အဆောက်အအုံများ ခြောက်ကပ်သွားခြင်း၊ ဝိညာဉ်ရည် ထပ်မံ ဝယ်ယူခြင်း

မျက်တောင်တစ်ခတ် အတွင်းမှာပင် နောက်ထပ် (၅) ရက်၊ (၆) ရက်ခန့် ကုန်လွန်သွားခဲ့သည်။

နေမင်းကြီး ဓားဂိုဏ်းနှင့် ဓာတ်ကြီးငါးပါး ဆေးဂိုဏ်းတို့၏ ပူးပေါင်းဆောင်ရွက်မှုကြောင့်၊ မြစိမ်းတော ဈေးတန်း ပြန်လည် တည်ဆောက်ရေးသည် အံ့သြဖွယ် ကောင်းလောက်အောင် မြန်ဆန်ခဲ့သည်။

ချက်ချင်းဆိုသလိုပင် ဒုတိယအဆင့် အစီအရင် တစ်ခုကို တည်ဆောက်လိုက်၏။

မူလက မြစိမ်းတော ဈေးတန်း၏ ဧရိယာသည် နှစ်ဆအထိ ကျယ်ဝန်းလာခဲ့သည်။

အဆောက်အအုံ အများအပြားသည် မိုးမျှော်တိုက်များ ပေါ်ပေါက်လာသကဲ့သို့ လျင်မြန်စွာ ထွက်ပေါ်လာ၏။

ဂိုဏ်းသား ကျင့်ကြံသူ အများအပြားသည် ဝင်ရောက် နေထိုင်နေကြပြီ ဖြစ်သဖြင့်၊ ယခင်က စည်ကားသိုက်မြိုက်မှုများလည်း ပြန်လည် အသက်ဝင်လာခဲ့သည်။

လေလွင့်ကျင့်ကြံသူများကို ပိုမို အံ့သြသွားစေသည့် အချက်မှာ သင်္ဘောပျံများ ရောက်ရှိလာခြင်း ဖြစ်၏။ ထိုသင်္ဘောများသည် အခြားဒေသများမှ လေလွင့်ကျင့်ကြံသူ (၂၀,၀၀၀) ကျော်ကို သယ်ဆောင်လာပြီး ရွှေ့ပြောင်း နေရာချထားလိုက်သည်။

မူလက သူတို့သည် ဤနေရာအတွက် မရှိမဖြစ် လိုအပ်သူများ ဖြစ်သည်ဟု ထင်မှတ်ထားခဲ့ကြသော်လည်း၊ မျက်တောင်တစ်ခတ်အတွင်း အခြားသူများက သူတို့နေရာကို အစားထိုး ဝင်ရောက်လာကြလိမ့်မည်ဟု မည်သူက ထင်မှတ်ထားပါမည်နည်း။

"သောက်ကျိုးနည်း... ဒီလောက်များတဲ့ လေလွင့်ကျင့်ကြံသူတွေ ဘယ်က ရောက်လာကြတာလဲ..."

"ကြားတာတော့ ဓာတ်ကြီးငါးပါး ဆေးဂိုဏ်းရဲ့ နယ်မြေကနေ ခေါ်လာတာတဲ့... ဝိညာဉ်ကျောက်တုံး သတ္တုသိုက် နဲ့ ကမ္ဗလာမီးလျှံ သံသတ္တုသိုက်ကို တူးဖော်ဖို့အတွက် သင်္ဘောတွေနဲ့ သယ်လာကြတာ..."

"ဟူး... လောကကြီးမှာ ဆင်းရဲတဲ့ လေလွင့်ကျင့်ကြံသူတွေက ပေါလွန်းပါတယ်ကွာ... ကြက်သွန်မြိတ်တွေ ရိတ်သိမ်းသလိုပဲ၊ တစ်သုတ်ပြီး တစ်သုတ် ရိတ်သိမ်းလို့ကို မကုန်နိုင်ဘူး..."

"အစက ငါတို့ကို ဂိုဏ်းကြီးနှစ်ခုက လိုအပ်နေသေးတယ်၊ လုပ်အားခ တိုးပေးမယ်လို့ ထင်ထားတာ... ဒီလောက် အများကြီး ပြောင်းရွှေ့လာမှတော့ ငါတို့ကို မလိုအပ်တော့ဘူးပေါ့..."

"ပြန်ကြတာ ပိုကောင်းပါတယ်... အခုချက်ချင်း မပြန်ရင် ဆင်းရဲသား ရပ်ကွက်မှာတောင် နေရာရချင်မှ ရတော့မှာ..."

လေလွင့်ကျင့်ကြံသူ အများအပြား အတော်လေး စိတ်ပျက်အားငယ်သွားကြသည်။

ရွှေအမြုတေဂိုဏ်းကြီး နှစ်ခု၏ နည်းလမ်းများက တကယ်ကို ရက်စက်လှသည်ဟု ခံစားလိုက်ကြရသည်။

ဂိုဏ်းကြီးများ အနေဖြင့် လေလွင့်ကျင့်ကြံသူများကို လုံးဝ ဂရုစိုက်ခြင်း မရှိပေ။

သူတို့အတွက် အခြားနေရာများမှ လေလွင့်ကျင့်ကြံသူများကို စုဆောင်းရန်မှာ အလွန် လွယ်ကူသော ကိစ္စပင်။

မည်သို့ဆိုစေ 'ထာဝရ အသက်ရှင်ခြင်း လမ်းစဉ်' ၏ ဆွဲဆောင်မှုကို မည်သည့် လေလွင့်ကျင့်ကြံသူက တွန်းလှန်နိုင်ပါမည်နည်း။

အခွင့်အရေး နည်းပါးကြောင်း၊ အုတ်မြစ်တည်ဆောက်ခြင်းအဆင့် ရောက်ဖို့ ခက်ခဲကြောင်း သိနေလျှင်တောင်၊ ပိုးဖလံမျိုး မီးကိုတိုး ဆိုသကဲ့သို့ လာရောက် စုဝေးကြမည်သာ ဖြစ်သည်။

ယခင်က ဤလေလွင့်ကျင့်ကြံသူများသည်လည်း နေမင်းကြီး ဓားဂိုဏ်း၏ ဆွဲဆောင်မှုကြောင့် မြစိမ်းတော ဈေးတန်းသို့ ရောက်ရှိလာခဲ့ကြခြင်း ဖြစ်သည်။

ရုတ်တရက်ဆိုသလို လေလွင့်ကျင့်ကြံသူ အများအပြားသည် အမည်မဲ့ တောင်ကြားမှ ထွက်ခွာပြီး၊ မြစိမ်းတော ဈေးတန်း၏ ဆင်းရဲသား ရပ်ကွက်သို့ ပြန်သွားကြတော့သည်။

"ကျင့်ကြံသူမိတ်ဆွေ ကျန်း... ကျွန်တော်တို့လည်း မြစိမ်းတော ဈေးတန်းကို ပြန်ရတော့မယ် ထင်တယ်..."

ထိုအချိန်တွင် ဖန်ဝေ၏ မိသားစုသည် ကျန်းဖန်နှင့် စုဝေဝေ တို့ကို လာရောက် နှုတ်ဆက်ကြသည်။

သူတို့လည်း အမည်မဲ့ တောင်ကြားတွင် ဆက်မနေချင်ကြတော့ပေ။ ထို့ကြောင့် မြစိမ်းတော ဈေးတန်းသို့ ပြန်ရန် ဆုံးဖြတ်လိုက်ကြ၏။

"အို... ခင်ဗျားတို့လည်း သွားကြတော့မလို့လား..."

ကျန်းဖန် မေးလိုက်သည်။

"ဟုတ်တယ်ဗျ... ဒီနေရာက ရှုခင်းလှပြီး သာယာတယ် ဆိုပေမဲ့..."

"ပြီးခဲ့တဲ့ တစ်ခေါက်က သားရဲလှိုင်းကနေ သီသီလေး လွတ်လာတာလေ..."

"နောက်တစ်ခေါက် ထပ်လာရင် ကံကောင်းချင်မှ ကောင်းတော့မှာ..."

"ဒါကြောင့် လူအများနဲ့အတူ မြစိမ်းတော ဈေးတန်းကို ပြန်လိုက်သွားဖို့ စိတ်ကူးထားတယ်..."

"ဆင်းရဲသား ရပ်ကွက်မှာ နေရင် အခွန်ဆောင်ရပေမဲ့၊ အနည်းဆုံးတော့ လုံခြုံ စိတ်ချရတယ်လေ..."

ဖန်ဝေ လေးလေးနက်နက် ပြောလိုက်သည်။

သံသယဖြစ်စရာ မလိုပါ၊ သူတို့အတွက်က လုံခြုံရေးသည် တန်ဖိုးအဖြတ်နိုင်ဆုံး အရာပင်။

သူတို့၏ အားနည်းသော ကျင့်ကြံခြင်းအဆင့်နှင့် ဆိုလျှင်၊ မည်သည့် ကမောက်ကမ ဖြစ်ရပ်ကိုမျှ ခံနိုင်ရည် ရှိမည် မဟုတ်ပေ။

ထို့ပြင် ယခုအခါ လူအများစုသည် မြစိမ်းတော ဈေးတန်းသို့ ပြန်ရန် စီစဉ်နေကြပြီ ဖြစ်သည်။

သူတို့လည်း လူအုပ်ကြီးနှင့်အတူ ပြန်လိုက်သွားနိုင်သည်။

ဤနည်းအားဖြင့် လမ်းခရီးတွင် အန္တရာယ်အတွက် စိတ်ပူစရာ မလိုတော့ပေ။

"ကောင်းပါပြီဗျာ... ကံကောင်းပါစေလို့ ဆုတောင်းပေးပါတယ်..."

"ကျွန်တော်တို့ကတော့ ဒီမှာ နေရတာ အဆင်ပြေနေလို့ မလိုက်တော့ဘူး..."

ကျန်းဖန် အနည်းငယ် ပြုံးလိုက်သည်။

"ဒါဆိုရင် ကျင့်ကြံသူမိတ်ဆွေ ကျန်း... သွားခွင့်ပြုပါဦး..."

ဖန်ဝေ ခေါင်းညိတ်လိုက်သည်။

ကျန်းဖန်တို့ ဘာကြောင့် ဆက်နေချင်ရတာလဲ ဆိုတာကို သူ သိချင်သော်လည်း၊ ပညာရှိစွာပင် အများကြီး မမေးမြန်းတော့ပေ။

တစ်ခါတစ်ရံတွင် ကျင့်ကြံသူများ အကြား ဆက်ဆံရေးတွင် စည်းတစ်ခု ထားရှိရန် လိုအပ်သည် မဟုတ်ပါလော။

မကြာမီ၊ ဖန်ဝေ၏ မိသားစုသည် အခြားသူများနှင့်အတူ မြစိမ်းတော ဈေးတန်းသို့ ပြန်သွားကြတော့သည်။

မူလက လေလွင့်ကျင့်ကြံသူ တစ်ထောင်ကျော် နေထိုင်ခဲ့သော အမည်မဲ့ တောင်ကြားကြီးသည် ယခုအခါ ခြောက်ကပ်သွားခဲ့လေပြီ။

လူသူကင်းမဲ့ပြီး စွန့်ပစ်ထားသော နေရာတစ်ခု၊ အပျက်အစီး တစ်ခုကဲ့သို့ပင် ဖြစ်သွားတော့သည်။

"ဒီလောက် ကျယ်ဝန်းတဲ့ နေရာမှာ၊ ကျွန်မတို့ နှစ်ယောက်တည်း နေရမယ် ဆိုတော့... မဆိုးပါဘူး..."

စုဝေဝေ ပြုံးလိုက်သည်။

သူမ၏ ယောကျ်ားက သူမဘေးနားမှာ ရှိနေသရွေ့၊ သူမ ဘာကိုမှ စိုးရိမ်စရာ မလိုပေ။

အထီးကျန်ခြင်းကိုလည်း ခံစားရမည် မဟုတ်။

"မြစိမ်းတော ဈေးတန်းကို တစ်ခေါက်လောက်တော့ သွားရမယ် ထင်တယ်..."

ကျန်းဖန် မေးစေ့ကို ပွတ်သပ်လိုက်သည်။

"ပစ္စည်း တစ်ခုခု ဝယ်မလို့လား ယောကျ်ား..."

စုဝေဝေ စူးစမ်းလိုစိတ်ဖြင့် မေးလိုက်သည်။

"ဟုတ်တယ်... ဆေးဝါး တချို့နဲ့ ဝိညာဉ်ရည် ဝယ်မလို့..."

"ဝယ်လို့ရခဲ့ရင်၊ ချီကျင့်ကြံခြင်းအဆင့် (၇) ရောက်ဖို့ သိပ်မလိုတော့ဘူး..."

ကျန်းဖန် လက်သီးကို တင်းတင်းဆုပ်လိုက်သည်။

သူသည် ကျင့်ကြံခြင်း အရင်းအမြစ်များကို အလွန် လိုအပ်နေဆဲ ဖြစ်သည်။

လုံလောက်သော အရင်းအမြစ်များ ရရှိပါက၊ ချီကျင့်ကြံခြင်းအဆင့် (၇) သို့ ပိုမို လျင်မြန်စွာ ရောက်ရှိနိုင်ပေလိမ့်မည်။

ကံကောင်းစွာဖြင့် ယခုအခါ မြစိမ်းတော ဈေးတန်းက ပြန်လည် တည်ဆောက်ပြီးပြီ ဖြစ်သည်။

ထို့ကြောင့် သူ့လက်ထဲရှိ ဝိညာဉ်ကျောက်တုံးများကို နောက်ဆုံးတွင် အသုံးပြုနိုင်တော့မည်။

တစ်နည်းအားဖြင့် ကြည့်လျှင် ဈေးတန်း ပြန်ဖွင့်ခြင်းသည် သူ့အတွက် ကောင်းသော အပြောင်းအလဲ တစ်ခုပင်။

......

နောက်တစ်နေ့ ကုန်လွန်သွားပြန်သည်။

ကျန်းဖန်သည် မြစိမ်းတော ဈေးတန်းသို့ တစ်ယောက်တည်း ပျံသန်းသွားခဲ့သည်။

သူသည် 'ကိုယ်ပေါ့အင်း' ၏ စွမ်းအားကို အသုံးပြုပြီး၊ ငှက်မွေးတစ်ခုကဲ့သို့ လျင်မြန်ပေါ့ပါးစွာ ရွေ့လျားသွား၏။

ထို့နောက် မကြာမီ အချိန်အတွင်းမှာပင် ပြန်လည် တည်ဆောက်ထားသော မြစိမ်းတော ဈေးတန်းသို့ ရောက်ရှိသွားသည်။

"တကယ်ပဲ အရင်ကထက် အများကြီး ပိုကြီးသွားပါလား..."

မြစိမ်းတော ဈေးတန်းသို့ နောက်တစ်ကြိမ် ရောက်ရှိလာသောအခါ၊ ယခင်က အပျက်အစီးများ လုံးဝ ပျောက်ကွယ်သွားသည်ကို သူ ချက်ချင်း သတိထားမိလိုက်သည်။

ထိုနေရာတွင် ခမ်းနားထည်ဝါသော အဆောက်အအုံများဖြင့် အစားထိုးထား၏။

ဤနေရာတွင် တိုက်ပွဲ ဖြစ်ပွားခဲ့ဖူးခြင်း မရှိသကဲ့သို့ပင်။

မြေပြင်ကိုလည်း ညီညာပြန့်ပြူးအောင် ပြုလုပ်ထားပြီး ဖြစ်သည်။

တိုက်ပွဲ၏ ခြေရာလက်ရာများ လုံးဝ ပျောက်ကွယ်သွားခဲ့လေပြီ။

ထို့ပြင် ယခုအခါ မြစိမ်းတော ဈေးတန်းတွင် ဂိုဏ်းသား ကျင့်ကြံသူ အမြောက်အမြားလည်း ရှိနေကြသည်။

၎င်းတို့သည် နေမင်းကြီး ဓားဂိုဏ်းနှင့် ဓာတ်ကြီးငါးပါး ဆေးဂိုဏ်း၏ ဝတ်စုံများကို ကိုယ်စီ ဝတ်ဆင်ထားကြပြီး စွမ်းအားကြီးသော အငွေ့အသက်များကို ထုတ်လွှတ်နေကြသည်။

"ချီကျင့်ကြံခြင်း နောက်ဆုံးအဆင့် ကျင့်ကြံသူတွေ အများကြီး ပါလား..."

ကျန်းဖန် မျက်လုံးအိမ်များ ကျဉ်းမြောင်းသွားသည်။

မြစိမ်းတော ဈေးတန်းရှိ ချီကျင့်ကြံခြင်း နောက်ဆုံးအဆင့် ကျင့်ကြံသူ အရေအတွက်သည် ယခင်ကထက် အဆပေါင်းများစွာ တိုးပွားလာကြောင်း သူ သတိထားမိလိုက်သည်။

……