အခန်း (၂၀၈)

အခန်း။ ၂၀၈

ဘေးပတ်ဝန်းကျင်မှ အခြေအနေအရပ်ရပ်ကို မသိရှိသေးသော လုချွမ်းသည် အထက်ကောင်းကင်ယံမှနေ၍ သူ့ထံသို့ အကြည့်တစ်စုံက စိုက်ကြည့်နေသည်ကို လုံးဝသတိမပြုမိခဲ့ပေ။

“စတုတ္ထအဆင့် ဆင့်ကဲဇွန်ဘီ လေးကောင်တောင်ပဲ... ဖေဖေ့ရဲ့ ကြိုးစားမှုတွေကတော့ အရာထင်လာပြီထင်တယ်”

ကျိရုရွှယ်သည် အခန်းအတွင်း၌ တင်ပလ္လင်ခွေထိုင်နေရင်း ပါးပြင်ပေါ်၌ အပြုံးနုနုလေးတစ်ခု ပေါ်လွင်နေသည်။ ယခုအချိန်တွင် သူမသည် ဝိညာဉ်ချင်းဆက်သွယ်ခြင်းအတတ်ကို အသုံးပြု၍ ပျားငယ်တစ်ကောင်အား စေခိုင်းကာ အောက်ဘက်ရှိ မြင်ကွင်းများကို စောင့်ကြည့်နေခြင်းဖြစ်သည်။

ခြံဝင်းတံတိုင်းအပြင်ဘက်တွင် မတ်တပ်ရပ်နေသော စတုတ္ထအဆင့် ဇွန်ဘီလေးကောင်ကို မြင်လိုက်ရသည့်အခါ ကျိရုရွှယ်၏ စိတ်ထဲ၌ နက်ရှိုင်းသော လုံခြုံမှုအတိကို ခံစားလိုက်ရသည်။ သူမသည်လည်း လုချွမ်းကဲ့သို့ပင် အတိုင်းမသိ ဝမ်းမြောက်နေမိသည်။ အဘယ်ကြောင့်ဆိုသော် ဤစတုတ္ထအဆင့် ဇွန်ဘီလေးကောင် ထပ်မံတိုးပွားလာခြင်းမှာ ချင်းရွှေခြံဝင်း၏ စစ်အင်အားကို အဆမတန် မြင့်မားသွားစေသောကြောင့်ပင်။

မှတ်သားဖွယ်ရာမှာသူမ၏ဖခင်ဖြစ်သူ ဇွန်ဘီဘုရင်ကို မရေတွက်ဘဲ ယခင်က ခြံဝင်းတစ်ခုလုံး၌ စတုတ္ထအဆင့် တိုက်ခိုက်ရေးသမား နှစ်ဦးသာ ရှိခဲ့ခြင်းဖြစ်သည်။ သို့သော် မျက်တောင်တစ်ခတ်အတွင်းမှာပင် ခြံဝင်း၏ စတုတ္ထအဆင့် အင်အားစုမှာ ခြောက်ဦးအထိ တိုးတက်လာခဲ့ပြီ ဖြစ်သည်။

ဤအချက်က ကျိရုရွှယ်အား လူသားများဘက်မှ ရန်စလာမှုကို ရင်ဆိုင်ရန် ပိုမိုယုံကြည်မှု ရှိစေသည်။ သူမ၏ အမြင်အရ လူသားရှင်သန်ကျန်ရစ်သူများ အခြေစိုက်စခန်းဘက်မှ အကြီးစား လက်နက်ကိုင်တပ်မတော်ကို အလုံးအရင်းနှင့် စေလွှတ်ခြင်းမျိုး မရှိပါက ဆင့်ကဲစွမ်းရည်

ရှင်အဖွဲ့များသက်သက်ဖြင့်မူ သူမနှင့် သူမဖခင်ကို မည်သို့မျှ ယှဉ်နိုင်မည် မဟုတ်ပေ။ စတုတ္ထအဆင့် အင်အားစုမျှဖြင့်ပင် ပတ်ဝန်းကျင်ရှိ ရှင်သန်ကျန်ရစ်သူမြို့များမှာ ယှဉ်နိုင်စွမ်း မရှိရာ သူတို့၏ ခြံဝင်းကို ဘယ်လိုလုပ် ရင်ဆိုင်နိုင်မှာလဲ။

ကျန်းဟိုင် ရှင်သန်ကျန်ရစ်သူများ အခြေစိုက်စခန်း ဧရာမ အစည်းအဝေးခန်းမကြီးတစ်ခုအတွင်း၌…

ကျယ်ဝန်းလှသော အစည်းအဝေးစားပွဲကြီး၏ အလယ်တွင် ဆင့်ကဲပြောင်းလဲသူ ဆယ့်ငါးဦးသည် ငါးဦးစီ အုပ်စုခွဲ၍ တစ်စုံတစ်ခုကို အလေးအနက် ဆွေးနွေးနေကြသည်။

ထိုအုပ်စုများထဲတွင် ဝမ်လေ့သည်လည်း သူ၏ အဖွဲ့ဝင်ငါးဦးနှင့်အတူ ထိုင်နေသည်။ အခြေစိုက်စခန်းမြို့တော်သို့ ပြန်ရောက်ပြီးနောက် မကြာမီမှာပင် သူ၏အဖွဲ့၌ လစ်လပ်နေသော နေရာများကို မြို့တော်တာဝန်ရှိသူများက ဖြည့်ဆည်းပေးခဲ့သဖြင့် ယခုအခါ သူ၌ အသင်းဖော်လေးဦး ပြန်လည်ရှိနေပြီ ဖြစ်သည်။

ဝမ်လေ့ ဤအစည်းအဝေးခန်းမသို့ ရောက်ရှိနေရခြင်းမှာ အဆင့်မြင့်ကွပ်ကဲမှုဌာနက ကျန်းနန်မြို့ပြခရိုင်အတွင်း၌ တာဝန်ထမ်းဆောင်ရန်အတွက် ထူးချွန်ထက်မြက်သော အထူးစစ်ဆင်ရေးအဖွဲ့ သုံးဖွဲ့ကို ရွေးချယ်လိုက်သောကြောင့် ဖြစ်သည်။ ယခုအခါ သူတို့ကို တရားဝင် အမိန့်စာများ ပေးအပ်ရန် ခေါ်ယူထားခြင်းဖြစ်ပြီး အမိန့်ရသည်နှင့် တစ်ပြိုင်နက် ထွက်ခွာကြရမည်ဖြစ်သည်။

မူလက ဝမ်လေ့၏ အဖွဲ့မှာ ဤတာဝန်အတွက် ပထမဦးစားပေး ရွေးချယ်ခံရခြင်း မဟုတ်ပေ။ အဓိကအကြောင်းရင်းမှာ သူ၏အဖွဲ့သည် လူသစ်များဖြင့် ပြန်လည်ဖွဲ့စည်းထားကာ အဖွဲ့ဝင်သစ်နှစ်ဦးမှာ အတွေ့အကြုံ မရှိသေးသဖြင့် အရေးကြီးသော မစ်ရှင်တစ်ခုကို ချက်ချင်းထမ်းဆောင်ရန် မသင့်တော်သောကြောင့် ဖြစ်သည်။ သို့သော် ဝမ်လေ့ကိုယ်တိုင်က တာဝန်ယူလိုကြောင်း အပြင်းအထန် တောင်းဆိုခဲ့သည့်အပြင် သူ၏အဖွဲ့မှာ ယခင်ကလည်း ဆက်စပ်တာဝန်များကို ထမ်းဆောင်ဖူးသဖြင့် ကျန်းနန်မြို့ပြခရိုင်၏ အခြေအနေကို ပိုမိုကျွမ်းကျင်သောကြောင့် နောက်ဆုံးတွင် အဆင့်မြင့်ကွပ်ကဲမှုဌာနက သဘောတူခဲ့ခြင်း ဖြစ်သည်။

အမှန်စင်စစ် ကိုယ်ယောင်ဖျောက်အဖွဲ့၏ ဖောက်ပြန်မှုကို အချိန်မီ ဖော်ထုတ်နိုင်ခဲ့ခြင်းမှာ ဝမ်လေ့၏ ကျေးဇူးကြောင့်ဖြစ်ကြောင်း အထက်လူကြီးများက အသိအမှတ်ပြုထားကြသည်။

“ခေါင်းဆောင်ဝမ်... ဒီတစ်ခေါက် မစ်ရှင်အချက်အလက်တွေကို ကျွန်တော် ကြည့်ပြီးပြီ တကယ့်ကို ရှုပ်ထွေးလွန်းတယ်ဗျ။ ဒါပေမဲ့ ခေါင်းဆောင်ဝမ်ကတော့ တကယ့်ကို ထူးချွန်ပါတယ် ကိုယ်ယောင်ဖျောက်အဖွဲ့ရဲ့ ပြဿနာတွေကို ရှာဖွေတွေ့ရှိနိုင်ခဲ့တာကတော့ တကယ့်ကို အံ့ဩစရာပါပဲ”

ဝမ်လေ့၏ မျက်နှာချင်းဆိုင်တွင် ထိုင်နေသော ထိပ်ပြောင်ပြောင်နှင့် လူလတ်ပိုင်းအမျိုးသားတစ်ဦးက ချီးကျူးစကား ပြောလိုက်သည်။

“ဟားဟား... ခေါင်းဆောင်ကျန်းကလည်း မြှောက်ပင့်လွန်းနေပါပြီ။ ဒါက တိုက်ဆိုင်မှုတစ်ခုပါပဲ ကျွန်တော်က ကျန်းနန်မြို့ပြခရိုင်ဘက်ကို အရင်ကလည်း ရောက်ဖူးတော့ အခြေအနေကို နည်းနည်း သိနေတာပါ။ ကိုယ်ယောင်ဖျောက်အဖွဲ့ဝင်တွေရဲ့ စကားတွေကလည်း တစ်ခုနဲ့တစ်ခု မကိုက်ညီတာတွေ ရှိနေတာနဲ့ ကျွန်တော်လည်း လောင်းကြေးထပ်ပြီး စမ်းကြည့်လိုက်တာ... ကံကောင်းလို့ အလုပ်ဖြစ်သွားတာပါ”

ဝမ်လေ့က နှိမ့်ချစွာဖြင့် ခေါင်းခါယမ်းလျက် ပြန်ပြောလိုက်သည်။

အမှန်တကယ်တော့ ထိုစဉ်က သူ၌ ခိုင်လုံသော သက်သေအထောက်အထား မရှိဘဲ သံသယမျှသာ ရှိခဲ့ခြင်း ဖြစ်သည်။ ကိုယ်ယောင်ဖျောက်အဖွဲ့ကို စိတ်ညှို့ပြီး စစ်ဆေးရန် ဆုံးဖြတ်ခဲ့ခြင်းမှာ ပြန်စဉ်းစားကြည့်လျှင် အလွန်စွန့်စားရာ ရောက်လှသည်။ အကယ်၍ တစ်ဖက်လူတွင် အပြစ်မရှိခဲ့ပါက ဝမ်လေ့အနေဖြင့် ရန်သူလေးဦး တိုးလာမည့်အပြင် အခြေစိုက်စခန်းမြို့တော်၏ ပြင်းထန်သော အပြစ်ပေးမှုကိုလည်း ရင်ဆိုင်ရမည် ဖြစ်သည်။ အဘယ်ကြောင့်ဆိုသော် ကိုယ်ယောင်ဖျောက်အဖွဲ့နှင့် ဝမ်လေ့တို့မှာ မြို့တော်၏ တရားဝင်တပ်ဖွဲ့ဝင်များ ဖြစ်ကြသဖြင့် လက်တွဲဖော် ရဲဘော်ရဲဘက်များ ဖြစ်နေသောကြောင့်ပင်။

ဝမ်လေ့အနေဖြင့် အကြောင်းပြချက် ခိုင်လုံမှုမရှိဘဲ ရဲဘော်ရဲဘက်အချင်းချင်းအပေါ် ယခုကဲ့သို့ အရေးယူဆောင်ရွက်ခြင်းမျိုးကို အခြေစိုက်စခန်းမြို့တော်က တင်းကျပ်စွာ တားမြစ်ထားခြင်းဖြစ်သည်။ အကယ်၍ အဆင့်မြင့်ကွပ်ကဲမှုဌာနကသာ ဝမ်လေ့၏အပြစ်ကို ကိုယ်တိုင်ကိုယ်ကျ ပယ်ဖျက်ပေးခြင်း မရှိခဲ့ပါက သူသည် ကြီးမားသော သူရဲကောင်းကောင်းမှုကို ပြုခဲ့သော်လည်း တစ်စုံတစ်ရာသော ပြစ်ဒဏ်ကို သေချာပေါက် ခံစားရမည်သာ။

“ခေါင်းဆောင်ဝမ်ကလည်း နှိမ့်ချလွန်းနေပါပြီ။ တခြားသူသာဆိုရင် သံသယရှိနေရင်တောင် ဒီလောက်ကြီးမားတဲ့ စွန့်စားမှုကို လုပ်ရဲမှာ မဟုတ်ဘူးဗျ”

ခေါင်းဆောင်ကျန်းက ဝမ်လေ့၏ ပြတ်သားသော လုပ်ရပ်အပေါ် အထင်ကြီးလေးစားစွာဖြင့် သူ၏ ပြောင်ချောနေသော ဦးခေါင်းကို မသိစိတ်ဖြင့် ပွတ်သပ်ရင်း ပြောလိုက်သည်။

“မှန်တာပေါ့ ခေါင်းဆောင်ဝမ်လို သတ္တိမျိုးက လူတိုင်းမှာ ရှိတာမဟုတ်ဘူး။ အခြေစိုက်စခန်းက ခေါင်းဆောင်လျိုကို သတ်ခဲ့တဲ့ တရားခံကို မြန်မြန်ဆန်ဆန် ရှာဖွေနိုင်ခဲ့တာက ခေါင်းဆောင်ဝမ်ကြောင့်ပဲ။ ဒီလို ပြတ်သားတဲ့ ဆုံးဖြတ်ချက်မျိုးကို ကျွန်တော်လည်း တကယ့်ကို အားကျမိပါတယ်”

ဝမ်လေ့က ပြန်လည်စကားဆိုရန် ပြင်နေစဉ်မှာပင် သူ၏ ဘေးချင်းကပ်လျက် ဝိုင်းမှ အသံတစ်သံ ထွက်ပေါ်လာသည်။ စကားပြောသူမှာ လူငယ်တစ်ဦးဖြစ်သော်လည်း ဆံပင်များမှာ ဖြူဖွေးနေပြီး မျက်နှာပေါ်ရှိ အမာရွတ်ကြောင့် သူ၏ အပြုံးမှာ အနည်းငယ် ကြောက်မက်ဖွယ်ကောင်းနေသည်။

“ခေါင်းဆောင်လီ... ခင်ဗျားလည်း လာပြီး ဝိုင်းမြှောက်နေပြန်ပြီလား”

ဝမ်လေ့က စကားပြောသူကို ကြည့်ကာ မတတ်သာသလို ခေါင်းခါယမ်းလိုက်သည်။

“ဟားဟား... ကျွန်တော်က အမှန်အတိုင်း ပြောတာပါ ခေါင်းဆောင်ဝမ်ရာ။ အလွန်အကျွံ နှိမ့်ချလွန်းနေရင် မာနကြီးတယ်လို့ အထင်ခံရလိမ့်မယ်ဗျ”

ခေါင်းဆောင်လီက ရယ်မောရင်း ပြောလိုက်သည်။ ထို့နောက် သူက ဝမ်လေ့ကို ကြည့်ကာ ဆက်လက်ပြောကြားသည်မှာ “ကျွန်တော်တို့ အဖွဲ့သုံးဖွဲ့ထဲမှာ ခေါင်းဆောင်ဝမ်တို့အဖွဲ့ပဲ ကျန်းနန်မြို့ထဲမှာ တာဝန်ထမ်းဆောင်ဖူးတာဆိုတော့ နောက်ပိုင်းကျရင် ခင်ဗျားတို့ဆီက လမ်းညွှန်မှုတွေ အများကြီး လိုအပ်မှာပါ”

“ဟုတ်တာပေါ့ ကျန်းနန်မြို့ပြခရိုင်က အတော်လေးကို ထူးဆန်းခြောက်ခြားဖို့ ကောင်းတယ်လို့ ကြားတယ်။ ခေါင်းဆောင်ဝမ်... ဒီတစ်ခေါက်တော့ ကျွန်တော်တို့ အဖွဲ့နှစ်ဖွဲ့လုံးက ခင်ဗျားနောက်ကပဲ လိုက်မှာပါ”

မျက်နှာချင်းဆိုင်မှ ခေါင်းဆောင်ကျန်းကလည်း ပြုံးရွှင်စွာဖြင့် ခေါင်းညိတ်ထောက်ခံသည်။

“ခင်ဗျားတို့ နှစ်ယောက်ကတော့လေ...”

ဝမ်လေ့သည် သူတို့၏ စကားကို ကြားသောအခါ အခြားအဖွဲ့နှစ်ဖွဲ့မှာ သူ၏အဖွဲ့အား ဦးဆောင်ခိုင်းလိုခြင်းဖြစ်ကြောင်း ရိပ်မိလိုက်သည်။ သို့ဖြစ်ရာ သူသည် ချက်ချင်းပင် လက်ခါယမ်း၍ ငြင်းပယ်လိုက်သည်။

ထိုစဉ်

တုတ်... တုတ်... တုတ်...

ပြတ်သားသော ခြေသံများမှာ ဘေးဘက်မှ တဖြည်းဖြည်း နီးကပ်လာသည်။ ရောက်ရှိလာသူအား မြင်လိုက်ရသည့်အခါ အားလုံး၏ မျက်နှာရိပ်မျက်နှာကဲများ တင်းမာသွားကြပြီး တစ်ပြိုင်နက်တည်း ထရပ်လိုက်ကြရာ အစည်းအဝေးခန်းမတစ်ခုလုံး ချက်ချင်း တိတ်ဆိတ်သွားတော့သည်။

ရောက်ရှိလာသူမှာ အခြေစိုက်စခန်း၏ အမြင့်ဆုံးကွပ်ကဲရေးမှူးပင်။

"အားလုံး ထိုင်ကြပါ"

အမြင့်ဆုံးကွပ်ကဲရေးမှူးသည် စားပွဲ၏ ထိပ်ဆုံးနေရာတွင် ထိုင်လိုက်ပြီး အားလုံးအား ပြန်လည်ထိုင်ရန် လက်အချက်ပြလိုက်သည်။

"ဟုတ်ကဲ့ပါ"

အားလုံး ပြန်လည်ထိုင်လိုက်ကြသည်။

"ဒီနေ့ မင်းတို့ကို ဒီမှာ စုခိုင်းရတဲ့ အကြောင်းရင်းကတော့ ရှေ့လာမယ့် မစ်ရှင်အတွက်ပဲ။ မစ်ရှင်နဲ့ ပတ်သက်တဲ့ အချက်အလက်တွေကို မင်းတို့ဆီ ပို့ပေးထားပြီးပြီဆိုတော့ အခြေအနေကို သိထားကြပြီးသား ဖြစ်မှာပါ။ ဒီတာဝန်က အလွန်အရေးကြီးတယ်။ ဒါကြောင့် မင်းတို့ အဖွဲ့ခေါင်းဆောင် သုံးယောက်အနေနဲ့ အစွမ်းကုန် ကြိုးစားပြီး ကျန်းနန်မြို့ထဲက အဲဒီ ထူးဆန်းတဲ့ မိန်းကလေးကို ငါ့ဆီ ဖမ်းခေါ်လာပေးဖို့ မျှော်လင့်တယ်"

အမြင့်ဆုံးကွပ်ကဲရေးမှူးက တည်ကြည်သော မျက်နှာထား လေးနက်သော အသံဖြင့် အမိန့်ပေးလိုက်သည်။

"စိတ်ချပါ ခင်ဗျာ။ ကျွန်တော်တို့ တာဝန်ကို အောင်မြင်အောင် ထမ်းဆောင်မယ်လို့ အာမခံပါတယ်"

ဝမ်လေ့နှင့် အခြားသူများက ပြန်လည်ထရပ်ကာ အသံကျယ်ကျယ်ဖြင့် တုံ့ပြန်လိုက်ကြသည်။

"ကောင်းပြီ... ခေါင်းဆောင်ဝမ် မင်းက ဒီမစ်ရှင်နဲ့ ပတ်သက်လို့ အကျွမ်းကျင်ဆုံးဖြစ်တဲ့အတွက် ဟိုကို ရောက်တာနဲ့ စစ်ဆင်ရေးတွေကို မင်းပဲ ဦးဆောင်ပါ။ အဲဒီ မိန်းကလေး လွတ်မသွားအောင် သေချာ ဂရုစိုက်ပါ"

အမြင့်ဆုံးကွပ်ကဲရေးမှူးက ခေါင်းညိတ်ပြပြီး ဝမ်လေ့အား အထူးတလည် ညွှန်ကြားလိုက်သည်။

"ဟုတ်ကဲ့ပါ"

ဝမ်လေ့က လေးနက်စွာ ပြန်လည်ထူးလိုက်သော်လည်း သူ၏ မျက်ဝန်းများထဲတွင် ဒေါသအရိပ်အယောင်များ ယှက်သန်းသွားသည်။ ကျန်းနန်မြို့သို့ နောက်ဆုံးသွားခဲ့သော ခရီးစဉ်တွင် သူ၏ အသင်းဖော်နှစ်ဦးမှာ ကြောက်မက်ဖွယ်ကောင်းစွာ သေဆုံးခဲ့ရပုံကို သူ ပြန်လည်သတိရလိုက်မိသည်။ ဤထူးဆန်းသော မိန်းကလေး မစ်ရှင်နှင့် ဆက်စပ်ကြည့်လျှင် ထိုသူသည်ပင် သူ၏ အသင်းဖော်နှစ်ဦးအား သတ်ခဲ့သူဖြစ်နိုင်ကြောင်း သူ အပြင်းအထန် သံသယဝင်နေမိသည်။

သွေးကြွေးကို... သွေးနဲ့ပဲ ပြန်ဆပ်ရမယ်။