အခွင့်အရေးလော၊ ကပ်ဘေးလော(၁)။

"ဒီလိုဆိုရင် ဒီအမျိုးသားက တကယ် နှိုင်းယှဉ်စရာမရှိလောက်အောင် ပါရမီထူးချွန်ပြီး ထိပ်တန်းအဆင့်ပဲ…"

သခင်မမက်မွန်ပွင့်၏ နှလုံးသား လှုပ်ရှားသွားလေသည်။

သူမအနေဖြင့် တက်ကြွစွာ စတင်လှုပ်ရှားသင့်သည်ဟု ခံစားမိသည်။ အကယ်၍ သူမသာ မလှုပ်ရှားပါက၊ သူမ သဘောကျနေသော အရာကို အခြားသော မြေခွေးမများက လုယူသွားမည်ကို စိုးရိမ်မိပြီး၊ သူမအလှည့် ရောက်လာတော့မည် မဟုတ်ပေ။

ကျင့်ကြံခြင်းလောက ဆိုသည်မှာ ဤအတိုင်းပင် မဟုတ်လော။ အရာအားလုံးက ယှဉ်ပြိုင်လုယူမှုအပေါ်တွင် မူတည်နေသည်။

နှစ်တစ်ထောင်ဝိညာဉ်ဆေးမြစ်၊ စတုတ္ထအဆင့် ရတနာဆေးလုံး၊ ထိပ်တန်းအဆင့် ဝိညာဉ်ရတနာ၊ နတ်ဘုရားအသွင်ပြောင်းအဆင့် ကျင့်ကြံခြင်းပညာရပ် စသည်တို့ အားလုံးသည် ထိုနည်းလည်းကောင်းပင်။

ကိုယ်တိုင် ဝင်မလုလျှင် မည်သည့်အရာကိုမျှ ရရှိမည် မဟုတ်ပေ။ ဤကမ္ဘာလောကတွင် ကောင်းကင်မှ မုန့်ကျလာသည့် ကိစ္စရပ်မျိုး မရှိချေ။

အမျိုးသားကောင်း တစ်ယောက်ကို ကိုယ်တိုင်ဝင်မလုလျှင် အခြား မိန်းမဆိုးများက လုယူသွားကြပေလိမ့်မည်။

မိန်းမကောင်းဟူသည် အမျိုးသားများ ချစ်ရေးဆိုမည်ကိုသာ ငြိမ်ငြိမ်လေး ထိုင်စောင့်နေတတ်သည် ဟူသော အတွေးအခေါ်ကား ခေတ်ကုန်သွားပြီဖြစ်၏။

စစ်မှန်သော မိန်းမတစ်ယောက်က တက်ကြွစွာ လက်ဦးမှုယူကာ တိုက်စစ်ဆင်ရပေမည်။

ဒေါက်… ဒေါက်… ဒေါက်…။

ထိုအချိန်တွင် အပြင်ဘက်မှ တံခါးခေါက်သံတစ်ခု ထွက်ပေါ်လာလေသည်။

"ဝင်ခဲ့ပါ…"

သခင်မမက်မွန်ပွင့်၏ စိတ်ထဲတွင် လှုပ်ရှားသွားပြီး အပြင်ဘက်၌ အမျိုးသမီးကျင့်ကြံသူ အနည်းငယ် ရောက်ရှိနေကြောင်း ချက်ချင်း အာရုံခံမိလိုက်သည်။

၎င်းတို့သည် ကျိုးစွေ့၏ ဘေးနားရှိ တာအိုလက်တွဲဖော်များ ဖြစ်ရမည်ဟု သူမ ချက်ချင်း သိလိုက်၏။ သူမနှင့် လာရောက်တွေ့ဆုံချင်ကြပုံ ရသည်။

ကလစ်ခနဲ အသံနှင့်အတူ အခန်းတံခါးပွင့်သွားပြီး၊ ပြိုင်ဘက်ကင်း အလှပဂေးအချို့ မြင်ကွင်းထဲသို့ ဝင်ရောက်လာကြသည်။

၎င်းတို့မှာ လင်းယာကျူ၊ ချူတျဲယီနှင့် အခြားသူများ ဖြစ်ကြသည်။

သူတို့သည်လည်း သခင်မမက်မွန်ပွင့်၏ သတင်းကို ကြားသိထားသဖြင့် အထူးတလည် လာရောက်လည်ပတ်ကြခြင်း ဖြစ်သည်။

မည်သို့ပင်ဆိုစေ တစ်ဖက်လူသည် ဝိညာဉ်သန္ဓေသား နှောင်းပိုင်းအဆင့် မဟာကျင့်ကြံသူတစ်ဦး ဖြစ်သည်။

ဤကဲ့သို့သော ပုဂ္ဂိုလ်မျိုးသည် ချန်လန်ပင်လယ်ဒေသတစ်ခုလုံးကို ကြည့်လျှင်ပင် တွေ့ရခဲလှသည်။

"တာအိုရောင်းရင်း မက်မွန်ပွင့်…"

"အခုလို လာရောက်ရတာက တကယ်တော့ မေးစရာကိစ္စလေး ရှိလို့ပါ…"

ချူတျဲယီက အနည်းငယ် ပြုံးလိုက်သည်။ သူမသည် စကားဝေ့မနေဘဲ တည့်တိုးပင် မေးမြန်းလိုက်သည်။

"ဩော်... ဘယ်လို အရေးကြီးကိစ္စများ ရှိလို့လဲ…"

သခင်မမက်မွန်ပွင့်က စူးစမ်းလိုစိတ်ဖြင့် မေးလိုက်သည်။

"ကျွန်မဆရာ ကောင်းကင်မိစ္ဆာဂိုဏ်း ဂိုဏ်းချုပ်နဲ့ တခြားသူတွေ ကုယုံဂိုဏ်းရဲ့ အစီအရင်ထဲမှာ ယာယီ ပိတ်မိနေတယ်လို့ ယောက်ျားပြောတာ ကြားလို့ပါ… အဲ့ဒါ ဟုတ်ပါသလား…"

ချူတျဲယီ မေးလိုက်သည်။

"မှန်ပါတယ်... တကယ်ပဲ အဲ့ဒီလို ဖြစ်နေတာပါ…"

"ဒါပေမဲ့ တကယ်တမ်းတော့ နင် စိတ်ပူစရာ မလိုပါဘူး…"

"ငါ့အဖေ ဝူကျိတာအိုအရှင်ရော၊ နင့်ဆရာ ကောင်းကင်မိစ္ဆာဂိုဏ်း ဂိုဏ်းချုပ်ရော နှစ်ယောက်လုံးက ဝိညာဉ်သန္ဓေသား နှောင်းပိုင်းအဆင့် မဟာကျင့်ကြံသူတွေပါ…"

"ဒါ့အပြင် တခြားသော ဝိညာဉ်သန္ဓေသား နှောင်းပိုင်းအဆင့် မဟာကျင့်ကြံသူတွေလည်း ရှိနေသေးတယ်… ချန်လန်ပင်လယ်ရဲ့ အားအကောင်းဆုံးသူတွေ စုဝေးနေကြတာ…"

"ကုယုံဂိုဏ်း ပင်မနယ်မြေက တားမြစ်အစီအရင်တွေ စွမ်းအားကြီးတယ် ဆိုပေမယ့်…"

"ခဏတဖြုတ်တော့ သူတို့ကို ဘာမှ လုပ်နိုင်မှာ မဟုတ်ဘူး…"

သခင်မမက်မွန်ပွင့်သည် ချူတျဲယီ သိလိုသည်ကို ချက်ချင်း သိရှိပြီး ပွင့်ပွင့်လင်းလင်း ပြောပြလိုက်သည်။

"ဒါဆိုရင် ကောင်းတာပေါ့…"

ထိုစကားကို ကြားသောအခါ ချူတျဲယီလည်း ချက်ချင်း သက်ပြင်းချလိုက်နိုင်တော့သည်။

မည်သို့ပင်ဆိုစေ သူမ၏ဆရာ ချန်ဇီယွင်သည် သူမအပေါ် အမြဲကောင်းမွန်ခဲ့ပြီး ဆရာတစ်ဦး၊ မိခင်တစ်ဦးကဲ့သို့ ဖြစ်သည်။ သူမ၏ ဆရာ တစ်စုံတစ်ရာ ဖြစ်သွားမည်ကို သူမ မမြင်လိုပေ။

"မင်းတို့ ဝိညာဉ်သန္ဓေသားအဆင့်ကို အခုမှ တက်လှမ်းထားတာ ဆိုတော့… ငါတို့ ကျင့်ကြံခြင်းအကြောင်း ဆွေးနွေးကြရင် မကောင်းဘူးလား…"

သခင်မမက်မွန်ပွင့်က မျက်လုံးကစားလိုက်ပြီး အနည်းငယ်ပြုံးကာ သူမ၏ အကြံပြုချက်ကို ထုတ်ဖော်ပြောလိုက်သည်။

ထင်ရှားသည်မှာ သူမသည် သူမ၏ စေတနာကို တက်ကြွစွာ ထုတ်ဖော်ပြသလိုက်ခြင်း ဖြစ်သည်။

အကယ်၍ သူမသည် အနာဂတ်တွင် ထိုအမျိုးသားနှင့် ပေါင်းဖက်ဖြစ်ခဲ့လျှင်၊ ဤအမျိုးသမီးကျင့်ကြံသူများသည် သူမ၏ ညီအစ်မများ ဖြစ်လာကြပေလိမ့်မည်။

ထို့ကြောင့် ကြိုတင်ပြီး ဆက်ဆံရေးကောင်းမွန်အောင် တည်ဆောက်ထားခြင်းက ပိုမကောင်းပေဘူးလော။

"ဒါဆိုရင်တော့ ငြင်းပယ်လို့ ဘယ်ဖြစ်ပါ့မလဲ…"

လင်းယာကျူနှင့် ချူတျဲယီတို့ နှစ်ဦး ချက်ချင်းပင် မျက်လုံးများ တောက်ပသွားပြီး အလွန် စိတ်လှုပ်ရှားသွားကြသည်။

မည်သို့ပင်ဆိုစေ သူတို့သည် ဝိညာဉ်သန္ဓေသားနယ်ပယ်သို့ ဝင်ရောက်စကျင့်ကြံသူများ ဖြစ်ကြပြီး၊ ရှေ့ဆက်ရမည့် ကျင့်ကြံခြင်းလမ်းခရီးနှင့် ပတ်သက်၍ ဝေဝါးနေကြဆဲ ဖြစ်သည်။

သခင်မမက်မွန်ပွင့်မှာမူ ဝိညာဉ်သန္ဓေသား နှောင်းပိုင်းအဆင့် မဟာကျင့်ကြံသူ ဖြစ်နေပြီ ဖြစ်သည်။

ထိုကဲ့သို့သော စီနီယာတစ်ဦးက လမ်းညွှန်ပြသပေးလိုသည်မှာ သူတို့အတွက် တောင်းဆို၍ပင် မရနိုင်သော အခွင့်အရေး ဖြစ်သည်။

ကျိပင်းယွီနှင့် အခြားသူများလည်း ဝမ်းသာနေကြသည်။ ဤကဲ့သို့သော ဝိညာဉ်သန္ဓေသား ကျင့်ကြံသူများ၏ ကျင့်ကြံခြင်းဆွေးနွေးပွဲကို နားထောင်ရခြင်းသည် အခြေတည်အဆင့်သာ ရှိသေးသော သူတို့အတွက် အပြည့်အဝနားမလည်နိုင်လျှင်တောင်မှ အကျိုးကျေးဇူးများစွာ ရရှိစေမည် ဖြစ်သည်။

အကယ်၍ သူတို့ အင်မော်တယ်ရှားကျွန်းတွင် ဆက်နေခဲ့ပြီး သာမန် အခြေတည်အဆင့် ကျင့်ကြံသူများသာ ဖြစ်နေခဲ့လျှင်၊ ဤကဲ့သို့သော စီနီယာမျိုးနှင့် ထိတွေ့ခွင့် မည်သည့်နေရာတွင် ရရှိနိုင်ပါမည်နည်း။

ရွှေအမြုတေ ဆရာသခင်နှင့်ပင် ထိတွေ့ခွင့် များများစားစား ရရှိချင်မှ ရရှိနိုင်ပေလိမ့်မည်။

……

အခြားတစ်ဖက်တွင်၊ ကျိုးစွေ့သည် သူ၏ တာအိုလက်တွဲဖော်များ ရင်းနှီးကျွမ်းဝင်လာကြပြီး ကျင့်ကြံခြင်းဆွေးနွေးပွဲပင် စတင်နေကြသည်ကို မသိရှိပေ။

ယခင်က တာအိုလက်တွဲဖော်များနှင့် တူနှစ်ကိုယ်ကျင့်ကြံပြီးနောက် သူသည် အားအင်ပြည့်ဖြိုးပြီး စိတ်ဓာတ် တက်ကြွနေသည်။

ဤအချိန်တွင် သူသည် သူ၏ နတ်ဘုရားအာရုံကို 'အစီအရင်နှလုံးသားကူ'ထဲသို့ နှစ်မြှုပ်လိုက်သည်။

အဘယ်ကြောင့်ဆိုသော် 'အစီအရင်နှလုံးသားကူ'သည် နှစ်ပေါင်းများစွာ တိုက်စားပြီးနောက် ကုယုံဂိုဏ်း အပျက်အစီး၏ အူတိုင်အစိတ်အပိုင်းကို နောက်ဆုံးတွင် ထိန်းချုပ်နိုင်ခဲ့ပြီး၊ ကုယုံဂိုဏ်း၏ ပဉ္စမအဆင့် အစီအရင်စွမ်းအား တစ်စိတ်တစ်ပိုင်းကို စတင်ထိန်းချုပ်နိုင်ပြီ ဖြစ်ကြောင်း သူ အာရုံခံမိလိုက်သောကြောင့် ဖြစ်သည်။

ဘုန်း…။

ဤအချိန်တွင် သူ၏ နတ်ဘုရားအာရုံသည် 'အစီအရင်နှလုံးသားကူ'ထဲတွင် ပေါ်လာသည်ကို တွေ့လိုက်ရသည်။

သူသည် ဖန်ဆင်းရှင်၏ ရှုထောင့်မှ ကြည့်နေရသကဲ့သို့ ကျွန်းတစ်ကျွန်းလုံးကို ငုံ့ကြည့်နေမိသည်။

ကျွန်း၏ မည်သည့်နေရာကိုမဆို သူ ရှင်းလင်းစွာ အာရုံခံနိုင်ပြီး အသေးစိတ် အချက်အလက်များပါမကျန် သိရှိနေသည်။

"ဒီလိုကိုး…"

"ဒါက ကုယုံဂိုဏ်းရဲ့ ပဉ္စမအဆင့် ထိပ်တန်းအစီအရင်ကြီး လေးပါးသင်္ကေတ ကုယုံအစီအရင်ပဲ…"

"ပြီးတော့ ဒီအစီအရင်ကြီးက ကုယုံဂိုဏ်းရဲ့ အသန်မာဆုံး သတ်ဖြတ်ခြင်းအစီအရင်ပဲ…"

"အစီအရင် စတင်လိုက်တာနဲ့ အစီအရင်ထဲမှာရှိနေတဲ့ သက်ရှိတွေရဲ့ သက်တမ်းက မြန်မြန်ဆန်ဆန် ကုန်ဆုံးသွားလိမ့်မယ်…"

"ကုယုံနတ်ဘုရားအလင်း တစ်ချက်ထိမှန်တာနဲ့ ချက်ချင်း သက်တမ်း နှစ်တစ်ရာ ဆုံးရှုံးသွားမှာ…"

"သက်တမ်း နှစ်သုံးထောင် ပိုင်ဆိုင်တဲ့ နတ်ဘုရားအသွင်ပြောင်းအဆင့် ကျင့်ကြံသူတောင်မှ အချိန်အကြာကြီး ခံနိုင်ရည်ရှိမှာ မဟုတ်ဘူး…"

ကျိုးစွေ့ အံ့သြတကြီး ရေရွတ်လိုက်မိသည်။

အတိတ်ကာလက ကုယုံဂိုဏ်းသည် ဤပဉ္စမအဆင့် ထိပ်တန်းအစီအရင်ကြီးကို အသုံးပြုပြီး၊ ချန်လန်ပင်လယ်ဒေသကို နှစ်သောင်းချီ ဖိနှိပ်အုပ်ချုပ်ကာ ပြိုင်ဘက်ကင်းအုပ်စိုးသူ ဖြစ်လာခဲ့ခြင်း ဖြစ်သည်။

၎င်း၏ ဂုဏ်သတင်းသည် ကျင့်ကြံခြင်းလောကတစ်ခုလုံးသို့ ပျံ့နှံ့ခဲ့သည်။

အခြား တိုက်ကြီးများမှ ကျင့်ကြံသူများပင် ကုယုံဂိုဏ်း၏ အမည်နာမကို ကြားဖူးကြပြီး ကြောက်ရွံ့တုန်လှုပ်ခဲ့ကြရသည်။

နတ်ဘုရားအသွင်ပြောင်းအဆင့် ဂိုဏ်းတိုင်း၏ အခြေခံအုတ်မြစ်သည် စိတ်ကူးယဉ်နိုင်စွမ်းထက် ကျော်လွန်နေချေသည်။

"ပဉ္စမအဆင့် အစီအရင်က ဒီလောက်တောင် နက်ရှိုင်းတာလား…"

ထိုအချိန်တွင် ကျိုးစွေ့သည် 'အစီအရင်နှလုံးသားကူ'ထံမှ အကန့်သတ်မဲ့သော သတင်းအချက်အလက်များကို အာရုံခံမိလိုက်ပြီး ၎င်းတို့သည် စိတ်ကူး၍မရနိုင်လောက်အောင် ရှုပ်ထွေးလှသည်။

ပဉ္စမအဆင့် အစီအရင်၏ ရှုပ်ထွေးမှုသည် စတုတ္ထအဆင့် အစီအရင်ထက် အနည်းဆုံး (၁၀)ဆ ပိုမို ရှုပ်ထွေးသည်။

ရှေးဟောင်းခေတ်က ကျင့်ကြံသူများပင်လျှင် ပဉ္စမအဆင့် အစီအရင်ပညာရှင် ဖြစ်လာနိုင်သူမှာ လက်ချိုးရေ၍ ရနိုင်ပေသည်။

၎င်း၏ ရှုပ်ထွေးမှုသည် သူ့ကို ခေါင်းမူးသွားစေလောက်သည်။

ကံကောင်းထောက်မစွာဖြင့် 'အစီအရင်နှလုံးသားကူ'၏ အကူအညီ ပါဝင်နေသည်။ သို့မဟုတ်ပါက သူ၏ နားလည်သဘောပေါက်နိုင်စွမ်း သက်သက်ဖြင့်ဆိုလျှင် အနည်းဆုံး နှစ်ရာချီ သို့မဟုတ် နှစ်ထောင်ချီကြာမှသာ အနည်းငယ်သာ နားလည်နိုင်ဖွယ် ရှိသည်။

ပဉ္စမအဆင့် အစီအရင်၏ ရှုပ်ထွေးမှုကို ဤအချက်က ပြသနေသည်။

မှန်ပေသည်၊ အောင်မြင်စွာ တတ်မြောက်သွားပါက ပဉ္စမအဆင့်အစီအရင်မှ ပေါက်ကွဲထွက်လာမည့် စွမ်းအားသည်လည်း စိတ်ကူးယဉ်နိုင်စွမ်းထက် ကျော်လွန်ပေလိမ့်မည်။

"နေဦး... ဒီလိုဆိုရင် ဝူကျိတာအိုအရှင်နဲ့ တခြားသူတွေက ဘာလို့ မသေသေးတာလဲ…"

ကျိုးစွေ့၏ စိတ်ထဲတွင် လှုပ်ရှားသွားသည်။

ဝူကျိတာအိုအရှင်၊ ထျန်းဆွမ်းတာအိုအရှင်၊ ချုံးရွှီတာအိုအရှင်၊ ချန်ဇီယွင်၊ ယဲ့ဖေးရို၊ စိတ်ခံစားမှုခုနစ်ပါး မိစ္ဆာဘုရင် အစရှိသော ဝိညာဉ်သန္ဓေသား နှောင်းပိုင်းအဆင့် ကျင့်ကြံသူများသည် ယခုအချိန်တွင် အစီအရင်တစ်ခုထဲ၌ ပိတ်မိနေကြကြောင်း သူ အာရုံခံမိလိုက်သည်။

ဤသည်မှာ ပဉ္စမအဆင့် အောက်ခြေအဆင့် အစီအရင်ကြီး 'ရီမုမြှုပ်နှံခြင်းအစီအရင်' ဖြစ်သည်။

သံသယဖြစ်ဖွယ်မလို၊ ဤသည်မှာ ပဉ္စမအဆင့် ပိတ်လှောင်ခြင်း အစီအရင်တစ်ခု ဖြစ်သည်။

ဝူကျိတာအိုအရှင်နှင့် အခြားသူများသည် ဝိညာဉ်သန္ဓေသား နှောင်းပိုင်းအဆင့် ကျင့်ကြံသူများ ဖြစ်ကြသော်လည်း၊ ပဉ္စမအဆင့် ပိတ်လှောင်ခြင်းအစီအရင်ကို ရင်ဆိုင်ရသောအခါ ဘာမှ မတတ်နိုင်ကြပေ။

အားလုံးသည် အစီအရင်အတွင်း၌ အကျဉ်းချခံထားရပြီး လွတ်မြောက်နိုင်စွမ်း မရှိကြချေ။

သို့သော် သူတို့၏ ကံတရားသည် မဆိုးလှပေ။

ပိတ်လှောင်ခြင်း အစီအရင်ထဲတွင်သာ ကျရောက်နေခြင်း ဖြစ်သည်။

အကယ်၍ ပိတ်လှောင်ခြင်းအစီအရင်မှ လွတ်မြောက်ပြီး သတ်ဖြတ်ခြင်းအစီအရင် နယ်ပယ်ထဲသို့ ဝင်ရောက်သွားခဲ့ပါက၊ တခဏအတွင်း ကုယုံနတ်ဘုရားအလင်း ကျရောက်လာမည် ဖြစ်ပြီး၊ သူတို့၏ သက်တမ်းအကုန်အစင် စုပ်ယူခံရကာ သေဆုံးသွားကြပေလိမ့်မည်။

အတိုင်းအတာတစ်ခုထိ ပြောရလျှင် သူတို့၏ ကံတရားသည် ကောင်းမွန်နေသေးသည်ဟု ဆိုရပေမည်။

အနည်းဆုံးတော့ အသက်မသေကြသေးပေ။

"အင်း... ဒီကောင်တွေက ထွက်ပြေးလွတ်မြောက်တော့မယ့်ပုံပဲ…"

"မဖြစ်ဘူး... ဒီကောင်တွေကို လွတ်မြောက်ခွင့် ပေးလို့မဖြစ်ဘူး…"

"ဒီနေရာမှာ ခဏလောက် ပိတ်လှောင်ထားမှ ရမယ်…"

ဝူကျိတာအိုအရှင်နှင့် အခြားသူများသည် ရီမုမြှုပ်နှံခြင်းအစီအရင်၏ စွမ်းအားကို အဆက်မပြတ် စမ်းသပ်နေကြသည်ကို ကျိုးစွေ့ အာရုံခံမိလိုက်သည်။

ဤဝိညာဉ်သန္ဓေသား နှောင်းပိုင်းအဆင့် မဟာကျင့်ကြံသူ တစ္ဆေအိုကြီးများတွင် နည်းလမ်းပေါင်းစုံ ရှိကြသည်။

သူတို့တွင် စတုတ္ထအဆင့် အဆောင်အများအပြား ရှိနေပြီး ပဉ္စမအဆင့် အဆောင်များပင် ရှိနေနိုင်သည်။

ထို့အပြင် ရီမုမြှုပ်နှံခြင်းအစီအရင်သည် ပြုပြင်ထိန်းသိမ်းမှုမရှိသည်မှာ ကြာမြင့်နေပြီဖြစ်ပြီး နှစ်ကာလရှည်ကြာ တိုက်စားခံထားရသဖြင့်၊ တားဆီးမှုမပြုလုပ်ပါက သူတို့ အစီအရင်ကို ချိုးဖျက်ပြီး ဤပဉ္စမအဆင့်အစီအရင်မှ သေချာပေါက် လွတ်မြောက်သွားကြပေလိမ့်မည်။