ဝိညာဉ်သန္ဓေသား မိစ္ဆာကျင့်ကြံသူ၏ သိုလှောင်အိတ်၊ နှစ်တစ်ထောင်ဝိညာဉ်ဆေးမြစ် 'ဝိညာဉ်ဆေးကြောပန်း'(၁)။

ဘိုးဘေးမဟူရာလ၊ ဘိုးဘေးကျီယင်းနှင့် ဘိုးဘေးမင်ယန်တို့ သေဆုံးသွားသည်နှင့်အမျှ သူတို့၏ အသက်ဝိညာဉ်ကမ္ဗည်းပြားများမှာ ချက်ချင်းပင် အက်ကွဲသွားလေသည်။ ယင်းသည် ကောင်းကင်မိစ္ဆာဂိုဏ်း၊ ဟေးရှားနန်းတော်နှင့် ရွှမ်ယင်ဂိုဏ်းဟူသော မိစ္ဆာဂိုဏ်းကြီးသုံးခုစလုံးတွင် ကြီးမားသော တုန်လှုပ်မှုများ ဖြစ်ပေါ်စေခဲ့၏။

မည်သို့ပင်ဆိုစေကာမူ သူတို့အားလုံးသည် ဝိညာဉ်သန္ဓေသား နှောင်းပိုင်းအဆင့် ကျင့်ကြံသူကြီးများ ဖြစ်ကြပေသည်။ မိစ္ဆာဂိုဏ်းများတွင်ပင် လက်ချိုးရေ၍ရနိုင်သော အားကောင်းသည့် ပုဂ္ဂိုလ်များ ဖြစ်ကြရာ၊ ယခု သူတို့ ကျဆုံးသွားခြင်းမှာ မိစ္ဆာဂိုဏ်းကြီးသုံးခုအတွက် မှန်းဆ၍မရနိုင်လောက်အောင် ကြီးမားသော ဆုံးရှုံးမှုပင် ဖြစ်ချေတော့သည်။

"ဘာဖြစ်သွားတာလဲ... ဘာလို့ ဘိုးဘေးမဟူရာလ၊ ဘိုးဘေးကျီယင်းနဲ့ ဘိုးဘေးမင်ယန်တို့က ပြိုင်တူ သေသွားရတာလဲ... သူတို့က နတ်ဘုရားအသွင်ပြောင်းအဆင့် အပျက်အစီးတွေထဲမှာ သေသွားကြတာလား..."

ဝိညာဉ်သန္ဓေသားအဆင့် မိစ္ဆာကျင့်ကြံသူတစ်ဦးသည် ဂိုဏ်းမှ သတင်းစကားကို လက်ခံရရှိပြီးနောက် မျက်နှာပျက်သွားလေသည်။

သူ့အနေဖြင့် ယုံကြည်ရန် ခက်ခဲနေမိ၏။ အဘယ်ကြောင့်ဆိုသော် ဘိုးဘေးမဟူရာလနှင့် အခြားသူများ မည်မျှစွမ်းအားကြီးကြောင်း သူသိထားသောကြောင့် ဖြစ်သည်။

သူတို့ကဲ့သို့သော လူမျိုးများက ဤမျှ လွယ်ကူစွာ မည်သို့ ကျဆုံးနိုင်ပါမည်နည်း။ သို့သော်လည်း လက်ရှိအချိန်တွင် ၎င်းတို့၏ကျဆုံးမှုမှာ လူတိုင်း မျှော်လင့်ထားသည်နှင့် လွဲချော်ခဲ့ရလေသည်။

"မဟုတ်ဘူး... သူတို့က နတ်ဘုရားအသွင်ပြောင်းအဆင့် အပျက်အစီးတွေထဲမှာ သေတာ မဟုတ်ဘူး... ကြားရသလောက်တော့ သူတို့က သခင်မမက်မွန်ပွင့်ကို လိုက်လံသတ်ဖြတ်ပြီး... သခင်မမက်မွန်ပွင့် ရရှိထားတဲ့ ရတနာတွေကို လုယူဖို့ ကြိုးစားခဲ့ကြတာတဲ့... ငါကတော့ ဘိုးဘေးမဟူရာလတို့ အောင်မြင်သွားမယ်လို့ ထင်ခဲ့တာ... သူတို့ သေဆုံးသွားတဲ့သတင်း ရောက်လာမယ်လို့ လုံးဝ မထင်ထားခဲ့ဘူး... ဖြစ်နိုင်ခြေများတာကတော့ သူတို့ သခင်မမက်မွန်ပွင့်ရဲ့ လက်ချက်နဲ့ သေဆုံးသွားတာ ဖြစ်မယ်..."

ဝိညာဉ်သန္ဓေသားအဆင့် မိစ္ဆာကျင့်ကြံသူတစ်ဦးက တိုးညှင်းစွာဖြင့် သူသိရှိထားသော သတင်းအချက်အလက်များကို ထုတ်ဖော်ပြောကြားလိုက်သည်။

"ဘာ..."

ဤစကားကို ကြားသောအခါ မိစ္ဆာကျင့်ကြံသူ အများအပြား မျက်နှာပျက်သွားကြသည်။ ဤကဲ့သို့သော အဖြစ်အပျက်မျိုး ဖြစ်လာလိမ့်မည်ဟု သူတို့ လုံးဝ မမျှော်လင့်ထားခဲ့ကြပေ။

"နောက်နေတာလားကွာ... သခင်မမက်မွန်ပွင့်က စွမ်းအားကြီးတာ မှန်ပေမယ့်... သူက ဝိညာဉ်သန္ဓေသား နှောင်းပိုင်းအဆင့်ကို အခုလေးတင်မှ ရောက်ထားတာလေ... အင်အားချင်းယှဉ်ရင် ဘိုးဘေးမဟူရာလတို့ကို ဘယ်လိုလုပ် ယှဉ်နိုင်မှာလဲ..."

"ဟုတ်ပါ့... ခုနကပဲ သခင်မမက်မွန်ပွင့်က ဘိုးဘေးမဟူရာလတို့ရဲ့ လိုက်လံတိုက်ခိုက်မှုကို ခံနေရပြီး ထွက်ပြေးနေရတာလေ... ဘယ်လိုလုပ် မျက်စိတစ်မှိတ်အတွင်းမှာ ဘိုးဘေးမဟူရာလကို ပြန်သတ်လိုက်နိုင်မှာလဲ... ဒါ လုံးဝ မဖြစ်နိုင်ဘူး..."

"ဒါက မတော်တဆမှု တစ်ခုခုဖြစ်လို့သာ ဘိုးဘေးမဟူရာလတို့ သေဆုံးသွားတာ နေမှာပါ..."

ဝိညာဉ်သန္ဓေသားအဆင့် မိစ္ဆာကျင့်ကြံသူ အများစုမှာ သခင်မမက်မွန်ပွင့်၏ အင်အားဖြင့် ဘိုးဘေးမဟူရာလနှင့် အခြားသူများကို ပြန်လည်သတ်ဖြတ်ရန် မဖြစ်နိုင်ဟု ယူဆကြသည်။ ဤသည်မှာ အားလုံး အမြင်ရှင်းနေသော အချက်လည်း ဖြစ်၏။

"ကြားရတာတော့ သခင်မမက်မွန်ပွင့်က တိုက်ရင်း ဆုတ်ရင်းနဲ့... ကြယ်သုံးပွင့်ကျွန်းစုဆီ ထွက်ပြေးသွားတယ်တဲ့... အဲ့ဒီ ကြယ်သုံးပွင့်ကျွန်းစုမှာ စတုတ္ထအဆင့် အစီအရင်တစ်ခု တပ်ဆင်ထားတယ်လေ... သခင်မမက်မွန်ပွင့်က အဲ့ဒီ စတုတ္ထအဆင့် အစီအရင်ကို အသုံးပြုပြီး ဘိုးဘေးမဟူရာလတို့ကို ပြန်သတ်လိုက်တာ ဖြစ်နိုင်တယ်..."

အခြား ဝိညာဉ်သန္ဓေသားအဆင့် ကျင့်ကြံသူတစ်ဦးက နောက်ထပ် သတင်းအချက်အလက်တစ်ခုကို ပြောပြလိုက်သည်။

"မဟုတ်မှလွဲရော... သခင်မမက်မွန်ပွင့်က ဝက်ယောင်ဆောင်ပြီး ကျားကို စားလိုက်တာလား... သူက စတုတ္ထအဆင့် အစီအရင်ပညာရှင် တစ်ယောက်များလား... သေချာပေါက် အဲ့ဒီလိုပဲ ဖြစ်ရမယ်... အဲ့လိုမဟုတ်ရင် သခင်မမက်မွန်ပွင့်က စတုတ္ထအဆင့် အစီအရင်ကို ဘယ်လို သုံးနိုင်မှာလဲ... ဝိညာဉ်သန္ဓေသား နှောင်းပိုင်းအဆင့် ကျင့်ကြံသူ သုံးယောက်စလုံးကို လုပ်ကြံလိုက်တာ... တကယ့်ကို ကောက်ကျစ်စဉ်းလဲတဲ့ မိန်းမပဲ..."

"ပြီးခဲ့တဲ့အကြိမ် ဧရာမသမင်ကျွန်းကို ပင်လယ်မျိုးနွယ်စုနဲ့ ဟေးရှားနန်းတော်တို့ ပူးပေါင်းတိုက်ခိုက်တုန်းကလည်း... သခင်မမက်မွန်ပွင့်ကပဲ အခြေအနေကို ပြောင်းလဲပစ်ခဲ့တာလေ... သူတစ်ယောက်တည်းနဲ့ ဝိညာဉ်သန္ဓေသား ခုနစ်ယောက်ကို သတ်ဖြတ်ပြီး... ဝူကျိမဟာမိတ်အဖွဲ့ရဲ့ ရှုံးနိမ့်မှုကို ကယ်တင်နိုင်ခဲ့တာ..."

"ကြည့်ရတာ လူတိုင်းက ဒီမိန်းမကို လျှော့တွက်ခဲ့မိကြပုံပဲ... အနာဂတ်မှာ သူက ချန်လန်ပင်လယ်ရဲ့ နံပါတ်တစ်ကျင့်ကြံသူ ဖြစ်လာနိုင်တယ်..."

"ဝူကျိတာအိုအရှင်ရဲ့ သမီးတော်ပီသပါပေတယ်... ကျားအဖေက ခွေးမမွေးဘူးဆိုတာ ဒါမျိုးပဲ..."

"အခု ငါတို့ ဘာလုပ်ကြမလဲ... ဘိုးဘေးမဟူရာလတို့အတွက် လက်စားချေကြမလား..."

"လက်စားချေမယ် ဟုတ်လား... ခင်ဗျား ရူးနေတာလား... ဂိုဏ်းချုပ်ကြီးတွေတောင် ပဉ္စမအဆင့် အစီအရင်ထဲမှာ ပိတ်မိနေတာ မမြင်ဘူးလား... ဂိုဏ်းချုပ်ကြီးတွေ ဝင်မပါဘဲ ငါတို့ ဘယ်လို လက်စားချေနိုင်မှာလဲ... ကြယ်သုံးပွင့်ကျွန်းစုထဲ ဝင်ပြီး သခင်မမက်မွန်ပွင့်ဆီ အသေခံမလို့လား..."

"ငါတို့က မိစ္ဆာကျင့်ကြံသူတွေလေ... အငြိုးအတေးရှိရင် လက်စားချေတတ်ကြပေမယ့်... အခြေအနေကိုလည်း သုံးသပ်တတ်ရတယ်... အရမ်း အင်အားကြီးတဲ့ ရန်သူနဲ့ တွေ့ရင် ခေါင်းမာမနေသင့်ဘူး... ဘာလို့ ကိုယ့်သေတွင်း ကိုယ်တူးရမှာလဲ..."

"ဟုတ်တယ်... ဟုတ်တယ်... ဘိုးဘေးမဟူရာလတို့ သေဆုံးသွားတာ နှမြောစရာ ကောင်းပေမယ့်... ဒါက မတတ်နိုင်တဲ့ ကိစ္စပဲ... ဂိုဏ်းချုပ်ကြီးတွေ ပြန်ထွက်လာမှ ဆုံးဖြတ်ချက်ချတာ ပိုကောင်းလိမ့်မယ်..."

"အဲ့ဒီမိန်းမက ဝိညာဉ်သန္ဓေသား နှောင်းပိုင်းအဆင့် ကျင့်ကြံသူကြီးလေ... စတုတ္ထအဆင့် အစီအရင်ရဲ့ စွမ်းအားပါ ပေါင်းစပ်လိုက်ရင် ဘယ်သူက သူ့ပြိုင်ဘက် ဖြစ်လာမှာလဲ... ငါတို့ သွားပြီး အသေမခံသင့်ဘူး... လုံးဝ မလိုအပ်ဘူး..."

ဝိညာဉ်သန္ဓေသားအဆင့် မိစ္ဆာကျင့်ကြံသူများသည် အချင်းချင်း ဆွေးနွေးငြင်းခုံနေကြသည်။

သူတို့သည် ဘိုးဘေးမဟူရာလနှင့် အခြားသူများ သေဆုံးသွားခြင်းအတွက် ဝမ်းနည်းနေကြသော်လည်း၊ အခြေအနေကို သုံးသပ်ကြည့်ပြီးနောက် လက်စားချေခြင်းသည် မဖြစ်နိုင်ကြောင်း ခံစားလိုက်ကြရ၏။ အဘယ်ကြောင့်ဆိုသော် သူတို့သည် သခင်မမက်မွန်ပွင့်၏ပြိုင်ဘက် လုံးဝ မဟုတ်ကြသောကြောင့် ဖြစ်သည်။

သခင်မမက်မွန်ပွင့်၏ တိုက်ခိုက်ရေးစွမ်းရည်မှာ အလွန် ကြောက်မက်ဖွယ် ကောင်းလွန်းလှသဖြင့်၊ သူတို့၏ စိတ်ထဲတွင် သူမ၏ ပုံရိပ်သည် အတိုင်းအဆမရှိ မြင့်မားသွားခဲ့သည်။

ဤသည်မှာ သာမန် ဝိညာဉ်သန္ဓေသား အမျိုးသမီးကျင့်ကြံသူတစ်ဦး မဟုတ်တော့ပေ။ သူမသည် ကောင်းကင်မိစ္ဆာဂိုဏ်း၏ ဂိုဏ်းချုပ်ချန်ဇီယွင်၊ မြူနှင်းနန်းတော်၏ နန်းတော်သခင် ယဲ့ဖေးရိုတို့နှင့် ယှဉ်နိုင်သော ထိပ်တန်း အမျိုးသမီးကျင့်ကြံသူ သုံးဦးထဲမှ တစ်ဦးဖြစ်လာခဲ့ပြီ ဖြစ်သည်။

သူတို့သည် မိစ္ဆာကျင့်ကြံသူများ ဖြစ်ကြသော်လည်း အရူးများ မဟုတ်ကြချေ။ နိုင်ခြေမရှိသော ပြိုင်ဘက်နှင့် ရင်ဆိုင်ရသောအခါ လိပ်ခေါင်းလျှိုသကဲ့သို့ ပုန်းအောင်းနေပြီး ဘာမှမဖြစ်ခဲ့သလို နေလိုက်ခြင်းက အကောင်းဆုံးပင် ဖြစ်ပေသည်။

…

ဤသတင်းသည် မိစ္ဆာဂိုဏ်းများတွင်သာ ပျံ့နှံ့သွားသည် မဟုတ်ဘဲ၊ ဝူကျိမဟာမိတ်အဖွဲ့၊ ကောင်းကင်ဓားဂိုဏ်း၊ မြူနှင်းနန်းတော်၊ ဆည်းဆာဂိုဏ်းနှင့် ရွှမ်ပေါင်မျှော်စင် စသည့် ဖြောင့်မတ်လမ်းစဉ် အင်အားစုများလည်း သိရှိသွားကြသည်။ မည်သို့ပင်ဖြစ်စေ ဝိညာဉ်သန္ဓေသား နှောင်းပိုင်းအဆင့် ကျင့်ကြံသူသုံးဦး သေဆုံးခြင်းမှာ မည်သည့်နေရာတွင်မဆို ကြီးမားသော ဂယက်ရိုက်ခတ်မှုကို ဖြစ်ပေါ်စေသည်။

"ကြားပြီးပြီလား... သခင်မမက်မွန်ပွင့်က လှုပ်ရှားလိုက်ပြီး... ဘိုးဘေးမဟူရာလ၊ ဘိုးဘေးကျီယင်းနဲ့ ဘိုးဘေးမင်ယန်တို့လို ဝိညာဉ်သန္ဓေသား နှောင်းပိုင်းအဆင့် မိစ္ဆာကျင့်ကြံသူ သုံးယောက်ကို ခြုံခိုတိုက်ခိုက်လိုက်တာလေ... သူတို့ ခေါင်းတွေကို ဖြတ်ပစ်လိုက်တာတဲ့... တော်တော် ကြမ်းတာပဲ..."

ကျင့်ကြံသူတစ်ဦးက လျှို့ဝှက်သတင်းကို ဖြန့်ဝေလိုက်သည်။

"ကြားပြီးပြီ... ပြောကြတာတော့ သခင်မမက်မွန်ပွင့်က မနိုင်ချင်ယောင်ဆောင်ပြီး... ဘိုးဘေးမဟူရာလ၊ ဘိုးဘေးကျီယင်းနဲ့ ဘိုးဘေးမင်ယန်တို့ သုံးယောက်ကို ကြယ်သုံးပွင့်ကျွန်းစုက စတုတ္ထအဆင့် အစီအရင်ထဲ ရောက်လာအောင် တမင် မျှားခေါ်ခဲ့တာတဲ့... ပြီးမှ အစီအရင်ရဲ့ စွမ်းအားကို သုံးပြီး မိစ္ဆာကျင့်ကြံသူ သုံးယောက်ကို လုပ်ကြံလိုက်တာ... သူတို့ကို ပြေးစရာမြေမရှိအောင် လုပ်ပစ်လိုက်တာ... တကယ်ကို အစွမ်းထက်လွန်းတယ်..."

"ငါတို့ ဝူကျိမဟာမိတ်အဖွဲ့ရဲ့ အနာဂတ်မဟာမိတ်အဓိပတိ ဖြစ်လာမယ့်သူလို့ ပြောရလောက်အောင်... တကယ်ကို ပြိုင်ဘက်ကင်း အားကောင်းတာပဲ..."

"လက်ရှိ မဟာမိတ်အဓိပတိနေရာကို ဆက်ခံပြီး မဟာမိတ်အဓိပတိသစ် ဖြစ်လာနိုင်တယ်လို့တောင် ငါ ထင်တယ်..."

ဝူကျိမဟာမိတ်အဖွဲ့မှ ကျင့်ကြံသူများသည် ဤကိစ္စကို ကြာမြင့်စွာကတည်းက ကြားသိခဲ့ရပြီး၊ မတူညီသောဇာတ်လမ်းပေါင်း (၁၈) မျိုးခန့်ပင် ပြောင်းလဲပျံ့နှံ့နေပြီဟု ဆိုကြသည်။

သူတို့ အလွန် ဂုဏ်ယူနေကြ၏။ မည်သို့ပင်ဖြစ်စေ ဤသူသည် ဝူကျိမဟာမိတ်အဖွဲ့၏ နောက်ထပ် မဟာမိတ်အဓိပတိ ဖြစ်လာမည့်သူ ဖြစ်ရာ၊ သူမ၏ အင်အားကြီးမားလေ ဝူကျိမဟာမိတ်အဖွဲ့အတွက် အကျိုးရှိလေ ဖြစ်သည်။

"ဘာ... သခင်မမက်မွန်ပွင့်က တစ်ယောက်တည်းနဲ့ သုံးယောက်ကို တိုက်ခိုက်ခဲ့တာလို့ ငါ ကြားတယ်... အကြွင်းမဲ့အင်အားနဲ့ ဘိုးဘေးမဟူရာလတို့ သုံးယောက်ကို ချေမှုန်းပစ်လိုက်တာတဲ့... သူတို့ရဲ့ ဝိညာဉ်သန္ဓေသားတွေတောင် မလွတ်မြောက်နိုင်ဘဲ သေဆုံးသွားကြတာ... နောက်ဆုံးမှ ကြယ်သုံးပွင့်ကျွန်းစုဆီ ဆွဲခေါ်သွားပြီး အလောင်းကောင်တွေကို ရိုက်နှက်ပြတာလို့ ကြားတယ်..."

"ဒါတင် မကသေးဘူး... သခင်မမက်မွန်ပွင့် သတ်လိုက်တာက ဘိုးဘေးမဟူရာလတို့လို ဝိညာဉ်သန္ဓေသား နှောင်းပိုင်းအဆင့် သုံးယောက်တည်း မဟုတ်ဘူး... လာကယ်ဖို့ ကြိုးစားတဲ့ သူတို့ရဲ့ ဝိညာဉ်သန္ဓေသား နောက်လိုက်အများကြီးကိုလည်း သခင်မမက်မွန်ပွင့်က သတ်ပစ်လိုက်တာ... တစ်ဖွဲ့လုံးကို ရှင်းပစ်လိုက်သလိုပဲ... သူ့လက်ချက်နဲ့ သေသွားတဲ့ ဝိညာဉ်သန္ဓေသား မိစ္ဆာကျင့်ကြံသူက အယောက် (၃၀) ကျော်တယ်တဲ့..."

"တချို့ကလည်း သခင်မမက်မွန်ပွင့်ဟာ ကုယုံဂိုဏ်းရဲ့ အထွတ်အထိပ် အမွေအနှစ်ကို ရခဲ့ပြီးတော့... ကျင့်ကြံခြင်းအဆင့် အများကြီး တိုးတက်လာတယ်လို့ ပြောကြတယ်... မကြာခင် နတ်ဘုရားအသွင်ပြောင်းအဆင့်ကို တက်လှမ်းတော့မှာတဲ့... အနာဂတ်မှာ ချန်လန်ပင်လယ်ရဲ့ နံပါတ်တစ်ကျင့်ကြံသူ ဖြစ်လာနိုင်တယ်..."

"အရမ်း ကြမ်းတာပဲ... အရင်တုန်းက သခင်မမက်မွန်ပွင့်က ချန်လန်ပင်လယ်ရဲ့ နံပါတ်တစ်အလှပဂေးလို့ ပြောကြတုန်းကဆို ငါ နည်းနည်း ပိုတယ်လို့ ထင်ခဲ့သေးတာ... အခု ကြည့်ရတာတော့ သံသယဖြစ်စရာ မလိုတော့ဘူး... ဒီလို အလှအပ... ဒီလို အင်အားနဲ့မှ သူက ချန်လန်ပင်လယ်ရဲ့ နံပါတ်တစ်အလှပဂေး မဟုတ်ရင် ဘယ်သူ ဖြစ်မှာလဲ..."

ကျင့်ကြံသူ အများအပြား ဆွေးနွေးငြင်းခုံနေကြသည်။ အတိုချုပ်ပြောရလျှင် သခင်မမက်မွန်ပွင့်အကြောင်း ကောလာဟလများသည် ပိုမို ချဲ့ကားလာကြ၏။

ကျင့်ကြံသူ အမျိုးမျိုး၏ ဖြန့်ဝေမှုမှတစ်ဆင့် ဇာတ်လမ်းကွဲပေါင်း (၁၀၈) မျိုးအထိ ထွက်ပေါ်လာခဲ့တော့သည်။ မည်သို့ပင်ဖြစ်စေ၊ မည်သည့် ဇာတ်လမ်းကွဲဖြစ်ပါစေ သခင်မမက်မွန်ပွင့်၏ စွမ်းအားကြီးမားမှုကို ပုံဖော်နေကြခြင်းသာ ဖြစ်ပေသည်။ ဤအချက်က သခင်မမက်မွန်ပွင့်၏ ကျော်ကြားမှုကို ပိုမို မြင့်တက်လာစေပြီး နေရာအနှံ့ ကျော်ကြားသွားစေလေသည်။