအားဖြင့် ဒီအဆင့်ကို ရောက်ဖို့ဆိုတာ စစ်မှန်နတ်ဘုရားတွေမှ ရတာ...

သိသာထင်ရှားတာက ဟွန်တွန်ပြင်ပနတ်ဘုရားဆိုတာ စည်းမျဉ်းတွေကို ထိန်းချုပ်ထားနိုင်တဲ့ ကြောက်မက်ဖွယ် သက်ရှိတွေပဲ။

ကောင်းကင်တာအို စည်းမျဉ်းတွေက အရာရာကို ဖန်တီးနိုင်တယ်။

ဒါကြောင့် အစီအရင်တားမြစ်ပိတ်ပင်မှုတွေ ဖန်တီးတာက သူတို့အတွက် လွယ်လွယ်လေးပဲ။

ဒီလိုနဲ့ လီချန် နတ်ဘုရားစုန်းမတားမြစ်နယ်မြေထဲမှာ အကြေးခွံကို အချိန်အတော်ကြာ လေ့လာခဲ့သည်။

ရိတ်သိမ်းရရှိမှုတချို့ရှိပေမဲ့...

အကြေးခွံအကြောင်း နှံ့နှံ့စပ်စပ်သိဖို့တော့ မလုံလောက်သေးဘူး။

"အကြေးခွံပေါ်က စည်းမျဉ်းစွမ်းအားတွေကို ဖိနှိပ်ထားနိုင်မယ့်နည်းလမ်းရှိမလား" လီချန် မေးစေ့ကို ပွတ်သပ်လိုက်သည်။

လက်ရှိ လေ့လာနည်းက သိပ်ခရီးမရောက်ဘူး။

ဒါပေမဲ့ အတွင်းကျကျ လေ့လာဖို့ကျပြန်တော့လည်း မလုပ်ရဲဘူး။

အကြေးခွံပိုင်ရှင် သတိထားမိသွားမှာ စိုးလို့လေ...

ဒါပေမဲ့ ဒီအတိုင်း လက်လျှော့လိုက်ရမှာလား။ မကျေနပ်ဘူး။

"စမ်းကြည့်ရမလား" လီချန် စိတ်တွေ လှုပ်ရှားလာသည်။

ဒီအကြေးခွံကိုသာရလိုက်ရင် သူ့အတွက် ပြောမပြတတ်အောင် အကျိုးရှိမယ်လို့ ခံစားနေရတယ်။

"လုပ်မယ်ကွာ" လီချန် သွားကိုကြိတ်ပြီး ဆုံးဖြတ်လိုက်သည်။

ပထမဆုံး သူက အားရို့ကိုခေါ်ပြီး အချိန်ခေါင်းလောင်း လှိုဏ်ဂူကောင်းကင်ဘုံထဲ ပြန်ဝင်သွားလိုက်သည်။ ပြီးတော့ ဝူရွှမ်းကို ပြောပြီး တပည့်အားလုံးကို ကောင်းကင်တာအိုနယ်ပယ်ထဲကနေ လှိုဏ်ဂူကောင်းကင်ဘုံ အတွင်းပိုင်းထဲ ပြန်ခေါ်ခိုင်းလိုက်သည်။

ကောင်းကင်တာအိုနယ်ပယ်ကို သူ ထိန်းချုပ်ထားနိုင်တယ်ဆိုပေမဲ့ အချိန်ခေါင်းလောင်း လှိုဏ်ဂူကောင်းကင်ဘုံနဲ့ယှဉ်ရင်တော့ ကွာခြားမှုရှိသေးတယ်လေ။

ပြင်ဆင်စရာရှိတာတွေ ပြင်ဆင်ပြီးမှ လီချန် နတ်ဘုရားစုန်းမတားမြစ်နယ်မြေထဲကို ပြန်ဝင်လာခဲ့သည်။

ကျောက်ခေါင်းတလားထဲက အကြေးခွံကိုကြည့်ပြီး အသက်ပြင်းပြင်း ရှူလိုက်သည်။ ထို့နောက် တွန့်ဆုတ်မနေတော့ဘဲ လက်ကို ဝှေ့ယမ်းလိုက်ရာ ဓားစွမ်းအင်အများအပြားက ကျောက်ခေါင်းတလားကို ဝိုင်းရံလိုက်ပြီး မ,တင်လိုက်သည်။

နောက်တစ်စက္ကန့်တွင် ကျောက်ခေါင်းတလားကို သယ်ဆောင်ပြီး အချိန်ခေါင်းလောင်း လှိုဏ်ဂူကောင်းကင်ဘုံထဲသို့ ချက်ချင်း ပြန်ဝင်သွားလိုက်သည်။

......

အချိန်ခေါင်းလောင်း လှိုဏ်ဂူကောင်းကင်ဘုံ။

လီချန်သည် သူ့ရှေ့မှ ကျောက်ခေါင်းတလားနှင့် အတွင်းရှိ အနက်ရောင်အကြေးခွံကို ကြည့်ပြီး ပြုံးလိုက်သည်။

လွယ်လွယ်လေး ယူလာနိုင်ခဲ့ပြီ။

ဒီအကြေးခွံက စည်းမျဉ်းစွမ်းအားတွေ ပါဝင်ပြီး အစီအရင်တားမြစ်ပိတ်ပင်မှုတွေ ဖန်တီးနိုင်တယ် ဆိုပေမဲ့၊ တကယ်တမ်းကျတော့ နေရာတစ်နေရာတည်းမှာ အသေတပ်ဆင်ထားတာ မဟုတ်ဘူး။

အကြေးခွံရှိတဲ့နေရာက နတ်ဘုရားစုန်းမတားမြစ်နယ်မြေအသစ် ဖြစ်လာမှာပဲ။

"ဒီပစ္စည်းကိုသုံးပြီး ဟိုပေါင်လင်းမယ်တော် (ကွေ့ရှန်း) ကို ထိန်းချုပ်လို့ ရနိုင်မလား" လီချန် ရုတ်တရက် ရူးသွပ်သောအတွေးတစ်ခု ဝင်လာသည်။

ဘာပဲဖြစ်ဖြစ် သူက အကြေးခွံကြောင့် ဖြစ်ပေါ်လာတဲ့ နတ်ဘုရားစုန်းမတားမြစ်နယ်မြေကို အချိန်ခေါင်းလောင်း လှိုဏ်ဂူကောင်းကင်ဘုံထဲ ပြောင်းရွှေ့လိုက်ပြီလေ။

ထို့နောက် လီချန် နတ်ဘုရားအာရုံကို အသုံးပြုပြီး မူလနတ်ဘုရားစုန်းမတားမြစ်နယ်မြေ တည်ရှိရာနေရာကို လှမ်းအာရုံခံကြည့်လိုက်သည်။

သူ ထင်ထားတဲ့အတိုင်းပါပဲ။ မူလနေရာမှာ မြူခိုးတွေ မရှိတော့ဘူး။

ကျောက်စက်တိုင်တွေ အများကြီးပဲ ကျန်တော့တယ်။

သူ အချိန်အတော်ကြာ စောင့်ကြည့်လိုက်ပေမဲ့ ဘာထူးခြားမှုမှမရှိဘူး။

ကြည့်ရတာ အကြေးခွံကိုယူလာလို့ ဆိုးကျိုး ဘာမှမဖြစ်လာဘူး။

အကြေးခွံပိုင်ရှင်က သတိမထားမိတာလား၊ ဒါမှမဟုတ် သတိထားမိပေမဲ့ လောလောဆယ် မဆင်းသက်နိုင်သေးတာလား... ဘာပဲဖြစ်ဖြစ်၊

ဒါက သူ့အတွက် အခွင့်အရေးပဲ။

ဒီတော့ လီချန် ပျော်ရွှင်စွာနဲ့ စတင်လေ့လာတော့သည်။

အချိန်ခေါင်းလောင်း လှိုဏ်ဂူကောင်းကင်ဘုံထဲမှာ အကြေးခွံကို လေ့လာရတာ ပိုအဆင်ပြေတယ်။

သူက နတ်ဘုရားလက်နက် အချိန်ခေါင်းလောင်းကို တိုက်ရိုက် အသုံးပြုပြီး ခေါင်းလောင်းသံတွေ ထုတ်လွှတ်ကာ အကြေးခွံကို ထိုးဖောက်ဝင်ရောက်စေသည်။ အကြေးခွံရဲ့စည်းမျဉ်းစွမ်းအားက ကြီးမားပေမဲ့၊ လီချန်ရဲ့ အချိန်ခေါင်းလောင်းကလည်း မညံ့ပါဘူး။

အချိန်ကြာလာတာနဲ့အမျှ အကြေးခွံကို တဖြည်းဖြည်း ဖိနှိပ်ထိန်းချုပ်လာနိုင်တယ်။

အကြေးခွံကို ဖိနှိပ်ထားလိုက်နိုင်တော့ လေ့လာရတာ အများကြီး လွယ်ကူသွားသည်။

စည်းမျဉ်းတွေရဲ့ လည်ပတ်ပုံနဲ့ ပတ်သက်ပြီး လီချန် တဖြည်းဖြည်း နားလည်သဘောပေါက်လာသည်။ ပါးပါးလေးဆိုပေမဲ့ တိုးတက်မှုတော့ ရှိတယ်။

"စည်းမျဉ်းဆိုတာ... နိယာမတစ်ခုတည်းနဲ့ ဖွဲ့စည်းထားတာ မဟုတ်ဘဲ နိယာမအများအပြား ပေါင်းစပ်ဖွဲ့စည်းထားတာနဲ့ တူတယ်..." လီချန် ရေရွတ်လိုက်သည်။

သူ နားလည်သဘောပေါက်ထားသလောက်ကို အခြေခံပြီး သူ့ရဲ့ လင့်တုန်းနိယာမနဲ့ တခြား အရန်နိယာမ ၇ ခု ကို ပေါင်းစပ်ဖို့ ကြိုးစားကြည့်လိုက်ရာ အံ့သြစရာကောင်းတဲ့ တွေ့ရှိချက်တစ်ခု ရလိုက်သည်။

ဒီနိယာမတွေကို ပေါင်းစပ်ပြီး စည်းမျဉ်းအဆင့်ရောက်အောင် မလုပ်နိုင်သေးပေမဲ့ နိယာမ အများအပြား ပေါင်းစပ်လိုက်တဲ့အခါ ထွက်ပေါ်လာတဲ့ စွမ်းအားက အဆမတန် ကြီးမားလာတာ တွေ့ရတယ်။

"နေဦး... မဟုတ်သေးဘူး" လီချန် အတွေးနက်သွားသည်။

သူ ကျင့်ကြံတဲ့ ကောင်းကင်ဘုံကိုးလွှာဓားက နိယာမ ၉ ခုကို နားလည်သဘောပေါက်စေနိုင်တယ်... တကယ်လို့ စည်းမျဉ်းဆိုတာ နိယာမတွေ ပေါင်းစပ်ထားတာဆိုရင် ကောင်းကင်ဘုံကိုးလွှာဓားဆိုတာ စည်းမျဉ်းအဆင့် ဓားသိုင်းဖြစ်ရမှာပေါ့။

ဒါပေမဲ့ မဟုတ်ဘူး။ ကောင်းကင်ဘုံကိုးလွှာဓားရဲ့ နိယာမ ၉ ခုက နားလည်သဘောပေါက်ပြီးရင် အဆင့်ထပ်တက်လို့ မရတော့ဘူး။

သူ အခု အဓိကကျင့်ကြံနေတဲ့ ရွှမ်မင်မူလရင်းမြစ်ကျမ်း (မြောက်ဘက် ရွှမ်မင်းဧကရာဇ်ဆီက ရတဲ့ ကျမ်း) မှာပါတဲ့ နတ်ဘုရားစွမ်းရည်တွေက ပင်မနိယာမတစ်ခုတည်းကိုပဲ အခြေခံထားတာ။ အရန်နိယာမတွေ မပါဘူး။

အဓိကအကြောင်းရင်းက အရန်နိယာမတွေနဲ့ ပင်မနိယာမက အဆင့်ကွာခြားလွန်းလို့ သိပ်အထောက်အကူ မဖြစ်တာ။

ဒါကြောင့် အရန်နိယာမတွေရဲ့အကျိုးသက်ရောက်မှုက "အထောက်အကူပြုရုံ" သက်သက်ပဲ ဖြစ်နေတာ။

ဒါပေမဲ့ အကြေးခွံပေါ်က စည်းမျဉ်းစွမ်းအားကျတော့ ပင်မနိယာမနဲ့ အရန်နိယာမ ဆက်နွယ်မှုမျိုး မဟုတ်ဘဲ၊ အဓိကနဲ့အရန် ခွဲခြားထားခြင်း မရှိဘူး။

ဆိုလိုတာက... သူသာ လင့်တုန်းနိယာမ နဲ့ အရန်နိယာမ ၇ ခုကို ပေါင်းစပ်ပြီး စည်းမျဉ်းအဖြစ် ပြောင်းလဲချင်ရင်၊ အရန်နိယာမ ၇ ခုကို ပင်မနိယာမနဲ့ တန်းတူအဆင့်ရောက်အောင် မြှင့်တင်ပေးမှ ရမယ်။ မဟုတ်ရင် စည်းမျဉ်း ဖြစ်မလာနိုင်ဘူး။

"ဒါက လုံးဝ မဖြစ်နိုင်တဲ့ကိစ္စပဲ" လီချန် ခေါင်းခါလိုက်သည်။

အနည်းဆုံးတော့ လောလောဆယ် သူ မလုပ်နိုင်သေးဘူးလို့ ထင်တယ်။

လုပ်မရရင်တောင်မှ လင့်တုန်းနိယာမ နဲ့ အရန်နိယာမ ၇ ခု ပေါင်းစပ်လိုက်ရင် စွမ်းအားအများကြီး တက်လာတယ်ဆိုတာ သိလိုက်ရတာက မဆိုးတဲ့ရိတ်သိမ်းမှုပါပဲ။

နောက်ပိုင်းကျရင် ဒီအကြေးခွံပေါ်က နိယာမအသီးသီးဟာ ဘယ်လိုလုပ်ပြီး အဓိကနဲ့အရန် ခွဲခြားမှုမရှိဘဲ ပြီးပြည့်စုံစွာ ပေါင်းစပ်နေကြတာလဲဆိုတာကို သူ သေချာလေ့လာရမယ်။

ဒီသဘောတရားကို နားလည်သွားရင် အနာဂတ်မှာ သူ့ရဲ့ နိယာမ ၈ ခု .. မဟုတ်ဘူး... နိယာမ ၉ ခုကို စည်းမျဉ်းအဖြစ် ပြောင်းလဲနိုင်မယ့် သော့ချက်က ဒီအကြေးခွံမှာရှိနေနိုင်တယ်။

.....

အချိန်တွေ ကုန်ဆုံးသွားလိုက်တာ ၁၀ နှစ်ကျော် ကြာမြင့်သွားခဲ့ပြီ။

ဒီ၁၀ နှစ်ကျော်အတွင်း လီချန်သည် အချိန်ခေါင်းလောင်း လှိုဏ်ဂူကောင်းကင်ဘုံထဲမှာပဲ နေခဲ့သည်။

ဒါပေမဲ့ ပြင်ပက သတင်းတွေကိုတော့ အဆက်မပြတ်ရနေသည်။

ယွီဟွာနတ်ဘုရားနန်းတော် လူတွေအပြင် လျှို့ဝှက်ရှန်ထျန်းဟွေ့မှာလည်း သတင်းကွန်ရက်တွေ ရှိနေလို့ ၃၃ ဘုံ အခြေအနေကို သိနေရသည်။

ကွေ့ရှန်းရဲ့ ခြိမ်းခြောက်မှုကြောင့် နိယာမပိုင်ဆိုင်တဲ့ ကျင့်ကြံသူတွေ ပုန်းအောင်းနေရပေမဲ့ လျှို့ဝှက်ရှန်ထျန်းဟွေ့မှာ သာမန်ကျင့်ကြံသူတွေ အများကြီးရှိတယ်လေ။

ကွေ့ရှန်းရဲ့ ခြိမ်းခြောက်မှုက တခြားဘုံတွေအထိ ပျံ့နှံ့နေပြီ။ အလယ်ပိုင်းဘုံတွေမှာတောင် ကွေ့ရှန်းရဲ့ခြေရာတွေ တွေ့နေရပြီ။

အောက်ပိုင်းဘုံတွေမှာတော့ လောလောဆယ် ကွေ့ရှန်း မရောက်သေးဘူး။

ဒါပေမဲ့ မကြာခင်ရောက်လာမှာ သေချာတယ်။

ကွေ့ရှန်း သောင်းကျန်းနေတာကြောင့် ၃၃ ဘုံ တစ်ခုလုံး ရေအိုင်သေကြီးလို တိတ်ဆိတ်ငြိမ်သက်နေတယ်။ အစွမ်းထက်ပုဂ္ဂိုလ်ကြီးတွေအကုန်လုံး အနက်ရှိုင်းဆုံးနေရာတွေမှာ ပုန်းအောင်းနေကြရပြီး ခေါင်းမထောင်ရဲကြဘူး။

ပုန်းနေရင်တောင် စိတ်မချရဘူး။

ကွေ့ရှန်းက ဟင်းလင်းပြင်ကို ထိုးဖောက်နိုင်ပြီး နိယာမခြေရာတွေကို လိုက်ရှာနိုင်စွမ်းရှိတယ်လေ။ မကြာခဏဆိုသလို ရွှေနတ်ဘုရားတွေ ပုန်းနေရင်း ရှာတွေ့ခံရပြီး အသတ်ခံနေကြရတယ်။

ဒီအတိုင်းသာ ဆက်သွားရင် နှစ် ၁၀၀ မပြည့်ခင် ၃၃ ဘုံ တစ်ခုလုံးက ရွှေနတ်ဘုရားတွေ မျိုးတုန်းသွားလောက်တယ်။

ယွီဟွာနတ်ဘုရားနန်းတော်က လူတွေကတော့ အချိန်ခေါင်းလောင်း လှိုဏ်ဂူကောင်းကင်ဘုံထဲမှာ ပုန်းနေကြတယ်။ အပြင်ထွက်ရင်တောင် ကောင်းကင်တာအိုနယ်ပယ် (မိုင်ရာချီ အကွာအဝေး) အတွင်းမှာပဲ သွားလာကြတာ။ ဒါကြောင့် ဘယ်သူမှ ထိခိုက်မှုမရှိကြဘူး။

တစ်နေ့တွင် အချိန်ခေါင်းလောင်း လှိုဏ်ဂူကောင်းကင်ဘုံ၏ နက်ရှိုင်းသောနေရာမှ အစွမ်းထက်သော အရှိန်အဝါတစ်ခု ထွက်ပေါ်လာသည်။

အကြေးခွံကို လေ့လာနေသော လီချန် ကျေနပ်စွာ ပြုံးလိုက်သည်။ ဒါက ယန်ဖန်း တာအိုပေါင်းစည်းခြင်းအဆင့် အောင်မြင်သွားပြီဆိုတာ သူ သိလိုက်သည်။

ဒါက သူ့တပည့်တွေထဲမှာ ၈ ယောက်မြောက် တာအိုပေါင်းစည်းခြင်းအဆင့်ရောက်သူဖြစ်သည်။

တခြား တပည့် ၁၀ ယောက်ကျော်ကလည်း မူလဝိညာဉ်အသွင်ပြောင်းခြင်းအထွတ်အထိပ် ရောက်နေကြပြီ။ အချိန်မရွေး တာအိုပေါင်းစည်းခြင်းအဆင့် တက်လှမ်းနိုင်ကြတော့မည်။

ယခုအခါ အချိန်ခေါင်းလောင်း လှိုဏ်ဂူကောင်းကင်ဘုံအတွင်း၌ လျှို့ဝှက်ရှန်ထျန်းဟွေ့မှ တာအိုသခင် ၃ ဦးလည်း ရှိနေကြသည်။

ကွေ့ရှန်း သောင်းကျန်းကတည်းက လီချန်က သူတို့ ၃ ဦးကို လှိုဏ်ဂူကောင်းကင်ဘုံထဲ ဝင်ခိုင်းထားတာပင်။

သူတို့ ၃ ဦးက လှိုဏ်ဂူကောင်းကင်ဘုံထဲမှာ နေ့တိုင်း တာအိုအကြောင်းဆွေးနွေးရင်း ဇိမ်ကျနေကြသည်။

လှိုဏ်ဂူနက်ရှိုင်းရာမှ တာအိုပေါင်းစည်းခြင်း အရှိန်အဝါ ထွက်ပေါ်လာတာ အာရုံခံမိတော့ သူတို့ သက်ပြင်းချလိုက်ကြသည်။ ဝူရွှမ်းတာအိုနန်းတော်မှာ နောက်ထပ် တာအိုသခင် တစ်ပါး ထွက်ပေါ်လာပြန်ပြီဆိုတာ သိလိုက်ကြသည်။

"ဒါ ၈ ယောက်မြောက် အောင်မြင်သူ ထင်တယ်" တာအိုသခင် ယွီဟိန်က ပြောလိုက်သည်။

"ဟုတ်တယ်။ နှစ်အနည်းငယ်အတွင်းမှာ ဒီလောက်များတဲ့ တာအိုသခင်တွေ ပေါ်ထွက်လာတာ... ဒီဝူရွှမ်းတာအိုနန်းတော် က ဒီတစ်ခေါက် ဟွေ့ယွမ်ကပ်ဘေး မှာ ၃၃ ဘုံရဲ့ အစွမ်းအထက်ဆုံး အဖွဲ့အစည်း ဖြစ်လာတော့မယ်" တာအိုသခင် ဖန်ယွမ်က ပြောလိုက်သည်။

ဝူရွှမ်းတာအိုနန်းတော် (ယွီဟွာနတ်ဘုရားနန်းတော်) မှာ တာအိုသခင်တွေ တစ်ပါးပြီးတစ်ပါး တိုးပွားလာတာကို သူတို့ မျက်မြင်ကိုယ်တွေ့ကြုံနေရသည်။

နောက်ထပ် နှစ်ရာချီလောက် အချိန်ပေးလိုက်ရင် ဝူရွှမ်းတာအိုနန်းတော်မှာ တာအိုသခင်အရေအတွက် ဘယ်လောက်တောင်များလာမလဲ တွေးကြည့်လို့တောင် မရဘူး။

"ငါတို့ အချိန်မီ ဝင်ခိုလှုံလိုက်တာ ကံကောင်းတယ်။ ကွေ့ရှန်းရန်ကနေ ကြောက်လန့်နေစရာ မလိုတော့ဘူး" တာအိုသခင် စစ်ယွီက ခေါင်းညိတ်ပြီး ပြောလိုက်သည်။

လျှို့ဝှက်ရှန်ထျန်းဟွေ့အနေနဲ့ ဝူရွှမ်းတာအိုနန်းတော်အောက် ဝင်ရောက်ခိုလှုံလိုက်တာက အမှန်ကန်ဆုံး ရွေးချယ်မှုဖြစ်ခဲ့သည်။

ဒီဟွေ့ယွမ်ကပ်ဘေးကို ကျော်ဖြတ်နိုင်မယ့် ယုံကြည်ချက်တွေ ပိုတိုးလာကြသည်။

"သွားကြစို့... ဟိုတာအိုရောင်းရင်းကို သွားပြီးဂုဏ်ပြုပေးကြရအောင်" တာအိုသခင် စစ်ယွီ က မတ်တတ်ရပ်ပြီး ပြောလိုက်သည်။

ထို့နောက် ၃ ဦးသား လီချန် စီစဉ်ပေးထားသော ကျင့်ကြံခြင်းလှိုဏ်ဂူမှထွက်ခွာပြီး၊ တာအိုပေါင်းစည်းခြင်းအရှိန်အဝါ ထွက်ပေါ်ရာနေရာသို့ ထွက်ခွာသွားကြသည်။

***