အခန်း (၂၀၉)

အခန်း။ ၂၀၉

ကျန်းနန်မြို့ပြခရိုင်၏ အပြင်ဘက်။

ဝုန်း... ဝုန်း... ဝုန်း...

ဟိန်းသံကြီးနှင့်အတူ ဝေးကွာသော အရပ်ဆီမှ ရဟတ်ယာဉ်သုံးစင်း ပျံသန်းလာကြသည်။ ညီညာပြန့်ပြူးသော မြေကွက်လပ်တစ်ခု၏ အထက်တွင် ထိုရဟတ်ယာဉ်များသည် ခေတ္တမျှ ဝဲပျံနေပြီးနောက် လူရိပ်ဆယ်ဂဏန်းခန့်သည် ကောင်းကင်ယံမှနေ၍ လျင်မြန်စွာ ဆင်းသက်လာကြသည်။

ဆင်းသက်လာသူများမှာ ဤမစ်ရှင်အတွက် ကျန်းဟိုင်အခြေစိုက်စခန်းမှ စေလွှတ်လိုက်သော အထူးစစ်ဆင်ရေးအဖွဲ့သုံးဖွဲ့ပင်။ ခဏအကြာတွင် ရဟတ်ယာဉ်များမှာ ပြန်လည်ကာ ပျံသန်း ထွက်ခွါသွားကြသည်။

မြေပြင်ပေါ်တွင် အဖွဲ့သုံးဖွဲ့သည် သူတို့၏ အသင်းခေါင်းဆောင်များအလိုက် စုရုံးလိုက်ကြသည်။

"ခေါင်းဆောင်ဝမ်... ခင်ဗျားက ကျွန်တော်တို့ထက်စာရင် ကျန်းနန်မြို့အကြောင်း ပိုသိတဲ့သူဆိုတော့ အခုကစပြီး ခင်ဗျားရဲ့ စီစဉ်ညွှန်ကြားမှုနောက်ကိုပဲ ကျွန်တော်တို့ လိုက်ပါ့မယ်။ နောက်ထပ် ဘာဆက်လုပ်ဖို့ အစီအစဉ်ရှိသလဲဗျ"

ဖြူဖွေးသော ဆံပင်များရှိသည့် ခေါင်းဆောင်လီက ဝမ်လေ့ကို ကြည့်ကာ အကြံပြုစကား ပြောလိုက်သည်။

ပုန်းအောင်းနေသော ရန်သူများသည် သေချာပေါက် အင်အားကြီးမားကြပေမည်။ အကယ်၍ အဖွဲ့သုံးဖွဲ့သာ လူစုခွဲ၍ တိုက်ခိုက်မည်ဆိုပါက တစ်ဖွဲ့ချင်းစီ အလွယ်တကူ ချေမှုန်းခံရနိုင်သဖြင့် အတူတကွ ပူးပေါင်းလှုပ်ရှားခြင်းမှာသာ ဘေးအကင်းဆုံး ဖြစ်သည်။

"ဟုတ်တယ် ခေါင်းဆောင်ဝမ် ကျွန်တော်တို့က ဒီနေရာနဲ့ ပတ်သက်ရင် သိပ်မကျွမ်းကျင်ဘူး။ ကျွန်တော်တို့မှာရှိတဲ့ အချက်အလက်အနည်းအကျဉ်းက ခင်ဗျားကိုယ်တိုင် လေ့လာထားတာတွေကို မယှဉ်နိုင်ပါဘူး။ အားနာမနေပါနဲ့တော့ ဒီစစ်ဆင်ရေးမှာ ခင်ဗျားရဲ့ အမိန့်အတိုင်းပဲ ကျွန်တော်တို့ လိုက်နာသွားမှာပါ"

ဘေးနားရှိ ပြောင်ချောနေသော ဦးခေါင်းနှင့် ခေါင်းဆောင်ကျန်းကလည်း ခါးတွင်ချိတ်ထားသော စီးကရက်ကို ဖယ်ရှားရင်း ပြုံး၍ ပြောလိုက်သည်။

သူတို့မှာ တာဝန်ယူရမည်ကို ကြောက်ရွံ့နေခြင်းမျိုး မဟုတ်ဘဲ ကျန်းနန်မြို့၏ အခြေအနေကို အမှန်တကယ်ပင် မကျွမ်းကျင်ခြင်းကြောင့် ဖြစ်သည်။ သူတို့အဖွဲ့နှစ်ဖွဲ့မှာ ယခင်က ကျန်းဟိုင်အခြေစိုက်စခန်း၏ အခြားသော အရပ်မျက်နှာများတွင်သာ တာဝန်ယူခဲ့ကြရပြီး ကျန်းနန်မြို့ပြခရိုင်နှင့်မူ တစ်ခါမျှ မပတ်သက်ဖူးကြချေ။

“ခေါင်းဆောင်နှစ်ယောက်လုံးက ဒီလိုပြောမှတော့ ကျွန်တော်လည်း အားမနာတော့ဘဲ ဒီစစ်ဆင်ရေးကို ဦးဆောင်ပါ့မယ်။ အကယ်၍ လိုအပ်ချက်တွေရှိရင်လည်း ဝိုင်းဝန်းဖြည့်စွက်ပေးကြဖို့ တောင်းဆိုချင်ပါတယ်”

ဝမ်လေ့သည် ခေတ္တမျှ ဝေခွဲမရဖြစ်နေပြီးမှ ခေါင်းညိတ်၍ သဘောတူလိုက်သည်။ အမှန်စင်စစ် ဤခရီးစဉ်မစမီကပင် အဆင့်မြင့်ကွပ်ကဲရေးမှူးကိုယ်တိုင်က သူ့အား ရှေ့လုပ်ငန်းစဉ်များ စီစဉ်ရန် တာဝန်ပေးအပ်ထားပြီးဖြစ်ရာ ငြင်းပယ်ရန်လည်း မသင့်တော်ပေ။

ဝမ်လေ့ သဘောတူလိုက်သည်ကို မြင်သောအခါ ခေါင်းဆောင်ကျန်းနှင့် ခေါင်းဆောင်လီတို့မှာ ပြုံးရွှင်သွားကြသည်။ ခေါင်းဆောင်ကျန်းက တက်ကြွစွာဖြင့် “ဒါဆိုရင် ခေါင်းဆောင်ဝမ်... ကျွန်တော်တို့အဖွဲ့တွေ ဘာဆက်လုပ်ကြမလဲ ကျန်းနန်မြို့ထဲကို တိုက်ရိုက်ဝင်ကြမလား ဒါမှမဟုတ် အခြေအနေကို အရင်ကင်းထောက်ဖို့ ရှေ့ပြေးတစ်ယောက်နှစ်ယောက်လောက် အရင်လွှတ်မလား” ဟု မေးမြန်းလိုက်သည်။

ယခင်တစ်ခေါက် ကျန်းနန်မြို့ထဲသို့ သူ၏အဖွဲ့ ဝင်ရောက်စဉ်က ဆင့်ကဲဇွန်ဘီများအားလုံး ပျောက်ကွယ်နေသည်ကို ဝမ်လေ့ ပြန်လည်အမှတ်ရလိုက်သည်။ ထိုအချက်ကို ထောက်ရှု၍ ကျန်းနန်မြို့ပြခရိုင်တစ်ခုလုံးတွင် ရန်သူ၏ နားမျက်စိများ ပျံ့နှံ့နေမည်မှာ သေချာသလောက်ရှိသည်ဟု သူ တွက်ဆလိုက်မိသည်။ ထိုဆင့်ကဲဇွန်ဘီများသည် မြို့အတွင်းရှိ ဆင့်ကဲပြောင်းလဲသူများ၏ လက်ချက်ဖြင့် သေဆုံးသွားခြင်းဖြစ်နိုင်သည်။

ဤသို့သော အခြေအနေမျိုးတွင် လူဆယ့်ငါးဦးပါဝင်သည့် အဖွဲ့ကြီးမှာ ရန်သူမသိအောင် လှုပ်ရှားရန် အလွန်ခက်ခဲလှသည်။ ထိုသို့ဆိုလျှင် ရန်သူက အလင်းတွင်ရှိပြီး သူတို့က အမှောင်တွင်ရှိသည် ဟူသော အားသာချက်မှာ ပျောက်ဆုံးသွားပေလိမ့်မည်။ ထို့ကြောင့် လူစုလူဝေးဖြင့် မြို့ထဲသို့ ဇွတ်တိုးဝင်ခြင်းမှာ မသင့်တော်ဟု ဝမ်လေ့က ယူဆလိုက်သည်။

“မိတ်ဆွေတို့... ကျန်းနန်မြို့ထဲမှာ ဆင့်ကဲပြောင်းလဲသူ ဘယ်နှယောက် ပုန်းနေသလဲဆိုတာ ကျွန်တော်တို့ မသိရသေးဘူး။ ဒါပေမဲ့ နည်းတဲ့အရေအတွက်တော့ မဟုတ်လောက်ဘူးလို့ ခန့်မှန်းရတယ်။ ရန်သူက ကြိုတင်ရိပ်မိမသွားအောင် အရင်ဆုံး ကင်းထောက်နိုင်စွမ်းရှိတဲ့သူတစ်ယောက်ကို မြို့ထဲလွှတ်ပြီး အခြေအနေကို အရင်စုံစမ်းခိုင်းတာက ပိုကောင်းမယ်လို့ ထင်ပါတယ်”

ဝမ်လေ့က ခေတ္တစဉ်းစားပြီးနောက် ခေါင်းဆောင်နှစ်ဦးအား အကြံပြုလိုက်သည်။ သူ စကားဆုံးသည်နှင့် တစ်ပြိုင်နက် ဝမ်လေ့၏ အကြည့်တို့က ခေါင်းဆောင်လီထံသို့ ရောက်ရှိသွားသည်။ ဘေးနားရှိ ခေါင်းဆောင်ကျန်းကလည်း ဝမ်လေ့နည်းတူပင် ခေါင်းဆောင်လီကို စိုက်ကြည့်လိုက်သည်။

အမှန်စင်စစ် ဤအဖွဲ့သုံးဖွဲ့၏ အခြေအနေနှင့် စွမ်းဆောင်ရည်များကို ခေါင်းဆောင်အချင်းချင်း အပြန်အလှန် ကောင်းစွာ သိရှိထားကြပြီးဖြစ်ရာ ဤတာဝန်အတွက် မည်သူက အသင့်တော်ဆုံးဖြစ်မည်ကို သူတို့ ရိပ်မိနေကြခြင်းပင်။

ဝမ်လေ့အကြံပြုသည့် ကင်းထောက်လုပ်ငန်းအတွက် အသင့်တော်ဆုံးပုဂ္ဂိုလ်မှာ ခေါင်းဆောင်လီ၏ အဖွဲ့ဝင်တစ်ဦးပင်။

ထိုဆင့်ကဲပြောင်းလဲသူ၏ လျှို့ဝှက်အမည်မှာ သိမ်းငှက်ဖြစ်သည်။

ကမ္ဘာပျက်ကပ်မတိုင်မီက သူသည် အမဲလိုက်ရာတွင် ကူညီရန် သိမ်းငှက်များကို လေ့ကျင့်မွေးမြူသည့် အသက်မွေးဝမ်းကျောင်း မုဆိုးတစ်ဦး ဖြစ်ခဲ့သည်။ ကမ္ဘာပျက်ကပ် ဆိုက်ရောက်လာသောအခါ သူရွေးချယ်မွေးမြူထားသော သိမ်းငှက်မှာ ဗီဇပြောင်း သားရဲတစ်ကောင် ဖြစ်လာခဲ့သော်လည်း သခင်ဖြစ်သူအပေါ် သစ္စာရှိမြဲ ရှိနေခဲ့သည်။ ထို့ပြင် ထိုဆင့်ကဲပြောင်းလဲသူကိုယ်တိုင်မှာလည်း သက်ရှိသတ္တဝါအချို့နှင့် ဝိညာဉ်စာချုပ် ချုပ်ဆိုနိုင်သည့် စွမ်းရည်ကို ရရှိခဲ့သည်။ ထိုစွမ်းရည်ကြောင့် သူသည် သူ၏ အိမ်မွေးတိရစ္ဆာန်နှင့် အမြင်အာရုံချင်း ချိတ်ဆက်နိုင်သည့်အပြင် အပြန်အလှန် စိတ်ချင်း ဆက်သွယ်နားလည်နိုင်စွမ်းလည်း ရှိလာခဲ့သည်။

သူ၏ သိမ်းငှက်နှင့် ဝိညာဉ်စာချုပ်ပြုလုပ်ထားခြင်းကြောင့် သိမ်းငှက်သည် ထူးကဲသော ကင်းထောက်နိုင်စွမ်းကို ပိုင်ဆိုင်ထားသူဖြစ်ရာ အခြေစိုက်စခန်းမြို့တော်က သူ့အား တန်ဖိုးထား၍ တရားဝင်တပ်ဖွဲ့အတွင်းသို့ စည်းရုံးသိမ်းသွင်းခဲ့ခြင်း ဖြစ်သည်။

အမှန်စင်စစ် အခြားအဖွဲ့နှစ်ဖွဲ့တွင်လည်း ကင်းထောက်ဆင့်ကဲပြောင်းလဲသူများ ရှိကြသော်လည်း သူတို့မှာ အနီးကပ်ကင်းထောက်မှသာ အလုပ်ဖြစ်ကြသဖြင့် ရန်သူ့နယ်မြေအတွင်း၌ ရိပ်မိသွားနိုင်သည့် အန္တရာယ်ရှိသည်။ သို့သော် သိမ်းငှက် အတွက်မူ ထိုသို့သော စိုးရိမ်စရာမလိုပေ။ သိမ်းငှက်တစ်ကောင်သည် မြို့ပြခရိုင်အတွင်း ပျံသန်းသွားပါက ရန်သူက တွေ့ရှိလျှင်ပင် သံသယဖြစ်စရာ အကြောင်းနည်းပါးလှသည်။

"ခေါင်းဆောင်လီ... ဒီကင်းထောက်တာဝန်အတွက်တော့ ခင်ဗျားတို့အဖွဲ့ကိုပဲ အားကိုးရတော့မယ်ဗျာ"

ဝမ်လေ့က လေးနက်စွာ ပြောလိုက်သည်။

ခေါင်းဆောင်ကျန်းကလည်း ထောက်ခံသည့်အနေဖြင့် ခေါင်းညိတ်ပြသည်။

ခေါင်းဆောင်လီသည် သူတို့၏ ဆိုလိုရင်းကို နားလည်သဖြင့် ငြင်းပယ်ခြင်း မပြုခဲ့ပေ။ သူကိုယ်တိုင်လည်း ဝမ်လေ့၏ ကင်းထောက်ရန် အဆိုပြုချက်ကို သဘောတူထားပြီး ဖြစ်သည်။ ထို့နောက် ခေါင်းဆောင်လီက ခေါင်းညိတ်ပြလိုက်ပြီး သူ့နောက်ရှိ အဖွဲ့သားများအား ချက်ချင်း အမိန့်ပေးလိုက်သည်။

"သိမ်းငှက်... မင်းရဲ့ အဖိုးတန်ရတနာလေးကို ရှေ့ကနေ ကင်းထောက်ခိုင်းလိုက်တော့ သတိထားဦးနော် အရမ်းနိမ့်နိမ့် မပျံစေနဲ့"

"ဟုတ်ကဲ့ ခေါင်းဆောင်"

ခေါင်းဆောင်လီ၏နောက်ရှိ လူလေးဦးအနက်မှ ကြမ်းတမ်းသော ရုပ်ရည်ရှိသည့် လူလတ်ပိုင်းအမျိုးသားတစ်ဦးသည် အမိန့်ကို ကြားသည်နှင့် ချက်ချင်း ရှေ့သို့ တိုးထွက်လာသည်။ သူသည် ပိန်ပိန်ပါးပါး ကိုယ်လုံးကိုယ်ပေါက်ရှိပြီး ကျောတွင် ဧရာမ သတ္တုစပ်လေးကြီးတစ်လက်ကို လွယ်ထားကာ ခါးတွင်လည်း မြှားတောင့်ကို ချိတ်ဆွဲထားသည်။

သူသည် အဖွဲ့ခေါင်းဆောင် သုံးဦးကို ရိုသေစွာ ခေါင်းညိတ်ပြလိုက်သည်။

ထို့နောက် သိမ်းငှက်သည် မျက်လုံးများကို မှိတ်လိုက်ပြီး သူ၏ အဖိုးတန်အိမ်မွေးတိရစ္ဆာန်နှင့် စိတ်ချင်း စတင်ဆက်သွယ်လေတော့သည်။

ရွှီးးးးးးးး

အားလုံး၏ ဦးခေါင်းထက်ဆီမှ နားစည်ကွဲမတတ် စူးရှသော အော်ဟစ်သံတစ်သံ ထွက်ပေါ်လာသည်။

ကောင်းကင်ယံ၌ အတောင်ပံဖြန့်လိုက်လျှင် ပေ ၃၀ နီးပါး ကျယ်ဝန်းပြီး စူးရှထက်မြက်သော မျက်ဝန်းများရှိသည့် ဧရာမ အနက်ရောင် သိမ်းငှက်ကြီးသည် အမိန့်ကို ရရှိသည်နှင့် တပြိုင်နက် အတောင်ပံများကို အားမာန်ပါပါ ခတ်ထုတ်လိုက်သည်။ ပြင်းထန်သော လေပွေလှိုင်းများကို ဖြစ်ပေါ်စေလျက် ထိုငှက်ကြီးသည် ကျန်းနန်မြို့ပြခရိုင်ဆီသို့ ဦးတည်ကာ ထိုးဆင်း၍ ပျံသန်းသွားတော့သည်။

အားလုံးက မော့ကြည့်ရင်း သိမ်းငှက်ကြီး မြို့အတွင်းသို့ ပျံသန်းဝင်ရောက်သွားသည်ကို စောင့်ကြည့်နေကြသည်။

“ခေါင်းဆောင်လီ... အမှန်အတိုင်း ပြောရရင် ကျွန်တော် ခင်ဗျားကို တကယ်အားကျတယ်ဗျာ။ အခြေစိုက်စခန်းက ဒီလောက်အသုံးဝင်တဲ့ ကင်းထောက်ဆင့်ကဲပြောင်းလဲသူမျိုးကို ခင်ဗျားအဖွဲ့ထဲ ဘယ်လိုလုပ် ထည့်ပေးလိုက်တာလဲ။ ကျွန်တော့်အဖွဲ့ထဲမှာလည်း ဒီလိုလူမျိုး တစ်ယောက်လောက် ရှိရင် သိပ်ကောင်းမှာပဲ”

အနက်ရောင် သိမ်းငှက်ကြီးနှင့် အာရုံချင်း ချိတ်ဆက်နေသော သိမ်းငှက်ကို တစ်ချက်ကြည့်ရင်း ခေါင်းဆောင်ကျန်းက သူ၏ဦးခေါင်းကို ပွတ်သပ်ကာ ခေါင်းဆောင်လီအား မနာလိုဖြစ်ဖွယ်ရာ စနောက်လိုက်သည်။

သိမ်းငှက်၏ ကင်းထောက်နိုင်စွမ်းမှာ အမှန်တကယ်ပင် အလွန်အသုံးဝင်လှသည်။ ဆင့်ကဲပြောင်းလဲသူကိုယ်တိုင် အန္တရာယ်ကြားထဲ တိုးဝင်စရာမလိုဘဲ အိမ်မွေးတိရစ္ဆာန်ဖြင့်သာ ကင်းထောက်နိုင်ခြင်းမှာ အလွန်ဘေးကင်းပြီး လျှို့ဝှက်ချက်ကိုလည်း ထိန်းသိမ်းနိုင်စွမ်းရှိသည်။

အခြေစိုက်စခန်း၏ မစ်ရှင်တိုင်းတွင် အဖွဲ့၏ ကင်းထောက်သမားမှာ အန္တရာယ်အရှိဆုံး အခန်းကဏ္ဍမှ ပါဝင်ရစမြဲ ဖြစ်သည်။ မသိရှိရသေးသော အန္တရာယ်ဇုန်များကို အမြဲဦးဆောင်စူးစမ်းရသူ ဖြစ်သဖြင့် ရန်သူနှင့် ထိပ်တိုက်တိုးပါက ဆုတ်ခွာရန် လမ်းစမရှိတော့ဘဲ တိုက်ရိုက်အသက်ပေးလှူရလေ့ရှိသည်။ ထို့ကြောင့်ပင် ခေါင်းဆောင်ကျန်း၏ အဖွဲ့တွင် ယခုအချိန်အထိ ကင်းထောက်ဆင့်ကဲပြောင်းလဲသူ နှစ်ဦးပင် အသက်ပေးခဲ့ရပြီး ဖြစ်သည်။ ကံကောင်းထောက်မစွာဖြင့် အခြေစိုက်စခန်းက ထိုနေရာများအတွက် လူသစ်များကို အချိန်မီ ဖြည့်ဆည်းပေးခဲ့သည်။

“ဒါကတော့ ဘာမှလုပ်လို့မရဘူးလေဗျာ သိမ်းငှက်ကို အခြေစိုက်စခန်းကပဲ တာဝန်ပေးလိုက်တာ ကျွန်တော်ကတော့ ဘာမှဝင်လုပ်ပေးတာ မရှိပါဘူး”

ခေါင်းဆောင်လီက ပြုံး၍ ပြန်ပြောလိုက်သည်။ သိမ်းငှက်ကို ကင်းထောက်အဖြစ် ရရှိခဲ့သည့်အချိန်မှစ၍ သူတို့အဖွဲ့၏ မစ်ရှင်များသည် ပိုမိုဘေးကင်းလာခဲ့သည်။ ရန်သူကို သတိမမူမိစေဘဲ အခြေအနေအရပ်ရပ်ကို အမြဲတမ်း စေ့စေ့စပ်စပ် စုံစမ်းနိုင်ခဲ့ကြသည်။

ထိုနှစ်ဦး စကားစမြည် ပြောဆိုနေကြစဉ် လူအုပ်ကြား၌ ဝမ်လေ့သည် မလှမ်းမကမ်းရှိ ကျန်းနန်မြို့ပြခရိုင်ကို စိုက်ကြည့်နေမိပြီး သူ၏မျက်ဝန်းများထဲတွင် ရက်စက်မှုအရိပ်အယောင်များ လက်ခနဲ ပေါ်လာသည်။ ဤနေရာသို့ နောက်တစ်ကြိမ် ပြန်ရောက်လာသည့်အခါ သူ၏ အသင်းဖော်နှစ်ဦး၏ ကြောက်မက်ဖွယ်ကောင်းသော သေဆုံးမှုပုံရိပ်များက သူ၏စိတ်ထဲတွင် တရစပ် ပြန်လည်ပေါ်ပေါက်လာသည်။

ရန်သူသည် သူတို့အား သတ်ဖြတ်ရုံသာမက အလောင်းများကိုပါ လူမြင်ကွင်းတွင် ချိတ်ဆွဲ၍ အရှက်ခွဲခဲ့ကြသည်။ ဤတစ်ကြိမ်တွင်မူ ဤမြို့ပြနယ်မြေ၏ လျှို့ဝှက်ချက်များကို သူ သေချာပေါက် ဖော်ထုတ်ပြရမည်။