မွေးရာပါနတ်ဘုရားအမြစ်

အချိန်များသည် လွန်းပျံသကဲ့သို့ လျင်မြန်စွာ ကုန်ဆုံးသွားပြီး နှစ်ပေါင်း တစ်သောင်းကြာမြင့်သွားခဲ့ပြီ။

ကာလကြာရှည် ရှုပ်ထွေးမှုများ ဖြစ်ပေါ်ပြီးနောက်၊ စကြဝဠာ ကမ္ဘာပေါင်းများစွာသည် တဖြည်းဖြည်း ပြန်လည် စည်ပင်ဝေဆာလာသည်။

အင်အားစုအသစ်များ ထွန်းကားလာသလို၊ အင်အားစုဟောင်း အများအပြားလည်း ကျဆုံးသွားခဲ့ကြသည်။

ဟွေ့ယွမ်ကပ်ဘေး၏ အငွေ့အသက်များ လုံးဝပျောက်ကွယ်သွားသကဲ့သို့ပင်။

ဤကာလအတွင်း နိယာမအဆင့် ကျင့်ကြံသူများသည် မိုးရွာပြီးစ မှိုများသဖွယ် အစီအရီပေါ်ထွက်လာကြပြီး၊ မပျက်သုဉ်းနိုင်သော ရွှေနတ်ဘုရားအသစ်များပင် မွေးဖွားလာကြသည်။

....

၃၃ ဘုံမြောက်ဘုံ။

ယွီဟွာနတ်ဘုရားဂိုဏ်း။

မကြာမီ နတ်ဘုရားမျိုးစေ့ စစ်ဆေးရွေးချယ်ပွဲ ကျင်းပတော့မည်ဖြစ်သည်။

နတ်ဘုရားမျိုးစေ့ဆိုသည်မှာ ဂိုဏ်းသားအရင်းထက် ပိုမြင့်မားသော အဆင့်အတန်းဖြစ်သည်။

နတ်ဘုရားမျိုးစေ့ဖြစ်လာလျှင် ဒဏ္ဍာရီလာ နတ်ဘုရားနန်းတော်အတွင်းသို့ ဝင်ရောက်ကျင့်ကြံခွင့်ရရှိမည်ဟု ဆိုကြသည်။

လွန်ခဲ့သော နှစ် ၉၀၀၀ ကျော်ကတည်းက၊ ၁၀ ခုမြောက်ဘုံတွင် တည်ရှိခဲ့သော မူလ ယွီဟွာနတ်ဘုရားဂိုဏ်းသည် ၃၃ ဘုံမြောက်ဘုံသို့ ပြောင်းရွှေ့လာခဲ့ပြီး၊ ပျက်စီးသွားသော မပျက်သုဉ်းနိုင်သော နတ်ဘုရားဂိုဏ်းကြီးတစ်ခု၏နေရာကို ဝင်ရောက်သိမ်းပိုက်ခဲ့သည်။

ယခု ယွီဟွာနတ်ဘုရားဂိုဏ်း၏ ခေါင်းဆောင်ပိုင်းအများစုသည် မူလယွီဟွာနတ်ဘုရားဂိုဏ်းမှ ဆင်းသက်လာသူများဖြစ်ကြသည်။ လက်ရှိ ဂိုဏ်းချုပ် ရှဲ့ဖုန်းသည် ရှန်ကျန့်တောင်မှ ဆင်းသက်လာသူ ဖြစ်ပြီး၊ ယခုအခါ အဆင့် ၅ နိယာမ ပိုင်ဆိုင်သော တာအိုပေါင်းစည်းခြင်းအဆင့်နှောင်းပိုင်း ကျင့်ကြံသူကြီးဖြစ်နေပြီ။

အခြား တာအိုပေါင်းစည်းခြင်းအဆင့်ကျင့်ကြံသူ အများအပြားလည်းရှိနေသေးသဖြင့်၊ ယွီဟွာနတ်ဘုရားဂိုဏ်းသည် ၃၃ ဘုံမြောက်ဘုံတွင်သာမက ၃၃ ဘုံတစ်ခုလုံးတွင်ပါ စစ်မှန်သော နံပါတ်တစ် နတ်ဘုရားဂိုဏ်းကြီးဖြစ်လာခဲ့သည်။

ဒါက ပုံမှန်ပါပဲ။ ဟွေ့ယွမ်ကပ်ဘေးအတွင်းမှာ ၃၃ ဘုံက မပျက်သုဉ်းနိုင်သော ရွှေနတ်ဘုရား ၉၉ ရာခိုင်နှုန်းလောက် သေဆုံးကုန်ကြပြီလေ။ အထူးသဖြင့် အထူးရွှေနတ်ဘုရားတွေဆိုရင် မျိုးတုန်းလုနီးပါး ဖြစ်သွားခဲ့တာ။

ဒါကြောင့် အခု ယွီဟွာနတ်ဘုရားဂိုဏ်းက တစ်ဦးတည်းလွှမ်းမိုးထားနိုင်တဲ့အခြေအနေ ဖြစ်နေသည်။

သေချာတာကတော့ ယွီဟွာနတ်ဘုရားဂိုဏ်းက အရမ်းကြီး အာဏာပြတာမျိုး မလုပ်ပါဘူး။ ဟိုတုန်းက အင်မော်တယ်နန်းတော်လိုမျိုး အုပ်ချုပ်ဖို့ မကြိုးစားဘူး။ ဒါကြောင့် ၃၃ ဘုံ တစ်ခုလုံးမှာ ဂိုဏ်းပေါင်းစုံ လွတ်လပ်စွာ စည်ပင်ထွန်းကားနေကြသည်။

ယခုအချိန်တွင် ရင်ပြင်ကျယ်ကြီးပေါ်၌ ဂိုဏ်းသားတစ်ထောင်ကျော် စုဝေးနေကြသည်။

ဒီဂိုဏ်းသားတွေက အနည်းဆုံး အမာခံဂိုဏ်းသားတွေ ဖြစ်ကြပြီး၊ ဂိုဏ်းသားအရင်းတွေလည်း မနည်းမနော ပါဝင်သည်။ အားလုံးက ပါရမီအလွန်မြင့်မားကြသည်။

ပြီးတော့ လက်ရှိ ယွီဟွာနတ်ဘုရားဂိုဏ်းက ဂိုဏ်းဝင်စကတည်းက ရှေးဟောင်းနတ်ဘုရားကျင့်စဉ်လမ်းကို လိုက်လျှောက်ခိုင်းထားတာ။ နတ်ဘုရားမျိုးစေ့ စစ်ဆေးပွဲဝင်မယ့်သူတွေက ချီစုဆောင်းခြင်းအဆင့် ၁၂ ဆင့် ရောက်နေမှရမယ်။ နတ်ဘုရားမျိုးစေ့အဖြစ် ရွေးချယ်ခံရရင် နတ်ဘုရားနန်းတော်ထဲ ဝင်ရောက်ကျင့်ကြံခွင့်ရမယ့်အပြင် အခြေခံတည်ဆောက်ခြင်းဆေးလုံးကိုပါ ရရှိဦးမှာ။

အခြေခံတည်ဆောက်ခြင်းဆေးလုံးဆိုတာ ချီစုဆောင်းခြင်းအဆင့် ကနေ အခြေခံတည်ဆောက်ခြင်းအဆင့်ကို တက်လှမ်းဖို့ မရှိမဖြစ်လိုအပ်တဲ့ ဆေးလေ။

မြင့်မားသော စင်မြင့်တစ်ခုပေါ်တွင် ဂိုဏ်းချုပ် ရှဲ့ဖုန်း သည် လက်ကို နောက်ပစ်ကာ ရပ်နေသည်။ သူ့အနောက်တွင် ဂိုဏ်းအကြီးအကဲများ ရပ်နေကြသည်။

လူတိုင်းက တာအိုပေါင်းစည်းခြင်းအဆင့် ကျင့်ကြံသူတွေချည်း ဖြစ်ကြသည်။

နတ်ဘုရားမျိုးစေ့ စစ်ဆေးပွဲတိုင်းကို ဂိုဏ်းက အလွန်အလေးထားသည်။

"ဂိုဏ်းချုပ်... ဒီတစ်ခေါက် နတ်ဘုရားမျိုးစေ့ နေရာလွတ်က နည်းလွန်းတယ် မဟုတ်ဘူးလား။ အရည်အချင်းပြည့်မီတဲ့ ဖြေဆိုသူ တစ်ထောင်ကျော်ရှိတာကို နေရာလွတ် ၁၀၀ ပဲ ပေးတယ်ဆိုတော့..." အကြီးအကဲ တစ်ဦးက မနေနိုင်ဘဲ ပြောလိုက်သည်။

"၁၀၀ ဆိုတာ မနည်းပါဘူး... ဒါတောင် ငါတို့ ယွီဟွာနတ်ဘုရားဂိုဏ်းက မူလပင်မဂိုဏ်းဖြစ်နေလို့ ဦးစားပေးအနေနဲ့ ဒီလောက်ရတာ" ဂိုဏ်းချုပ် ရှဲ့ဖုန်းက အေးဆေးစွာ ပြောလိုက်သည်။

အခုချိန်မှာ နတ်ဘုရားနန်းတော်လက်အောက်ခံ ဂိုဏ်းအဖွဲ့အစည်းတွေက မနည်းတော့ဘူး။ ရာချီ၊ ထောင်ချီ ရှိနေပြီ။ အင်အားကြီးတာတွေရှိသလို သေးတာတွေလည်း ရှိတယ်။ ယွီဟွာနတ်ဘုရားဂိုဏ်းက အင်အားအကြီးဆုံးအုပ်စုထဲ မပါဘူး။ ထိပ်တန်း ၁၀၀ စာရင်း ဝင်ဖို့တောင် မလွယ်ဘူး။

နေရာလွတ် ၁၀၀ ရတယ်ဆိုတာ ဂိုဏ်းပေါင်းများစွာထဲမှာ ထိပ်တန်း ၅၀ စာရင်းဝင်တဲ့ အဆင့်မို့ ရတာ။

ဒါလည်း ပုံမှန်ပါပဲ။ အခု နတ်ဘုရားနန်းတော်ရဲ့ အင်အားက အရမ်းကြီးမားနေပြီ။ တပည့်ဦးရေ ဘယ်လောက်တောင်များနေပြီလဲ။ ဂိုဏ်းခွဲတစ်ခုကို နေရာလွတ် ဆယ်ဂဏန်းလောက်ပဲ ပေးရင်တောင်၊ စုစုပေါင်းလိုက်ရင် သောင်းချီရှိနေပြီ။

နတ်ဘုရားမျိုးစေ့ ရွေးချယ်ပွဲက ၃ နှစ် တစ်ကြိမ်လုပ်တာဆိုတော့ ကြိမ်နှုန်းကလည်း စိပ်တယ်လို့ ပြောလို့ ရပါတယ်။

"ဒါပေမဲ့... ငါတို့ နေရာလွတ် ပိုလိုချင်ရင် နတ်ဘုရားကုသိုလ်မှတ် များများစုဆောင်းမှရမယ်..." ဂိုဏ်းချုပ် ရှဲ့ဖုန်း ခဏရပ်ပြီး လေးနက်စွာ ဆက်ပြောလိုက်သည်။

"ဂိုဏ်းချုပ်... နတ်ဘုရားကုသိုလ်မှတ် စုဆောင်းရတာ မလွယ်ဘူးဗျ။ လွန်ခဲ့တဲ့ ၁၀ နှစ်အတွင်း ကျွန်တော်တို့ ပေးပို့တဲ့ အဆင့်မြင့် အရင်းအမြစ်တွေ၊ ပြီးမြောက်ခဲ့တဲ့ တာဝန်တွေက နည်းတာ မဟုတ်ဘူး။ ဒါပေမဲ့ တခြားဂိုဏ်းတွေက... ပိုပြီး အသည်းအသန် ကြိုးစားကြတယ်။ ပြီးတော့ ကျွန်တော်တို့ ၃၃ ဘုံက အရင်းအမြစ်တွေက ဟိုထိပ်တန်း ကမ္ဘာကြီးတွေလောက် မများပြားဘူးလေ..." အကြီးအကဲတစ်ဦးက ညည်းတွားလိုက်သည်။

အခု နတ်ဘုရားနန်းတော်ရဲ့ နတ်ဘုရားကုသိုလ်မှတ်စနစ်က အလွန်ပြည့်စုံကောင်းမွန်နေပြီ။

နတ်ဘုရားမျိုးစေ့ နေရာလွတ်တွေ၊ အဆင့်မြင့်ကျင့်ကြံရေးအရင်းအမြစ် ခွဲဝေမှုတွေ အားလုံးက နတ်ဘုရားကုသိုလ်မှတ်နဲ့ ချိတ်ဆက်ထားတာ။

ဒါကြောင့် နတ်ဘုရားနန်းတော် လက်အောက်ခံ ဂိုဏ်းအသီးသီးက နတ်ဘုရားမျိုးစေ့ ပိုရဖို့၊ အဆင့်မြင့်အရင်းအမြစ်တွေ ပိုရဖို့အတွက် အသေအလဲပြိုင်ဆိုင်နေကြတာ။

မပြိုင်ဆိုင်ရင်၊ နတ်ဘုရားကုသိုလ်မှတ်က သူများထက် နည်းနေရင် ကိုယ်ရမယ့် အဆင့်မြင့် အရင်းအမြစ်က နည်းသွားမှာ။

နတ်ဘုရားနန်းတော်က ထုတ်လုပ်တဲ့ ဆေးလုံးတွေ၊ တာအိုလက်နက်တွေ၊ အစီအရင်တွေ၊ တိုက်ပွဲဝင် သားရဲတွေ... အကုန်လုံးက အရည်အသွေး ရှယ်တွေချည်းပဲ။

ကျင့်ကြံမှုမြန်ချင်ရင် ပြိုင်ဆိုင်မှဖြစ်မယ်။

သေချာတာကတော့... ဒီလို အသည်းအသန် ပြိုင်ဆိုင်ကြတဲ့ ရလဒ်အနေနဲ့၊ ယွီဟွာနတ်ဘုရားနန်းတော်ရဲ့ စုစုပေါင်း အင်အားနဲ့ အုတ်မြစ်ကလည်း ဒုံးပျံစီးသလို တက်လာခဲ့သည်။

.......

ကောင်းကင်တာအိုနယ်ပယ်။

မိုးဖွဲလေးတွေ ရွာသွန်းနေသော နေရာတစ်ခုရှိ ဇရပ်ဆောင်တစ်ခုတွင်။

ထိုမိုးဖွဲလေးများသည် သာမန်မိုးရေ မဟုတ်ဘဲ၊ နတ်ဘုရားချီများ စုစည်းပြီး ဖြစ်ပေါ်လာခြင်းဖြစ်သည်။

အခု ကောင်းကင်တာအိုနယ်ပယ်က တားမြစ်နယ်မြေ ၁၀ ခုကျော်ကို လွှမ်းခြုံထားပြီဖြစ်သည်။ နတ်ဘုရားစုန်းမတားမြစ်နယ်မြေဆိုရင် လွှမ်းခြုံခံထားရတာ ကြာလှပြီ။

ဒီကောင်းကင်တာအိုနယ်ပယ်အတွင်းမှာ အရာအားလုံးက လီချန်ရဲ့ ထိန်းချုပ်မှုအောက်မှာရှိသည်။

အခု ကောင်းကင်တာအိုနယ်ပယ်က သက်ရှိတွေနဲ့ စည်ကားသိုက်မြိုက်နေပြီး၊ အကောင်းဆုံး ကျင့်ကြံရေးနယ်မြေဖြစ်လာခဲ့ပြီ။

လီချန်ရဲ့စီမံကိန်းအရ၊ လှိုဏ်ဂူနေထိုင်ရာ ဇုန်နဲ့ ထုတ်လုပ်ရေး ဇုန်ဆိုပြီး ခွဲခြားထားသည်။

လှိုဏ်ဂူနေထိုင်ရာ ဇုန်မှာ လှိုဏ်ဂူများစွာရှိပြီး နတ်ဘုရားနန်းတော် တပည့်အများအပြား နေထိုင်ကြသည်။

ထုတ်လုပ်ရေး ဇုန်မှာတော့ နတ်ဆေးပင်နဲ့ ဝိညာဉ်ပစ္စည်းတွေ စိုက်ပျိုးထားတဲ့ စိုက်ခင်းတွေ အများကြီး ရှိပြီး၊ ဝိညာဉ်ဆေးပင်စိုက်ပျိုးသူများစွာ အလုပ်ရှုပ်နေကြသည်။

ဒါ့အပြင် ဆေးဖော်ခန်းတွေ၊ လက်နက်သွန်းလုပ်ရုံတွေ၊ အစီအရင်စခန်းတွေ စသဖြင့်... အချိန်တိုင်း ဆေးလုံးတွေ၊ လက်နက်တွေ၊ အစီအရင်တွေ အမြောက်အမြား ထုတ်လုပ်ပေးနေသည်။

အချိန်ခေါင်းလောင်း လှိုဏ်ဂူကောင်းကင်ဘုံကတော့ အခုအခါ အဓိကဗဟိုချက်မဖြစ်လာခဲ့ပြီ။ ယွီဟွာနတ်ဘုရားနန်းတော်ရဲ့ အမာခံခေါင်းဆောင်ပိုင်းတွေရဲ့ လှိုဏ်ဂူတွေသာ ဒီထဲမှာရှိကြတော့သည်။

သာမန် ယွီဟွာနတ်ဘုရားနန်းတော် တပည့်တွေအနေနဲ့ အချိန်ခေါင်းလောင်း လှိုဏ်ဂူကောင်းကင်ဘုံထဲ ဝင်ရောက်ကျင့်ကြံချင်ရင် နတ်ဘုရားကုသိုလ်မှတ်ကို အသုံးပြုမှရတော့သည်။

တစ်နည်းအားဖြင့် ပြောရရင်၊ အခု အချိန်ခေါင်းလောင်း လှိုဏ်ဂူကောင်းကင်ဘုံက ကျင့်ကြံရေး အရင်းအမြစ်တစ်ခုဖြစ်သွားပြီ။

မတတ်နိုင်ဘူးလေ။ အချိန်ခေါင်းလောင်း လှိုဏ်ဂူကောင်းကင်ဘုံက ကျယ်ပြန့်လာနေပေမဲ့ တိုးချဲ့နှုန်းက ကောင်းကင်တာအိုနယ်ပယ်လောက် မမြန်ဘူး။

ဒီနှစ်ပေါင်းတစ်သောင်းအတွင်းမှာ ယွီဟွာနတ်ဘုရားနန်းတော်ရဲ့ တပည့်ဦးရေက ၁၀ သန်းကျော်သွားပြီ။

ဒါက ကမ္ဘာအသီးသီးမှာ ဖြန့်ကျက်ထားတဲ့ လက်အောက်ခံ အင်အားစုတွေကို ထည့်မတွက်ထားသေးဘူး။

အကုန်ထည့်တွက်လိုက်ရင် သန်းရာချီ၊ ထောင်ချီ ရှိလောက်တယ်။ တပည့်ဦးရေက ဒီလောက် များပြားလာတော့ စီမံခန့်ခွဲမှုက ရှုပ်ထွေးလာသည်။

အရင်တုန်းကလို တပည့်အားလုံးကို အချိန်ခေါင်းလောင်း လှိုဏ်ဂူကောင်းကင်ဘုံထဲပေးဝင်ပြီး ကျင့်ကြံခိုင်းဖို့ မဖြစ်နိုင်တော့ဘူး။ ပြီးတော့ ဂိုဏ်းတစ်ခု ရေရှည်ဖွံ့ဖြိုးတိုးတက်ဖို့အတွက် ပြီးပြည့်စုံတဲ့ ဂိုဏ်းစည်းမျဉ်းတွေရှိဖို့ လိုအပ်တယ်။

နှစ်ပေါင်းများစွာ ပြုပြင်မွမ်းမံပြီးနောက်၊ အခု ယွီဟွာနတ်ဘုရားနန်းတော်က စနစ်တကျလည်ပတ်နေပြီ။

လီချန် စိတ်ပူစရာ မလိုတော့ဘူး။

အခု နတ်ဘုရားနန်းတော်ကို စီမံခန့်ခွဲနေတာက ဟိုတုန်းက မူလတပည့်ဟောင်းတွေပဲ။

သူတို့ထဲက အစွမ်းအထက်ဆုံး လူတွေက အတိဒုက္ခဖြတ်ကျော်ခြင်းအဆင့်ကို ရောက်နေကြပြီ။ နိယာမအဆင့်ကလည်း အဆင့် ၆ နှင့်အထက်ရှိကြတယ်။

နှစ်တစ်သောင်းဆိုတာ မတိုပေမဲ့၊ ကျင့်ကြံခြင်းလောကအတွက်တော့ အရမ်းကြီးရှည်လျားလှတာ မဟုတ်ဘူး။

သူတို့ ဒီလောက်မြန်မြန် တိုးတက်လာရတာက နတ်ဘုရားကိရိယာ အချိန်ခေါင်းလောင်းရဲ့ အထောက်အပံ့အပြင်၊ လီချန် ဖော်စပ်ပေးတဲ့ နိယာမနတ်ဆေးလုံးတွေကြောင့်လည်း ပါတယ်။

နိယာမနတ်ဆေးလုံး ဖော်စပ်ဖို့ လိုအပ်တဲ့ ကုန်ကြမ်းတွေက ရှားပါးပေမဲ့ (အထူးသဖြင့် ငရဲဘုံ မူလအနှစ်သာရလို ပစ္စည်းမျိုး)၊ အခု ယွီဟွာနတ်ဘုရားနန်းတော်ရဲ့ အင်အားစုတွေက စကြဝဠာ နေရာအနှံ့ ဖြန့်ကျက်ထားတော့ အရင်းအမြစ်ရှာဖွေရတာ လမ်းကြောင်းတွေ များပြားလာလို့ အဆင်ပြေနေတာ။

....

အချိန်ခေါင်းလောင်း လှိုဏ်ဂူကောင်းကင်ဘုံ။

လီချန်သည် အချိန်ခေါင်းလောင်းရှေ့တွင် တင်ပျဉ်ခွေ ထိုင်နေသည်။ သူ့အောက်တွင် ထူးဆန်းသော ဓားကြာပန်းတစ်ပွင့် ရှိနေသည်။ ဒါက လီချန် တည်ဆောက်ထားသော မွေးရာပါ ဓားအစီအရင်ဖြစ်သည်။

နှစ်ပေါင်း တစ်သောင်းကြာအောင် ပြုပြင်မွမ်းမံပြီးနောက်၊ ဒီဓားအစီအရင်က လွန်ခဲ့တဲ့ နှစ်တစ်သောင်းတုန်းကနဲ့ယှဉ်ရင် မိုးနဲ့မြေလို ကွာခြားသွားပြီ။

အခု ဓားအစီအရင်က ၂၇ အခြေခံ အထိ ရောက်ရှိနေပြီ။

သူက စကြဝဠာ ကမ္ဘာပေါင်းများစွာက အရင်းအမြစ်တွေကို ပိုင်ဆိုင်ထားတာလေ။ ဘယ်လိုအစီအရင် လျှို့ဝှက်နယ်မြေမျိုးမဆို ရှာမတွေ့တာမရှိဘူး။

ဒါတောင်မှ အစီအရင်ပညာရပ်ပေါင်းစုံကို စုစည်းလေ့လာပြီးတာတောင် ဓားအစီအရင်ကို ၂၈ အခြေခံအထိ မြှင့်တင်လို့ မရသေးဘူး။

ဘာလို့လဲဆိုတော့ သူ့ရဲ့ အစီအရင်ပညာရပ်အဆင့်က ၂၇ အခြေခံမှာ တန့်နေလို့ပဲ။

ဒါပေမဲ့ ၂၇ အခြေခံရှိတဲ့ မွေးရာပါ ဓားအစီအရင်ဆိုတာကလည်း အလွန်ကြောက်မက်ဖွယ် ကောင်းနေပါပြီ။

လွန်ခဲ့တဲ့ နှစ်တစ်သောင်းတုန်းက သူ့ရဲ့ မွေးရာပါ ဓားအစီအရင်က ယဲ့မော်ရဲ့ နတ်ဘုရားဆင်းသက်ခြင်းကြောင့် ပျက်စီးလုနီးပါး ဖြစ်ခဲ့ဖူးတယ်။ အခုတော့ ပြန်လည်ကောင်းမွန်သွားရုံသာမက၊ အရင်က မရောက်ဖူးတဲ့အဆင့်အထိ တိုးတက်လာခဲ့ပြီ။

တာအိုဓားပေါင်း ၂၄၃၀ တိတိ ပါဝင်တယ်။

ပြီးတော့ တာအိုဓားတစ်ချောင်းချင်းစီရဲ့ အဆင့်က အဆင့် ၉ အထိ ရောက်နေပြီ။

မရေမတွက်နိုင်သော ဓားချီတွေက သူ့ခန္ဓာကိုယ်နဲ့ ဓားကြာပန်းကြားမှာ လှည့်ပတ်စီးဆင်းနေသည်။

သူက ၂၇ အခြေခံ ၁၀ မျက်နှာ အချိန်ခေါင်းလောင်း ဓားအစီအရင်ကြီးကို အသုံးပြုပြီး၊ ပိုမြင့်မားတဲ့ ၂၈ အခြေခံ အစီအရင်ကို တွက်ချက်နေခြင်းဖြစ်သည်။

အချိန်အတော်ကြာပြီးနောက်၊ လီချန်၏ပတ်လည်က ဓားချီတွေ တဖြည်းဖြည်း ပျောက်ကွယ်သွားပြီး၊ ဓားကြာပန်းလည်းကျုံ့ဝင်ကာ သူ့ခန္ဓာကိုယ်ထဲ ဝင်ရောက်သွားသည်။

သူ မျက်လုံးများကို ဖြည်းညှင်းစွာ ဖွင့်လိုက်သည်။ မျက်နှာပေါ်တွင် ပင်ပန်းနွမ်းနယ်မှုများ ပေါ်နေသည်။

သူ့ရဲ့ လက်ရှိအဆင့်အတန်းနဲ့ အချိန်ခေါင်းလောင်းရဲ့အကူအညီပါတာတောင်မှ စွမ်းအင်ကုန်ခမ်းမှု များပြားနေတုန်းပဲ။

"ခက်ခဲလိုက်တာ" လီချန် သက်ပြင်းချလိုက်သည်။

ထို့နောက် သူ စနစ်မျက်နှာပြင်ကို ခေါ်ယူလိုက်သည်။

အိမ်ရှင်: လီချန်။

နတ်ဝိညာဉ် (ကောင်းကင်တာအို)။

မဟာယာနနယ်ပယ် (နှောင်းပိုင်း ၉၄/၁၀၀)။

အချိန်ခေါင်းလောင်း (နတ်ဘုရားကိရိယာ ၄၇၅၈၆၃၈/၁၀၀၀၀၀၀၀)

ကောင်းကင်ဘုံအဌမဓား (အထွတ်အထိပ်)။

မျက်လုံးခြောက်လုံးပိုင်ဆိုင်သော ဟွန်တွန်လျှို့ဝှက်နတ်ဘုရား သက်ဆင်းခြင်းပညာ (ကြီးမားသော သက်ဆင်းခြင်း ၉၉/၁၀၀)။

လင့်တုန်းလောကသစ်ပင် (အဆင့် ၉ ၉၉/၁၀၀)။

အရန်နိယာမများ: အားလုံး အဆင့် ၉ (၉၉/၁၀၀)။ (လုရှန်နိယာမပါ,အပါ)

ချန်ယွမ်အစီအရင်ကျမ်း (နှစ်ဆယ့်ခုနစ်အခြေခံ ၉၉/၁၀၀)။

ဝိညာဉ်ဆေးပင်စိုက်ပျိုးသူ(အဆင့်ဆယ့်လေး ၇၈/၁၀၀)။

လက်နက်သန့်စင်သူ (အဆင့်ဆယ့်ငါး ၃၄/၁၀၀)။

အဂ္ဂိရတ်ဆရာ (အဆင့်ဆယ့်ငါး ၄၃/၁၀၀)။

သားရဲထိန်းကျောင်းသူ (အဆင့် ၁၃ ၈၈/၁၀၀)။

သူ့ရဲ့ ကျင့်ကြံမှုက မဟာယာနနယ်ပယ် နှောင်းပိုင်း ၉၄ မှတ် ရောက်နေပြီ။

နောက်ထပ် နှစ် ၃၀၀၊ ၄၀၀ လောက်ဆိုရင် မဟာယာနနယ်ပယ် အထွတ်အထိပ်ရောက်လောက်ပြီ။

ဝမ်းနည်းစရာက ကောင်းကင်ဘုံနဝမမြောက်ဓားကို လုံးဝဝင်ပေါက်မတွေ့သေးဘူး။ ဒီနှစ်တစ်သောင်းလုံးလုံး ကြိုးစားခဲ့ပေမဲ့ ဘာတုံ့ပြန်မှုမှမရှိဘူး။

ဒီ၉ ခုမြောက်ဓားကွက်ဆိုတာ တကယ်ရောရှိရဲ့လားလို့တောင် သံသယဖြစ်မိတယ်။

လုရှန်ကတင် နတ်ဘုရားအဆင့်ကို ခြိမ်းခြောက်နိုင်နေပြီဆိုတော့၊ ၉ ခုမြောက် ဓားကွက်က ဘယ်လောက်တောင် မြင့်မားမလဲ။

သေချာတာကတော့ ဖြစ်နိုင်ခြေတစ်ခုရှိတယ်။ သူ့ရဲ့ နိယာမ ၉ ခုစလုံးက အဆင့် ၉ အကန့်အသတ်မှာ တန့်နေလို့ဖြစ်မယ်။

စည်းမျဉ်းအဆင့်ကို တက်လှမ်းနိုင်မှသာ ကောင်းကင်ဘုံနဝမမြောက်ဓားကို နားလည်သဘောပေါက်နိုင်မလား မသိဘူး။

ဒီနှစ်တစ်သောင်းအတွင်းမှာ သူက နိယာမ ၉ ခုကို ပေါင်းစပ်ပြီး စစ်မှန်တဲ့ စည်းမျဉ်းအဖြစ် ပြောင်းလဲဖို့ အမြဲကြိုးစားခဲ့တယ်။ ရလဒ်တွေလည်း အများကြီးရခဲ့ပါတယ်။

ဒါက ရှေးဟောင်းနတ်ဘုရားကျင့်စဉ်လမ်းအရ မဟာယာနအဆင့်ကနေ နတ်ဘုရားအဆင့်ကို တက်လှမ်းတဲ့ နည်းလမ်းပဲ။

ဒါပေမဲ့ ရှေးဟောင်းကျင့်ကြံသူတွေက များသောအားဖြင့် နိယာမ ၂ ခု၊ ၃ ခုလောက်ပဲ ရွေးပြီး ပေါင်းစပ်ကြတာ။ လီချန်လို နိယာမ ၉ ခုလုံး ပေါင်းစပ်တာမျိုးက... မရှိဖူးဘူး။

ကျီမိသားစု မှတ်တမ်းတွေအရ ကောင်းကင်ဘုံကိုးလွှာဓားကို ဖန်တီးခဲ့တဲ့ ရှန်ရှောင်မသေမျိုးဧကရာဇ်တောင်မှ နိယာမ ၇ ခုပဲ ပေါင်းစပ်ခဲ့တာ။

ကောင်းကင်ဘုံကိုးလွှာဓားကို ဖန်တီးပြီးမှ နိယာမ ၉ ခုလုံးကို နားလည်ခဲ့တာဖြစ်ပေမဲ့၊ စည်းမျဉ်းက ပုံပေါ်ပြီးသားဖြစ်နေလို့ နောက်ထပ် နိယာမတွေ ထပ်ပေါင်းထည့်တဲ့အခါ စည်းမျဉ်းရဲ့အဆင့်အတန်း တိုးတက်မှုက လျော့နည်းသွားတယ်။

နတ်ဘုရား မဖြစ်ခင်ကတည်းက နိယာမအားလုံးကို ပေါင်းစပ်ထားမှသာ ကိုယ်ပိုင်မွေးရာပါစည်းမျဉ်းဖြစ်လာမှာ။

နောင်မှ ထပ်ပေါင်းထည့်တဲ့ နိယာမတွေက စည်းမျဉ်းရဲ့အဆင့်အတန်းကို မမြှင့်တင်နိုင်ဘူး။

ပြီးတော့ ပေါင်းစပ်တဲ့ နိယာမ များလေလေ၊ အခက်အခဲက ကြီးမားလေလေပဲ။

ဒါကြောင့် နတ်ဘုရားဖြစ်ဖို့ အခွင့်အလမ်းများအောင် မဟာယာနကျင့်ကြံသူတိုင်းက ကိုယ့်အင်အားကို ချင့်ချိန်ရတယ်။ ကိုယ့်အကန့်အသတ်ထက် ပိုပြီး ပေါင်းစပ်ဖို့ ကြိုးစားရင်၊ နောက်ဆုံးမှာ စည်းမျဉ်းအဖြစ် မပြောင်းလဲနိုင်ဘဲ မဟာယာနအဆင့်မှာပဲ တစ်သက်လုံး တန့်နေသွားတတ်တယ်။

"အစီအရင် တိုးတက်ဖို့က ခက်ခဲတယ်... နိယာမ ပေါင်းစပ်ဖို့က ပိုခက်ခဲပါလား" လီချန် ခေါင်းခါလိုက်သည်။

သေချာတာကတော့ အစီအရင်ပဲဖြစ်ဖြစ်၊ နိယာမ ပေါင်းစပ်တာပဲဖြစ်ဖြစ်... အတင်းအဓမ္မ လုပ်ယူလို့ မရဘဲ၊ သဘာဝကျကျဖြစ်လာဖို့လိုအပ်တယ်။

အတင်းလုပ်ယူရင် ဉာဏ်အလင်းပွင့်ဖို့ ခက်ခဲတယ်။

ဒါကြောင့် သူ မလောပါဘူး။

စိတ်ကို တည်ငြိမ်အောင်ထားပြီး၊ တခြားကိစ္စတွေပေါ်မှာ အာရုံစိုက်ထားလိုက်သည်။

"နောက်ထပ် ဟွေ့ယွမ်ကပ်ဘေးရောက်ဖို့ နှစ် ၁ သိန်း ၁ သောင်းကျော် လိုသေးတယ်... ပြီးတော့ သာမန် ကပ်ဘေးလောက်ပဲဖြစ်မှာမို့ သိပ်ပြီး ထိခိုက်မှုရှိမှာမဟုတ်ဘူး" လီချန် တွက်ချက်ကြည့်လိုက်သည်။

အဲဒီအချိန်ရောက်ရင် ယွီဟွာနတ်ဘုရားနန်းတော်ရဲ့အင်အားက ဘယ်လောက်ထိ ကြီးမားနေမလဲ မသိဘူး။

အချိန်ခေါင်းလောင်းရဲ့အကူအညီနဲ့ဆိုရင် ဟွေ့ယွမ်တစ်ခုစာ (နှစ် ၁ သိန်းကျော်) ကာလအတွင်းမှာ အဆင့် ၇၊ ၈၊ ၉ ရှိတဲ့ ကျင့်ကြံသူကြီးတွေ အမြောက်အမြား မွေးထုတ်နိုင်လိမ့်မယ်လို့ ယုံကြည်တယ်။ သူ ကိုယ်တိုင်လည်း နတ်ဘုရားအဆင့် ရောက်နေလောက်ပြီ။

လီချန် အချိန်ခေါင်းလောင်း ခန်းမဆောင်မှ ထွက်ခွာပြီး အခြားခန်းမဆောင်တစ်ခုသို့ ရောက်ရှိလာသည်။

"ဆရာ" ခန်းမဆောင်ထဲတွင် စောင့်ဆိုင်းနေသော ရှင်းကျွေးက အလျင်အမြန် ဂါရဝပြုလိုက်သည်။

"ဘာကိစ္စ ရှိလို့လဲ" လီချန် ထိုင်လိုက်သည်။

"ဆရာ... ဒီတစ်ခေါက် ရွေးချယ်ခံရတဲ့ နတ်ဘုရားမျိုးစေ့ တပည့်တွေထဲမှာ မွေးရာပါနတ်ဘုရားအမြစ် ပါလာပါတယ်..." ရှင်းကျွေး၏လေသံတွင် စိတ်လှုပ်ရှားမှုများ ပါဝင်နေသည်။

"မွေးရာပါနတ်ဘုရားအမြစ်?" လီချန် အံ့သြသွားသည်။

မွေးရာပါနတ်ဘုရားအမြစ်ဆိုတာဘာလဲ သူ ကောင်းကောင်း သိတာပေါ့။

သူ သိထားတဲ့ သတင်းအချက်အလက်တွေအရ၊ ရှေးဟောင်းနတ်ဘုရားကမ္ဘာ ခေတ်တုန်းက... မွေးရာပါနတ်ဘုရားအမြစ်ဆိုတာ မွေးဖွားလာကတည်းက တကူးတက မကျင့်ကြံရင်တောင်မှ သဘာဝအလျောက် နတ်ဘုရားချီကို စုပ်ယူနိုင်ပြီး၊ နောက်ဆုံးမှာ နတ်ဘုရား ဖြစ်လာနိုင်သူကို ခေါ်တာ။

ပြီးတော့ ဒီလိုလူတွေက များသောအားဖြင့် မိုးကြိုးအတိဒုက္ခ မရှိကြဘူး။

ကောင်းမွန်စွာ ပြုစုပျိုးထောင်ပေးရင် မသေမျိုးဧကရာဇ်အဆင့်အထိ မျှော်မှန်းလို့ရတယ်။

ဒါက လက်ရှိ ရွှေနတ်ဘုရားတွေထဲက အဆင့် ၉ မသေမျိုးဧကရာဇ်ကိုပြောတာ မဟုတ်ဘူးနော်... စစ်မှန်တဲ့ ရှေးဟောင်း မသေမျိုးဧကရာဇ်ကို ပြောတာ။

ကျီမိသားစု သမိုင်းကြောင်းမှာ မွေးရာပါနတ်ဘုရားအမြစ်တစ်ယောက် ပေါ်ထွက်ခဲ့ဖူးတယ်လို့ ဆိုကြတယ်။ ဒါပေမဲ့ ကံဆိုးစွာနဲ့ သတင်းပေါက်ကြားသွားပြီး ဟွန်တွန်အဖွဲ့အစည်းရဲ့ လုပ်ကြံသတ်ဖြတ်မှုကို ခံလိုက်ရတယ်။

ဒီလို မွေးရာပါနတ်ဘုရားအမြစ်ကိုသာ ကျီမိသားစုက ကောင်းကောင်း ပျိုးထောင်ပေးလိုက်ရင်၊ နတ်ဘုရားကမ္ဘာ ပျက်စီးသွားတဲ့ အကန့်အသတ်ကြောင့် နတ်ဘုရား မဖြစ်နိုင်ရင်တောင်မှ... အဆင့် ၉ နိယာမ ပိုင်ဆိုင်တဲ့ မဟာယာနအဆင့် အစွမ်းထက်ကျင့်ကြံသူကြီးဖြစ်လာဖို့ ပြဿနာ မရှိဘူး။

ဟွန်တွန်အဖွဲ့အစည်းက ဒီလိုခြိမ်းခြောက်မှုကို အသက်ရှင်ခွင့်ပေးထားမှာမဟုတ်ဘူး။

ဘာပဲဖြစ်ဖြစ် ဒီလောက် နှစ်တွေ အကြာကြီးအတွင်း ယွီဟွာနတ်ဘုရားနန်းတော်မှာ ဒီလိုအဆင့်ရှိတဲ့တပည့်မျိုး တစ်ခါမှ မရဖူးသေးဘူး... အခု ရုတ်တရက်ပေါ်လာတော့ လီချန် အံ့သြတာ မဆန်းပါဘူး။

ထို့နောက် လီချန် ဘေးနားက ခန်းမဆောင်ငယ်ဆီ သွားလိုက်ပြီး၊ ဒီတစ်ခေါက် ရောက်လာတဲ့ မွေးရာပါနတ်ဘုရားအမြစ် ပိုင်ရှင်ကို သွားကြည့်လိုက်သည်။

၁၄၊ ၁၅ နှစ် အရွယ်၊ ရိုးရိုးရှင်းရှင်း ပုံစံရှိတဲ့ မိန်းကလေးတစ်ယောက်ဖြစ်သည်။

လီချန် အထက်အောက် စုန်ဆန်ကြည့်လိုက်ပြီး အံ့သြသွားသည်။

ဒီမိန်းကလေးရဲ့ ကျင့်ကြံမှုက ချီစုဆောင်းခြင်းအဆင့် ၁၂ ဆင့် သာ ရှိသေးတယ်။

ဒါက ယွီဟွာနတ်ဘုရားနန်းတော်ရဲ့ နတ်ဘုရားမျိုးစေ့ဖြစ်ဖို့ သတ်မှတ်ချက်ပဲ။

ဒါပေမဲ့ ထူးဆန်းတာက သူမရဲ့ ခန္ဓာကိုယ်က လေထုထဲမှာ ရှိတဲ့ နတ်ဘုရားချီတွေကို သဘာဝအလျောက် စုပ်ယူနေတာကို တွေ့ရတယ်။

ပုံမှန်အားဖြင့် အခြေခံတည်ဆောက်ခြင်းအဆင့်ပြီးမှသာ နတ်ဘုရားချီကို စုပ်ယူနိုင်ကြတာ။

သာမန် ချီစုဆောင်းခြင်းအဆင့် ကျင့်ကြံသူတွေအနေနဲ့ နတ်ဘုရားချီကိုစုပ်ယူဖို့ လုံးဝမဖြစ်နိုင်ဘူး။

"တကယ်ပဲ မွေးရာပါနတ်ဘုရားအမြစ်ပါလား" လီချန် ခေါင်းညိတ်လိုက်သည်။

ဒီမိန်းကလေးရဲ့ မွေးရာပါနတ်ဘုရားအမြစ် ပါရမီကို အစကတည်းက မတွေ့ရှိခဲ့ရတာက၊ ပြင်ပကမ္ဘာမှာ နတ်ဘုရားချီမရှိလို့ဖြစ်မယ်။

မွေးရာပါနတ်ဘုရားအမြစ် ပိုင်ရှင်တွေက နတ်ဘုရားချီကိုပဲ စုပ်ယူနိုင်တာ။

သာမန် ဝိညာဉ်စွမ်းအင်ကိုတော့... အဆင့်နိမ့်လွန်းလို့ မစုပ်ယူနိုင်ဘူး။

ဒီမိန်းကလေးက ယွီဟွာနတ်ဘုရားနန်းတော်ရဲ့ နတ်ဘုရားမျိုးစေ့ဖြစ်လာပြီး၊ ကောင်းကင်တာအိုနယ်ပယ် (နတ်ဘုရားချီရှိသော နေရာ) ထဲ ဝင်ရောက်လာမှသာ သူမရဲ့ မွေးရာပါနတ်ဘုရားအမြစ်ပါရမီက နိုးထလာခဲ့တာဖြစ်မယ်။

***