ခွင့်လွှတ်ပါ ကျွန်းသခင်မ၊ အဲ့ဒီအမျိုးသားရဲ့ ဆွဲဆောင်မှုက အရမ်းကြီးမားလွန်းတော့ ကျွန်မတို့ မထိန်းချုပ်နိုင်ခဲ့ကြဘူး(၂)။

"နည်းလမ်းတွေကတော့ မဆိုးလှပါဘူး... ဒါပေမဲ့ ဒီလောက်ပါပဲ..."

ကျိုးစွေ့သည် ဘိုးဘေးမဟူရာလ၊ ဘိုးဘေးမင်ယန်နှင့် ဘိုးဘေးကျီယင်းတို့ သုံးဦးကို တည်ငြိမ်စွာ ကြည့်လိုက်သည်။

ဝိညာဉ်သန္ဓေသား နှောင်းပိုင်းအဆင့် မဟာကျင့်ကြံသူများ၏ တိုက်ခိုက်ရေးစွမ်းရည်သည် အလွန် ကြောက်မက်ဖွယ် ကောင်းလှပြီး၊ မတူညီသောအခြေအနေ ဖြစ်ပါက သူသည် တစ်ခဏချင်း အသတ်ခံလိုက်ရနိုင်ကာ ပြန်လည်ခုခံနိုင်စွမ်းပင် ရှိမည်မဟုတ်ပေ။

သို့သော် စတုတ္ထအဆင့် ထိပ်တန်းအစီအရင် ရွှမ်ယင်လေးလံရေအစီအရင်အတွင်းတွင် ရှိနေပြီး စတုတ္ထအဆင့် ဝိညာဉ်သွေးကြော၏ စွမ်းအားကို ထိန်းချုပ်ထားသရွေ့၊ သူသည် ဤနယ်မြေ၏ စစ်မှန်သော အရှင်သခင်ဖြစ်ပြီး မည်သည့်ကျင့်ကြံသူ ဝင်ရောက်လာသည်ဖြစ်စေ သူ၏ပြိုင်ဘက် ဖြစ်လာနိုင်မည် မဟုတ်ပေ။

ဤသည်မှာ အစီအရင်၏စွမ်းအား၊ ကောင်းကင်နှင့်မြေကြီး၏ စွမ်းအားကို ထိန်းချုပ်ခြင်းပင်။

သာမန်လူသားခန္ဓာကိုယ်ဖြင့် နတ်ဘုရားတစ်ပါး၏ စွမ်းအားကို ထုတ်ဖော်ခြင်း ဖြစ်၏။

ကနဦးတွင် ကျိုးစွေ့ ထုတ်သုံးခဲ့သော စွမ်းအားသည် ရွှမ်ယင်လေးလံရေအစီအရင်၏ စွမ်းအား တစ်စိတ်တစ်ပိုင်းမျှသာ ဖြစ်ကြောင်း သိထားသင့်သည်။

စွမ်းအား အလုံးစုံ မဟုတ်သေးပေ။

စတုတ္ထအဆင့် အစီအရင်တစ်ခု အနေဖြင့်သာမက၊ အစီအရင်ကြီးနှစ်ခု၏ စွမ်းအားကို ပေါင်းစပ်ထားသော နှစ်ထပ်ပေါင်းစပ် အစီအရင်တစ်ခုလည်း ဖြစ်သည်။

ယင်း၏ စွမ်းအားသည် တစ်ပေါင်းတစ် ညီမျှခြင်း နှစ် ကဲ့သို့ ရိုးရှင်းသည် မဟုတ်ပေ။

စွမ်းအားသည် ဆတိုးကိန်းဖြင့် တိုးတက်လာခြင်း ဖြစ်သည်။

"လေကို ဆင့်ခေါ်..."

"မိုးကို ရွာစေ..."

ကျိုးစွေ့၏ အတွေးတစ်ချက် လှုပ်ရှားလိုက်သည်နှင့် ရွှမ်ယင်လေးလံရေအစီအရင်ကို အစွမ်းကုန် မောင်းနှင်လိုက်ရာ၊ ဤစတုတ္ထအဆင့် အထွတ်အထိပ်အစီအရင်၏ ကြောက်မက်ဖွယ်စွမ်းအားသည် ချက်ချင်း ပေါက်ကွဲထွက်ပေါ်လာပြီး၊ ယခင်ကနှင့် နှိုင်းယှဉ်၍ မရနိုင်တော့ပေ။

ခေါ်ယူလိုက်သော လေသည် သာမန်လေ မဟုတ်ဘဲ ရွှမ်ယင်လေပြင်းဖြစ်ကြောင်း သိထားရပေမည်။

ရွာစေသော မိုးသည်လည်း သာမန်မိုး မဟုတ်ဘဲ ရွှမ်ယင်လေးလံရေဖြစ်၏။

ဤစွမ်းအားကြီးမားသော သဘာဝစွမ်းအင်နှစ်ခု ပေါင်းစပ်လိုက်သောအခါ ပေါက်ကွဲထွက်ပေါ်လာသည့် စွမ်းအားသည် သဘာဝကျကျပင် ကောင်းကင်နှင့် မြေကြီးကိုပင် ဖျက်ဆီးပစ်နိုင်ပေသည်။

ဘုန်း... ဘုန်း... ဘုန်း...

တစ်ခဏချင်းတွင် မိုင်ထောင်ချီ ပင်လယ်ပြင်ဧရိယာသည် ဤစွမ်းအား၏ လွှမ်းမိုးမှုအောက်သို့ ရောက်ရှိသွားသည်။

ကောင်းကင်နှင့် မြေကြီးကြားတွင် လေပြင်းများ တိုက်ခတ်လာပြီး အဆုံးမဲ့ ရွှမ်ယင်လေပြင်းများ ပေါက်ကွဲထွက်ပေါ်လာကာ မုန်တိုင်းတစ်ခု ဖြစ်ပေါ်လာပြီး၊ လေထဲတွင် ကြောက်မက်ဖွယ် ရွှမ်ယင်လေဓားသွားများအဖြစ် စုစည်းကာ အရာအားလုံးကို ဖျက်ဆီးပစ်လိုက်သည်။

ကောင်းကင်ထက်မှ ထောင်ပေါင်းသောင်းချီသော ရွှမ်ယင်လေးလံရေများ ကျဆင်းလာသည်။

ဤရွှမ်ယင်လေးလံရေများသည် ထူးကဲစွာ လေးလံရုံသာမက၊ ရေတစ်စက်ချင်းစီ၏ အလေးချိန်သည် တောင်တစ်လုံးနှင့် ညီမျှသည်။

ပို၍ အရေးကြီးသည်မှာ ကြောက်မက်ဖွယ်ကောင်းသော ရွှမ်ယင်စွမ်းအားများ ပါဝင်နေပြီး၊ ချဉ်းကပ်လာသည်နှင့်တပြိုင်နက် ရွှမ်ယင်ရေခဲစွမ်းအား၏ ကျူးကျော်မှုကို ခံရကာ ခန္ဓာကိုယ်တစ်ခုလုံး အေးခဲသွားစေနိုင်သည်။

ဤအခိုက်အတန့်တွင် ကျိုးစွေ့သည် အင်မော်တယ်နတ်ဘုရားတစ်ပါးကဲ့သို့ ဖြစ်နေပြီး အထွတ်အထိပ် နတ်ဘုရားစွမ်းရည်ဖြစ်သော 'လေကိုခေါ်၍ မိုးကိုရွာစေခြင်း' ပညာရပ်ကို ထုတ်ဖော်နေသကဲ့သို့ ရှိသည်။

ဤစတုတ္ထအဆင့် အစီအရင်ကြီး၏ အထောက်အပံ့အောက်တွင် သူသည် ဝိညာဉ်သန္ဓေသား မှော်စွမ်းအားကို ပိုင်ဆိုင်ထားသကဲ့သို့ ဖြစ်နေပြီး၊ အကန့်အသတ်မရှိ စွမ်းအင်ဖြည့်တင်းနိုင်ကာ ဤစွမ်းအားကို အကြွင်းမဲ့ထုတ်လွှတ်နိုင်ပြီး ကောင်းကင်နှင့် မြေကြီး၏ စွမ်းအားကို ထိန်းချုပ်နိုင်လေသည်။

"သေစမ်း... ဒီကောင်က စတုတ္ထအဆင့် အစီအရင်ပညာရှင်ပဲ... ပြီးတော့ စတုတ္ထအဆင့် အထွတ်အထိပ်နယ်ပယ်ကို ရောက်နေတာ..."

"သူက စတုတ္ထအဆင့် အစီအရင်ရဲ့ စွမ်းအားကို အပြီးပြည့်စုံဆုံး ဖော်ထုတ်နိုင်တယ်..."

ဘိုးဘေးမဟူရာလ မျက်နှာပျက်သွားပြီး ကောင်းကင်နှင့် မြေကြီးကြားရှိ ကြောက်မက်ဖွယ်စွမ်းအားကို ခံစားလိုက်ရသည်။ ဤအချိန်မှသာ သူသည် စတုတ္ထအဆင့် အထွတ်အထိပ်အစီအရင်၏ စွမ်းအားဆိုသည်မှာ မည်သို့ရှိကြောင်း အမှန်တကယ် ခံစားလိုက်ရသည်။

အဘယ်ကြောင့်ဆိုသော် ယခင်က စတုတ္ထအဆင့် အစီအရင်များကို စွမ်းအားအပြည့် အသက်သွင်းလေ့ မရှိသောကြောင့် ဖြစ်သည်။

သေခြင်းနှင့်ရှင်ခြင်းကို အဆုံးအဖြတ်ပေးမည့် အရေးကြီးသော အချိန်မဟုတ်လျှင် မည်သူက ဂိုဏ်းအတွင်းရှိ စတုတ္ထအဆင့် အစီအရင်ကို အပြည့်အဝ အသက်သွင်းပါမည်နည်း။

ထို့ကြောင့် သူ၏ စတုတ္ထအဆင့် အစီအရင်များအပေါ် နားလည်မှုသည် သိပ်မပြည့်စုံခဲ့ပေ။

ယခု သူသည် ကောင်းကင်နှင့် မြေကြီးကြား နေရာတိုင်းတွင် ရှိနေသော စွမ်းအားများ၊ နေရာတိုင်းတွင် ရှိနေသော သတ်ဖြတ်လိုစိတ်များကို အာရုံခံမိပြီး၊ ကမ္ဘာလောကကြီးတစ်ခုလုံးက သူတို့ကို ဤနေရာတွင် လုံးဝ သုတ်သင်ရှင်းလင်းပစ်တော့မည့်အလား ခံစားနေရသည်။

ဤအချိန်တွင် စတုတ္ထအဆင့် အစီအရင်ပညာရှင်၏ အဆင့်အတန်းသည် အဘယ်ကြောင့် ဤမျှ လေးစားဖွယ်ကောင်းကြောင်း သူ နောက်ဆုံးတွင် သဘောပေါက်သွားရသည်။

အစီအရင်အပြင်ဘက်တွင် အစီအရင်ပညာရှင်၏ ခြိမ်းခြောက်မှုသည် သိပ်မကြီးမားသော်လည်း၊

အစီအရင်အတွင်းတွင်မူ သူတို့သည် ပြိုင်ဘက်ကင်းသော ဖြစ်တည်မှုများ ဖြစ်ကြသည်။

မည်သည့်ကျင့်ကြံသူမျှ အစီအရင်အတွင်း၌ အစီအရင်ပညာရှင်နှင့် မိုက်မဲစွာ ယှဉ်ပြိုင်ရဲကြမည် မဟုတ်ပေ။

ထိုသို့ပြုလုပ်ခြင်းသည် သေလမ်းရှာခြင်း သက်သက်သာ ဖြစ်သည်။

"မဟူရာလ ကောင်းကင်ဝါးမြိုခြင်း..."

တုံ့ဆိုင်းမနေတော့ဘဲ ဘိုးဘေးမဟူရာလသည် သူ၏ကိုယ်ပေါ်ရှိ အထွတ်အထိပ်အဆင့် ဝိညာဉ်ရတနာ မဟူရာလတံခွန်ကို ချက်ချင်း အသက်သွင်းလိုက်ရာ၊ မဟူရာလမင်းကြီးတစ်စင်း လေထဲတွင် မြင့်တက်လာပြီး ဤကောင်းကင်ကြီးကို အနက်ရောင်ဖြင့် တိုက်စားသွားသကဲ့သို့ ဖြစ်ပေါ်လာသည်။

ကောင်းကင်နှင့် မြေကြီးကြားတွင် ဤမဟူရာလမင်းကြီးသာ ကျန်ရှိတော့ပြီး အမှောင်ထုနှင့် မကောင်းဆိုးဝါး အရှိန်အဝါများကို ထုတ်လွှတ်နေချေသည်။

ချက်ချင်းပင် ဤကြီးမားသော မဟူရာလမင်းကြီးသည် ကျိုးစွေ့ထံသို့ ပစ်ဆောင့်လိုက်ပြီး အစီအရင်ကို ဖြိုခွဲရန် ကြိုးစားလိုက်သည်။

ဝမ်းနည်းစရာမှာ ၎င်းသည် မည်သည့် အကျိုးသက်ရောက်မှုမှ မရှိခဲ့ပေ။

အဆုံးမဲ့ ရွှမ်ယင်လေပြင်းများ တိုက်ခတ်လာပြီး မိုင်ထောင်ချီ ပင်လယ်ပြင်ကို ဖုံးလွှမ်းသော ကြောက်မက်ဖွယ် မုန်တိုင်းတစ်ခု ဖြစ်ပေါ်လာကာ၊ မည်သည့်နေရာသို့ ပုန်းရှောင်သည်ဖြစ်စေ အသုံးဝင်မည် မဟုတ်ပေ။

ဘန်း… ဘန်း… ဘန်း…

ထောင်ပေါင်းသောင်းချီသော ရွှမ်ယင်လေပြင်းများ ကြိတ်ချေဝင်ရောက်လာပြီး ဤကမ္ဘာကြီးကို စုတ်ဖြဲပစ်ကာ မဟူရာလမင်းကြီးကို ဝင်ရောက်တိုက်ခိုက်လိုက်ရာ၊ ချက်ချင်းပင် ထိုမဟူရာလမင်းကြီးကို အပိုင်းပိုင်းအစစ ဆုတ်ဖြဲပစ်လိုက်ပြီး အမှုန့်ဖြစ်သွားစေသည်။

ရွှမ်ယင်လေပြင်း အများအပြားသည် ဘိုးဘေးမဟူရာလ၏ ခန္ဓာကိုယ်ကို တိုက်ရိုက် ရိုက်ခတ်သွားကြတော့သည်။

"အား..."

ဘိုးဘေးမဟူရာလတစ်ယောက် ချက်ချင်းဆိုသလို မချိမဆံ့အော်သံတစ်ချက် ပြုလုပ်လိုက်ရပြီး၊ သူ၏ ကိုယ်ပေါ်ရှိ ချပ်ဝတ်သည် ချက်ချင်း ကွဲကြေသွားကာ၊ တစ်ကိုယ်လုံး လွင့်စင်ထွက်သွားပြီး ပင်လယ်ပြင်ပေါ်တွင် ဆယ်မိုင်ကျော်ခန့် လျှောတိုက်ပါသွားလေတော့သည်။

ကြောက်မက်ဖွယ် ရွှမ်ယင်စွမ်းအားတစ်ခုက သူ၏ ခန္ဓာကိုယ်ထဲသို့ ဝင်ရောက်လာပြီး သွေးကြောများကို အေးခဲသွားစေကာ၊ သူ၏ မျက်ခုံး၊ မျက်လုံး၊ နှာခေါင်း စသည့် အစိတ်အပိုင်းများတွင် အဖြူရောင်နှင်းခဲများ ဖြစ်ပေါ်လာစေသည်။

"မင်ယန် ငရဲမီးပင်လယ်..."

ဘိုးဘေးမင်ယန် ကျယ်လောင်စွာ အော်ဟစ်လိုက်ပြီး အထွတ်အထိပ်အဆင့် ဝိညာဉ်ရတနာ မင်ယန်လက်ကောက်ကို ကိုင်ဆောင်ကာ၊ သူ၏ ခန္ဓာကိုယ်ကို ဗဟိုပြု၍ မိုင်ရာချီဧရိယာကို အနက်ရောင် မီးပင်လယ်အဖြစ် ပြောင်းလဲပစ်လိုက်သည်။

အနက်ရောင် မီးပင်လယ်ထဲမှ အနက်ရောင် မီးကျီးကန်းများ ပျံသန်းထွက်ပေါ်လာပြီး အော်မြည်သံများ ပြုလုပ်ကာ၊ သေခြင်းတရားအရှိန်အဝါနှင့် အေးစက်ယင်အရှိန်အဝါများကို ထုတ်လွှတ်ပြီး ဤအစီအရင် အတားအဆီးကို မီးရှို့ဖျက်ဆီးကာ ဤနေရာမှ ထွက်ပြေးရန် ကြိုးစားလိုက်သည်။

အစီအရင်ထဲတွင် ဆက်လက်နေထိုင်နေပါက သေချာပေါက် သေဆုံးရမည်ကို သူ သိရှိထားသည်။

အနက်ရောင် မီးကျီးကန်းတစ်ကောင်စီ၏ စွမ်းအားသည် အလွန် ကြောက်မက်ဖွယ်ကောင်းပြီး၊ အနီးနားရှိ ကျွန်းများပေါ်သို့ ကျရောက်သွားရာ လူသူမဲ့ကျွန်း တစ်ကျွန်းလုံးကို ပြာကျသွားသည်အထိ လောင်ကျွမ်းစေပြီး အဆုံးမဲ့မီးပင်လယ်အဖြစ် ပြောင်းလဲစေကာ၊ ချော်ရည်အခြေအနေသို့ပင် ရောက်ရှိသွားစေသည်။

လူသားတစ်ဦးအပေါ် ကျရောက်သွားပါက သေချာပေါက် အရိုးပင်ကျန်မည် မဟုတ်ပေ။

ကံမကောင်းစွာဖြင့် ရွှမ်ယင်လေးလံရေ၏ စွမ်းအားရှေ့တွင်မူ အသုံးမဝင်ခဲ့ပေ။

ကောင်းကင်ထက်မှ ထောင်ပေါင်းသောင်းချီသော ရွှမ်ယင်လေးလံရေများ ကျဆင်းလာပြီး ဥက္ကာခဲများ ကျဆင်းလာသကဲ့သို့ ထိုအနက်ရောင်မီးကျီးကန်းများကို ပြင်းထန်စွာ ရိုက်ချလိုက်ရာ၊ ချက်ချင်းပင် ထိုမီးတောက်များကို ငြိမ်းသတ်ပစ်လိုက်သည်။

တစ်ချိန်တည်းမှာပင် ဘိုးဘေးမင်ယန်သည် မကာကွယ်နိုင်လိုက်ဘဲ တစ်ကိုယ်လုံး ရွှမ်ယင်လေးလံရေဆယ်စက်ကျော်၏ ရိုက်ခတ်မှုကို ခံလိုက်ရပြီး၊ တောင်ဆယ်လုံးကျော် ဝင်တိုက်သကဲ့သို့ ဖြစ်သွားကာ တစ်ကိုယ်လုံး လွင့်စင်ထွက်သွားပြီး ပင်လယ်ပြင်ပေါ်သို့ ပြင်းထန်စွာ ပစ်ကျသွားကာ ရေပွက်အများအပြား လွင့်စဉ်သွားစေသည်။

သူ သွေးတစ်လုပ် အန်ထုတ်လိုက်မိပြီး၊ ကိုယ်တွင်းကလီစာများ ပြင်းထန်စွာ ဒဏ်ရာရသွားခဲ့သည်။

ပို၍ ကြောက်မက်ဖွယ်ကောင်းသည်မှာ ရွှမ်ယင်ချီစွမ်းအင်များ သူ၏ ခန္ဓာကိုယ်ထဲသို့ ဝင်ရောက်လာပြီး များပြားလှသော အရှိန်အဝါဖြင့် သူ၏ ခန္ဓာကိုယ်ကို အေခဲသွားစေသည်။

ပင်လယ်ပြင်ပေါ်တွင်လည်း ရေခဲစွမ်းအားများ ဝင်ရောက်လာပြီး ထူထဲသော ရေခဲပြင်ကြီး ဖြစ်ပေါ်လာတော့သည်။

"ပြေးရမယ်..."

ဘိုးဘေးကျီယင်း ကြောက်လန့်တကြား ဖြစ်သွားပြီး ဤအစီအရင်စွမ်းအား၏ ကြောက်မက်ဖွယ်ကောင်းမှုကို ခံစားလိုက်ရကာ၊ ဤနေရာတွင် တစ်ဖက်လူနှင့် တိုက်ခိုက်ခြင်းသည် အနိုင်ရရန် အခွင့်အရေး လုံးဝမရှိကြောင်း သိလိုက်သဖြင့်၊ သူ၏ အထွတ်အထိပ် လွတ်မြောက်ခြင်းပညာရပ်ဖြစ်သော အတုမဲ့အရိပ်လွတ်မြောက်ခြင်းကို ချက်ချင်း အသုံးပြုလိုက်သည်။

ရုတ်တရက် သူတစ်ကိုယ်လုံး အနက်ရောင် အလင်းတန်းတစ်ခုအဖြစ် ပြောင်းလဲသွားပြီး ဟင်းလင်းပြင်နှင့် ပေါင်းစပ်သွားကာ အစီအရင်အပြင်ဘက်သို့ ပျံသန်းသွားပြီး၊ ဤအစီအရင် အတားအဆီးမှ ဖောက်ထွက်၍ အသက်ဘေးမှ လွတ်မြောက်ရန် ကြိုးစားလိုက်သည်။

ဘုန်း...

ကံမကောင်းစွာဖြင့် သူ ထွက်ပြေးလုနီးပါး ဖြစ်နေချိန်တွင် နှစ်ထပ်အတားအဆီး ပေါ်လာပြီး ထူထဲသော နံရံကြီးတစ်ခု ဖြစ်ပေါ်လာကာ ဟင်းလင်းပြင်ကို ဖြတ်တောက်လိုက်ပြီး ဘိုးဘေးကျီယင်းကို ချက်ချင်း တားဆီးလိုက်လေသည်။

သူသည် အတားအဆီးကို ပြင်းထန်စွာ ဝင်တိုက်မိပြီး ဒဏ်ရာများစွာရသွားလေသည်။

"သေစမ်း... ဒါက စတုတ္ထအဆင့် အစီအရင်ရဲ့ ဟင်းလင်းပြင်ပိတ်ဆို့ခြင်းစွမ်းအားပဲ..."

"ကောင်လေး...မင်း တကယ်ပဲ ငါတို့ကို အပြတ်ရှင်းချင်နေတာလား..."

"ငါက ရွှမ်ယင်ဂိုဏ်းရဲ့ အကြီးအကဲတစ်ယောက်ကွ... မင်း ငါ့ကို သတ်လိုက်ရင် ရွှမ်ယင်ဂိုဏ်းနဲ့ ရန်သူ ဖြစ်သွားမှာနော်..."

"ဒီအကျိုးဆက်ကို မင်း တွေးကြည့်ပြီးပြီလား..."

ဘိုးဘေးကျီယင်းသည် အတွင်းစိတ်၌ ကြောက်ရွံ့နေသော်လည်း အပြင်ပန်းတွင် မာထန်သော အမူအရာဖြင့် ကျိုးစွေ့ကို ကြည့်ကာ ခြိမ်းခြောက်ရန် ကြိုးစားလိုက်လေ၏။