ချင်းဖုန်းကျန်းရမ်

လူတိုင်း၏ စူးစိုက်ကြည့်ရှုမှုအောက်တွင်...

ရှန်းယီသည် ယွီယွဲ့ဟူ၏သတိပေးစကားကို မကြားသကဲ့သို့ပင် ‌တည်နေရာရွေ့ပြောင်းခြင်းအစီအရင် အတွင်းသို့ တည့်တည့်မတ်မတ် လျှောက်လှမ်းဝင်ရောက်သွားလေ၏။

ဤသည်ကိုမြင်သောအခါ ဟွမ်ယွမ်အဆင့် သိုင်းအရှင်သခင်အများအပြားသည် ခဏမျှ တွန့်ဆုတ်နေပြီးနောက် သူ့နောက်သို့ လျင်မြန်စွာ လိုက်ပါသွားကြသည်။

မင်ရောင်ဝတ်ရုံနက်ဝတ်ဆင်ထားသော လူငယ်လေးသည် အဆင့်မြင့် နတ်ဆိုးဘုရင်သုံးပါးကို လွယ်ကူသက်သာစွာ တိုက်ခိုက်ခဲ့သည့် ပုံရိပ်သည် လူတိုင်း၏ စိတ်ထဲတွင် ကွက်ကွက်ကွင်းကွင်း ရှိနေဆဲပင်။

ခွန်အားအပြင် သူ၏နောက်ခံအင်အားသည်လည်း ထူးကဲလိမ့်မည်ဟု ခန့်မှန်းထားလေ၏။

သူသည် ရွှမ်ကွမ်းဂူကို ကြောက်ရွံ့နေစရာ မလိုသည်လည်း ဖြစ်ကောင်းဖြစ်နိုင်၏။

ကျန်းချန်းလင်၏ မောက်မာသော သဘာဝအရ ဤစီနီယာနှင့် တိုက်ပွဲဖြစ်ပွားခြင်းမှာ မကြာခင် ဖြစ်လာမည့်ကိစ္စသာ ဖြစ်သည်။

စီနီယာက ရှေ့ဆောင်လမ်းပြ ဖြစ်နေသဖြင့် သူတို့ကိုယ်တိုင်ဝင်ပါခဲ့လျှင်ပင် ရွှမ်ကွမ်းဂူအနေဖြင့် သူတို့အားလုံးကို မှတ်မိနေပါဦးမည်လော။

ပုံရိပ်များသည် အစီအရင်ထဲသို့ တစ်ယောက်ပြီးတစ်ယောက် ဝင်ရောက်ပျောက်ကွယ်သွားကြ၏။

အစီအရင်၏ တောက်ပမှုမှာ တဖြည်းဖြည်း မှေးမှိန်သွား၏။ ဟွမ်ယွမ်အဆင့် သိုင်းအရှင်သခင် အားလုံးသည် သူတို့၏တာအိုဝိညာဉ်များကို ဆင့်ခေါ်လိုက်ပြီး တိုက်ခိုက်ရန် ပြင်ဆင်လိုက်ကြသည်။

နောက်တစ်ခဏတွင် လူအုပ်ကြီး တစ်အုပ်သည် သူတို့၏မျက်စိရှေ့၌ ပေါ်လာလေသည်။

ရှစ်မျက်နှာစားသောက်ခန်းမ မှ လူပေါင်းများစွာသည် ဂူဗိမာန်အပြင်ဘက်တွင် စုရုံးနေကြ၏။

ဦးဆောင်လာသူမှာ မိန်းကလေးမေ့ပင် ဖြစ်ပြီး သူမ၏ရှေ့တွင် လည်ပင်းတုတ်တုတ်၊အဆီပြန်သောဝတ်ရုံကို ဝတ်ဆင်ထားကာ အသားမာတက်နေသောလက်ထဲတွင် ဆေးတံကို ကိုင်ထားသည့် တောင့်တင်းသန်မာသော အဖိုးအိုတစ်ဦး ရှိနေသည်။

ဤသည်ကို မြင်လိုက်ရသောအခါ ယွီယွဲ့ဟူ၏ တင်းမာနေသော စိတ်များသည် အလိုအလျောက် လျော့ကျသွားရလေ၏။

ရှစ်မျက်နှာစားသောက်ခန်းမ ဝင်ရောက်လာခြင်းက ရွှမ်ကွမ်းဂူနှင့် ကြားဝင်စေ့စပ်ပေးရန် ရည်ရွယ်သည်ဟု ဆိုလိုခြင်း ဖြစ်နိုင်ပါသည်။

သို့သော် သူတို့သည်ပုံမှန်အားဖြင့် သူတစ်ပါးကိစ္စများတွင် ဝင်ရောက်စွက်ဖက်လေ့ မရှိပေ၊ ယနေ့ တစ်ခုခုထူးခြားနေ၍ဖြစ်လိမ့်မည်။

ဇဝေဇဝါဖြစ်နေစဉ်အတွင်း ယွီယွဲ့ဟူသည် ကျန်းချန်းလင်၏ ပုံရိပ်ကို လျင်မြန်စွာ ရှာတွေ့လိုက်ပြီး သူ၏မျက်လုံးအိမ်များ ချက်ချင်း ကျဉ်းမြောင်းသွားလေ၏။

သူ ပထမတစ်ချက်ကြည့်ရုံဖြင့် သတိမထားမိခဲ့ရသည့် အကြောင်းရင်းမှာ...

မောက်မာလှသော ရွှမ်ကွမ်းဂူ၏တပည့်ကျော်သည် ယခုအခါ ချမ်းသာသောမိသားစုတစ်ခုမှ အစေခံတစ်ဦးကဲ့သို့ ခါးကို နက်ရှိုင်းစွာ ကိုင်းညွှတ်ထားသောကြောင့်ပင်။

ယခင်က မောက်မာခဲ့သော်လည်း ယခုရိုသေကိုင်းရှိုင်းနေပုံမှာ အတော်ပင် ရယ်စရာကောင်းလှ၏။

ကျန်းချန်းလင်၏ဘေးတွင်...

ရိုးသားသော မျက်နှာထားနှင့် လူငယ်လေးတစ်ဦး ရပ်နေသည်။ လက်ကို အောက်ချထားပြီး ဆံပင်ကို စုစည်းထားကာရိုးရှင်းသော ဝတ်ရုံရှည်ကို ဝတ်ဆင်ထားပြီး ခြေထောက်တွင် ပိုးဖိနပ်စီးထားသည်။

အမှန်စင်စစ် သူ၌နီရဲသော နှုတ်ခမ်းနှင့် ဖြူဖွေးသောသွားများ ရှိပြီး မျက်နှာမှာအနည်းငယ် ဝိုင်းစက်နေ၏။ သူ့ကို မြင်လိုက်ရသည်နှင့် အစီအရင်ထဲမှ ထွက်လာကာစ ဟွမ်ယွမ်အဆင့် သိုင်းအရှင်သခင်များပင်လျှင် သူတို့၏လက်နက်များကို အလျင်အမြန် ပြန်သိမ်းကာ ပြိုင်တူ ဦးညွှတ်လိုက်ကြ၏။

"ချင်းဖုန်း ကျန်းရမ် ကို ဂါရဝပြုပါတယ်"

ယွီယွဲ့ဟူသည် သူ့အစ်ကိုကို သယ်ဆောင်ထားရသဖြင့် ဦးညွှတ်၍မရသော်လည်း လေးစားမှုသဘောဖြင့် ခေါင်းငုံ့ပြလိုက်သည်။

ရှစ်မျက်နှာစားသောက်ခန်းမမှ လူများ ထွက်လာကြသည်မှာ အံ့သြစရာ မဟုတ်တော့ပေ။

ဝူထုံတောင်မှ အစစ်မှန်ပုဂ္ဂိုလ်တစ်ပါး ရောက်ရှိနေခြင်း ဖြစ်သည်။

ချင်းဖုန်းကျန်းရမ်သည် ဝူထုံတောင်၏ တပည့် ၁၂ ဦးအနက် အသက်အငယ်ဆုံး ဖြစ်သော်လည်း သူ၏ခွန်အားမှာ နတ်ဆိုးတစ်ထောင်ဂူ မှ ထိပ်တန်း နတ်ဆိုးဧကရာဇ် အဆင့် ၂၀ နှင့် ယှဉ်နိုင်စွမ်း ရှိသည်။

သူသည် သံသယဖြစ်ဖွယ်မရှိ အလွန်အရေးပါသော ပုဂ္ဂိုလ်တစ်ဦး ဖြစ်ပေသည်။

"အရမ်းယဉ်ကျေးစရာမလိုပါဘူး"

ချင်းဖုန်းကျန်းရမ်က အနည်းငယ် ခေါင်းညိတ်ပြပြီး လူအုပ်ကြီးကို ဝေ့ကြည့်လိုက်၏။

"အထဲမှာ နတ်ဆိုးတွေနဲ့ တွေ့ခဲ့ကြသလား"

"ကျွန်တော်ဒီမှာ တောက်လျှောက် စောင့်နေခဲ့တာပါ..."

ကျန်းချန်လင်က ခေါင်းမော့၍ စတင်ရှင်းပြသော်လည်း လူငယ်လေးက သူ့ကို တစ်ချက်မျှသာ လှမ်းကြည့်လိုက်သဖြင့် ပါးစပ်ကို အမြန် ပိတ်လိုက်ရလေ၏။

"ချင်းဖုန်းကျန်းရမ်ကို တင်ပြအပ်ပါတယ်၊ ကျွန်တော်တို့ တွေ့ခဲ့ပါတယ်"

အခြားသူများ စကားမပြောနိုင်ခင် ယွီယွဲ့ဟူသည် သူ့ရင်ထဲမှဒေါသကို မြိုသိပ်ကာ တည်ငြိမ်မှုကို ထိန်းသိမ်းရင်း ပြောလိုက်သည်။

"နတ်ဆိုးတစ်ထောင်ဂူကလား" လူငယ်လေးက မျက်ခွံကို ပင့်ကြည့်လိုက်လေ၏။

ဟွမ်ယွမ် သိုင်းအရှင်သခင်များက ပြန်ဖြေလိုက်ကြ၏။

"ဟုတ်မှန်ပါတယ်၊ ရွှေဆေဘာနတ်ဆိုးဘုရင်၊ လေနက်နတ်ဆိုးဘုရင်၊ ပြီးတော့..."

"မင်းတို့တွေ အဓိပ္ပာယ်မရှိတာတွေ ပြောနေတာပဲ"

ကျန်းချန်းလင်က ဒေါသတကြီးအံကြိတ်ကာ ကြမ်းတမ်းသော မျက်နှာထားဖြင့် လှည့်ကြည့်လိုက်သည်။

"ငါက နတ်ဆိုးတစ်ကောင်မှ မမြင်ရဘဲနဲ့၊ ပြီးတော့ ငါ့သိုင်းဦးလေးက အထဲမှာ ရှိနေတုန်းပဲလေ၊ မင်းတို့ရဲ့ပါရမီလောက်နဲ့ အဲဒီနတ်ဆိုးဘုရင်တွေနဲ့ တကယ်တွေ့ခဲ့ရင် အသက်ရှင်လျက် ပြန်ထွက်လာနိုင်ပါ့မလား"

သူ၏စကားကြောင့် ဟွမ်ယွမ်သိုင်းအရှင်သခင် အများအပြား၏မျက်နှာထားများ အေးစက်သွားကြသည်။

သို့သော် သူတို့အားလုံး ကျန်းဇီရှန့်ကိစ္စကိုတော့ တညီတညွတ်တည်း လျစ်လျူရှုထားလိုက်ကြ၏။

"ကျွန်တော်တို့က နတ်ဆိုးဘုရင်တွေရဲ့ပြိုင်ဘက် မဟုတ်တာ မှန်ပါတယ်၊ ဒါပေမဲ့ စီနီယာတစ်ယောက် ဝင်ရောက်ကူညီပေးမှုကြောင့် အသက်ဘေးက လွတ်ခဲ့တာပါ၊ ဒါက ခင်ဗျားနဲ့ မဆိုင်ပါဘူး"

သူတို့သည် ကျန်းဇီရှန့်ကို တိုက်ခိုက်ခဲ့သော ကိစ္စကို နတ်ဆိုးများအပေါ် အဆင်ပြေသလို လွှဲချလိုက်ကြသည်။

ချင်းဖုန်းကျန်းရမ်သည် တည်နေရာရွေ့ပြောင်းအစီအရင် တဖြည်းဖြည်း မှေးမှိန်ပျောက်ကွယ်သွားသည်ကို ကြည့်နေလိုက်၏။ နောက်ထပ် မည်သူမှ ထွက်မလာတော့ပေ။

ထို့နောက် သူသည် လူအုပ်ရှေ့ဆုံးရှိ မင်ရောင်ဝတ်ရုံနက်နှင့် လူငယ်ကို တစ်ချက် ထပ်ကြည့်လိုက်သည်။

သူတို့ ပြောနေသော စီနီယာ ဆိုသည်မှာ မည်သူဖြစ်ကြောင်းနေရာယူထားပုံကို ကြည့်ရုံဖြင့် ခန့်မှန်းနိုင်သည်။

ထို့ကြောင့် သူသည် ကျန်းချန်းလင်၏ ပခုံးကို ပုတ်ကာ ဂရုမစိုက်သလို ပြောလိုက်၏။

"ဆုံးရှုံးမှုအတွက် စိတ်ကို ကြံ့ခိုင်အောင် ထားပါ"

"မင်း ပါးစပ်ပိ..."

ကျန်းချန်းလင်သည် မသိစိတ်ဖြင့် ပြန်ဆဲရန် ပြင်လိုက်သော်လည်း သူ၏ခန္ဓာကိုယ်မှာ အနည်းငယ် တုန်ခါသွားပြီးနောက် သူ့ပါးသူ ပြန်ရိုက်ကာ ရှင်းပြလိုက်လေ၏။

"ကျေးဇူးပြုပြီး ဒေါသမထွက်ပါနဲ့ အစစ်မှန်ပုဂ္ဂိုလ်၊ ကျွန်တော်က သိုင်းဦးလေးအတွက် အရမ်း စိုးရိမ်နေလို့ပါ"

"ရပါတယ်၊ ငါကသာ နောက်ကျမှ ရောက်လာခဲ့တာပါ"

ချင်းဖုန်းကျန်းရမ်က မှတ်ချက်ချလိုက်၏။

လူငယ်လေးသည် လက်ကို ပြန်ရုပ်လိုက်ပြီး ခေါင်းခါကာ ရှစ်မျက်နှာစားသောက်ခန်းမဘက်သို့ လှည့်ထွက်သွားလေသည်။

သူ၏ရိုးရှင်းသော အပြုအမူက အခြားသူများကို အံ့သြသွားစေ၏။

ဒါက ဘာကို ဆိုလိုတာလဲ... နတ်ဆိုးတစ်ထောင်ဂူက အရှင်သခင်ကျန်းကို ဂူဗိမာန်ထဲမှာတင် ခြုံခိုတိုက်ခိုက်ပြီး အောင်မြင်သွားပြီလို့ ဆိုလိုတာလား။

အားချင်းနှင့် ချန်ကျုံးတို့ကမူ လူအုပ်ကြီး တွေးနေသလို မဟုတ်ကြောင်း သိနေကြ၏။

သို့သော် လောလောဆယ်တွင် သူတို့သည် ဘာမှမသိသလို နေခဲ့ကြသည်။

ကျန်းမင်ယန်ကျဆုံးသွားသည်ကို ဘေးက ရပ်ကြည့်နေခြင်းကပင် ရွှမ်ကွမ်းဂူအနေဖြင့် သူတို့အသက်ကို တောင်းဆိုရန် လုံလောက်သော အကြောင်းပြချက် ဖြစ်နေသည်။ ထို့အပြင် ရွှီမိသားစု နှင့် မဟာချန်တို့သည် ရွှမ်ကွမ်းဂူနှင့် ပြဿနာ ရှိပြီးသား ဖြစ်လေ၏။

"ချင်းဖုန်းကျန်းရမ်"

ကျန်းချန်လင်က သူ့ကို ရုတ်တရက် လှမ်းခေါ်လိုက်သည်။

"ဘယ်သူလုပ်သွားတာလဲဆိုတာ ပြောပြပေးလို့ ရမလား"

လူငယ်လေးသည် ရပ်တန့်လိုက်ပြီး ခဏမျှ စဉ်းစားကာ မသေချာသလို ပြောလိုက်၏။

"အမွှေးဖြူနတ်ဆိုးဧကရာဇ် လား"

"ဒါပေမဲ့ ဘာကြောင့်..."

ကျန်းချန်းလင် ယိုင်နဲ့သွားပြီး မတ်တတ်ရပ်ရန်ပင် ခက်ခဲသွားပုံရသည်။

နတ်ဘုရားအသွင်ပြောင်းအဆင့် ပုဂ္ဂိုလ်ကြီးတစ်ပါး ကျဆုံးခြင်းသည် ရွှမ်ကွမ်းဂူအတွက်ပင် ခံနိုင်ရည်မရှိသော ဆုံးရှုံးမှုကြီး ဖြစ်သည်။

"အာ..."

လူငယ်လေးသည် လှည့်ကြည့်လိုက်ပြီး သူ့မျက်လုံးထဲမှ အနေခက်မှုကို ဖုံးကွယ်လိုက်လေ၏။

"ငါ သိပ်မသေချာဘူး"

ထိုစကားကို ကြားသောအခါ မိန်းကလေးမေ့နှင့် အဖိုးအိုတို့သည် မသိမသာ အကြည့်လွှဲလိုက်ကြသည်။

အဘယ်ကြောင့်နည်း။

အဘယ်ကြောင့်ဆိုသော် စီနီယာနီ ယူလာသော ပါဝင်ပစ္စည်းများသည် သွေးပြောင်းလဲခြင်း နတ်ဆိုးဧကရာဇ်အုပ်ချုပ်သော နတ်ဆိုးတစ်ထောင်ဂူ၏၁၉ ခုမြောက် ဂူမှ ဖြစ်သောကြောင့်တည်း။

ဤကဲ့သို့သော ဘေးအန္တရာယ်မျိုးသည် အင်အားစုတိုင်းကို တံခါးပိတ်ပုန်းအောင်းနေစေရန် ဖိအားပေးနိုင်ပေသည်။

ဒေါသထွက်နေသော နတ်ဆိုးတစ်ထောင်ဂူနှင့် သူတို့၏ဒေါသပြေပျောက်စေရန် ပေးဆပ်ရမည့် အသက်ပေါင်းများစွာကို သူတို့ မြင်ယောင်ကြည့်နိုင်သည်။

အခြားသူများအတွက် သိပ်မဆိုးလှသော်လည်း ရှစ်မျက်နှာ စားသောက်ခန်းမ၊ မဟာချန်နှင့် ရွှမ်ကွမ်းဂူတို့သည် တာဝန်မှ ရှောင်လွှဲနိုင်မည် မဟုတ်ပေ။ ပထမတစ်ဖွဲ့က စားဖိုမှူးအဖြစ်၊ နောက်တစ်ဖွဲ့က မဟာမိတ်အဖြစ် ပါဝင်ပတ်သက်နေသောကြောင့်ပင်။

ဝူထုံတောင်တွင် တပည့် ၁၂ ဦးသာ ရှိသော်လည်း တစ်ယောက်ထက်တစ်ယောက် ပို၍ ကြောက်မက်ဖွယ် ကောင်းကြလေ၏။

နီကျွင်းသည် လက်တုံ့ပြန်မှုကို ကြောက်ရွံ့နေမည် မဟုတ်ပေ။ သူ့စရိုက်အရ ရှစ်မျက်နှာ စားသောက်ခန်းမ သို့မဟုတ် မဟာမိတ်အင်အားစုများနှင့် ပတ်သက်၍ ပြဿနာတစ်စုံတစ်ရာ ပေါ်ပေါက်လာပါက သူသည် နောက်မှကလဲ့စားချေလိုက်ရုံသာ ရှိသည်။

ကံကောင်းထောက်မစွာဖြင့် ချင်းဖုန်းကျန်းရမ်သည် ကရုဏာတရားရှိပြီး မြေပြင်အနှံ့မှ သူ့ဂိုဏ်းတူညီနောင်များ၏ပြဿနာများကို ဖြေရှင်းပေးလေ့ရှိသည်။

ထိုအချက်ကို တွေးမိရင်း မေ့ရှီးယောင်သည် လူအုပ်ဘက်သို့ တိတ်တဆိတ် လှမ်းကြည့်လိုက်လေ၏။

လူအများအပြား ဝင်သွားခဲ့သော်လည်း ထက်ဝက်အောက်သာ ပြန်ထွက်လာခဲ့ကြပြီး ဟွမ်ယွမ်အဆင့် သိုင်းအရှင်သခင်များပင် ဆိုးရွားစွာ ထိခိုက်သေဆုံးမှုများ ရှိခဲ့သည်။

သူမသည် လူအုပ်၏ရှေ့ဆုံးမှ ဝတ်ရုံနက်နှင့် လူငယ်ကို အစောပိုင်းကတည်းက သတိထားမိခဲ့သည်။

သူ ထွက်ခွာစဉ်က ထိုမျှယုံကြည်မှု ရှိနေခဲ့သည်မှာ အံ့သြစရာ မဟုတ်တော့ပေ။

သူသည် စစ်မှန်သော စွမ်းရည်များကို ပိုင်ဆိုင်ထားသည့် အစွမ်းထက် ပုဂ္ဂိုလ်တစ်ဦး ဖြစ်နေခဲ့သည်။

"မိတ်ဆွေတို့ စိတ်မရှိဘူးဆိုရင် ရှစ်မျက်နှာ စားသောက်ခန်းမမှာ ခေတ္တ အနားယူဖို့ ဖိတ်ခေါ်ပါတယ်၊မိတ်ဆွေတို့ ခံစားသုံးဆောင်နိုင်ဖို့ ဟင်းကောင်းတွေကို ပြင်ဆင်ထားပါတယ်"

မိန်းကလေးမေ့၏ ပြတ်သားပြီး သာယာသော အသံ ထွက်ပေါ်လာ၏။ ဤတော့မှ လူတိုင်း သက်ပြင်းချနိုင်တော့သည်။

အနည်းဆုံးတော့ ချင်းဖုန်းကျန်းရမ် ရှေ့မှောက်တွင် ကျန်းချန်းလင်အနေဖြင့် ကိုယ်ခန္ဓာရှာဖွေမည့် ကိစ္စကို ထပ်ပြောရဲတော့မည် မဟုတ်ပေ။ သူ၏ ဖြူလျော့နေသော မျက်နှာကို မြင်လိုက်ရသဖြင့် သူတို့ စိတ်သက်သာရာ ရသွားကြသည်။

သူ ခံရတာ နည်းတောင် နည်းသေးတယ်။

"..."

ရှန်းယီသည် တိတ်ဆိတ်စွာ နားထောင်နေပြီး ရလဒ်အပေါ် ကျေနပ်နေလေ၏။

ရွှမ်ကွမ်းဂူမှ အထွတ်အထိပ် ဟွမ်ယွမ်အဆင့် သိုင်းအရှင်သခင်ကြီးကို ပြဿနာဟု သူ ထင်မြင်နေခြင်း မဟုတ်ပေ။ မဟာနတ်ဆိုးကိုးပါး အသွင်ပြောင်းခြင်းကျင့်စဉ် အဆင့်မြှင့်တင်ပြီးနောက်ပိုင်းတွင် သူ နားမလည်နိုင်သော သမားရိုးကျ မဟုတ်သည့် နည်းလမ်းများနှင့် မတွေ့ဆုံသရွေ့...ဟွမ်ယွမ်နယ်ပယ်ချင်း ထိပ်တိုက်ရင်ဆိုင်မှုတွင် သူသည် အဆင့် ၁ တွင် ရှိနေလောက်လေ၏။

သို့သော် ဂူဗိမာန်အတွင်းပိုင်းနှင့် အပြင်ဘက်သည် ကွာခြားမှု ရှိနေမြဲပင်။

အပြင်ဘက်တွင် မျက်လုံးပေါင်းများစွာနှင့် မတူညီသော အတွေးများစွာ ရှိနေသည်။

မလိုအပ်သော ရန်ငြိုးများအတွက် တန်ဖိုးရှိလှသော အမွှေးတိုင်ယုံကြည်မှုစွမ်းအားများကို ဖြုန်းတီးပစ်ခြင်းမှာ မကောင်းလှပေ။ နတ်ဆိုးများနှင့် ယှဉ်လျှင် ကျင့်ကြံသူများကို သတ်ဖြတ်ခြင်းမှာ တွက်ခြေမကိုက်လှပေ။

ထို့အပြင် ရွှမ်ကွမ်းဂူ၏အခြေခံအုတ်မြစ်ကို ထည့်သွင်းစဉ်းစားကြည့်လျှင်...

အကယ်၍ သူတို့သာ သူ့ကို တိုက်ခိုက်ရန် အင်အားအကုန် အာရုံစိုက်လိုက်ပါက ၎င်းသည် စစ်မှန်သော ဒုက္ခ ဖြစ်လာပေလိမ့်မည်။